75. තත්ර චෙ භික්ඛූනං එවං හොති: “අයං ඛො ආවුසො භික්ඛු සඞ්ඝෙන පටිසාරණීයකම්මකතො සම්මා වත්තති. ලොමං පාතෙති. නෙත්ථාරං වත්තති. පටිසාරණීයස්ස කම්මස්ස පටිප්පස්සද්ධිං යාචති. හන්දස්ස මයං පටිසාරණීයකම්මං පටිප්පස්සම්භෙමා”ති. තෙ තස්ස පටිසාරණීයකම්මං පටිප්පස්සම්භෙන්ති අධම්මෙන වග්ගා.
76. සො තම්හා ආවාසා අඤ්ඤං ආවාසං ගච්ඡති. තත්ථ භික්ඛූනං එවං හොති: “ඉමස්ස ඛො ආවුසො භික්ඛුනො සඞ්ඝෙන පටිසාරණීයකම්මං පටිප්පස්සද්ධං අධම්මෙන වග්ගෙහි. හන්දස්ස මයං පටිසාරණීයකම්මං පටිප්පස්සම්භෙමා”ති. තෙ තස්ස පටිසාරණීයකම්මං පටිප්පස්සම්භෙන්ති අධම්මෙන සමග්ගා. -පෙ- ධම්මෙන වග්ගා -පෙ- ධම්මපතිරූපකෙන වග්ගා. -පෙ- ධම්මපතිරූපකෙන සමග්ගා. චක්කං කාතබ්බං.
77. ඉධ පන, භික්ඛවෙ, භික්ඛු සඞ්ඝෙන ආපත්තියා අදස්සනෙ උක්ඛෙපනීයකම්මකතො සම්මා වත්තති. ලොමං පාතෙති. නෙත්ථාරං වත්තති. ආපත්තියා අදස්සනෙ උක්ඛෙපනීයස්ස කම්මස්ස පටිප්පස්සද්ධිං යාචති.
78. තත්ර චෙ භික්ඛූනං එවං හොති: “අයං ඛො ආවුසො භික්ඛු සඞ්ඝෙන ආපත්තියා අදස්සනෙ උක්ඛෙපනීයකම්මකතො සම්මා වත්තති. ලොමං පාතෙති. නෙත්ථාරං වත්තති. ආපත්තියා අදස්සනෙ උක්ඛෙපනීයස්ස කම්මස්ස පටිප්පස්සද්ධිං යාචති. හන්දස්ස මයං ආපත්තියා අදස්සනෙ උක්ඛෙපනීයකම්මං පටිප්පස්සම්භෙමා”ති. තෙ තස්ස ආපත්තියා අදස්සනෙ උක්ඛෙපනීයකම්මං පටිප්පස්සම්භෙන්ති අධම්මෙන වග්ගා.
79. සො තම්හා ආවාසා අඤ්ඤං ආවාසං ගච්ඡති. තත්ථ භික්ඛූනං එවං හොති: “ඉමස්ස ඛො ආවුසො භික්ඛුනො සඞ්ඝෙන ආපත්තියා අදස්සනෙ උක්ඛෙපනීයකම්මං පටිප්පස්සද්ධං අධම්මෙන වග්ගෙහි. හන්දස්ස මයං ආපත්තියා අදස්සනෙ උක්ඛෙපනීයකම්මං පටිප්පස්සම්භෙමා”ති. තෙ තස්ස ආපත්තියා අදස්සනෙ උක්ඛෙපනීයකම්මං පටිප්පස්සම්භෙන්ති අධම්මෙන සමග්ගා -පෙ- ධම්මෙන වග්ගා. -පෙ- ධම්මපතිරූපකෙන වග්ගා -පෙ- ධම්මපතිරූපකෙන සමග්ගා. චක්කං කාතබ්බං.
