ද්වීහාකාරෙහි සඞ්ඝො භිජ්ජති : කම්මෙන වා, සලාකගාහෙන වා.
3. ද්වෙ පුග්ගලා න උපසම්පාදෙතබ්බා : අද්ධානහීනො අඞ්ගහීනො. අපරෙපි ද්වෙ පුග්ගලා න උපසම්පාදෙතබ්බා : වත්ථුවිපන්නො, කරණදුක්කටකො. අපරෙපි ද්වෙ පුග්ගලා න උපසම්පාදෙතබ්බා : අපරිපූරො පරිපූරො නො ච යාචති.
ද්වින්නං පුග්ගලානං නිස්සාය න වත්ථබ්බං : අලජ්ජිස්ස ච බාලස්ස ච.
ද්වින්නං පුග්ගලානං නිස්සයො න දාතබ්බො : අලජ්ජිස්ස ච ලජ්ජිනො ච න යාචති.
ද්වින්නං පුග්ගලානං නිස්සයො දාතබ්බො : බාලස්ස ච ලජ්ජිස්ස ච යාචති.
ද්වෙ පුග්ගලා අභබ්බා ආපත්තිං ආපජ්ජිතුං : බුද්ධා ච. පච්චෙකබුද්ධා ච.
ද්වෙ පුග්ගලා භබ්බා ආපත්තිං ආපජ්ජිතුං : භික්ඛූ ච භික්ඛුනියො ච.
ද්වෙ පුග්ගලා අභබ්බා සඤ්චිච්ච ආපත්තිං ආපජ්ජිතුං : භික්ඛූ ච භික්ඛුනියො ච අරියපුග්ගලා.
ද්වෙ පුග්ගලා භබ්බා සඤ්චිච්ච ආපත්තිං ආපජ්ජිතුං : භික්ඛූ ච භික්ඛුනියො ච පුථුජ්ජනා.
ද්වෙ පුග්ගලා අභබ්බා සඤ්චිච්ච සාතිසාරං වත්ථුං අජ්ඣාචරිතුං : භික්ඛූ ච භික්ඛුනියො ච අරියපුග්ගලා.
ද්වෙ පුග්ගලා භබ්බා සඤ්චිච්ච සාතිසාරං වත්ථුං අජ්ඣාචරිතුං : භික්ඛූ ච භික්ඛුනියො ච පුථුජ්ජනා.
ද්වෙ පටික්කොසා : කායෙන වා පටික්කොසති, වාචාය වා පටික්කොසති.
ද්වෙ නිස්සාරණා : අත්ථි පුග්ගලො අප්පත්තො නිස්සාරණං තඤ්චෙ සඞ්ඝො නිස්සාරෙති, එකච්චො සුනිස්සාරිතො, එකච්චො දුන්නිස්සාරිතො.
ද්වෙ ඔසාරණා : අත්ථි පුග්ගලො අප්පත්තො ඔසාරණං තඤ්චෙ සඞ්ඝො ඔසාරෙති, එකච්චො සොසාරිතො, එකච්චො දොසාරිතො.
ද්වෙ පටිඤ්ඤා : කායෙන වා පටිජානාති වාචාය වා පටිජානාති.
ද්වෙ පටිග්ගහා : කායෙන වා පටිගණ්හාති, කායපටිබද්ධෙන වා පටිගණ්හාති.
ද්වෙ පටික්ඛෙපා : කායෙන වා පටික්ඛිපති වාචාය වා පටික්ඛිපති.
ද්වෙ උපඝාතිකා : සික්ඛූපඝාතිකා ච භොගූපඝාතිකා ච.
ද්වෙ චොදනා : කායෙන වා චොදෙති, වාචාය වා චොදෙති.
4. ද්වෙ කඨිනස්ස පලිබොධා : ආවාසපලිබොධො ච චීවරපලිබොධො ච.
ද්වෙ කඨිනස්ස අපලිබොධා : ආවාස අපලිබොධො ච චීවරඅපලිබොධො ච.
ද්වෙ චීවරානි : ගහපතිකඤ්ච පංසුකූලඤ්ච.
ද්වෙ පත්තා : අයොපත්තො මත්තිකා පත්තො.
ද්වෙ මණ්ඩලානි : තිපුමයං සීසමයං.
ද්වෙ පත්තස්ස අධිට්ඨානා : කායෙන වා අධිට්ඨෙති, වාචාය වා අධිට්ඨෙති.
ද්වෙ චීවරස්ස අධිට්ඨානා : කායෙන වා අධිට්ඨෙති, වාචාය වා අධිට්ඨෙති.
