8. 1. 2. 2.
සීහසෙනාපති සුත්තං
එකං සමයං භගවා වෙසාලියං විහරති මහාවනෙ කූටාගාරසාලායං. තෙන ඛො පන සමයෙන සම්බහුලා අභිඤ්ඤාතා අභිඤ්ඤාතා ලිච්ඡවී සන්ථාගාරෙ සන්නිසින්නා සන්නිපතිතා අනෙකපරියායෙන බුද්ධස්ස වණ්ණං භාසන්ති. ධම්මස්ස වණ්ණං භාසන්ති. සඞ්ඝස්ස වණ්ණං භාසන්ති.
තෙන ඛො පන සමයෙන සීහො සෙනාපති නිගණ්ඨසාවකො තස්සං පරිසායං නිසින්නො හොති. අථ ඛො සීහස්ස සෙනාපතිස්ස එතදහොසි; නිස්සංසයං ඛො සො භගවා අරහං සම්මාසම්බුද්ධො භවිස්සති. තථා හි ‘මෙ සම්බහුලා අභිඤ්ඤාතා අභිඤ්ඤාතා ලිච්ඡවී සන්ථාගාරෙ සන්නිසින්නා සන්නිපතිතා අනෙකපරියායෙන බුද්ධස්ස වණ්ණං භාසන්ති. ධම්මස්ස වණ්ණං භාසන්ති, සඞ්ඝස්ස වණ්ණං භාසන්ති. යන්නූනාහං තං භගවන්තං දස්සනාය උපසඞ්කමෙය්යං අරහන්තං සම්මාසම්බුද්ධන්ති.
අථ ඛො සීහො සෙනාපති යෙන නිගණ්ඨො නාතපුත්තො තෙනුපසඞ්කමි. උපසඞ්කමිත්වා නිගණ්ඨං නාතපුත්තං එතදවොච: ඉච්ඡාමහං භන්තෙ, සමණං ගොතමං දස්සනාය උපසඞ්කමිතුන්ති.
කිං පන ත්වං සීහ, කිරියවාදො සමානො අකිරියවාදං සමණං ගොතමං දස්සනාය උපසඞ්කමිස්සසි. සමණො හි සීහ, ගොතමො අකිරියවාදො අකිරියාය ධම්මං දෙසෙති, තෙන ච සාවකෙ විනෙතීති.
අථ ඛො සීහස්ස සෙනාපතිස්ස යො අහොසි ගමියාභිසඞ්ඛාරො.{1} භගවන්තං දස්සනාය, සො පටිප්පස්සම්භි.
දුතියම්පි ඛො සම්බහුලා අභිඤ්ඤාතා අභිඤ්ඤාතා ලිච්ඡවී සන්ථාගාරෙ සන්නිසින්නා සන්නිපතිතා අනෙකපරියායෙන බුද්ධස්ස වණ්ණං භාසන්ති, ධම්මස්ස වණ්ණං භාසන්ති, සඞ්ඝස්ස වණ්ණං භාසන්ති.
දුතියම්පි ඛො සීහස්ස සෙනාපතිස්ස එතදහොසි: නිස්සංසයං ඛො සො භගවා අරහං සම්මාසම්බුද්ධො භවිස්සති. තථා හි’මෙ සම්බහුලා අභිඤ්ඤාතා අභිඤ්ඤාතා ලිච්ඡවී සන්ථාගාරෙ සන්නිසින්නා සන්නිපතිතා අනෙකපරියායෙන බුද්ධස්ස වණ්ණං භාසන්ති, ධම්මස්ස වණ්ණං භාසන්ති, සඞ්ඝස්ස වණ්ණං භාසන්ති. යන්නූනාහං තං භගවන්තං දස්සනාය උපසඞ්කමෙය්යං අරහන්තං සම්මාසම්බුද්ධන්ති.
අථ ඛො සීහො සෙනාපති යෙන නිගණ්ඨො නාතපුත්තො තෙනුපසඞ්කමි. උපසඞ්කමිත්වා නිගණ්ඨං නාතපුත්තං එතදවොච: ඉච්ඡාමහං භන්තෙ, සමණං ගොතමං දස්සනාය උපසඞ්කමිතුන්ති.
කිං පන ත්වං සීහ, කිරියවාදො සමානො අකිරියවාදං සමණං ගොතමං දස්සනාය උපසඞ්කමිස්සසි, සමණො හි සීහ, ගොතමො අකිරියවාදො අකිරියාය ධම්මං දෙසෙති, තෙන ච සාවකෙ විනෙතීති.
දුතියම්පි ඛො සීහස්ස සෙනාපතිස්ස යො අහොසි ගමියාභිසඞ්ඛාරො භගවන්තං දස්සනාය, සො පටිප්පස්සම්භි.
තතියම්පි ඛො සම්බහුලා අභිඤ්ඤාතා අභිඤ්ඤාතා ලිච්ඡවී සන්ථාගාරෙ සන්නිසින්නා සන්නිපතිතා අනෙකපරියායෙන බුද්ධස්ස වණ්ණං භාසන්ති, ධම්මස්ස වණ්ණං භාසන්ති, සඞ්ඝස්ස වණ්ණං භාසන්ති.
තතියම්පි ඛො සීහස්ස සෙනාපතිස්ස එතදහොසි: නිස්සංසයං ඛො සො භගවා අරහං සම්මාසම්බුද්ධො භවිස්සති. තථා හිමෙ සම්බහුලා අභිඤ්ඤාතා අභිඤ්ඤාතා ලිච්ඡවී සන්ථාගාරෙ සන්නිසින්නා සන්නිපතිතා අනෙකපරියායෙන බුද්ධස්ස වණ්ණං භාසන්ති, ධම්මස්ස වණ්ණං භාසන්ති, සඞ්ඝස්ස වණ්ණං භාසන්ති. කිං හිමෙ කරිස්සන්ති නිගණ්ඨා අපලොකිතා වා අනපලොකිතා වා, යන්නූනාහං අනපලොකිතාව නිගණ්ඨෙ තං භගවන්තං දස්සනාය උපසඞ්කමෙය්යං අරහන්තං සම්මාසම්බුද්ධන්ති.
