3. මධුං විඤ්ඤාපෙත්වා භුඤ්ජන්තියා පාටිදෙසනීයං කත්ථ -පෙ- ඡබ්බග්ගියා භික්ඛුනියො මධුං විඤ්ඤාපෙත්වා භුඤ්ජිංසු, තස්මිං වත්ථුස්මිං -පෙ-.
4. ඵාණිතං විඤ්ඤාපෙත්වා භුඤ්ජන්තියා පාටිදෙසනීයං කත්ථ -පෙ- ඡබ්බග්ගියා භික්ඛුනියො ඵාණිතං විඤ්ඤාපෙත්වා භුඤ්ජිංසු, තස්මිං වත්ථුස්මිං -පෙ-.
5. මච්ඡං විඤ්ඤාපෙත්වා භුඤ්ජන්තියා පාටිදෙසනීයං කත්ථ -පෙ- ඡබ්බග්ගියා භික්ඛුනියො මච්ඡං විඤ්ඤාපෙත්වා භුඤ්ජිංසු, තස්මිං වත්ථුස්මිං -පෙ-.
6. මංසං විඤ්ඤාපෙත්වා භුඤ්ජන්තියා පාටිදෙසනීයං කත්ථ -පෙ- ඡබ්බග්ගියා භික්ඛුනියො. මංසං විඤ්ඤාපෙත්වා භුඤ්ජිංසු, තස්මිං වත්ථුස්මිං -පෙ-.
7. ඛීරං විඤ්ඤාපෙත්වා භුඤ්ජන්තියා පාටිදෙසනීයං කත්ථ -පෙ- ඡබ්බග්ගියා භික්ඛුනියො ඛීරං විඤ්ඤාපෙත්වා භුඤ්ජිංසු, තස්මිං වත්ථුස්මිං -පෙ-.
8. දධිං විඤ්ඤාපෙත්වා භුඤ්ජන්තියා පාටිදෙසනීයං කත්ථ පඤ්ඤත්තන්ති : සාවත්ථියං පඤ්ඤත්තං. කං ආරබ්භාති : ඡබ්බග්ගියා භික්ඛුනියො ආරබ්භ. කිස්මිං වත්ථුස්මින්ති : ඡබ්බග්ගියා භික්ඛුනියො දධිං විඤ්ඤාපෙත්වා භුඤ්ජිංසු, තස්මිං වත්ථුස්මිං.
එකා පඤ්ඤත්ති, එකා අනුපඤ්ඤත්ති. ඡන්නං ආපත්තිසමුට්ඨානානං චතූහි සමුට්ඨානෙහි සමුට්ඨාති, සියා කායතො සමුට්ඨාති, න වාචතො. න චිත්තතො. සියා කායතො ච වාචතො ච සමුට්ඨාති, න චිත්තතො, සියා කායතො ච චිත්තතො ච සමුට්ඨාති, න වාචතො. සියා කායතො ච වාචතො ච චිත්තතො ච සමුට්ඨාති -පෙ-.
අට්ඨ පාටිදෙසනීයා නිට්ඨිතා.
තස්සුද්දානං:
සප්පිං තෙලං මධුඤ්චෙව ඵාණිතං මච්ඡමෙව ච, මංසං ඛීරං දධිඤ්චාපි විඤ්ඤාපෙත්වාන භික්ඛුනී, පාටිදෙසනීයා අට්ඨ සම්බුද්ධෙන පකාසිතාති.{1}
යෙ සික්ඛාපදා භික්ඛුවිභඞ්ගෙ විත්ථාරිතා තෙ සංඛිත්තා{2} භික්ඛුනී විභඞ්ගෙ.
කත්ථ පඤ්ඤත්තිවාරො නිට්ඨිතො පඨමො.
2. කතාපත්තිවාරො
2. 1.
