29. නනු ආවුසො භගවතා අනෙක පරියායෙන කාමානං පහාණං අක්ඛාතං, කාමසඤ්ඤානං පරිඤ්ඤා අක්ඛාතා, කාමපිපාසානං පටිවිනයො අක්ඛාතො, කාමවිතක්කානං සමුග්ඝාතො අක්ඛාතො, කාමපරිළාහානං වූපසමො අක්ඛාතො?
30. නෙතං ආවුසො අප්පසන්නානං වා පසාදාය පසන්නානං වා භිය්යොභාවාය{1} අථ ඛ්වෙතං, ආවුසො අප්පසන්නානඤ්චෙව අප්පසාදාය පසන්නානඤ්ච එකච්චානං අඤ්ඤථත්තායා”ති.
31. අථ ඛො තෙ භික්ඛූ ආයස්මන්තං සුදින්නං අනෙකපරියායෙන විගරහිත්වා භගවතො එතමත්ථං ආරොචෙසුං. අථ ඛො භගවා එතස්මිං නිදානෙ එතස්මිං පකරණෙ භික්ඛුසඞ්ඝං සන්නිපාතාපෙත්වා ආයස්මන්තං සුදින්නං පටිපුච්ඡි: “සච්චං කිර ත්වං සුදින්න, පුරාණ දුතියිකාය මෙථුනං ධම්මං පටිසෙවී”ති. “සච්චං භගවා.” විගරහි බුද්ධො භගවා:
32. “අනනුච්ඡවියං{1} මොඝපුරිස, අනනුලොමිකං අප්පතිරූපං අස්සාමණකං අකප්පියං අකරණීයං. කථං හි නාම ත්වං මොඝපුරිස, එවං ස්වාක්ඛාතෙ ධම්මවිනයෙ පබ්බජිත්වා න සක්ඛිස්සසි යාවජීවං පරිසුද්ධං පරිපුණ්ණං{2} බ්රහ්මචරියං චරිතුං.
33. නනු මයා, මොඝපුරිස, අනෙකපරියායෙන විරාගාය ධම්මො දෙසිතො නො සරාගාය? විසංයොගාය ධම්මො දෙසිතො නො සංයොගාය? අනුපාදානාය ධම්මො දෙසිතො නො සඋපාදානාය?
34. තත්ථ නාම ත්වං මොඝපුරිස, මයා විරාගාය ධම්මෙ දෙසිතෙ සරාගාය චෙතෙස්සසි. විසංයොගාය ධම්මෙ දෙසිතෙ සංයොගාය චෙතෙස්සසි. අනුපාදානාය ධම්මෙ දෙසිතෙ සඋපාදානාය චෙතෙස්සසි.
35. නනු මයා මොඝපුරිස, අනෙකපරියායෙන රාගවිරාගාය ධම්මො දෙසිතො? මදනිම්මදනාය පිපාසවිනයාය ආලයසමුග්ඝාතාය වට්ටුපච්ඡෙදාය තණ්හක්ඛයාය විරාගාය නිරොධාය නිබ්බානාය ධම්මො දෙසිතො?
36. නනු මයා මොඝපුරිස, අනෙකපරියායෙන කාමානං පහාණං අක්ඛාතං? කාමසඤ්ඤානං පරිඤ්ඤා අක්ඛාතා? කාමපිපාසානං පටිවිනයො අක්ඛාතො? කාමවිතක්කානං සමුග්ඝාතො අක්ඛාතො? කාමපරිළාහානං වූපසමො අක්ඛාතො?”
37. “වරං තෙ මොඝපුරිස ආසීවිසස්ස ඝොරවිසස්ස මුඛෙ අඞ්ගජාතං පක්ඛිත්තං, න ත්වෙව මාතුගාමස්ස අඞ්ගජාතෙ අඞ්ගජාතං පක්ඛිත්තං. වරං තෙ මොඝපුරිස කණ්හසප්පස්ස මුඛෙ අඞ්ගජාතං පක්ඛිත්තං, න ත්වෙව මාතුගාමස්ස අඞ්ගජාතෙ අඞ්ගජාතං පක්ඛිත්තං. වරං තෙ මොඝපුරිස අඞ්ගාරකාසුයා ආදිත්තාය සම්පජ්ජලිතාය සජොතිභූතාය අඞ්ගජාතං පක්ඛිත්තං. න ත්වෙව මාතුගාමස්ස අඞ්ගජාතෙ අඞ්ගජාතං පක්ඛිත්තං. තං කිස්ස හෙතු? තතොනිදානං හි, මොඝපුරිස මරණං වා නිගච්ඡෙය්ය මරණමත්තං වා දුක්ඛං. නත්වෙව තප්පච්චයා කායස්ස භෙදා පරම්මරණා අපායං දුග්ගතිං විනිපාතං නිරයං උපපජ්ජෙය්ය. ඉතොනිදානඤ්ච ඛො මොඝපුරිස කායස්ස භෙදා පරම්මරණා අපායං දුග්ගතිං විනිපාතං නිරයං උපපජ්ජෙය්ය.
38. “තත්ථ නාම ත්වං මොඝපුරිස, යං ත්වං අසද්ධම්මං ගාමධම්මං වසලධම්මං දුට්ඨුල්ලං ඔදකන්තිකං රහස්සං{1} ද්වයංද්වයසමාපත්තිං සමාපජ්ජිස්සසි, බහුන්නං{2} ඛො ත්වං මොඝපුරිස අකුසලානං ධම්මානං ආදිකත්තා පුබ්බඞ්ගමො. නෙතං මොඝපුරිස අප්පසන්නානං වා පසාදාය පසන්නානං වා භිය්යොභාවාය. අථ ඛ්වෙතං මොඝපුරිස, අප්පසන්නානඤ්චෙව අප්පසාදාය, පසන්නානඤ්ච එකච්චානං අඤ්ඤථත්තායා”ති.
39. අථ ඛො භගවා ආයස්මන්තං සුදින්නං අනෙකපරියායෙන විගරහිත්වා දුභරතාය{3} දුප්පොසතාය මහිච්ඡතාය අසන්තුට්ඨිතාය{4} සඞ්ගණිකාය කොසජ්ජස්ස අවණ්ණං භාසිත්වා අනෙකපරියායෙන සුභරතාය සුප්පොසතාය{5} අප්පිච්ඡස්ස සන්තුට්ඨස්ස සල්ලෙඛස්ස ධුතස්ස පාසාදිකස්ස අපචයස්ස වීරියාරම්භස්ස වණ්ණං භාසිත්වා භික්ඛූනං තදනුච්ඡවිකං තදනුලොමිකං ධම්මිං කථං කත්වා භික්ඛූ ආමන්තෙසි:
40. “තෙන හි භික්ඛවෙ භික්ඛූනං සික්ඛාපදං පඤ්ඤපෙස්සාමි දස අත්ථවසෙ පටිච්ච: සඞ්ඝසුට්ඨුතාය, සඞ්ඝඵාසුතාය, දුම්මඞ්කූනං පුග්ගලානං නිග්ගහාය, පෙසලානං භික්ඛූනං ඵාසුවිහාරාය, දිට්ඨධම්මිකානං ආසවානං සංවරාය, සම්පරායිකානං ආසවානං පටිඝාතාය, අප්පසන්නානං පසාදාය, පසන්නානං භිය්යොභාවාය, සද්ධම්මට්ඨිතියා, විනයානුග්ගහාය. එවඤ්ච පන භික්ඛවෙ ඉමං සික්ඛාපදං උද්දිසෙය්යාථ:
“යො පන භික්ඛු මෙථුනං ධම්මං පටිසෙවෙය්ය, පාරාජිකො හොති අසංවාසො”ති.
එවඤ්චිදං භගවතා භික්ඛූනං සික්ඛාපදං පඤ්ඤත්තං හොති.
[මූලපඤ්ඤත්ති]
සුදින්නභාණවාරො නිට්ඨිතො.
මක්කටීවත්ථු
1. තෙන ඛො පන සමයෙන අඤ්ඤතරො භික්ඛු වෙසාලියං මහාවනෙ මක්කටිං ආමිසෙන උපලාපෙත්වා තස්සා මෙථුනං ධම්මං පටිසෙවති. අථ ඛො සො භික්ඛු පුබ්බණ්හසමයං නිවාසෙත්වා පත්තචීවරමාදාය වෙසාලිං පිණ්ඩාය පාවිසි.
2. තෙන ඛො පන සමයෙන සම්බහුලා භික්ඛූ සෙනාසනචාරිකං ආහිණ්ඩන්තා යෙන තස්ස භික්ඛුනො විහාරො තෙනුපසඞ්කමිංසු. අද්දසා ඛො සා මක්කටී තෙ භික්ඛූ දූරතො’ව ආගච්ඡන්තෙ. දිස්වාන යෙන තෙ භික්ඛූ තෙනුපසඞ්කමි. උපසඞ්කමිත්වා තෙසං භික්ඛූනං පුරතො කටිම්පි චාලෙසි, ඡෙප්පම්පි චාලෙසි, කටිම්පි ඔඩ්ඩි, නිමිත්තම්පි අකාසි. අථ ඛො තෙසං භික්ඛූනං එතදහොසි: “නිස්සංසයං ඛො සො භික්ඛු ඉමිස්සා මක්කටියා මෙථුනං ධම්මං පටිසෙවතී”ති එකමන්තං නිලීයිංසු. අථ ඛො සො භික්ඛු වෙසාලියං පිණ්ඩාය චරිත්වා පිණ්ඩපාතං ආදාය පටික්කමි.
3. අථ ඛො සා මක්කටී යෙන සො භික්ඛු තෙනුපසඞ්කමි. අථ ඛො සො භික්ඛු තං පිණ්ඩපාතං එකදෙසං භුඤ්ජිත්වා එකදෙසං තස්සා මක්කටියා අදාසි. අථ ඛො සා මක්කටී භුඤ්ජිත්වා{1} තස්ස භික්ඛුනො කටිං ඔඩ්ඩි. අථ ඛො සො භික්ඛු තස්සා මක්කටියා මෙථුනං ධම්මං පතිසෙවති.