ද්වෙ විකප්පනා : සම්මුඛාවිකප්පනා ච පරම්මුඛාවිකප්පනා ච.
5. ද්වෙ විනයා : භික්ඛූනඤ්ච භික්ඛුනීනඤ්ච.
ද්වෙ වෙනයිකා : පඤ්ඤත්තඤ්ච පඤ්ඤත්තානුලොමඤ්ච.
ද්වෙ විනයස්ස සල්ලෙඛා : අකප්පියෙ සෙතුඝාතො, කප්පියෙ මත්තකාරිතා.
ද්වීහාකාරෙහි ආපත්තිං ආපජ්ජති : කායෙන වා ආපජ්ජති වාචාය වා ආපජ්ජති.
ද්වීහාකාරෙහි ආපත්තියා වුට්ඨාති : කායෙන වා වුට්ඨාති, වාචාය වා වුට්ඨාති.
ද්වෙ පරිවාසා : පටිච්ඡන්නපරිවාසො අපටිච්ඡන්නපරිවාසො, අපරෙපි ද්වෙ පරිවාසා : සුද්ධන්තපරිවාසො සමොධානපරිවාසො.
ද්වෙ මානත්තා : පටිච්ඡන්නමානත්තං අපටිච්ඡන්නමානත්තං. අපරෙපි ද්වෙ මානත්තා : පක්ඛමානත්තං සමොධානමානත්තං.
ද්වින්නං පුග්ගලානං රත්තිච්ඡෙදො : පාරිවාසිකස්ස ච මානත්තචාරිකස්ස ච.
ද්වෙ අනාදරියානි : පුග්ගලඅනාදරියඤ්ච ධම්මඅනාදරියඤ්ච.
6. ද්වෙ ලොණානි : ජාතිමඤ්ච කාරිමඤ්ච,{1} අපරානිපි ද්වෙ ලොණානි : සාමුද්දං කාළලොණං. අපරානිපි ද්වෙ ලොණානි : සින්ධවං, උබ්භිදං. අපරානිපි ද්වෙ ලොණානි : රොමකං පක්කාලකං.
ද්වෙ පරිභොගා : අබ්භන්තරපරිභොගො ච බාහිරපරිභොගො ච.
ද්වෙ අක්කොසා : හීනො ච අක්කොසො උක්කට්ඨො ච අක්කොසො.
ද්වීහාකාරෙහි පෙසුඤ්ඤං හොති : පියකම්යස්ස වා භෙදාධිප්පායස්ස වා.
ද්වීහාකාරෙහි ගණභොජනං පසවති : නිමන්තනතො වා විඤ්ඤත්තිතො වා.
7. ද්වෙ වස්සූපනායිකා : පුරිමිකා ච පච්ඡිමිකා ච.
ද්වෙ අධම්මිකානි පාතිමොක්ඛට්ඨපනානි.
ද්වෙ ධම්මිකානි පාතිමොක්ඛට්ඨපනානි.
8. ද්වෙ පුග්ගලා බාලා : යො ච අනාගතං භාරං වහති, යො ච ආගතං භාරං න වහති. ද්වෙ පුග්ගලා පණ්ඩිතා : යො ච අනාගතං භාරං න වහති, යො ච ආගතං භාරං වහති.
අපරෙපි ද්වෙ පුග්ගලා බාලා : යො ච අකප්පියෙ කප්පියසඤ්ඤී, යො ච කප්පියෙ අකප්පියසඤ්ඤී. ද්වෙ පුග්ගලා පණ්ඩිතා : යො ච අකප්පියෙ අකප්පියසඤ්ඤී, යො ච කප්පියෙ කප්පිය සඤ්ඤී.
අපරෙපි ද්වෙ පුග්ගලා බාලා : යො ච අනාපත්තියා ආපත්තිසඤ්ඤී, යො ච ආපත්තියා අනාපත්තිසඤ්ඤී. ද්වෙ පුග්ගලා පණ්ඩිතා : යො ච ආපත්තියා ආපත්තිසඤ්ඤී, යො ච අනාපත්තියා අනාපත්තිසඤ්ඤී.
අපරෙපි ද්වෙ පුග්ගලා බාලා : යො ච අධම්මෙ ධම්මසඤ්ඤී, යො ච ධම්මෙ අධම්මසඤ්ඤී. ද්වෙ පුග්ගලා පණ්ඩිතා : යො ච අධම්මෙ අධම්මසඤ්ඤී, යො ච ධම්මෙ ධම්මසඤ්ඤී.
