කිස්මිං වත්ථුස්මින්ති : ආයස්මා ආනන්දො පුබ්බෙ අප්පටිසංවිදිතො රඤ්ඤො අන්තෙපුරං පාවිසි, තස්මිං වත්ථුස්මිං.
එකා පඤ්ඤත්ති.
ඡන්නං ආපත්තිසමුට්ඨානානං ද්වීහි සමුට්ඨානෙහි සමුට්ඨාති -පෙ- කඨිනකෙ.
2. රතනං උග්ගණ්හන්තස්ස පාචිත්තියං කත්ථ පඤ්ඤත්තන්ති : සාවත්ථියං පඤ්ඤත්තං .
කං ආරබ්භාති : අඤ්ඤතරං භික්ඛුං ආරබ්භ.
කිස්මිං වත්ථුස්මින්ති : අඤ්ඤතරො භික්ඛු රතනං උග්ගහෙසි, තස්මිං වත්ථුස්මිං.
එකා පඤ්ඤත්ති, ද්වෙ අනුපඤ්ඤත්තියො.
ඡන්නං ආපත්තිසමුට්ඨානානං ඡහි සමුට්ඨානෙහි සමුට්ඨාති -පෙ-.
3. සන්තං භික්ඛුං අනාපුච්ඡා විකාලෙ ගාමං පවිසන්තස්ස පාචිත්තියං කත්ථ පඤ්ඤත්තන්ති : සාවත්ථියං පඤ්ඤත්තං.
කං ආරබ්භාති : ඡබ්බග්ගියෙ භික්ඛූ ආරබ්භ.
කිස්මිං වත්ථුස්මින්ති : ඡබ්බග්ගියා භික්ඛූ විකාලෙ ගාමං පවිසිංසු, තස්මිං වත්ථුස්මිං.
එකා පඤ්ඤත්ති, තිස්සො අනුපඤ්ඤත්තියො.
ඡන්නං ආපත්තිසමුට්ඨානානං ද්වීහි සමුට්ඨානෙහි සමුට්ඨාති -පෙ- කඨිනකෙ.
4. අට්ඨිමයං වා දන්තමයං වා විසාණමයං වා සූචිඝරං කාරාපෙන්තස්ස පාචිත්තියං කත්ථ පඤ්ඤත්තන්ති : සක්කෙසු පඤ්ඤත්තං.
කං ආරබ්භාති : සම්බහුලෙ භික්ඛූ ආරබ්භ.
කිස්මිං වත්ථුස්මින්ති : සම්බහුලා භික්ඛූ න මත්තං ජානිත්වා බහූ සූචිඝරෙ විඤ්ඤාපෙසුං, තස්මිං වත්ථුස්මිං.
එකා පඤ්ඤත්ති.
ඡන්නං ආපත්තිසමුට්ඨානානං ඡහි සමුට්ඨානෙහි සමුට්ඨාති -පෙ-.
5. පමාණාතික්කන්තං මඤ්චං වා පීඨං වා කාරාපෙන්තස්ස පාචිත්තියං කත්ථ පඤ්ඤත්තන්ති : සාවත්ථියං පඤ්ඤත්තං.
කං ආරබ්භාති : ආයස්මන්තං උපනන්දං සක්යපුත්තං ආරබ්භ.
කිස්මිං වත්ථුස්මින්ති : ආයස්මා උපනන්දො සක්යපුත්තො උච්චෙ මඤ්චෙ සයි, තස්මිං වත්ථුස්මිං.
එකා පඤ්ඤත්ති.
ඡන්නං ආපත්තිසමුට්ඨානානං ඡහි සමුට්ඨානෙහි සමුට්ඨාති -පෙ-.
6. මඤ්චං වා පීඨං වා තූලොනද්ධං කාරාපෙන්තස්ස පාචිත්තියං කත්ථ පඤ්ඤත්තන්ති : සාවත්ථියං පඤ්ඤත්තං.
කං ආරබ්භාති : ඡබ්බග්ගියෙ භික්ඛූ ආරබ්භ.
කිස්මිං වත්ථුස්මින්ති : ඡබ්බග්ගියා භික්ඛූ මඤ්චං වා පීඨම්පි{1} තූලොනද්ධං කාරාපෙසුං, තස්මිං වත්ථුස්මිං.