4. අථ ඛො තෙ භික්ඛූ තං භික්ඛුං එතදවොචුං: “නනු ආවුසො භගවතා සික්ඛාපදං පඤ්ඤත්තං. කිස්ස ත්වං ආවුසො මක්කටියා මෙථුනං ධම්මං පතිසෙවසී”ති. “සච්චං, ආවුසො භගවතා සික්ඛාපදං පඤ්ඤත්තං. තඤ්ච ඛො මනුස්සිත්ථියා, නො තිරච්ඡානගතායා”ති. “නනු, ආවුසො තථෙව තං හොති. අනනුච්ඡවියං{2} ආවුසො අනනුලොමිකං අප්පතිරූපං අස්සාමණකං අකප්පියං අකරණීයං. කථං හි නාම ත්වං ආවුසො එවං ස්වාක්ඛාතෙ ධම්මවිනයෙ පබ්බජිත්වා න සක්ඛිස්සසි යාවජීවං පරිපුණ්ණං පරිසුද්ධං බ්රහ්මචරියං චරිතුං? නනු ආවුසො භගවතා අනෙකපරියායෙන විරාගාය ධම්මො දෙසිතො නො සරාගාය -පෙ- කාමපරිළාහානං වූපසමො අක්ඛාතො? නෙතං ආවුසො අප්පසන්නානං වා පසාදාය පසන්නානං වා භිය්යොභාවාය. අථ ඛ්වෙතං ආවුසො අප්පසන්නානඤ්චෙව අප්පසාදාය පසන්නානඤ්ච එකච්චානං අඤ්ඤථත්තායා”ති. අථ ඛො තෙ භික්ඛූ තං භික්ඛුං අනෙකපරියායෙන විගරහිත්වා භගවතො එතමත්ථං අරොචෙසුං.
5. අථ ඛො භගවා එතස්මිං නිදානෙ එතස්මිං පකරණෙ භික්ඛුසඞ්ඝං සන්නිපාතාපෙත්වා තං භික්ඛුං පටිපුච්ඡි: “සච්චං කිර ත්වං භික්ඛු මක්කටියා මෙථුනං ධම්මං පතිසෙවසී?”ති{1} “සච්චං භගවා.”{2} විගරහි බුද්ධො භගවා:
අනනුච්ඡවියං මොඝපුරිස, අනනුලොමිකං අප්පතිරූපං අස්සාමණකං අකප්පියං අකරණීයං. කථං හි නාම ත්වං මොඝපුරිස, එවං ස්වාක්ඛාතෙ ධම්මවිනයෙ පබ්බජිත්වා න සක්ඛිස්සසි යාවජීවං පරිපුණ්ණං පරිසුද්ධං බ්රහ්මචරියං චරිතුං? නනු මයා මොඝපුරිස, අනෙකපරියායෙන විරාගාය ධම්මො දෙසිතො නො සරාගාය -පෙ- කාමපරිළාහානං වූපසමො අක්ඛාතො?
6. වරං තෙ මොඝපුරිස, ආසීවිසස්ස ඝොරවිසස්ස මුඛෙ අඞ්ගජාතං පක්ඛිත්තං, න ත්වෙව මක්කටියා{3} අඞ්ගජාතෙ අඞ්ගජාතං පක්ඛිත්තං. වරං තෙ මොඝපුරිස කණ්හසප්පස්ස මුඛෙ අඞ්ගජාතං පක්ඛිත්තං, න ත්වෙව මක්කටියා අඞ්ගජාතෙ අඞ්ගජාතං පක්ඛිත්තං. වරං තෙ මොඝපුරිස, අඞ්ගාරකාසුයා ආදිත්තාය සම්පජ්ජලිතාය සජොතිභූතාය අඞ්ගජාතං පක්ඛිත්තං, න ත්වෙව මක්කටියා අඞ්ගජාතෙ අඞ්ගජාතං පක්ඛිත්තං. තං කිස්ස හෙතු? තතොනිදානං හි, මොඝපුරිස, මරණං වා නිගච්ඡෙය්ය මරණමත්තං වා දුක්ඛං. න ත්වෙව තප්පච්චයා කායස්ස භෙදා පරම්මරණා අපායං දුග්ගතිං විනිපාතං නිරයං උපපජ්ජෙය්ය. ඉතො නිදානඤ්ච ඛො මොඝපුරිස, කායස්ස භෙදා පරම්මරණා අපායං දුග්ගතිං විනිපාතං නිරයං උපපජ්ජෙය්ය.
7. තත්ථ නාම ත්වං මොඝපුරිස, යං ත්වං අසද්ධම්මං ගාමධම්මං වසලධම්මං දුට්ඨුල්ලං ඔදකන්තිකං රහස්සං ද්වයංද්වයසමාපත්තිං සමාපජ්ජිස්සසි, නෙතං මොඝපුරිස, අප්පසන්නානං වා පසාදාය පසන්නානං වා භියොභාවාය. අථ ඛ්වෙතං මොඝපුරිස, අප්පසන්නානඤ්චෙව අප්පසාදාය පසන්නානඤ්ච එකච්චානං අඤ්ඤථත්තායා’ති.
8. අථ ඛො භගවා තං භික්ඛුං අනෙකපරියායෙන විගරහිත්වා දුභරතාය දුප්පොසතාය මහිච්ඡතාය අසන්තුට්ඨිතාය සඞ්ගණිකාය කොසජ්ජස්ස අවණ්ණං භාසිත්වා අනෙකපරියායෙන සුභරතාය සුප්පොසතාය අප්පිච්ඡස්ස සන්තුට්ඨස්ස සල්ලෙඛස්ස ධුතස්ස පාසාදිකස්ස අපචයස්ස විරියාරම්භස්ස වණ්ණං භාසිත්වා භික්ඛූනං තදනුච්ඡවිකං තදනුලොමිකං ධම්මිං{4} කථං කත්වා භික්ඛූ ආමන්තෙසි:
9. “තෙන හි භික්ඛවෙ භික්ඛූනං සික්ඛාපදං පඤ්ඤාපෙස්සාමි දස අත්ථවසෙ පටිච්ච: සඞ්ඝසුට්ඨුතාය, සඞ්ඝඵාසුතාය, දුම්මඞ්කූනං පුග්ගලානං නිග්ගහාය, පෙසලානං භික්ඛූනං ඵාසුවිහාරාය, දිට්ඨම්මිකානං ආසවානං සංවරාය, සම්පරායිකානං ආසවානං පටිඝාතාය, අප්පසන්නානං පසාදාය, පසන්නානං භිය්යොභාවාය, සද්ධම්මට්ඨිතියා, විනයානුග්ගහාය. එවඤ්ච පන භික්ඛවෙ ඉමං සික්ඛාපදං උද්දිසෙය්යාථ:
“යො පන භික්ඛු මෙථුනං ධම්මං පතිසෙවෙය්ය{1} අන්තමසො තිරච්ඡානගතායපි, පාරාජිකො හොති අසංවාසො”ති.
එවඤ්චිදං භගවතා භික්ඛූනං සික්ඛාපදං පඤ්ඤත්තං හොති.
[දුතියපඤ්ඤත්ති]
මක්කටීවත්ථු නිට්ඨිතං.
සන්ථතභාණවාරො
1. තෙන ඛො පන සමයෙන සම්බහුලා වෙසාලිකා වජ්ජිපුත්තකා භික්ඛූ යාවදත්ථං භුඤ්ජිංසු, යාවදත්ථං සුපිංසු, යාවදත්ථං නහායිංසු. යාවදත්ථං භුඤ්ජිත්වා, යාවදත්ථං සුපිත්වා, යාවදත්ථං නහායිත්වා, අයොනිසො මනසි කරිත්වා, සික්ඛං අපච්චක්ඛාය, දුබ්බල්යං අනාවීකත්වා,{2} මෙථුනං ධම්මං පතිසෙවිංසු. තෙ අපරෙන සමයෙන ඤාතිව්යසනෙනපි ඵුට්ඨා, භොගව්යසනෙනපි ඵුට්ඨා, රොගව්යසනෙනපි ඵුට්ඨා ආයස්මන්තං ආනන්දං උපසඞ්කමිත්වා එවං වදන්ති: “න මයං භන්තෙ ආනන්ද, බුද්ධගරහිනො න ධම්මගරහිනො න සඞ්ඝගරහිනො. අත්තගරහිනො මයං භන්තෙ ආනන්ද, අනඤ්ඤගරහිනො. මයමෙවම්හා අලක්ඛිකා මයං අප්පපුඤ්ඤා, යෙ මයං එවං ස්වාක්ඛාතෙ ධම්මවිනයෙ පබ්බජිත්වා නාසක්ඛිම්හ{3} යාවජීවං පරිපුණ්ණං පරිසුද්ධං බ්රහ්මචරියං චරිතුං. ඉදානි චෙ’පි මයං භන්තෙ ආනන්ද, ලභෙය්යාම භගවතො සන්තිකෙ පබ්බජ්ජං, ලභෙය්යාම උපසම්පදං. ඉදානි’පි මයං විපස්සකා කුසලානං ධම්මානං පුබ්බරත්තාපරරත්තං බොධිපක්ඛියානං{4} ධම්මානං භාවනානුයොගමනුයුත්තා විහරෙය්යාම. සාධු භන්තෙ ආනන්ද, භගවතො එතමත්ථං ආරොචෙහී”ති. “එවමාවුසො”ති ඛො ආයස්මා ආනන්දො වෙසාලිකානං වජ්ජිපුත්තකානං පටිස්සුත්වා{5} යෙන භගවා තෙනුපසඞ්කමි. උපසඞ්කමිත්වා භගවතො එතමත්ථං ආරොචෙසි.
