ඉත්ථිබන්ධන සුත්තං.
[සාවත්ථිනිදානං]
අට්ඨහි භික්ඛවෙ ආකාරෙහි පුරිසො ඉත්ථිං බන්ධති, කතමෙහි අට්ඨහි:
රූපෙන භික්ඛවෙ පුරිසො ඉත්ථිං බන්ධති, හසිතෙන භික්ඛවෙ පුරිසො ඉත්ථිං බන්ධති. භණිතෙන භික්ඛවෙ පුරිසො ඉත්ථිං බන්ධති. ගීතෙන භික්ඛවෙ පුරිසො ඉත්ථිං බන්ධති. රුණ්ණෙන{1} භික්ඛවෙ පුරිසො ඉත්ථිං බන්ධති. ආකප්පෙන භික්ඛවෙ පුරිසො ඉත්ථිං බන්ධති. වනභඞ්ගෙන භික්ඛවෙ, පුරිසො ඉත්ථිං බන්ධති. ඵස්සෙන භික්ඛවෙ පුරිසො ඉත්ථිං බන්ධති. ඉමෙහි ඛො භික්ඛවෙ අට්ඨහි ආකාරෙහි පුරිසො ඉත්ථිං බන්ධති, තෙ භික්ඛවෙ සත්තා සුබද්ධා යෙ{2} ඵස්සෙන බද්ධාති.{3}{*}
8. 1. 2. 9.
පහාරාද සුත්තං
එකං සමයං භගවා වෙරඤ්ජායං විහරති නළෙරු පුචිමන්ද මූලෙ. අථ ඛො පහාරාදො අසුරින්දො යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං අට්ඨාසි. එකමන්තං ඨිතං ඛො පහාරාදං අසුරින්දං භගවා එතදවොච: අපි පන පහාරාද, අසුරා මහාසමුද්දෙ අභිරමන්තීති.
අභිරමන්ති භන්තෙ, අසුරා මහාසමුද්දෙති:
කති පන පහාරාද, මහාසමුද්දෙ අච්ඡරියා අබ්භුතා ධම්මා යෙ දිස්වා දිස්වා අසුරා මහාසමුද්දෙ අභිරමන්තීති.
අට්ඨ භන්තෙ, මහාසමුද්දෙ අච්ඡරියා අබ්භුතා ධම්මා යෙ දිස්වා දිස්වා අසුරා මහාසමුද්දෙ අභිරමන්ති කතමෙ අට්ඨ?:
1. මහාසමුද්දො භන්තෙ, අනුපුබ්බනින්නො අනුපුබ්බපොණො අනුපුබ්බපබ්භාරො න ආයතකෙනෙව පපාතො. යම්පි භන්තෙ, මහාසමුද්දො අනුපුබ්බනින්නො අනුපුබ්බපොණො අනුපුබ්බපබ්භාරො න ආයතකෙනෙව පපාතො, අයං භන්තෙ, මහාසමුද්දෙ පඨමො අච්ඡරියො අබ්භුතො ධම්මො යං දිස්වා දිස්වා අසුරා මහාසමුද්දෙ අභිරමන්ති.
2. පුන චපරං භන්තෙ, මහාසමුද්දො ඨිතධම්මො වෙලං නාතිවත්තති. යම්පි භන්තෙ, මහා සමුද්දො ඨිතධම්මො වෙලං නාතිවත්තති, අයං භන්තෙ, මහාසමුද්දෙ දුතියො අච්ඡරියො අබ්භුතො ධම්මො යං දිස්වා දිස්වා අසුරා මහාසමුද්දෙ අභිරමන්ති.
3. පුන චපරං භන්තෙ, මහාසමුද්දො න මතෙන කුණපෙන සංවසති, යං හොති මහාසමුද්දෙ මතං කුණපං තං ඛිප්පංයෙව{1} තීරං වාහෙති, ථලං උස්සාදෙති{2} යම්පි භන්තෙ, මහාසමුද්දො න මතෙන කුණපෙන සංවසති. යං හොති මහාසමුද්දෙ මතං කුණපං තං ඛිප්පං යෙව තීරං වාහෙති, ථලං උස්සාදෙති2. අයං භන්තෙ, මහාසමුද්දෙ තතියො අච්ඡරියො අබ්භුතො ධම්මො යං දිස්වා දිස්වා අසුරා මහාසමුද්දෙ අභිරමන්ති.
4. පුන චපරං භන්තෙ, යා කාචි මහානදියො, සෙය්යථීදං: ගඞ්ගා, යමුනා, අචිරවතී, සරභූ, මහී, තා මහා සමුද්දං පත්වා ජහන්ති පුරිමානි නාමගොත්තානි, මහාසමුද්දොත්වෙව සඞ්ඛං ගච්ඡන්ති. යම්පි භන්තෙ, යා කාචි මහානදියො සෙය්යථීදං ගඞ්ගා යමුනා අචිරවතී සරභූ මහී තා මහාසමුද්දං පත්වා ජහන්ති පුරිමානි නාමගොත්තානි, මහාසමුද්දොත්වෙව සඞ්ඛං ගච්ඡන්ති. අයං භන්තෙ මහාසමුද්දෙ චතුත්ථො අච්ඡරියො අබ්භුතො ධම්මො, යං දිස්වා දිස්වා අසුරා මහාසමුද්දෙ අභිරමන්ති.
5. පුන චපරං භන්තෙ, යා ච{1} ලොකෙ සවන්තියො මහාසමුද්දං අප්පෙන්ති, යා ච අන්තලික්ඛා ධාරා පපතන්ති, න තෙන මහාසමුද්දස්ස ඌනත්තං වා පූරත්තං වා පඤ්ඤායති, යම්පි භන්තෙ, යා ච ලොකෙ සවන්තියො මහාසමුද්දං අප්පෙන්ති, යා ච අන්තලික්ඛා ධාරා පපතන්ති, න තෙන මහාසමුද්දස්ස ඌනත්තං වා පූරත්තං වා පඤ්ඤායති, අයං භන්තෙ, මහාසමුද්දෙ පඤ්චමො අච්ඡරියො අබ්භුතො ධම්මො යං දිස්වා දිස්වා අසුරා මහා සමුද්දෙ අභිරමන්ති.
6. පුන චපරං භන්තෙ, මහාසමුද්දො එකරසො ලොණරසො, යම්පි භන්තෙ, මහාසමුද්දො එකරසො ලොණරසො, අයං භන්තෙ, මහා සමුද්දෙ ඡට්ඨො අච්ඡරියො අබ්භුතො ධම්මො යං දිස්වා දිස්වා අසුරා මහාසමුද්දෙ අභිරමන්ති.
