1. නාසෙතබ්බා{2} පාදුකා ච පත්තා ච චීවරානි ච, තතියා පුච්ඡිතබ්බා ච අධිට්ඨාන විකප්පනා.
2. අරුණා ගණ්ඨිකා වීඨා{1} අකප්පියා ච කප්පියා, නිස්සයා වන්දියා චෙව පරමානි වරානි ච; සීමාදොසා ච අක්කොසා මෙත්තායෙකාදසා කතාති.
එකුත්තරිකං නිට්ඨිතං.
තස්සුද්දානං:
1. එකකා ච දුකා චෙව තිකා ච චතු පඤ්චකා, ඡ සත්තට්ඨ නවකා ච දස එකාදසානි ච.
2. හිතාය සබ්බසත්තානං ඤාතධම්මෙන තාදිනා, එකුත්තරිකා විමලා මහාවීරෙන දෙසිතාති.
උපොසථාදි පුච්ඡා විස්සජ්ජනා
පුච්ඡා
1. උපොසථකම්මස්ස කො ආදි, කිං මජ්ඣෙ, කිං පරියොසානං. පවාරණස්ස කම්මස්ස කො ආදි, කිං මජ්ඣෙ, කිං පරියොසානං. තජ්ජනීයකම්මස්ස කො ආදි, කිං මජ්ඣෙ, කිං පරියොසානං, නියස්සකම්මස්ස -පෙ- පබ්බාජනීයකම්මස්ස -පෙ- පටිසාරණීයකම්මස්ස -පෙ- උක්ඛෙපනීයකම්මස්ස -පෙ- පරිවාසදානස්ස -පෙ- මූලායපටිකස්සනාය -පෙ- මානත්තදානස්ස -පෙ- අබ්භානස්ස -පෙ- උපසම්පදාකම්මස්ස කො ආදි, කිං මජ්ඣෙ, කිං පරියොසානං :
2. තජ්ජනීයකම්මස්ස පටිප්පස්සද්ධියා කො ආදි, කිං මජ්ඣෙ, කිං පරියොසානං, නියස්සකම්මස්ස පටිප්පස්සද්ධියා -පෙ- පබ්බාජනීයකම්මස්ස පටිප්පස්සද්ධියා -පෙ- පටිසාරණීයකම්මස්ස පටිප්පස්සද්ධියා -පෙ- උක්ඛෙපනීයකම්මස්ස පටිප්පස්සද්ධියා කො ආදි, කිං මජ්ඣෙ, කිං පරියොසානං.
3. සතිවිනයස්ස කො ආදි, කිං මජ්ඣෙ, කිං පරියොසානං. අමූළ්හවිනයස්ස -පෙ- තස්සපාපිය්යසිකාය -පෙ- තිණවත්ථාරකස්ස -පෙ- භික්ඛුනොවාදකසම්මුතියා -පෙ- තිචීවරෙන අවිප්පවාසසම්මුතියා -පෙ- සන්ථතසම්මුතියා -පෙ- රූපියඡඩ්ඩකසම්මුතියා -පෙ- සාටියගාහාපකසම්මුතියා -පෙ- පත්තග්ගාහාපකසම්මුතියා -පෙ- දණ්ඩසම්මුතියා -පෙ- සික්කාසම්මුතියා -පෙ- දණ්ඩසික්කාසම්මුතියා කො ආදි, කිං මජ්ඣෙ, කිං පරියොසානං.
පුච්ඡා නිට්ඨිතා
විස්සජ්ජනා
1. උපොසථකම්මස්ස කො ආදි, කිං මජ්ඣෙ, කිං පරියොසානන්ති : උපොසථකම්මස්ස සාමග්ගී ආදි, කිරියා මජ්ඣෙ, නිට්ඨානං පරියොසානං.
2. පවාරණාකම්මස්ස කො ආදි, කිං මජ්ඣෙ, කිං පරියොසානන්ති : පවාරණාකම්මස්ස සාමග්ගී ආදි, කිරියා මජ්ඣෙ, නිට්ඨානං පරියොසානං.