2. “අට්ඨානමෙතං, ආනන්ද, අනවකාසො, යං තථාගතො වජ්ජීනං වා වජ්ජිපුත්තකානං වා කාරණා සාවකානං පාරාජිකං සික්ඛාපදං පඤ්ඤත්තං සමූහනෙය්යා”ති. අථ ඛො භගවා එතස්මිං නිදානෙ එතස්මිං පකරණෙ ධම්මිං කථං කත්වා භික්ඛූ ආමන්තෙසි: “යො පන භික්ඛවෙ භික්ඛු සික්ඛං අපච්චක්ඛාය දුබ්බල්යං අනාවීකත්වා මෙථුනං ධම්මං පතිසෙවති, සො ආගතො න උපසම්පාදෙතබ්බො. යො ච ඛො භික්ඛවෙ භික්ඛු සික්ඛං පච්චක්ඛාය දුබ්බල්යං ආවීකත්වා මෙථුනං ධම්මං පතිසෙවති, සො ආගතො උපසම්පාදෙතබ්බො. එවඤ්ච පන භික්ඛවෙ ඉමං සික්ඛාපදං උද්දිසෙය්යාථ”:
3. “යො පන භික්ඛු භික්ඛූනං සික්ඛාසාජීවසමාපන්නො සික්ඛං අපච්චක්ඛාය දුබ්බල්යං අනාවීකත්වා මෙථුනං ධම්මං පතිසෙවෙය්ය අන්තමසො තිරච්ඡානගතායපි, පාරාජිකො හොති අසංවාසො”ති.
[තතියපඤ්ඤත්තී]
4. යො පනාති - යො යාදිසො යථායුත්තො යථාජච්චො යථානාමො යථාගොත්තො යථාසීලො යථාවිහාරී යථාගොචරො ථෙරො වා නවො වා මජ්ඣිමො වා. එසො වුච්චති ‘යො පනා’ති.
5. භික්ඛූති-භික්ඛකො’ති භික්ඛු, භික්ඛාචරියං අජ්ඣූපගතො’ති භික්ඛු, භින්නපටධරො’ති භික්ඛු, සමඤ්ඤාය භික්ඛු, පටිඤ්ඤාය භික්ඛු, එහි භික්ඛූ’ති භික්ඛු, තීහි සරණගමනෙහි උපසම්පන්නො’ති භික්ඛු, භද්රො භික්ඛු, සාරො භික්ඛු, සෙඛො භික්ඛු, අසෙඛො භික්ඛු, සමග්ගෙන සඞ්ඝෙන ඤත්තිචතුත්ථෙන කම්මෙන අකුප්පෙන ඨානාරහෙන උපසම්පන්නො’ති භික්ඛු. තත්රය්වායං භික්ඛු සමග්ගෙන සඞ්ඝෙන ඤත්තිචතුත්ථෙන කම්මෙන අකුප්පෙන ඨානාරහෙන උපසම්පන්නො, අයං ඉමස්මිං අත්ථෙ අධිප්පෙතො භික්ඛූ’ති.
6. සික්ඛාති-තිස්සො සික්ඛා: අධිසීලසික්ඛා, අධිචිත්තසික්ඛා අධිපඤ්ඤාසික්ඛා. තත්ර යායං අධිසීලසික්ඛා අයං ඉමස්මිං අත්ථෙ අධිප්පෙතා ‘සික්ඛා’ති.
7. සාජීවං නාම - යං භගවතා පඤ්ඤත්තං සික්ඛාපදං, එතං සාජීවං නාම. තස්මිං සික්ඛති තෙන වුච්චති සාජීවසමාපන්නො’ති.
8. සික්ඛං අපච්චක්ඛාය දුබ්බල්යං අනාවීකත්වා’ති - අත්ථි භික්ඛවෙ දුබ්බල්යාවීකම්මඤ්චෙව හොති සික්ඛා ච අපච්චක්ඛාතා. අත්ථි භික්ඛවෙ දුබ්බල්යාවීකම්මඤ්චෙව හොති සික්ඛා ච පච්චක්ඛාතා.
9. කථඤ්ච භික්ඛවෙ දුබ්බල්යාවීකම්මඤ්චෙව හොති සික්ඛා ච අපච්චක්ඛාතා? ඉධ භික්ඛවෙ භික්ඛු උක්කණ්ඨිතො අනභිරතො සාමඤ්ඤා චවිතුකාමො භික්ඛුභාවං අට්ටීයමානො හරායමානො ජිගුච්ඡමානො ගිහීභාවං පත්ථයමානො උපාසකභාවං පත්ථයමානො ආරාමිකභාවං පත්ථයමානො සාමණෙරභාවං පත්ථයමානො තිත්ථියභාවං පත්ථයමානො තිත්ථියසාවකභාවං පත්ථයමානො අස්සමණභාවං පත්ථයමානො අසක්යපුත්තියභාවං පත්ථයමානො ‘යන්නූනාහං බුද්ධං පච්චක්ඛෙය්ය’න්ති වදති විඤ්ඤාපෙති. එවම්පි භික්ඛවෙ දුබ්බල්යාවීකම්මඤ්චෙව හොති සික්ඛා ච අපච්චක්ඛාතා.
10. අථ වා පන උක්කණ්ඨිතො අනභිරතො සාමඤ්ඤා චවිතුකාමො භික්ඛුභාවං අට්ටීයමානො හරායමානො ජිගුච්ඡමානො ගිහීභාවං පත්ථයමානො -පෙ- අසක්යපුත්තියභාවං පත්ථයමානො ‘යන්නූනාහං ධම්මං පච්චක්ඛෙය්ය’න්ති වදති විඤ්ඤාපෙති -පෙ- ‘යන්නූනාහං සඞ්ඝං පච්චක්ඛෙය්ය’න්ති වදති විඤ්ඤාපෙති, -පෙ- ‘යන්නූනාහං සික්ඛං පච්චක්ඛෙය්ය’න්ති වදති විඤ්ඤාපෙති, -පෙ- ‘යන්නූනාහං විනයං පච්චක්ඛෙය්ය’න්ති වදති විඤ්ඤාපෙති, -පෙ- ‘යන්නූනාහං පාතිමොක්ඛං පච්චක්ඛෙය්ය’න්ති වදති විඤ්ඤාපෙති, -පෙ- ‘යන්නූනාහං උද්දෙසං පච්චක්ඛෙය්ය’න්ති වදති විඤ්ඤාපෙති, -පෙ- ‘යන්නූනාහං උපජ්ඣායං පච්චක්ඛෙය්ය’න්ති වදති විඤ්ඤාපෙති, -පෙ- ‘යන්නූනාහං ආචරියං පච්චක්ඛෙය්ය’න්ති වදති විඤ්ඤාපෙති, -පෙ- ‘යන්නූනාහං සද්ධිවිහාරිකං පච්චක්ඛෙය්ය’න්ති වදති විඤ්ඤාපෙති, -පෙ- ‘යන්නූනාහං අන්තෙවාසිකං පච්චක්ඛෙය්ය’න්ති වදති විඤ්ඤාපෙති, -පෙ- ‘යන්නූනාහං සමානුපජ්ඣායකං පච්චක්ඛෙය්ය’න්ති වදති විඤ්ඤාපෙති, -පෙ- ‘යන්නූනාහං සමානාචරියකං පච්චක්ඛෙය්ය’න්ති වදති විඤ්ඤාපෙති, -පෙ- ‘යන්නූනාහං සබ්රහ්මචාරිං පච්චක්ඛෙය්ය’න්ති වදති විඤ්ඤාපෙති, -පෙ- ‘යන්නූනාහං ගිහී අස්ස’න්ති වදති විඤ්ඤාපෙති, -පෙ- ‘යන්නූනාහං උපාසකො අස්ස’න්ති වදති විඤ්ඤාපෙති, -පෙ- ‘යන්නූනාහං ආරාමිකො අස්ස’න්ති වදති විඤ්ඤාපෙති, ‘යන්නූනාහං සාමණෙරො අස්ස’න්ති වදති විඤ්ඤාපෙති, -පෙ- ‘යන්නූනාහං තිත්ථියො අස්ස’න්ති වදති විඤ්ඤාපෙති, -පෙ- ‘යන්නූනාහං තිත්ථියසාවකො අස්ස’න්ති වදති විඤ්ඤාපෙති, -පෙ- ‘යන්නූනාහං අස්සමණො අස්ස’න්ති වදති විඤ්ඤාපෙති, -පෙ- ‘යන්නූනාහං අසක්යපුත්තියො අස්ස’න්ති වදති විඤ්ඤාපෙති, එවම්පි භික්ඛවෙ දුබ්බල්යාවීකම්මඤ්චෙව හොති සික්ඛා ච අපච්චක්ඛාතා.
11. අථ වා පන උක්කණ්ඨිතො අනභිරතො සාමඤ්ඤා චවිතුකාමො භික්ඛුභාවං අට්ටීයමානො හරායමානො ජිගුච්ඡමානො ගිහීභාවං පත්ථයමානො -පෙ- අසක්යපුත්තියභාවං පත්ථයමානො ‘යදි පනාහං බුද්ධං පච්චක්ඛෙය්ය’න්ති වදති විඤ්ඤාපෙති -පෙ- ‘යදි පනාහං අසක්යපුත්තියො අස්ස’න්ති වදති විඤ්ඤාපෙති, එවම්පි, භික්ඛවෙ, දුබ්බල්යාවීකම්මං චෙව හොති සික්ඛා ච අපච්චක්ඛාතා.
12. අථවා පන -පෙ- ‘අපාහං බුද්ධං පච්චක්ඛෙය්ය’න්ති වදති විඤ්ඤාපෙති -පෙ- ‘අපාහං අසක්යපුත්තියො අස්ස’න්ති වදති විඤ්ඤාපෙති, එවම්පි භික්ඛවෙ දුබ්බල්යාවීකම්මං චෙව හොති සික්ඛා ච අපච්චක්ඛාතා.
