තීහාකාරෙහි ආපත්තියා වුට්ඨාති : කායෙන වුට්ඨාති, වාචාය වුට්ඨාති, කායෙන වාචාය වුට්ඨාති. අපරෙහිපි තීහාකාරෙහි ආපත්තියා වුට්ඨාති : සඞ්ඝමජ්ඣෙ, ගණමජ්ඣෙ, පුග්ගලස්ස සන්තිකෙ.
තීණි අධම්මිකානි අමූළ්හවිනයස්ස දානානි : තීණි ධම්මිකානි අමූළ්හවිනයස්ස දානානි.
5. තීහඞ්ගෙහි සමන්නාගතස්ස භික්ඛුනො ආකඞ්ඛමානො සඞ්ඝො. තජ්ජනීයකම්මං කරෙය්ය : භණ්ඩනකාරකො හොති කලහකාරකො විවාදකාරකො භස්සකාරකො සඞ්ඝෙ අධිකරණකාරකො, බාලො හොති අබ්යත්තො ආපත්තිබහුලො අනපදානො, ගිහීසංසට්ඨො විහරති අනනුලොමිකෙහි ගිහීසංසග්ගෙහි.
තීහඞ්ගෙහි සමන්නාගතස්ස භික්ඛුනො ආකඞ්ඛමානො සඞ්ඝො නියස්සකම්මං කරෙය්ය : භණ්ඩනකාරකො හොති -පෙ- සඞ්ඝෙ අධිකරණකාරකො, බාලො හොති අබ්යත්තො ආපත්තිබහුලො අනපදානො ගිහීසංසට්ඨො විහරති අනනුලොමිකෙහි ගිහීසංසග්ගෙහි.
තීහඞ්ගෙහි සමන්නාගතස්ස භික්ඛුනො ආකඞ්ඛමානො සඞ්ඝො පබ්බාජනීයකම්මං කරෙය්ය : භණ්ඩනකාරකො හොති -පෙ- සඞ්ඝෙ අධිකරණකාරකො, බාලො හොති අබ්යත්තො ආපත්තිබහුලො අනපදානො, කුලදූසකො හොති පාපසමාචාරො, දිස්සන්ති චෙව පාපකා සමාචාරා සුය්යන්ති ච.
තීහඞ්ගෙහි සමන්නාගතස්ස භික්ඛුනො ආකඞ්ඛමානො සඞ්ඝො පටිසාරණීයකම්මං කරෙය්ය : භණ්ඩනකාරකො හොති -පෙ- සඞ්ඝෙ අධිකරණකාරකො, බාලො හොති අබ්යත්තො, ආපත්ති බහුලො අනපදානො, ගිහී අක්කොසති පරිභාසති.
තීහඞ්ගෙහි සමන්නාගතස්ස භික්ඛුනො ආකඞ්ඛමානො සඞ්ඝො ආපත්තියා අදස්සනෙ උක්ඛෙපනීයකම්මං කරෙය්ය : භණ්ඩනකාරකො හොති -පෙ- සඞ්ඝෙ අධිකරණකාරකො, බාලො හොති අබ්යත්තො ආපත්තිබහුලො අනපදානො, ආපත්තිං ආපජ්ජිත්වා න ඉච්ඡති ආපත්තිං පස්සිතුං.
තීහඞ්ගෙහි සමන්නාගතස්ස භික්ඛුනො ආකඞ්ඛමානො සඞ්ඝො ආපත්තියා අප්පටිකම්මෙ උක්ඛෙපනීයකම්මං කරෙය්ය : භණ්ඩනකාරකො හොති -පෙ- සඞ්ඝෙ අධිකරණකාරකො, බාලො හොති අබ්යත්තො ආපත්තිබහුලො අනපදානො, ආපත්තිං ආපජ්ජිත්වා න ඉච්ඡති ආපත්තිං පටිකාතුං.
