10. පාරාජිකං යං පඨමං දුතියඤ්ච තතො පරං, සඤ්චරිත්තානුභාසඤ්ච{2} අතිරෙකඤ්ච චීවරං.
11. ලොමානි පදසො ධම්මො භූතං සංවිධානෙන ච, ථෙය්යදෙසනචොරිං ච අනනුඤ්ඤාතාය තෙරස
12. තෙරසෙතෙ සමුට්ඨානනයා විඤ්ඤූහි චින්තිතා, එකෙකස්මිං සමුට්ඨානෙ සදිසා ඉධ දිස්සරෙ.
පඨමපාරාජික සමුට්ඨානං
13. මෙථුනං සුක්කසංසග්ගො අනියතා පඨමිකා, පුබ්බූපපරිපාචිතා රහො භික්ඛුනියා සහ.
14. සභොජනෙ{1} රහො ද්වෙ ච අඞ්ගුලි උදකෙ හසං, පහාරෙ උග්ගිරෙ ද්වෙ ව තෙපඤ්ඤාසා ච සෙඛියා.
15. අධක්ඛකගාමාවස්සුතා තලමට්ඨඤ්ච සුද්ධිකා, වස්සං වුත්ථා ච ඔවාදං නානුබන්ධෙ පවත්තිනිං.
16. ඡසත්තති ඉමෙ සික්ඛා කායමානසිකා කතා, සබ්බෙ එකසමුට්ඨානා පඨමං පාරාජිකං යථා.
පඨමපාරාජිකසමුට්ඨානං නිට්ඨිතං.
දුතියපාරාජික සමුට්ඨානං
17. අදින්නං විග්ගහුත්තරිං දුට්ඨුල්ලං අත්තකාමිනං,{2} අමූලා අඤ්ඤභාගියා අනියතා දුතියිකා.
18. අච්ඡින්දෙ පරිණාමනෙ මුසා ඔමස පෙසුණා, දුට්ඨුල්ලා පඨවිං ඛණෙ භූතං අඤ්ඤාය උජ්ඣාපෙ.
19. නික්කඩ්ඪනං සිඤ්චනඤ්ච ආමිසහෙතු භුත්තාවී, එහි අනාදරි භිංසා අපනිධෙ ච ජීවිතං.
20. ජානං සප්පාණකං කම්මං ඌනෙන සංවාසනාසනා, සහධම්මිකං විලෙඛා ව මොහො අමූලකෙන ච.
21. කුක්කුච්චං ධම්මිකං චීවරං{3} දත්වා පරිණාමෙය්ය පුග්ගලෙ, කිං තෙ අකාලං අච්ඡින්දෙ දුග්ගහීත නිරයෙන ච.
22. ගණං විභඞ්ගං දුබ්බලං කඨිනාඵාසු පස්සයං, අක්කොසචණ්ඩී මච්ඡරී ගබ්භිනී ච පායන්තියා.
23. ද්වෙ වස්සං සික්ඛා සඞ්ඝෙන තයො චෙව ගිහීගතා, කුමාරීභූතා තිස්සො ච ඌනද්වාදස සම්මතා.
24. අලං තාව සොකාවාසං ඡන්දා අනුවස්සා ච ද්වෙ, සික්ඛාපදා සත්තතිමෙ සමුට්ඨානා තිකා කතා.
25. කායචිත්තෙන න වාචා වාචා චිත්තං න කායිකං, තීහි ද්වාරෙහි ජායන්ති පාරාජිකං දුතියං යථා.
දුතිය පාරාජිකසමුට්ඨානං නිට්ඨිතං.
සඤ්චරිත්ත සමුට්ඨානං
26. සඤ්චරී කුටි විහාරො ධොවනඤ්ච පටිග්ගහො, විඤ්ඤත්තුත්තරි අභිහට්ඨුං උභින්නං දූතකෙන ච.
27. කොසිය සුද්ධ ද්වෙභාගා ඡබ්බස්සානි නිසීදනං, රිඤ්චන්ති රූපිකා චෙව උභො නානප්පකාරකා.