7. පුන චපරං භන්තෙ, මහාසමුද්දො බහුරතනො අනෙකරතනො{2}. තත්රිමානි රතනානි, සෙය්යථීදං: මුත්තා, මණි, වෙළුරියො, සඞ්ඛො, සිලා, පවාළං. රජතං, ජාතරූපං, ලොහිතඞ්කො, මසාරගල්ලං, යම්පි භන්තෙ, මහා සමුද්දො බහුරතනො අනෙකරතනො. තත්රිමානි රතනානි, සෙය්යථීදං මුත්තා, මණි, වෙළුරියො, සඞ්ඛො, සිලා, පවාළං, රජතං, ජාතරූපං, ලොහිතඞ්කො, මසාරගල්ලං, අයං භන්තෙ, මහාසමුද්දෙ සත්තමො අච්ඡරියො අබ්භුතො ධම්මො යං දිස්වා දිස්වා අසුරා මහාසමුද්දෙ අභිරමන්ති.
8. පුන චපරං භන්තෙ, මහාසමුද්දො මහතං භූතානං ආවාසො. තත්රිමෙ භූතා: තිමි තිමිඞ්ගලා තිමිරපිඞ්ගලා{3}, අසුරා, නාගා, ගන්ධබ්බා. සන්ති මහා සමුද්දෙ යොජනසතිකාපි අත්තභාවා, ද්වියොජනසතිකාපි අත්තභාවා, තියොජනසතිකාපි අත්තභාවා, චතුයොජනසතිකාපි අත්තභාවා, පඤ්චයොජනසතිකාපි අත්තභාවා.
යම්පි භන්තෙ, මහාසමුද්දො මහතං භූතානං ආවාසො. තතිරමෙ භූතා: තිමි, තිමිඞ්ගලා තිමිරපිඞ්ගලා, අසුරා, නාගා, ගන්ධබ්බා. සන්ති මහා සමුද්දෙ යොජනසතිකාපි අත්තභාවා, ද්වියොජන -පෙ- තියොජන -පෙ- චතුයොජන -පෙ- පඤ්චයොජන සතිකාපි අත්තභාවා, අයං භන්තෙ, මහා සමුද්දෙ අට්ඨමො අච්ඡරියො අබ්භුතො ධම්මො යං දිස්වා දිස්වා අසුරා මහාසමුද්දෙ අභිරමන්ති.
ඉමෙ ඛො භන්තෙ, මහාසමුද්දෙ අට්ඨ අච්ඡරියා අබ්භුතා ධම්මා යෙ දිස්වා දිස්වා අසුරා මහාසමුද්දෙ අභිරමන්තීති.
අපි පන භන්තෙ, භික්ඛු ඉමස්මිං ධම්මවිනයෙ අභිරමන්තීති?
අභිරමන්ති පහාරාද, භික්ඛු ඉමස්මිං ධම්මවිනයෙති.
කති පන භන්තෙ, ඉමස්මිං ධම්මවිනයෙ අච්ඡරියා අබ්භුතා ධම්මා යෙ දිස්වා දිස්වා භික්ඛු ඉමස්මිං ධම්මවිනයෙ අභිරමන්තීති, ?
අට්ඨ පහාරාද ඉමස්මිං ධම්මවිනයෙ අච්ඡරියා අබ්භුතා ධම්මා යෙ දිස්වා දිස්වා භික්ඛු ඉමස්මිං ධම්මවිනයෙ අභිරමන්ති. කතමෙ අට්ඨ:
1. සෙය්යථාපි පහාරාද මහාසමුද්දො අනුපුබ්බනින්නො අනුපුබ්බපොණො අනුපුබ්බපබ්භාරො න ආයත කෙනෙව පපාතො. එවමෙව ඛො පහාරාද ඉමස්මිං ධම්මවිනයෙ අනුපුබ්බසික්ඛා අනුපුබ්බකිරියා අනුපුබ්බපටිපදා.
න ආයතකෙනෙ ව අඤ්ඤා පටිවෙධො. යම්පි පහාරාද, ඉමස්මිං ධම්මවිනයෙ අනුපුබ්බසික්ඛා අනුපුබ්බකිරියා අනුපුබ්බපටිපදා න ආයතකෙනෙව අඤ්ඤාපටිවෙධො. අයං පහාරාද, ඉමස්මිං ධම්මවිනයෙ පඨමො අච්ඡරියො අබ්භුතො ධම්මො යං දිස්වා දිස්වා භික්ඛු ඉමස්මිං ධම්මවිනයෙ අභිරමන්ති.
2. සෙය්යථාපි පහාරාද, මහාසමුද්දො ඨිතධම්මො වෙලං නාතිවත්තති, එවමෙව ඛො පහාරාද, යං මයා සාවකානං සික්ඛාපදං පඤ්ඤත්තං තං මම සාවකා ජීවිතහෙතුපි නාතික්කමන්ති. යම්පි පහාරාද, මයා සාවකානං සික්ඛාපදං පඤ්ඤත්තං තං මම සාවකා ජීවිතහෙතුපි නාතික්කමන්ති. අයං පහාරාද, ඉමස්මිං ධම්මවිනයෙ දුතියො අච්ඡරියො අබ්භුතො ධම්මො යං දිස්වා දිස්වා භික්ඛු ඉමස්මිං ධම්මවිනයෙ අභිරමන්ති.
3. සෙය්යථාපි පහාරාද මහාසමුද්දො න මතෙන කුණපෙන සංවසති. යං හොති මහාසමුද්දෙ මතං කුණපං තං ඛිප්පඤ්ඤෙව{1} තීරං වාහෙති, ථලං උස්සාදෙති.{2} එවමෙව ඛො පහාරාද, යො සො පුග්ගලො දුස්සීලො පාපධම්මො අසුචිසඞ්කස්සරසමාචාරො පටිච්ඡන්නකම්මන්තො අස්සමණො සමණපටිඤ්ඤො අබ්රහ්මචාරී බ්රහ්මචාරීපටිඤ්ඤො. අන්තොපූති අවස්සුතො කසම්බුජාතො. න තෙන සඞ්ඝො සංවසති. අථ ඛො නං ඛිප්පඤ්ඤෙව{3} සන්නිපතිත්වා උක්ඛිපති. කිඤ්චාපි සො හොති මජ්ඣෙ භික්ඛුසඞ්ඝස්ස නිසින්නො.{4} අථ ඛො සො ආරකාව සඞ්ඝම්හා සඞ්ඝො ච තෙන. යම්පි පහාරාද යො සො පුග්ගලො දුස්සීලො පාපධම්මො අසුචි සඞ්කස්සරසමාචාරො පටිච්ඡන්නකම්මන්තො අස්සමණො සමණපටිඤ්ඤො අබ්රහ්මචාරී බ්රහ්මචාරීපටිඤ්ඤො අන්තොපූති අවස්සුතො කසම්බුජාතො, න තෙන සඞ්ඝො සංවසති. අථ ඛො නං ඛිප්පඤ්ඤෙව සන්නිපතිත්වා උක්ඛිපති. කිඤ්චාපි සො හොති මජ්ඣෙ භික්ඛුසඞ්ඝස්ස නිසින්නො{4} අථ ඛො සො ආරකාව සඞ්ඝම්හා සඞ්ඝො ච තෙන. අයං පහාරාද ඉමස්මිං ධම්මවිනයෙ තතියො අච්ඡරියො අබ්භුතො ධම්මො යං දිස්වා දිස්වා භික්ඛු ඉමස්මිං ධම්මවිනයෙ අභිරමන්ති.
