[භල්ලිකාදි වීසති සුත්තානි]
[සාවත්ථිනිදානං]
17-36. ඡහි භික්ඛවෙ ධම්මෙහි සමන්නාගතො භල්ලිකො ගහපති -පෙ- සුදත්තො ගහපති අනාථපිණ්ඩිකො -පෙ- චිත්තො ගහපති මච්ඡිකාසණ්ඩිකො -පෙ- හත්ථකො ආළවකො -පෙ- මහානාමො සක්කො -පෙ- උග්ගො ගහපති වෙසාලිකො -පෙ- උග්ගතො ගහපති -පෙ- සූරො අම්බට්ඨො -පෙ- ජීවකො කොමාරභච්චො -පෙ- නකුලපිතා ගහපති -පෙ- තවකණ්ණිකො ගහපති -පෙ- පූරණො ගහපති -පෙ- ඉසිදත්තො ගහපති -පෙ- සන්ධානො ගහපති -පෙ- විජයො ගහපති{2} -පෙ- වජ්ජියමහිතො ගහපති{3} -පෙ- මෙණ්ඩකො ගහපති -පෙ- වාසෙට්ඨො උපාසකො -පෙ- අරිට්ඨො උපාසකො -පෙ- සාරග්ගො{4} උපාසකො තථාගතෙ නිට්ඨංගතො අමතද්දසො අමතං සච්ඡිකත්වා ඉරීයති. කතමෙහි ඡහි.
බුද්ධෙ අවෙච්චප්පසාදෙන, ධම්මෙ අවෙච්චප්පසාදෙන, සඞ්ඝෙ අවෙච්චප්පසාදෙන, අරියෙන සීලෙන, අරියෙන ඤාණෙන. අරියාය විමුත්තියා.
ඉමෙහි ඛො භික්ඛවෙ ඡහි ධම්මෙහි සමන්නාගතො සාරග්ගො උපාසකො තථාගතෙ නිට්ඨං ගතො අමතද්දසො අමතං සච්ඡිකත්වා ඉරීයතීති.
සාමඤ්ඤ වග්ගො.
ඡක්කනිපාතෙ රාගාදිපෙය්යාල සුත්තානි.
[සාවත්ථිනිදානං]
1. රාගස්ස භික්ඛවෙ අභිඤ්ඤාය ඡ ධම්මා භාවෙතබ්බා. කතමෙ ඡ:
දස්සනානුත්තරියං, සවනානුත්තරියං, ලාභානුත්තරියං, සික්ඛානුත්තරියං, පාරිචරියානුත්තරියං, අනුස්සතානුත්තරියං.
රාගස්ස භික්ඛවෙ අභිඤ්ඤාය ඉමෙ ඡ ධම්මා භාවෙතබ්බාති.
[සාවත්ථිනිදානං]
2. රාගස්ස භික්ඛවෙ අභිඤ්ඤාය ඡ ධම්මා භාවෙතබ්බා. කතමෙ ඡ:
බුද්ධානුස්සති, ධම්මානුස්සති, සඞ්ඝානුස්සති, සීලානුස්සති, චාගානුස්සති, දෙවතානුස්සති.
රාගස්ස භික්ඛවෙ අභිඤ්ඤාය ඉමෙ ඡ ධම්මා භාවෙතබ්බාති.
[සාවත්ථිනිදානං]
3. රාගස්ස භික්ඛවෙ අභිඤ්ඤාය ඡ ධම්මා භාවෙතබ්බා. කතමෙ ඡ:
අනිච්චසඤ්ඤා, අනිච්චෙ දුක්ඛසඤ්ඤා, දුක්ඛෙ අනත්තසඤ්ඤා, පහානසඤ්ඤා, විරාගසඤ්ඤා, නිරොධසඤ්ඤා.
රාගස්ස භික්ඛවෙ අභිඤ්ඤාය ඉමෙ ඡ ධම්මා භාවෙතබ්බාති.
[සාවත්ථිනිදානං]
4-30 රාගස්ස භික්ඛවෙ පරිඤ්ඤාය [ඡ ධම්මා භාවෙතබ්බා -පෙ- රාගස්ස භික්ඛවෙ] පරික්ඛයාය -පෙ- පහානාය -පෙ- ඛයාය -පෙ- වයාය -පෙ- විරාගාය -පෙ- නිරොධාය -පෙ- චාගාය -පෙ- පටිනිස්සග්ගාය ඉමෙ ඡ ධම්මා භාවෙතබ්බා’ති.