අථ ඛො සීහො සෙනාපති පඤ්චමත්තෙහි රථසතෙහි දිවාදිවස්ස වෙසාලියා නිය්යාසි භගවන්තං දස්සනාය. යාවතිකා යානස්ස භූමි, යානෙන ගන්ත්වා යානා පච්චොරොහිත්වා පත්තිකොව ආරාමං පාවිසි. අථ ඛො සීහො සෙනාපති යෙන භගවා තෙනුපසඞ්කමි, උපසඞ්කමිත්වා භගවන්තං අභිවාදෙත්වා එකමන්තං නිසීදි, එකමන්තං නිසින්නො ඛො සීහො සෙනාපති භගවන්තං එතදවොච:
සුතං මෙ’තං භන්තෙ, අකිරියවාදො සමණො ගොතමො අකිරියාය ධම්මං දෙසෙති, තෙන ච සාවකෙ විනෙතීති. යෙ තෙ භන්තෙ, එවමාහංසු: අකිරියවාදො සමණො ගොතමො අකිරියාය ධම්මං දෙසෙති, තෙන ච සාවකෙ විනෙතීති. කච්චි තෙ භන්තෙ, වුත්තවාදිනො? න ච භගවන්තං අභූතෙන අබ්භාචික්ඛන්ති,? ධම්මස්ස චානුධම්මං ව්යාකරොන්ති, න ච කොචි සහධම්මිකො වාදානුවාදො ගාරය්හං ඨානං ආගච්ඡති? අනබ්භක්ඛාතුකාමාහි මයං භන්තෙ, භගවන්තන්ති.
1. අත්ථි සීහ, පරියායො යෙන මං පරියායෙන සම්මා වදමානො වදෙය්ය අකිරියවාදො සමණො ගොතමො අකිරියාය ධම්මං දෙසෙති, තෙන ච සාවකෙ විනෙතීති.
2. අත්ථි සීහ, පරියායො යෙන මං පරියායෙන සම්මා වදමානො වදෙය්ය, කිරියවාදො සමණො ගොතමො කිරියාය ධම්මං දෙසෙති, තෙන ච සාවකෙ විනෙතීති.
3. අත්ථි සීහ, පරියායො යෙන මං පරියායෙන සම්මා වදමානො වදෙය්ය උච්ඡෙදවාදො සමණො ගොතමො, උච්ඡෙදාය ධම්මං දෙසෙති, තෙන ච සාවකෙ විනෙතීති.
4. අත්ථි සීහ, පරියායො යෙන මං පරියායෙන සම්මා වදමානො වදෙය්ය, ජෙගුච්ඡී සමණො ගොතමො ජෙගුච්ඡිතාය ධම්මං දෙසෙති, තෙන ච සාවකෙ විනෙතීති.
5. අත්ථි සීහ, පරියායො යෙන මං පරියායෙන සම්මා වදමානො වදෙය්ය, වෙනයිකො සමණො ගොතමො විනයාය ධම්මං දෙසෙති. තෙන ච සාවකෙ විනෙතීති.
6. අත්ථි සීහ, පරියායො යෙන මං පරියායෙන සම්මා වදමානො වදෙය්ය තපස්සී සමණො ගොතමො තපස්සිතාය ධම්මං දෙසෙති, තෙන ච සාවකෙ විනෙතීති.
7. අත්ථි සීහ, පරියායො යෙන මං පරියායෙන සම්මා වදමානො වදෙය්ය, අපගබ්භො සමණො ගොතමො අපගබ්භතාය ධම්මං දෙසෙති, තෙන ච සාවකෙ විනෙතීති.
8. අත්ථි සීහ, පරියායො යෙන මං පරියායෙන සම්මා වදමානො වදෙය්ය, අස්සාසකො{1} සමණො ගොතමො අස්සාසාය ධම්මං දෙසෙති. තෙන ච සාවකෙ විනෙතීති.
1. කතමො ච සීහ, පරියායො යෙන මං පරියායෙන සම්මා වදමානො වදෙය්ය අකිරියවාදො සමණො ගොතමො අකිරියාය ධම්මං දෙසෙති, තෙන ච සාවකෙ විනෙතීති: අහං හි සීහ, අකිරියං වදාමි කායදුච්චරිතස්ස වචීදුච්චරිතස්ස මනොදුච්චරිතස්ස, අනෙකවිහිතානං පාපකානං අකුසලානං ධම්මානං අකිරියං වදාමි. අයං ඛො සීහ, පරියායො යෙන මං පරියායෙන සම්මා වදමානො වදෙය්ය අකිරියවාදො සමණො ගොතමො අකිරියාය ධම්මං දෙසෙති, තෙන ච සාවකෙ විනෙතීති.
2. කතමො ච සීහ, පරියායො යෙන මං පරියායෙන සම්මා වදමානො වදෙය්ය කිරියවාදො සමණො ගොතමො කිරියාය ධම්මං දෙසෙති. තෙන ච සාවකෙ විනෙතීති: අහං හි සීහ, කිරියං වදාමි. කායසුචරිතස්ස වචීසුචරිතස්ස මනොසුචරිතස්ස, අනෙකවිහිතානං කුසලානං ධම්මානං කිරියං වදාමි. අයං ඛො සීහ, පරියායො යෙන මං පරියායෙන සම්මා වදමානො වදෙය්ය කිරියවාදො සමණො ගොතමො කිරියාය ධම්මං දෙසෙති. තෙන ච සාවකෙ විනෙතීති.
3. කතමො ච සීහ, පරියායො යෙන මං පරියායෙන සම්මා වදමානො වදෙය්ය උච්ඡෙදවාදො සමණො ගොතමො, උච්ඡෙදාය ධම්මං දෙසෙති, තෙන ච සාවකෙ විනෙතීති: අහං හි සීහ, උච්ඡෙදං වදාමි රාගස්ස දොසස්ස මොහස්ස, අනෙකවිහිතානං පාපකානං අකුසලානං ධම්මානං උච්ඡෙදං වදාමි. අයං ඛො සීහ, පරියායො යෙන මං පරියායෙන සම්මා වදමානො වදෙය්ය උච්ඡෙදවාදො සමණො ගොතමො උච්ඡෙදාය ධම්මං දෙසෙති, තෙන ච සාවකෙ විනෙතීති.