තීහඞ්ගෙහි සමන්නාගතස්ස භික්ඛුනො ආකඞ්ඛමානො සඞ්ඝො පාපිකාය දිට්ඨියා අප්පටිනිස්සග්ගෙ උක්ඛෙපනීයකම්මං කරෙය්ය : භණ්ඩනකාරකො හොති -පෙ- සඞ්ඝෙ අධිකරණකාරකො, බාලො හොති අබ්යත්තො ආපත්තිබහුලො අනපදානො, න ඉච්ඡති පාපිකං දිට්ඨිං පටිනිස්සජ්ජිතුං.
තීහඞ්ගෙහි සමන්නාගතස්ස භික්ඛුනො ආකඞ්ඛමානො සඞ්ඝො ආගාළ්හාය චෙතෙය්ය : භණ්ඩනකාරකො හොති කලහකාරකො විවාදකාරකො භස්සකාරකො සඞ්ඝෙ අධිකරණකාරකො, බාලො හොති අබ්යත්තො ආපත්තිබහුලො අනපදානො, ගිහීසංසට්ඨො විහරති අනනුලොමිකෙහි ගිහීසංසග්ගෙහි.
6. තීහඞ්ගෙහි සමන්නාගතස්ස භික්ඛුනො කම්මං කාතබ්බං : අලජ්ජී ච හොති, බාලො ච, අපකතත්තො ච.
අපරෙහිපි තීහඞ්ගෙහි සමන්නාගතස්ස භික්ඛුනො කම්මං කාතබ්බං : අධිසීලෙ සීලවිපන්නො හොති, අජ්ඣාචාරෙ ආචාරවිපන්නො හොති, අතිදිට්ඨියා දිට්ඨිවිපන්නො හොති.
අපරෙහිපි තීහඞ්ගෙහි සමන්නාගතස්ස භික්ඛුනො කම්මං කාතබ්බං : කායිකෙන දවෙන සමන්නාගතො හොති, වාචසිකෙන දවෙන සමන්නාගතො හොති, කායිකවාචසිකෙන දවෙන සමන්නාගතො හොති.
අපරෙහිපි තීහඞ්ගෙහි සමන්නාගතස්ස භික්ඛුනො කම්මං කාතබ්බං : කායිකෙන අනාචාරෙන සමන්නාගතො හොති, වාචසිකෙන අනාචාරෙන සමන්නාගතො හොති, කායිකවාචසිකෙන අනාචාරෙන සමන්නාගතො හොති.
අපරෙහිපි තීහඞ්ගෙහි සමන්නාගතස්ස භික්ඛුනො කම්මං කාතබ්බං : කායිකෙන උපඝාතිකෙන සමන්නාගතො හොති, වාචසිකෙන උපඝාතිකෙන සමන්නාගතො හොති, කායිකවාචසිකෙන උපඝාතිකෙන සමන්නාගතො හොති.
අපරෙහිපි තීහඞ්ගෙහි සමන්නාගතස්ස භික්ඛුනො කම්මං කාතබ්බං : කායිකෙන මිච්ඡාජීවෙන සමන්නාගතො හොති, වාචසිකෙන මිච්ඡාජීවෙන සමන්නාගතො හොති, කායිකවාචසිකෙන මිච්ඡාජීවෙන සමන්නාගතො හොති.
අපරෙහිපි තීහඞ්ගෙහි සමන්නාගතස්ස භික්ඛුනො කම්මං කාතබ්බං : ආපත්තිං ආපන්නො කම්මකතො උපසම්පාදෙති, නිස්සයං දෙති, සාමණෙරං උපට්ඨාපෙති.
අපරෙහිපි තීහඞ්ගෙහි සමන්නාගතස්ස භික්ඛුනො කම්මං කාතබ්බං : යාය ආපත්තියා සඞ්ඝෙන කම්මං කතං හොති, තං ආපත්තිං ආපජ්ජති, අඤ්ඤං වා තාදිසිකං, තතො වා පාපිට්ඨතරං.
අපරෙහිපි තීහඞ්ගෙහි සමන්නාගතස්ස භික්ඛුනො කම්මං කාතබ්බං : බුද්ධස්ස අවණ්ණං භාසති, ධම්මස්ස අවණ්ණං භාසති, සඞ්ඝස්ස අවණ්ණං භාසති.