13. අථවා පන -පෙ- ‘හන්දාහං බුද්ධං පච්චක්ඛෙය්ය’න්ති වදති විඤ්ඤාපෙති -පෙ- ‘හන්දාහං අසක්යපුත්තියො අස්ස’න්ති වදති විඤ්ඤාපෙති, එවම්පි භික්ඛවෙ දුබ්බල්යාවීකම්මං චෙව හොති සික්ඛා ච අපච්චක්ඛාතා.
14. අථවා පන -පෙ- ‘හොති මෙ බුද්ධං පච්චක්ඛෙය්ය’න්ති වදති විඤ්ඤාපෙති -පෙ- ‘හොති මෙ අසක්යපුත්තියො අස්ස’න්ති වදති විඤ්ඤාපෙති, එවම්පි භික්ඛවෙ දුබ්බල්යාවීකම්මඤ්චෙව හොති සික්ඛා ච අපච්චක්ඛාතා.
15. අථවා පන උක්කණ්ඨිතො අනභිරතො සාමඤ්ඤා චවිතුකාමො භික්ඛුභාවං අට්ටීයමානො හරායමානො ජිගුච්ඡමානො ගිහීභාවං පත්ථයමානො -පෙ- අසක්යපුත්තියභාවං පත්ථයමානො ‘මාතරං සරාමී’ති වදති විඤ්ඤාපෙති -පෙ- ‘පිතරං සරාමී’ති වදති විඤ්ඤාපෙති, -පෙ- ‘භාතරං සරාමී’ති වදති විඤ්ඤාපෙති, -පෙ- ‘භගිනිං සරාමී’ති වදති විඤ්ඤාපෙති, -පෙ- ‘පුත්තං සරාමී’ති වදති විඤ්ඤාපෙති, -පෙ- ‘ධීතරං සරාමී’ති වදති විඤ්ඤාපෙති, -පෙ- ‘පජාපතිං සරාමී’ති වදති විඤ්ඤාපෙති, -පෙ- ‘ඤාතකෙ සරාමී’ති වදති විඤ්ඤාපෙති, -පෙ- ‘මිත්තෙ සරාමී’ති වදති විඤ්ඤාපෙති, -පෙ- ‘ගාමං සරාමී’ති වදති විඤ්ඤාපෙති, -පෙ- ‘නිගමං සරාමී’ති වදති විඤ්ඤාපෙති, -පෙ- ‘ඛෙත්තං සරාමී’ති වදති විඤ්ඤාපෙති, -පෙ- ‘වත්ථුං සරාමි’ති වදති විඤ්ඤාපෙති, -පෙ- ‘හිරඤ්ඤං සරාමී’ති වදති විඤ්ඤාපෙති, -පෙ- ‘සුවණ්ණං සරාමී’ති වදති විඤ්ඤාපෙති, -පෙ- ‘සිප්පං සරාමී’ති වදති විඤ්ඤාපෙති, -පෙ- ‘පුබ්බෙ හසිතං ලපිතං කීළිතං සමනුස්සරාමී’ති වදති විඤ්ඤාපෙති, -පෙ- එවම්පි භික්ඛවෙ දුබ්බල්යාවීකම්මඤ්චෙව හොති සික්ඛා ච අපච්චක්ඛාතා.
16. අථ වා පන උක්කණ්ඨිතො අනභිරතො සාමඤ්ඤා චවිතුකාමො භික්ඛුභාවං අට්ටීයමානො හරායමානො ජිගුච්ඡමානො ගිහීභාවං පත්ථයමානො -පෙ- අසක්යපුත්තියභාවං පත්ථයමානො ‘මාතා මෙ අත්ථි. සා මයා පොසෙතබ්බා’ති වදති විඤ්ඤාපෙති, -පෙ- ‘පිතා මෙ අත්ථි සො මයා පොසෙතබ්බො’ති වදති විඤ්ඤාපෙති, -පෙ- ‘භාතා මෙ අත්ථි. සො මයා පොසෙතබ්බො’ති වදති විඤ්ඤාපෙති, -පෙ- ‘භගිනී මෙ අත්ථි සා මයා පොසෙතබ්බා’ති වදති විඤ්ඤාපෙති, -පෙ- ‘පුත්තො මෙ අත්ථි. සො මයා පොසෙතබ්බො’ති වදති විඤ්ඤාපෙති, -පෙ- ‘ධීතා මෙ අත්ථි, සා මයා පොසෙතබ්බා’ති වදති විඤ්ඤාපෙති, -පෙ- ‘පජාපති මෙ අත්ථි. සා මයා පොසෙතබ්බා’ති වදති විඤ්ඤාපෙති, -පෙ- ‘ඤාතකා මෙ අත්ථි. තෙ මයා පොසෙතබ්බා’ති වදති විඤ්ඤාපෙති, -පෙ- ‘මිත්තා මෙ අත්ථි. තෙ මයා පොසෙතබ්බා’ති වදති විඤ්ඤාපෙති, -පෙ- එවම්පි භික්ඛවෙ දුබ්බල්යාවීකම්මඤ්චෙව හොති, සික්ඛා ච අපච්චක්ඛාතා.
17. අථ වා පන උක්කණ්ඨිතො අනභිරතො සාමඤ්ඤා චවිතුකාමො භික්ඛුභාවං අට්ටීයමානො හරායමානො ජිගුච්ඡමානො ගිහීභාවං පත්ථයමානො -පෙ- අසක්යපුත්තියභාවං පත්ථයමානො ‘මාතා මෙ අත්ථි. සා මං පොසෙස්සතී’ති වදති විඤ්ඤාපෙති, -පෙ- ‘පිතා මෙ අත්ථි සො මං පොසෙස්සතී’ති වදති විඤ්ඤාපෙති, -පෙ- ‘භාතා මෙ අත්ථි සො මං පොසෙස්සතී’ති වදති විඤ්ඤාපෙති, -පෙ- භගිනී මෙ අත්ථි සා මං පොසෙස්සතී’ති වදති විඤ්ඤාපෙති, -පෙ- ‘පුත්තො මෙ අත්ථි සො මං පොසෙස්සතී’ති වදති විඤ්ඤාපෙති, -පෙ- ‘ධීතා මෙ අත්ථි සා මං පොසෙස්සතී’ති වදති විඤ්ඤාපෙති, -පෙ- ‘පජාපති මෙ අත්ථි සා මං පොසෙස්සතී’ති වදති විඤ්ඤාපෙති, -පෙ- ‘ඤාතකා මෙ අත්ථි තෙ මං පොසෙස්සන්තී’ති වදති විඤ්ඤාපෙති, -පෙ- ‘මිත්තා මෙ අත්ථි තෙ මං පොසෙස්සන්තී’ති වදති විඤ්ඤාපෙති, -පෙ- ‘ගාමො මෙ අත්ථි තෙනාහං ජීවිස්සාමී’ති වදති විඤ්ඤාපෙති, -පෙ- ‘නිගමො මෙ අත්ථි තෙනාහං ජීවිස්සාමී’ති වදති විඤ්ඤාපෙති, -පෙ- ‘ඛෙත්තං මෙ අත්ථි තෙනාහං ජීවිස්සාමී’ති වදති විඤ්ඤාපෙති, -පෙ- ‘වත්ථු මෙ අත්ථි තෙනාහං ජීවිස්සාමී’ති වදති විඤ්ඤාපෙති, -පෙ- ‘හිරඤ්ඤං මෙ අත්ථි තෙනාහං ජීවිස්සාමී’ති වදති විඤ්ඤාපෙති, -පෙ- ‘සුවණ්ණං මෙ අත්ථි තෙනාහං ජීවිස්සාමී’ති වදති විඤ්ඤාපෙති, -පෙ- ‘සිප්පං මෙ අත්ථි තෙනාහං ජීවිස්සාමී’ති වදති විඤ්ඤාපෙති. එවම්පි, භික්ඛවෙ, දුබ්බල්යාවීකම්මඤ්චෙව හොතී සික්ඛා ච අපච්චක්ඛාතා.
18. අථ වා පන උක්කණ්ඨිතො අනභිරතො සාමඤ්ඤා චවිතුකාමො භික්ඛුභාවං අට්ටීයමානො හරායමානො ජිගුච්ඡමානො ගිහීභාවං පත්ථයමානො -පෙ- අසක්යපුත්තියභාවං පත්ථයමානො ‘දුක්කර’න්ති වදති විඤ්ඤාපෙති -පෙ- ‘න සුකර’න්ති වදති විඤ්ඤාපෙති, -පෙ- ‘දුච්චර’න්ති වදති විඤ්ඤාපෙති, -පෙ- ‘න සුචර’න්ති වදති විඤ්ඤාපෙති, -පෙ- ‘න උස්සහාමී’ති වදති විඤ්ඤාපෙති, -පෙ- ‘න විසහාමී’ති වදති විඤ්ඤාපෙති, -පෙ- ‘න රමාමී’ති වදති විඤ්ඤාපෙති, -පෙ- ‘න අභිරමාමී’ති වදති විඤ්ඤාපෙති, එවම්පි ඛො භික්ඛවෙ දුබ්බල්යාවීකම්මඤ්චෙව හොති සික්ඛා ච අපච්චක්ඛාතා.
19. කථඤ්ච භික්ඛවෙ දුබ්බල්යාවීකම්මඤ්චෙව හොති සික්ඛා ච පච්චක්ඛාතා? ඉධ භික්ඛවෙ භික්ඛු උක්කණ්ඨිතො අනභිරතො සාමඤ්ඤා චවිතුකාමො භික්ඛුභාවං අට්ටීයමානො හරායමානො ජිගුච්ඡමානො ගිහීභාවං පත්ථයමානො -පෙ- අසක්යපුත්තියභාවං පත්ථයමානො ‘බුද්ධං පච්චක්ඛාමී’ති වදති විඤ්ඤාපෙති, එවම්පි භික්ඛවෙ දුබ්බල්යාවීකම්මඤ්චෙව හොති සික්ඛා ච පච්චක්ඛාතා.