80. ඉධ පන භික්ඛවෙ, භික්ඛු සඞ්ඝෙන ආපත්තියා අප්පටිකම්මෙ උක්ඛෙපනීයකම්මකතො සම්මා වත්තති. ලොමං පාතෙති. නෙත්ථාරං වත්තති. ආපත්තියා අප්පටිකම්මෙ උක්ඛෙපනීයස්ස කම්මස්ස පටිප්පස්සද්ධිං යාචති.
81. තත්ර චෙ භික්ඛූනං එවං හොති: “අයං ඛො ආවුසො භික්ඛු සඞ්ඝෙන ආපත්තියා අප්පටිකම්මෙ උක්ඛෙපනීයකම්මකතො සම්මා වත්තති. ලොමං පාතෙති. නෙත්ථාරං වත්තති. ආපත්තියා අප්පටිකම්මෙ උක්ඛෙපනීයස්ස කම්මස්ස පටිප්පස්සද්ධිං යාචති. හන්දස්ස මයං ආපත්තියා අප්පටිකම්මෙ උක්ඛෙපනීයකම්මං පටිප්පස්සම්භෙමා”ති. තෙ තස්ස ආපත්තියා අප්පටිකම්මෙ උක්ඛෙපනීයකම්මං පටිප්පස්සම්භෙන්ති අධම්මෙන වග්ගා.
82. සො තම්හා ආවාසා අඤ්ඤං ආවාසං ගච්ඡති. තත්ථ භික්ඛූනං එවං හොති: “ඉමස්ස ඛො ආවුසො භික්ඛුනො සඞ්ඝෙන ආපත්තියා අප්පටිකම්මෙ උක්ඛෙපනීයකම්මං පටිප්පස්සද්ධං අධම්මෙන වග්ගෙහි. හන්දස්ස මයං ආපත්තියා අප්පටිකම්මෙ උක්ඛෙපනීයකම්මං පටිප්පස්සම්භෙමා”ති. තෙ තස්ස ආපත්තියා අප්පටිකම්මෙ උක්ඛෙපනීයකම්මං පටිප්පස්සම්භෙන්ති අධම්මෙන සමග්ගා. -පෙ- ධම්මෙන වග්ගා. -පෙ- ධම්මපතිරූපකෙන වග්ගා. -පෙ- ධම්මපතිරූපකෙන සමග්ගා. චක්කං කාතබ්බං.
83. ඉධ පන භික්ඛවෙ, භික්ඛු සඞ්ඝෙන පාපිකාය දිට්ඨියා අප්පටිනිස්සග්ගෙ උක්ඛෙපනීයකම්මකතො සම්මා වත්තති. ලොමං පාතෙති. නෙත්ථාරං වත්තති. පාපිකාය දිට්ඨියා අප්පටිනිස්සග්ගෙ උක්ඛෙපනීයස්ස කම්මස්ස පටිප්පස්සද්ධිං යාචති.
84. තත්ර චෙ භික්ඛූනං එවං හොති: “අයං ඛො ආවුසො භික්ඛු සඞ්ඝෙන පාපිකාය දිට්ඨියා අප්පටිනිස්සග්ගෙ උක්ඛෙපනීයකම්මකතො සම්මා වත්තති. ලොමං පාතෙති. නෙත්ථාරං වත්තති. පාපිකාය දිට්ඨියා අප්පටිනිස්සග්ගෙ උක්ඛෙපනීයස්ස කම්මස්ස පටිප්පස්සද්ධිං යාචති. හන්දස්ස මයං පාපිකාය දිට්ඨියා අප්පටිනිස්සග්ගෙ උක්ඛෙපනීයකම්මං පටිප්පස්සම්භෙමා”ති. තෙ තස්ස පාපිකාය දිට්ඨියා අප්පටිනිස්සග්ගෙ උක්ඛෙපනීයකම්මං පටිප්පස්සම්භෙන්ති අධම්මෙන වග්ගා.