එකා පඤ්ඤත්ති.
ඡන්නං ආපත්තිසමුට්ඨානානං ඡහි සමුට්ඨානෙහි සමුට්ඨාති -පෙ-.
7. පමාණාතික්කන්තං නිසීදනං කාරාපෙන්තස්ස පාචිත්තියං කත්ථ පඤ්ඤත්තන්ති : සාවත්ථියං පඤ්ඤත්තං.
කං ආරබ්භාති : ඡබ්බග්ගියෙ භික්ඛූ ආරබ්භ.
කිස්මිං වත්ථුස්මින්ති : ඡබ්බග්ගියා භික්ඛූ අප්පමාණිකානි නිසීදනානි ධාරෙසුං, තස්මිං වත්ථුස්මිං.
එකා පඤ්ඤත්ති.
ඡන්නං ආපත්තිසමුට්ඨානානං ඡහි සමුට්ඨානෙහි සමුට්ඨාති -පෙ-.
8. පමාණාතික්කන්තං කණ්ඩුපටිච්ඡාදිං කාරාපෙන්තස්ස පාචිත්තියං කත්ථ පඤ්ඤත්තන්ති : සාවත්ථියං පඤ්ඤත්තං.
කං ආරබ්භාති : ඡබ්බග්ගියෙ භික්ඛූ ආරබ්භ.
කිස්මිං වත්ථුස්මින්ති : ඡබ්බග්ගියා භික්ඛූ අප්පමාණිකායො කණ්ඩුපටිච්ඡාදියො ධාරෙසුං, තස්මිං වත්ථුස්මිං.
එකා පඤ්ඤත්ති.
ඡන්නං ආපත්තිසමුට්ඨානානං ඡහි සමුට්ඨානෙහි සමුට්ඨාති -පෙ-.
9. පමාණාතික්කන්තං වස්සිකසාටිකං කාරාපෙන්තස්ස පාචිත්තියං කත්ථ පඤ්ඤත්තන්ති : සාවත්ථියං පඤ්ඤත්තං.
කං ආරබ්භාති : ඡබ්බග්ගියෙ භික්ඛූ ආරබ්භ.
කිස්මිං වත්ථුස්මින්ති : ඡබ්බග්ගියා භික්ඛූ අප්පමාණිකායො වස්සිකසාටිකායො ධාරෙසුං, තස්මිං වත්ථුස්මිං.
එකා පඤ්ඤත්ති.
ඡන්නං ආපත්තිසමුට්ඨානානං ඡහි සමුට්ඨානෙහි සමුට්ඨාති -පෙ-.
10. සුගතචීවරප්පමාණං චීවරං කාරාපෙන්තස්ස පාචිත්තියං කත්ථ පඤ්ඤත්තන්ති : සාවත්ථියං පඤ්ඤත්තං.
කං ආරබ්භාති : ආයස්මන්තං නන්දං ආරබ්භ.
කිස්මිං වත්ථුස්මින්ති : ආයස්මා නන්දො සුගතචීවරප්පමාණං චීවරං ධාරෙසි, තස්මිං වත්ථුස්මිං.
එකා පඤ්ඤත්ති.
ඡන්නං ආපත්තිසමුට්ඨානානං ඡහි සමුට්ඨානෙහි සමුට්ඨාති -පෙ-.
රාජවග්ගො නවමො.
ද්වෙනවුති පාචිත්තියා නිට්ඨිතා.
තස්සුද්දානං:
1. මුසා ඔමස පෙසුඤ්ඤා - පදසො ද්වෙ නිපජ්ජනා, දෙසනා රොචනා චෙව - දුට්ඨුල්ලාපත්ති ඛණනා.
2. භූතඤ්ඤවාද{1} උජ්ඣායී - මඤ්චො සෙය්යො ච වුච්චති, පුබ්බනික්කඩ්ඪනාහච්ච{2} - ද්වාරං සප්පාණකෙන ච.
3. අසම්මතා අත්ථඞ්ගතෙ - උපස්සයාමිසෙන ච, දදෙ සිබ්බෙ විධානෙන - නාවා භුඤ්ජෙය්ය එකතො.
