64. සපරිදණ්ඩා භික්ඛුං පහිණාති: “ගච්ඡ භන්තෙ ඉත්ථන්නාමං බ්රූහි: “හොමි ඉත්ථන්නාමස්ස භරියා ධනක්කීතා ච ඡන්දවාසිනී ච භොගවාසිනී ච පටවාසිනී ච ඔදපත්තකිනී ච ඔභටචුම්බටා ච දාසී ච භරියා ච කම්මකාරී ච භරියා ච ධජාහටා ච මුහුත්තිකා චා”ති. පතිගණ්හාති වීමංසති පච්චාහරති, ආපත්ති සඞ්ඝාදිසෙසස්ස.
සපරිදණ්ඩාචක්කං නිට්ඨිතං.
සබ්බං චක්කපෙය්යාලං නිට්ඨිතං.
65. පතිගණ්හාති වීමංසති පච්චාහරති, ආපත්ති සඞ්ඝාදිසෙසස්ස. පතිගණ්හාති වීමංසති න පච්චාහරති, ආපත්ති ථුල්ලච්චයස්ස. පතිගණ්හාති න වීමංසති පච්චාහරති, ආපත්ති ථුල්ලච්චයස්ස. පතිගණ්හාති න වීමංසති න පච්චාහරති, ආපත්ති දුක්කටස්ස. න පතිගණ්හාති වීමංසති පච්චාහරති, ආපත්ති ථුල්ලච්චයස්ස. න පතිගණ්හාති වීමංසති න පච්චාහරති, ආපත්ති දුක්කටස්ස. න පතිගණ්හාති න වීමංසති පච්චාහරති, ආපත්ති දුක්කටස්ස. න පතිගණ්හාති න වීමංසති න පච්චාහරති, අනාපත්ති.
66. පුරිසො සම්බහුලෙ භික්ඛූ ආණාපෙති: “ගච්ඡථ භන්තෙ ඉත්ථන්නාමං ඉත්ථිං වීමංසථා”ති. සබ්බෙ පතිගණ්හන්ති සබ්බෙ වීමංසන්ති සබ්බෙ පච්චාහරන්ති, ආපත්ති සබ්බෙසං සඞ්ඝාදිසෙසස්ස.
67. පුරිසො සම්බහුලෙ භික්ඛූ ආණාපෙති:- “ගච්ඡථ භන්තෙ ඉත්ථන්නාමං ඉත්ථිං වීමංසථා”ති. සබ්බෙ පතිගණ්හන්ති සබ්බෙ වීමංසන්ති එකං පච්චාහරාපෙන්ති, ආපත්ති සබ්බෙසං සඞ්ඝාදිසෙසස්ස.
68. පුරිසො සම්බහුලෙ භික්ඛූ ආණාපෙති:- “ගච්ඡථ භන්තෙ ඉත්ථන්නාමං ඉත්ථිං වීමංසථා”ති. සබ්බෙ පතිගණ්හන්ති එකං වීමංසාපෙත්වා සබ්බෙ පච්චාහරන්ති, ආපත්ති සබ්බෙසං සඞ්ඝාදිසෙසස්ස.
69. පුරිසො සම්බහුලෙ භික්ඛූ ආණාපෙති:- “ගච්ඡථ භන්තෙ ඉත්ථන්නාමං ඉත්ථිං වීමංසථා”ති. සබ්බෙ පතිගණ්හන්ති එකං වීමංසාපෙත්වා එකං පච්චාහරාපෙන්ති, ආපත්ති සබ්බෙසං සඞ්ඝාදිසෙසස්ස.
70. පුරිසො භික්ඛුං ආණාපෙති:- “ගච්ඡ භන්තෙ ඉත්ථන්නාමං ඉත්ථිං වීමංසා”ති. පතිගණ්හාති වීමංසා”ති පච්චාහරති, ආපත්ති සඞ්ඝාදිසෙසස්ස.
71. පුරිසො භික්ඛුං ආණාපෙති:- “ගච්ඡ භන්තෙ ඉත්ථන්නාමං ඉත්ථිං වීමංසා”ති. පතිගණ්හාති වීමංසා”ති අන්තෙවාසිං පච්චාහරාපෙති, ආපත්ති සඞ්ඝාදිසෙසස්ස.
72. පුරිසො භික්ඛුං ආණාපෙති:- “ගච්ඡ භන්තෙ ඉත්ථන්නාමං ඉත්ථිං වීමංසා”ති. පතිගණ්හාති, අන්තෙවාසිං වීමංසාපෙත්වා අත්තනා පච්චාහරති ආපත්ති සඞ්ඝාදිසෙසස්ස.
73. පුරිසො භික්ඛුං ආණාපෙති:- “ගච්ඡ භන්තෙ ඉත්ථන්නාමං ඉත්ථිං වීමංසා”ති. පතිගණ්හාති අන්තෙවාසිං වීමංසාපෙති, අන්තෙවාසී වීමංසිත්වා බහිද්ධා පච්චාහරති, ආපත්ති උභින්නං ථුල්ලච්චයස්ස.
74. ගච්ඡන්තො සම්පාදෙති, ආගච්ඡන්තො විසංවාදෙති, ආපත්ති ථුල්ලච්චයස්ස. ගච්ඡන්තො විසංවාදෙති, ආගච්ඡන්තො සම්පාදෙති, ආපත්ති ථුල්ලච්චයස්ස. ගච්ඡන්තො සම්පාදෙති, ආගච්ඡන්තො සම්පාදෙති, ආපත්ති සඞ්ඝාදිසෙසස්ස. ගච්ඡන්තො විසංවාදෙති, ආගච්ඡන්තො විසංවාදෙති, අනාපත්ති.
75. අනාපත්ති සඞ්ඝස්ස වා චෙතියස්ස වා ගිලානස්ස වා කරණීයෙන ගච්ඡති, උම්මත්තකස්ස, ආදිකම්මිකස්සාති.
විනීතවත්ථු
උද්දානගාථා:
සුත්තා මතා ච නික්ඛන්තා, අනිත්ථි ඉත්ථිපණ්ඩකා, කලහං කත්වාන සම්මොදි, සඤ්චරිත්තඤ්ච පණ්ඩකෙති.