7. තීහඞ්ගෙහි සමන්නාගතස්ස භික්ඛුනො සඞ්ඝමජ්ඣෙ උපොසථං ඨපෙන්තස්ස “අලං භික්ඛු මා භණ්ඩනං, මා කලහං, මා විග්ගහං, මා විවාද”න්ති ඔමද්දිත්වා සඞ්ඝෙන උපොසථො කාතබ්බො : අලජ්ජී ච හොති, බාලො ච අපකතත්තො ච.
තීහඞ්ගෙහි සමන්නාගතස්ස භික්ඛුනො සඞ්ඝමජ්ඣෙ පවාරණං ඨපෙන්තස්ස : “අලං භික්ඛු මා භණ්ඩනං, මා කලහං, මා විග්ගහං. මා විවාදං”ති ඔමද්දිත්වා{1} සඞ්ඝෙන පවාරෙතබ්බං : අලජ්ජී ච හොති, බාලො ච, අපකතත්තො ච.
8. තීහඞ්ගෙහි සමන්නාගතස්ස භික්ඛුනො න කාචි සඞ්ඝසම්මුති දාතබ්බා : අලජ්ජී ච හොති, බාලො ච, අපකතත්තො ච.
තීහඞ්ගෙහි සමන්නාගතෙන භික්ඛුනා සඞ්ඝෙ න වොහරිතබ්බං{1} අලජ්ජී ච හොති, බාලො ච, අපකතත්තො ච.
තීහඞ්ගෙහි සමන්නාගතො භික්ඛු න කිස්මිචි පච්චෙකට්ඨානෙ ඨපෙතබ්බො : අලජ්ජී ච හොති, බාලො ච, අපකතත්තො ච.
තීහඞ්ගෙහි සමන්නාගතස්ස භික්ඛුනො නිස්සාය න වත්ථබ්බං : අලජ්ජී ච හොති, බාලො ච, අපකතත්තො ච.
තීහඞ්ගෙහි සමන්නාගතස්ස භික්ඛුනො නිස්සයො න දාතබ්බො : අලජ්ජී ච හොති, බාලො ච, අපකතත්තො ච.
තීහඞ්ගෙහි සමන්නාගතස්ස භික්ඛුනො ඔකාසකම්මං කාරාපෙන්තස්ස නාලං ඔකාසකම්මං කාතුං : අලජ්ජී ච හොති, බාලො ච, අපකතත්තො ච.
තීහඞ්ගෙහි සමන්නාගතස්ස භික්ඛුනො සවචනීයං නාදාතබ්බං{2} : අලජ්ජී ච හොති, බාලො ච, අපකතත්තො ච.
තීහඞ්ගෙහි සමන්නාගතස්ස භික්ඛුනො විනයො න පුච්ඡිතබ්බො : අලජ්ජී ච හොති, බාලො ච, අපකතත්තො ච.
තීහඞ්ගෙහි සමන්නාගතෙන භික්ඛුනා විනයො න පුච්ඡිතබ්බො : අලජ්ජී ච හොති, බාලො ච, අපකතත්තො ච.
තීහඞ්ගෙහි සමන්නාගතස්ස භික්ඛුනො විනයො න විස්සජ්ජෙතබ්බො : අලජ්ජී ච හොති, බාලො ච, අපකතත්තො ච.
තීහඞ්ගෙහි සමන්නාගතෙන භික්ඛුනා විනයො න විස්සජ්ජෙතබ්බො : අලජ්ජී ච හොති, බාලො ච, අපකතත්තො ච.
තීහඞ්ගෙහි සමන්නාගතස්ස භික්ඛුනො අනුයොගො න දාතබ්බො : අලජ්ජී ච හොති, බාලො ච, අපකතත්තො ච.
තීහඞ්ගෙහි සමන්නාගතෙන භික්ඛුනා සද්ධිං විනයො න සාකච්ඡිතබ්බො{3} : අලජ්ජී ච හොති, බාලො ච, අපකතත්තො ච.