4. සෙය්යථාපි පහාරාද, යා කාචි මහා නදියො, සෙය්යථීදං: ගඞ්ගා යමුනා අචිරවතී සරභූ මහී, තා මහාසමුද්දං පත්වා ජහන්ති පුරිමානි නාමගොත්තානි, මහාසමුද්දොත්වෙව සඞ්ඛං ගච්ඡන්ති එවමෙව ඛො පහාරාද, චත්තාරොමෙ වණ්ණා, ඛත්තියා බ්රාහ්මණා වෙස්සා සුද්දා, තෙ තථාගතප්පවෙදිතෙ ධම්මවිනයෙ අගාරස්මා අනගාරියං පබ්බජිත්වා ජහන්ති පුරිමානි නාමගොත්තානි, ‘සමණා සක්යපුත්තියා’ ත්වෙව සඞ්ඛං ගච්ඡන්ති, යම්පි පහාරාද චත්තාරොමෙ වණ්ණා ඛත්තියා බ්රාහ්මණා වෙස්සා සුද්දා. තෙ තථාගතප්පවෙදිතෙ ධම්මවිනයෙ අගාරස්මා අනගාරියං පබ්බජිත්වා ජහන්ති පුරිමානි නාමගොත්තානි, ‘සමණා සක්යපුත්තියා’ ත්වෙව සඞ්ඛං ගච්ඡන්ති. අයං පහාරාද, ඉමස්මිං ධම්මවිනයෙ චතුත්ථො අච්ඡරියො අබ්භුතො ධම්මො යං දිස්වා දිස්වා භික්ඛු ඉමස්මිං ධම්මවිනයෙ අභිරමන්ති.
5. සෙය්යථාපි පහාරාද, යා ච ලොකෙ සවන්තියො මහාසමුද්දං අප්පෙන්ති යා ච අන්තලික්ඛා ධාරා පපතන්ති. න තෙන මහාසමුද්දස්ස ඌනත්තං වා පූරත්තං වා පඤ්ඤායති එවමෙව ඛො පහාරාද, බහූ චෙපි භික්ඛු අනුපාදිසෙසාය නිබ්බානධාතුයා පරිනිබ්බායන්ති. න තෙන නිබ්බානධාතුයා ඌනත්තං වා පූරත්තං වා පඤ්ඤායති. යම්පි පහාරාද, බහූ චෙපි භික්ඛු අනුපාදිසෙසාය නිබ්බානධාතුයා පරිනිබ්බායන්ති, න තෙන නිබ්බානධාතුයා ඌනත්තං වා පූරත්තං වා පඤ්ඤායති. අයං පහාරාද, ඉමස්මිං ධම්මවිනයෙ පඤ්චමො අච්ඡරියො අබ්භුතො ධම්මො යං දිස්වා දිස්වා භික්ඛු ඉමස්මිං ධම්මවිනයෙ අභිරමන්ති.
6. සෙය්යථාපි පහාරාද, මහාසමුද්දො එකරසො ලොණරසො, එවමෙව ඛො පහාරාද, අයං ධම්මවිනයො එකරසො විමුත්තිරසො, යම්පි පහාරාද, අයං ධම්මවිනයො එකරසො විමුත්තිරසො, අයං පහාරාද ඉමස්මිං ධම්මවිනයෙ ඡට්ඨො අච්ඡරියො අබ්භුතො ධම්මො, යං දිස්වා දිස්වා භික්ඛු ඉමස්මිං ධම්මවිනයෙ අභිරමන්ති.
7. සෙය්යථාපි පහාරාද, මහාසමුද්දො බහුරතනො අනෙකරතනො, තත්රිමානි රතනානි, සෙය්යථීදං, මුත්තා මණි වෙළුරියො සඞ්ඛො සිලා පවාළං රජතං ජාතරූපං ලොහිතඞ්කො මසාරගල්ලං. එවමෙව ඛො පහාරාද, අයං ධම්මවිනයො බහුරතනො අනෙකරතනො, තත්රිමානි රතනානි: සෙය්යථීදං, චත්තාරො සතිපට්ඨානා, චත්තාරො සම්මප්පධානා චත්තාරො ඉද්ධිපාදා පඤ්චින්ද්රියානි පඤ්ච බලානි සත්ත බොජ්ඣඞ්ගා අරියො අට්ඨඞ්ගිකො මග්ගො. යම්පි පහාරාද අයං ධම්මවිනයො බහුරතනො අනෙකරතනො, තත්රිමානි රතනානි: සෙය්යථීදං, චත්තාරො සතිපට්ඨානා, චත්තාරො සම්මප්පධානා චත්තාරො ඉද්ධිපාදා පඤ්චින්ද්රියානි පඤ්ච බලානි සත්ත බොජ්ඣඞ්ගා අරියො අට්ඨඞ්ගිකො මග්ගො. අයං පහාරාද, ඉමස්මිං ධම්මවිනයෙ සත්තමො අච්ඡරියො අබ්භුතො ධම්මො, යං දිස්වා දිස්වා භික්ඛු ඉමස්මිං ධම්මවිනයෙ අභිරමන්ති.
8. සෙය්යථාපි පහාරාද මහා සමුද්දො මහතං භූතානං ආවාසො, තත්රිමෙ භූතා: තිමි තිමිඞ්ගලා තිමිරපිඞ්ගලා අසුරා නාගා ගන්ධබ්බා, සන්ති මහා සමුද්දෙ යොජනසතිකාපි අත්තභාවා ද්වියොජනසතිකාපි අත්තභාවා, තියොජනසතිකාපි අත්තභාවා, චතුයොජනසතිකාපි අත්තභාවා, පඤ්චයොජනසතිකාපි අත්තභාවා.
එවමෙව ඛො පහාරාද, අයං ධම්මවිනයො මහතං භූතානං ආවාසො තත්රිමෙ භූතා: සොතාපන්නො, සොතාපත්ති ඵලසච්ඡිකිරියාය පටිපන්නො, සකදාගාමී, සකදාගාමි ඵලසච්ඡිකිරියාය පටිපන්නො, අනාගාමී, අනාගාමී ඵලසච්ඡිකිරියාය පටිපන්නො, අරහා, අරහත්තාය පටිපන්නො. යම්පි පහාරාද, අයං ධම්මවිනයෙ මහතං භූතානං ආවාසො, තත්රිමෙ භූතා, සොතාපන්නො, සොතාපත්ති ඵලසච්ඡිකිරියාය පටිපන්නො, සකදාගාමී, සකදාගාමිඵලසච්ඡිකිරියාය පටිපන්නො, අනාගාමී, අනාගාමී ඵලසච්ඡිකිරියාය පටිපන්නො, අරහා, අරහත්තාය පටිපන්නො, අයං පහාරාද ඉමස්මිං ධම්මවිනයෙ අට්ඨමො අච්ඡරියො අබ්භුතො ධම්මො යං දිස්වා දිස්වා භික්ඛු ඉමස්මිං ධම්මවිනයෙ අභිරමන්ති.