28. ඌන බන්ධන වස්සිකා සුත්තං විකප්පනෙන ච, ද්වාර දාන සිබ්බනී ච පූවපච්චය ජොති ච.
29. රතනං සූචි මඤ්චො ච තූලං නිසීදනං කණ්ඩු ච, වස්සිකා ච සුගතෙන විඤ්ඤත්ති අඤ්ඤං චෙතාපනා.
30. ද්වෙ සඞ්ඝිකා මහාජනී ද්වෙ පුග්ගලා ලහුකා ගරු, ද්වෙ විඝාසා සාටිකා ච සමණචීවරෙන ච.
31. සමපඤ්ඤාසිමෙ ධම්මා ඡහි ඨානෙහි ජායරෙ, කායතො න චිත්තා වාචතො න කායමනා.
32. කායවාචා න චිත්තතො{1} කායචිත්තා න වාචතො, වාචා චිත්තා න කායෙන තීහි ද්වාරෙහි{2} ජායරෙ, ඡ සමුට්ඨානිකා චෙතෙ, සඤ්චරිත්තෙන සාදිසා.
සඤ්චරිත්තසමුට්ඨානං නිට්ඨිතං.
සමනුභාසන සමුට්ඨානං
33. භෙදානුවත්තදුබ්බච දූස දුට්ඨුල්ල දිට්ඨි ච, ඡන්දං උජ්ජග්ඝිකා ද්වෙ ච ද්වෙ ච සද්දා න බ්යාහරෙ.
34. ඡමා නීචාසනෙ ඨානං පච්ඡතො උප්පථෙන ච, වජ්ජානුවත්තිගහණා ඔසාරෙ පච්චාචික්ඛනා.
35. කිස්මිං සංසට්ඨා ද්වෙ වධි විසිබ්බෙ දුක්ඛිතාය ච, පුන සංසට්ඨා න වූපසමෙ ආරාමඤ්ච පවාරණා.
36. අන්වද්ධමාසං සහජීවි ද්වෙ චීවරං අනුබන්ධනා; සත්තතිංස ඉමෙ ධම්මා කායවාචාය චිත්තතො සබ්බෙ එකසමුට්ඨානා සමනුභාසනා යථා.
සමනුභාසනාසමුට්ඨානං නිට්ඨිතං.
කඨින සමුට්ඨානං
37. උබ්භතං කඨිනං තීණි පඨමං පත්තභෙසජ්ජං, අච්චෙකං චාපි සාසඞ්කං පක්කමන්තෙන වා දුවෙ.
38. උපස්සයං පරම්පරං අනතිරිත්තං නිමන්තනා, විකප්පං රඤ්ඤො විකාලෙ වොසාසාරඤ්ඤකෙන ච.
39. උස්සයා සන්නිචයඤ්ච, පුරෙ පච්ඡා විකාලෙ ච, පඤ්චාහිකා සඞ්කමනී දුවෙ ආවසථෙන ච.
40. පසාඛෙ ආසනෙ චෙව තිංස එකූනකා ඉමෙ, කායවාචා න චිත්තා තීහි ද්වාරෙහි ජායරෙ, ද්වෙ සමුට්ඨානිකා සබ්බෙ කඨිනෙන සහා සමා.
කඨිනසමුට්ඨානං නිට්ඨිතං.
එළකලොම සමුට්ඨානං
41. එළකලොමා ද්වෙ සෙය්යං ආහච්ච පිණ්ඩභොජනං, ගණ විකාල සන්නිධි දන්තපොණෙන චෙලකා.
42. උය්යුත්තං සෙනං උය්යොධී සුරා ඔරෙන නහායනා, දුබ්බණ්ණෙ ද්වෙ දෙසනීයා{1} ලසුණුපතිට්ඨෙ නච්චනා.
43. නහානං අත්ථරණං සෙය්යා අන්තො රට්ඨෙ තථා බහී, අන්තොවස්සං චිත්තාගාරං ආසන්දිං සුත්තකන්තනා.