20. අථ වා පන උක්කණ්ඨිතො අනභිරතො සාමඤ්ඤා චවිතුකාමො භික්ඛුභාවං අට්ටීයමානො හරායමානො ජිගුච්ඡමානො ගිහීභාවං පත්ථයමානො -පෙ- අසක්යපුත්තියභාවං පත්ථයමානො ‘ධම්මං පච්චක්ඛාමී’ති වදති විඤ්ඤාපෙති, -පෙ- ‘සඞ්ඝං පච්චක්ඛාමී’ති වදති විඤ්ඤාපෙති, -පෙ- ‘සික්ඛං පච්චක්ඛාමී’ති වදති විඤ්ඤාපෙති, -පෙ- ‘විනයං පච්චක්ඛාමී’ති වදති විඤ්ඤාපෙති, -පෙ- ‘පාතිමොක්ඛං පච්චක්ඛාමී’ති වදති විඤ්ඤාපෙති, -පෙ- ‘උද්දෙසං පච්චක්ඛාමී’ති වදති විඤ්ඤාපෙති, -පෙ- ‘උපජ්ඣායං පච්චක්ඛාමී’ති වදති විඤ්ඤාපෙති, -පෙ- ‘ආචරියං පච්චක්ඛාමී’ති වදති විඤ්ඤාපෙති, -පෙ- ‘සද්ධිවිහාරිකං පච්චක්ඛාමී’ති වදති විඤ්ඤාපෙති, -පෙ- ‘අන්තෙවාසිකං පච්චක්ඛාමී’ති වදති විඤ්ඤාපෙති, -පෙ- ‘සමානූපජ්ඣායකං පච්චක්ඛාමී’ති වදති විඤ්ඤාපෙති, -පෙ- ‘සමානාචරියකං පච්චක්ඛාමී’ති වදති විඤ්ඤාපෙති, -පෙ- ‘සබ්රහ්මචාරිං පච්චක්ඛාමී’ති වදති විඤ්ඤාපෙති, -පෙ- ‘ගිහීති මං ධාරෙහී’ති වදති විඤ්ඤාපෙති, -පෙ- ‘උපාසකොති මං ධාරෙහීති’ වදති විඤ්ඤාපෙති, -පෙ- ‘ආරාමිකොති මං ධාරෙහී’ති වදති විඤ්ඤාපෙති, -පෙ- ‘සාමණෙරොති මං ධාරෙහී’ති වදති විඤ්ඤාපෙති, -පෙ- ‘තිත්ථියොති මං ධාරෙහී’ති වදති විඤ්ඤාපෙති, -පෙ- ‘තිත්ථියසාවකොති මං ධාරෙහී’ති වදති විඤ්ඤාපෙති, -පෙ- ‘අස්සමණොති මං ධාරෙහී’ති වදති විඤ්ඤාපෙති, -පෙ- ‘අසක්යපුත්තියොති මං ධාරෙහී’ති වදති විඤ්ඤාපෙති, එවම්පි භික්ඛවෙ දුබ්බල්යාවීකම්මඤ්චෙව හොති සික්ඛා ච පච්චක්ඛාතා.
21. අථ වා පන උක්කණ්ඨිතො අනභිරතො සාමඤ්ඤා චවිතුකාමො භික්ඛුභාවං අට්ටීයමානො හරායමානො ජිගුච්ඡමානො ගිහීභාවං පත්ථයමානො -පෙ- අසක්යපුත්තියභාවං පත්ථයමානො ‘අලං මෙ බුද්ධෙනා’ති වදති විඤ්ඤාපෙති -පෙ- ‘අලං මෙ සබ්රහ්මචාරීහී’ති වදති විඤ්ඤාපෙති, එවම්පි -පෙ- සික්ඛා ච පච්චක්ඛාතා.
22. අථ වා පන -පෙ- ‘කින්නු මෙ බුද්ධෙනා’ති වදති විඤ්ඤාපෙති, -පෙ- ‘කින්නු මෙ සබ්රහ්මචාරීහී’ති වදති විඤ්ඤාපෙති, එවම්පි -පෙ- සික්ඛා ච පච්චක්ඛාතා.
23. අථ වා පන -පෙ- ‘න මමත්ථො බුද්ධෙනා’ති වදති විඤ්ඤාපෙති, -පෙ- ‘න මමත්ථො සබ්රහ්මචාරීහී’ති වදති විඤ්ඤාපෙති, එවම්පි -පෙ-. සික්ඛා ච පච්චක්ඛාතා.
24. අථ වා පන -පෙ- ‘සුමුත්තා’හං{1} බුද්ධෙනා’ති වදති විඤ්ඤාපෙති, -පෙ- ‘සුමුත්තා’හං සබ්රහ්මචාරීහී’ති වදති විඤ්ඤාපෙති, එවම්පි භික්ඛවෙ දුබ්බල්යාවීකම්මඤ්චෙව හොති සික්ඛා ච පච්චක්ඛාතා.
25. යානි වා පනඤ්ඤානි’පි අත්ථි බුද්ධවෙවචනානි වා ධම්මවෙවචනානි වා සඞ්ඝවෙවචනානි වා සික්ඛාවෙවචනානි වා විනයවෙවචනානි වා පාතිමොක්ඛවෙවචනානි වා උද්දෙසවෙවචනානි වා උපජ්ඣායවෙවචනානි වා ආචරියවෙවචනානි වා සද්ධිවිහාරිකවෙවචනානි වා අන්තෙවාසිකවෙවචනානි වා සමානුපජ්ඣායකවෙවචනානි වා සමානාචරියකවෙවචනානි වා සබ්රහ්මචාරිවෙවචනානි වා ගිහිවෙවචනානි වා උපාසකවෙවචනානි වා ආරාමිකවෙවචනානි වා සාමණෙරවෙවචනානි වා තිත්ථියවෙවචනානි වා තිත්ථියසාවකවෙවචනානි වා අස්සමණවෙවචනානි වා අසක්යපුත්තියවෙවචනානි වා තෙහි ආකාරෙහි තෙහි ලිඞ්ගෙහි තෙහි නිමිත්තෙහි වදති විඤ්ඤාපෙති, එවං ඛො භික්ඛවෙ දුබ්බල්යාවීකම්මඤ්චෙව හොති සික්ඛා ච පච්චක්ඛාතා.
26. කථඤ්ච භික්ඛවෙ, අපච්චක්ඛාතා හොති සික්ඛා? ඉධ භික්ඛවෙ යෙහි ආකාරෙහි යෙහි ලිඞ්ගෙහි යෙහි නිමිත්තෙහි සික්ඛා පච්චක්ඛාතා හොති, තෙහි ආකාරෙහි තෙහි ලිඞ්ගෙහි තෙහි නිමිත්තෙහි උම්මත්තකො සික්ඛං පච්චක්ඛාති, අපච්චක්ඛාතා හොති සික්ඛා. උම්මත්තකස්ස සන්තිකෙ සික්ඛං පච්චක්ඛාති, අපච්චක්ඛාතා හොති සික්ඛා. ඛිත්තචිත්තො සික්ඛං පච්චක්ඛාති, අපච්චක්ඛාතා හොති සික්ඛා. ඛිත්තචිත්තස්ස සන්තිකෙ සික්ඛං පච්චක්ඛාති, අපච්චක්ඛාතා හොති සික්ඛා. වෙදනට්ටො සික්ඛං පච්චක්ඛාති, අපච්චක්ඛාතා හොති සික්ඛා. වෙදනට්ටස්ස සන්තිකෙ සික්ඛං පච්චක්ඛාති, අපච්චක්ඛාතා හොති සික්ඛා. දෙවතාය සන්තිකෙ සික්ඛං පච්චක්ඛාති, අපච්චක්ඛාතාහොති සික්ඛා. තිරච්ඡානගතස්ස සන්තිකෙ සික්ඛං පච්චක්ඛාති, අපච්චක්ඛාතා හොති සික්ඛා. අරියකෙන මිලක්ඛකස්ස{1} සන්තිකෙ සික්ඛං පච්චක්ඛාති, සො ච න පටිවිජානාති, අපච්චක්ඛාතා හොති සික්ඛා. මිලක්ඛකෙන අරියකස්ස සන්තිකෙ සික්ඛං පච්චක්ඛාති, සො ච න පටිවිජානාති, අපච්චක්ඛාතා හොති සික්ඛා. අරියකෙන අරියකස්ස{2} සන්තිකෙ සික්ඛං පච්චක්ඛාති, සො ච න පටිවිජානාති, අපච්චක්ඛාතා හොති සික්ඛා. මිලක්ඛකෙන මිලක්ඛකස්ස සන්තිකෙ සික්ඛං පච්චක්ඛාති, සො ච න පටිවිජානාති, අපච්චක්ඛාතා හොති සික්ඛා. දවාය සික්ඛං පච්චක්ඛාති, අපච්චක්ඛාතා හොති සික්ඛා. රවාය සික්ඛං පච්චක්ඛාති, අපච්චක්ඛාතා හොති සික්ඛා. අසාවෙතුකාමො සාවෙති, අපච්චක්ඛාතා හොති සික්ඛා. සාවෙතුකාමො න සාවෙති, අපච්චක්ඛාතා හොති සික්ඛා. අවිඤ්ඤුස්ස සාවෙති, අපච්චක්ඛාතා හොති සික්ඛා. විඤ්ඤුස්ස න සාවෙති, අපච්චක්ඛාතා හොති සික්ඛා. සබ්බසො වා පන න සාවෙති, අපච්චක්ඛාතා හොති සික්ඛා. එවං ඛො, භික්ඛවෙ, අපච්චක්ඛාතා හොති සික්ඛා.
27. මෙථුනධම්මො නාම: යො සො අසද්ධම්මො ගාමධම්මො වසලධම්මො දුට්ඨුල්ලං ඔදකන්තිකං රහස්සං ද්වයංද්වයසමාපත්ති, එසො මෙථුනධම්මො නාම.