පාරාජික කණ්ඩො
1. අවස්සුතා භික්ඛුනී අවස්සුතස්ස පුරිසපුග්ගලස්ස කායසංසග්ගං සාදියන්තී කති ආපත්තියො ආපජ්ජති : අවස්සුතා භික්ඛුනී අවස්සුතස්ස පුරිසපුග්ගලස්ස කායසංසග්ගං සාදියන්තී තිස්සො ආපත්තියො ආපජ්ජති : අධක්ඛකං උබ්භජාණුමණ්ඩලං ගහණං සාදියති ආපත්ති පාරාජිකස්ස. උබ්භක්ඛකං අධොජාණුමණ්ඩලං ගහණං සාදියති ආපත්ති ථුල්ලච්චයස්ස, කායපටිබද්ධගහණං සාදියති, ආපත්ති දුක්කටස්ස. අවස්සුතා භික්ඛුනී අවස්සුතස්ස පුරිසපුග්ගලස්ස කායසංසග්ගං සාදියන්තී ඉමා තිස්සො ආපත්තියො ආපජ්ජති.
2. වජ්ජප්පටිච්ඡාදිකා භික්ඛුනී වජ්ජං පටිච්ඡාදෙන්තී කති ආපත්තියො ආපජ්ජති : වජ්ජප්පටිච්ඡාදිකා භික්ඛුනී වජ්ජං පටිච්ඡාදෙන්තී තිස්සො ආපත්තියො ආපජ්ජති : ජානං පාරාජිකං ධම්මං පටිච්ඡාදෙති, ආපත්ති පාරාජිකස්ස; වෙමතිකා පටිච්ඡාදෙති, ආපත්ති ථුල්ලච්චයස්ස. ආචාරවිපත්තිං පටිච්ඡාදෙති, ආපත්ති දුක්කටස්ස. වජ්ජප්පටිච්ඡාදිකා භික්ඛුනී වජ්ජං පටිච්ඡාදෙන්තී ඉමා තිස්සො ආපත්තියො ආපජ්ජති.
3. උක්ඛිත්තානුවත්තිකා භික්ඛුනී යාව තතියං සමනුභාසනාය නප්පටිනිස්සජ්ජන්තී කති ආපත්තියො ආපජ්ජති : උක්ඛිත්තානුවත්තිකා භික්ඛුනී යාව තතියං සමනුභාසනාය නප්පටිනිස්සජ්ජන්තී තිස්සො ආපත්තියො ආපජ්ජති : ඤත්තියා දුක්කටං. ද්වීහි කම්මවාචාහි ථුල්ලච්චයං කම්මවාචාපරියොසානෙ ආපත්ති පාරාජිකස්ස. උක්ඛිත්තානුවත්තිකා භික්ඛුනී යාවතතියං සමනුභාසනාය නප්පටිනිස්සජ්ජන්තී ඉමා තිස්සො ආපත්තියො ආපජ්ජති.
4. අට්ඨමං වත්ථුං පරිපූරෙන්තී කති ආපත්තියො ආපජ්ජති : අට්ඨමං වත්ථුං පරිපූරෙන්තී තිස්සො ආපත්තියො ආපජ්ජති : “පුරිසෙන ඉත්ථන්නාමං ඔකාසං ආගච්ඡා”ති වුත්තා ගච්ඡති, ආපත්ති දුක්කටස්ස. පුරිසස්ස හත්ථපාසං ඔක්කන්තමත්තෙ ආපත්ති ථුල්ලච්චයස්ස. අට්ඨමං වත්ථුං පරිපූරෙති ආපත්ති පාරාජිකස්ස. අට්ඨමං වත්ථුං පරිපූරෙන්තී ඉමා තිස්සො ආපත්තියො ආපජ්ජති.
පාරාජිකා නිට්ඨිතා.
2. 2.