4. කතමො ච සීහ, පරියායො යෙන මං පරියායෙන සම්මා වදමානො වදෙය්ය ජෙගුච්ඡී සමණො ගොතමො ජෙගුච්ඡිතාය ධම්මං දෙසෙති, තෙන ච සාවකෙ විනෙතීති: අහං හි සීහ, ජිගුච්ඡාමි. කායදුච්චරිතෙන වචීදුච්චරිතෙන මනොදුච්චරිතෙන, අනෙකවිහිතානං පාපකානං අකුසලානං ධම්මානං සමාපත්තියා ජිගුච්ඡාමි. අයං ඛො සීහ, පරියායො යෙන මං පරියායෙන සම්මා වදමානො වදෙය්ය ජෙගුච්ඡි සමණො ගොතමො ජෙගුච්ඡිතාය ධම්මං දෙසෙති, තෙන ච සාවකෙ විනෙතීති.
5. කතමො ච සීහ, පරියායො යෙන මං පරියායෙන සම්මා වදමානො වදෙය්ය: වෙනයිකො සමණො ගොතමො විනයාය ධම්මං දෙසෙති, තෙන ච සාවකෙ විනෙතීති: අහං හි සීහ, විනයාය ධම්මං දෙසෙමි. රාගස්ස දොසස්ස මොහස්ස, අනෙකවිහිතානං පාපකානං අකුසලානං ධම්මානං විනයාය ධම්මං දෙසෙමි. අයං ඛො සීහ, පරියායො යෙන මං පරියායෙන සම්මා වදමානො වදෙය්ය වෙනයිකො සමණො ගොතමො, විනයාය ධම්මං දෙසෙති, තෙන ච සාවකෙ විනෙතීති.
6. කතමො ච සීහ, පරියායො යෙන මං පරියායෙන සම්මා වදමානො වදෙය්ය: තපස්සී සමණො ගොතමො තපස්සිතාය ධම්මං දෙසෙති, තෙන ච සාවකෙ විනෙතීති: තපනීයාහං සීහ, පාපකෙ අකුසලෙ ධම්මෙ වදාමි. කායදුච්චරිතං වචීදුච්චරිතං මනොදුච්චරිතං, යස්ස ඛො සීහ, තපනීයා පාපකා අකුසලා ධම්මා පහීනා උච්ඡින්නමූලා තාලාවත්ථුකතා අනභාවකතා ආයතිං අනුප්පාදධම්මා. තමහං තපස්සීති වදාමි. තථාගතස්ස ඛො සීහ, තපනීයා පාපකා අකුසලා ධම්මා පහීනා උච්ඡින්නමූලා තාලාවත්ථුකතා අනභාවකතා ආයතිං අනුප්පාදධම්මා. අයං ඛො සීහ, පරියායො යෙන මං පරියායෙන සම්මා වදමානො වදෙය්ය තපස්සී සමණො. ගොතමො තපස්සිතාය ධම්මං දෙසෙති. තෙන ච සාවකෙ විනෙතීති.
7. කතමො ච සීහ, පරියායො යෙන මං පරියායෙන සම්මා වදමානො වදෙය්ය අපගබ්භො සමණො ගොතමො අපගබ්භතාය ධම්මං දෙසෙති, තෙන ච සාවකෙ විනෙතීති. යස්ස ඛො සීහ, ආයතිං ගබ්භසෙය්යා පුනබ්භවාභිනිබ්බත්ති පහීනා, උච්ඡින්නමූලා තාලාවත්ථුකතා අනභාවකතා ආයතිං අනුප්පාදධම්මා, තමහං අපගබ්භොති වදාමි. තථාගතස්ස ඛො සීහ, ආයතිං ගබ්භසෙය්යා පුනබ්භවාභිනිබ්බත්ති පහීනා උච්ඡින්නමූලා තාලාවත්ථුකතා අනභාවකතා ආයතිං අනුප්පාදධම්මා. අයං ඛො සීහ, පරියායො යෙන මං පරියායෙන සම්මා වදමානො වදෙය්ය අපගබ්භො සමණො ගොතමො අපගබ්භතාය ධම්මං දෙසෙති, තෙන ච සාවකෙ විනෙතීති.
8. කතමො ච සීහ, පරියායො යෙන මං පරියායෙන සම්මා වදමානො වදෙය්ය අස්සාසකො සමණො ගොතමො අස්සාසාය ධම්මං දෙසෙති, තෙන ච සාවකෙ විනෙතීති. අහං හි සීහ, අස්සාසකො පරමෙන අස්සාසෙන, අස්සාසාය ච ධම්මං දෙසෙමි, තෙන ච සාවකෙ විනෙමි. අයං ඛො සීහ, පරියායො යෙන මං පරියායෙන සම්මා වදමානො වදෙය්ය අස්සාසකො සමණො ගොතමො අස්සාසාය ධම්මං දෙසෙති, තෙන ච සාවකෙ විනෙතීති.
එවං වුත්තෙ සීහො සෙනාපති භගවන්තං එතදවොච: අභික්කන්තං භන්තෙ, අභික්කන්තං භන්තෙ, -පෙ- උපාසකං මං භන්තෙ, භගවා ධාරෙතු අජ්ජතග්ගෙ පාණුපෙතං සරණං ගතන්ති.
අනුවිච්චකාරං ඛො සීහ, කරොහි, අනුවිච්චකාරො තුම්හාදිසානං ඤාතමනුස්සානං සාධු හොතීති.
ඉමිනා පහං භන්තෙ භගවතො භිය්යොසොමත්තාය අත්තමනො අභිරද්ධො, යං මං භගවා එවමාහ: අනුවිච්චකාරං ඛො සීහ, කරොහි, අනුවිච්චකාරො තුම්හාදිසානං ඤාතමනුස්සානං සාධු හොතීති.
මමං හි භන්තෙ, අඤ්ඤතිත්ථියා සාවකං ලභිත්වා කෙවලකප්පං වෙසාලිං පටාකං පරිහරෙය්යුං: සීහො අම්හාකං සෙනාපති සාවකත්තං උපගතොති. අථ ච පන මං භගවා එවමාහ: අනුවිච්චකාරං ඛො සීහ, කරොහි. අනුවිච්චකාරො තුම්හාදිසානං ඤාතමනුස්සානං සාධු හොතීති. එසාහං භන්තෙ, දුතියම්පි භගවන්තං සරණං ගච්ඡාමි ධම්මඤ්ච භික්ඛුසඞ්ඝඤ්ච, උපාසකං මං භන්තෙ, භගවා ධාරෙතු අජ්ජතග්ගෙ පාණුපෙතං සරණං ගතන්ති.
