18. දුබ්බචස්ස භික්ඛුනො යාවතතියං සමනුභාසනාය නප්පටිනිස්සජ්ජනන්ති වත්ථු චෙව ගොත්තඤ්ච. සඞ්ඝාදිසෙසොති නාමඤ්චෙව ආපත්ති ච.
19. කුලදූසකස්ස භික්ඛුනො යාවතතියං සමනුභාසනාය නප්පටිනිස්සජ්ජනන්ති වත්ථු චෙව ගොත්තඤ්ච. සඞ්ඝාදිසෙසොති නාමඤ්චෙව ආපත්ති ච -පෙ-.
20. අනාදරියං පටිච්ච උදකෙ උච්චාරං වා පස්සාවං වා ඛෙළං වා කරණන්ති වත්ථු චෙව ගොත්තඤ්ච දුක්කටන්ති නාමඤ්චෙව ආපත්ති චාති.
නවසඞ්ගහවග්ගො පඤ්චමො.
වග්ගපඤ්චකතස්සුද්දානං:
1. අපලොකනං ඤත්ති ච දුතියං චතුත්ථෙන ච, වත්ථු ඤත්ති අනුසාවනං සීමාපරිසමෙව ච.
2. සම්මුඛා පටිපුච්ඡා ච පටිඤ්ඤා විනයාරහො, වත්ථු සඞ්ඝං පුග්ගලඤ්ච ඤත්තිං න පච්ඡා ඤත්ති ච.
3. වත්ථුං සඞ්ඝං පුග්ගලඤ්ච සාවනං අකාලෙන ච, අතිඛුද්දකා මහන්තා ච ඛණ්ඩ ඡායා නිමිත්තකා.
4. බහිනදී සමුද්දෙ ච ජාතස්සරෙ ච භින්දති අජ්ඣොත්ථරති සීමාය චතු පඤ්ච ච වග්ගිකා.
5. දස වීසතිවග්ගා ච අනාහටා ච ආහටා, කම්මප්පත්තා ඡන්දාරහා කම්මාරහා ච පුග්ගලා.
6. අපලොකනං පඤ්ච ඨානං ඤත්ති ච නවඨානිකා, ඤත්තිදුතියං සත්ත ඨානං චතුත්ථා සත්තඨානිකා.
7. සුට්ඨු ඵාසු දුම්මඞ්කූනං පෙසලා චාපි ආසවා. වෙරං වජ්ජ භයඤ්චෙ, අකුසලඤ්ච ගිහීනං ච.
8. පාපිච්ඡා අප්පසන්නානං පසන්නා ධම්මට්ඨපනා, විනයානුග්ගහා චෙව පාතිමොක්ඛුද්දෙසෙන ච.
9. පාතිමොක්ඛඤ්ච ඨපනා ච පවාරණඤ්ච ඨපනං, තජ්ජනීයා නියස්සඤ්ච පබ්බාජපටිසාරණී.{1}
10. උක්ඛෙපන පරිවාසං මූලං මානත්ත අබ්භානං, ඔසාරණං නිස්සාරණං තථෙව උපසම්පදා.
11. අපලොකන ඤත්ති ච දුතියඤ්ච චතුත්ථකං, අපඤ්ඤත්තෙනුපඤ්ඤත්තං සම්මුඛාවිනයො සති.
12. අමූළ්හපටියෙභුය්ය පාපිය්යතිණවත්ථාරකං, වත්ථු විපත්ති ආපත්ති නිදානං පුග්ගලෙන ච.
13. ඛන්ධා චෙව සමුට්ඨානා, අධිකරණමෙව ච, සමථා සඞ්ගහා චෙව නාම ආපත්තිකා තථා ති.
පරිවාරපාළි නිට්ඨිතා.
1. පුබ්බාචරියමග්ගඤ්ච පුච්ඡිත්වා ච තහිං තහිං, දීපනාමො මහාපඤ්ඤො සුතධාරී{2} විචක්ඛණො.
2. ඉමං විත්ථාරසඞ්ඛෙපං{3} සජ්ඣාමග්ගෙන මජ්ඣිමෙ, චින්තයිත්වා ලිඛාපෙසි සිස්සකානං සුඛාවහං.
3. පරිවාරන්ති යං වුත්තං සබ්බං වත්ථුං සලක්ඛණං, අත්ථං අත්ථෙන සද්ධම්මෙ ධම්මං ධම්මෙන පඤ්ඤත්තෙ.
4. සාසනං පරිවාරෙසි ජම්බුදීපං‘ච සාගරො, පරිවාරං අජානන්තො කුතො ධම්මවිනිච්ඡයං.
5. විපත්ති වත්ථු පඤ්ඤත්ති අනුපඤ්ඤත්ති පුග්ගලො, එකතො උභතො චෙව ලොකපණ්ණත්ති වජ්ජතො.
6. යස්ස ජායති විමති පරිවාරෙන ඡිජ්ජති, චක්කවත්ති මහාසෙනෙ මිගමජ්ඣෙව කෙසරී.
7. රවි රංසිපරික්ඛිණ්ණො චන්දො තාරාගණෙ යථා, බ්රහ්මා බ්රහ්මපරිසාය ගණමජ්ඣෙ ව නායකො; එවං සද්ධම්මවිනයො පරිවාරෙන සොභතීති.