3. තජ්ජනීයකම්මස්ස කො ආදි, කිං මජ්ඣෙ, කිං පරියොසානන්ති : තජ්ජනීයකම්මස්ස වත්ථු ච පුග්ගලො ච ආදි, ඤත්ති මජ්ඣෙ, කම්මවාචා පරියොසානං.
4. නියස්සකම්මස්ස -පෙ- පබ්බාජනීයකම්මස්ස -පෙ- පටිසාරණීයකම්මස්ස -පෙ- උක්ඛෙපනීයකම්මස්ස -පෙ- පරිවාසදානස්ස -පෙ- මූලායපටිකස්සනාය -පෙ- මානත්තදානස්ස -පෙ- අබ්භානස්ස -පෙ-.
5. උපසම්පදාකම්මස්ස කො ආදි, කිං මජ්ඣෙ, කිං පරියොසානන්ති : උපසම්පදාකම්මස්ස පුග්ගලො ආදි, ඤත්ති මජ්ඣෙ, කම්මවාචා පරියොසානං.
6. තජ්ජනීයකම්මස්ස පටිප්පස්සද්ධියා කො ආදි, කිං මජ්ඣෙ, කිං පරියොසානන්ති : තජ්ජනීයකම්මස්ස පටිප්පස්සද්ධියා සම්මාවත්තනා ආදි, ඤත්ති මජ්ඣෙ, කම්මවාචා පරියොසානං.
7. නියස්සකම්මස්ස -පෙ- පබ්බාජනීයකම්මස්ස -පෙ- පටිසාරණීයකම්මස්ස -පෙ- උක්ඛෙපනීයකම්මස්ස පටිප්පස්සද්ධියා කො ආදි, කිං මජ්ඣෙ, කිං පරියොසානන්ති : උක්ඛෙපනීයකම්මස්ස පටිප්පස්සද්ධියා සම්මා වත්තනා ආදි, ඤත්ති මජ්ඣෙ, කම්මවාචා පරියොසානං.
8. සතිවිනයස්ස කො ආදි , කිං මජ්ඣෙ, කිං පරියොසානන්ති : සතිවිනයස්ස වත්ථු ච පුග්ගලො ච ආදි, ඤත්ති මජ්ඣෙ, කම්මවාචා පරියොසානං.
9. අමූළ්හවිනයස්ස -පෙ- තස්ස පාපිය්යසිකාය -පෙ- තිණවත්ථාරකස්ස -පෙ- භික්ඛුනොවාදකසම්මුතියා -පෙ- තිචීවරෙන අවිප්පවාසසම්මුතියා -පෙ- සන්ථතසම්මුතියා -පෙ- රූපියඡඩ්ඩකසම්මුතියා -පෙ- සාටියගාහාපකසම්මුතියා -පෙ- පත්තගාහාපකසම්මුතියා -පෙ- දණ්ඩසම්මුතියා -පෙ- සික්කාසම්මුතියා -පෙ- දණ්ඩසික්කාසම්මුතියා කො ආදි, කිං මජ්ඣෙ, කිං පරියොසානන්ති : දණ්ඩසික්කාසම්මුතියා වත්ථු ච පුග්ගලො ච ආදි, ඤත්ති මජ්ඣෙ, කම්මවාචා පරියොසානං.
විස්සජ්ජනා නිට්ඨිතා.
උපොසථාදි පුච්ඡාවිස්සජ්ජනා නිට්ඨිතා.
අත්ථවසප්පකරණං
1. දස අත්ථවසෙ පටිච්ච තථාගතෙන සාවකානං සික්ඛාපදං පඤ්ඤත්තං : සඞ්ඝසුට්ඨුතාය, සඞ්ඝඵාසුතාය, දුම්මඞ්කූනං පුග්ගලානං නිග්ගහාය, පෙසලානං භික්ඛූනං ඵාසුවිහාරාය, දිට්ඨධම්මිකානං ආසවානං සංවරාය, සම්පරායිකානං ආසවානං පටිඝාතාය, අප්පසන්නානං පසාදාය, පසන්නානං භිය්යොභාවාය, සද්ධම්මට්ඨිතියා, විනයානුග්ගහාය.