දීඝරත්තං ඛො තෙ සීහ, නිගණ්ඨානාං ඔපානභූතං කුලං යෙන තෙසං උපගතානං පිණ්ඩකං දාතබ්බං මඤ්ඤෙය්යාසීති.
ඉමිනාපහං භන්තෙ, භගවතො භීය්යොසොමත්තාය අත්තමනො අභිරද්ධො යං මං භගවා එවමාහ: දීඝරත්තං ඛො තෙ සීහ, නිගණ්ඨානං ඔපානභූතං කුලං යෙන තෙසං උපගතානං පිණ්ඩකං දාතබ්බං මඤ්ඤෙය්යාසීති.
සුතං මෙ තං භන්තෙ, සමණො ගොතමො එවමාහ: මය්හමෙව දානං දාතබ්බං න අඤ්ඤෙසං දානං දාතබ්බං, මය්හමෙව සාවකානං දානං දාතබ්බං න අඤ්ඤෙසං සාවකානං දානං දාතබ්බං, මය්හමෙව දින්නං මහප්ඵලං, න අඤ්ඤෙසං දින්නං මහප්ඵලං, මය්හමෙව සාවකානං දින්නං මහප්ඵලං නාඤ්ඤෙසං සාවකානං දින්නං මහප්ඵලන්ති. අථ ච පන මං භගවා නිගණ්ඨෙසුපි දානෙ සමාදපෙති. අපි ච භන්තෙ, මයමෙත්ථකාලං ජානිස්සාම. එසාහං භන්තෙ තතියම්පි භගවන්තං සරණං ගච්ඡාමි. ධම්මඤ්ච භික්ඛුසඞ්ඝඤ්ච උපාසකං මං භන්තෙ, භගවා ධාරෙතු අජ්ජතග්ගෙ පාණුපෙතං සරණං ගතන්ති.
අථ ඛො භගවා සීහස්ස සෙනාපතිස්ස ආනුපුබ්බීකථං{1} කථෙසි. සෙය්යථීදං: දාන කථං සීලකථං සග්ගකථං කාමානං ආදීනවං ඔකාරං සඞ්කිලෙසං නෙක්ඛම්මෙ ච ආනිසංසං පකාසෙසි.
යදා භගවා අඤ්ඤාසි සීහං සෙනාපතිං කල්ලචිත්තං මුදුචිත්තං විනීවරණචිත්තං උදග්ගචිත්තං පසන්නචිත්තං, අථ යා බුද්ධානං සාමුක්කංසිකා ධම්මදෙසනා තං පකාසෙසි: දුක්ඛං සමුදයං නිරොධං මග්ගං, සෙය්යථාපි නාම සුද්ධං වත්ථං අපගතකාළකං සම්මදෙව රජනං පතිගණ්හෙය්ය, එවමෙව සීහස්ස සෙනාපතිස්ස තස්මිං යෙව ආසනෙ විරජං වීතමලං ධම්මචක්ඛුං උදපාදි යං කිඤ්චි සමුදයධම්මං සබ්බන්තං නිරොධධම්මන්ති.
අථ ඛො සීහො සෙනාපති දිට්ඨධම්මො පත්තධම්මො විදිතධම්මො පරියොගාළ්හධම්මො තිණ්ණවිචිකිච්ඡො විගතකථඞ්කථො වෙසාරජ්ජප්පත්තො අපරප්පච්චයො සත්ථුසාසනෙ භගවන්තං එතදවොච:
අධිවාසෙතු මෙ භන්තෙ, භගවා ස්වාතනාය භත්තං සද්ධිං භික්ඛුසඞ්ඝෙනාති. අධිවාසෙසි භගවා තුණ්හීභාවෙන.
අථ ඛො සීහො සෙනාපති භගවතො අධිවාසනං විදිත්වා උට්ඨායාසනා භගවන්තං අභිවාදෙත්වා පදක්ඛිණං කත්වා පක්කාමි.
අථ ඛො සීහො සෙනාපති අඤ්ඤතරං පුරිසං ආමන්තෙසි: ගච්ඡ ත්වං අම්භො පුරිස, පවත්තමංසං ජානාහීති. අථ ඛො සීහො සෙනාපති තස්සා රත්තියා අච්චයෙන සකෙ නිවෙසනෙ පණීතං ඛාදනීයං භොජනීයං පටියාදාපෙත්වා භගවතො කාලං ආරොචාපෙසි. කාලො භන්තෙ, නිට්ඨිතං භත්තන්ති.
අථ ඛො භගවා පුබ්බන්හසමයං නිවාසෙත්වා පත්තචීවරමාදාය යෙන සීහස්ස සෙනාපතිස්ස නිවෙසනං තෙනුපසඞ්කමි, උපසඞ්කමිත්වා පඤ්ඤත්තෙ ආසනෙ නිසීදි සද්ධිං භික්ඛුසඞ්ඝෙන.
තෙන ඛො පන සමයෙන සම්බහුලා නිගණ්ඨා වෙසාලියං රථිකාය රථිකං{1} සිඞ්ඝාටකෙන සිඞ්ඝාටකං බාහා පග්ගය්හ කන්දන්ති. අජ්ජ සීහෙන සෙනාපතිනා ථුල්ලං පසුං වධිත්වා සමණස්ස ගොතමස්ස භත්තං කතං. තං සමණො ගොතමො ජානං උද්දිස්සකටං මංසං පරිභුඤ්ජති පටිච්ච කම්මන්ති.
අථ ඛො අඤ්ඤතරො පුරිසො යෙන සීහො සෙනාපති තෙනුපසඞ්කමි, උපසඞ්කමිත්වා සීහස්ස සෙනාපතිස්ස උපකණ්ණකෙ ආරොචෙසි. යග්ඝෙ භන්තෙ, ජානෙය්යාසි: එතෙ සම්බහුලා නිගණ්ඨා වෙසාලියං රථිකාය රථිකං{1} සිඞ්ඝාටකෙන සිඞ්ඝාටකං බාහා පග්ගය්හ කන්දන්ති. අජ්ජ සීහෙන සෙනාපතිනා ථුල්ලං පසුං වධිත්වා සමණස්ස ගොතමස්ස භත්තං කතං, තං සමණො ගොතමො ජානං උද්දිස්සකටං මංසං පරිභුඤ්ජති පටිච්චකම්මන්ති.