44. වෙය්යාවච්චං සහත්ථා ච අභික්ඛුකාවාසෙන ච, ඡත්තං යානඤ්ච සඞ්ඝාණිං අලඞ්කාරං ගන්ධවාසිතං.
45. භික්ඛුනී සික්ඛමානා ච සාමණෙරී ගිහීනියා, අසංකච්චිකා ආපත්ති චත්තාරීසා චතුත්තරී.
46. කායෙන න වාචා චිත්තෙන කායචිත්තෙන න වාචතො, ද්වෙ සමුට්ඨානිකා සබ්බෙ සමා එළකලොමිකාති.
එළකලොමසමුට්ඨානං නිට්ඨිතං.
පදසොධම්ම සමුට්ඨානං
47. පදඤ්ඤත්ර අසම්මතා තථා අත්ථඞ්ගතෙන ච, තිරච්ඡානවිජ්ජා ද්වෙ වුත්තා අනොකාසො ච පුච්ඡනා.
48. සත්ත සික්ඛාපදා එතෙ වාචා න කායචිත්තතො, වාචා චිත්තෙන ජායන්ති න තු කායෙන ජායරෙ, ද්වෙ සමුට්ඨානිකා සබ්බෙ පදසොධම්මසදිසා.
පදසොධම්මසමුට්ඨානං නිට්ඨිතං.
අද්ධාන සමුට්ඨානං
49. අද්ධානං නාවං පණීතං, මාතුගාමෙන සංහරෙ, ධඤ්ඤං නිමන්තිතා චෙව අට්ඨ ච පාටිදෙසනී.
50. සික්ඛා පණ්ණරසා එතෙ කායා න වාචා න මනා, කායවාචාහි ජායන්ති න තෙ චිත්තෙන ජායරෙ
51. කායචිත්තෙන ජායන්ති න තෙ ජායන්ති වාචතො, කායවාචාහි චිත්තෙන සමුට්ඨානා චතුබ්බිධා. පඤ්ඤත්තා බුද්ධඤාණෙන අද්ධානෙන සහා සමා.{1}
අද්ධානසමුට්ඨානං නිට්ඨිතං.
ථෙය්යසත්ථ සමුට්ඨානං
52. ථෙය්යසත්ථං උපස්සුති සූපං විඤ්ඤාපනෙන ච, රත්ති ඡන්නඤ්ච ඔකාසං එතෙ බ්යූහෙන සත්තමා.
53. කාය චිත්තෙන ජායන්ති න තෙ ජායන්ති වාචතො, තීහි ද්වාරෙහි ජායන්ති ද්වෙ සමුට්ඨානිකා ඉමෙ, ථෙය්යසත්ථසමුට්ඨානා දෙසිතාදිච්චබන්ධුනා.
ථෙය්යසත්ථසමුට්ඨානං නිට්ඨිතං.
ධම්මදෙසන සමුට්ඨානං
54. ඡත්තපාණිස්ස සද්ධම්මං න දෙසෙන්ති තථාගතා, තථෙව{2} දණ්ඩපාණිස්ස, සත්ථආයුධපාණිනං.
55. පාදුකූපාහනා යානං සෙය්යපල්ලත්ථිකාය ච, වෙඨිතො ගුණ්ඨිතො චෙව එකාදස මනූනකා.
56. වාචා චිත්තෙන ජායන්ති න තෙ ජායන්ති කායතො, සබ්බෙ එකසමුට්ඨානා සමකා ධම්මදෙසනෙ.
ධම්මදෙසනාසමුට්ඨානං නිට්ඨිතං.
භූතාරොචන සමුට්ඨානං
57. භූතං කායෙන ජායති න වාචාය{1} න චිත්තතො, වාචතො ච සමුට්ඨාති න කායා න ච චිත්තතො
58. කායවාචාය ජායති න ච ජායති චිත්තතො, භූතාරොචනකා නාම තීහි ඨානෙහි ජායති.