85. සො තම්හා ආවාසා අඤ්ඤං ආවාසං ගච්ඡති. තත්ථ භික්ඛූනං එවං හොති: “ඉමස්ස ඛො ආවුසො භික්ඛුනො සඞ්ඝෙන පාපිකාය දිට්ඨියා අප්පටිනිස්සග්ගෙ උක්ඛෙපනීයකම්මං පටිප්පස්සද්ධං අධම්මෙන වග්ගෙහි. හන්දස්ස මයං පාපිකාය දිට්ඨියා අප්පටිනිස්සග්ගෙ උක්ඛෙපනීයකම්මං පටිප්පස්සම්භෙමා”ති. තෙ තස්ස පාපිකාය දිට්ඨියා අප්පටිනිස්සග්ගෙ උක්ඛෙපනීයකම්මං පටිප්පස්සම්භෙන්ති අධම්මෙන සමග්ගා. -පෙ- ධම්මෙන වග්ගා. -පෙ- ධම්මපතිරූපකෙන වග්ගා. -පෙ- ධම්මපතිරූපකෙන සමග්ගා. චක්කං කාතබ්බං.
86. ඉධ පන භික්ඛවෙ, භික්ඛු භණ්ඩනකාරකො හොති කලහකාරකො විවාදකාරකො භස්සකාරකො සඞ්ඝෙ අධිකරණකාරකො. තත්ර චෙ භික්ඛූනං එවං හොති: “අයං ඛො ආවුසො භික්ඛු භණ්ඩනකාරකො -පෙ- සඞ්ඝෙ අධිකරණකාරකො. හන්දස්ස මයං තජ්ජනීයකම්මං කරොමා”ති. තෙ තස්ස තජ්ජනීයකම්මං කරොන්ති අධම්මෙන වග්ගා.
87. තත්රට්ඨො සඞ්ඝො විවදති: “අධම්මෙන වග්ගකම්මං. අධම්මෙන සමග්ගකම්මං. ධම්මෙන වග්ගකම්මං. ධම්මපතිරූපකෙන වග්ගකම්මං. ධම්මපතිරූපකෙන සමග්ගකම්මං. අකතං කම්මං දුක්කතං කම්මං පුන කාතබ්බං කම්ම”න්ති.
88. තත්ර භික්ඛවෙ, යෙ තෙ භික්ඛූ එවමාහංසු: “අධම්මෙන වග්ගකම්ම”න්ති, යෙ ච තෙ භික්ඛූ එවමාහංසු: “අකතං කම්මං. දුක්කතං කම්මං. පුන කාතබ්බං කම්ම”න්ති, ඉමෙ තත්ථ භික්ඛූ ධම්මවාදිනො.
89. ඉධ පන භික්ඛවෙ, භික්ඛු භණ්ඩනකාරකො හොති -පෙ- සඞ්ඝෙ අධිකරණකාරකො. තත්ර චෙ භික්ඛූනං එවං හොති: “අයං ඛො ආවුසො භික්ඛු භණ්ඩනකාරකො -පෙ- සඞ්ඝෙ අධිකරණකාරකො. හන්දස්ස මයං තජ්ජනීයකම්මං කරොමා”ති. තෙ තස්ස තජ්ජනීයකම්මං කරොන්ති අධම්මෙන සමග්ගා.
90. තත්රට්ඨො සඞ්ඝො විවදති: “අධම්මෙන වග්ගකම්මං. අධම්මෙන සමග්ගකම්මං. ධම්මෙන වග්ගකම්මං. ධම්මපතිරූපකෙන වග්ගකම්මං. ධම්මපතිරූපකෙන සමග්ගකම්මං. අකතං කම්මං දුක්කතං කම්මං. පුන කාතබ්බං කම්ම”න්ති.
91. තත්ර භික්ඛවෙ, යෙ තෙ භික්ඛූ එවමාහංසු: “අධම්මෙන සමග්ගකම්ම’න්ති, යෙ ච තෙ භික්ඛූ එවමාහංසු: “අකතං කම්මං. දුක්කතං කම්මං. පුන කාතබ්බං කම්ම”න්ති, ඉමෙ තත්ථ භික්ඛූ ධම්මවාදිනො.
