33. කති පාචිත්තියානි සබ්බානි නානාවත්ථුකානි, අපුබ්බං අචරිමං ආපජ්ජෙය්ය එකතො.
34. නව පාචිත්තියානි සබ්බානි නානාවත්ථුකානි, අපුබ්බං අචරිමං ආපජ්ජෙය්ය එකතො.
35. කති පාචිත්තියානි සබ්බානි නානා වත්ථුකානි, කති වාචාය දෙසෙය්ය වුත්තා ආදිච්චබන්ධුනා.
36. පඤ්ච පාචිත්තියානි සබ්බානි නානාවත්ථුකානි, එකවාචාය දෙසෙය්ය වුත්තා ආදිච්චබන්ධුනා.
37. කති පාචිත්තියානි සබ්බානි නානා වත්ථුකානි, කති වාචාය දෙසෙය්ය වුත්තා ආදිච්චබන්ධුනා.
38. නව පාචිත්තියානි සබ්බානි නානාවත්ථුකානි, එකවාචාය දෙසෙය්ය වුත්තා ආදිච්චබන්ධුනා.
39. කති පාචිත්තියානි සබ්බානි නානාවත්ථුකානි, කිඤ්ච කිත්තෙත්වා දෙසෙය්ය වුත්තා ආදිච්චබන්ධුනා.
40. පඤ්ච පාචිත්තියානි සබ්බානි නානාවත්ථුකානි, වත්ථුං කිත්තෙත්වා දෙසෙය්ය වුත්තා ආදිච්චබන්ධුනා.
41. කති පාචිත්තියානි සබ්බානි නානාවත්ථුකානි, කිඤ්ච කිත්තෙත්වා දෙසෙය්ය වුත්තා ආදිච්චබන්ධුනා.
42. නව පාචිත්තියානි සබ්බානි නානාවත්ථුකානි, වත්ථුං කිත්තෙත්වා දෙසෙය්ය වුත්තා ආදිච්චබන්ධුනා.
43. යාවතතියකා කති ආපත්තියො කති වොහාරපච්චයා, ඛාදන්තස්ස කති ආපත්තියො කති භොජනපච්චයා.
44. යාවතතියකෙ තිස්සො ආපත්තියො ඡ වොහාරපච්චයා, ඛාදන්තස්ස තිස්සො ආපත්තියො පඤ්ච භොජනපච්චයා.
45. සබ්බා යාවතතියකා කති ඨානානි ගච්ඡන්ති, කතිනඤ්චෙව ආපත්තියො කතිනං අධිකරණෙන ච.
46. සබ්බා යාවතතියකා පඤ්ච ඨානානි ගච්ඡන්ති, පඤ්චන්නඤ්චෙව ආපත්ති පඤ්චන්නං අධිකරණෙන ච.
47. කතින්නං විනිච්ඡයො හොති, කතින්නං වූපසමෙන ච, කතිනඤ්චෙව අනාපත්ති කතීහි ඨානෙහි සොභති.
48. පඤ්චන්නං විනිච්ඡයො හොති පඤ්චන්නං වූපසමෙන ච, පඤ්චන්නඤ්චෙව අනාපත්ති තීහි ඨානෙහි සොභති.
49. කති කායිකා රත්තිං කති කායිකා දිවා, නිජ්ඣායන්තස්ස කති ආපත්ති කති පිණ්ඩපාතපච්චයා.
50. ද්වෙ කායිකා රත්තිං ද්වෙ කායිකා දිවා, නිජ්ඣායන්තස්ස එකා ආපත්ති එකා පිණ්ඩපාතපච්චයා.
51. කතානිසංසෙ සම්පස්සං පරෙසං සද්ධාය දෙසයෙ, උක්ඛිත්තකා කති වුත්තා කති සම්මා පවත්තනා.
52. අට්ඨානිසංසෙ සම්පස්සං පරෙසං සද්ධාය දෙසයෙ, උක්ඛිත්තකා තයො වුත්තා තෙ චත්තාරීස සම්මාවත්තනා.
53. කති ඨානෙ මුසාවාදො කති පරමන්ති වුච්චති, කති පාටිදෙසනීයා, කතිනං දෙසනාය ච.
54. පඤ්ච ඨානෙ මුසාවාදො චුද්දස පරමන්ති වුච්චති, ද්වාදස පාටිදෙසනීයා චතුන්නං දෙසනාය ච.