සඞ්ඝාදිසෙස කණ්ඩො
1. උස්සයවාදිකා භික්ඛුනී අට්ටං කරොන්තී තිස්සො ආපත්තියො ආපජ්ජති : එකස්ස ආරොචෙති, ආපත්ති දුක්කටස්ස. දුතියස්ස ආරොචෙති, ආපත්ති ථුල්ලච්චයස්ස; අට්ටපරියොසානෙ ආපත්ති සඞ්ඝාදිසෙසස්ස.{1}
2. චොරිං වුට්ඨාපෙන්තී තිස්සො ආපත්තියො ආපජ්ජති : ඤත්තියා දුක්කටං. ද්වීහි කම්මවාචාහි ථුල්ලච්චයං. කම්මවාචාපරියොසානෙ ආපත්ති සඞ්ඝාදිසෙසස්ස.
3. එකා ගාමන්තරං ගච්ඡන්තී තිස්සො ආපත්තියො ආපජ්ජති : ගච්ඡති ආපත්ති දුක්කටස්ස. පඨමං පාදං පරික්ඛෙපං අතික්කාමෙති, ආපත්ති ථුල්ලච්චයස්ස. දුතියං පාදං අතික්කාමෙති ආපත්ති සඞ්ඝාදිසෙසස්ස.
4. සමග්ගෙන සඞ්ඝෙන උක්ඛිත්තං භික්ඛුනිං ධම්මෙන විනයෙන සත්ථුසාසනෙන අනපලොකෙත්වා කාරකසඞ්ඝං අනඤ්ඤාය ගණස්ස ඡන්දං ඔසාරෙන්තී තිස්සො ආපත්තියො ආපජ්ජති : ඤත්තියා දුක්කටං. ද්වීහි කම්මවාචාහි ථුල්ලච්චයං කම්මවාචාපරියොසානෙ ආපත්ති සඞ්ඝාදිසෙසස්ස.
5. අවස්සුතා භික්ඛුනී අවස්සුතස්ස පුරිසපුග්ගලස්ස හත්ථතො ඛාදනීයං වා භොජනීයං වා සහත්ථා පටිග්ගහෙත්වා භුඤ්ජන්තී තිස්සො ආපත්තියො ආපජ්ජති : ඛාදිස්සාමි භුඤ්ජිස්සාමීති පටිගණ්හාති, ආපත්ති ථුල්ලච්චයස්ස; අජ්ඣොහාරෙ අජ්ඣොහාරෙ ආපත්ති සඞ්ඝාදිසෙසස්ස; උදකදන්තපොණං පටිගණ්හාති, ආපත්ති දුක්කටස්ස.
6. “කිං තෙ අය්යෙ එසො පුරිසපුග්ගලො කරිස්සති අවස්සුතො වා අනවස්සුතො වා යතො ත්වං අනවස්සුතා, ඉඞ්ඝය්යෙ යං තෙ එසො පුරිසපුග්ගලො දෙති ඛාදනීයං වා භොජනීයං වා, තං ත්වං සහත්ථා පටිග්ගහෙත්වා ඛාද වා භුඤ්ජ වා”ති උය්යොජෙන්තී තිස්සො ආපත්තියො ආපජ්ජති : තස්සා වචනෙන ඛාදිස්සාමි භුඤ්ජිස්සාමීති පටිග්ගණ්හාති,{1} ආපත්ති දුක්කටස්ස. අජ්ඣොහාරෙ අජ්ඣොහාරෙ ආපත්ති ථුල්ලච්චයස්ස භොජනපරියොසානෙ ආපත්ති සඞ්ඝාදිසෙසස්ස.
7. කුපිතා භික්ඛුනී යාව තතියං සමනුභාසනාය නප්පටිනිස්සජ්ජන්තී තිස්සො ආපත්තියො ආපජ්ජති : ඤත්තියා දුක්කටං, ද්වීහි කම්මවාචාහි ථුල්ලච්චයා, කම්මවාචාපරියොසානෙ ආපත්ති සඞ්ඝාදිසෙසස්ස.