1. තෙන ඛො පන සමයෙන අඤ්ඤතරො පුරිසො අඤ්ඤතරං භික්ඛුං ආණාපෙසි:- “ගච්ඡ භන්තෙ ඉත්ථන්නාමං ඉත්ථිං වීමංසා”ති. සො ගන්ත්වා මනුස්සෙ පුච්ඡි:- “කහං ඉත්ථන්නාමා”ති? “සුත්තා භන්තෙ”ති. තස්ස කුක්කුච්චං අහොසි. කච්චි නු ඛො අහං සඞ්ඝාදිසෙසං ආපත්තිං ආපන්නො”ති. භගවතො එතමත්ථං ආරොචෙසි -පෙ- “අනාපත්ති භික්ඛු සඞ්ඝාදිසෙසස්ස; ආපත්ති දුක්කටස්සා”ති. (1)
2. තෙන ඛො පන සමයෙන අඤ්ඤතරො පුරිසො අඤ්ඤතරං භික්ඛුං ආණාපෙසි:- “ගච්ඡ භන්තෙ ඉත්ථන්නාමං ඉත්ථිං වීමංසා”ති. සො ගන්ත්වා මනුස්සෙ පුච්ඡි:- “කහං ඉත්ථන්නාමා”ති. “මතා භන්තෙ”ති -පෙ- “නික්ඛන්තා භන්තෙ”ති, ‘අනිත්ථි භන්තෙ”ති, “ඉත්ථිපණ්ඩකා භන්තෙ”ති. තස්ස කුක්කුච්චං අහොසි -පෙ- අනාපත්ති භික්ඛු සඞ්ඝාදිසෙසස්ස; ආපත්ති දුක්කටස්සා”ති. (2-5)
3. තෙන ඛො පන සමයෙන අඤ්ඤතරා ඉත්ථි සාමිකෙන සහ භණ්ඩිත්වා මාතුඝරං අගමාසි. කුලූපගො භික්ඛු සම්මොදනීයං අකාසි. තස්ස කුක්කුච්චං අහොසි -පෙ-“අලංවචනීයා භික්ඛූ”ති? “නාලංවචනීයා භගවා”ති. “අනාපත්ති භික්ඛු නාලංවචනීයායා”ති. (6)
4. තෙන ඛො පන සමයෙන අඤ්ඤතරො භික්ඛු පණ්ඩකෙ සඤ්චරිත්තං සමාපජ්ජි. තස්ස කුක්කුච්චං අහොසි:- කච්චි නු ඛො අහං සංඝාදිසෙසං ආපත්තිං ආපන්නොති. භගවතො එතමත්ථං ආරොචෙසි -පෙ- “අනාපත්ති භික්ඛු සඞ්ඝාදිසෙසස්ස; ආපත්ති ථුල්ලච්චයස්සා”ති. (7)
සඤ්චරිත්ත සික්ඛාපදං නිට්ඨිතං
3. 6.
කුටිකාරසික්ඛාපදං
1. තෙන සමයෙන බුද්ධො භගවා රාජගහෙ විහරති වෙළුවනෙ කලන්දකනිවාපෙ. තෙන ඛො පන සමයෙන ආළවකා භික්ඛූ සඤ්ඤාචිකායො කුටියො කාරාපෙන්ති අස්සාමිකායො අත්තුද්දෙසිකායො අප්පමාණිකායො, තායො න නිට්ඨානං ගච්ඡන්ති. තෙ යාචනබහුලා විඤ්ඤත්තිබහුලා විහරන්ති: “පුරිසං දෙථ, පුරිසත්ථකරං දෙථ, ගොණං දෙථ, සකටං දෙථ, වාසිං දෙථ, ඵරසුං දෙථ, කුඨාරිං දෙථ, කුද්දාලං දෙථ, නිඛාදනං දෙථ, වල්ලිං දෙථ, වෙළුං දෙථ, මුඤ්ජං දෙථ, බබ්බජං දෙථ, තිණං දෙථ, මත්තිකං දෙථා”ති. මනුස්සා උපද්දුතා යාචනාය උපද්දුතා විඤ්ඤත්තියා භික්ඛූ දිස්වා උබ්බිජ්ජන්තිපි උත්තසන්තිපි පලායන්තිපි අඤ්ඤෙනපි ගච්ඡන්ති අඤ්ඤෙනපි මුඛං කරොන්ති ද්වාරම්පි ථකෙන්ති, ගාවිම්පි දිස්වා පලායන්ති, භික්ඛූති මඤ්ඤමානා.
2. අථ ඛො ආයස්මා මහාකස්සපො රාජගහෙ වස්සං වුත්ථො යෙන ආළවී තෙන පක්කාමි. අනුපුබ්බෙන යෙන ආළවී තදවසරි. තත්ර සුදං ආයස්මා මහාකස්සපො ආළවියං විහරති අග්ගාළවෙ චෙතියෙ. අථ ඛො ආයස්මා මහාකස්සපො පුබ්බණ්හසමයං නිවාසෙත්වා පත්තචීවරමාදාය ආළවිං පිණ්ඩාය පාවිසි. මනුස්සා ආයස්මන්තං මහාකස්සපං පස්සිත්වා උබ්බිජ්ජන්තිපි උත්තසන්තිපි පලායන්තිපි අඤ්ඤෙනපි ගච්ඡන්ති අඤ්ඤෙනපි මුඛං කරොන්ති ද්වාරම්පි ථකෙන්ති. අථ ඛො ආයස්මා මහාකස්සපො ආළවියං පිණ්ඩාය චරිත්වා පච්ඡාභත්තං පිණ්ඩපාතප්පටික්කන්තො භික්ඛූ ආමන්තෙසි:
“පුබ්බායං ආවුසො ආළවි සුභික්ඛා අහොසි සුලභපිණ්ඩා සුකරා උඤ්ඡෙන පග්ගහෙන යාපෙතුං. එතරහි පනායං ආළවී දුබ්භික්ඛා දුල්ලභපිණ්ඩා න සුකරා උඤ්ඡෙන පග්ගහෙන යාපෙතුං. කො නු ඛො ආවුසො හෙතු කො පච්චයො යෙනායං ආළවි දුබ්භික්ඛා දුල්ලභපිණ්ඩා න සුකරා උඤ්ඡෙන පග්ගහෙන යාපෙතු”න්ති. අථ ඛො තෙ භික්ඛූ ආයස්මතො මහාකස්සපස්ස එතමත්ථං ආරොචෙසුං.
3. අථ ඛො භගවා රාජගහෙ යථාභිරන්තං විහරිත්වා යෙන ආළවි තෙන චාරිකං පක්කාමි. අනුපුබ්බෙන චාරිකං චරමානො යෙන ආළවි තදවසරි. තත්ර සුදං භගවා ආළවියං විහරති අග්ගාළවෙ චෙතියෙ. අථ ඛො ආයස්මා මහාකස්සපො යෙන භගවා, තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං නිසීදි. එකමන්තං නිසින්නො ඛො මහාකස්සපො භගවතො එතමත්ථං ආරොචෙසි.