55. කතඞ්ගිකො මුසාවාදො, කති උපොසථඞ්ගානි, කති දූතෙය්යඞ්ගානි කති තිත්ථියවත්තනා.
56. අට්ඨඞ්ගිකො මුසාවාදො අට්ඨ උපොසථඞ්ගානි, අට්ඨ දූතෙය්යඞ්ගානි අට්ඨ තිත්ථියවත්තනා.
57. කති වාචිකා උපසම්පදා කතින්නං පච්චුට්ඨාතබ්බං, කතින්නං ආසනං දාතබ්බං භික්ඛුනොවාදකො කතීහි.
58. අට්ඨ වාචිකා උපසම්පදා අට්ඨන්නං පච්චුට්ඨාතබ්බං, අට්ඨන්නං ආසනං දාතබ්බං භික්ඛුනොවාදකො අට්ඨහි.
59. කතින්නං ඡෙජ්ජං හොති කතින්නං ථුල්ලච්චයං, කතින්නඤ්චෙව අනාපත්ති සබ්බෙසං එකවත්ථුකා.
60. එකස්ස ඡෙජ්ජං හොති චතුන්නං ථුල්ලච්චයං, චතුන්නඤ්චෙව අනාපත්ති සබ්බෙසං එකවත්ථුකා.
61. කති ආඝාතවත්ථූනි කතීහි සඞ්ඝො භිජ්ජති, කතෙත්ථ පඨමාපත්තිකා ඤත්තියා කරණා කති.
62. නව ආඝාතවත්ථූනි නවහි සඞ්ඝො භිජ්ජති, නවෙත්ථ පඨමාපත්තිකා ඤත්තියා කරණා නව.
63. කති පුග්ගලා නාභිවාදෙතබ්බා අඤ්ජලි සාමිචෙන ච, කතින්නං දුක්කටං හොති කති චීවරධාරණා.
64. දස පුග්ගලා නාභිවාදෙතබ්බා අඤ්ජලි සාමිචෙන ච, දසන්නං දුක්කටං හොති දස චීවරධාරණා.
65. කතින්නං වස්සං වුත්ථානං දාතබ්බං ඉධ චීවරං, කතින්නං භන්තෙ දාතබ්බං කතිනඤ්චෙව න දාතබ්බං.
66. පඤ්චන්නං වස්සං වුත්ථානං දාතබ්බං ඉධ චීවරං, සත්තන්නං සන්තෙ දාතබ්බං සොළසන්නං න දාතබ්බං.
67. කති සතං රත්ති සතං ආපත්තියො ඡාදයිත්වාන, කති රත්තියො වසිත්වාන මුච්චෙය්ය පාරිවාසිකො.
68. දසසතං රත්ති සතං ආපත්තියො ඡාදයිත්වාන, දස රත්තියො වසිත්වාන මුච්චෙය්ය පාරිවාසිකො.
69. කති කම්මදොසා වුත්තා බුද්ධෙනාදිච්චබන්ධුනා, චම්පායං විනයවත්ථුස්මිං සබ්බෙව අධම්මිකා{1} කති.
70. ද්වාදස කම්මදොසා වුත්තා බුද්ධෙනාදිච්චබන්ධුනා, චම්පායං විනයවත්ථුස්මිං සබ්බෙවාධම්මිකා කතා.
71. කති කම්මසම්පත්තියො වුත්තා බුද්ධෙනාදිච්චබන්ධුනා, චම්පායං විනයවත්ථුස්මිං සබ්බෙව ධම්මිකා කති.
72. චතස්සො කම්මසම්පත්තියො වුත්තා බුද්ධෙනාදිච්චබන්ධුනා, චම්පායං විනයවත්ථුස්මිං සබ්බෙව ධම්මිකා කතා.
73. කති කම්මානි වුත්තානි බුද්ධෙනාදිච්චබන්ධුනා, ඡ චම්පායං විනයවත්ථුස්මිං ධම්මිකා අධම්මිකා කති.
74. ඡ කම්මානි වුත්තානි බුද්ධෙනාදිච්චබන්ධුනා, චම්පායං විනයවත්ථුස්මිං එකෙත්ථ ධම්මිකා කතා ; පඤ්ච අධම්මිකා වුත්තා බුද්ධෙනාදිච්චබන්ධුනා.
75. කති කම්මානි වුත්තානි බුද්ධෙනාදිච්චබන්ධුනා, චම්පායං විනයවත්ථුස්මිං ධම්මිකා අධම්මිකා කති.