28. පතිසෙවති නාම: යො නිමිත්තෙන නිමිත්තං අඞ්ගජාතෙන අඞ්ගජාතං අන්තමසො තිලඵලමත්තම්පි පවෙසෙති, එසො පතිසෙවති නාම.
29. අන්තමසො තිරච්ඡානගතායපී’ති තිරච්ඡානගතිත්ථියාපි මෙථුනං ධම්මං පතිසෙවිත්වා අස්සමණො හොති අසක්යපුත්තියො, පගෙව මනුස්සිත්ථියා. තෙන වුච්චති ‘අන්තමසො තිරච්ඡානගතායපී’ති.
30. පාරාජිකො හොතී’ති සෙය්යථාපි නාම පුරිසො සීසච්ඡින්නො අභබ්බො තෙන සරීරබන්ධනෙන ජීවිතුං, එවමෙව භික්ඛු මෙථුනං ධම්මං පතිසෙවිත්වා අස්සමණො හොති අසක්යපුත්තියො. තෙන වුච්චති පාරාජිකො හොතීති.
31. අසංවාසො’ති සංවාසො නාම එකං කම්මං එකුද්දෙසො සමසික්ඛතා. එසො සංවාසො නාම. සො තෙන සද්ධිං නත්ථි. තෙන වුච්චති අසංවාසො’ති.
32. තිස්සො ඉත්ථියො: මනුස්සිත්ථි, අමනුස්සිත්ථි, තිරච්ඡානගතිත්ථි. තයො උභතොබ්යඤ්ජනකා: මනුස්සුභතොබ්යඤ්ජනකො, අමනුස්සුභතොබ්යඤ්ජනකො, තිරච්ඡානගතුභතොබ්යඤ්ජනකො. තයො පණ්ඩකා: මනුස්සපණ්ඩකො, අමනුස්සපණ්ඩකො , තිරච්ඡානගතපණ්ඩකො. තයො පුරිසා: මනුස්සපුරිසො අමනුස්සපුරිසො, තිරච්ඡානගතපුරිසො.
33. මනුස්සිත්ථියා තයො මග්ගෙ මෙථුනං ධම්මං පතිසෙවන්තස්ස{1} ආපත්ති පාරාජිකස්ස:– වච්චමග්ගෙ පස්සාවමග්ගෙ මුඛෙ. අමනුස්සිත්ථියා -පෙ- තිරච්ඡානගතිත්ථියා තයො මග්ගෙ මෙථුනං ධම්මං පතිසෙවන්තස්ස ආපත්ති පාරාජිකස්ස: වච්චමග්ගෙ පස්සාවමග්ගෙ මුඛෙ. මනුස්සුභතොබ්යඤ්ජනකස්ස -පෙ- අමනුස්සුභතොබ්යඤ්ජනකස්ස -පෙ- තිරච්ඡානගතූභතොබ්යඤ්ජනකස්ස තයො මග්ගෙ මෙථුනං ධම්මං පතිසෙවන්තස්ස ආපත්ති පාරාජිකස්ස: වච්චමග්ගෙ, පස්සාවමග්ගෙ මුඛෙ.
34. මනුස්සපණ්ඩකස්ස ද්වෙ මග්ගෙ මෙථුනං ධම්මං පතිසෙවන්තස්ස ආපත්ති පාරාජිකස්ස: වච්චමග්ගෙ මුඛෙ. අමනුස්සපණ්ඩකස්ස -පෙ- තිරච්ඡානගතපණ්ඩකස්ස -පෙ- මනුස්සපුරිසස්ස -පෙ- අමනුස්සපුරිසස්ස -පෙ- තිරච්ඡානගතපුරිසස්ස ද්වෙ මග්ගෙ මෙථුනං ධම්මං පතිසෙවන්තස්ස ආපත්ති පාරාජිකස්ස:– වච්චමග්ගෙ මුඛෙ.
35. භික්ඛුස්ස සෙවනචිත්තං උපට්ඨිතෙ මනුස්සිත්ථියා වච්චමග්ගං අඞ්ගජාතං පවෙසෙන්තස්ස{2} ආපත්ති පාරාජිකස්ස. භික්ඛුස්ස සෙවනචිත්තං උපට්ඨිතෙ මනුස්සිත්ථියා පස්සාවමග්ගං -පෙ- මුඛං අඞ්ගජාතං පවෙසෙන්තස්ස ආපත්ති පාරාජිකස්ස. භික්ඛුස්ස සෙවනචිත්තං උපට්ඨිතෙ අමනුස්සිත්ථියා -පෙ- තිරච්ඡානගතිත්ථියා -පෙ- මනුස්සුභතොබ්යඤ්ජනකස්ස -පෙ- අමනුස්සුභතොබ්යඤ්ජනකස්ස තිරච්ඡානගතූභතොබ්යඤ්ජනකස්ස වච්චමග්ගං -පෙ- පස්සාවමග්ගං -පෙ- මුඛං අඞ්ගජාතං පවෙසෙන්තස්ස{2} ආපත්ති පාරාජිකස්ස.
36. භික්ඛුස්ස සෙවනචිත්තං උපට්ඨිතෙ මනුස්සපණ්ඩකස්ස වච්චමග්ගං -පෙ- මුඛං අඞ්ගජාතං පවෙසෙන්තස්ස{2} ආපත්ති පාරාජිකස්ස. භික්ඛුස්ස සෙවනචිත්තං උපට්ඨිතෙ අමනුස්සපණ්ඩකස්ස -පෙ- තිරච්ඡානගතපණ්ඩකස්ස -පෙ- මනුස්සපුරිසස්ස -පෙ- අමනුස්සපුරිසස්ස -පෙ- තිරච්ඡානගතපුරිසස්ස වච්චමග්ගං -පෙ- මුඛං අඞ්ගජාතං පවෙසෙන්තස්ස{2} ආපත්ති පාරාජිකස්ස.
37. භික්ඛුපච්චත්ථිකා මනුස්සිත්ථිං භික්ඛුස්ස සන්තිකෙ{1} ආනෙත්වා වච්චමග්ගෙන අඞ්ගජාතං අභිනිසීදෙන්ති. සො චෙ පවෙසනං සාදියති, පවිට්ඨං සාදියති, ඨිතං සාදියති, උද්ධරණං සාදියති, ආපත්ති පාරාජිකස්ස. භික්ඛුපච්චත්ථිකා මනුස්සිත්ථිං භික්ඛුස්ස සන්තිකෙ52 ආනෙත්වා වච්චමග්ගෙන අඞ්ගජාතං අභිනිසීදෙන්ති. සො චෙ පවෙසනං න සාදියති, පවිට්ඨං සාදියති, ඨිතං සාදියති, උද්ධරණං සාදියති, ආපත්ති පාරාජිකස්ස. භික්ඛුපච්චත්ථිකා මනුස්සිත්ථිං භික්ඛුස්ස සන්තිකෙ ආනෙත්වා වච්චමග්ගෙන අඞ්ගජාතං අභිනිසීදෙන්ති. සො චෙ පවෙසනං න සාදියති, පවිට්ඨං න සාදියති, ඨිතං සාදියති, උද්ධරණං සාදියති, ආපත්ති පාරාජිකස්ස. භික්ඛුපච්චත්ථිකා මනුස්සිත්ථිං භික්ඛුස්ස සන්තිකෙ ආනෙත්වා වච්චමග්ගෙන අඞ්ගජාතං අභිනිසීදෙන්ති. සො චෙ පවෙසනං න සාදියති, පවිට්ඨං න සාදියති, ඨිතං න සාදියති, උද්ධරණං සාදියති, ආපත්ති පාරාජිකස්ස. භික්ඛුපච්චත්ථිකා මනුස්සිත්ථිං භික්ඛුස්ස සන්තිකෙ ආනෙත්වා වච්චමග්ගෙන අඞ්ගජාතං අභිනිසීදෙන්ති. සො චෙ පවෙසනං න සාදියති, පවිට්ඨං න සාදියති, ඨිතං න සාදියති, උද්ධරණං න සාදියති, අනාපත්ති.
38. භික්ඛුපච්චත්ථිකා මනුස්සිත්ථිං භික්ඛුස්ස සන්තිකෙ ආනෙත්වා පස්සාවමග්ගෙන -පෙ- මුඛෙන අඞ්ගජාතං අභිනිසීදෙන්ති. සො චෙ පවෙසනං සාදියති, පවිට්ඨං සාදියති, ඨිතං සාදියති, උද්ධරණං සාදියති, ආපත්ති පාරාජිකස්ස. භික්ඛුපච්චවත්ථිකා -පෙ- න සාදියති අනාපත්ති.
39. භික්ඛුපච්චත්ථිකා මනුස්සිත්ථිං ජාගරන්තිං -පෙ- සුත්තං -පෙ- මත්තං -පෙ- උම්මත්තං -පෙ- පමත්තං -පෙ- මතං අක්ඛයිතං -පෙ- මතං යෙභුය්යෙන අක්ඛයිතං -පෙ- සාදියති, ආපත්ති පාරාජිකස්ස. භික්ඛුපච්චත්ථිකා -පෙ- න සාදියති අනාපත්ති.
40. භික්ඛුපච්චත්ථිකා මනුස්සිත්ථිං මතං යෙභුය්යෙන ඛයිතං{2} භික්ඛුස්ස සන්තිකෙ ආනෙත්වා වච්චමග්ගෙන -පෙ- පස්සාවමග්ගෙන -පෙ- මුඛෙන අඞ්ගජාතං අභිනිසීදෙන්ති. සො චෙ පවෙසනං සාදියති, පවිට්ඨං සාදියති, ඨිතං සාදියති, උද්ධරණං සාදියති, ආපත්ති ථුල්ලච්චයස්ස. භික්ඛුපච්චත්ථිකා -පෙ- න සාදියති, අනාපත්ති.