4. අථ ඛො භගවා එතස්මිං නිදානෙ එතස්මිං පකරණෙ භික්ඛුසඞ්ඝං සන්නිපාතාපෙත්වා ආළවකෙ භික්ඛූ පටිපුච්ඡි: “සච්චං කිර තුම්හෙ භික්ඛවෙ සඤ්ඤාචිකායො කුටියො කාරාපෙථ අස්සාමිකායො අත්තුද්දෙසිකායො අප්පමාණිකායො. තායො න නිට්ඨානං ගච්ඡන්ති. තෙ තුම්හෙ යාචනබහුලා විඤ්ඤත්තිබහුලා විහරථ, පුරිසං දෙථ, පුරිසත්ථකරං දෙථ, -පෙ- තිණං දෙථ, මත්තිකං දෙථා”ති. මනුස්සා උපද්දුතා යාචනාය, උපද්දුතා විඤ්ඤත්තියා භික්ඛූ දිස්වා උබ්බිජ්ජන්තිපි උත්තසන්තිපි පලායන්තිපි අඤ්ඤෙනපි ගච්ඡන්ති අඤ්ඤෙනපි මුඛං කරොන්ති ද්වාරම්පි ථකෙන්ති, ගාවිම්පි දිස්වා පලායන්ති භික්ඛූති මඤ්ඤමානා”ති. “සච්චං භගවා.”
5. විගරහි බුද්ධො භගවා: “කථං හි නාම තුම්හෙ මොඝපුරිසා සඤ්ඤාචිකායො කුටියො කාරාපෙස්සථ අස්සාමිකායො අත්තුද්දෙසිකායො අප්පමාණිකායො, තායො න නිට්ඨානං ගච්ඡන්ති. තෙ තුම්හෙ යාචනබහුලා විඤ්ඤත්තිබහුලා විහරිස්සථ: පුරිසං දෙථ පුරිසත්ථකරං දෙථ -පෙ- තිණං දෙථ මත්තිකං දෙථා”ති. නෙතං මොඝපුරිසා අප්පසන්නානං වා පසාදාය -පෙ- විගරහිත්වා ධම්මිං කථං කත්වා භික්ඛූ ආමන්තෙසි:
6. භූතපුබ්බං භික්ඛවෙ ද්වෙ භාතරො ඉසයො ගඞ්ගං නදිං උපනිස්සාය විහරිංසු. අථ ඛො භික්ඛවෙ මණිකණ්ඨො නාගරාජා ගඞ්ගං නදිං උත්තරිත්වා යෙන කණිට්ඨො ඉසි තෙනුපසඞ්කමි උපසඞ්කමිත්වා කණිට්ඨං ඉසිං සත්තක්ඛත්තුං භොගෙහි පරික්ඛිපිත්වා උපරි මුද්ධනි මහන්තං ඵණං කරිත්වා අට්ඨාසි. අථ ඛො භික්ඛවෙ කණිට්ඨො ඉසි තස්ස නාගස්ස භයා කිසො අහොසි ලූඛො දුබ්බණ්ණො උප්පණ්ඩුප්පණ්ඩුකජාතො ධමනිසන්ථතගත්තො. අද්දස ඛො භික්ඛවෙ ජෙට්ඨො ඉසි කණිට්ඨං ඉසිං කිසං ලූඛං දුබ්බණ්ණං උප්පණ්ඩුප්පණ්ඩුකජාතං ධමනිසන්ථතගත්තං, දිස්වාන කණිට්ඨං ඉසිං එතදවොච: “කිස්ස ත්වං භො කිසො ලූඛො දුබ්බණ්ණො උප්පණ්ඩුප්පණ්ඩුකජාතො ධමනිසන්ථතගත්තො”ති. ඉධ භො මණිකණ්ඨො නාගරාජා ගඞ්ගං නදිං උත්තරිත්වා යෙනාහං තෙනුපසඞ්කමි. උපසඞ්කමිත්වා මං සත්තක්ඛත්තුං භොගෙහි පරික්ඛිපිත්වා උපරි මුද්ධනි මහන්තං ඵණං කරිත්වා අට්ඨාසි. තස්සාහං භො නාගස්ස භයා’ම්භි කිසො ලූඛො දුබ්බණ්ණො උප්පණ්ඩුප්පණ්ඩුකජාතො ධමනිසන්ථතගත්තො”ති. “ඉච්ඡසි පන ත්වං භො තස්ස නාගස්ස අනාගමනන්ති.” “ඉච්ඡාමහං භො තස්ස නාගස්ස අනාගමනන්ති.” “අපි පන ත්වං භො තස්ස නාගස්ස කිඤ්චි පස්සසී”ති. “පස්සාමහං භො මණිමස්ස කණ්ඨෙ පිලන්ධන”න්ති. “තෙන හි ත්වං භො තං නාගං මණිං යාච, මණිං මෙ භො දෙහි, මණිනා මෙ අත්ථො”ති.
7. අථ ඛො භික්ඛවෙ මණිකණ්ඨො නාගරාජා ගඞ්ගං නදිං උත්තරිත්වා කණිට්ඨො ඉසි තෙනුපසඞ්කමි. උපසඞ්කමිත්වා එකමන්තං අට්ඨාසි. එකමන්තං ඨිතං ඛො භික්ඛවෙ මණිකණ්ඨං නාගරාජානං කණිට්ඨො ඉසි එතදවොච: “මණිං මෙ භො දෙහි, මණිනා මෙ අත්ථො”ති. අථ ඛො භික්ඛවෙ මණිකණ්ඨො නාගරාජා “භික්ඛු මණිං යාචති, භික්ඛුස්ස මණිනා අත්ථො’ති ඛිප්පඤ්ඤෙව අගමාසි. දුතියම්පි ඛො භික්ඛවෙ මණිකණ්ඨො නාගරාජා ගඞ්ගං නදිං උත්තරිත්වා යෙන කණිට්ඨො ඉසි තෙනුපසඞ්කමි. අද්දසා ඛො භික්ඛවෙ කණිට්ඨො ඉසි මණිකණ්ඨං නාගරාජානං දූරතොව ආගච්ඡන්තං දිස්වාන මණිකණ්ඨං නාගරාජානං එතදවොච: “මණිං මෙ භො දෙහි, මණිනා මෙ අත්ථො”ති. අථ ඛො භික්ඛවෙ මණිකණ්ඨො නාගරාජා “භික්ඛු මණිං යාචති, භික්ඛුස්ස මණිනා අත්ථො”ති තතොව පටිනිවත්ති. තතියම්පි ඛො භික්ඛවෙ මණිකණ්ඨො නාගරාජා ගඞ්ගං නදිං උත්තරති. අද්දසා ඛො භික්ඛවෙ කණිට්ඨො ඉසි මණිකණ්ඨං නාගරාජානං ගඞ්ගං නදිං උත්තරන්තං. දිස්වාන මණිකණ්ඨං නාගරාජානං එතදවොච: “මණිං මෙ භො දෙහි, මණිනා මෙ අත්ථො”ති. අථ ඛො භික්ඛවෙ මණිකණ්ඨො නාගරාජා කණිට්ඨං ඉසිං ගාථාහි අජ්ඣභාසි:
“මමන්නපානං විපුලං උළාරං උප්පජ්ජතීමස්ස මණිස්ස හෙතු, තං තෙ න දස්සං අතියාචකො’සි න චාපි තෙ අස්සමමාගමිස්සං.
