පරිවාරපාළි
දුතියො භාගො
නමො තස්ස භගවතො අරහතො සම්මාසම්බුද්ධස්ස.
ඛන්ධකපුච්ඡා
1. උපසම්පදං පුච්ඡිස්සං සනිදානං සනිද්දෙසං, සමුක්කට්ඨපදානං කති ආපත්තියො : උපසම්පදං විස්සජ්ජිස්සං සනිදානං සනිද්දෙසං, සමුක්කට්ඨපදානං ද්වෙ ආපත්තියො.
2. උපොසථං පුච්ඡිස්සං සනිදානං සනිද්දෙසං, සමුක්කට්ඨපදානං කති ආපත්තියො : උපොසථං විස්සජ්ජිස්සං සනිදානං සනිද්දෙසං, සමුක්කට්ඨපදානං තිස්සො ආපත්තියො.
3. වස්සූපනායිතං පුච්ඡිස්සං සනිදානං සනිද්දෙසං, සමුක්කට්ඨපදානං කති ආපත්තියො : වස්සූපනායිතං විස්සජ්ජිස්සං සනිදානං සනිද්දෙසං, සමුක්කට්ඨපදානං එකා ආපත්ති.
4. පවාරණං පුච්ඡිස්සං සනිදානං සනිද්දෙසං, සමුක්කට්ඨපදානං කති ආපත්තියො : පවාරණං විස්සජ්ජිස්සං සනිදානං සනිද්දෙසං, සමුක්කට්ඨපදානං තිස්සො ආපත්තියො.
5. චම්මසඤ්ඤුත්තං පුච්ඡිස්සං සනිදානං සනිද්දෙසං, සමුක්කට්ඨපදානං කති ආපත්තියො : චම්මසඤ්ඤුත්තං විස්සජ්ජිස්සං සනිදානං සනිද්දෙසං, සමුක්කට්ඨපදානං තිස්සො ආපත්තියො.
6. භෙසජ්ජං පුච්ඡිස්සං සනිදානං සනිද්දෙසං, සමුක්කට්ඨපදානං කති ආපත්තියො : භෙසජ්ජං විස්සජ්ජිස්සං සනිදානං සනිද්දෙසං, සමුක්කට්ඨපදානං තිස්සො ආපත්තියො.
7. කඨිනකං පුච්ඡිස්සං සනිදානං සනිද්දෙසං, සමුක්කට්ඨපදානං කති ආපත්තියො : කඨිනකං විස්සජ්ජිස්සං සනිදානං සනිද්දෙසං, සමුක්කට්ඨපදානං නත්ථි තත්ථ ආපත්ති.
8. චීවරසඤ්ඤුත්තං පුච්ඡිස්සං සනිදානං සනිද්දෙසං, සමුක්කට්ඨපදානං කති ආපත්තියො : චීවරසඤ්ඤුත්තං විස්සජ්ජිස්සං සනිදානං සනිද්දෙසං, සමුක්කට්ඨපදානං තිස්සො ආපත්තියො.
9. චම්පෙය්යකං පුච්ඡිස්සං සනිදානං සනිද්දෙසං, සමුක්කට්ඨපදානං කති ආපත්තියො : චම්පෙය්යකං විස්සජ්ජිස්සං සනිදානං සනිද්දෙසං, සමුක්කට්ඨපදානං එකා ආපත්ති.
10. කොසම්බකං පුච්ඡිස්සං සනිදානං සනිද්දෙසං, සමුක්කට්ඨපදානං කති ආපත්තියො : කොසම්බකං විස්සජ්ජිස්සං සනිදානං සනිද්දෙසං, සමුක්කට්ඨපදානං එකා ආපත්ති.
11. කම්මක්ඛන්ධකං පුච්ඡිස්සං සනිදානං සනිද්දෙසං, සමුක්කට්ඨපදානං කති ආපත්තියො : කම්මක්ඛන්ධකං විස්සජ්ජිස්සං සනිදානං සනිද්දෙසං, සමුක්කට්ඨපදානං එකා ආපත්ති.