92. ඉධ පන භික්ඛවෙ, භික්ඛු භණ්ඩනකාරකො හොති. -පෙ- සඞ්ඝෙ අධිකරණකාරකො. තත්ර චෙ භික්ඛූනං එවං හොති: “අයං ඛො ආවුසො භික්ඛු භණ්ඩනකාරකො -පෙ- සඞ්ඝෙ අධිකරණකාරකො. හන්දස්ස මයං තජ්ජනීයකම්මං කරොමා”ති. තෙ තස්ස තජ්ජනීයකම්මං කරොන්ති– ධම්මෙන වග්ගා.
93. තත්රට්ඨො සඞ්ඝො විවදති: “අධම්මෙන වග්ගකම්මං. අධම්මෙන සමග්ගකම්මං. ධම්මෙන වග්ගකම්මං. ධම්මපතිරූපකෙන වග්ගකම්මං. ධම්මපතිරූපකෙන සමග්ගකම්මං. අකතං කම්මං දුක්කතං කම්මං පුන කාතබ්බං කම්ම”න්ති.
94. තත්ර භික්ඛවෙ, යෙ තෙ භික්ඛූ එවමාහංසු: “ධම්මෙන වග්ගකම්ම”න්ති, යෙ ච තෙ භික්ඛූ එවමාහංසු: “අකතං කම්මං දුක්කතං කම්මං පුන කාතබ්බං කම්ම”න්ති, ඉමෙ තත්ථ භික්ඛූ ධම්මවාදිනො.
95. ඉධ පන භික්ඛවෙ, භික්ඛු භණ්ඩනකාරකො හොති -පෙ- සඞ්ඝෙ අධිකරණකාරකො. තත්ර චෙ භික්ඛූනං එවං හොති: “අයං ඛො ආවුසො, භික්ඛු භණ්ඩනකාරකො -පෙ- සඞ්ඝෙ අධිකරණකාරකො. හන්දස්ස මයං තජ්ජනීයකම්මං කරොමා”ති. තෙ තස්ස තජ්ජනීයකම්මං කරොන්ති ධම්මපතිරූපකෙන වග්ගා.
96. තත්රට්ඨො සඞ්ඝො විවදති “අධම්මෙන වග්ගකම්මං. අධම්මෙන සමග්ගකම්මං. ධම්මෙන වග්ගකම්මං. ධම්මපතිරූපකෙන වග්ගකම්මං. ධම්මපතිරූපකෙන සමග්ගකම්මං. අකතං කම්මං දුක්කතං කම්මං පුන කාතබ්බං කම්ම”න්ති.
97. තත්ර භික්ඛවෙ, යෙ තෙ භික්ඛූ එවමාහංසු: “ධම්මපතිරූපකෙන සමග්ගකම්ම”න්ති{1}, යෙ ච තෙ භික්ඛූ එවමාහංසු: “අකතං කම්මං දුක්කතං කම්මං. පුන කාතබ්බං කම්ම”න්ති, ඉමෙ තත්ථ භික්ඛූ ධම්මවාදිනො.
98. ඉධ පන, භික්ඛවෙ, භික්ඛු භණ්ඩනකාරකො හොති -පෙ- සඞ්ඝෙ අධිකරණකාරකො. තත්ර චෙ භික්ඛූනං එවං හොති: “අයං ඛො ආවුසො භික්ඛු භණ්ඩනකාරකො හොති -පෙ- සඞ්ඝෙ අධිකරණකාරකො. හන්දස්ස මයං තජ්ජනීයකම්මං කරොමා”ති. තෙ තස්ස තජ්ජනීයකම්මං කරොන්ති ධම්මපතිරූපකෙන සමග්ගා.
99. තත්රට්ඨො සඞ්ඝො විවදති: “අධම්මෙන වග්ගකම්මං. අධම්මෙන සමග්ගකම්මං. ධම්මෙන වග්ගකම්මං. ධම්මපතිරූපකෙන වග්ගකම්මං. ධම්මපතිරූපකෙන සමග්ගකම්මං. අකතං කම්මං දුක්කතං කම්මං පුන කාතබ්බං කම්ම”න්ති.