“සුසූ යථා සක්ඛරධොතපාණී තාසෙසි මං සෙලං යාචමානො, තං තෙ න දස්සං අතියාචකො’සි න චාපි තෙ අස්සමමාගමිස්ස’න්ති.
8. අථ ඛො භික්ඛවෙ මණිකණ්ඨො නාගරාජා “භික්ඛු මණිං යාචති, භික්ඛුස්ස මණිනා අත්ථො”ති පක්කාමි. තථා පක්කන්තො පක්කන්තොව{1} අහොසි, න පුන පච්චාගඤ්ඡි. අථ ඛො භික්ඛවෙ කණිට්ඨො ඉසි තස්ස නාගස්ස දස්සනීයස්ස අදස්සනෙන භිය්යොසොමත්තාය කිසො අහොසි ලූඛො දුබ්බණ්ණො උප්පණ්ඩුප්පණ්ඩුකජාතො ධමනිසන්ථතගත්තො. අද්දසා ඛො භික්ඛවෙ ජෙට්ඨො ඉසි කණිට්ඨං ඉසිං භිය්යොසොමත්තාය කිසං ලූඛං දුබ්බණ්ණං උප්පණ්ඩුප්පණ්ඩුකජාතං ධමනිසන්ථතගත්තං. දිස්වාන කණිට්ඨං ඉසිං එතදවොච: “කිස්ස ත්වං භො භිය්යොසොමත්තාය කිසො ලූඛො දුබ්බණ්ණො උප්පණ්ඩුප්පණ්ඩුකජාතො ධමනිසන්ථතගත්තො”ති. තස්සාහං භො නාගස්ස දස්සනීයස්ස අදස්සනෙන. භිය්යොසොමත්තාය කිසො ලූඛො දුබ්බණ්ණො උප්පණ්ඩුප්පණ්ඩුකජාතො ධමනිසන්ථතගත්තො”ති. අථ ඛො භික්ඛවෙ ජෙට්ඨො ඉසි කණිට්ඨං ඉසිං ගාථාය අජ්ඣභාසි:-
“න තං යාචෙ යස්ස පියං ජිගිංසෙ{2} දෙස්සො{3} හොති අතියාචනාය, නාගො මණිං යාචිතො බ්රාහ්මණෙන අදස්සනඤ්ඤෙව තදජ්ඣගමාති.
තෙසං හි නාම භික්ඛවෙ තිරච්ඡානගතානං පාණානං අමනාපා භවිස්සති යාචනා අමනාපා විඤ්ඤත්ති. කිමඞ්ග{4} පන මනුස්සභූතානං.”
9. “භූතපුබ්බං භික්ඛවෙ අඤ්ඤතරො භික්ඛු හිමවන්තපස්සෙ විහරති අඤ්ඤතරස්මිං වනසණ්ඩෙ. තස්ස ඛො භික්ඛවෙ වනසණ්ඩස්ස අවිදූරෙ මහන්තං නින්නං පල්ලලං. අථ ඛො භික්ඛවෙ මහාසකුණසඞ්ඝො තස්මිං පල්ලලෙ දිවසං ගොචරං චරිත්වා සායං තං වනසණ්ඩං වාසාය උපගච්ඡති. අථ ඛො භික්ඛවෙ සො භික්ඛු තස්ස සකුණසඞ්ඝස්ස සද්දෙන උබ්බාළ්හො යෙනාහං තෙනුපසඞ්කමි. උපසඞ්කමිත්වා මං අභිවාදෙත්වා එකමන්තං නිසීදි. එකමන්තං නිසින්නං ඛො අහං භික්ඛවෙ තං භික්ඛුං එතදවොච “කච්චි භික්ඛු ඛමනීයං, කච්චි යාපනීයං, කච්චිසි අප්පකිලමථෙන අද්ධානං ආගතො, කුතො ච ත්වං භික්ඛු ආගච්ඡසී”ති. “ඛමනීයං භගවා යාපනීයං භගවා. අප්පකිලමථෙන චාහං භන්තෙ අද්ධානං ආගතො. අත්ථි භන්තෙ හිමවන්තපස්සෙ මහාවනසණ්ඩො. තස්ස ඛො පන භන්තෙ වනසණ්ඩස්ස අවිදූරෙ මහන්තං නින්නං පල්ලලං. අථ ඛො භන්තෙ මහාසකුණසඞ්ඝො තස්මිං පල්ලලෙ දිවසං ගොචරං චරිත්වා සායං තං වනසණ්ඩං වාසාය උපගච්ඡති. තතො අහං භගවා ආගච්ඡාමි තස්ස සකුණසඞ්ඝස්ස සද්දෙන උබ්බාළ්හො”ති. “ඉච්ඡසි පන ත්වං භික්ඛු තස්ස සකුණසඞ්ඝස්ස අනාගමන”න්ති. “ඉච්ඡාමහං භගවා තස්ස සකුණසඞ්ඝස්ස අනාගමන”න්ති. ‘තෙන හි ත්වං භික්ඛු තත්ථ ගන්ත්වා තං වනසණ්ඩං අජ්ඣොගහෙත්වා රත්තියා පඨමං යාමං තික්ඛත්තුං සද්දමනුස්සාවෙහි: “සුණන්තු මෙ භොන්තො සකුණා, යාවතිකා ඉමස්මිං වනසණ්ඩෙ වාසං උපගතා, පත්තෙන මෙ අත්ථො, එකෙකං මෙ භොන්තො පත්තං දදන්තු”ති. රත්තියා මජ්ඣිමං යාමං -පෙ- රත්තියා පච්ඡිමං යාමං තික්ඛත්තුං සද්දමනුස්සාවෙහි: “සුණන්තු මෙ භොන්තො සකුණා යාවතිකා ඉමස්මිං වනසණ්ඩෙ වාසං උපගතා, පත්තෙන මෙ අත්ථො, එකෙකං මෙ භොන්තො පත්තං දදන්තූ”ති.