31-60 දොසස්ස [භික්ඛවෙ අභිඤ්ඤාය ඡ ධම්මා භාවෙතබ්බා -පෙ- දොසස්ස භික්ඛවෙ] පරිඤ්ඤාය -පෙ- පරික්ඛයාය -පෙ- පහානාය -පෙ- ඛයාය -පෙ- වයාය -පෙ- විරාගාය -පෙ- නිරොධාය -පෙ- චාගාය -පෙ- පටිනිස්සග්ගාය ඉමෙ ඡ ධම්මා භාවෙතබ්බා’ති.
61-90. මොහස්ස භික්ඛවෙ -පෙ-
91-120. කොධස්ස භික්ඛවෙ -පෙ-
121-150. උපනාහස්ස භික්ඛවෙ -පෙ-
151-180. මක්ඛස්ස භික්ඛවෙ -පෙ-
181-210. පලාසස්ස භික්ඛවෙ -පෙ-
211-240. ඉස්සාය භික්ඛවෙ -පෙ-
241-270. මච්ඡරියස්ස භික්ඛවෙ -පෙ-
271-300. මායාය භික්ඛවෙ -පෙ-
301-330. සාඨෙය්යස්ස භික්ඛවෙ -පෙ-
331-360. ථම්භස්ස භික්ඛවෙ -පෙ-
361-390. සාරම්භස්ස භික්ඛවෙ -පෙ-
391-420. මානස්ස භික්ඛවෙ -පෙ-
421-450. අතිමානස්ස භික්ඛවෙ -පෙ-
451-480. මදස්ස භික්ඛවෙ -පෙ-
481-510. පමාදස්ස භික්ඛවෙ අභිඤ්ඤාය -පෙ- පරිඤ්ඤාය -පෙ- පරික්ඛයාය -පෙ- පහානාය -පෙ- ඛයාය -පෙ- වයාය -පෙ- විරාගාය -පෙ- නිරොධාය -පෙ- චාගාය -පෙ- පටිනිස්සග්ගාය ඡ ධම්මා භාවෙතබ්බා කතමෙ ඡ: දස්සනානුත්තරියං -පෙ- අනුස්සතානුත්තරියං -පෙ- කතමෙ ඡ බුද්ධානුස්සති -පෙ- කතමෙ ඡ අනිච්චසඤ්ඤා -පෙ- පමාදස්ස භික්ඛවෙ අභිඤ්ඤාය -පෙ- පරිඤ්ඤාය -පෙ- පරික්ඛයාය -පෙ- පහානාය -පෙ- ඛයාය -පෙ- වයාය -පෙ- විරාගාය -පෙ- නිරොධාය -පෙ- චාගාය -පෙ- පටිනිස්සග්ගාය ඉමෙ ඡ ධම්මා භාවෙතබ්බා’ති.
ඉදමවොච භගවා. අත්තමනා තෙ භික්ඛූ භගවතො භාසිතං අභිනන්දුන්ති.
රාගාදිපෙය්යාලො{*} නිට්ඨිතො.
ඡක්කනිපාතො සමත්තො.
අඞ්ගුත්තරනිකායො
7. සත්තකනිපාතො
1. පඨමො පණ්ණාසකො
1. ධන වග්ගො
නමො තස්ස භගවතො අරහතො සම්මාසම්බුද්ධස්ස.
7. 1. 1. 1.
[පඨම පියභික්ඛු සුත්තං]
1. එවං මෙ සුතං: එකං සමයං භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. තත්ර ඛො භගවා භික්ඛූ ආමන්තෙසි භික්ඛවොති. භදන්තෙති තෙ භික්ඛූ භගවතො පච්චස්සොසුං. භගවා එතදවොච:
සත්තහි භික්ඛවෙ, ධම්මෙහි සමන්නාගතො භික්ඛු සබ්රහ්මචාරීනං අප්පියො ච හොති අමනාපො ච අගරු ච අභාවනීයො ච. කතමෙහි සත්තහි:
ඉධ භික්ඛවෙ, භික්ඛු ලාභකාමො ච හොති, සක්කාරකාමො ච,{1} අනවඤ්ඤත්තිකාමො ච, අහිරිකො ච, අනොත්තප්පී ච, පාපිච්ඡො ච, මිච්ඡාදිට්ඨි ච.