භූතාරොචනසමුට්ඨානං නිට්ඨිතං.
චොරිවුට්ඨාපන සමුට්ඨානං
59. චොරිං{2} වාචාය චිත්තෙන, න තං ජායති කායතො; ජායති තීහි ද්වාරෙහි චොරිවුට්ඨාපනං ඉදං, අකතං ද්විසමුට්ඨානං ධම්මරාජෙන භාසිතං.
චොරිවුට්ඨාපනසමුට්ඨානං නිට්ඨිතං.
අනනුඤ්ඤාත සමුට්ඨානං
60. අනනුඤ්ඤාතං වාචාය න කායා න ච චිත්තතො, ජායති කායවාචාය න තං ජායති චිත්තතො.
61. ජායති වාචා චිත්තෙන න තං ජායති කායතො, ජායති තීහි ද්වාරෙහි අකතං චතුඨානිකං.
අනනුඤ්ඤාතසමුට්ඨානං නිට්ඨිතං.
62. සමුට්ඨානං හි සඞ්ඛෙපං දස තීණි සුදෙසිතං, අසම්මොහකරං ඨානං නෙත්තිධම්මානුලොමිකං, ධාරයන්තො ඉමං විඤ්ඤූ සමුට්ඨානෙ න මුය්හතීති.
සමුට්ඨානසීසසඞ්ඛෙපො නිට්ඨිතො.
අන්තරපෙය්යාලෙ
කතිපුච්ඡාවාරො
කති ආපත්තියො, කති ආපත්තික්ඛන්ධා, කති විනීතවත්ථූනි, කති අගාරවා, කති ගාරවා, කති විනීතවත්ථූනි, කති විපත්තියො, කති ආපත්තිසමුට්ඨානා, කති විවාදමූලානි, කති අනුවාදමූලානි, කති සාරාණීයා ධම්මා, කති භෙදකරවත්ථූනි, කති අධිකරණානි, කති සමථා :
පඤ්ච ආපත්තියො, පඤ්ච ආපත්තික්ඛන්ධා, පඤ්ච විනීතවත්ථූනි, සත්ත ආපත්තියො, සත්ත ආපත්තික්ඛන්ධා, සත්ත විනීතවත්ථූනි, ඡ අගාරවා, ඡ ගාරවා, ඡ විනීතවත්ථූනි, චතස්සො විපත්තියො, ඡ ආපත්තිසමුට්ඨානා, ඡ විවාදමූලානි, ඡ අනුවාදමූලානි, ඡ සාරාණීයා ධම්මා, අට්ඨාරස භෙදකරවත්ථූනි, චත්තාරි අධිකරණානි, සත්තසමථා.
1. තත්ථ කතමා පඤ්ච ආපත්තියො : පාරාජිකාපත්ති, සඞ්ඝාදිසෙසාපත්ති, පාචිත්තියාපත්ති, පාටිදෙසනීයාපත්ති, දුක්කටාපත්ති. ඉමා පඤ්ච ආපත්තියො.
2. කත්ථ කතමෙ පඤ්ච ආපත්තික්ඛන්ධා : පාරාජිකාපත්තික්ඛන්ධො, සඞ්ඝාදිසෙසාපත්තික්ඛන්ධො, පාචිත්තියාපත්තික්ඛන්ධො, පාටිදෙසනීයාපත්තික්ඛන්ධො, දුක්කටාපත්තික්ඛන්ධො. ඉමෙ පඤ්ච ආපත්තික්ඛන්ධා.
3. තත්ථ කතමානි පඤ්ච විනීතවත්ථූනි : පඤ්චහි ආපත්තික්ඛන්ධෙහි ආරති විරති පටිවිරති වෙරමණී අකිරියා අකරණං අනජ්ඣාපත්ති වෙලාඅනතික්කමො සෙතුඝාතො, ඉමානි පඤ්ච විනීතවත්ථූනි.