ඉමෙ ඛො පහාරාද, ඉමස්මිං ධම්මවිනයෙ අට්ඨ අච්ඡරියා අබ්භුතා ධම්මා යෙ දිස්වා දිස්වා භික්ඛු ඉමස්මිං ධම්මවිනයෙ අභිරමන්තීති.
8. 1. 2. 10.
උපොසථ සුත්තං
එකං සමයං භගවා සාවත්ථියං විහරති පුබ්බාරාමෙ මිගාරමාතුපාසාදෙ තෙන ඛො පන සමයෙන භගවා තදහුපොසථෙ භික්ඛුසඞ්ඝපරිවුතො නිසින්නො හොති. අථ ඛො ආයස්මා ආනන්දො අභික්කන්තාය රත්තියා නික්ඛන්තෙ පඨමෙ යාමෙ උට්ඨායාසනා එකංසං උත්තරාසඞ්ගං කරිත්වා යෙන භගවා තෙනඤ්ජලිං පණාමෙත්වා භගවන්තං එතදවොච:
අභික්කන්තා භන්තෙ රත්ති නික්ඛන්තො පඨමො යාමො, චිරනිසින්නො භික්ඛුසඞ්ඝො, උද්දිසතු භන්තෙ භගවා භික්ඛූනං පාතිමොක්ඛන්ති. එවං වුත්තෙ භගවා තුණ්හී අහොසි. දුතියම්පි ඛො ආයස්මා ආනන්දො අභික්කන්තාය රත්තියා නික්ඛන්තෙ මජ්ඣිමෙ යාමෙ උට්ඨායාසනා එකංසං උත්තරාසඞ්ගං කරිත්වා යෙන භගවා තෙනඤ්ජලිං පණාමෙත්වා භගවන්තං එතදවොච:
අභික්කන්තා භන්තෙ, රත්ති නික්ඛන්තො මජ්ඣිමො යාමො, චිරනිසින්නො භික්ඛුසඞ්ඝො, උද්දිසතු භන්තෙ, භගවා භික්ඛූනං ‘පාතිමොක්ඛන්ති, දුතියම්පි ඛො භගවා තුණ්හී අහොසි, තතියම්පි ඛො ආයස්මා ආනන්දො අභික්කන්තාය රත්තියා නික්ඛන්තෙ පච්ඡිමෙ යාමෙ උද්ධස්තෙ අරුණෙ නන්දිමුඛියා රත්තියා උට්ඨායාසනා එකංසං උත්තරාසඞ්ගං කරිත්වා යෙන භගවා තෙනඤ්ජලිං පණාමෙත්වා භගවන්තං එතදවොච: “අභික්කන්තා භන්තෙ, රත්ති, නික්ඛන්තො පච්ඡිමො යාමො උද්ධස්තං අරුණං නන්දිමුඛී රත්ති, චිරනිසින්නො භික්ඛුසඞ්ඝො, උද්දිසතු භන්තෙ, භගවා භික්ඛූනං පාතිමොක්ඛන්ති.
අපරිසුද්ධා ආනන්ද පරිසාති. අථ ඛො ආයස්මතො මොග්ගල්ලානස්ස එතදහොසි: කං නු ඛො භගවා පුග්ගලං සන්ධාය එවමාහ: ‘අපරිසුද්ධා ආනන්ද පරිසා’ ති. අථ ඛො ආයස්මා මහාමොග්ගල්ලානො සබ්බාවන්තං භික්ඛුසඞ්ඝං චෙතසා චෙතො පරිච්ච මනසාකාසි.
අද්දසා ඛො ආයස්මා මහාමොග්ගල්ලානො තං පුග්ගලං දුස්සීලං පාපධම්මං අසුචිං සඞ්කස්සරසමාචාරං පටිච්ඡන්නකම්මන්තං අස්සමණං සමණපටිඤ්ඤං අබ්රහ්මචාරිං බ්රහ්මචාරීපටිඤ්ඤං අන්තොපූතිං අවස්සුතං කසම්බුජාතං මජ්ඣෙ භික්ඛුසඞ්ඝස්ස නිසින්නං, දිස්වාන උට්ඨායාසනා යෙන සො පුග්ගලො තෙනුපසඞ්කමි. උපසඞ්කමිත්වා තං පුග්ගලං එතදවොච: උට්ඨෙහි ආවුසො{1} දිට්ඨොසි භගවතා, නත්ථි තෙ භික්ඛූහි සද්ධිං සංවාසොති.
එවං වුත්තෙ සො පුග්ගලො තුණ්හී අහොසි. දුතියම්පි ඛො ආයස්මා මහාමොග්ගල්ලානො තං පුග්ගලං එතදවොච: උට්ඨෙහි ආවුසො,{1} දිට්ඨොසි භගවතා, නත්ථි තෙ භික්ඛූහි සද්ධිං සංවාසොති. දුතියම්පි ඛො සො පුග්ගලො තුණ්හී අහොසි. තතියම්පි ඛො ආයස්මා මහාමොග්ගල්ලානො තං පුග්ගලං එතදවොච: උට්ඨෙහි ආවුසො, දිට්ඨොසි භගවතා, නත්ථි තෙ භික්ඛූහි සද්ධිං සංවාසොති, තතියම්පි ඛො සො පුග්ගලො තුණ්හී අහොසි.
අථ ඛො ආයස්මා මහා මොග්ගල්ලානො තං පුග්ගලං බාහායං ගහෙත්වා බහිද්වාරකොට්ඨකා නික්ඛාමෙත්වා සූචිඝටිකං දත්වා යෙන භගවා තෙනුපසඞ්කමි උපසඞ්කමිත්වා භගවන්තං එතදවොච:
නික්ඛාමිතො සො භන්තෙ පුග්ගලො මයා, පරිසුද්ධා පරිසා, උද්දිසතු භන්තෙ භගවා භික්ඛූනං පාතිමොක්ඛන්ති.
අච්ඡරියං මොග්ගල්ලාන, අබ්භුතං මොග්ගල්ලාන, යාව බාහා ගහණාපි නාම සො මොඝපුරිසො ආගමෙස්සතීති{1} අථ ඛො භගවා භික්ඛු ආමන්තෙසි, තුම්හෙවදානි භික්ඛවෙ, උපොසථං,{2} කරෙය්යාථ. පාතිමොක්ඛං උද්දිසෙය්යාථ. නදානාහං භික්ඛවෙ, අජ්ජතග්ගෙ උපොසථං කරිස්සාමි. පාතිමොක්ඛං උද්දිසිස්සාමි. අට්ඨානමෙතං භික්ඛවෙ, අනවකාසො යං තථාගතො අපරිසුද්ධාය පරිසාය{3} උපොසථං කරෙය්ය පාතිමොක්ඛං උද්දිසෙය්ය.