2. යං සඞ්ඝසුට්ඨු තං සඞ්ඝඵාසු. යං සඞ්ඝඵාසු, තං දුම්මඞ්කූනං පුග්ගලානං නිග්ගහාය. යං දුම්මඞ්කූනං පුග්ගලානං නිග්ගහාය, තං පෙසලානං භික්ඛූනං ඵාසුවිහාරාය. යං පෙසලානං භික්ඛූනං ඵාසුවිහාරාය තං දිට්ඨධම්මිකානං ආසවානං සංවරාය. යං දිට්ඨධම්මිකානං ආසවානං සංවරාය, තං සම්පරායිකානං ආසවානං පටිඝාතාය. යං සම්පරායිකානං ආසවානං පටිඝාතාය, තං අප්පසන්නානං පසාදාය. යං අප්පසන්නානං පසාදාය, තං පසන්නානං භිය්යොභාවාය. යං පසන්නානං භිය්යොභාවාය, තං සද්ධම්මට්ඨිතියා. යං සද්ධම්මට්ඨිතියා, තං විනයානුග්ගහාය.
3. යං සඞ්ඝසුට්ඨු තං සඞ්ඝඵාසු. යං සඞ්ඝසුට්ඨු, තං දුම්මඞ්කූනං පුග්ගලානං නිග්ගහාය. යං සඞ්ඝසුට්ඨු, තං පෙසලානං භික්ඛූනං ඵාසුවිහාරාය. යං සඞ්ඝසුට්ඨු තං දිට්ඨධම්මිකානං ආසවානං සංවරාය. යං සඞ්ඝසුට්ඨු, තං සම්පරායිකානං ආසවානං පටිඝාතාය. යං සඞ්ඝසුට්ඨු, තං අප්පසන්නානං පසාදාය. යං සඞ්ඝසුට්ඨු, තං පසන්නානං භිය්යොභාවාය. යං සඞ්ඝසුට්ඨු, තං සද්ධම්මට්ඨිතියා. යං සඞ්ඝසුට්ඨු තං විනයානුග්ගහාය.
4. යං සඞ්ඝඵාසු, තං දුම්මඞ්කූනං පුග්ගලානං නිග්ගහාය. යං සඞ්ඝඵාසු, තං පෙසලානං භික්ඛූනං ඵාසුවිහාරාය. යං සඞ්ඝඵාසු, තං දිට්ඨධම්මිකානං ආසවානං සංවරාය, යං සඞ්ඝඵාසු, තං සම්පරායිකානං ආසවානං පටිඝාතාය. යං සඞ්ඝඵාසු, තං අප්පසන්නානං පසාදාය. යං සඞ්ඝඵාසු, තං පසන්නානං භිය්යොභාවාය. යං සඞ්ඝඵාසු, තං සද්ධම්මට්ඨිතියා. යං සඞ්ඝඵාසු, තං විනයානුග්ගහාය. යං සඞ්ඝඵාසු, තං සඞ්ඝසුට්ඨු.