තීහඞ්ගෙහි සමන්නාගතෙන භික්ඛුනා න උපසම්පාදෙතබ්බො, න නිස්සයො දාතබ්බො, න සාමණෙරො උපට්ඨාපෙතබ්බො : අලජ්ජී ච හොති, බාලො ච, අපකතත්තො ච.
9. තයො උපොසථා : චාතුද්දසිකො, පණ්ණරසිකො, සාමග්ගිඋපොසථො. අපරෙපි තයො උපොසථා : සඞ්ඝෙ උපොසථො, ගණෙ උපොසථො, පුග්ගලෙ උපොසථො. අපරෙපි තයො උපොසථා : සුත්තූද්දෙසො උපොසථො, පාරිසුද්ධි උපොසථො, අධිට්ඨානුපොසථො.
තිස්සො පවාරණා : චාතූද්දසිකා, පණ්ණරසිකා, සාමග්ගීපවාරණා. අපරාපි තිස්සො පවාරණා : සඞ්ඝෙ පවාරණා, ගණෙ පවාරණා, පුග්ගලෙ පවාරණා. අපරාපි තිස්සො පවාරණා : තෙවාචිකා පවාරණා, ද්වෙවාචිකා පවාරණා, සමානවස්සිකා පවාරණා.
10. තයො ආපායිකා නෙරයිකා : ඉදමප්පහාය : යො ච අබ්රහ්මචාරී බ්රහ්මචාරීපටිඤ්ඤො, යො ච සුද්ධං බ්රහ්මචාරිං{1} පරිසුද්ධං{2} බ්රහ්මචරියං චරන්තං අමූලකෙන අබ්රහ්මචරියෙන{3} අනුද්ධංසෙති, යො චායං එවංවාදී එවංදිට්ඨි “නත්ථි කාමෙසු දොසො”ති සො කාමෙසු පාතව්යතං ආපජ්ජති.”
11. තීණි අකුසලමූලානි : ලොභො අකුසලමූලං, දොසො අකුසලමූලං, මොහො අකුසලමූලං. තීණි කුසලමූලානි : අලොභො කුසලමූලං, අදොසො කුසලමූලං, අමොහො කුසලමූලං.
තීණි දුච්චරිතානි : කායදුච්චරිතං, වචීදුච්චරිතං, මනොදුච්චරිතං. තීණි සුචරිතානි : කායසුචරිතං, වචීසුචරිතං, මනොසුචරිතං.
12. තයො අත්ථවසෙ පටිච්ච භගවතා කුලෙසු තිකභොජනං පඤ්ඤත්තං : දුම්මඞ්කූනං පුග්ගලානං නිග්ගහාය පෙසලානං භික්ඛූනං ඵාසුවිහාරාය, මා පාපිච්ඡා පක්ඛං නිස්සාය සඞ්ඝං භින්දෙය්යුං, කුලානුද්දයතාය ච.
තීහි අසද්ධම්මෙහි අභිභූතො පරියාදින්නචිත්තො දෙවදත්තො ආපායිකො නෙරයිකො කප්පට්ඨො අතෙකිච්ඡො : පාපිච්ඡතා, පාපමිත්තතා ඔරමත්තකෙන විසෙසාධිගමෙන අන්තරාවොසානං ආපාදි.
13. තිස්සො සම්මුතියො : දණ්ඩසම්මුති, සික්කාසම්මුති, දණ්ඩසික්කා සම්මුති.
තිස්සො පාදුකා ධුවට්ඨානියා{4} අසඞ්කමනීයා : වච්චපාදුකා, පස්සාවපාදුකා, ආචමනපාදුකා.
තිස්සො පාදඝංසනියො : සක්ඛරං, කඨලා, සමුද්දඵෙණකොති.
තිකං නිට්ඨිතං.
තස්සුද්දානං:
1. තිට්ඨන්තෙ කාලෙ රත්තිං ච දස පඤ්ච කුසලෙන, වෙදනා චොදනා වත්ථු සලාකා ද්වෙ පටික්ඛිපා.