අපරෙපි ද්වෙ පුග්ගලා බාලා : යො ච අවිනයෙ විනයසඤ්ඤී, යො ච විනයෙ අවිනයසඤ්ඤී. ද්වෙ පුග්ගලා පණ්ඩිතා : යො ච අවිනයෙ අවිනයසඤ්ඤී, යො ච විනයෙ විනයසඤ්ඤී.
9. ද්වින්නං පුග්ගලානං ආසවා වඩ්ඪන්ති : යො ච න කුක්කුච්චායිතබ්බං කුක්කුච්චායති, යො ච කුක්කුච්චායිතබ්බං න කුක්කුච්චායති. ද්වින්නං පුග්ගලානං ආසවා න වඩ්ඪන්ති : යො ච කුක්කුච්චායිතබ්බං න කුක්කුච්චායති යො ච කුක්කුච්චායිතබ්බං කුක්කුච්චායති.
අපරෙසම්පි ද්වින්නං පුග්ගලානං ආසවා වඩ්ඪන්ති : යො ච අකප්පියෙ කප්පියසඤ්ඤී, යො ච කප්පියෙ අකප්පියසඤ්ඤී. ද්වින්නං පුග්ගලානං ආසවා න වඩ්ඪන්ති : යො ච අකප්පියෙ අකප්පියසඤ්ඤී, යො ච කප්පියෙ කප්පියසඤ්ඤී.
අපරෙසම්පි ද්වින්නං පුග්ගලානං ආසවා වඩ්ඪන්ති : යො ච අනාපත්තියා ආපත්තිසඤ්ඤී, යො ච ආපත්තියා අනාපත්තිසඤ්ඤී. ද්වින්නං පුග්ගලානං ආසවා න වඩ්ඪන්ති : යො ච අනාපත්තියා අනාපත්තිසඤ්ඤී, යො ච ආපත්තියා ආපත්තිසඤ්ඤී.
අපරෙසම්පි ද්වින්නං පුග්ගලානං ආසවා වඩ්ඪන්ති : යො ච අධම්මෙ ධම්මසඤ්ඤී, යො ච ධම්මෙ අධම්මසඤ්ඤී. ද්වින්නං පුග්ගලානං ආසවා න වඩ්ඪන්ති : යො ච අධම්මෙ අධම්මසඤ්ඤී, යො ච ධම්මෙ ධම්මසඤ්ඤී.
අපරෙසම්පි ද්වින්නං පුග්ගලානං ආසවා වඩ්ඪන්ති : යො ච අවිනයෙ විනයසඤ්ඤී, යො ච විනයෙ අවිනයසඤ්ඤී. ද්වින්නං පුග්ගලානං ආසවා න වඩ්ඪන්ති : යො ච අවිනයෙ අවිනයසඤ්ඤී, යො ච විනයෙ විනයසඤ්ඤී.
දුකං නිට්ඨිතං.
තස්සුද්දානං:
1. සඤ්ඤා ලද්ධා ච සද්ධම්මා පරික්ඛාරා ච පුග්ගලා, සච්චං භූමි නික්ඛමන්තො, ආදියන්තො සමාදියං.
2. කරොන්තො දෙන්තො ගණ්හන්තො පරිභොගෙන රත්ති ච, අරුණා ඡින්දං ඡාදෙන්තා ධාරෙන්තො ච උපොසථා.
3. පවාරණා කම්මා පරා වත්ථු අපරා දොසා ච, අපරා ද්වෙ ච සම්පත්ති නානා සමානමෙව ච.
4. පාරාජිකා සඞ්ඝා ථුල්ලච්ච{1} පාචිත්තියා පාටිදෙසනී, දුක්කටා දුබ්භාසිතා චෙව{2} සත්තාපත්තික්ඛන්ධා ච.
5. භිජ්ජති උපසම්පදා, තථෙව අපරෙ දුවෙ, න වත්ථබ්බං න දාතබ්බං අභබ්බාභබ්බමෙව ච.
6. සඤ්චිච්ච සාතිසාරා ච පටික්කොසා ච නිස්සාරණා, ඔසාරණා පටිඤ්ඤා ච පටිග්ගහා පටික්ඛිපා.
7. උපඝාති චොදනා ච කඨිනා ච දුවෙ තථා, චීවරා පත්තමණ්ඩලා අධිට්ඨානා තථෙව ද්වෙ.
8. විකප්පනා ච විනයා වෙනයිකා ච සල්ලෙඛා, ආපජ්ජති ච වුට්ඨාති පරිවාසා අපරෙ දුවෙ.