4. තත්ථ කතමා සත්ත ආපත්තියො : පාරාජිකාපත්ති, සඞ්ඝාදිසෙසාපත්ති, ථුල්ලච්චයාපත්ති, පාචිත්තියාපත්ති, පාටිදෙසනීයාපත්ති, දුක්කටාපත්ති, දුබ්භාසිතාපත්ති. ඉමා සත්ත ආපත්තියො.
5. තත්ථ කතමෙ සත්ත ආපත්තික්ඛන්ධා : පාරාජිකාපත්තික්ඛන්ධො, සඞ්ඝාදිසෙසාපත්තික්ඛන්ධො, ථුල්ලච්චයාපත්තික්ඛන්ධො, පාචිත්තියාපත්තික්ඛන්ධො, පාටිදෙසනීයාපත්තික්ඛන්ධො, දුක්කටාපත්තික්ඛන්ධො, දුබ්භාසිතාපත්තික්ඛන්ධො. ඉමෙ සත්ත ආපත්තික්ඛන්ධා.
6. තත්ථ කතමානි සත්ත විනීතවත්ථූනි : සත්තහි ආපත්තික්ඛන්ධෙහි ආරති විරති පටිවිරති වෙරමණී අකිරියා අකරණං අනජ්ඣාපත්ති වෙලාඅනතික්කමො සෙතුඝාතො. ඉමානි සත්ත විනීතවත්ථූනි.
7. තත්ථ කතමෙ ඡ අගාරවා : බුද්ධෙ අගාරවො, ධම්මෙ අගාරවො, සඞ්ඝෙ අගාරවො, සික්ඛාය අගාරවො, අප්පමාදෙ අගාරවො, පටිසන්ධාරෙ අගාරවො. ඉමෙ ඡ අගාරවා.
8. තත්ථ කතමෙ ඡ ගාරවා : බුද්ධෙ ගාරවො, ධම්මෙ ගාරවො, සඞ්ඝෙ ගාරවො, සික්ඛාය ගාරවො, අප්පමාදෙ ගාරවො, පටිසන්ධාරෙ ගාරවො. ඉමෙ ඡ ගාරවා.
9. තත්ථ කතමානි ඡ විනීතවත්ථූනි : ඡහි අගාරවෙහි ආරති විරති පටිවිරති වෙරමණී අකිරියා අකරණං අනජ්ඣාපත්ති වෙලාඅනතික්කමො සෙතුඝාතො. ඉමානි ඡ විනීතවත්ථූනි.
10. තත්ථ කතමා චතස්සො විපත්තියො : සීලවිපත්ති, ආචාරවිපත්ති, දිට්ඨිවිපත්ති, ආජීවවිපත්ති. ඉමා චතස්සො විපත්තියො.
11. තත්ථ කතමෙ ඡ ආපත්තිසමුට්ඨානා : අත්ථාපත්ති කායතො සමුට්ඨාති, න වාචතො න චිත්තතො. අත්ථාපත්ති වාචතො සමුට්ඨාති, න කායතො න චිත්තතො, අත්ථාපත්ති කායතො ච වාචතො ච සමුට්ඨාති න චිත්තතො, අත්ථාපත්ති කායතො ච චිත්තතො ච සමුට්ඨාති, න වාචතො. අත්ථාපත්ති වාචතො ච චිත්තතො ච සමුට්ඨාති, න කායතො. අත්ථාපත්ති කායතො ච වාචතො ච චිත්තතො ච සමුට්ඨාති. ඉමෙ ඡ ආපත්තිසමුට්ඨානා.