2. පඤ්ඤත්ති අපරෙ ද්වෙ ච බාලො කාළෙ ච කප්පති, හෙමන්තෙ සඞ්ඝො සඞ්ඝස්ස ඡාදනා ච පටිච්ඡාදි.
3. පටිච්ඡන්නා විවටා ච සෙනාසනගිලායනා, පාතිමොක්ඛං පරිවාසං මානත්තාපාරිවාසිකා.
4. අන්තො අන්තො ච සීමාය ආපජ්ජති පුනාපරෙ, වුට්ඨාති අපරෙ චෙව අමූළ්හවිනයා දුවෙ.
5. තජ්ජනීයා නියස්සා ච පබ්බාජපටිසාරණී, අදස්සනාපටිකම්මෙ අනිස්සග්ගෙ ච{1} දිට්ඨියා.
6. ආගාළ්හකම්මාධිසීලෙ දවානාචාරඝාතිකා, ආජීවාපන්නාතාදිසිකා අවණ්ණුපොසථෙන ච.
7. පවාරණා සම්මුති ච වොහාරපච්චෙකෙන ච න වත්ථබ්බං න දාතබ්බං ඔකාසං න කරෙ තථා.
8. න කරෙ සවචනීයං න පුච්ඡිතබ්බකා දුවෙ, න විස්සජ්ජෙ දුවෙ චෙව අනුයොගම්පි නො දදෙ.
9. සාකච්ඡා උපසම්පදා නිස්සයසාමණෙරා ච, උපොසථා තිකා තීණි පවාරණා තිකා තයො.
10. ආපායිකා අකුසලා කුසලා චරිතා දුවෙ, තිකභොජනසද්ධම්මෙ සම්මුති පාදුකෙන ච, පාදඝංසනිකා චෙව උද්දානං තිකකෙ ඉදන්ති.
චතුක්කං
1. අත්ථාපත්ති සකවාචාය ආපජ්ජති, පරවාචාය වුට්ඨාති, අත්ථාපත්ති පරවාචාය ආපජ්ජති, සකවාචාය වුට්ඨාති, අත්ථාපත්ති සකවාචාය ආපජ්ජති, සකවාචාය වුට්ඨාති, අත්ථාපත්ති පරවාචාය ආපජ්ජති, පරවාචාය වුට්ඨාති.
අත්ථාපත්ති කායෙන ආපජ්ජති, වාචාය වුට්ඨාති, අත්ථාපත්ති වාචාය ආපජ්ජති, කායෙන වුට්ඨාති, අත්ථාපත්ති කායෙන ආපජ්ජති, කායෙන වුට්ඨාති, අත්ථාපත්ති වාචාය ආපජ්ජති, වාචාය වුට්ඨාති.
අත්ථාපත්ති පසුත්තො ආපජ්ජති, පටිබුද්ධො වුට්ඨාති, අත්ථාපත්ති පටිබුද්ධො ආපජ්ජති, පසුත්තො වුට්ඨාති, අත්ථාපත්ති පසුත්තො ආපජ්ජති, පසුත්තො වුට්ඨාති, අත්ථාපත්ති පටිබුද්ධො ආපජ්ජති, පටිබුද්ධො වුට්ඨාති.
අත්ථාපත්ති අචිත්තකො ආපජ්ජති, සචිත්තකො වුට්ඨාති, අත්ථාපත්ති සචිත්තකො ආපජ්ජති, අචිත්තකො වුට්ඨාති, අත්ථාපත්ති අචිත්තකො ආපජ්ජති, අචිත්තකො වුට්ඨාති, අත්ථාපත්ති සචිත්තකො ආපජ්ජති, සචිත්තකො වුට්ඨාති.
අත්ථාපත්ති ආපජ්ජන්තො දෙසෙති, දෙසෙන්තො ආපජ්ජති. අත්ථාපත්ති ආපජ්ජන්තො වුට්ඨාති, වුට්ඨහන්තො ආපජ්ජති.
අත්ථාපත්ති කම්මෙන ආපජ්ජති, අකම්මෙන වුට්ඨාතී, අත්ථාපත්ති අකම්මෙන ආපජ්ජති, කම්මෙන වුට්ඨාති, අත්ථාපත්ති කම්මෙන ආපජ්ජති, කම්මෙන වුට්ඨාති, අත්ථාපත්ති අකම්මෙන ආපජ්ජති, අකම්මෙන වුට්ඨාති.