12. පාරිවාසිකං පුච්ඡිස්සං සනිදානං සනිද්දෙසං, සමුක්කට්ඨපදානං කති ආපත්තියො : පාරිවාසිකං විස්සජ්ජිස්සං සනිදානං සනිද්දෙසං, සමුක්කට්ඨපදානං එකා ආපත්ති.
13. සමුච්චයං පුච්ඡිස්සං සනිදානං සනිද්දෙසං, සමුක්කට්ඨපදානං කති ආපත්තියො : සමුච්චයං විස්සජ්ජිස්සං සනිදානං සනිද්දෙසං, සමුක්කට්ඨපදානං එකා ආපත්ති.
14. සමථං පුච්ඡිස්සං සනිදානං සනිද්දෙසං, සමුක්කට්ඨපදානං කති ආපත්තියො : සමථං විස්සජ්ජිස්සං සනිදානං සනිද්දෙසං, සමුක්කට්ඨපදානං ද්වෙ ආපත්තියො.
15. ඛුද්දකවත්ථුකං පුච්ඡිස්සං සනිදානං සනිද්දෙසං, සමුක්කට්ඨපදානං කති ආපත්තියො : ඛුද්දකවත්ථුකං විස්සජ්ජිස්සං සනිදානං සනිද්දෙසං, සමුක්කට්ඨපදානං තිස්සො ආපත්තියො.
16. සෙනාසනං පුච්ඡිස්සං සනිදානං සනිද්දෙසං, සමුක්කට්ඨපදානං කති ආපත්තියො : සෙනාසනං විස්සජ්ජිස්සං සනිදානං සනිද්දෙසං, සමුක්කට්ඨපදානං තිස්සො ආපත්තියො.
17. සඞ්ඝභෙදං පුච්ඡිස්සං සනිදානං සනිද්දෙසං, සමුක්කට්ඨපදානං කති ආපත්තියො : සඞ්ඝභෙදං විස්සජ්ජිස්සං සනිදානං සනිද්දෙසං, සමුක්කට්ඨපදානං ද්වෙ ආපත්තියො.
18. සමාචාරං පුච්ඡිස්සං සනිදානං සනිද්දෙසං, සමුක්කට්ඨපදානං කති ආපත්තියො : සමාචාරං විස්සජ්ජිස්සං සනිදානං සනිද්දෙසං, සමුක්කට්ඨපදානං එකා ආපත්ති.
19. ඨපනං පුච්ඡිස්සං සනිදානං සනිද්දෙසං, සමුක්කට්ඨපදානං කති ආපත්තියො : ඨපනං විස්සජ්ජිස්සං සනිදානං සනිද්දෙසං, සමුක්කට්ඨපදානං එකා ආපත්ති.
20. භික්ඛුනීඛන්ධකං පුච්ඡිස්සං සනිදානං සනිද්දෙසං, සමුක්කට්ඨපදානං කති ආපත්තියො : භික්ඛුනීඛන්ධකං විස්සජ්ජිස්සං සනිදානං සනිද්දෙසං, සමුක්කට්ඨපදානං ද්වෙ ආපත්තියො.
21. පඤ්චසතිකං පුච්ඡිස්සං සනිදානං සනිද්දෙසං, සමුක්කට්ඨපදානං කති ආපත්තියො : පඤ්චසතිකං විස්සජ්ජිස්සං සනිදානං සනිද්දෙසං, සමුක්කට්ඨපදානං නත්ථි තත්ථ ආපත්ති.
22. සත්තසතිකං පුච්ඡිස්සං සනිදානං සනිද්දෙසං, සමුක්කට්ඨපදානං කති ආපත්තියො : සත්තසතිකං විස්සජ්ජිස්සං සනිදානං සනිද්දෙසං, සමුක්කට්ඨපදානං නත්ථි තත්ථ ආපත්තීති.
ඛන්ධකපුච්ඡා නිට්ඨිතා පඨමා.
තස්සුද්දානං:
1. උපසම්පදූපොසථා{1} - වස්සූපනායිකපවාරණා,{2} චම්මභෙසජ්ජකඨිනා - චීවරං චම්පෙය්යකෙන ච.