4. පිණ්ඩං ගණං පරං පූවං - පවාරිතො පවාරිතං, විකාලං සන්නිධි ඛීරං - දන්තපොණෙන තෙ දස.
5. අචෙලකා උය්යොඛජ්ජ{3} - පටිච්ඡන්නං රහෙන ච, නිමන්තිතො පච්චයෙහි - සෙනාවසදුය්යොධිකං.
6. සුරා අඞ්ගුලි හාසො ච - අනාදරියඤ්ච භිංසනා, ජොති නහාන දුබ්බණ්ණා - සාමං අපනිධෙන ච.
7. සඤ්චිච්චුදක කම්මා ච - දුට්ඨුල්ලං ඌනවීසති, ථෙය්ය ඉත්ථි අවදෙසං - සංවාසෙනාසිතෙන ච.
8. සහධම්මික විලෙඛා - මොහො පහාරෙනුග්ගිරෙ. අමූලකඤ්ච සඤ්චිච්ච - සොස්සාමි ඛීයෙ පක්කමෙ. සඞ්ඝෙන චීවරං දත්වා - පරිණාමෙය්ය පුග්ගලො.
9. රඤ්ඤඤ්ච රතනං සන්තං - සූචි මඤ්චො ච තූලිකා නිසීදනං කණ්ඩුච්ඡාදි - වස්සිකා සුගතෙන චාති.
තෙසං වග්ගානං උද්දානං :
මුසා භූතා ච ඔවාදො - භොජනාචෙළකෙන ච, සුරා සප්පාණකා ධම්මො - රාජවග්ගෙන තෙ නවාති.
1. 6.
පාටිදෙසනීයකණ්ඩො
1. යං තෙන භගවතා ජානතා පස්සතා අරහතා සම්මාසම්බුද්ධෙන අඤ්ඤාතිකාය භික්ඛුනියා අන්තරඝරං පවිට්ඨාය හත්ථතො ඛාදනීයං වා භොජනීයං වා සහත්ථා පටිග්ගහෙත්වා භුඤ්ජන්තස්ස පාටිදෙසනීයං කත්ථ පඤ්ඤත්තන්ති : සාවත්ථියං පඤ්ඤත්තං.
කං ආරබ්භාති : අඤ්ඤතරං භික්ඛුං ආරබ්භ.
කිස්මිං වත්ථුස්මින්ති : අඤ්ඤතරො භික්ඛු අඤ්ඤාතිකාය භික්ඛුනියා අන්තරඝරං පවිට්ඨාය හත්ථතො ආමිසං පටිග්ගහෙසි, තස්මිං වත්ථුස්මිං.
එකා පඤ්ඤත්ති.
ඡන්නං ආපත්තිසමුට්ඨානානං ද්වීහි සමුට්ඨානෙහි සමුට්ඨාති : සියා කායතො සමුට්ඨාති, න වාචතො න චිත්තතො. සියා කායතො ච චිත්තතො ච සමුට්ඨාති න වාචතො. -පෙ-
2. භික්ඛුනියා වොසාසන්තියා න නිවාරෙත්වා භුඤ්ජන්තස්ස පාටිදෙසනීයං කත්ථ පඤ්ඤත්තන්ති : රාජගහෙ පඤ්ඤත්තං.
කං ආරබ්භාති : ඡබ්බග්ගියෙ භික්ඛූ ආරබ්භ.
කිස්මිං වත්ථුස්මින්ති : ඡබ්බග්ගියා භික්ඛූ භික්ඛුනියො වොසාසන්තියො න නිවාරෙසුං, තස්මිං වත්ථුස්මිං.
එකා පඤ්ඤත්ති.
ඡන්නං ආපත්තිසමුට්ඨානානං ද්වීහි සමුට්ඨානෙහි සමුට්ඨාති : සියා කායතො ච වාචතො ච සමුට්ඨාති, න චිත්තතො සියා කායතො ච වාචතො ච චිත්තතො ච සමුට්ඨාති -පෙ-
3. සෙඛසම්මතෙසු කුලෙසු ඛාදනීයං වා භොජනීයං වා සහත්ථා පටිග්ගහෙත්වා භුඤ්ජන්තස්ස පාටිදෙසනීයං කත්ථ පඤ්ඤත්තන්ති : සාවත්ථියං පඤ්ඤත්තං.