2. චත්තාරො අනරියවොහාරා : අදිට්ඨෙ දිට්ඨවාදිතා, අසුතෙ සුතවාදිතා, අමුතෙ මුතවාදිතා, අවිඤ්ඤාතෙ විඤ්ඤාතවාදිතා.
චත්තාරො අරියවොහාරා : අදිට්ඨෙ අදිට්ඨවාදිතා, අස්සුතෙ අසුතවාදිතා, අමුතෙ අමුතවාදිතා, අවිඤ්ඤාතෙ අවිඤ්ඤාතවාදිතා.
අපරෙපි චත්තාරො අනරියවොහාරා : දිට්ඨෙ අදිට්ඨවාදිතා, සුතෙ අසුතවාදිතා, මුතෙ අමුතවාදිතා, විඤ්ඤාතෙ අවිඤ්ඤාතවාදිතා.
චත්තාරො අරියවොහාරා : දිට්ඨෙ දිට්ඨවාදිතා, සුතෙ සුතවාදිතා, මුතෙ මුතවාදිතා, විඤ්ඤාතෙ විඤ්ඤාතවාදිතා.
3. චත්තාරො පාරාජිකා භික්ඛූනං භික්ඛුනීහි සාධාරණා, චත්තාරො පාරාජිකා භික්ඛුනීනං භික්ඛූහි අසාධාරණා.
චත්තාරො පරික්ඛාරා : අත්ථි පරික්ඛාරො රක්ඛිතබ්බො ගොපෙතබ්බො මමායිතබ්බො පරිභුඤ්ජිතබ්බො, අත්ථි පරික්ඛාරො රක්ඛිතබ්බො ගොපෙතබ්බො මමායිතබ්බො, න පරිභුඤ්ජිතබ්බො, අත්ථි පරික්ඛාරො රක්ඛිතබ්බො ගොපෙතබ්බො, න මමායිතබ්බො න පරිභුඤ්ජිතබ්බො, අත්ථි පරික්ඛාරො න රක්ඛිතබ්බො න ගොපෙතබ්බො න මමායිතබ්බො න පරිභුඤ්ජිතබ්බො.
අත්ථාපත්ති සම්මුඛා ආපජ්ජති, පරම්මුඛා වුට්ඨාති, අත්ථාපත්ති පරම්මුඛා ආපජ්ජති, සම්මුඛා වුට්ඨාති, අත්ථාපත්ති සම්මුඛා ආපජ්ජති, සම්මුඛා වුට්ඨාති, අත්ථාපත්ති පරම්මුඛා ආපජ්ජති, පරම්මුඛා වුට්ඨාති.
අත්ථාපත්ති අජානන්තො ආපජ්ජති, ජානන්තො වුට්ඨාති අත්ථාපත්ති ජානන්තො ආපජ්ජති, අජානන්තො වුට්ඨාති, අත්ථාපත්ති අජානන්තො ආපජ්ජති, අජානන්තො වුට්ඨාති, අත්ථාපත්ති ජානන්තො ආපජ්ජති, ජානන්තො වුට්ඨාති.
4. චතූහාකාරෙහි ආපත්තිං ආපජ්ජති : කායෙන ආපජ්ජති, වාචාය ආපජ්ජති, කායෙන වාචාය ආපජ්ජති, කම්මවාචාය ආපජ්ජති. අපරෙහිපි චතූහාකාරෙහි ආපත්තිං ආපජ්ජති : සඞ්ඝමජ්ඣෙ, ගණමජ්ඣෙ, පුග්ගලස්ස සන්තිකෙ, ලිඞ්ගපාතුභාවෙන.
චතූහාකාරෙහි ආපත්තියා වුට්ඨාති : කායෙන වුට්ඨාති, වාචාය වුට්ඨාති, කායෙන වාචාය වුට්ඨාති, කම්මවාචාය වුට්ඨාති.