76. චත්තාරි කම්මානි වුත්තානි, බුද්ධෙනාදිච්චබන්ධුනා, චම්පායං විනයවත්ථුස්මිං එකෙත්ථ ධම්මිකා කතා ; තයො අධම්මිකා වුත්තා බුද්ධෙනාදිච්චබන්ධුනා.
77. යං දෙසිතා අනන්තජිනෙන තාදිනා, ආපත්තික්ඛන්ධානි විවෙකදස්සිනා, කතෙත්ථ සම්මන්ති විනා සමථෙහි පුච්ඡාමි තං බ්රූහි විභඞ්ගකොවිද.
78. යං දෙසිතා අනන්තජිනෙන තාදිනා, ආපත්තික්ඛන්ධානි විවෙකදස්සිනා ; එකෙත්ථ සම්මති විනා සමථෙහි, එතං තෙ අක්ඛාමි විභඞ්ගකොවිද.
79. කති ආපායිකා වුත්තා බුද්ධෙනාදිච්චබන්ධුනා, විනයං පටිජානන්තස්ස විසයානි{1} සුණොම තෙ.
80. ඡ ඌනදියඩ්ඪසතා වුත්තා බුද්ධෙනාදිච්චබන්ධුනා, ආපායිකා නෙරයිකා කප්පට්ඨා සඞ්ඝභෙදකා ; විනයං පටිජානන්තස්ස විසයානි සුණොහි මෙ.
81. කති නාපායිකා වුත්තා බුද්ධෙනාදිච්චබන්ධුනා, විනයං පටිජානන්තස්ස විසයානි සුණොම තෙ.
82. අට්ඨාරස නාපායිකා වුත්තා බුද්ධෙනාදිච්චබන්ධුනා, විනයං පටිජානන්තස්ස විසයානි සුණොහි මෙ.
83. කති අට්ඨකා වුත්තා බුද්ධෙනාදිච්චබන්ධුනා, විනයං පටිජානන්තස්ස විසයානි සුණොම තෙ.
84. අට්ඨාරසට්ඨකා වුත්තා බුද්ධෙනාදිච්චබන්ධුනා, විනයං පටිජානන්තස්ස විසයානි සුණොහි මෙ.
85. කති කම්මානි වුත්තානි බුද්ධෙනාදිච්චබන්ධුනා, විනයං පටිජානන්තස්ස විසයානි සුණොම තෙ.
86. සොළස කම්මානි වුත්තානි බුද්ධෙනාදිච්චබන්ධුනා, විනයං පටිජානන්තස්ස විසයානි සුණොහි මෙ.
87. කති කම්මදොසා වුත්තා බුද්ධෙනාදිච්චබන්ධුනා, විනයං පටිජානන්තස්ස විසයානි සුණොම තෙ.
88. ද්වාදස කම්මදොසා වුත්තා බුද්ධෙනාදිච්චබන්ධුනා, විනයං පටිජානන්තස්ස විසයානි සුණොහි මෙ.
89. කති කම්මසම්පත්තියො වුත්තා බුද්ධෙනාදිච්චබන්ධුනා, විනයං පටිජානන්තස්ස විසයානි සුණොම තෙ.
90. චතස්සො කම්මසම්පත්තියො වුත්තා බුද්ධෙනාදිච්චබන්ධුනා, විනයං පටිජානන්තස්ස විසයානි සුණොහි මෙ.
91. කති කම්මානි වුත්තානි බුද්ධෙනාදිච්චබන්ධුනා, විනයං පටිජානන්තස්ස විසයානි සුණොම තෙ.
92. ඡ කම්මානි වුත්තානි බුද්ධෙනාදිච්චබන්ධුනා, විනයං පටිජානන්තස්ස විසයානි සුණොහි මෙ.
93. කති කම්මානි වුත්තානි බුද්ධෙනාදිච්චබන්ධුනා, විනයං පටිජානන්තස්ස විසයානි සුණොම තෙ.
94. චත්තාරි කම්මානි වුත්තානි බුද්ධෙනාදිච්චබන්ධුනා, විනයං පටිජානන්තස්ස විසයානි සුණොහි මෙ.
95. කති පාරාජිකා වුත්තා බුද්ධෙනාදිච්චබන්ධුනා, විනයං පටිජානන්තස්ස විසයානි සුණොම තෙ.
96. අට්ඨ පාරාජිකා වුත්තා බුද්ධෙනාදිච්චබන්ධුනා, විනයං පටිජානන්තස්ස විසයානි සුණොහි මෙ.