අට්ඨිමෙ භික්ඛවෙ, මහාසමුද්දෙ අච්ඡරියා අබ්භුතා ධම්මා යෙ දිස්වා දිස්වා අසුරා මහාසමුද්දෙ අභිරමන්ති. කතමෙ අට්ඨ:
මහාසමුද්දො භික්ඛවෙ, අනුපුබ්බනින්නො අනුපුබ්බපොණො අනුපුබ්බපබ්භාරො න ආයතකෙනෙව පපාතො. යම්පි භික්ඛවෙ, මහාසමුද්දො අනුපුබ්බනින්නො අනුපුබ්බපොණො අනුපුබ්බපබ්භාරො න ආයතකෙනෙව පපාතො, අයං භික්ඛවෙ, මහාසමුද්දෙ පඨමො අච්ඡරියො අබ්භුතො ධම්මො යං දිස්වා දිස්වා අසුරා මහාසමුද්දෙ අභිරමන්ති -පෙ-
පුන චපරං භික්ඛවෙ, මහාසමුද්දො මහතං භූතානං ආවාසො. තත්රිමෙ භූතා: තිමි තිමිඞ්ගලා තිමිරපිඞ්ගලා{4} අසුරා, නාගා, ගන්ධබ්බා, සන්ති මහාසමුද්දෙ යොජනසතිකාපි, අත්තභාවා -පෙ- පඤ්චයොජනසතිකාපි අත්තභාවා, යම්පි භික්ඛවෙ, මහාසමුද්දො මහතං භූතානං ආවාසො. තත්රිමෙ භූතා: ‘තිමි තිමිඞ්ගලා තිමිරපිඞ්ගලා, අසුරා, නාගා, ගන්ධබ්බා සන්ති{5} මහා සමුද්දෙ යොජනසතිකාපි අත්තභාවා -පෙ- පඤ්චයොජනසතිකාපි අත්තභාවා, අයං භික්ඛවෙ, මහා සමුද්දෙ අට්ඨමො අච්ඡරියො අබ්භුතො ධම්මො යං දිස්වා දිස්වා අසුරා මහාසමුද්දෙ අභිරමන්ති.
ඉමෙ ඛො භික්ඛවෙ, මහාසමුද්දෙ අට්ඨ අච්ඡරියා අබ්භුතා ධම්මා යෙ දිස්වා දිස්වා{6} අසුරා මහාසමුද්දෙ අභිරමන්ති.
එවමෙව ඛො භික්ඛවෙ, අට්ඨ ඉමස්මිං ධම්මවිනයෙ අච්ඡරියා අබ්භුතා ධම්මා යෙ දිස්වා දිස්වා භික්ඛු ඉමස්මිං ධම්මවිනයෙ අභිරමන්ති.
කතමෙ අට්ඨ:
සෙය්යථාපි භික්ඛවෙ, මහාසමුද්දො අනුපුබ්බනින්නො අනුපුබ්බපොණො අනුපුබ්බපබ්භාරො න ආයතකෙනෙව පපාතො. එවමෙව ඛො භික්ඛවෙ, ඉමස්මිං ධම්මවිනයෙ අනුපුබ්බසික්ඛා අනුපුබ්බකිරියා අනුපුබ්බපටිපදා න ආයතකෙනෙව අඤ්ඤාපටිවෙධො. යම්පි භික්ඛවෙ, ඉමස්මිං ධම්මවිනයෙ අනුපුබ්බසික්ඛා අනුපුබ්බකිරියා අනුපුබ්බපටිපදා න ආයතකෙනෙව අඤ්ඤාපටිවෙධො. අයං භික්ඛවෙ, ඉමස්මිං ධම්මවිනයෙ පඨමො අච්ඡරියො අබ්භුතො ධම්මො යං දිස්වා දිස්වා භික්ඛු ඉමස්මිං ධම්මවිනයෙ අභිරමන්ති -පෙ-
සෙය්යථාපි භික්ඛවෙ, මහා සමුද්දො මහතං භූතානං ආවාසො තත්රිමෙ භූතා: තිමි තිමිඞ්ගලා තිමිරපිඞ්ගලා{1} අසුරා නාගා ගන්ධබ්බා, සන්ති{2} මහා සමුද්දෙ යොජනසතිකාපි අත්තභාවා -පෙ- පඤ්චයොජනසතිකාපි අත්තභාවා. එවමෙව ඛො භික්ඛවෙ, අයං ධම්මවිනයො මහතං භූතානං ආවාසො තත්රිමෙ භූතා: සොතාපන්නො, සොතාපත්ති ඵලසච්ඡිකිරියාය පටිපන්නො -පෙ- අරහා, අරහත්තාය පටිපන්නො. යම්පි භික්ඛවෙ, අයං ධම්මවිනයො මහතං භූතානං ආවාසො, තත්රිමෙ භූතා සොතාපන්නො, සොතාපත්තිඵලසච්ඡිකිරියාය පටිපන්නො -පෙ- අරහා, අරහත්තාය පටිපන්නො. අයං භික්ඛවෙ ඉමස්මිං ධම්මවිනයෙ අට්ඨමො අච්ඡරියො අබ්භුතො ධම්මො යං දිස්වා දිස්වා භික්ඛු ඉමස්මිං ධම්මවිනයෙ අභිරමන්ති. ඉමෙ ඛො භික්ඛවෙ, ඉමස්මිං ධම්මවිනයෙ අට්ඨ අච්ඡරියා අබ්භුතා ධම්මා යෙ දිස්වා දිස්වා භික්ඛු ඉමස්මිං ධම්මවිනයෙ අභිරමන්තීති.
මහාවග්ගො දුතියො.
තත්රුද්දානං:
වෙරඤ්ජොසීහො ආජඤ්ඤා ඛලුඞ්කෙන මලානි ච දූතෙය්යං ද්වෙ ච බන්ධනා පහාරාදො උපොසථොති,
3. ගහපතිවග්ගො
8. 1. 3. 1.
වෙසාලිකඋග්ග සුත්තං
එකං සමයං භගවා වෙසාලියං විහරති මහාවනෙ කූටාගාරසාලායං තත්ර ඛො භගවා භික්ඛු ආමන්තෙසි භික්ඛවොති. භදන්තෙති තෙ භික්ඛු භගවතො පච්චස්සොසුං. භගවා එතදවොච:
අට්ඨහි භික්ඛවෙ, අච්ඡරියෙහි අබ්භුතෙහි ධම්මෙහි සමන්නාගතං උග්ගං ගහපතිං වෙසාලිකං ධාරෙථාති. ඉදමවොච භගවා, ඉදං වත්වාන සුගතො උට්ඨායාසනා විහාරං පාවිසි. අථ ඛො අඤ්ඤතරො භික්ඛු පුබ්බන්හසමයං නිවාසෙත්වා පත්තචීවරමාදාය යෙන උග්ගස්ස ගහපතිනො වෙසාලිකස්ස නිවෙසනං තෙනුපසඞ්කමි.
උපසඞ්කමිත්වා පඤ්ඤත්තෙ ආසනෙ නිසීදි. අථ ඛො උග්ගො ගහපති වෙසාලිකො යෙන සො භික්ඛු තෙනුපසඞ්කමි. උපසඞ්කමිත්වා තං භික්ඛුං අභිවාදෙත්වා එකමන්තං නිසීදි. එකමන්තං නිසින්නං ඛො උග්ගං ගහපතිං වෙසාලිකං සො භික්ඛු එතදවොච:
අට්ඨහි ඛො ත්වං ගහපති, අච්ඡරියෙහි අබ්භුතෙහි ධම්මෙහි සමන්නාගතො භගවතා ව්යාකතො. කතමෙ තෙ ගහපති, අට්ඨ අච්ඡරියා අබ්භුතා ධම්මා යෙහි ත්වං සමන්නාගතො භගවතා ව්යාකතොති.