41. භික්ඛුපච්චත්ථිකා අමනුස්සිත්ථිං -පෙ- තිරච්ඡානගතිත්ථිං -පෙ- මනුස්සුභතොබ්යඤ්ජනකං -පෙ- අමනුස්සුභතොබ්යඤ්ජනකං -පෙ- තිරච්ඡානගතූභතොබ්යඤ්ජනකං භික්ඛුස්ස සන්තිකෙ ආනෙත්වා වච්චමග්ගෙන -පෙ- පස්සාවමග්ගෙන -පෙ- මුඛෙන අඞ්ගජාතං අභිනිසීදෙන්ති. සො චෙ පවෙසනං සාදියති, පවිට්ඨං සාදියති, ඨිතං සාදියති, උද්ධරණං සාදියති, ආපත්ති පාරාජිකස්ස. භික්ඛුපච්චත්ථිකා -පෙ- න සාදියති, අනාපත්ති.
42. භික්ඛුපච්චත්ථිකා -පෙ- තිරච්ඡානගතූභතොබ්යඤ්ජනකං ජාගරන්තං -පෙ- සුත්තං -පෙ- මත්තං -පෙ- උම්මත්තං -පෙ- පමත්තං -පෙ- මතං අක්ඛයිතං -පෙ- මතං යෙභුය්යෙන අක්ඛයිතං -පෙ- සාදියති, ආපත්ති පාරාජිකස්ස. -පෙ- න සාදියති, අනාපත්ති.
43. භික්ඛුපච්චත්ථිකා -පෙ- තිරච්ඡානගතූභතොබ්යඤ්ජනකං මතං යෙභුය්යෙන ඛයිතං53 භික්ඛුස්ස සන්තිකෙ ආනෙත්වා වච්චමග්ගෙන -පෙ- පස්සාවමග්ගෙන -පෙ- මුඛෙන අඞ්ගජාතං අභිනිසීදෙන්ති. සො චෙ පවෙසනං සාදියති, පවිට්ඨං සාදියති, ඨිතං සාදියති, උද්ධරණං සාදියති, ආපත්ති ථුල්ලච්චයස්ස. භික්ඛුපච්චත්ථිකා -පෙ- න සාදියති, අනාපත්ති.
44. භික්ඛුපච්චත්ථිකා -පෙ- මනුස්සපණ්ඩකං -පෙ- අමනුස්සපණ්ඩකං -පෙ- තිරච්ඡානගතපණ්ඩකං භික්ඛුස්ස සන්තිකෙ ආනෙත්වා වච්චමග්ගෙන -පෙ- මුඛෙන අඞ්ගජාතං අභිනිසීදෙන්ති. සො චෙ පවෙසනං සාදියති, පවිට්ඨං සාදියති, ඨිතං සාදියති, උද්ධරණං සාදියති, ආපත්ති පාරාජිකස්ස. භික්ඛුපච්චත්ථිකා -පෙ- න සාදියති, අනාපත්ති.
45. භික්ඛුපච්චත්ථිකා -පෙ- තිරච්ඡානගතපණ්ඩකං ජාගරන්තං -පෙ- සුත්තං -පෙ- මත්තං -පෙ- උම්මත්තං -පෙ- පමත්තං -පෙ- මතං අක්ඛයිතං -පෙ- මතං යෙභුය්යෙන අක්ඛයිතං -පෙ- සාදියති, ආපත්ති පාරාජිකස්ස. -පෙ- න සාදියති අනාපත්ති.
46. භික්ඛුපච්චත්ථිකා -පෙ- තිරච්ඡානගතපණ්ඩකං මතං යෙභුය්යෙන ඛයිතං53 භික්ඛුස්ස සන්තිකෙ ආනෙත්වා වච්චමග්ගෙන -පෙ- මුඛෙන අඞ්ගජාතං අභිනිසීදෙන්ති. සො චෙ පවෙසනං සාදියති, පවිට්ඨං සාදියති, ඨිතං සාදියති, උද්ධරණං සාදියති, ආපත්ති ථුල්ලච්චයස්ස. භික්ඛුපච්චත්ථිකා -පෙ- න සාදියති අනාපත්ති.
47. භික්ඛුපච්චත්ථිකා මනුස්සපුරිසං -පෙ- අමනුස්සපුරිසං -පෙ- තිරච්ඡානගතපුරිසං භික්ඛුස්ස සන්තිකෙ{1} ආනෙත්වා වච්චමග්ගෙන -පෙ- මුඛෙන අඞ්ගජාතං අභිනිසීදෙන්ති. සො චෙ පවෙසනං සාදියති, පවිට්ඨං සාදියති, ඨිතං සාදියති, උද්ධරණං සාදියති, ආපත්ති පාරාජිකස්ස. භික්ඛුපච්චත්ථිකා -පෙ- න සාදියති අනාපත්ති.
48. භික්ඛුපච්චත්ථිකා -පෙ- තිරච්ඡානගතපුරිසං ජාගරන්තං -පෙ- සුත්තං -පෙ- මත්තං -පෙ- උම්මත්තං -පෙ- පමත්තං -පෙ- මතං අක්ඛයිතං -පෙ- මතං යෙභුය්යෙන අක්ඛයිතං -පෙ- සාදියති, ආපත්ති පාරාජිකස්ස. -පෙ- න සාදියති, අනාපත්ති.
49. භික්ඛුපච්චත්ථිකා -පෙ- තිරච්ඡානගතපුරිසං මතං යෙභුය්යෙන ඛයිතං53 භික්ඛුස්ස සන්තිකෙ ආනෙත්වා වච්චමග්ගෙන -පෙ- මුඛෙන අඞ්ගජාතං අභිනිසීදෙන්ති. සො චෙ පවෙසනං සාදියති, පවිට්ඨං සාදියති, ඨිතං සාදියති, උද්ධරණං සාදියති, ආපත්ති ථුල්ලච්චයස්ස. භික්ඛුපච්චත්ථිකා -පෙ- න සාදියති, අනාපත්ති.
50. භික්ඛුපච්චත්ථිකා මනුස්සිත්ථිං භික්ඛුස්ස සන්තිකෙ ආනෙත්වා වච්චමග්ගෙන -පෙ- පස්සාවමග්ගෙන -පෙ- මුඛෙන අඞ්ගජාතං අභිනිසීදෙන්ති, සන්ථතාය අසන්ථතස්ස, -පෙ- අසන්ථාතාය සන්ථතස්ස -පෙ- සන්ථතාය සන්ථතස්ස -පෙ- අසන්ථතාය අසන්ථතස්ස. සො චෙ පවෙසනං සාදියති, පවිට්ඨං සාදියති, ඨිතං සාදියති, උද්ධරණං සාදියති, ආපත්ති පාරාජිකස්ස. භික්ඛුපච්චත්ථිකා -පෙ- න සාදියති, අනාපත්ති .
51. භික්ඛුපච්චත්ථිකා මනුස්සිත්ථිං ජාගරන්තිං -පෙ- සුත්තං -පෙ- මත්තං -පෙ- උම්මත්තං -පෙ- පමත්තං -පෙ- මතං අක්ඛයිතං -පෙ- මතං යෙභුය්යෙන අක්ඛයිතං -පෙ- සාදියති, ආපත්ති පාරාජිකස්ස. -පෙ- න සාදියති, අනාපත්ති.
52. භික්ඛුපච්චත්ථිකා මනුස්සිත්ථිං -පෙ- අමනුස්සිත්ථිං -පෙ- තිරච්ඡානගතිත්ථිං මතං යෙභුය්යෙන ඛයිතං භික්ඛුස්ස සන්තිකෙ ආනෙත්වා වච්චමග්ගෙන -පෙ- පස්සාවමග්ගෙන -පෙ- මුඛෙන අඞ්ගජාතං අභිනිසීදෙන්ති, සන්ථතාය අසන්ථතස්ස -පෙ- අසන්ථතාය සන්ථතස්ස -පෙ- සන්ථතාය සන්ථතස්ස -පෙ- අසන්ථතාය අසන්ථතස්ස -පෙ- සො චෙ පවෙසනං සාදියති, පවිට්ඨං සාදියති, ඨිතං සාදියති, උද්ධරණං සාදියති, ආපත්ති ථුල්ලච්චයස්ස. භික්ඛුපච්චත්ථිකා -පෙ- න සාදියති, අනාපත්ති.
53. භික්ඛුපච්චත්ථිකා මනුස්සුභතොබ්යඤ්ජනකං -පෙ- අමනස්සුභතොබ්යඤ්ජනකං -පෙ- තිරච්ඡානගතූභතොබ්යඤ්ජනකං භික්ඛුස්ස සන්තිකෙ ආනෙත්වා වච්චමග්ගෙන -පෙ- පස්සාවමග්ගෙන -පෙ- මුඛෙන අඞ්ගජාතං අභිනිසීදෙන්ති, සන්ථතස්ස අසන්ථතස්ස -පෙ- අසන්ථතස්ස සන්ථතස්ස -පෙ- සන්ථතස්ස සන්ථතස්ස -පෙ- අසන්ථතස්ස අසන්ථතස්ස -පෙ- සො චෙ පවෙසනං සාදියති, පවිට්ඨං සාදියති, ඨිතං සාදියති, උද්ධරණං සාදියති, ආපත්ති පාරාජිකස්ස. භික්ඛුපච්චත්ථිකා -පෙ- න සාදියති අනාපත්ති.
54. භික්ඛුපච්චත්ථිකා තිරච්ඡානගතූභතොබ්යඤ්ජනකං ජාගරන්තං -පෙ- සුත්තං -පෙ- මත්තං -පෙ- උම්මත්තං -පෙ- පමත්තං -පෙ- මතං අක්ඛයිතං -පෙ- මතං යෙභුය්යෙන අක්ඛයිතං -පෙ- ආපත්ති පාරාජිකස්ස.