5. යං දුම්මඞ්කූනං පුග්ගලානං නිග්ගහාය -පෙ- යං පෙසලානං භික්ඛූනං ඵාසුවිහාරාය -පෙ- යං දිට්ඨධම්මිකානං ආසවානං සංවරාය -පෙ- යං සම්පරායිකානං ආසවානං පටිඝාතාය -පෙ- යං අප්පසන්නානං පසාදාය -පෙ- යං පසන්නානං භිය්යොභාවාය -පෙ- යං සද්ධම්මට්ඨිතියා -පෙ-
6. යං විනයානුග්ගහාය, තං සඞ්ඝසුට්ඨු. යං විනයානුග්ගහාය, තං සඞ්ඝඵාසු. යං විනයානුග්ගහාය, තං දුම්මඞ්කූනං පුග්ගලානං නිග්ගහාය. යං විනයානුග්ගහාය, තං පෙසලානං භික්ඛූනං ඵාසුවිහාරාය. යං විනයානුග්ගහාය, තං දිට්ඨධම්මිකානං ආසවානං සංවරාය. යං විනයානුග්ගහාය, තං සම්පරායිකානං ආසවානං පටිඝාතාය. යං විනයානුග්ගහාය, තං අප්පසන්නානං පසාදාය. යං විනයානුග්ගහාය, තං පසන්නානං භිය්යොභාවාය. යං විනයානුග්ගහාය තං සද්ධම්මට්ඨිතියාති.
අත්ථසතං ධම්මසතං ද්වෙ නිරුත්තිසතානි ච, චත්තාරි ඤාණසතානි අත්ථවසෙ පකරණෙති.
අත්ථවසප්පකරණං නිට්ඨිතං.
මහාවග්ගො නිට්ඨිතො.
තස්සුද්දානං:
1. පඨමං අට්ඨ පුච්ඡාය පච්චයෙසු පුනට්ඨ ච, භික්ඛූනං සොළස එතෙ භික්ඛුනීනම්පි සොළස.
2. පෙය්යාල අන්තරා භෙදා එකුත්තරිකමෙව ච, පවාරණත්ථවසිකා මහාවග්ගස්ස සඞ්ගහොති.
ගාථාසඞ්ගණිකං
1. එකංසං චීවරං කත්වා, පග්ගහෙත්වාන{1} අඤ්ජලිං, ආසිංසමානරූපො ව{2} කිස්ස ත්වං ඉධ මාගතො.
2. ද්වීසු විනයෙසු පඤ්ඤත්තා යෙ උද්දෙසං ආගච්ඡන්ති උපොසථෙසු, කති තෙ සික්ඛාපදානි හොන්ති කතිසු නගරෙසු පඤ්ඤත්තා.
3. භද්දකො තෙ උම්මග්ගො{3} යොනිසො පරිපුච්ඡසි, තග්ඝ තෙ අහමක්ඛිස්සං යථාසි කුසලො තථා.
4. ද්වීසු විනයෙසු පඤ්ඤත්තා යෙ උද්දෙසං ආගච්ඡන්ති උපොසථෙසු, අඩ්ඪුඩ්ඪසතානි තෙ හොන්ති සත්තසු නගරෙසු පඤ්ඤත්තා.
5. කතමෙසු සත්තසු නගරෙසු පඤ්ඤත්තා ඉඞ්ඝ මෙ ත්වං බ්යාකර{4}, තං වචනපථං{5} නිසාමයිත්වා පටිපජ්ජෙම හිතාය නො සියාති.
6. වෙසාලියං රාජගහෙ සාවත්ථියං ච ආළවියං, කොසම්බියං ච සක්කෙසු භග්ගෙසු චෙව පඤ්ඤත්තා.
7. කති වෙසාලියං පඤ්ඤත්තා කති රාජගහෙ කතා, සාවත්ථියං කති හොන්ති කති ආළවියං කතා.
8. කති කොසම්බියං පඤ්ඤත්තා, කති සක්කෙසු වුච්චන්ති, කති භග්ගෙසු පඤ්ඤත්තා තං මෙ අක්ඛාහි පුච්ඡිතො.
9. දස වෙසාලියං පඤ්ඤත්තා එකවීස රාජගහෙ කතා, ඡ ඌන තීණි සතානි සබ්බෙ සාවත්ථියං කතා.
10. ඡ ආළවියං පඤ්ඤත්තා අට්ඨ කොසම්බියං කතා, අට්ඨ සක්කෙසු වුච්චන්ති තයො භග්ගෙසු පඤ්ඤත්තා.