න ඛො අහං භන්තෙ, ජානාමි කතමෙහි අට්ඨහි අබ්භුතෙහි ධම්මෙහි සමන්නාගතො භගවතා ව්යාකතො. අපි ච භන්තෙ, යෙ මෙ අට්ඨ අච්ඡරියා අබ්භුතා ධම්මා සංවිජ්ජන්ති තෙ සුණාහි, සාධුකං මනසිකරොහි, භාසිස්සාමීති.
එවං ගහපතීති ඛො සො භික්ඛු උග්ගස්ස ගහපතිනො වෙසාලිකස්ස පච්චස්සොසි. උග්ගො ගහපති වෙසාලිකො එතදවොච:
1. යදාහං භන්තෙ, භගවන්තං පඨමං දූරතොව අද්දසං සහදස්සනෙනෙව මෙ භන්තෙ භගවතො චිත්තං පසීදි. අයං ඛො මෙ භන්තෙ පඨමො අච්ඡරියො අබ්භුතො ධම්මො සංවිජ්ජති.
2. සො ඛො අහං භන්තෙ, පසන්නචිත්තො භගවන්තං පයිරුපාසිං. තස්ස මෙ භගවා ආනුපුබ්බීකථං කථෙසි, සෙය්යථීදං:දානකථං සීලකථං සග්ගකථං කාමානං ආදීනවං ඔකාරං සඞ්කිලෙසං නෙක්ඛම්මෙ ච ආනිසංසං පකාසෙසි. යදා මං භගවා අඤ්ඤාසි කල්ලචිත්තං මුදුචිත්තං විනීවරණචිත්තං උදග්ගචිත්තං පසන්නචිත්තං, අථ යා බුද්ධානං සාමුක්කංසිකා ධම්මදෙසනා, තං පකාසෙසි, දුක්ඛං සමුදයං නිරොධං මග්ගං. සෙය්යථාපි නාම සුද්ධං වත්ථං අපගතකාළකං සම්මදෙව රජනං පතිගණ්හෙය්ය, එවමෙව ඛො මෙ තස්මිං යෙව ආසනෙ විරජං වීතමලං ධම්මචක්ඛුං උදපාදි, යං කිඤ්චි සමුදයධම්මං සබ්බං තං නිරොධධම්මන්ති.
සො ඛො අහං භන්තෙ, දිට්ඨධම්මො පත්තධම්මො විදිතධම්මො පරියොගාළ්හධම්මො තිණ්ණවිචිකිච්ඡො විගතකථංකථො වෙසාරජ්ජප්පත්තො අපරප්පච්චයො සත්ථුසාසනෙ තත්ථෙව බුද්ධඤ්ච ධම්මඤ්ච සඞ්ඝඤ්ච සරණං අගමාසිං. බ්රහ්මචරියපඤ්චමානි ච සික්ඛාපදානි සමාදියිං. අයං ඛො මෙ භන්තෙ, දුතියො අච්ඡරියො අබ්භුතො ධම්මො සංවිජ්ජති.
3. තස්ස මය්හං භන්තෙ, චතස්සො කොමාරියො පජාපතියො අහෙසුං. අථ ඛ්වාහං භන්තෙ, යෙන තා පජාපතියො තෙනුපසඞ්කමිං. උපසඞ්කමිත්වා තා පජාපතියො එතදවොචං: මයා ඛො භගිනියො බ්රහ්මචරියපඤ්චමානි සික්ඛාපදානි සමාදින්නානි. යා ඉච්ඡති සා ඉධෙව භොගෙ ච භුඤ්ජතු! පුඤ්ඤානි ච කරොතු! සකානි වා ඤාතිකුලානි ගච්ඡතු! හොති වා පන පුරිසාධිප්පායා, කස්ස වො දම්මීති. එවං වුත්තෙ සා භන්තෙ ජෙට්ඨා පජාපතී මං එතදවොච: ඉත්ථංනාමස්ස මං අය්යපුත්ත පුරිසස්ස දෙහීති.
අථ ඛ්වාහං භන්තෙ, තං පුරිසං පක්කොසාපෙත්වා වාමෙන හත්ථෙන පජාපතිං ගහෙත්වා දක්ඛිණෙන හත්ථෙන භිඞ්කාරං ගහෙත්වා තස්ස පුරිසස්ස ඔනොජෙසිං. කොමාරිං ඛො පනාහං භන්තෙ, දාරං පරිච්චජන්නො නාභිජානාමි චිත්තස්ස අඤ්ඤථත්තං. අයං ඛො මෙ භන්තෙ, තතියො අච්ඡරියො ධම්මො සංවිජ්ජති.
4. සංවිජ්ජන්ති ඛො පන මෙ භන්තෙ, කුලෙ භොගා. තෙ ච ඛො අප්පටිවිභත්තා සීලවන්තෙහි කල්යාණධම්මෙහි. අයං ඛො මෙ භන්තෙ, චතුත්ථො අච්ඡරියො අබ්භුතො ධම්මො සංවිජ්ජති.
5. යං ඛො පන අහං භන්තෙ, භික්ඛුං පයිරුපාසාමි, සක්කච්චංයෙව පයිරුපාසාමි නො අසක්කච්චං. අයං ඛො මෙ භන්තෙ, පඤ්චමො අච්ඡරියො අබ්භුතො ධම්මො සංවිජ්ජති.
6. සො චෙ{1} මෙ භන්තෙ, ආයස්මා ධම්මං දෙසෙති සක්කච්චං යෙව සුණාමි, නො අසක්කච්චං. නො චෙ මෙ සො ආයස්මා ධම්මං දෙසෙති අහමස්ස ධම්මං දෙසෙමි. අයං ඛො මෙ භන්තෙ, ඡට්ඨො අච්ඡරියො අබ්භුතො ධම්මො සංවිජ්ජති.
7. අනච්ඡරියං ඛො පන මං භන්තෙ, දෙවතා උපසඞ්කමිත්වා ආරොචෙන්ති: ස්වාක්ඛාතො ගහපති, භගවතා ධම්මොති. එවං වුත්තෙ අහං භන්තෙ, තා දෙවතා එවං වදාමි: වදෙය්යාථ වා එවං ඛො තුම්හෙ දෙවතා නො වා වදෙය්යාථ, අථ ඛො ස්වාක්ඛාතො භගවතා ධම්මොති, න ඛො පනාහං භන්තෙ, අභිජානාමි තතොනිදානං චිත්තස්ස උණ්ණතිං, මං වා දෙවතා උපසඞ්කමන්ති අහං වා දෙවතාහි සල්ලපාමීති. අයං ඛො මෙ භන්තෙ, සත්තමො අච්ඡරියො අබ්භුතො ධම්මො සංවිජ්ජති.