2. කොසම්බක්ඛන්ධකං කම්මං - පාරිවාසිසමුච්චයා, සමථඛුද්දකා සෙනා - සඞ්ඝභෙදං සමාචාරො,{3} ඨපනං භික්ඛුනීඛන්ධං - පඤ්චසත්තසතෙන චාති.
එකුත්තරිකං
එකකං
1. ආපත්තිකරා ධම්මා ජානිතබ්බා, අනාපත්තිකරා ධම්මා ජානිතබ්බා.
ආපත්ති ජානිතබ්බා, අනාපත්ති ජානිතබ්බා.
ලහුකා ආපත්ති ජානිතබ්බා, ගරුකා ආපත්ති ජානිතබ්බා.
සාවසෙසා ආපත්ති ජානිතබ්බා, අනවසෙසා ආපත්ති ජානිතබ්බා.
දුට්ඨුල්ලා ආපත්ති ජානිතබ්බා, අදුට්ඨුල්ලා ආපත්ති ජානිතබ්බා.
සප්පටිකම්මා ආපත්ති ජානිතබ්බා, අප්පටිකම්මා ආපත්ති ජානිතබ්බා.
දෙසනාගාමිනී ආපත්ති ජානිතබ්බා, අදෙසනාගාමිනී ආපත්ති ජානිතබ්බා.
අන්තරායිකා ආපත්ති ජානිතබ්බා, අනන්තරායිකා ආපත්ති ජානිතබ්බා.
සාවජ්ජපඤ්ඤත්ති ආපත්ති ජානිතබ්බා, අනවජ්ජපඤ්ඤත්ති ආපත්ති ජානිතබ්බා.
කිරියතො සමුට්ඨිතා ආපත්ති ජානිතබ්බා, අකිරියතො සමුට්ඨිතා ආපත්ති ජානිතබ්බා, කිරියාකිරියතො සමුට්ඨිතා ආපත්ති ජානිතබ්බා.
පුබ්බාපත්ති ජානිතබ්බා, අපරාපත්ති ජානිතබ්බා.
පුබ්බාපත්තීනං අන්තරාපත්ති ජානිතබ්බා, අපරාපත්තීනං අන්තරාපත්ති ජානිතබ්බා.
දෙසිතා ගණනූපගා ආපත්ති ජානිතබ්බා, දෙසිතා න ගණනූපගා ආපත්ති ජානිතබ්බා.
පඤ්ඤත්ති ජානිතබ්බා, අනුපඤ්ඤත්ති ජානිතබ්බා. අනුප්පන්නපඤ්ඤත්ති ජානිතබ්බා.
සබ්බත්ථ පඤ්ඤත්ති ජානිතබ්බා, පදෙසපඤ්ඤත්ති ජානිතබ්බා.
සාධාරණපඤ්ඤත්ති ජානිතබ්බා, අසාධාරණපඤ්ඤත්ති ජානිතබ්බා.
එකතො පඤ්ඤත්ති ජානිතබ්බා, උභතොපඤ්ඤත්ති ජානිතබ්බා.
ථුල්ලවජ්ජා ආපත්ති ජානිතබ්බා, අථුල්ලවජ්ජා ආපත්ති ජානිතබ්බා.
ගිහීපටිසඤ්ඤුත්තා ආපත්ති ජානිතබ්බා, න ගිහීපටිසඤ්ඤුත්තා ආපත්ති ජානිතබ්බා.
නියතා ආපත්ති ජානිතබ්බා, අනියතා ආපත්ති ජානිතබ්බා.
ආදිකරො පුග්ගලො ජානිතබ්බො. අනාදිකරො පුග්ගලො ජානිතබ්බො.
අධිච්චාපත්තිකො පුග්ගලො ජානිතබ්බො, අභිණ්හාපත්තිකො පුග්ගලො ජානිතබ්බො.
චොදකො පුග්ගලො ජානිතබ්බො, චුදිතකො පුග්ගලො ජානිතබ්බො.
අධම්මචොදකො පුග්ගලො ජානිතබ්බො, අධම්මචුදිතකො පුග්ගලො ජානිතබ්බො.