100. තත්ර භික්ඛවෙ, යෙ තෙ භික්ඛූ එවමාහංසු: “ධම්මපතිරූපකෙන සමග්ගකම්ම”න්ති, යෙ ච තෙ භික්ඛූ එවමාහංසු: “අකතං කම්මං දුක්කතං කම්මං පුන කාතබ්බං කම්ම”න්ති, ඉමෙ තත්ථ භික්ඛූ ධම්මවාදිනො.
101. ඉධ පන භික්ඛවෙ, භික්ඛු බාලො හොති අව්යත්තො ආපත්තිබහුලො අනපදානො ගිහීසංසට්ඨො විහරති අනනුලොමිකෙහි ගිහිසංසග්ගෙහි. තත්ර චෙ භික්ඛූනං එවං හොති: “අයං ඛො ආවුසො භික්ඛු බාලො අව්යත්තො ආපත්තිබහුලො අනපදානො ගිහීසංසට්ඨො විහරති අනනුලොමිකෙහි ගිහීසංසග්ගෙහි. හන්දස්ස මයං නියස්සකම්මං කරොමා”ති. තෙ තස්ස නියස්සකම්මං කරොන්ති අධම්මෙන වග්ගා. -පෙ- අධම්මෙන සමග්ගා -පෙ- ධම්මෙන වග්ගා -පෙ- ධම්මපතිරූපකෙන වග්ගා -පෙ- ධම්මපතිරූපකෙන සමග්ගා. තත්රට්ඨො සඞ්ඝො විවදති: “අධම්මෙන වග්ගකම්මං. අධම්මෙන සමග්ගකම්මං. ධම්මෙන වග්ගකම්මං. ධම්මපතිරූපකෙන වග්ගකම්මං. ධම්මපතිරූපකෙන සමග්ගකම්මං. අකතං කම්මං. දුක්කතං කම්මං. පුන කාතබ්බං කම්ම”න්ති. තත්ර භික්ඛවෙ, යෙ තෙ භික්ඛූ එවමාහංසු: “ධම්මපතිරූපකෙන සමග්ගකම්ම”න්ති, යෙ ච තෙ භික්ඛූ එවමාහංසු: “අකතං කම්මං. දුක්කතං කම්මං පුන කාතබ්බං කම්ම”න්ති, ඉමෙ තත්ථ භික්ඛූ ධම්මවාදිනො. ඉමෙ පඤ්ච වාරා සංඛිත්තා.
102. ඉධ පන භික්ඛවෙ, භික්ඛු කුලදූසකො හොති පාපසමාචාරො. තත්ර චෙ භික්ඛූනං එවං හොති: “අයං ඛො ආවුසො භික්ඛු කුලදූසකො පාපසමාචාරො. හන්දස්ස මයං පබ්බාජනීයකම්මං කරොමා”ති. තෙ තස්ස පබ්බාජනීයකම්මං කරොන්ති අධම්මෙන වග්ගා. -පෙ- අධම්මෙන සමග්ගා -පෙ- ධම්මෙන වග්ගා. -පෙ- ධම්මපතිරූපකෙන වග්ගා -පෙ- ධම්මපතිරූපකෙන සමග්ගා. තත්රට්ඨො සඞ්ඝො විවදති: “අධම්මෙන වග්ගකම්මං. අධම්මෙන සමග්ගකම්මං. ධම්මෙන වග්ගකම්මං. ධම්මපතිරූපකෙන වග්ගකම්මං. ධම්මපතිරූපකෙන සමග්ගකම්මං. අකතං කම්මං දුක්කතං කම්මං පුන කාතබ්බං කම්ම”න්ති. තත්ර භික්ඛවෙ, යෙ තෙ භික්ඛූ එවමාහංසු: “ධම්මපතිරූපකෙන සමග්ගකම්ම”න්ති, යෙ ච තෙ භික්ඛූ එවමාහංසු: “අකතං කම්මං දුක්කතං කම්මං පුන කාතබ්බං කම්ම”න්ති, ඉමෙ තත්ථ භික්ඛූ ධම්මවාදිනො. ඉමෙ පඤ්ච වාරා සංඛිත්තා.