අලං අය්යො දීඝරත්තම්පි තෙ ආයස්මන්තො අවණ්ණකාමා බුද්ධස්ස, අවණ්ණකාමා ධම්මස්ස, අවණ්ණකාමා සඞ්ඝස්ස න ච පනෙතෙ ආයස්මන්තො ජීරන්ති තං භගවන්තං අසතා තුච්ඡා මුසා අභූතෙන අබ්භාචික්ඛන්තා, න ච මයං ජීවිතහෙතූපි සඤ්චිච්ච පාණං ජීවිතා වොරොපෙය්යාමාති.
අථ ඛො සීහො සෙනාපති බුද්ධපමුඛං භික්ඛුසඞ්ඝං පණීතෙන ඛාදනීයෙන භොජනීයෙන සහත්ථා සන්තප්පෙසි. සම්පවාරෙසි. අථ ඛො සීහො සෙනාපති භගවන්තං භුත්තාවිං ඔනීතපත්තපාණිං එකමන්තං නිසීදි. එකමන්තං නිසින්නං ඛො සීහං සෙනාපතිං භගවා ධම්මියා කථාය සන්දස්සෙත්වා සමාදපෙත්වා සමුත්තෙජෙත්වා සම්පහංසෙත්වා උට්ඨායාසනා පක්කාමීති.
8. 1. 2. 3.
ආජඤ්ඤ සුත්තං
[සාවත්ථිනිදානං]
අට්ඨහි භික්ඛවෙ, අඞ්ගෙහි සමන්නාගතො රඤ්ඤො භද්රො අස්සාජානීයො රාජාරහො හොති රාජභොග්ගො රඤ්ඤො අඞ්ගන්ත්වෙව සඞ්ඛං ගච්ඡති, කතමෙහි අට්ඨහි:
ඉධ භික්ඛවෙ, රඤ්ඤො භද්රො අස්සාජානීයො උභතො සුජාතො හොති. මාතිතො ච පිතිතො ච යස්සං දිසායං අඤ්ඤෙපි භද්රා අස්සාජානීයා ජායන්ති තස්සං දිසායං ජාතො හොති, යං ඛො පනස්ස භොජනං දෙන්ති අල්ලං වා සුක්ඛං වා, තං සක්කච්චං යෙව පරිභුඤ්ජති අවිකිරන්තො, ජෙගුච්ඡි හොති උච්චාරං වා පස්සාවං වා අභිනිසීදිතුං වා අභිනිපජ්ජිතුං වා, සොරතො හොති සුඛසංවාසො, න අඤ්ඤෙ අස්සෙ උබ්බෙජෙතා, යානි ඛො පනස්ස හොන්ති සාඨෙය්යානි කූටෙය්යානි ජිම්භෙය්යානි වඞ්කෙය්යානි තානි යථාභූතං සාරථිස්ස ආවීකත්තා හොති.
තෙසමස්ස සාරථී අභිනිම්මදනාය වායමති, වාහී ඛො පන හොති කාමඤ්ඤෙ අස්සා වහන්තු වා මා වා අහමෙත්ථ වහිස්සාමීති චිත්තං උප්පාදෙති, ගච්ඡන්තො ඛො පන උජුමග්ගෙනෙව ගච්ඡති, ථාමවා හොති යාව ජීවිතමරණපරියාදානා ථාමං උපදංසෙතා, ඉමෙහි ඛො භික්ඛවෙ, අට්ඨහි අඞ්ගෙහි සමන්නාගතො රඤ්ඤො භද්රො අස්සාජානීයො රාජාරහො හොති රාජභොග්ගො, රඤ්ඤො අඞ්ගත්වෙ සඞ්ඛං ගච්ඡති.
එවමෙව ඛො භික්ඛවෙ අට්ඨහි ධම්මෙහි සමන්නාගතො භික්ඛු ආහුනෙය්යො හොති -පෙ- අනුත්තරං පුඤ්ඤක්ඛෙත්තං ලොකස්ස, කතමෙහි අට්ඨහි:
ඉධ භික්ඛවෙ, භික්ඛු සීලවා හොති. පාතිමොක්ඛසංවරසංවුතො විහරති. ආචාරගොචරසම්පන්නො අණුමත්තෙසු වජ්ජෙසු භයදස්සාවී සමාදාය සික්ඛති සික්ඛාපදෙසු, යං ඛො පනස්ස භොජනං දෙන්ති ලූඛං වා පණීතං වා තං සක්කච්චංයෙව පරිභුඤ්ජති අවිහඤ්ඤමානො, ජෙගුච්ඡි හොති කායදුච්චරිතෙන වචීදුච්චරිතෙන මනොදුච්චරිතෙන, ජෙගුච්ඡි හොති අනෙකවිහිතානං පාපකානං අකුසලානං ධම්මානං සමාපත්තියා, සොරතො හොති සුඛසංවාසො, න අඤ්ඤෙ භික්ඛු උබ්බෙජෙතා. යානි ඛො පනස්ස හොන්තී සාඨෙය්යානි කූටෙය්යානි ජිම්භෙය්යානි වඞ්කෙය්යානි තානි යථාභූතං ආවීකත්තා හොති සත්ථරි වා විඤ්ඤූසු වා සබ්රහ්මචාරිසු, තෙසමස්ස සත්ථා වා විඤ්ඤූ වා සබ්රහ්මචාරී අභිනිම්මදනාය වායමති. සික්ඛිතා ඛො පන හොති. කාමඤ්ඤෙ භික්ඛු සික්ඛන්තු වා මා වා අහමෙත්ථ සික්ඛිස්සාමීති චිත්තං උප්පාදෙති. ගච්ඡන්තො ඛො පන උජුමග්ගෙනෙව ගච්ඡති. තත්රායං උජුමග්ගො සෙය්යථීදං: සම්මාදිට්ඨි -පෙ- සම්මාසමාධි, ආරද්ධවිරියො විහරති කාමං තචො ච නහාරු ච අට්ඨි ච අවසිස්සතු සරීරෙ උපසුස්සතු මංසලොහිතං, යන්තං පුරිසථාමෙන පුරිසවිරියෙන පුරිසපරක්කමෙන පත්තබ්බං, න තං අපාපුණිත්වා විරියස්ස සන්ථානං භවිස්සතීති. ඉමෙහි ඛො භික්ඛවෙ, අට්ඨහි ධම්මෙහි සමන්නාගතො භික්ඛු ආහුනෙය්යො හොති, -පෙ- අනුත්තරං පුඤ්ඤක්ඛෙත්තං ලොකස්සාති.