ධම්මචොදකො පුග්ගලො ජානිතබ්බො, ධම්මචුදිතකො පුග්ගලො ජානිතබ්බො.
නියතො පුග්ගලො ජානිතබ්බො, අනියතො පුග්ගලො ජානිතබ්බො.
භබ්බාපත්තිකො පුග්ගලො ජානිතබ්බො, අභබ්බාපත්තිකො පුග්ගලො ජානිතබ්බො.
උක්ඛිත්තකො පුග්ගලො ජානිතබ්බො; අනුක්ඛිත්තකො පුග්ගලො ජානිතබ්බො.
නාසිතකො පුග්ගලො ජානිතබ්බො, අනාසිතකො පුග්ගලො ජානිතබ්බො.
සමානසංවාසකො පුග්ගලො ජානිතබ්බො. අසමානවාසකො පුග්ගලො ජානිතබ්බො.
ඨපනං ජානිතබ්බන්ති.
එකකං නිට්ඨිතං.
තස්සුද්දානං:
1. කරා ආපත්ති ලහුකා සාවසෙසා ච දුට්ඨුල්ලා, පටිකම්මදෙසනා චෙව අන්තරාවජ්ජකිරියා{1}
2. කිරියාකිරියං පුබ්බා අන්තරා ගණනූපගා, පඤ්ඤත්ති අනානුප්පන්න සබ්බත්ථ පදෙසසාධාරණා ච එකතො.{2}
3. ථුල්ලගිහීනියතා ච ආදි අධිච්ච චොදකා, අධම්මධම්ම නියතො අභබ්බොක්ඛිත්ත නාසිතා, සමානං ඨපනං චෙව උද්දානං එකකෙ ඉදන්ති.
දුකං
1. අත්ථාපත්ති සඤ්ඤාවිමොක්ඛා, අත්ථාපත්ති නො සඤ්ඤාවිමොක්ඛා.
අත්ථාපත්ති ලද්ධසමාපත්තිකස්ස, අත්ථාපත්ති න ලද්ධසමාපත්තිකස්ස.
අත්ථාපත්ති සද්ධම්මපටිසඤ්ඤුත්තා, අත්ථාපත්ති අසද්ධම්මපටිසඤ්ඤුත්තා.
අත්ථාපත්ති සපරික්ඛාරපටිසඤ්ඤුත්තා, අත්ථාපත්ති පරපරික්ඛාරපටිසඤ්ඤුත්තා.
අත්ථාපත්ති සපුග්ගලපටිසඤ්ඤුත්තා, අත්ථාපත්ති පරපුග්ගලපටිසඤ්ඤුත්තා.
අත්ථි සච්චං භණන්තො ගරුකං ආපත්තිං ආපජ්ජති, අත්ථි සච්චං භණන්තො ලහුකං ආපත්තිං ආපජ්ජති.
අත්ථි මුසා භණන්තො ගරුකං ආපත්තිං ආපජ්ජති, අත්ථි මුසා භණන්තො ලහුකං ආපත්තිං ආපජ්ජති.
අත්ථාපත්ති භූමිගතො ආපජ්ජති නො වෙහාසගතො, අත්ථාපත්ති වෙහාසගතො ආපජ්ජති නො භූමිගතො.
අත්ථාපත්ති නික්ඛමන්තො ආපජ්ජති නො පවිසන්තො, අත්ථාපත්ති පවිසන්තො ආපජ්ජති නො නික්ඛමන්තො.
අත්ථාපත්ති ආදියන්තො ආපජ්ජති, අත්ථාපත්ති අනාදියන්තො ආපජ්ජති.
අත්ථාපත්ති සමාදියන්තො ආපජ්ජති, අත්ථාපත්ති න සමාදියන්තො ආපජ්ජති.
අත්ථාපත්ති කරොන්තො ආපජ්ජති, අත්ථාපත්ති න කරොන්තො ආපජ්ජති.
අත්ථාපත්ති දෙන්තො ආපජ්ජති, අත්ථාපත්ති න දෙන්තො ආපජ්ජති.