55. භික්ඛුපච්චත්ථිකා -පෙ- මතං යෙභුය්යෙන ඛයිතං භික්ඛුස්ස සන්තිකෙ ආනෙත්වා වච්චමග්ගෙන -පෙ- පස්සාවමග්ගෙන -පෙ- මුඛෙන අඞ්ගජාතං අභිනිසීදෙන්ති, සන්ථතස්ස අසන්ථතස්ස -පෙ- අසන්ථතස්ස සන්ථතස්ස, -පෙ- සන්ථතස්ස සන්ථතස්ස -පෙ- අසන්ථතස්ස අසන්ථතස්ස -පෙ- සො චෙ පවෙසනං සාදියති, පවිට්ඨං සාදියති, ඨිතං සාදියති , උද්ධරණං සාදියති, ආපත්ති ථුල්ලච්චයස්ස. භික්ඛුපච්චත්ථිකා -පෙ- න සාදියති, අනාපත්ති.
56. භික්ඛුපච්චත්ථිකා මනුස්සපණ්ඩකං -පෙ- අමනුස්සපණ්ඩකං -පෙ- තිරච්ඡානගතපණ්ඩකං -පෙ- මනුස්සපුරිසං -පෙ- අමනුස්සපුරිසං -පෙ- තිරච්ඡානගතපුරිසං භික්ඛුස්ස සන්තිකෙ ආනෙත්වා වච්චමග්ගෙන -පෙ- මුඛෙන අඞ්ගජාතං අභිනිසීදෙන්ති, සන්ථතස්ස අසන්ථතස්ස -පෙ- අසන්ථතස්ස සන්ථතස්ස, -පෙ- සන්ථතස්ස සන්ථතස්ස -පෙ- අසන්ථතස්ස අසන්ථතස්ස. සො චෙ පවෙසනං සාදියති, පවිට්ඨං සාදියති, ඨිතං සාදියති, උද්ධරණං සාදියති, ආපත්ති පාරාජිකස්ස. භික්ඛු පච්චත්ථිකා -පෙ- න සාදියති, අනාපත්ති.
57. භික්ඛුපච්චත්ථිකා මනුස්සපණ්ඩකං -පෙ- තිරච්ඡානගතපුරිසං ජාගරන්තං -පෙ- සුත්තං -පෙ- මත්තං -පෙ- උම්මත්තං -පෙ- පමත්තං -පෙ- මතං අක්ඛයිතං -පෙ- මතං යෙභුය්යෙන අක්ඛයිතං -පෙ- සාදියති, ආපත්ති පාරාජිකස්ස. භික්ඛු පච්චත්ථිකා -පෙ- න සාදියති, අනාපත්ති.
58. භික්ඛුපච්චත්ථිකා -පෙ- තිරච්ඡානගත පුරිසං මතං යෙභුය්යෙන ඛයිතං භික්ඛුස්ස සන්තිකෙ ආනෙත්වා වච්චමග්ගෙන -පෙ- මුඛෙන අඞ්ගජාතං අභිනිසීදෙන්ති, සන්ථතස්ස අසන්ථතස්ස, -පෙ- අසන්ථතස්ස සන්ථතස්ස, -පෙ- සන්ථතස්ස සන්ථතස්ස, -පෙ- අසන්ථතස්ස අසන්ථතස්ස. -පෙ- සො ච පවෙසනං සාදියති, පවිට්ඨං සාදියති, ඨිතං සාදියති, උද්ධරණං සාදියති , ආපත්ති ථුල්ලච්චයස්ස. භික්ඛුපච්චත්ථිකා -පෙ- න සාදියති, අනාපත්ති.
59. භික්ඛුපච්චත්ථිකා භික්ඛුං මනුස්සිත්ථියා සන්තිකෙ ආනෙත්වා අඞ්ගජාතෙන වච්චමග්ගං -පෙ- පස්සාවමග්ගං -පෙ- මුඛං අභිනිසීදෙන්ති, සො චෙ පවෙසනං සාදියති, පවිට්ඨං සාදියති, ඨිතං සාදියති, උද්ධරණං සාදියති, ආපත්ති පාරාජිකස්ස. භික්ඛුපච්චත්ථිකා -පෙ- න සාදියති, අනාපත්ති.
60. භික්ඛුපච්චත්ථිකා භික්ඛුං මනුස්සිත්ථියා ජාගරන්තියා -පෙ- සුත්තාය -පෙ- මත්තාය -පෙ- උම්මත්තාය -පෙ- පමත්තාය -පෙ- මතාය අක්ඛයිතාය, -පෙ- මතාය යෙභුය්යෙන අක්ඛයිතාය -පෙ- සාදියති, ආපත්ති පාරාජිකස්ස. භික්ඛු පච්චත්ථිකා භික්ඛුං -පෙ- න සාදියති, අනාපත්ති.
61. භික්ඛුපච්චත්ථිකා භික්ඛුං -පෙ- මනුස්සිත්ථියා මතාය යෙභුය්යෙන ඛයිතාය සන්තිකෙ ආනෙත්වා අඞ්ගජාතෙන වච්චමග්ගං -පෙ- පස්සාවමග්ගං -පෙ- මුඛං අභිනිසීදෙන්ති. සො චෙ පවෙසනං සාදියති, පවිට්ඨං සාදියති, ඨිතං සාදියති, උද්ධරණං සාදියති, ආපත්ති ථුල්ලච්චයස්ස. භික්ඛුපච්චත්ථිකා භික්ඛුං -පෙ- න සාදියති, අනාපත්ති.
62. භික්ඛුපච්චත්ථිකා භික්ඛුං අමනුස්සිත්ථියා තිරච්ඡානගතිත්ථියා -පෙ- මනුස්සුභතොබ්යඤ්ජනකස්ස -පෙ- අමනුස්සුභතොබ්යඤ්ජනකස්ස -පෙ- තිරච්ඡානගතූභතොබ්යඤ්ජනකස්ස -පෙ- මනුස්සපණ්ඩකස්ස -පෙ- අමනුස්සපණ්ඩකස්ස -පෙ- තිරච්ඡානගතපණ්ඩකස්ස -පෙ- මනුස්සපුරිසස්ස -පෙ- අමනුස්සපුරිසස්ස -පෙ- තිරච්ඡානගතපුරිසස්ස සන්තිකෙ ආනෙත්වා අඞ්ගජාතෙන වච්චමග්ගං -පෙ- මුඛං අභිනිසීදෙන්ති. සො චෙ පවෙසනං සාදියති, පවිට්ඨං සාදියති, ඨිතං සාදියති, උද්ධරණං සාදියති, ආපත්ති පාරාජිකස්ස. භික්ඛුපච්චත්ථිකා භික්ඛුං -පෙ- න සාදියති, අනාපත්ති.
63. භික්ඛුපච්චත්ථිකා භික්ඛුං -පෙ- තිරච්ඡානගතපුරිසස්ස ජාගරන්තස්ස -පෙ- සුත්තස්ස -පෙ- මත්තස්ස -පෙ- උම්මත්තස්ස -පෙ- පමත්තස්ස -පෙ- මතස්ස අක්ඛයිතස්ස -පෙ- මතස්ස යෙභුය්යෙන අක්ඛයිතස්ස -පෙ- සාදියති, ආපත්ති පාරාජිකස්ස. භික්ඛුපච්චත්ථිකා භික්ඛුං -පෙ- න සාදියති, අනාපත්ති.
64. භික්ඛුපච්චත්ථිකා භික්ඛුං -පෙ- තිරච්ඡානගතපුරිසස්ස මතස්ස යෙභුය්යෙන ඛයිතස්ස සන්තිකෙ ආනෙත්වා අඞ්ගජාතෙන වච්චමග්ගං -පෙ- මුඛං අභිනිසීදෙන්ති. සො චෙ පවෙසනං සාදියති, පවිට්ඨං සාදියති, ඨිතං සාදියති, උද්ධරණං සාදියති, ආපත්ති ථුල්ලච්චයස්ස. භික්ඛුපච්චත්ථිකා භික්ඛුං -පෙ- න සාදියති, අනාපත්ති.
65. භික්ඛුපච්චත්ථිකා භික්ඛුං මනුස්සිත්ථියා සන්තිකෙ ආනෙත්වා අඞ්ගජාතෙන වච්චමග්ගං -පෙ- පස්සාවමග්ගං -පෙ- මුඛං අභිනිසීදෙන්ති. සන්ථතස්ස අසන්ථතාය, -පෙ- අසන්ථතස්ස සන්ථතාය, -පෙ- සන්ථතස්ස සන්ථතාය -පෙ- අසන්ථතස්ස අසන්ථතාය -පෙ- සො චෙ පවෙසනං සාදියති, පවිට්ඨං සාදියති, ඨිතං සාදියති, උද්ධරණං සාදියති, ආපත්ති පාරාජිකස්ස -පෙ- න සාදියති, අනාපත්ති.
66. භික්ඛුපච්චත්ථිකා භික්ඛුං මනුස්සිත්ථියා ජාගරන්තියා -පෙ- සුත්තාය -පෙ- මත්තාය -පෙ- උම්මත්තාය -පෙ- පමත්තාය -පෙ- මතාය අක්ඛායිතාය -පෙ- මතාය යෙභුය්යෙන අක්ඛයිතාය -පෙ- සාදියති, ආපත්ති පාරාජිකස්ස. -පෙ- න සාදියති, අනාපත්ති.
67. භික්ඛුපච්චත්ථිකා භික්ඛුං මනුස්සිත්ථියා මතාය යෙභුය්යෙන ඛයිතාය සන්තිකෙ ආනෙත්වා අඞ්ගජාතෙන වච්චමග්ගං -පෙ- පස්සාවමග්ගං -පෙ- මුඛං අභිනිසීදෙන්ති සන්ථතස්ස අසන්ථතාය -පෙ- අසන්ථතස්ස සන්ථතාය, -පෙ- සන්ථතස්ස සන්ථතාය -පෙ- අසන්ථතස්ස අසන්ථතාය -පෙ- සො චෙ පවෙසනං සාදියති, පවිට්ඨං සාදියති, ඨිතං සාදියති, උද්ධරණං සාදියති, ආපත්ති ථුල්ලච්චයස්ස. භික්ඛුපච්චත්ථිකා -පෙ- න සාදියති, අනාපත්ති.