103. ඉධ පන, භික්ඛවෙ, භික්ඛු ගිහී අක්කොසති. පරිභාසති. තත්ර චෙ භික්ඛූනං එවං හොති: “අයං ඛො ආවුසො භික්ඛු ගිහී අක්කොසති පරිභාසති. හන්දස්ස මයං පටිසාරණීයකම්මං කරොමා”ති. තෙ තස්ස පටිසාරණීයකම්මං කරොන්ති අධම්මෙන වග්ගා. -පෙ- අධම්මෙන සමග්ගා -පෙ- ධම්මෙන වග්ගා -පෙ- ධම්මපතිරූපකෙන වග්ගා -පෙ- ධම්මපතිරූපකෙන සමග්ගා. තත්රට්ඨො සඞ්ඝො විවදති: “අධම්මෙන වග්ගකම්මං. අධම්මෙන සමග්ගකම්මං. ධම්මෙන වග්ගකම්මං. ධම්මපතිරූපකෙන වග්ගකම්මං. ධම්මපතිරූපකෙන සමග්ගකම්මං. අකතං කම්මං දුක්කතං කම්මං පුන කාතබ්බං කම්ම”න්ති. තත්ර භික්ඛවෙ, යෙ තෙ භික්ඛූ එවමාහංසු: “ධම්මපතිරූපකෙන සමග්ගකම්ම”න්ති, යෙ ච තෙ භික්ඛූ එවමාහංසු: “අකතං කම්මං දුක්කතං කම්මං පුන කාතබ්බං කම්ම”න්ති, ඉමෙ තත්ථ භික්ඛූ ධම්මවාදිනො. ඉමෙ පඤ්ච වාරා සංඛිත්තා.
104. ඉධ පන භික්ඛවෙ, භික්ඛු ආපත්තිං ආපජ්ජිත්වා න ඉච්ඡති ආපත්තිං පස්සිතුං. තත්ර චෙ භික්ඛූනං එවං හොති: “අයං ඛො ආවුසො භික්ඛු ආපත්තිං ආපජ්ජිත්වා න ඉච්ඡති ආපත්තිං පස්සිතුං. හන්දස්ස මයං ආපත්තියා අදස්සනෙ උක්ඛෙපනීයකම්මං කරොමා”ති. තෙ තස්ස ආපත්තියා අදස්සනෙ උක්ඛෙපනීයකම්මං කරොන්ති අධම්මෙන වග්ගා. -පෙ- අධම්මෙන සමග්ගා. -පෙ- ධම්මෙන වග්ගා. -පෙ- ධම්මපතිරූපකෙන වග්ගා. -පෙ- ධම්මපතිරූපකෙන සමග්ගා. තත්රට්ඨො සඞ්ඝො විවදති: “අධම්මෙන වග්ගකම්මං. අධම්මෙන සමග්ගකම්මං. ධම්මෙන වග්ගකම්මං. ධම්මපතිරූපකෙන වග්ගකම්මං. ධම්මපතිරූපකෙන සමග්ගකම්මං. අකතං කම්මං. දුක්කතං කම්මං. පුන කාතබ්බං කම්ම”න්ති. තත්ර භික්ඛවෙ, යෙ තෙ භික්ඛූ එවමාහංසු: “ධම්මපතිරූපකෙන සමග්ගකම්ම”න්ති, යෙ ච තෙ භික්ඛූ එවමාහංසු: “අකතං කම්මං. දුක්කතං කම්මං. පුන කාතබ්බං කම්ම”න්ති, ඉමෙ තත්ථ භික්ඛූ ධම්මවාදිනො. ඉමෙ පඤ්ච වාරා සංඛිත්තා.