8. කිස්මිචිදෙව අධිකරණෙ පච්චාකතා භික්ඛුනී යාවතතියං සමනුභාසනාය නප්පටිනිස්සජ්ජන්තී තිස්සො ආපත්තියො ආපජ්ජති : ඤත්තියා දුක්කටං. ද්වීහි කම්මවාචාහි ථුල්ලච්චයං. කම්මවාචාපරියොසානෙ ආපත්ති සඞ්ඝාදිසෙසස්ස.
9. සංසට්ඨා භික්ඛුනියො යාවතතියං සමනුභාසනාය නප්පටිනිස්සජ්ජන්තියො තිස්සො ආපත්තියො ආපජ්ජන්ති : ඤත්තියා දුක්කටං. ද්වීහි කම්මවාචාහි ථුල්ලච්චයා කම්මවාචාපරියොසානෙ ආපත්ති සඞ්ඝාදිසෙසස්ස.
10. “සංසට්ඨාවය්යෙ, තුම්හෙ විහරථ. මා තුම්හෙ නානා විහරිත්ථා”ති උය්යොජෙන්තී යාවතතියං සමනුභාසනාය නප්පටිනිස්සජ්ජන්තී තිස්සො ආපත්තියො ආපජ්ජති : ඤත්තියා දුක්කටං, ද්වීහි කම්මවාචාහි ථුල්ලච්චයං කම්මවාචාපරියොසානෙ ආපත්ති සඞ්ඝාදිසෙසස්ස.
සඞ්ඝාදිසෙසා නිට්ඨිතා.
2. 3.
නිස්සග්ගිය කණ්ඩො
1. පත්තසන්නිචයං කරොන්තී එකං ආපත්තිං ආපජ්ජති : නිස්සග්ගියං පාචිත්තියං.
2. අකාලචීවරං කාලචීවරන්ති අධිට්ඨහිත්වා භාජාපෙන්තී ද්වෙ ආපත්තියො ආපජ්ජති : භාජාපෙති, පයොගෙ දුක්කටං, භාජාපිතෙ නිස්සග්ගියං පාචිත්තියං.
3. භික්ඛුනියා සද්ධිං චීවරං පරිවත්තෙත්වා අච්ඡින්දන්තී ද්වෙ ආපත්තියො ආපජ්ජති : අච්ඡින්දති, පයොගෙ දුක්කටං, අච්ඡින්නෙ නිස්සග්ගියං පාචිත්තියං.
4. අඤ්ඤං විඤ්ඤාපෙත්වා අඤ්ඤං විඤ්ඤාපෙන්තී ද්වෙ ආපත්තියො ආපජ්ජති : විඤ්ඤාපෙති, පයොගෙ දුක්කටං, විඤ්ඤාපිතෙ නිස්සග්ගියං පාචිත්තියං.
5. අඤ්ඤං චෙතාපෙත්වා අඤ්ඤං චෙතාපෙන්තී ද්වෙ ආපත්තියො ආපජ්ජති : චෙතාපෙති, පයොගෙ දුක්කටං, චෙතාපිතෙ නිස්සග්ගියං පාචිත්තියං.
6. අඤ්ඤදත්ථිකෙන පරික්ඛාරෙන අඤ්ඤුද්දිසිකෙන සඞ්ඝිකෙන අඤ්ඤං චෙතාපෙන්තී ද්වෙ ආපත්තියො ආපජ්ජති : චෙතාපෙති, පයොගෙ දුක්කටං, චෙතාපිතෙ නිස්සග්ගියං පාචිත්තියං.
7. අඤ්ඤදත්ථිකෙ පරික්ඛාරෙන අඤ්ඤුද්දිසිකෙන සඞ්ඝිකෙන සඤ්ඤාචිකෙන අඤ්ඤං චෙතාපෙන්තී ද්වෙ ආපත්තියො ආපජ්ජති : චෙතාපෙති, පයොගෙ දුක්කටං, චෙතාපිතෙ නිස්සග්ගියං පාචිත්තියං.