10. අථ ඛො භික්ඛවෙ සො භික්ඛු තත්ථ ගන්ත්වා තං වනසණ්ඩං අජ්ඣොගාහෙත්වා රත්තියා පඨමං යාමං තික්ඛත්තුං සද්දමනුස්සාවෙසි: “සුණන්තු මෙ භොන්තො සකුණා යාවතිකා ඉමස්මිං වනසණ්ඩෙ වාසං උපගතා, පත්තෙන මෙ අත්ථො, එකෙකං මෙ භොන්තො පත්තං දදන්තූ”ති. රත්තියා මජ්ඣිමං යාමං -පෙ- රත්තියා පච්ඡිමං යාමං තික්ඛත්තුං සද්දමනුස්සාවෙසි: “සුණන්තු මෙ භොන්තො සකුණා යාවතිකා ඉමස්මිං වනසණ්ඩෙ වාසං උපගතා, පත්තෙන මෙ අත්ථො, එකෙකං මෙ භොන්තො පත්තං දදන්තූ”ති. අථ ඛො භික්ඛවෙ සො සකුණසඞ්ඝො භික්ඛු පත්තං යාචති, භික්ඛුස්ස පත්තෙන අත්ථො”ති. තම්හා වනසණ්ඩා පක්කාමි. තථා පක්කන්තො පක්කන්තොව අහොසි. න පුන පච්චාගඤ්ඡි. තෙසං හි නාම භික්ඛවෙ තිරච්ඡානගතානං පාණානං අමනාපා භවිස්සති යාචනා අමනාපා විඤ්ඤත්ති, කිමඞ්ග පන මනුස්සභූතානං.
11. භූතපුබ්බං භික්ඛවෙ රට්ඨපාලස්ස කුලපුත්තස්ස පිතා රට්ඨපාලං කුලපුත්තං ගාථාය අජ්ඣභාසි.:
“අපාහං තෙ න ජානාමි රට්ඨපාල බහුජ්ජනා, තෙ මං සඞ්ගම්ම යාචන්ති කස්මා මං ත්වං න යාචසීති.
යාචකො අප්පියො හොති යාචං අදදමප්පියො, තස්මාහං තං න යාචාමි මා මෙ විදෙස්සනා{1} අහූ”ති.
12. සො හි නාම භික්ඛවෙ රට්ඨපාලො කුලපුත්තො සකං පිතරං එවං වක්ඛති කිමඞ්ග පන ජනො ජනං. ගිහීනං හි භික්ඛවෙ දුස්සංහරානි භොගානි සම්භතානි’පි{2} දුරනුක්ඛියානි. තත්ථ නාම තුම්හෙ මොඝපුරිසා එවං දුස්සංහරෙසු භොගෙසු සංභතෙසුපි{3} දුරනුරක්ඛියෙසු යාචනබහුලා විඤ්ඤත්තිබහුලා විහරිස්සථ: “පුරිසං දෙථ, පුරිසත්ථකරං දෙථ, ගොණං දෙථ, සකටං දෙථ, වාසිං දෙථ, ඵරසුං{4} දෙථ, කුඨාරිං දෙථ, කුද්දාලං දෙථ, නිඛාදනං දෙථ, වල්ලිං දෙථ, වෙළුං දෙථ, මුඤ්ජං දෙථ, බබ්බජං දෙථ, තිණං දෙථ, මත්තිකං දෙථා”ති. නෙතං, මොඝපුරිසා අප්පසන්නානං වා පසාදාය -පෙ- එවඤ්ච පන භික්ඛවෙ ඉමං සික්ඛාපදං උද්දිසෙය්යාථ:”
“සඤ්ඤාචිකාය පන භික්ඛුනා කුටිං කාරයමානෙන අස්සාමිකං අත්තුද්දෙසං පමාණිකා කාරෙතබ්බා. තත්රිදං පමාණං: දීඝසො ද්වාදසවිදත්ථියො, සුගතවිදත්ථියා තිරියං සත්තන්තරා, භික්ඛූ අභිනෙතබ්බා වත්ථුදෙසනාය. තෙහි භික්ඛූහි වත්ථුං දෙසෙතබ්බං අනාරම්භං සපරික්කමනං. සාරම්භෙ චෙ භික්ඛු වත්ථුස්මිං අපරික්කමනෙ සඤ්ඤාචිකාය කුටිං කාරෙය්ය, භික්ඛූ වා අනභිනෙය්ය වත්ථුදෙසනාය, පමාණං වා අතික්කාමෙය්ය සඞ්ඝාදිසෙසො”ති.
13. සඤ්ඤාචිකා නාම: සයං යාචිත්වා පුරිසම්පි පුරිසත්ථකරම්පි ගොණම්පි සකටම්පි වාසිම්පි පරසුම්පි කුඨාරිම්පි කුද්දාලම්පි නිඛාදනම්පි වල්ලිම්පි වෙළුම්පි මුඤ්ජම්පි බබ්බජම්පි තිණම්පි මත්තිකම්පි.
කුටිනාම: උල්ලිත්තා වා හොති අවලිත්තා වා උල්ලිත්තාවලිත්තා වා.
කාරයමානෙනාති කරොන්තො වා කාරාපෙන්තො වා.
අස්සාමිකන්ති න අඤ්ඤො කොචි සාමිකො හොති ඉත්ථි වා පුරිසො වා ගහට්ඨො වා පබ්බජිතො වා.
අත්තුද්දෙසන්ති අත්තනො අත්ථාය.
පමාණිකා කාරෙතබ්බා තත්රිදං පමාණං: දීඝසො ද්වාදස විදත්ථියො සුගතවිදත්ථියා ති බාහිරිමෙන මානෙන.
තිරියං සත්තන්තරා ති අබ්භන්තරිමෙන මානෙන.