97. කති සඞ්ඝාදිසෙසා වුත්තා බුද්ධෙනාදිච්චබන්ධුනා, විනයං පටිජානන්තස්ස විසයානි සුණොම තෙ.
98. තෙවීස සඞ්ඝාදිසෙසා වුත්තා බුද්ධෙනාදිච්චබන්ධුනා, විනයං පටිජානන්තස්ස විසයානි සුණොහි මෙ.
99. කති අනියතා වුත්තා බුද්ධෙනාදිච්චබන්ධුනා, විනයං පටිජානන්තස්ස විසයානි සුණොම තෙ.
100. ද්වෙ අනියතා වුත්තා බුද්ධෙනාදිච්චබන්ධුනා, විනයං පටිජානන්තස්ස විසයානි සුණොහි මෙ.
101. කති නිස්සග්ගියා වුත්තා බුද්ධෙනාදිච්චබන්ධුනා, විනයං පටිජානන්තස්ස විසයානි සුණොම තෙ.
102. ද්වෙචත්තාලීස නිස්සග්ගියා වුත්තා බුද්ධෙනාදිච්චබන්ධුනා, විනයං පටිජානන්තස්ස විසයානි සුණොහි මෙ.
103. කති පාචිත්තියා වුත්තා බුද්ධෙනාදිච්චබන්ධුනා, විනයං පටිජානන්තස්ස විසයානි සුණොම තෙ.
104. අට්ඨාසීති සතං පාචිත්තියා වුත්තා බුද්ධෙනාදිච්චබන්ධුනා, විනයං පටිජානන්තස්ස විසයානි සුණොහි මෙ.
105. කති පාටිදෙසනීයා වුත්තා බුද්ධෙනාදිච්චබන්ධුනා, විනයං පටිජානන්තස්ස විසයානි සුණොම තෙ.
106. ද්වාදස පාටිදෙසනීයා වුත්තා බුද්ධෙනාදිච්චබන්ධුනා, විනයං පටිජානන්තස්ස විසයානි සුණොහි මෙ.
107. කති සෙඛියා වුත්තා බුද්ධෙනාදිච්චබන්ධුනා, විනයං පටිජානන්තස්ස විසයානි සුණොම තෙ.
108. පඤ්චසත්තති සෙඛියා වුත්තා බුද්ධෙනාදිච්චබන්ධුනා, විනයං පටිජානන්තස්ස විසයානි සුණොහි මෙ.
109. යාව සුපුච්ඡිතං තයා යාව සුවිස්සජ්ජිතං මයා: පුච්ඡාය විස්සජ්ජනාය වා නත්ථි කිඤ්චි අසුත්තිකන්ති.
දුතියගාථාසඞ්ගණිකං නිට්ඨිතං.
සෙදමොචනගාථා
1. අසංවාසො භික්ඛූහි ච භික්ඛුනීහි ච සම්භොගො එකච්චො තහිං න ලබ්භති, අවිප්පවාසෙන අනාපත්ති, පඤ්හාමෙසා කුසලෙහි චින්තිතා.
2. අවිස්සජ්ජියං{1} අවෙභඞ්ගියං{2} පඤ්ච වුත්තා මහෙසිනා, විස්සජ්ජෙන්තස්ස පරිභුඤ්ජන්තස්ස අනාපත්ති පඤ්හාමෙසා කුසලෙහි චින්තිතා.
3. දස පුග්ගලෙ න වදාමි එකාදස විවජ්ජිය, බුඩ්ඪං වන්දන්තස්ස ආපත්ති පඤ්හාමෙසා කුසලෙහි චින්තිතා
4. න උක්ඛිත්තකො න ච පන පාරිවාසිකො, න සඞ්ඝභින්නො න ච පන පක්ඛසඞ්කන්තො, සමානසංවාසකභූමියා ඨිතො කථන්නුසික්ඛාය අසාධාරණො සියා පඤ්හාමෙසා කුසලෙහි චින්තිතා.
5. උපෙති ධම්මං පරිපුච්ඡමානො කුසලං අත්ථූපසඤ්හිතං, න ජීවති න මතො න නිබ්බුතො තං පුග්ගලං කතමං වදන්ති බුද්ධා පඤ්හාමෙසා කුසලෙහි චින්තිතා.
6. උබ්භක්ඛකෙ න වදාමි අධො නාභිං විවජ්ජිය මෙථුනධම්මපච්චයා කථං පාරාජිකො සියා; පඤ්හා මෙසා කුසලෙහි චින්තිතා.