අපරෙහිපි චතූහාකාරෙහි ආපත්තියා වුට්ඨාති : සඞ්ඝමජ්ඣෙ, ගණමජ්ඣෙ, පුග්ගලස්ස සන්තිකෙ, ලිඞ්ගපාතුභාවෙන. සහපටිලාභෙන පුරිමං ජහති, පච්ඡිමෙ පතිට්ඨාති, විඤ්ඤත්තියො පටිප්පස්සම්භන්ති, පඤ්ඤත්තියො{1} නිරුජ්ඣන්ති. සහපටිලාභෙන පච්ඡිමං ජහාති, පුරිමෙ පතිට්ඨාති, විඤ්ඤත්තියො පටිප්පස්සම්භන්ති, පඤ්ඤත්තියො නිරුජ්ඣන්ති.
5. චතස්සො චොදනා : සීලවිපත්තියා චොදෙති ආචාරවිපත්තියා චොදෙති, දිට්ඨිවිපත්තියා චොදෙති, ආජීවවිපත්තියා චොදෙති.
චත්තාරො පරිවාසා : පටිච්ඡන්නපරිවාසො, අප්පටිච්ඡන්නපරිවාසො, සුද්ධන්තපරිවාසො, සමොධානපරිවාසො.
චත්තාරො මානත්තානි{2} : පටිච්ඡන්නමානත්තං, අපටිච්ඡන්නමානත්තං, පක්ඛමානත්තං, සමොධානමානත්තං.
චත්තාරො මානත්තචාරිකස්ස භික්ඛුනො රත්තිච්ඡෙදා : සහවාසො විප්පවාසො, අනාරොචනා, ඌනෙ ගණෙ චරති.
චත්තාරො සාමුක්කංසා.
6. චත්තාරො පටිග්ගහිතපරිභොගා : යාවකාලිකං, යාමකාලිකං, සත්තාහකාලිකං, යාවජීවිකං.
චත්තාරි මහාවිකටානි : ගූථො, මුත්තං, ඡාරිකා, මත්තිකා.
චත්තාරි කම්මානි : අපලොකනකම්මං, ඤත්තිකම්මං, ඤත්තිදුතියකම්මං, ඤත්තිචතුත්ථකම්මං.
අපරානිපි චත්තාරි කම්මානි : අධම්මෙන වග්ගකම්මං, අධම්මෙන සමග්ගකම්මං, ධම්මෙන වග්ගකම්මං, ධම්මෙන සමග්ගකම්මං.
චතස්සො විපත්තියො : සීලවිපත්ති, ආචාරවිපත්ති, දිට්ඨිවිපත්ති, ආජීවවිපත්ති.
චත්තාරි අධිකරණානි : විවාදාධිකරණං, අනුවාදාධිකරණං, ආපත්තාධිකරණං, කිච්චාධිකරණං.
චත්තාරො පරිසදූසනා : භික්ඛු දුස්සීලො පාපධම්මො පරිසදූසනො, භික්ඛුනී දුස්සීලා පාපධම්මා පරිසදූසනා, උපාසකො දුස්සීලො පාපධම්මො පරිසදූසනො, උපාසිකා දුස්සීලා පාපධම්මා පරිසදූසනා.
චත්තාරො පරිසසොභනා : භික්ඛු සීලවා කල්යාණධම්මො පරිසසොභනො, භික්ඛුනී සීලවතී කල්යාණධම්මා පරිසසොභනා, උපාසකො සීලවා කල්යාණධම්මො පරිසසොභනො, උපාසිකා සීලවතී කල්යාණධම්මා පරිසසොභනා.
7. අත්ථාපත්ති ආගන්තුකො ආපජ්ජති නො ආවාසිකො. අත්ථාපත්ති ආවාසිකො ආපජ්ජති නො ආගන්තුකො. අත්ථාපත්ති ආගන්තුකො චෙව ආපජ්ජති ආවාසිකො ච. අත්ථාපත්ති නෙව ආගන්තුකො ආපජ්ජති නො ආවාසිකො.