12. තත්ථ කතමානි ඡ විවාදමූලානි : ඉධ භික්ඛු කොධනො හොති උපනාහී, යො සො භික්ඛු කොධනො හොති උපනාහී, සො සත්ථරිපි අගාරවො විහරති අප්පතිස්සවො, ධම්මෙපි අගාරවො විහරති අප්පතිස්සවො, සඞ්ඝෙපි අගාරවො විහරති අප්පතිස්සවො, සික්ඛායපි න පරිපූරකාරී හොති. යො සො භික්ඛු සත්ථරි අගාරවො විහරති අප්පතිස්සවො, ධම්මෙ -පෙ- සඞ්ඝෙ -පෙ- සික්ඛාය න පරිපූරකාරී සො සඞ්ඝෙ විවාදං ජනෙති, යො හොති විවාදො බහුජනඅහිතාය බහුජනඅසුඛාය බහුනො ජනස්ස අනත්ථාය අහිතාය දුක්ඛාය දෙවමනුස්සානං. එවරූපං චෙ තුම්හෙ විවාදමූලං අජ්ඣත්තං වා පහිද්ධා වා සමනුපස්සෙය්යාථ, තත්ර තුම්හෙ තස්සෙව පාපකස්ස විවාදමූලස්ස පහානාය වායමෙය්යාථ එවරූපං චෙ තුම්හෙ විවාදමූලං අජ්ඣත්තං වා බහිද්ධා වා න සමනුපස්සෙය්යාථ, තත්ර තුම්හෙ තස්සෙව පාපකස්ස විවාදමූලස්ස ආයතිං අනවස්සවාය පටිපජ්ජෙය්යාථ. එවමෙතස්ස පාපකස්ස විවාදමූලස්ස පහානං හොති, එවමෙතස්ස පාපකස්ස විවාදමූලස්ස ආයතිං අනවස්සවො හොති.
පුන චපරං භික්ඛු මක්ඛී හොති පලාසී -පෙ- ඉස්සුකී හොති මච්ඡරී -පෙ- සඨො හොති මායාවී -පෙ- පාපිච්ඡො හොති මිච්ඡාදිට්ඨි -පෙ- සන්දිට්ඨිපරාමාසී හොති ආධානග්ගාහී දුප්පටිනිස්සග්ගී. යො සො භික්ඛු සන්දිට්ඨිපරාමාසී හොති ආධානග්ගාහී දුප්පටිනිස්සග්ගී, සො සත්ථරිපි අගාරවො විහරති අප්පතිස්සවො, ධම්මෙපි අගාරවො විහරති අප්පතිස්සවො, සඞ්ඝෙපි අගාරවො විහරති අප්පතිස්සවො, සික්ඛායපි න පරිපූරකාරී හොති. යො සො භික්ඛු සත්ථරි අගාරවො විහරති අප්පතිස්සවො ධම්මෙ -පෙ- සඞ්ඝෙ -පෙ- සික්ඛාය න පරිපූරකාරී, සො සඞ්ඝෙ විවාදං ජනෙති.
යො සො හොති විවාදො බහුජනඅහිතාය බහුජනඅසුඛාය බහුනො ජනස්ස අනත්ථාය අහිතාය දුක්ඛාය දෙවමනුස්සානං, එවරූපං චෙ තුම්හෙ විවාදමූලං අජ්ඣත්තං වා බහිද්ධා වා සමනුපස්සෙය්යාථ, තත්ර තුම්හෙ තස්සෙව පාපකස්ස විවාදමූලස්ස පහානාය වායමෙය්යාථ. එවරූපං චෙ තුම්හෙ විවාදමූලං අජ්ඣත්තං වා බහිද්ධා වා න සමනුපස්සෙය්යාථ, තත්ර තුම්හෙ තස්සෙව පාපකස්ස විවාදමූලස්ස ආයතිං අනවස්සවාය පටිපජ්ජෙය්යාථ. එවමෙතස්ස පාපකස්ස විවාදමූලස්ස පහානං හොති, එවමෙතස්ස පාපකස්ස විවාදමූලස්ස ආයතිං අනවස්සවො හොති, ඉමානි ඡ විවාදමූලානි.