7. භික්ඛු සඤ්ඤාචිකාය කුටිං කරොති, අදෙසිතවත්ථුකං පමාණාතික්කන්තා, සාරම්භං අපරික්කමනං අනාපත්ති පඤ්හාමෙසා කුසලෙහි චින්තිතා.
8. භික්ඛු සඤ්ඤාචිකාය කුටිං කරොති දෙසිතවත්ථුකං පමාණිකා, අනාරම්භං සපරික්කමනං ආපත්ති පඤ්හාමෙසා කුසලෙහි චින්තිතා.
9. න කායිකං කඤ්චි පයොගමාචරෙ න චාපි වාචාය පරෙ භණෙය්ය, ආපජ්ජෙය්ය ගරුකං ඡෙජ්ජවත්ථුං පඤ්හාමෙසා කුසලෙහි චින්තිතා.
10. න කායිකං වාචසිකඤ්ච කිඤ්චි මනසාපි සන්තො න කරෙය්ය පාපං, සො නාසිතො කින්ති සුනාසිතො භවෙ පඤ්හාමෙසා කුසලෙහි චින්තිතා.
11. අනාලපන්තො මනුජෙන කෙනචි වාචා ගිරං නො ච පරෙ භණෙය්ය, ආපජ්ජෙය්ය වාචසිකං න කායිකා පඤ්හාමෙසා කුසලෙහි චින්තිතා.
12. සික්ඛාපදා බුද්ධවරෙන වණ්ණිතා සඞ්ඝාදිසෙසා චතුරො භවෙය්යුං ආපජ්ජෙය්ය එකපයොගෙන සබ්බෙ පඤ්හා මෙසා කුසලෙහි චින්තිතා.
13. උභො එකතො උපසම්පන්නා උභින්නං හත්ථතො චීවරං පටිග්ගණ්හෙය්ය, සියා ආපත්තියො නානා පඤ්හාමෙසා කුසලෙහි චින්තිතා.
14. චතුරො ජනා සංවිධාය ගරුභණ්ඩං අවාහරුං, තයො පාරාජිකා එකො න පාරාජිකො, පඤ්හාමෙසා කුසලෙහි චින්තිතා.
15. ඉත්ථි ච අබ්භන්තරෙ සියා භික්ඛු ච බහිද්ධා සියා, ඡිද්දං තස්මිං ඝරෙ නත්ථි මෙථුනධම්මපච්චයා, කථං පාරාජිකො සියා පඤ්හාමෙසා කුසලෙහි චින්තිතා.
16. තෙලං මධුං ඵාණිතඤ්චාපි සප්පිං සාමං ගහෙත්වාන නික්ඛිපෙය්ය අවීතිවත්තෙ සත්තාහෙ, සති පච්චයෙ පරිභුඤ්ජන්තස්ස ආපත්ති පඤ්හාමෙසා කුසලෙහි චින්තිතා.
17. නිස්සග්ගියෙන ආපත්ති සුද්ධකෙන පාචිත්තියං, ආපජ්ජන්තස්ස එකතො පඤ්හාමෙසා කුසලෙහි චින්තිතා.
18. භික්ඛූ සියා වීසතියා සමාගතා කම්මං කරෙය්යුං සමග්ගසඤ්ඤිනො, භික්ඛු සියා ද්වාදසයොජනෙ ඨිතො කම්මඤ්ච තං කුප්පෙය්ය වග්ගපච්චයා. පඤ්හාමෙසා කුසලෙහි චින්තිතා.
19. පදවීතිහාරමත්තෙන වාචාය භණිතෙන ච, සබ්බානි ගරුකානි සප්පටිකම්මානි, චතුසට්ඨි ආපත්තියො ආපජ්ජෙය්ය එකතො පඤ්හාමෙසා කුසලෙහි චින්තිතා.
20. නිවත්ථො අන්තරවාසකෙන, දිගුණං සඞ්ඝාටිපාරුතො සබ්බානි තානි නිස්සග්ගියානි හොන්ති පඤ්හාමෙසා කුසලෙහි චින්තිතා.
21. න චාපි ඤත්ති න ච පන කම්මවාචා න චෙහි භික්ඛූති ජිනො අවොච සරණගමනම්පි න තස්ස අත්ථි, උපසම්පන්නො උපසම්පදා චස්ස අකුප්පා පඤ්හාමෙසා කුසලෙහි චින්තිතා.