8. අඤ්ඤදත්ථිකෙන පරික්ඛාරෙන අඤ්ඤුද්දිසිකෙන මහාජනිකෙන අඤ්ඤං චෙතාපෙන්තී ද්වෙ ආපත්තියො ආපජ්ජති : චෙතාපෙති, පයොගෙ දුක්කටං, චෙතාපිතෙ නිස්සග්ගියං පාචිත්තියං.
9. අඤ්ඤදත්ථිකෙන පරික්ඛාරෙන අඤ්ඤුද්දිසිකෙන මහාජනිකෙන සඤ්ඤාචිකෙන අඤ්ඤං චෙතාපෙන්තී ද්වෙ ආපත්තියො ආපජ්ජති : චෙතාපෙති, පයොගෙ දුක්කටං, චෙතාපිතෙ නිස්සග්ගියං පාචිත්තියං.
10. අඤ්ඤදත්ථිකෙන පරික්ඛාරෙන අඤ්ඤුද්දිසිකෙ පුග්ගලිකෙන සඤ්ඤාචිකෙන අඤ්ඤං චෙතාපෙන්තී ද්වෙ ආපත්තියො ආපජ්ජති : චෙතාපෙති, පයොගෙ දුක්කටං, චෙතාපිතෙ නිස්සග්ගියං පාචිත්තියං.
11. අතිරෙකචතුක්කංසපරමං ගරුපාපුරණං චෙතාපෙන්තී ද්වෙ ආපත්තියො ආපජ්ජති : චෙතාපෙති, පයොගෙ දුක්කටං, චෙතාපිතෙ නිස්සග්ගියං පාචිත්තියං.
12. අතිරෙකඅඩ්ඪතෙය්යකංසපරමං ලහුපාපුරණං චෙතාපෙන්තී ද්වෙ ආපත්තියො ආපජ්ජති : චෙතාපෙති, පයොගෙ දුක්කටං, චෙතාපිතෙ නිස්සග්ගියං පාචිත්තියං.
නිස්සග්ගියා පාචිත්තියා නිට්ඨිතා.
2. 4.
පාචිත්තිය කණ්ඩො
4. 1.
1. ලසුණං ඛාදන්තී ද්වෙ ආපත්තියො ආපජ්ජති : ඛාදිස්සාමීති පටිගණ්හාති{1} ආපත්ති දුක්කටස්ස, අජ්ඣොහාරෙ අජ්ඣොහාරෙ ආපත්ති පාචිත්තියස්ස.
2. සම්බාධෙ ලොමං සංහරාපෙන්තී ද්වෙ ආපත්තියො ආපජ්ජති : සංහරාපෙති පයොගෙ දුක්කටං. සංහරාපිතෙ ආපත්ති පාචිත්තියස්ස.
3. තලඝාතකං කරොන්තී ද්වෙ ආපත්තියො ආපජ්ජති : කරොති, පයොගෙ දුක්කටං. කතෙ ආපත්ති පාචිත්තියස්ස.
4. ජතුමට්ටකං ආදියන්තී ද්වෙ ආපත්තියො ආපජ්ජති : ආදියති, පයොගෙ දුක්කටං. ආදියිතෙ{2} ආපත්ති පාචිත්තියස්ස.
5. අතිරෙකද්වඞ්ගුලපබ්බපරමං උදකසුද්ධිකං ආදියන්තී ද්වෙ ආපත්තියො ආපජ්ජති : ආදියති, පයොගෙ දුක්කටං. ආදින්නෙ ආපත්ති පාචිත්තියස්ස.
6. භික්ඛුස්ස භුඤ්ජන්තස්ස පානීයෙන වා විධූපනෙන වා උපතිට්ඨන්තී ද්වෙ ආපත්තියො ආපජ්ජති : හත්ථපාසෙ තිට්ඨති ආපත්ති පාචිත්තියස්ස. හත්ථපාසං විජහිත්වා තිට්ඨති ආපත්ති දුක්කටස්ස.