8. යානිමානි භන්තෙ, භගවතා දෙසිතානි පඤ්චොරම්භාගියානි සංයොජනානි, නාහං තෙසං කිඤ්චි අත්තනි අප්පහීනං සමනුපස්සාමීති. අයං ඛො මෙ භන්තෙ, අට්ඨමො අච්ඡරියො අබ්භුතො ධම්මො සංවිජ්ජති.
ඉමෙ ඛො භන්තෙ, අට්ඨ අච්ඡරියා අබ්භුතා ධම්මා සංවිජ්ජන්ති. නො ච ඛො අහං ජානාමි. කතමෙහිපහං අට්ඨහි අච්ඡරියෙහි අබ්භුතෙහි ධම්මෙහි සමන්නාගතො භගවතා ව්යාකතොති.
අථ ඛො සො භික්ඛු උග්ගස්ස ගහපතිනො වෙසාලිකස්ස නිවෙසනෙ පිණ්ඩපාතං ගහෙත්වා උට්ඨායාසනා පක්කාමි.
අථ ඛො සො භික්ඛු පච්ඡාභත්තං පිණ්ඩපාතපටික්කන්තො යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං නිසීදි. එකමන්තං නිසින්නො ඛො සො භික්ඛු යාවතකො අහොසි උග්ගෙන ගහපතිනා වෙසාලිකෙන සද්ධිං කථාසල්ලාපො, තං සබ්බං භගවතො ආරොචෙසි.
සාධු සාධු භික්ඛු, යථා තං උග්ගො ගහපති වෙසාලිකො සම්මා ව්යාකරමානො ව්යාකරෙය්ය ඉමෙහෙව භික්ඛු, අට්ඨහි අච්ඡරියෙහි අබ්භුතෙහි ධම්මෙහි සමන්නාගතො උග්ගො ගහපති වෙසාලිකො මයා බ්යාකතො.
ඉමෙහි ච පන භික්ඛු, අච්ඡරියෙහි අබ්භුතෙහි ධම්මෙහි සමන්නාගතං උග්ගං ගහපතිං වෙසාලිකං ධාරෙථාති.
8. 1. 3. 2.
හත්ථිගාමක උග්ග සුත්තං.
එකං සමයං භගවා වජ්ජීසු විහරති හත්ථිගාමෙ. තත්ර ඛො භගවා භික්ඛු ආමන්තෙසි -පෙ-
අට්ඨහි භික්ඛවෙ, අච්ඡරියෙහි අබ්භුතෙහි ධම්මෙහි සමන්නාගතං උග්ගං ගහපතිං හත්ථිගාමකං ධාරෙථා’ති. ඉදමවොච භගවා. ඉදං වත්වා සුගතො උට්ඨායාසනා විහාරං පාවිසි.
අථ ඛො අඤ්ඤතරො භික්ඛු පුබ්බන්හසමයං නිවාසෙත්වා පත්තචීවරමාදාය යෙන උග්ගස්ස ගහපතිනො හත්ථිගාමකස්ස නිවෙසනං තෙනුපසඞ්කමි. උපසඞ්කමිත්වා පඤ්ඤත්තෙ ආසනෙ නිසීදි. අථ ඛො උග්ගො ගහපති හත්ථිගාමකො යෙන සො භික්ඛු තෙනුපසඞ්කමි. උපසඞ්කමිත්වා තං භික්ඛුං අභිවාදෙත්වා එකමන්තං නිසීදි. එකමන්තං නිසින්නං ඛො උග්ගං ගහපතිං හත්ථිගාමකං සො භික්ඛු එතදවොච:
අට්ඨහි ඛො ත්වං ගහපති, අච්ඡරියෙහි අබ්භුතෙහි ධම්මෙහි සමන්නාගතො භගවතා ව්යාකතො. කතමෙ තෙ ගහපති, අට්ඨ අච්ඡරියා අබ්භුතා ධම්මා යෙහි ත්වං සමන්නාගතො භගවතා ව්යාකතොති?
න ඛො අහං භන්තෙ, ජානාමි කතමෙහිපහං අට්ඨහි අච්ඡරියෙහි අබ්භුතෙහි ධම්මෙහි සමන්නාගතො භගවතා ව්යාකතො. අපිච භන්තෙ, යෙ මෙ අට්ඨ අච්ඡරියා අබ්භුතා ධම්මා සංවිජ්ජන්ති තෙ සුණාහි සාධුකං මනසිකරොහි භාසිස්සාමීති. එවං ගහපතීති සො භික්ඛු උග්ගස්ස ගහපතිනො හත්ථිගාමකස්ස පච්චස්සොසි. උග්ගො ගහපති හත්ථිගාමකො එතදවොච:
1. යදාහං භන්තෙ, නාගවනෙ පරිචාරෙන්තො භගවන්තං පඨමං දූරතොව අද්දසං. සහදස්සනෙනෙව මෙ භන්තෙ, භගවතො චිත්තං පසීදි. සුරාමදො ච පහීයි. අයං ඛො මෙ භන්තෙ, පඨමො අච්ඡරියො අබ්භුතො ධම්මො සංවිජ්ජති.
2. සො ඛො අහං භන්තෙ, පසන්නචිත්තො භගවන්තං පයිරුපාසිං. තස්ස මෙ භගවා ආනුපුබ්බීකථං කථෙසි, සෙය්යථීදං:දානකථං සීලකථං සග්ගකථං කාමානං ආදීනවං ඔකාරං සඞ්කිලෙසං නෙක්ඛම්මෙ ච ආනිසංසං පකාසෙසි. යදා මං භගවා අඤ්ඤාසි කල්ලචිත්තං මුදුචිත්තං විනීවරණචිත්තං උදග්ගචිත්තං පසන්නචිත්තං අථ යා බුද්ධානං සාමුක්කංසිකා ධම්මදෙසනා තං පකාසෙසි. දුක්ඛං සමුදයං නිරොධං මග්ගං. සෙය්යථාපි නාම සුද්ධං වත්ථං අපගතකාළකං සම්මදෙව රජනං පතිගණ්හෙය්ය, එවමෙව ඛො තස්මිං යෙව ආසනෙ විරජං වීතමලං ධම්මචක්ඛුං උදපාදි, යං කිඤ්චි සමුදයධම්මං සබ්බං තං නිරොධධම්මන්ති.
සො ඛො අහං භන්තෙ, දිට්ඨධම්මො පත්තධම්මො විදිතධම්මො පරියොගාළ්හධම්මො තිණ්ණවිචිකිච්ඡො විගතකථංකථො වෙසාරජ්ජප්පත්තො අපරප්පච්චයො සත්ථුසාසනෙ තත්ථෙව බුද්ධං ච ධම්මං ච සඞ්ඝං ච සරණං අගමාසිං. බ්රහ්මචරියපඤ්චමානි ච සික්ඛාපදානි සමාදියිං. අයං ඛො මෙ භන්තෙ, දුතියො අච්ඡරියො අබ්භුතො ධම්මො සංවිජ්ජති.