අත්ථාපත්ති ගමිකො ආපජ්ජති නො ආවාසිකො. අත්ථාපත්ති ආවාසිකො ආපජ්ජති නො ගමිකො. අත්ථාපත්ති ගමිකො චෙව ආපජ්ජති ආවාසිකො ච, අත්ථාපත්ති නෙව ගමිකො ආපජ්ජති නො ආවාසිකො.
අත්ථි වත්ථුනානත්තතා නො ආපත්තිනානත්තතා, අත්ථි ආපත්තිනානත්තතා නො වත්ථුනානත්තතා, අත්ථි වත්ථුනානත්තතා චෙව ආපත්තිනානත්තතා ච. අත්ථි නෙව වත්ථුනානත්තතා නො ආපත්තිනානත්තතා.
අත්ථි වත්ථුසභාගතා නො ආපත්තිසභාගතා, අත්ථි ආපත්තිසභාගතා නො වත්ථුසභාගතා, අත්ථි වත්ථුසභාගතා චෙව ආපත්තිසභාගතා ච. අත්ථි නෙව වත්ථුසභාගතා නො ආපත්තිසභාගතා.
අත්ථාපත්ති උපජ්ඣායො ආපජ්ජති නො සද්ධිවිහාරිකො. අත්ථාපත්ති සද්ධිවිහාරිකො ආපජ්ජති නො උපජ්ඣායො. අත්ථාපත්ති උපජ්ඣායො චෙව ආපජ්ජති සද්ධිවිහාරිකො ච. අත්ථාපත්ති නෙව උපජ්ඣායො ආපජ්ජති නො සද්ධිවිහාරිකො.
අත්ථාපත්ති ආචරියො ආපජ්ජති නො අන්තෙවාසිකො. අත්ථාපත්ති අන්තෙවාසිකො ආපජ්ජති නො ආචරියො අත්ථාපත්ති ආචරියො චෙව ආපජ්ජති අන්තෙවාසිකො ච. අත්ථාපත්ති නෙව ආචරියො ආපජ්ජති නො අන්තෙවාසිකො.
8. චත්තාරො පච්චයා අනාපත්ති වස්සච්ඡෙදස්ස : සඞ්ඝො වා භින්නො හොති, සඞ්ඝං වා භින්දිතුකාමා වා හොන්ති, ජීවිතන්තරායො වා හොති, බ්රහ්මචරියන්තරායො වා.
චත්තාරි වචීදුච්චරිතානි : මුසාවාදො, පිසුනා වාචා, ඵරුසා වාචා, සම්ඵප්පලාපො.
චත්තාරි වචීසුචරිතානි : සච්චවාචා, අපිසුණා වාචා, සණ්හා වාචා, මන්තාභාසා.
අත්ථි ආදියන්තො ගරුකං ආපත්තිං ආපජ්ජති, පයොජෙන්තො ලහුකං. අත්ථි ආදියන්තො ලහුකං ආපත්තිං ආපජ්ජති, පයොජෙන්තො ගරුකං. අත්ථි ආදියන්තොපි පයොජෙන්තොපි ගරුකං ආපත්තිං ආපජ්ජති. අත්ථි ආදියන්තොපි පයොජෙන්තොපි ලහුකං ආපත්තිං ආපජ්ජති.
9. අත්ථි පුග්ගලො අභිවාදනාරහො නො පච්චුට්ඨානාරහො, අත්ථි පුග්ගලො පච්චුට්ඨානාරහො නො අභිවාදනාරහො. අත්ථි පුග්ගලො අභිවාදනාරහො චෙව පච්චුට්ඨානාරහො ච. අත්ථි පුග්ගලො නෙව අභිවාදනාරහො නො පච්චුට්ඨානාරහො.
අත්ථි පුග්ගලො ආසනාරහො නො අභිවාදනාරහො අත්ථි පුග්ගලො අභිවාදනාරහො නො ආසනාරහො. අත්ථි පුග්ගලො ආසනාරහො චෙව අභිවාදනාරහො ච. අත්ථි පුග්ගලො නෙව ආසනාරහො නො අභිවාදනාරහො.