ඉමෙහි ඛො භික්ඛවෙ, සත්තහි ධම්මෙහි සමන්නාගතො භික්ඛු සබ්රහ්මචාරීනං අප්පියො ච හොති අමනාපො ච අගරු ච අභාවනීයො ච.
සත්තහි භික්ඛවෙ, ධම්මෙහි සමන්නාගතො භික්ඛු සබ්රහ්මචාරීනං පියො ච හොති මනාපො ච ගරු ච භාවනීයො ච. කතමෙහි සත්තහි:
ඉධ භික්ඛවෙ, භික්ඛු න ලාභකාමො ච හොති, න සක්කාරකාමො ච, න අනවඤ්ඤත්තිකාමො ච, හිරිමා ච, ඔත්තප්පී ච, අප්පිච්ඡො ච, සම්මාදිට්ඨි ච.
ඉමෙහි ඛො භික්ඛවෙ, සත්තහි ධම්මෙහි සමන්නාගතො භික්ඛු සබ්රහ්මචාරීනං පියො ච හොති මනාපො ච ගරු ච භාවනීයො චාති.
7. 1. 1. 2.
[දුතිය පියභික්ඛු සුත්තං]
[සාවත්ථිනිදානං]
2. සත්තහි භික්ඛවෙ, ධම්මෙහි සමන්නාගතො භික්ඛු සබ්රහ්මචාරීනං අප්පියො ච හොති අමනාපො ච අගරු ච අභාවනීයො ච. කතමෙහි සත්තහි:
ඉධ භික්ඛවෙ, භික්ඛු ලාභකාමො ච හොති, සක්කාරකාමො ච, අනවඤ්ඤත්තිකාමො ච, අහිරිකො ච, අනොත්තප්පී ච, ඉස්සුකී ච, මච්ඡරී ච.
ඉමෙහි ඛො භික්ඛවෙ, සත්තහි ධම්මෙහි සමන්නාගතො භික්ඛු සබ්රහ්මචාරීනං අප්පියො ච හොති අමනාපො ච අගරු ච අභාවනීයො ච.
සත්තහි භික්ඛවෙ, ධම්මෙහි සමන්නාගතො භික්ඛු සබ්රහ්මචාරීනං පියො ච හොති මනාපො ච ගරු ච භාවනීයො ච. කතමෙහි සත්තහි?
ඉධ භික්ඛවෙ භික්ඛු න ලාභකාමො ච හොති, න සක්කාරකාමො ච, න අනවඤ්ඤත්තිකාමො ච, හිරිමා ච, ඔත්තප්පී ච, අනුස්සුකී ච, අමච්ඡරී ච.
ඉමෙහි ඛො භික්ඛවෙ, සත්තහි ධම්මෙහි සමන්නාගතො භික්ඛු සබ්රහ්මචාරීනං පියො ච හොති මනාපො ච ගරු ච භාවනීයො චාති.
7. 1. 1. 3.
[සඞ්ඛිත්ත සත්තබල සුත්තං]
[සාවත්ථිනිදානං]
3. සත්තිමානි භික්ඛවෙ, බලානි. කතමානි සත්ත:
සද්ධාබලං, විරියබලං, හිරිබලං, ඔත්තප්පබලං, සතිබලං, සමාධිබලං, පඤ්ඤාබලං. ඉමානි ඛො භික්ඛවෙ සත්තබලානි.
1. සද්ධාබලං විරියබලං හිරිඔත්තප්පියං බලං{1} සතිබලං සමාධී ච පඤ්ඤා වෙ සත්තමං බලං. එතෙහි බලවා භික්ඛු සුඛං ජීවති පණ්ඩිතො.
2. යොනිසො විචිනෙ ධම්මං පඤ්ඤායත්ථං විපස්සති. පජ්ජොතස්සෙව නිබ්බානං විමොක්ඛො හොති චෙතසො’ති.
7. 1. 1. 4.
[විත්ථතසත්තබල සුත්තං]
[සාවත්ථිනිදානං]
4. සත්තිමානි භික්ඛවෙ, බලානි. කතමානි සත්ත:
සද්ධාබලං, විරියබලං, හිරිබලං, ඔත්තප්පබලං, සතිබලං, සමාධිබලං, පඤ්ඤාබලං.