භික්ඛූ අභිනෙතබ්බා වත්ථු දෙසනායාති-තෙන කුටිකාරකෙන භික්ඛුනා කුටිවත්ථුං සොධෙත්වා සඞ්ඝං උපසඞ්කමිත්වා එකංසං උත්තරාසඞ්ගං කරිත්වා වුඩ්ඪානං භික්ඛූනං පාදෙ වන්දිත්වා උක්කුටිකං නිසීදිත්වා අඤ්ජලිං පග්ගහෙත්වා එවමස්ස වචනීයො: “අහං භන්තෙ සඤ්ඤාචිකාය කුටිං කත්තුකාමො අස්සාමිකං අත්තුද්දෙසං. සොහං භන්තෙ සඞ්ඝං කුටිවත්ථු ඔලොකනං යාචාමී”ති. දුතියම්පි යාචිතබ්බා. තතියම්පි යාචිතබ්බො. සචෙ සබ්බො සඞ්ඝො උස්සහති කුටිවත්ථුං ඔලොකෙතුං, සබ්බෙන සඞ්ඝෙන ඔලොකෙතබ්බං. නො චෙ සබ්බො සඞ්ඝො උස්සහති කුටිවත්ථුං ඔලොකෙතුං, යෙ තත්ථ හොන්ති භික්ඛූ ව්යත්තා පටිබලා සාරම්භං අනාරම්භං සපරික්කමනං අපරික්කමනං ජානිතුං, තෙ යාචිත්වා සම්මන්නිතබ්බා. එවඤ්ච පන භික්ඛවෙ සම්මන්නිතබ්බා ව්යත්තෙන භික්ඛුනා පටිබලෙන සඞ්ඝො ඤාපෙතබ්බො:
“සුණාතු මෙ භන්තෙ සඞ්ඝො අයං ඉත්ථන්නාමො භික්ඛු සඤ්ඤාචිකාය කුටිං කත්තුකාමො අස්සාමිකං අත්තුද්දෙසං, සො සඞ්ඝං කුටිවත්ථු ඔලොකනං යාචති. යදි සඞ්ඝස්ස පත්තකල්ලං, සඞ්ඝො ඉත්ථන්නාමඤ්ච ඉත්ථන්නාමඤ්ච භික්ඛූ සම්මන්නෙය්ය ඉත්ථන්නාමස්ස භික්ඛුනො කුටිවත්ථුං ඔලොකෙතුං. එසා ඤත්ති.
සුණාතු මෙ භන්තෙ සඞ්ඝො. අයං ඉත්ථන්නාමො භික්ඛු සඤ්ඤාචිකාය කුටිං කත්තුකාමො අස්සාමිකං අත්තුද්දෙසං. සො සඞ්ඝං කුටිවත්ථු ඔලොකනං යාචති. සඞ්ඝො ඉත්ථන්නාමඤ්ච ඉත්ථන්නාමඤ්ච භික්ඛූ සම්මන්නති ඉත්ථන්නාමස්ස භික්ඛුනො කුටිවත්ථුං ඔලොකෙතුං. යස්සායස්මතො ඛමති ඉත්ථන්නාමස්ස ච ඉත්ථන්නාමස්ස ච භික්ඛූනං සම්මති{1} ඉත්ථන්නාමස්ස භික්ඛුනො කුටිවත්ථුං ඔලොකෙතුං. සො තුණ්හස්ස. යස්ස නක්ඛමති, සො භාසෙය්ය.
සම්මතා සඞ්ඝෙන ඉත්ථන්නාමො ච ඉත්ථන්නාමො ච භික්ඛූ ඉත්ථන්නාමස්ස භික්ඛුනො කුටිවත්ථුං ඔලොකෙතුං. ඛමති සඞ්ඝස්ස, තස්මා තුණ්හී, එවමෙතං ධාරයාමී”ති.
තෙහි සම්මතෙහි භික්ඛූහි තත්ථ ගන්ත්වා කුටිවත්ථු ඔලොකෙතබ්බං සාරම්භං අනාරම්භං, සපරික්කමනං අපරික්කමනං ජානිතබ්බං. සචෙ සාරම්භං හොති අපරික්කමනං, ‘මා ඉධ කරීති වත්තබ්බො. සචෙ අනාරම්භං හොති සපරික්කමනං සඞ්ඝස්ස ආරොචෙතබ්බං අනාරම්භං සපරික්කමනන්ති. තෙන කුටිකාරකෙන භික්ඛුනා සඞ්ඝං උපසඞ්කමිත්වා එකංසං උත්තරාසඞ්ගං කරිත්වා බුඩ්ඪානං භික්ඛූනං පාදෙ වන්දිත්වා උක්කුටිකං නිසීදිත්වා අඤ්ජලිං පග්ගහෙත්වා එවමස්ස වචනීයො: “අහං භන්තෙ සඤ්ඤාචිකාය කුටිං කත්තුකාමො අස්සාමිකං අත්තුද්දෙසං, සොහං භන්තෙ සඞ්ඝං කුටිවත්ථුදෙසනං යාචාමී”ති. දුතියම්පි යාචිතබ්බො. තතියම්පි යාචිතබ්බො. ව්යත්තෙන භික්ඛුනා පටිබලෙන සඞ්ඝො ඤාපෙතබ්බො:
“සුණාතු මෙ භන්තෙ සඞ්ඝො අයං ඉත්ථන්නාමො භික්ඛු සඤ්ඤාචිකාය කුටිං කත්තුකාමො අස්සාමිකං අත්තුද්දෙසං, සො සඞ්ඝං කුටිවත්ථුදෙසනං යාචති. යදි සඞ්ඝස්ස පත්තකල්ලං සඞ්ඝො ඉත්ථන්නාමස්ස භික්ඛුනො කුටිවත්ථුං දෙසෙය්ය. එසා ඤත්ති.
සුණාතු මෙ භන්තෙ සඞ්ඝො අයං ඉත්ථන්නාමො භික්ඛු සඤ්ඤාචිකාය කුටිං කත්තුකාමො අස්සාමිකං අත්තුද්දෙසං, සො සඞ්ඝං කුටිවත්ථු දෙසනං යාචති, සඞ්ඝො ඉත්ථන්නාමස්ස භික්ඛුනො කුටිවත්ථුං දෙසෙති, යස්සායස්මතො ඛමති ඉත්ථන්නාමස්ස භික්ඛුනො කුටිවත්ථුස්ස දෙසනා සො තුණ්හස්ස, යස්ස නක්ඛමති, සො භාසෙය්ය.
දෙසිතං සඞ්ඝෙන ඉත්ථන්නාමස්ස භික්ඛුනො කුටිවත්ථු. ඛමති සඞ්ඝස්ස, තස්මා තුණ්හී, එවමෙතං ධාරයාමී”ති.