8. 1. 2. 4.
ඛලුඞ්ක සුත්තං
[සාවත්ථිනිදානං]
අට්ඨ ච භික්ඛවෙ අස්සඛලුඞ්කෙ දෙසිස්සාමි අට්ඨ ච අස්සදොසෙ, අට්ඨ ච පුරිසඛලුඞ්කෙ අට්ඨ ච පුරිසදොසෙ, තං සුණාථ සාධුකං මනසි කරොථ භාසිස්සාමීති. එවං භන්තෙති ඛො තෙ භික්ඛු භගවතො පච්චස්සොසුං. භගවා එතදවොච:
1. කතමෙ ච භික්ඛවෙ, අට්ඨ අස්සඛලුඞ්කා අට්ඨ ච අස්සදොසා: ඉධ භික්ඛවෙ, එකච්චො අස්සඛලුඞ්කො ‘පෙහී’ති වුත්තො විද්ධො සමානො චොදිතො සාරථිනා පච්ඡතො පටිසක්කති{1} පිට්ඨිතො රථං පටිවත්තෙති{2}. එවරූපොපි භික්ඛවෙ ඉධෙකච්චො අස්සඛලුඞ්කො හොති. අයං භික්ඛවෙ, පඨමො අස්සදොසො.
2. පුන චපරං භික්ඛවෙ, ඉධෙකච්චො අස්සඛලුඞ්කො ‘පෙහී’ති වුත්තො විද්ධො සමානො චොදිතො සාරථිනා පච්ඡා ලංඝති{3} කුබ්බරං හන්ති. තිදණ්ඩං භඤ්ජති. එවරූපොපි භික්ඛවෙ, ඉධෙකච්චො අස්සඛලුඞ්කො හොති. අයං භික්ඛවෙ දුතියො අස්සදොසො.
3. පුන චපරං භික්ඛවෙ, ඉධෙකච්චො අස්සඛලුඞ්කො ‘පෙහී’ති වුත්තො විද්ධො සමානො චොදිතො සාරථිනා රථිසාය සත්ථිං උස්සජ්ජිත්වා{4} රථිසං යෙව අජ්ඣොමද්දති, එවරූපොපි භික්ඛවෙ, ඉධෙකච්චො අස්සඛලුඞ්කො හොති. අයං භික්ඛවෙ තතියො අස්සදොසො.
4. පුන චපරං භික්ඛවෙ ඉධෙකච්චො අස්සඛලුඞ්කො ‘පෙහී’ති වුත්තො විද්ධො සමානො චොදිතො සාරථිනා උම්මග්ගං ගණ්හාති, උබ්බටුමං රථං කරොති. එවරූපොපි භික්ඛවෙ ඉධෙකච්චො අස්සඛලුඞ්කො හොති. අයං භික්ඛවෙ චතුත්ථො අස්සදොසො.
5. පුන චපරං භික්ඛවෙ, ඉධෙකච්චො අස්සඛලුඞ්කො ‘පෙහී’ති වුත්තො විද්ධො සමානො චොදිතො සාරථිනා ලඞ්ඝති පුරිමං කායං, පග්ගණ්හාති පුරිමෙ පාදෙ. එවරූපොපි භික්ඛවෙ ඉධෙකච්චො අස්සඛලුඞ්කො හොති. අයං භික්ඛවෙ, පඤ්චමො අස්සදොසො.
6. පුන චපරං භික්ඛවෙ ඉධෙකච්චො අස්සඛලුඞ්කො ‘පෙහී’ති වුත්තො විද්ධො සමානො චොදිතො සාරථිනා අනාදියිත්වා සාරථිං අනාදියිත්වා පතොදං{1} දන්තෙහි{2} මුඛාධානං විදංසිත්වා{3} යෙන කාමං පක්කමති, එවරූපොපි භික්ඛවෙ, ඉධෙකච්චො අස්සඛලුඞ්කො හොති. අයං භික්ඛවෙ, ඡට්ඨො අස්සදොසො.
7. පුන චපරං භික්ඛවෙ ඉධෙකච්චො අස්සඛලුඞ්කො ‘පෙහී’ති වුත්තො විද්ධො සමානො චොදිතො සාරථිනා, නෙව අභික්කමති, නො පටික්කමති, තත්ථෙව ඛීලට්ඨායී ඨිතො හොති. එවරූපොපි භික්ඛවෙ, ඉධෙකච්චො අස්සඛලුඞ්කො හොති. අයං භික්ඛවෙ, සත්තමො, අස්සදොසො.
8. පුන චපරං භික්ඛවෙ ඉධෙකච්චො අස්සඛලුඞ්කො ‘පෙහී’ති වුත්තො විද්ධො සමානො චොදිතො සාරථිනා පුරිමෙ ච පාදෙ සංහරිත්වා පච්ඡිමෙ ච පාදෙ සංහරිත්වා තත්ථෙව චත්තාරො පාදෙ අභිනිසීදති. එවරූපොපි භික්ඛවෙ, ඉධෙකච්චො අස්සඛලුඞ්කො හොති. අයං භික්ඛවෙ, අට්ඨමො අස්සදොසො. ඉමෙ ඛො භික්ඛවෙ, අට්ඨ අස්සඛලුඞ්කා අට්ඨ ච අස්සදොසා.
1. කතමෙ ච භික්ඛවෙ අට්ඨ ච පුරිසඛලුඞ්කා, අට්ඨ ච පුරිසදොසා: ඉධ භික්ඛවෙ භික්ඛු භික්ඛුං ආපත්තියා චොදෙන්ති. සො භික්ඛු භික්ඛූහි ආපත්තියා චොදියමානො න සරාමීති අසතියා ව නිබ්බෙඨෙති. සෙය්යථාපි සො භික්ඛවෙ, අස්සඛලුඞ්කො පෙහීති වුත්තො විද්ධො සමානො චොදිතො සාරථිනා පච්ඡතො පටිසක්කති පිට්ඨිතො රථං පටිවත්තෙති. තථූපමාහං භික්ඛවෙ, ඉමං පුග්ගලං වදාමි. එවරූපොපි භික්ඛවෙ, ඉධෙකච්චො පුරිසඛලුඞ්කො හොති. අයං භික්ඛවෙ, පඨමො පුරිසදොසො.