11. යෙ වෙසාලියං පඤ්ඤත්තා, තෙ සුණොහි යථා කථං,{6} මෙථුන විග්ගහුත්තරි අතිරෙකඤ්ච කාළකං.
12. භූතං පරම්පරභත්තං දන්තපොනෙන අචෙලකො, භික්ඛුනීසු ච අක්කොසො දසෙතෙ වෙසාලියං කතා.
13. යෙ රාජගහෙ පඤ්ඤත්තා තෙ සුණොහි යථා කථං,{1} අදින්නාදානං රාජගහෙ ද්වෙ අනුද්ධංසනාපි ච.
14. ද්වෙ පිච භෙදා අන්තරවාසකං රූපියං සුත්තං උජ්ඣාපනෙන ච පාචීතපිණ්ඩං ගණභොජනං විකාලෙ ච චාරිත්තං නහානං ඌනවීසති.
15. චීවරං දත්වා වොසාසන්තී එතෙ රාජගහෙ කතා, ගිරග්ගචරියා තත්ථෙව ඡන්දදානෙන එකවීසති.
16. යෙ සාවත්ථියං පඤ්ඤත්තා තෙ සුණොහි යථා කථං, පාරාජිකානි චත්තාරි සඞ්ඝාදිසෙසා භවන්ති සොළස.
17. අනියතා ච ද්වෙ හොන්ති නිස්සග්ගියා චතුතිංසති,{2} ඡ පඤ්ඤාසසතඤ්චෙව ඛුද්දකානි පවුච්චන්ති.
18. දසයෙව ච ගාරය්හා ද්වෙ සත්තති ච සෙඛියා, ඡ ඌන තීණි සතානි සබ්බෙ සාවත්ථියං කතා.
19. යෙ ආළවියා පඤ්ඤත්තා තෙ සුණොහි යථා කථං, කුටි කොසිය සෙය්යා ච ඛනනෙ ගච්ඡ දෙවතෙ; සප්පාණකඤ්ච සිඤ්චන්ති ඡ එතෙ ආළවියං කතා.
20. යෙ කොසම්බියං පඤ්ඤත්තා තෙ සුණොහි යථා කථං, මහාවිහාරො දොවචස්සං අඤ්ඤං ද්වාරං සුරාය ච, අනාදරියං සහධම්මො පයො පානෙන අට්ඨමං.
21. යෙ ච සක්කෙසු පඤ්ඤත්තා තෙ සුණොහි යථා කථං,{3} එළකලොමානි පත්තො ච, ඔවාදො චෙව භෙසජ්ජං.
22. සූචි ආරඤ්ඤිකො චෙව ඡ එතෙ{4} කාපිලවත්ථවෙ, උදකසුද්ධියා ඔවාදො, භික්ඛුනීසු පවුච්චන්ති.
23. යෙ ච භග්ගෙසු පඤ්ඤත්තා තෙ සුණොහි යථා කථං,{5} සමාදහිත්වා විසිබ්බෙන්ති සාමිසෙන සසිත්ථකං.
24. පාරාජිකානි චත්තාරි සඞ්ඝාදිසෙසානි භවන්ති, සත්ත ච නිස්සග්ගියා අට්ඨ ද්වත්තිංසති ච ඛුද්දකා.
25. ද්වෙ ගාරය්හා තයො සෙක්ඛා{6} ඡ පඤ්ඤාස සික්ඛාපදා, ඡසු නගරෙසු පඤ්ඤත්තා බුද්ධෙනාදිච්චබන්ධුනා.
26. ඡ ඌන තීණි සතානි සබ්බෙ සාවත්ථියං කතා, කාරුණිකෙන බුද්ධෙන ගොතමෙන යසස්සිනා.
චතුවිපත්ති
1. යං තං අපුච්ඡිම්හ අකිත්තයී නො, තං තං බ්යාකතං අනඤ්ඤථා; අඤ්ඤං තං පුච්ඡාමි තදිඞ්ඝ බ්රූහි.