7. ආමකධඤ්ඤං විඤ්ඤාපෙත්වා භුඤ්ජන්තී ද්වෙ ආපත්තියො ආපජ්ජති : භුඤ්ජිස්සාමීති පටිගණ්හාති ආපත්ති දුක්කටස්ස. අජ්ඣොහාරෙ අජ්ඣොහාරෙ ආපත්ති පාචිත්තියස්ස.
8. උච්චාරං වා පස්සාවං වා සඞ්කාරං වා විඝාසං වා තිරොකුඩ්ඩෙ වා තිරොපාකාරෙ වා ඡඩ්ඩෙන්තී ද්වෙ ආපත්තියො ආපජ්ජති : ඡඩ්ඩෙති පයොගෙ දුක්කටං. ඡඩ්ඩිතෙ ආපත්ති පාචිත්තියස්ස.
9. උච්චාරං වා පස්සාවං වා සඞ්කාරං වා විඝාසං වා හරිතෙ ඡඩ්ඩෙන්තී ද්වෙ ආපත්තියො ආපජ්ජති : ඡඩ්ඩෙති පයොගෙ දුක්කටං. ඡඩ්ඩිතෙ ආපත්ති පාචිත්තියස්ස.
10. නච්චං වා ගීතං වා වාදිතං වා දස්සනාය ගච්ඡන්තී ද්වෙ ආපත්තියො ආපජ්ජති : ගච්ඡති, ආපත්ති දුක්කටස්ස. යත්ථ ඨිතා පස්සති වා සුණාති වා ආපත්ති පාචිත්තියස්ස.
ලසුණවග්ගො පඨමො.
4. 2.
1. රත්තන්ධකාරෙ අප්පදීපෙ පුරිසෙන සද්ධිං එකෙනෙකා සන්තිට්ඨන්තී ද්වෙ ආපත්තියො ආපජ්ජති : හත්ථපාසෙ තිට්ඨති, ආපත්ති පාචිත්තියස්ස. හත්ථපාසං විජහිත්වා තිට්ඨති, ආපත්ති දුක්කටස්ස.
2. පටිච්ඡන්නෙ ඔකාසෙ පුරිසෙන සද්ධිං එකෙනෙකා සන්තිට්ඨන්තී ද්වෙ ආපත්තියො ආපජ්ජති : හත්ථපාසෙ තිට්ඨති ආපත්ති පාචිත්තියස්ස. හත්ථපාසං විජහිත්වා තිට්ඨති ආපත්ති දුක්කටස්ස.
3. අජ්ඣොකාසෙ පුරිසෙන සද්ධිං එකෙනෙකා සන්තිට්ඨන්තී ද්වෙ ආපත්තියො ආපජ්ජති : හත්ථපාසෙ තිට්ඨති, ආපත්ති පාචිත්තියස්ස. හත්ථපාසං විජහිත්වා තිට්ඨති ආපත්ති දුක්කටස්ස.
4. රථියා වා බ්යූහෙ වා සිඞ්ඝාටකෙ වා පුරිසෙන සද්ධිං එකෙනෙකා සන්තිට්ඨන්තී ද්වෙ ආපත්තියො ආපජ්ජති : හත්ථපාසෙ තිට්ඨති ආපත්ති පාචිත්තියස්ස. හත්ථපාසං විජහිත්වා තිට්ඨති ආපත්ති දුක්කටස්ස.
5. පුරෙභත්තං කුලානි උපසඞ්කමිත්වා ආසනෙ නිසීදිත්වා සාමිකෙ අනාපුච්ඡා පක්කමන්තී ද්වෙ ආපත්තියො ආපජ්ජති : පඨමං පාදං අනොවස්සකං අතික්කාමෙති ආපත්ති දුක්කටස්ස. දුතියං පාදං අතික්කාමෙති ආපත්ති පාචිත්තියස්ස.
6. පච්ඡාභත්තං කුලානි උපසඞ්කමිත්වා සාමිකෙ අනාපුච්ඡා ආසනෙ නිසීදන්තී ද්වෙ ආපත්තියො ආපජ්ජති : නිසීදති පයොගෙ දුක්කටං. නිසින්නෙ ආපත්ති පාචිත්තියස්ස.