105. ඉධ පන භික්ඛවෙ, භික්ඛු ආපත්තිං ආපජ්ජිත්වා න ඉච්ඡති ආපත්තිං පටිකාතුං. තත්ර චෙ භික්ඛූනං එවං හොති: “අයං ඛො ආවුසො භික්ඛු ආපත්තිං ආපජ්ජිත්වා න ඉච්ඡති ආපත්තිං පටිකාතුං. හන්දස්ස මයං ආපත්තියා අප්පටිකම්මෙ උක්ඛෙපනීයකම්මං කරොමා”ති. තෙ තස්ස ආපත්තියා අප්පටිකම්මෙ උක්ඛෙපනීයකම්මං කරොන්ති අධම්මෙන වග්ගා. -පෙ- අධම්මෙන සමග්ගා. -පෙ- ධම්මෙන වග්ගා. -පෙ- ධම්මපතිරූපකෙන වග්ගා. -පෙ- ධම්මපතිරූපකෙන සමග්ගා. තත්රට්ඨො සඞ්ඝො විවදති – “අධම්මෙන වග්ගකම්මං, අධම්මෙන සමග්ගකම්මං. ධම්මෙන වග්ගකම්මං. ධම්මපතිරූපකෙන වග්ගකම්මං. ධම්මපතිරූපකෙන සමග්ගකම්මං. අකතං කම්මං. දුක්කතං කම්මං. පුන කාතබ්බං කම්ම”න්ති. තත්ර භික්ඛවෙ, යෙ තෙ භික්ඛූ එවමාහංසු: “ධම්මපතිරූපකෙන සමග්ගකම්ම”න්ති, යෙ ච තෙ භික්ඛූ එවමාහංසු: “අකතං කම්මං. දුක්කතං කම්මං. පුන කාතබ්බං කම්ම”න්ති, ඉමෙ තත්ථ භික්ඛූ ධම්මවාදිනො. ඉමෙ පඤ්ච වාරා සංඛිත්තා.
106. ඉධ පන භික්ඛවෙ, භික්ඛු න ඉච්ඡති පාපිකං දිට්ඨිං පටිනිස්සජ්ජිතුං. තත්ර චෙ භික්ඛූනං එවං හොති: “අයං ඛො ආවුසො භික්ඛු න ඉච්ඡති පාපිකං දිට්ඨිං පටිනිස්සජ්ජිතුං. හන්දස්ස මයං පාපිකාය දිට්ඨියා අප්පටිනිස්සග්ගෙ උක්ඛෙපනීයකම්මං කරොමා”ති. තෙ තස්ස පාපිකාය දිට්ඨියා අප්පටිනිස්සග්ගෙ උක්ඛෙපනීයකම්මං කරොන්ති අධම්මෙන වග්ගා. -පෙ- අධම්මෙන සමග්ගා. -පෙ- ධම්මෙන වග්ගා. -පෙ- ධම්මපතිරූපකෙන වග්ගා. -පෙ- ධම්මපතිරූපකෙන සමග්ගා. තත්රට්ඨො සඞ්ඝො විවදති: “අධම්මෙන වග්ගකම්මං. අධම්මෙන සමග්ගකම්මං. ධම්මෙන වග්ගකම්මං. ධම්මපතිරූපකෙන වග්ගකම්මං. ධම්මපතිරූපකෙන සමග්ගකම්මං. අකතං කම්මං. දුක්කතං කම්මං. පුන කාතබ්බං කම්ම”න්ති. තත්ර භික්ඛවෙ, යෙ තෙ භික්ඛූ එවමාහංසු: “ධම්මපතිරූපකෙන සමග්ගකම්ම”න්ති. යෙ ච තෙ භික්ඛූ එවමාහංසු: “අකතං කම්මං දුක්කතං කම්මං පුන කාතබ්බං කම්ම”න්ති, ඉමෙ තත්ථ භික්ඛූ ධම්මවාදිනො. ඉමෙ පඤ්ච වාරා සංඛිත්තා.