2. ගරුක ලහුකඤ්චාපි සාවසෙසං නාවසෙසං. දුට්ඨුල්ලඤ්ච අදුට්ඨුල්ලං යෙ ච යාවතතියකා.
3. සාධාරණාසාධාරණං විපත්තියො{1} යෙහි සමථෙහි සම්මන්ති, සබ්බානිපෙතානි වියාකරොහි හන්ද වාක්යං සුණොම තෙ.
4. එකතිංසා යෙ ගරුකා අට්ඨෙත්ථ අනවසෙසා, යෙ ගරුකා තෙ දුට්ඨුල්ලා යෙ දුට්ඨුල්ලා සා සීලවිපත්ති.
5. පාරාජිකං සඞ්ඝාදිසෙසො සීලවිපත්තීති වුච්චති, ථුල්ලච්චයං පාචිත්තියං පාටිදෙසනීයං තථා.
6. දුක්කටං දුබ්භාසිතං යො චායං අක්කොසති, හස්සාධිප්පායො අයං සා ආචාරවිපත්ති සම්මතා.
7. විපරීතදිට්ඨිං ගණ්හන්ති අසද්ධම්මෙහි පුරක්ඛතා, අබ්භාචික්ඛන්ති සම්බුද්ධං දුප්පඤ්ඤා මොහපාරුතා අයං සා දිට්ඨි විපත්තිසම්මතා.
8. ආජීවහෙතු ආජීවකාරණා පාපිච්ඡො ඉච්ඡාපකතො අසන්තං අභූතං උත්තරිමනුස්සධම්මං උල්ලපති, ආජීවහෙතු ආජීවකාරණා සඤ්චරිත්තං සමාපජ්ජති, ආජීවහෙතු ආජීවකාරණා ‘යො තෙ විහාරෙ වසති සො භික්ඛු අරහා’ති භණති, ආජීවහෙතු ආජීවකාරණා භික්ඛු පණීතභොජනානි අත්තනො අත්ථාය විඤ්ඤාපෙත්වා භුඤ්ජති, ආජීවහෙතු ආජීවකාරණා භික්ඛූ සූපං වා ඔදනං වා අගිලානො අත්තනො අත්ථාය විඤ්ඤාපෙත්වා භුඤ්ජති. අයං සා ආජීවවිපත්ති සම්මතා.
9. එකාදස යාවතතියකා තෙ සුණොහි යථා කථං, උක්ඛිත්තානුවත්තිකා අට්ඨ යාවතතියකා ; අරිට්ඨො චණ්ඩකාළී ච ඉමෙ තෙ යාවතතියකා.
ඡෙදනකාදි
1. කති ඡෙදනකානි කති භෙදනකානි, කති උද්දාලනකානි කති අනඤ්ඤපාචිත්තියානි.
2. කති භික්ඛුසම්මුතියො කති සාමීචියො කති පරමානි, කති ජානන්ති පඤ්ඤත්තා බුද්ධෙනාදිච්චබන්ධුනා.
3. ඡ ඡෙදනකානි එකං භෙදනකං, එකං උද්දාලනකං චත්තාරි අනඤ්ඤපාචිත්තියානි.
4. චතස්සො භික්ඛුසම්මුතියො සත්ත සාමීචියො චුද්දස පරමානි, සොළස{1} ජානන්ති පඤ්ඤත්තා බුද්ධෙනාදිච්චබන්ධුනා.
අසාධාරණකාදි
1. වීසං ද්වෙ සතානි භික්ඛූනං සික්ඛාපදානි, උද්දෙසං ආගච්ඡන්ති උපොසථෙසු,
2. තීණි සතානි චත්තාරි භික්ඛුනීනං සික්ඛාපදානි, උද්දෙසං ආගච්ඡන්ති උපොසථෙසු.
3. ඡ චත්තාලීසා භික්ඛූනං භික්ඛුනීහි අසාධාරණා, සතං තිංසා ච භික්ඛුනීනං භික්ඛූහි අසාධාරණා.