7. විකාලෙ කුලානි උපසඞ්කමිත්වා සාමිකෙ අනාපුච්ඡා සෙය්යං සන්ථරිත්වා වා සන්ථරාපෙත්වා වා අභිනිසීදන්තී ද්වෙ ආපත්තියො ආපජ්ජති : අභිනිසීදති පයොගෙ දුක්කටං, අභිනිසින්නෙ ආපත්ති පාචිත්තියස්ස.
8. දුග්ගහිතෙන දූපධාරිතෙන පරං උජ්ඣාපෙන්තී ද්වෙ ආපත්තියො ආපජ්ජති : උජ්ඣාපෙති පයොගෙ දුක්කටං. උජ්ඣාපිතෙ ආපත්ති පාචිත්තියස්ස.
9. අත්තානං වා පරං වා නිරයෙන වා බ්රහ්මචරියෙන වා අභිසපන්තී ද්වෙ ආපත්තියො ආපජ්ජති : අභිසපති පයොගෙ දුක්කටං. අභිසපිතෙ ආපත්ති පාචිත්තියස්ස.
10. අත්තානං වධිත්වා වධිත්වා රොදන්තී ද්වෙ ආපත්තියො ආපජ්ජති : වධති රොදති ආපත්ති පාචිත්තියස්ස. වධති න රොදති ආපත්ති දුක්කටස්ස.
රත්තන්ධකාරවග්ගො දුතියො.
4. 3.
1. නග්ගා නහායන්තී ද්වෙ ආපත්තියො ආපජ්ජති : නහායති පයොගෙ දුක්කටං. නහානපරියොසානෙ ආපත්ති පාචිත්තියස්ස.
2. පමාණාතික්කන්තං උදකසාටිකං කාරාපෙන්තී ද්වෙ ආපත්තියො ආපජ්ජති : කාරාපෙති පයොගෙ දුක්කටං. කාරාපිතෙ ආපත්ති පාචිත්තියස්ස.
3. භික්ඛුනියා චීවරං විසිබ්බෙත්වා වා විසිබ්බාපෙත්වා වා නෙව සිබ්බෙන්තී න සිබ්බාපනාය උස්සුක්කං කරොන්තී එකං ආපත්තිං ආපජ්ජති : පාචිත්තියං.
4. පඤ්චාහිකං සඞ්ඝාටිචාරං{1} අතික්කාමෙන්තී එකං ආපත්තිං ආපජ්ජති : පාචිත්තියං.
5. චීවරසඞ්කමනීයං ධාරෙන්තී ද්වෙ ආපත්තියො ආපජ්ජති : ධාරෙති පයොගෙ දුක්කටං. ධාරිතෙ ආපත්ති පාචිත්තියස්ස.
6. ගණස්ස චීවරලාභං අන්තරායං කරොන්තී ද්වෙ ආපත්තියො ආපජ්ජති : කරොති පයොගෙ දුක්කටං. කතෙ ආපත්ති පාචිත්තියස්ස.
7. ධම්මිකං චීවරවිභඞ්ගං පටිබාහන්තී ද්වෙ ආපත්තියො ආපජ්ජති : පටිබාහති පයොගෙ දුක්කටං. පටිබාහිතෙ ආපත්ති පාචිත්තියස්ස.
8. අගාරිකස්ස වා පරිබ්බාජකස්ස වා පරිබ්බාජිකාය වා සමණචීවරං දෙන්තී ද්වෙ ආපත්තියො ආපජ්ජති : දෙති පයොගෙ දුක්කටං. දින්නෙ ආපත්ති පාචිත්තියස්ස.
9. දුබ්බලචීවරපච්චාසාය චීවරකාලසමයං අතික්කාමෙන්තී ද්වෙ ආපත්තියො ආපජ්ජති : අතික්කාමෙති පයොගෙ දුක්කටං. අතික්කාමිතෙ ආපත්ති පාචිත්තියස්ස.