සාරම්භං නාම: කිපිල්ලිකානං වා ආසයො හොති. උපචිකානං වා ආසයො හොති. උන්දූරානං වා ආසයො හොති. අහීනං වා ආසයො හොති. විච්ඡිකානං වා ආසයො හොති. සතපදීනං වා ආසයො හොති. හත්ථීනං වා ආසයො හොති. සීහානං වා ආසයො හොති. ව්යග්ඝානං වා ආසයො හො. දීපීනං වා ආසයො හොති. අච්ඡානං වා ආසයො හොති. තරච්ඡානං වා ආසයො හොති. යෙසං කෙසඤ්චි තිරච්ඡානගතානං පාණානං ආසයො හොති. පුබ්බන්නනිස්සිතං වා හොති. අපරන්නනිස්සිතං වා හොති. අබ්භාඝාතනිස්සිතං වා හොති. ආඝාතනිස්සිතං වා හොති. සුසානනිස්සිතං වා හොති. උය්යානනිස්සිතං වා හොති. රාජවත්ථුනිස්සිතං වා හොති. හත්ථිසාලානිස්සීතං වා හොති. අස්සසාලානිස්සිතං වා හොති. බන්ධනාගාරනිස්සිතං වා හොති. පානාගාරනිස්සිතං වා හොති. සූනනිස්සිතං වා හොති. රච්ඡානිස්සිතං වා හොති. චච්චරනිස්සිතං වා හොති. සභානිස්සිතං වා හොති. සංසරණ{1} නිස්සිතං වා හොති. එතං සාරම්භං නාම.
අපරික්කමනං නාම: න සක්කා හොති යථායුත්තෙන සකටෙන අනුපරිගන්තුං, සමන්තා නිස්සෙනියා අනුපරිගන්තුං. එතං අපරික්කමනං නාම.
අනාරම්භං නාම: න කිපිල්ලිකානං වා ආසයො හොති -පෙ- න සංසරණනිස්සිතං වා හොති. එතං අනාරම්භං නාම.
සපරික්කමනං නාම: සක්කා හොති යථා යුත්තෙන සකටෙන අනුපරිගන්තුං, සමන්තා නිස්සෙනියා අනුපරිගන්තුං, එතං සපරික්කමනං නාම.
සඤ්ඤාචිකා නාම සයං යාචිත්වා පුරිසම්පි පුරිසත්ථකරම්පි -පෙ- මත්තිකම්පි.
කුටි නාම: උල්ලිත්තා වා හොති වා අවලිත්තා වා උල්ලිත්තාවලිත්තා වා.
කාරෙය්යාති කරොති වා කාරාපෙති වා.
භික්ඛූ වා අනභිනෙය්ය, වත්ථුදෙසනාය පමාණං වා අතික්කාමෙය්යාති: ඤත්තිදුතියෙන කම්මෙන කුටිවත්ථුං න දෙසාපෙත්වා ආයාමතො වා විත්ථාරතො වා අන්තමසො කෙසග්ගමත්තම්පි අතික්කාමෙත්වා කරොති වා කාරාපෙති වා පයොගෙ පයොගෙ දුක්කටං, එකං පිණ්ඩං අනාගතෙ ආපත්ති ථුල්ලච්චයස්ස; තස්මිං පිණ්ඩෙ ආගතෙ ආපත්ති සඞ්ඝාදිසෙසස්ස.
සඞ්ඝාදිසෙසොති -පෙ- තෙනපි වුච්චති සඞ්ඝාදිසෙසොති.
------------
1. භික්ඛු කුටිං කරොති අදෙසිතවත්ථුකං සාරම්භං අපරික්කමනං, ආපත්ති සඞ්ඝාදිසෙසෙන ද්වින්නං දුක්කටානං,
භික්ඛු කුටිං කරොති අදෙසිතවත්ථුකං සාරම්භං සපරික්කමනං, ආපත්ති සඞ්ඝාදිසෙසෙන දුක්කටස්ස.
භික්ඛු කුටිං කරොති අදෙසිතවත්ථුකං අනාරම්භං අපරික්කමනං, ආපත්ති සඞ්ඝාදිසෙසෙන දුක්කටස්ස.
භික්ඛු කුටිං කරොති අදෙසිතවත්ථුකං අනාරම්භං සපරික්කමනං, ආපත්ති සඞ්ඝාදිසෙසස්ස.
භික්ඛු කුටිං කරොති දෙසිතවත්ථුකං සාරම්භං අපරික්කමනං, ආපත්ති ද්වින්නං දුක්කටානං.
භික්ඛු කුටිං කරොති දෙසිතවත්ථුකං සාරම්භං සපරික්කමනං, ආපත්ති දුක්කටස්ස.
භික්ඛු කුටිං කරොති දෙසිතවත්ථුකං අනාරම්භං අපරික්කමනං, ආපත්ති දුක්කටස්ස.
භික්ඛු කුටිං කරොති දෙසිතවත්ථුකං අනාරම්භං සපරික්කමනං, අනාපත්ති.
භික්ඛු කුටිං කරොති පමාණාතික්කන්තං සාරම්භං අපරික්කමනං, ආපත්ති සඞ්ඝාදිසෙසෙන ද්වින්නං දුක්කටානං.
භික්ඛු කුටිං කරොති පමාණාතික්කන්තං සාරම්භං සපරික්කමනං, ආපත්ති සඞ්ඝාදිසෙසෙන දුක්කටස්ස.
භික්ඛු කුටිං කරොති පමාණාතික්කන්තං අනාරම්භං අපරික්කමනං, ආපත්ති සඞ්ඝාදිසෙසෙන දුක්කටස්ස.
භික්ඛු කුටිං කරොති පමාණාතික්කන්තං අනාරම්භං සපරික්කමනං, ආපත්ති සඞ්ඝාදිසෙසස්ස.
භික්ඛු කුටිං කරොති පමාණිකං සාරම්භං අපරික්කමනං, ආපත්ති ද්වින්නං දුක්කටානං.
භික්ඛු කුටිං කරොති පමාණිකං සාරම්භං සපරික්කමනං, ආපත්ති දුක්කටස්ස.
භික්ඛු කුටිං කරොති පමාණිකං අනාරම්භං අපරික්කමනං, ආපත්ති දුක්කටස්ස.
භික්ඛු කුටිං කරොති පමාණිකං අනාරම්භං සපරික්කමනං, අනාපත්ති.