9. ද්වෙ මානත්තා අපරෙ ච රත්තිච්ඡෙදො අනාදරි, ද්වෙ ලොණා තයො අපරෙ පරිභොගක්කොසෙන ච.
10. පෙසුඤ්ඤො ච ගණාවස්සට්ඨපනා භාරකප්පියා, අනාපත්ති අධම්මධම්මා විනයෙ ආසවෙ තථා ති.
තිකං
1. අත්ථාපත්ති තිට්ඨන්තෙ භගවති ආපජ්ජති, නො පරිනිබ්බුතෙ, අත්ථාපත්ති පරිනිබ්බුතෙ භගවති ආපජ්ජති, නො තිට්ඨන්තෙ, අත්ථාපත්ති තිට්ඨන්තෙපි භගවති ආපජ්ජති පරිනිබ්බුතෙපි.
අත්ථාපත්ති කාලෙ ආපජ්ජති, නො විකාලෙ, අත්ථාපත්ති විකාලෙ ආපජ්ජති, නො කාලෙ, අත්ථාපත්ති කාලෙ චෙව ආපජ්ජති විකාලෙ ච.
අත්ථාපත්ති රත්තිං ආපජ්ජති නො දිවා, අත්ථාපත්ති දිවා ආපජ්ජති, නො රත්තිං, අත්ථාපත්ති රත්තිං චෙව ආපජ්ජති දිවා ච.
අත්ථාපත්ති දසවස්සො ආපජ්ජති නො ඌනදසවස්සො, අත්ථාපත්ති ඌනදසවස්සො ආපජ්ජති, නො දසවස්සො, අත්ථාපත්ති දසවස්සො චෙව ආපජ්ජති ඌනදසවස්සො ච.
අත්ථාපත්ති පඤ්චවස්සො ආපජ්ජති, නො ඌනපඤ්චවස්සො, අත්ථාපත්ති ඌනපඤ්චවස්සො ආපජ්ජති නො පඤ්චවස්සො, අත්ථාපත්ති පඤ්චවස්සො චෙව ආපජ්ජති ඌනපඤ්චවස්සො ච.
අත්ථාපත්ති කුසලචිත්තො ආපජ්ජති, අත්ථාපත්ති අකුසලචිත්තො ආපජ්ජති, අත්ථාපත්ති අබ්යාකතචිත්තො ආපජ්ජති.
අත්ථාපත්ති සුඛවෙදනාසමඞ්ගී ආපජ්ජති, අත්ථාපත්ති දුක්ඛවෙදනාසමඞ්ගී ආපජ්ජති, අත්ථාපත්ති අදුක්ඛමසුඛවෙදනාසමඞ්ගී ආපජ්ජති.
2. තීණි චොදනාවත්ථූනි : දිට්ඨෙන සුතෙන පරිසඞ්කාය.
තයො සලාකගාහා : ගූළ්හකො විවටකො සකණ්ණජප්පකො.
තයො පටික්ඛෙපා : මහිච්ඡතා අසන්තුට්ඨිතා{1} අසල්ලෙඛතා.
තයො අනුඤ්ඤාතා : අප්පිච්ඡතා සන්තුට්ඨිතා සල්ලෙඛතා. අපරෙපි
තයො පටික්ඛෙපා : මහිච්ඡතා අසන්තුට්ඨිතා අමත්තඤ්ඤුතා.
තයො අනුඤ්ඤාතා : අප්පිච්ඡතා සන්තුට්ඨිතා මත්තඤ්ඤුතා.
තිස්සො පඤ්ඤත්තියො : පඤ්ඤත්ති අනුපඤ්ඤත්ති අනුප්පන්නපඤ්ඤත්ති. අපරාපි තිස්සො පඤ්ඤත්තියො : සබ්බත්ථ පඤ්ඤත්ති පදෙසපඤ්ඤත්ති සාධාරණපඤ්ඤත්ති, අපරාපි තිස්සො පඤ්ඤත්තියො : අසාධාරණපඤ්ඤත්ති එකතො පඤ්ඤත්ති උභතො පඤ්ඤත්ති.
3. අත්ථාපත්ති බාලො ආපජ්ජති නො පණ්ඩිතො, අත්ථාපත්ති පණ්ඩිතො ආපජ්ජති නො බාලො, අත්ථාපත්ති බාලො චෙව ආපජ්ජති පණ්ඩිතො ච.
අත්ථාපත්ති කාළෙ ආපජ්ජති නො ජුණ්හෙ, අත්ථාපත්ති ජුණ්හෙ ආපජ්ජති නො කාළෙ, අත්ථාපත්ති කාළෙ චෙව ආපජ්ජති ජුණ්හෙ ච.