10. ධම්මිකං කඨිනුද්ධාරං පටිබාහන්තී ද්වෙ ආපත්තියො ආපජ්ජති : පටිබාහති පයොගෙ දුක්කටං. පටිබාහිතෙ ආපත්ති පාචිත්තියස්ස.
නහානවග්ගො තතියො.
4. 4.
1. ද්වෙ භික්ඛුනියො එකමඤ්චෙ තුවට්ටෙන්තියො ද්වෙ ආපත්තියො ආපජ්ජන්ති : නිපජ්ජන්ති පයොගෙ දුක්කටං. නිපන්නෙ ආපත්ති පාචිත්තියස්ස.
2. ද්වෙ භික්ඛුනියො එකත්ථරණපාපුරණා තුවට්ටෙන්තියො ද්වෙ ආපත්තියො ආපජ්ජන්ති : නිපජ්ජන්ති පයොගෙ දුක්කටං. නිපන්නෙ ආපත්ති පාචිත්තියස්ස.
3. භික්ඛුනියා සඤ්චිච්ච අඵාසුං කරොන්තී ද්වෙ ආපත්තියො ආපජ්ජති : කරොති පයොගෙ දුක්කටං. කතෙ ආපත්ති පාචිත්තියස්ස.
4. දුක්ඛිතං සහජීවිනිං නෙව උපට්ඨහන්තී න උපට්ඨාපනාය උස්සුක්කං කරොන්තී එකං ආපත්තිං ආපජ්ජති : පාචිත්තියං.
5. භික්ඛුනියා උපස්සයං දත්වා කුපිතා අනත්තමනා නික්කඩ්ඪන්තී ද්වෙ ආපත්තියො ආපජ්ජති : නික්කඩ්ඪති පයොගෙ දුක්කටං. නික්කඩ්ඪිතෙ ආපත්ති පාචිත්තියස්ස.
6. සංසට්ඨා භික්ඛුනී යාව තතියං සමනුභාසනාය නප්පටිනිස්සජ්ජන්තී ද්වෙ ආපත්තියො ආපජ්ජති : ඤත්තියා දුක්කටං. කම්මවාචාපරියොසානෙ ආපත්ති පාචිත්තියස්ස.
7. අන්තොරට්ඨෙ සාසඞ්කසම්මතෙ සප්පටිභයෙ අසත්ථිකා චාරිකං චරන්තී ද්වෙ ආපත්තියො ආපජ්ජති : පටිපජ්ජති පයොගෙ දුක්කටං. පටිපන්නෙ ආපත්ති පාචිත්තියස්ස.
8. තිරොරට්ඨෙ සාසඞ්කසම්මතෙ සප්පටිභයෙ අසත්ථිකා චාරිකං චරන්තී ද්වෙ ආපත්තියො ආපජ්ජති : පටිපජ්ජති පයොගෙ දුක්කටං. පටිපන්නෙ ආපත්ති පාචිත්තියස්ස.
9. අන්තොවස්සං චාරිකං චරන්තී ද්වෙ ආපත්තියො ආපජ්ජති : පටිපජ්ජති පයොගෙ දුක්කටං. පටිපන්නෙ ආපත්ති පාචිත්තියස්ස.
10. වස්සං වුත්ථා භික්ඛුනී චාරිකං න පක්කමන්තී එකං ආපත්තිං ආපජ්ජති : පාචිත්තියං.
තුවට්ටවග්ගො චතුත්ථො.
4. 5.
1. රාජාගාරං වා චිත්තාගාරං වා ආරාමං වා උය්යානං වා පොක්ඛරණිං වා දස්සනාය ගච්ඡන්තී ද්වෙ ආපත්තියො ආපජ්ජති : ගච්ඡති පයොගෙ දුක්කටං. යත්ථ ඨිතා{1} පස්සති, ආපත්ති පාචිත්තියස්ස.