4. සතං සත්තති ඡච්චෙව උභින්නං අසාධාරණා, සතං සත්තති චත්තාරි උභින්නං සමසික්ඛතා.
5. වීසං ද්වෙ සතානි භික්ඛූනං සික්ඛාපදානි, උද්දෙසං ආගච්ඡන්ති උපොසථෙසු තෙ සුණොහි යථා කථං.
6. පාරාජිකානි චත්තාරි සඞ්ඝාදිසෙසානි භවන්ති තෙරස, අනියතා ද්වෙ හොන්ති නිස්සග්ගියානි තිංසෙව; ද්වෙ නවුති ච ඛුද්දකා චත්තාරො පාටිදෙසනීයා, පඤ්චසත්තති සෙඛියා.
7. වීසං ද්වෙ සතානි චිමෙ{2} හොන්ති භික්ඛූනං, සික්ඛාපදානි උද්දෙසං ආගච්ඡන්ති උපොසථෙසු.
8. තීණි සතානි චත්තාරි භික්ඛුනීනං සික්ඛාපදානි, උද්දෙසං ආගච්ඡන්ති උපොසථෙසු තෙ සුණොහි යථා කථං.
9. පාරාජිකානි අට්ඨ සඞ්ඝාදිසෙසානි භවන්ති සත්තරස, නිස්සග්ගියානි තිංසෙව සතං සට්ඨි ඡ ච්චෙව ඛුද්දකානි පවුච්චන්ති.
10. අට්ඨ පාටිදෙසනීයා පඤ්ච සත්තති සෙඛියා, තීණි සතානි චත්තාරිමෙ හොන්ති භික්ඛුනීනං; සික්ඛාපදානි උද්දෙසං ආගච්ඡන්ති උපොසථෙසු.
11. ඡ චත්තාලීස භික්ඛූනං භික්ඛුනීහි අසාධාරණා, තෙ සුණොහි යථා කථං.
12. ඡ සඞ්ඝාදිසෙසා ද්වීහි අනියතෙහි{1} අට්ඨ, නිස්සග්ගියානි ද්වාදස තෙ තෙහි හොන්ති වීසති.
13. ද්වාවීසති ඛුද්දකා චත්තාරො පාටිදෙසනීයා, ඡ චත්තාලීසාපිමෙ හොන්ති භික්ඛූනං භික්ඛුනීහි අසාධාරණා.
14. සතං තිංසා ච භික්ඛුනීනං භික්ඛූහි අසාධාරණා, තෙ සුණොහි යථා කථං.{2}
15. පාරාජිකානි චත්තාරි සඞ්ඝම්හා දස නිස්සරෙ, නිස්සග්ගියානි ද්වාදස ඡන්නවුති ච ඛුද්දකා අට්ඨ පාටිදෙසනීයා; සතං තිංසාපිමෙ හොන්ති භික්ඛුනීනං භික්ඛූහි අසාධාරණා.
16. සතං සත්තති ඡච්චෙව උභින්නං අසාධාරණා, තෙ සුණොහි යථා කථං.{3}
17. පාරාජිකානි චත්තාරි සඞ්ඝාදිසෙසානි භවන්ති සොළස, අනියතානි ච ද්වෙ හොන්ති නිස්සග්ගියානි චතුවීසති.
18. සතං අට්ඨාරසා චෙව ඛුද්දකානි පවුච්චන්ති ද්වාදස පාටිදෙසනීයා සතං සත්තති ඡ චෙවපිමෙ හොන්ති උභින්නං අසාධාරණා.
19. සතං සත්තති චත්තාරි උභින්නං සමසික්ඛතා, තෙ සුණොහි යථා කථං.
20. පාරාජිකානි චත්තාරි සඞ්ඝාදිසෙසානි භවන්ති සත්ත, නිස්සග්ගියානි අට්ඨාරස සමසත්තති ඛුද්දකා පඤ්චසත්තති සෙඛියා; සතං සත්තති චත්තාරිපිමෙ හොන්ති උභින්නං සමසික්ඛතා.