අත්ථි කාළෙ කප්පති, නො ජුණ්හෙ, අත්ථි ජුණ්හෙ කප්පති නො කාළෙ, අත්ථි කාළෙ චෙව කප්පති ජුණ්හෙ ච.
අත්ථාපත්ති හෙමන්තෙ ආපජ්ජති නො ගිම්හෙ නො වස්සෙ, අත්ථාපත්ති ගිම්හෙ ආපජ්ජති, නො හෙමන්තෙ නො වස්සෙ, අත්ථාපත්ති වස්සෙ ආපජ්ජති නො ගිම්හෙ නො හෙමන්තෙ.
අත්ථාපත්ති සඞ්ඝො ආපජ්ජති න ගණො න පුග්ගලො, අත්ථාපත්ති ගණො ආපජ්ජති න සඞ්ඝො න පුග්ගලො, අත්ථාපත්ති පුග්ගලො ආපජ්ජති න සඞ්ඝො න ගණො.
අත්ථි සඞ්ඝස්ස කප්පති න ගණස්ස න පුග්ගලස්ස, අත්ථි ගණස්ස කප්පති න සඞ්ඝස්ස න පුග්ගලස්ස, අත්ථි පුග්ගලස්ස කප්පති න සඞ්ඝස්ස න ගණස්ස.
තිස්සො ඡාදනා : වත්ථුං ඡාදෙති නො ආපත්තිං, ආපත්තිං ඡාදෙති, නො වත්ථුං, වත්ථුඤ්චෙව ඡාදෙති ආපත්තිඤ්ච.
තිස්සො පටිච්ඡාදියො : ජන්තාඝරපටිච්ඡාදි, උදකපටිච්ඡාදි, වත්ථපටිච්ඡාදි.
තීණි පටිච්ඡන්නානි වහන්ති නො විවටානි : මාතුගාමො පටිච්ඡන්නො වහති නො විවටො, බ්රාහ්මණානං මන්තා පටිච්ඡන්නා වහන්ති නො විවටා, මිච්ඡාදිට්ඨි පටිච්ඡන්නා වහති නො විවටා.
තීණි විවටානි විරොචන්ති නො පටිච්ඡන්නානි : චන්දමණ්ඩලං විවටං විරොචති නො පටිච්ඡන්නං, සූරියමණ්ඩලං විවටං විරොචති නො පටිච්ඡන්නං, තථාගතප්පවෙදිතො ධම්මවිනයො විවටො විරොචති නො පටිච්ඡන්නො.
තයො සෙනාසනගාහා : පුරිමකො පච්ඡිමකො අන්තරාමුත්තකො.
අත්ථාපත්ති ගිලානො ආපජ්ජති නො අගිලානො, අත්ථාපත්ති අගිලානො ආපජ්ජති නො ගිලානො, අත්ථාපත්ති ගිලානො චෙව ආපජ්ජති අගිලානො ච.
4. තීණි අධම්මිකානි පාතිමොක්ඛට්ඨපනානි. තීණි ධම්මිකානි පාතිමොක්ඛට්ඨපනානි.
තයො පරිවාසා : පටිච්ඡන්නපරිවාසො, අපටිච්ඡන්න පරිවාසො, සුද්ධන්තපරිවාසො.
තයො මානත්තා : පටිච්ඡන්නමානත්තං, අපටිච්ඡන්නමානත්තං, පක්ඛමානත්තං.
තයො පාරිවාසිකස්ස භික්ඛුනො රත්තිච්ඡෙදා : සහවාසො, විප්පවාසො, අනාරොචනා.
අත්ථාපත්ති අන්තො ආපජ්ජති නො බහි, අත්ථාපත්ති බහි ආපජ්ජති නො අන්තො, අත්ථාපත්ති අන්තො චෙව ආපජ්ජති බහි ච.
අත්ථාපත්ති අන්තොසීමාය ආපජ්ජති නො බහිසීමාය, අත්ථාපත්ති බහිසීමාය ආපජ්ජති නො අන්තොසීමාය, අත්ථාපත්ති අන්තොසීමාය චෙව ආපජ්ජති බහිසීමාය ච.
තීහාකාරෙහි ආපත්තිං ආපජ්ජති : කායෙන ආපජ්ජති, වාචාය ආපජ්ජති, කායෙන වාචාය ආපජ්ජති. අපරෙහිපි තීහාකාරෙහි ආපත්තිං ආපජ්ජති : සඞ්ඝමජ්ඣෙ, ගණමජ්ඣෙ, පුග්ගලස්ස සන්තිකෙ.