3. තස්ස මය්හං භන්තෙ, චතස්සො කොමාරියො පජාපතියො අහෙසුං. අථ ඛ්වාහං භන්තෙ, යෙන තා පජාපතියො තෙනුපසඞ්කමිං. උපසඞ්කමිත්වා තා පජාපතියො එතදවොචං: මයා ඛො භගිනියො බ්රහ්මචරියපඤ්චමානි සික්ඛාපදානි සමාදින්නානි. යා ඉච්ඡති සා ඉධෙව භොගෙ ච භුඤ්ජතු! පුඤ්ඤානි ච කරොතු! සකානි වා ඤාතිකුලානි ගච්ඡතු! හොති වා පන පුරිසාධිප්පායා, කස්ස වො දම්මීති. එවං වුත්තෙ සා භන්තෙ ජෙට්ඨා පජාපතී මං එතදවොච: ඉත්ථන්නාමස්ස මං අය්යපුත්ත පුරිසස්ස, දෙහීති. අථ ඛ්වාහං භන්තෙ, තං පුරිසං පක්කොසාපෙත්වා වාමෙන හත්ථෙන පජාපතිං ගහෙත්වා දක්ඛිණෙන හත්ථෙන භිඞ්කාරං ගහෙත්වා තස්ස පුරිසස්ස ඔනොජෙසිං. කොමාරිං ඛො පනාහං භන්තෙ, දාරං පරිච්චජන්නො නාභිජානාමි චිත්තස්ස අඤ්ඤථත්තං. අයං ඛො මෙ භන්තෙ, තතියො අච්ඡරියො අබ්භුතො ධම්මො සංවිජ්ජති.
4. සංවිජ්ජන්ති ඛො පන මෙ භන්තෙ, කුලෙ භොගා තෙ ච ඛො අප්පටිවිභත්තා සීලවන්තෙහි කල්යාණධම්මෙහි. අයං ඛො මෙ භන්තෙ, චතුත්ථො අච්ඡරියො අබ්භුතො ධම්මො සංවිජ්ජති.
5. යං ඛො පනාහං භන්තෙ, භික්ඛුං පයිරුපාසාමි, සක්කච්චං යෙව පයිරුපාසාමි නො අසක්කච්චං, සො චෙ මෙ භන්තෙ, ආයස්මා ධම්මං දෙසෙති සක්කච්චං යෙව සුණාමි, නො අසක්කච්චං. නො චෙ මෙ සො ආයස්මා ධම්මං දෙසෙති, අහමස්ස ධම්මං දෙසෙමි. අයං ඛො මෙ භන්තෙ, පඤ්චමො අච්ඡරියො අබ්භුතො ධම්මො සංවිජ්ජති.
6. අනච්ඡරියං ඛො පන මෙ භන්තෙ, සඞ්ඝෙ නිමන්තිතෙ දෙවතා උපසඞ්කමිත්වා ආරොචෙන්ති: අසුකො ගහපති, භික්ඛු උභතොභාගවිමුත්තො, අසුකො පඤ්ඤාවිමුත්තො, අසුකො කායසක්ඛී, අසුකො දිට්ඨප්පත්තො අසුකො සද්ධාවිමුත්තො, අසුකො සද්ධානුසාරී, අසුකො ධම්මානුසාරී, අසුකො සීලවා කල්යාණධම්මො, අසුකො දුස්සීලො පාපධම්මොති. සඞ්ඝං ඛො පනාහං භන්තෙ, පරිවිසන්තො නාභිජානාමි. එවං චිත්තං උප්පාදෙතා: ඉමස්ස වා ථොකං දෙමි ඉමස්ස වා බහුකන්ති. අථඛ්වාහං භන්තෙ, සමචිත්තොව දෙමි. අයං ඛො මෙ භන්තෙ, ඡට්ඨො අච්ඡරියො අබ්භුතො ධම්මො සංවිජ්ජති.
7. අච්ඡරියං ඛො පන මෙ භන්තෙ, දෙවතා උපසඞ්කමිත්වා ආරොචෙන්ති: ‘ස්වාක්ඛාතො ගහපති භගවතා ධම්මො’ ති. එවං වුත්තෙ අහං භන්තෙ, තා දෙවතා එවං වදාමි. ‘වදෙය්යාථ වා එවං ඛො තුම්හෙ දෙවතා නො වා වදෙය්යාථ, අථ ඛො ස්වාක්ඛාතො භගවතා ධම්මො’ ති. න ඛො පනාහං භන්තෙ, අභිජානාමි තතො නිදානං චිත්තස්ස උණ්ණතිං. මං වා දෙවතා උපසඞ්කමන්ති. අහං වා දෙවතාහි සල්ලපාමීති. අයං ඛො මෙ භන්තෙ, සත්තමො අච්ඡරියො අබ්භුතො ධම්මො සංවිජ්ජති.
8. සචෙ ඛො පනාහං භන්තෙ, භගවතො පඨමතරං කාලඞ්කරෙය්යං අනච්ඡරියං ඛො පනෙතං යං මං භගවා එවං ව්යාකරෙය්ය; නත්ථි තං සංයොජනං යෙන සංයොජනෙන සංයුත්තො උග්ගො ගහපති හත්ථිගාමකො පුන ඉමං ලොකං ආගච්ඡෙය්යාති. අයං ඛො මෙ භන්තෙ, අට්ඨමො අච්ඡරියො අබ්භුතො ධම්මො සංවිජ්ජති.
ඉමෙ ඛො භන්තෙ, අට්ඨ අච්ඡරියා අබ්භුතා ධම්මා සංවිජ්ජන්ති. නො ච ඛො අහං ජානාමි. කතමෙහිපහං අට්ඨහි අච්ඡරියෙහි අබ්භුතෙහි ධම්මෙහි සමන්නාගතො භගවතා ව්යාකතොති.
අථ ඛො සො භික්ඛු උග්ගස්ස ගහපතිනො හත්ථිගාමකස්ස නිවෙසනෙ පිණ්ඩපාතං ගහෙත්වා උට්ඨායාසනා පක්කාමි. අථ ඛො සො භික්ඛු පච්ඡාභත්තං පිණ්ඩපාතපටික්කන්තො යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං නිසීදි. එකමන්තං නිසින්නො ඛො සො භික්ඛු යාවතකො අහොසි උග්ගෙන ගහපතිනා හත්ථිගාමකෙන සද්ධිං කථාසල්ලාප්පො, තං සබ්බං භගවතො ආරොචෙසි.
සාධු සාධු භික්ඛු, යථා තං උග්ගො ගහපති හත්ථිගාමකො සම්මා ව්යාකරමානො ව්යාකරෙය්ය ඉමෙහෙව ඛො භික්ඛු, අට්ඨහි අච්ඡරියෙහි අබ්භුතෙහි ධම්මෙහි සමන්නාගතො උග්ගො ගහපති හත්ථිගාමකො මයා ව්යාකතො. ඉමෙහි ච පන භික්ඛු අට්ඨහි අච්ඡරියෙහි අබ්භුතෙහි ධම්මෙහි සමන්නාගතං උග්ගං ගහපතිං හත්ථිගාමකං ධාරෙථාති.