කං ආරබ්භාති : සම්බහුලෙ භික්ඛූ ආරබ්භ.
කිස්මිං වත්ථුස්මින්ති : සම්බහුලා භික්ඛූ න මත්තං ජානිත්වා පටිග්ගහෙසුං තස්මිං වත්ථුස්මිං.
එකා පඤ්ඤත්ති. ද්වෙ අනුපඤ්ඤත්තියො.
ඡන්නං ආපත්තිසමුට්ඨානානං ද්වීහි සමුට්ඨානෙහි සමුට්ඨාති : සියා කායතො සමුට්ඨාති, න වාචතො න චිත්තතො. සියා කායතො ච චිත්තතො ච සමුට්ඨාති, න වාචතො. -පෙ-
4. ආරඤ්ඤකෙසු සෙනාසනෙසු පුබ්බෙ අප්පටිසංවිදිතං ඛාදනීයං වා භොජනීයං වා අජ්ඣාරාමෙ සහත්ථා පටිග්ගහෙත්වා භුඤ්ජන්තස්ස පාටිදෙසනීයං කත්ථ පඤ්ඤත්තන්ති : සක්කෙසු පඤ්ඤත්තං.
කං ආරබ්භාති : සම්බහුලෙ භික්ඛූ ආරබ්භ.
කිස්මිං වත්ථුස්මින්ති: සම්බහුලා භික්ඛූ ආරාමෙ චොරෙ පටිවසන්තෙ නාරොචෙසුං, තස්මිං වත්ථුස්මිං.
එකා පඤ්ඤත්ති.
ඡන්නං ආපත්තිසමුට්ඨානානං ද්වීහි සමුට්ඨානෙහි සමුට්ඨාති : සියා කායතො ච වාචතො ච සමුට්ඨාති, න චිත්තතො. සියා කායතො ච වාචතො ච චිත්තතො ච සමුට්ඨාති. -පෙ-
චත්තාරො පාටිදෙසනීයා නිට්ඨිතා.
තස්සුද්දානං:
අඤ්ඤාතිකාය වොසාසං - සෙඛාරඤ්ඤකෙන ච, පාටිදෙසනීයා චත්තාරො - සම්බුද්ධෙන පකාසිතාති.
1. 7.
සෙඛියා
7. 1.
1. යං තෙන භගවතා ජානතා පස්සතා අරහතා සම්මාසම්බුද්ධෙන අනාදරියං පටිච්ච පුරතො වා පච්ඡතො වා ඔලම්බෙන්තෙන නිවාසෙන්තස්ස දුක්කටං කත්ථ පඤ්ඤත්තන්ති : සාවත්ථියං පඤ්ඤත්තං.
කං ආරබ්භාති : ඡබ්බග්ගියෙ භික්ඛූ ආරබ්භ.
කිස්මිං වත්ථුස්මින්ති : ඡබ්බග්ගියා භික්ඛූ පුරතොපි පච්ඡතොපි ඔලම්බෙන්තා නිවාසෙසුං, තස්මිං වත්ථුස්මිං.
එකා පඤ්ඤත්ති.
ඡන්නං ආපත්තිසමුට්ඨානානං එකෙන සමුට්ඨානෙන සමුට්ඨාති : කායතො ච චිත්තතො ච සමුට්ඨාති න වාචතො.
2. අනාදරියං පටිච්ච පුරතො වා පච්ඡතො වා ඔලම්බෙන්තෙන පාරුපන්තස්ස දුක්කටං කත්ථ පඤ්ඤත්තන්ති : සාවත්ථියං පඤ්ඤත්තං.
කං ආරබ්භාති : ඡබ්බග්ගියෙ භික්ඛූ ආරබ්භ.
කිස්මිං වත්ථුස්මින්ති : ඡබ්බග්ගියා භික්ඛූ පුරතොපි පච්ඡතොපි ඔලම්බෙන්තා පාරුපිංසු, තස්මිං වත්ථුස්මිං.
එකා පඤ්ඤත්ති.
ඡන්නං ආපත්තිසමුට්ඨානානං එකෙන සමුට්ඨානෙන සමුට්ඨාති : කායතො ච චිත්තතො ච සමුට්ඨාති න වාචතො.