2. පුන චපරං භික්ඛවෙ භික්ඛු භික්ඛුං ආපත්තියා චොදෙන්ති සො භික්ඛු භික්ඛූහි ආපත්තියා චොදියමානො චොදකං යෙව පටිප්ඵරති. කිං නුඛො තුය්හං බාලස්ස අබ්යත්තස්ස භණිතෙන ත්වම්පි නාම භණිතබ්බං මඤ්ඤසීති. සෙය්යථාපි සො භික්ඛවෙ අස්සඛලුඞ්කො පෙහීති වුත්තො විද්ධො සමානො චොදිතො සාරථිනා පච්ඡාලංඝති, කුබ්බරං හන්ති, තිදණ්ඩං භඤ්ජති. තථූපමාහං භික්ඛවෙ ඉමං පුග්ගලං වදාමි. එවරූපොපි භික්ඛවෙ, ඉධෙකච්චො පුරිසඛලුඞ්කො හොති. අයං භික්ඛවෙ දුතියො පුරිසදොසො.
3. පුන චපරං භික්ඛවෙ, භික්ඛු භික්ඛුං ආපත්තියා චොදෙන්ති. සො භික්ඛු භික්ඛූහි ආපත්තියා චොදියමානො චොදකස්සෙව පච්චාරොපෙති ත්වම්පි ඛොසි ඉත්ථන්නාමං ආපත්තිං ආපන්නො ත්වං තාව පඨමං පටිකරොහීති. සෙය්යථාපි සො භික්ඛවෙ, අස්සඛලුඞ්කො පෙහීති වුත්තො විද්ධො සමානො චොදිතො සාරථිනා රථිසාය සත්ථිං උස්සජ්ජිත්වා රථිසං යෙව අජ්ඣොමද්දති. තථූපමාහං භික්ඛවෙ, ඉමං පුග්ගලං වදාමි. එවරූපොපි භික්ඛවෙ, ඉධෙකච්චො පුරිසඛලුඞ්කො හොති. අයං භික්ඛවෙ, තතියො පුරිසදොසො.
4. පුන චපරං භික්ඛවෙ, භික්ඛු භික්ඛුං ආපත්තියා චොදෙන්ති. සො භික්ඛු භික්ඛූහි ආපත්තියා චොදියමානො අඤ්ඤෙනඤ්ඤං පටිචරති, බහිද්ධා කථං අපනාමෙති, කොපඤ්ච දොසඤ්ච අප්පච්චයං ච පාතුකරොති. සෙය්යථාපි සො භික්ඛවෙ, අස්සඛලුඞ්කො පෙහීති වුත්තො විද්ධො සමානො චොදිතො සාරථිනා උම්මග්ගං ගණ්හාති, උබ්බටුමං රථං කරොති. තථූපමාහං භික්ඛවෙ, ඉමං පුග්ගලං වදාමි. එවරූපොපි භික්ඛවෙ, ඉධෙකච්චො පුරිසඛලුඞ්කො හොති. අයං භික්ඛවෙ, චතුත්ථො පුරිසදොසො.
5. පුන චපරං භික්ඛවෙ, භික්ඛු භික්ඛුං ආපත්තියා චොදෙන්ති. සො භික්ඛු භික්ඛූහි ආපත්තියා චොදියමානො සඞ්ඝමජ්ඣෙ බාහා වික්ඛෙපං භණති. සෙය්යථාපි සො භික්ඛවෙ අස්සඛලුඞ්කො පෙහීති වුත්තො විද්ධො සමානො චොදිතො සාරථිනා ලඞ්ඝති පුරිමං කායං, පග්ගණ්හාති පුරිමෙ පාදෙ, තථූපමාහං භික්ඛවෙ, ඉමං පුග්ගලං වදාමි එවරූපොපි භික්ඛවෙ ඉධෙකච්චො පුරිසඛලුඞ්කො හොති. අයං භික්ඛවෙ, පඤ්චමො පුරිසදොසො.
6. පුන චපරං භික්ඛවෙ, භික්ඛු භික්ඛුං ආපත්තියා චොදෙන්ති. සො භික්ඛු භික්ඛූහි ආපත්තියා චොදියමානො අනාදියිත්වා සඞ්ඝං අනාදියිත්වා චොදකං සාපත්තිකොව යෙන කාමං පක්කමති. සෙය්යථාපි සො භික්ඛවෙ, අස්සඛලුඞ්කො පෙහීති වුත්තො විද්ධො සමානො චොදිතො සාරථිනා අනාදියිත්වා සාරථිං අනාදියිත්වා පතොදං දන්තෙහි මුඛාධානං විදංසිත්වා{1} යෙන කාමං පක්කමති. තථූපමාහං භික්ඛවෙ, ඉමං පුග්ගලං වදාමි. එව රූපොපි භික්ඛවෙ, ඉධෙකච්චො පුරිසඛලුඞ්කො හොති. අයං භික්ඛවෙ ඡට්ඨො පුරිසදොසො.
7. පුන චපරං භික්ඛවෙ භික්ඛු භික්ඛුං ආපත්තියා චොදෙන්ති. සො භික්ඛු භික්ඛූහි ආපත්තියා චොදියමානො නෙවාහං ආපත්තොම්හි න පනාහං ආපත්තොම්හීති තුණ්හීභාවෙන සඞ්ඝං විහෙසෙති. සෙය්යථාපි සො භික්ඛවෙ, අස්සඛලුඞ්කො පෙහීති වුත්තො විද්ධො සමානො චොදිතො සාරථිනා නෙව අභික්කමති, නො පටික්කමති, තත්ථෙව ඛීලට්ඨායී ඨිතො හොති. තථූපමාහං භික්ඛවෙ ඉමං පුග්ගලං වදාමි. එවරූපොපි භික්ඛවෙ, ඉධෙකච්චො පුරිසඛලුඞ්කො හොති. අයං භික්ඛවෙ, සත්තමො පුරිසදොසො.