(1) කතමඤ්ච භික්ඛවෙ, සද්ධාබලං:
ඉධ භික්ඛවෙ අරියසාවකො සද්ධො හොති සද්දහති තථාගතස්ස බොධිං: “ඉතිපි සො භගවා අරහං සම්මාසම්බුද්ධො විජ්ජාචරණසම්පන්නො සුගතො ලොකවිදූ අනුත්තරො පුරිසදම්මසාරථි සත්ථා දෙවමනුස්සානං බුද්ධො භගවා”ති. ඉදං වුච්චති භික්ඛවෙ සද්ධාබලං.
(2) කතමඤ්ච භික්ඛවෙ, විරියබලං:
ඉධ භික්ඛවෙ, අරියසාවකො ආරද්ධවිරියො විහරති: අකුසලානං ධම්මානං පහානාය, කුසලානං ධම්මානං උපසම්පදාය, ථාමවා දළ්හපරක්කමො අනික්ඛිත්තධුරො කුසලෙසු ධම්මෙසු. ඉදං වුච්චති භික්ඛවෙ, විරියබලං.
(3) කතමඤ්ච භික්ඛවෙ, හිරිබලං:
ඉධ භික්ඛවෙ, අරියසාවකො හිරිමා හොති, හිරීයති කායදුච්චරිතෙන, වචීදුච්චරිතෙන, මනොදුච්චරිතෙන, හිරීයති පාපකානං අකුසලානං ධම්මානං සමාපත්තියා. ඉදං වුච්චති භික්ඛවෙ, හිරිබලං.
(4) කතමඤ්ච භික්ඛවෙ, ඔත්තප්පබලං:
ඉධ භික්ඛවෙ, අරියසාවකො ඔත්තප්පී හොති, ඔත්තපති කායදුච්චරිතෙන, වචීදුච්චරිතෙන, මනොදුච්චරිතෙන, ඔත්තපති පාපකානං අකුසලානං ධම්මානං සමාපත්තියා. ඉදං වුච්චති භික්ඛවෙ, ඔත්තප්පබලං.
(5) කතමඤ්ච භික්ඛවෙ, සතිබලං:
ඉධ භික්ඛවෙ, අරියසාවකො සතිමා හොති පරමෙන සතිනෙපක්කෙන සමන්නාගතො චිරකතම්පි චිරභාසිතම්පි සරිතා අනුස්සරිතා. ඉදං වුච්චති භික්ඛවෙ, සතිබලං.
(6) කතමඤ්ච භික්ඛවෙ, සමාධිබලං:
ඉධ භික්ඛවෙ, අරියසාවකො විවිච්චෙව කාමෙහි -පෙ- චතුත්ථංඣානං උපසම්පජ්ජ විහරති. ඉදං වුච්චති භික්ඛවෙ, සමාධිබලං.
(7) කතමඤ්ච භික්ඛවෙ, පඤ්ඤාබලං:
ඉධ භික්ඛවෙ අරියසාවකො පඤ්ඤවා හොති උදයත්ථගාමිනියා පඤ්ඤාය සමන්නාගතො අරියාය නිබ්බෙධිකාය සම්මා දුක්ඛක්ඛයගාමිනියා. ඉදං වුච්චති භික්ඛවෙ, පඤ්ඤාබලං.
ඉමානි ඛො භික්ඛවෙ, සත්තබලානි.
3. සද්ධාබලං විරියබලං{1} හිරිඔත්තප්පියං බලං සතිබලං සමාධී ච පඤ්ඤා වෙ සත්තමං බලං. එතෙහි බලවා භික්ඛු සුඛං ජීවති පණ්ඩිතො.
4. යොනිසො විචිනෙ ධම්මං පඤ්ඤායත්ථං විපස්සති පජ්ජොතස්සෙව නිබ්බානං විමොඛො හොති චෙතසො’ති.
7. 1. 1. 5.
[සඞ්ඛිත්ත ධනසුත්තං]
[සාවත්ථිනිදානං]
5. සත්තිමානි භික්ඛවෙ, ධනානි. කතමානි සත්ත:
සද්ධාධනං, සීලධනං, හිරිධනං, ඔත්තප්පධනං, සුතධනං, චාගධනං, පඤ්ඤාධනං.
ඉමානි ඛො භික්ඛවෙ, සත්ත ධනානී’ති.
5. සද්ධාධනං සීලධනං හිරි ඔත්තප්පියං ධනං සුතධනං ච චාගො ච පඤ්ඤා වෙ සත්තමං ධනං.
6. යස්ස එතෙ ධනා අත්ථි ඉත්ථියා පුරිසස්ස වා අදළිද්දොති තං ආහු අමොඝං තස්ස ජීවිතං.