අත්ථාපත්ති දෙසෙන්තො ආපජ්ජති, අත්ථාපත්ති න දෙසෙන්තො ආපජ්ජති.
අත්ථාපත්ති පටිගණ්හන්තො ආපජ්ජති, අත්ථාපත්ති න පටිගණ්හන්තො ආපජ්ජති.
අත්ථාපත්ති පරිභොගෙන ආපජ්ජති, අත්ථාපත්ති න පරිභොගෙන ආපජ්ජති.
අත්ථාපත්ති රත්තිං ආපජ්ජති නො දිවා, අත්ථාපත්ති දිවා ආපජ්ජති නො රත්තිං.
අත්ථාපත්ති අරුණුග්ගෙ ආපජ්ජති, අත්ථාපත්ති න අරුණුග්ගෙ ආපජ්ජති.
අත්ථාපත්ති ඡින්දන්තො ආපජ්ජති, අත්ථාපත්ති න ඡින්දන්තො ආපජ්ජති.
අත්ථාපත්ති ඡාදෙන්තො ආපජ්ජති, අත්ථාපත්ති න ඡාදෙන්තො ආපජ්ජති.
අත්ථාපත්ති ධාරෙන්තො ආපජ්ජති, අත්ථාපත්ති න ධාරෙන්තො ආපජ්ජති.
2. ද්වෙ උපොසථා : චාතුද්දසිකො ච පණ්ණරසිකො ච.
ද්වෙ පවාරණා : චාතුද්දසිකො ච පණ්ණරසිකො ච.
ද්වෙ කම්මානි : අපලොකනකම්මං, ඤත්තිකම්මං. අපරානිපි ද්වෙ කම්මානි : ඤත්තිදුතියකම්මං, ඤත්තිචතුත්ථකම්මං.
ද්වෙ කම්මවත්ථූනි : අපලොකනකම්මස්ස වත්ථු, ඤත්තිකම්මස්ස වත්ථු. අපරානිපි ද්වෙ කම්මවත්ථූනි : ඤත්තිදුතියකම්මස්ස වත්ථු, ඤත්තිචතුත්ථකම්මස්ස වත්ථු.
ද්වෙ කම්මදොසා : අපලොකනකම්මස්ස දොසො, ඤත්තිකම්මස්ස දොසො. අපරෙපි ද්වෙ කම්මදොසා : ඤත්තිදුතියකම්මස්ස දොසො, ඤත්තිචතුත්ථකම්මස්ස දොසො.
ද්වෙ කම්මසම්පත්තියො : අපලොකනකම්මස්ස සම්පත්ති, ඤත්තිකම්මස්ස සම්පත්ති. අපරාපි ද්වෙ කම්මසම්පත්තියො : ඤත්තිදුතියකම්මස්ස සම්පත්ති, ඤත්තිචතුත්ථකම්මස්ස සම්පත්ති.
ද්වෙ නානාසංවාසකභූමියො : අත්තනාව අත්තානං නානාසංවාසකං කරොති, සමග්ගො වා නං සඞ්ඝො උක්ඛිපති අදස්සනෙ වා අප්පටිකම්මෙ වා අප්පටිනිස්සග්ගෙ වා.
ද්වෙ සමානසංවාසකභූමියො : අත්තනාව අත්තානං සමානසංවාසකං කරොති, සමග්ගො වා නං සඞ්ඝො උක්ඛිත්තං ඔසාරෙති දස්සනෙ වා පටිකම්මෙ වා පටිනිස්සග්ගෙ වා.
ද්වෙ පාරාජිකා : භික්ඛූනඤ්ච භික්ඛුනීනඤ්ච. ද්වෙ සඞ්ඝාදිසෙසා -පෙ- ද්වෙ ථුල්ලච්චයා -පෙ- ද්වෙ පාචිත්තියා -පෙ- ද්වෙ පාටිදෙසනීයා -පෙ- ද්වෙ දුක්කටා -පෙ- ද්වෙ දුබ්භාසිතා භික්ඛූනඤ්ච භික්ඛුනීනඤ්ච.
සත්ත ආපත්තියො, සත්ත ආපත්තික්ඛන්ධා.