භික්ඛු කුටිං කරොති අදෙසිතවත්ථුකං පමාණාතික්කන්තං සාරම්භං අපරික්කමනං, ආපත්ති ද්වින්නං සඞ්ඝාදිසෙසෙන ද්වින්නං දුක්කටානං.
භික්ඛු කුටිං කරොති අදෙසිතවත්ථුකං පමාණාතික්කන්තං සාරම්භං සපරික්කමනං, ආපත්ති ද්වින්නං සඞ්ඝාදිසෙසෙන දුක්කටස්ස.
භික්ඛු කුටිං කරොති අදෙසිතවත්ථුකං පමාණාතික්කන්තං අනාරම්භං අපරික්කමනං, ආපත්ති ද්වින්නං සඞ්ඝාදිසෙසෙන දුක්කටස්ස.
භික්ඛු කුටිං කරොති අදෙසිතවත්ථුකං පමාණාතික්කන්තං අනාරම්භං සපරික්කමනං, ආපත්ති ද්වින්නං සඞ්ඝාදිසෙසානං.
භික්ඛු කුටිං කරොති දෙසිතවත්ථුකං පමාණිකං සාරම්භං අපරික්කමනං, ආපත්ති ද්වින්නං දුක්කටානං.
භික්ඛු කුටිං කරොති දෙසිතවත්ථුකං පමාණිකං සාරම්භං සපරික්කමනං, ආපත්ති දුක්කටස්ස.
භික්ඛු කුටිං කරොති දෙසිතවත්ථුකං පමාණිකං අනාරම්භං අපරික්කමනං, ආපත්ති දුක්කටස්ස.
භික්ඛු කුටිං කරොති දෙසිතවත්ථුකං පමාණිකං අනාරම්භං සපරික්කමනං, අනාපත්ති.
2. භික්ඛු සමාදිසති කුටිං මෙ කරොථාති, තස්ස කුටිං කරොන්ති අදෙසිතවත්ථුකං සාරම්භං අපරික්කමනං, ආපත්ති සඞ්ඝාදිසෙසෙන ද්වින්නං දුක්කටානං -පෙ- සාරම්භං සපරික්කමනං. ආපත්ති සඞ්ඝාදිසෙසෙන දුක්කටස්ස -පෙ- අනාරම්භං අපරික්කමනං, ආපත්ති සඞ්ඝාදිසෙසෙන දුක්කටස්ස -පෙ- අනාරම්භං සපරික්කමනං, ආපත්ති සඞ්ඝාදිසෙසස්ස.
3. භික්ඛු සමාදිසති කුටිං මෙ කරොථාති, තස්ස කුටිං කරොන්ති දෙසිතවත්ථුකං සාරම්භං අපරික්කමනං, ආපත්ති ද්වින්නං දුක්කටානං -පෙ- සාරම්භං සපරික්කමනං, ආපත්ති දුක්කටස්ස -පෙ- අනාරම්භං අපරික්කමනං, ආපත්ති දුක්කටස්ස -පෙ- අනාරම්භං සපරික්කමනං, අනාපත්ති.
4. භික්ඛු සමාදිසති කුටිං මෙ කරොථාති. තස්ස කුටිං කරොන්ති පමාණාතික්කන්තං සාරම්භං අපරික්කමනං, ආපත්ති සඞ්ඝාදිසෙසෙන ද්වින්නං දුක්කටානං -පෙ- සාරම්භං සපරික්කමනං, ආපත්ති සඞ්ඝාදිසෙසෙන දුක්කටස්ස -පෙ- අනාරම්භං අපරික්කමනං, ආපත්ති සඞ්ඝාදිසෙසෙන දුක්කටස්ස -පෙ- අනාරම්භං සපරික්කමනං, ආපත්ති සඞ්ඝාදිසෙසස්ස.
5. භික්ඛු සමාදිසති කුටිං මෙ කරොථාති, තස්ස කුටිං කරොන්ති පමාණිකං සාරම්භං අපරික්කමනං, ආපත්ති ද්වින්නං දුක්කටානං -පෙ- සාරම්භං සපරික්කමනං, ආපත්ති දුක්කටස්ස -පෙ- අනාරම්භං අපරික්කමනං, ආපත්ති දුක්කටස්ස -පෙ- අනාරම්භං සපරික්කමනං, අනාපත්ති.
6. භික්ඛු සමාදිසති කුටිං මෙ කරොථාති. තස්ස කුටිං කරොන්ති අදෙසිතවත්ථුකං පමාණාතික්කන්තං සාරම්භං අපරික්කමනං, ආපත්ති ද්වින්නං සඞ්ඝාදිසෙසෙන ද්වින්නං දුක්කටානං -පෙ- සාරම්භං සපරික්කමනං, ආපත්ති ද්වින්නං සඞ්ඝාදිසෙසෙන දුක්කටස්ස -පෙ- අනාරම්භං අපරික්කමනං, ආපත්ති ද්වින්නං සඞ්ඝාදිසෙසෙන දුක්කටස්ස -පෙ- අනාරම්භං සපරික්කමනං, ආපත්ති ද්වින්නං සඞ්ඝාදිසෙසානං.
7. භික්ඛු සමාදිසති කුටිං මෙ කරොථාති. තස්ස කුටිං කරොන්ති දෙසිතවත්ථුකං පමාණිකං සාරම්භං අපරික්කමනං, ආපත්ති ද්වින්නං දුක්කටානං -පෙ- සාරම්භං සපරික්කමනං, ආපත්ති දුක්කටස්ස -පෙ- අනාරම්භං අපරික්කමනං, ආපත්ති දුක්කටස්ස -පෙ- අනාරම්භං සපරික්කමනං, අනාපත්ති.
8. භික්ඛු සමාදිසිත්වා පක්කමති කුටිං මෙ කරොථාති. න ච සමාදිසති දෙසිතවත්ථුකා ච හොතු අනාරම්භා ච සපරික්කමනා චාති. තස්ස කුටිං කරොන්ති අදෙසිතවත්ථුකං සාරම්භං අපරික්කමනං, ආපත්ති සඞ්ඝාදිසෙසෙන ද්වින්නං දුක්කටානං -පෙ- සාරම්භං සපරික්කමනං, ආපත්ති සඞ්ඝාදිසෙසෙන දුක්කටස්ස -පෙ- අනාරම්භං අපරික්කමනං, ආපත්ති සඞ්ඝාදිසෙසෙන දුක්කටස්ස -පෙ- අනාරම්භං සපරික්කමනං, ආපත්ති සඞ්ඝාදිසෙසස්ස.