8. පුන චපරං භික්ඛවෙ භික්ඛු භික්ඛුං ආපත්තියා චොදෙන්ති. සො භික්ඛු භික්ඛූහි ආපත්තියා චොදියමානො එවමාහ; කිං නුඛො තුම්හෙ ආයස්මන්තො අතිබාළ්හං මයි බ්යාවටා, ඉදානාහං සික්ඛං පච්චක්ඛාය හීනායාවත්තිස්සාමීති, සො සික්ඛං පච්චක්ඛාය හීනායාවත්තිත්වා එවමාහ: ඉදානි ඛො තුම්හෙ ආයස්මන්තො අත්තමනා හොථා’ති, සෙය්යථාපි සො භික්ඛවෙ අස්සඛලුඞ්කො පෙහීති වුත්තො විද්ධො සමානො චොදිතො සාරථිනා පුරිමෙ ච පාදෙ සංහරිත්වා පච්ඡිමෙ ව පාදෙ සංහරිත්වා තත්ථෙව චත්තාරො පාදෙ අභිනිසීදති. තථූපමාහං භික්ඛවෙ ඉමං පුග්ගලං වදාමි. එවරූපොපි භික්ඛවෙ ඉධෙකච්චො පුරිසඛලුඞ්කො හොති. අයං භික්ඛවෙ අට්ඨමො පුරිසදොසො. ඉමෙ ඛො භික්ඛවෙ අට්ඨ පුරිසඛලුඞ්කා අට්ඨ ච පුරිසදොසාති.
8. 1. 2. 5.
මල සුත්තං
[සාවත්ථිනිදානං]
අට්ඨිමානි භික්ඛවෙ මලානි කතමානි අට්ඨ.
අසජ්ඣාය මලා භික්ඛවෙ මන්තා, අනුට්ඨානමලා භික්ඛවෙ ඝරා, මලං භික්ඛවෙ වණ්ණස්ස කොසජ්ජං, පමාදො භික්ඛවෙ රක්ඛතො මලං. මලං භික්ඛවෙ ඉත්ථියා දුච්චරිතං. මච්ඡෙරං භික්ඛවෙ දදතො මලං. මලා භික්ඛවෙ පාපකා අකුසලා ධම්මා අස්මිං ලොකෙ පරම්හි ච. තතො භික්ඛවෙ මලා මලතරං අවිජ්ජා පරමං මලං. ඉමානි ඛො භික්ඛවෙ අට්ඨ මලානීති.
1. අසජ්ඣාය මලා මන්තා අනුට්ඨානමලා ඝරා, මලං වණ්ණස්ස කොසජ්ජං පමාදො රක්ඛතො මලං
2. මලිත්ථියා දුච්චරිතං මච්ඡෙරං දදතො මලං, මලා වෙ පාපකා ධම්මා අස්මිං ලොකෙ පරම්හි ච තතො මලා මලතරං අවිජ්ජා පරමං මලන්ති.
8. 1. 2. 6.
දූතෙය්ය සුත්තං
[සාවත්ථිනිදානං]
අට්ඨහි භික්ඛවෙ ධම්මෙහි සමන්නාගතො භික්ඛු දූතෙය්යං ගන්තුමරහති. කතමෙහි අට්ඨහි:
ඉධ භික්ඛවෙ භික්ඛු සොතා ච හොති සාවෙතා ච, උග්ගහෙතා ච ධාරෙතා ච, විඤ්ඤාතා ච විඤ්ඤාපෙතා ච, කුසලො ච සහිතාසහිතස්ස, නො ච කලහකාරකො. ඉමෙහි ඛො භික්ඛවෙ, අට්ඨහි ධම්මෙහි සමන්නාගතො භික්ඛු දූතෙය්යං ගන්තුමරහති.
අට්ඨහි භික්ඛවෙ ධම්මෙහි සමන්නාගතො සාරිපුත්තො දූතෙය්යං ගන්තුමරහති. කතමෙහි අට්ඨහි:
ඉධ භික්ඛවෙ සාරිපුත්තො සොතා ච හොති සාවෙතා ච, උග්ගහෙතා ච, ධාරෙතා ච, විඤ්ඤාතා ච, විඤ්ඤාපෙතා ච, කුසලො ච සහිතාසහිතස්ස, නො ච කලහකාරකො. ඉමෙහි ඛො භික්ඛවෙ අට්ඨහි ධම්මෙහි සමන්නාගතො සාරිපුත්තො දූතෙය්යං ගන්තුමරහතීති.
1. යො වෙ නවෙධති{1} පත්වා පරිසං උග්ගවාදිනිං{2}. න ච හාපෙති වචනං න ච ඡාදෙති සාසනං,
2. අසන්දිද්ධඤ්ච භණති පුච්ඡිතො න ච කුප්පති, ස වෙ තාදිසකො භික්ඛු දූතෙය්යං ගන්තුමරහතීති.
8. 1. 2. 7.
පුරිසබන්ධන සුත්තං
[සාවත්ථිනිදානං]
අට්ඨහි භික්ඛවෙ ආකාරෙහි ඉත්ථි පුරිසං බන්ධති, කතමෙහි අට්ඨහි:
රූපෙන භික්ඛවෙ, ඉත්ථි පුරිසං බන්ධති. හසිතෙන භික්ඛවෙ ඉත්ථි පුරිසං බන්ධති. භණිතෙන භික්ඛවෙ ඉත්ථි පුරිසං බන්ධති. ගීතෙන භික්ඛවෙ ඉත්ථි පුරිසං බන්ධති. රුණ්ණෙන{1} භික්ඛවෙ ඉත්ථි පුරිසං බන්ධති. ආකප්පෙන භික්ඛවෙ ඉත්ථි පුරිසං බන්ධති. වනභඞ්ගෙන භික්ඛවෙ, ඉත්ථී පුරිසං බන්ධති. ඵස්සෙන භික්ඛවෙ ඉත්ථි පුරිසං බන්ධති. ඉමෙහි ඛො භික්ඛවෙ අට්ඨහි ආකාරෙහි ඉත්ථි පුරිසං බන්ධති. තෙ භික්ඛවෙ සත්තා සුබද්ධා යෙ{2} ඵස්සෙන බද්ධාති.{3}{*}
8. 1. 2. 8.