13. තත්ථ කතමානි ඡ අනුවාදමූලානි : ඉධ භික්ඛු කොධනො හොති උපනාහී. යො සො භික්ඛු කොධනො හොති උපනාහී, සො සත්ථරිපි අගාරවො විහරති අප්පතිස්සවො. ධම්මෙපි අගාරවො විහරති අප්පතිස්සවො, සඞ්ඝෙපි අගාරවො විහරති අප්පතිස්සවො, සික්ඛායපි න පරිපූරකාරී හොති. යො සො භික්ඛු සත්ථරි අගාරවො විහරති අප්පතිස්සවො. ධම්මෙ -පෙ- සඞ්ඝෙ -පෙ- සික්ඛාය න පරිපූරකාරී සො සඞ්ඝෙ අනුවාදං ජනෙති, යො හොති අනුවාදො බහුජනඅහිතාය බහුජනඅසුඛාය බහුනො ජනස්ස අනත්ථාය අහිතාය දුක්ඛාය දෙවමනුස්සානං. එවරූපං චෙ තුම්හෙ අනුවාදමූලං අජ්ඣත්තං වා බහිද්ධා වා සමනුපස්සෙය්යාථ, තත්ර තුම්හෙ තස්සෙව පාපකස්ස අනුවාදමූලස්ස පහානාය වායමෙය්යාථ. එවරූපං චෙ තුම්හෙ අනුවාදමූලං අජ්ඣත්තං වා බහිද්ධා වා න සමනුපස්සෙය්යාථ, තත්ර තුම්හෙ තස්සෙව පාපකස්ස අනුවාදමූලස්ස ආයතිං අනවස්සවාය පටිපජ්ජෙය්යාථ. එවමෙතස්ස පාපකස්ස අනුවාදමූලස්ස පහානං හොති, එවමෙතස්ස පාපකස්ස අනුවාදමූලස්ස ආයතිං අනවස්සවො හොති.
පුන චපරං භික්ඛු මක්ඛී හොති පලාසී -පෙ- ඉස්සුකී හොති මච්ඡරී -පෙ- සඨො හොති මායාවී, පාපිච්ඡො හොති මිච්ඡාදිට්ඨි -පෙ- සන්දිට්ඨිපරාමාසී හොති ආධානග්ගාහී දුප්පටිනීස්සග්ගී, යො සො භික්ඛු සන්දිට්ඨිපරාමාසී හොති ආධානගාහී දුප්පටිනිස්සග්ගී සො සත්ථරිපි අගාරවො විහරති අප්පතිස්සවො, ධම්මෙපි අගාරවො විහරති අප්පතිස්සවො, සඞ්ඝෙපි අගාරවො විහරති අප්පතිස්සවො. සික්ඛායපි න පරිපූරකාරී හොති. යො භික්ඛු සත්ථරි අගාරවො විහරති අප්පතිස්සවො. ධම්මෙ -පෙ- සඞ්ඝෙ -පෙ- සික්ඛාය න පරිපූරකාරී, සො සඞ්ඝෙ අනුවාදං ජනෙති, යො හොති අනුවාදො බහුජනඅහිතාය බහුජනඅසුඛාය බහුනො ජනස්ස අනත්ථාය අහිතාය දුක්ඛාය දෙවමනුස්සානං. එවරූපං චෙ තුම්හෙ අනුවාදමූලං අජ්ඣත්තං වා බහිද්ධා වා සමනුපස්සෙය්යාථ, තත්ර තුම්හෙ තස්සෙව පාපකස්ස අනුවාදමූලස්ස පහානාය වායමෙය්යාථ. එවරූපං චෙ තුම්හෙ අනුවාදමූලං අජ්ඣත්තං වා බහිද්ධා වා න සමනුපස්සෙය්යාථ, තත්ර තුම්හෙ තස්සෙව පාපකස්ස අනුවාදමූලස්ස ආයතිං අනවස්සවාය පටිපජ්ජෙය්යාථ. එවමෙතස්ස පාපකස්ස අනුවාදමූලස්ස පහානං හොති. එවමෙතස්ස පාපකස්ස අනුවාදමූලස්ස ආයතිං අනවස්සවො හොති. ඉමානි ඡ අනුවාදමූලානි.