107. ඉධ පන භික්ඛවෙ, භික්ඛු සඞ්ඝෙන තජ්ජනීයකම්මකතො සම්මා වත්තති. ලොමං පාතෙති. නෙත්ථාරං වත්තති. තජ්ජනීයස්ස කම්මස්ස පටිප්පස්සද්ධිං යාචති. තත්ර චෙ භික්ඛූනං එවං හොති: “අයං ඛො ආවුසො භික්ඛු සඞ්ඝෙන තජ්ජනීයකම්මකතො සම්මා වත්තති. ලොමං පාතෙති. නෙත්ථාරං වත්තති. තජ්ජනීයස්ස කම්මස්ස පටිප්පස්සද්ධිං යාචති. හන්දස්ස මයං තජ්ජනීයකම්මං පටිප්පස්සම්භෙමා”ති. තෙ තස්ස තජ්ජනීයකම්මං පටිප්පස්සම්භෙන්ති අධම්මෙන වග්ගා. තත්රට්ඨො සඞ්ඝො විවදති: “අධම්මෙන වග්ගකම්මං. අධම්මෙන සමග්ගකම්මං. ධම්මෙන වග්ගකම්මං. ධම්මපතිරූපකෙන වග්ගකම්මං. ධම්මපතිරූපකෙන සමග්ගකම්මං. අකතං කම්මං. දුක්කතං කම්මං. පුන කාතබ්බං කම්ම”න්ති. තත්ර භික්ඛවෙ, යෙ තෙ භික්ඛූ එවමාහංසු: “අධම්මෙන වග්ගකම්ම”න්ති. යෙ ච තෙ භික්ඛූ එවමාහංසු: “අකතං කම්මං. දුක්කතං කම්මං. පුන කාතබ්බං කම්ම”න්ති. ඉමෙ තත්ථ භික්ඛූ ධම්මවාදිනො.
108. ඉධ පන භික්ඛවෙ, භික්ඛු සඞ්ඝෙන තජ්ජනීයකම්මකතො සම්මා වත්තති. ලොමං පාතෙති. නෙත්ථාරං වත්තති. තජ්ජනීයස්ස කම්මස්ස පටිප්පස්සද්ධිං යාචති. තත්ර චෙ භික්ඛූනං එවං හොති: “අයං ඛො ආවුසො භික්ඛු සඞ්ඝෙන තජ්ජනීයකම්මකතො සම්මා වත්තති. ලොමං පාතෙති. නෙත්ථාරං වත්තති. තජ්ජනීයස්ස කම්මස්ස පටිප්පස්සද්ධිං යාචති. හන්දස්ස මයං තජ්ජනීයකම්මං පටිප්පස්සම්භෙමා”ති. තෙ තස්ස තජ්ජනීයකම්මං පටිප්පස්සම්භෙන්ති අධම්මෙන සමග්ගා. තත්රට්ඨො සඞ්ඝො විවදති: “අධම්මෙන වග්ගකම්මං. අධම්මෙන සමග්ගකම්මං. ධම්මෙන වග්ගකම්මං. ධම්මපතිරූපකෙන වග්ගකම්මං. ධම්මපතිරූපකෙන සමග්ගකම්මං. අකතං කම්මං. දුක්කතං කම්මං. පුන කාතබ්බං කම්ම”න්ති. තත්ර භික්ඛවෙ, යෙ තෙ භික්ඛූ එවමාහංසු: “අධම්මෙන සමග්ගකම්ම”න්ති, යෙ ච තෙ භික්ඛූ එවමාහංසු: “අකතං කම්මං. දුක්කතං කම්මං. පුන කාතබ්බං කම්ම”න්ති, ඉමෙ තත්ථ භික්ඛූ ධම්මවාදිනො.
109. ඉධ පන භික්ඛවෙ, භික්ඛු සඞ්ඝෙන තජ්ජනීයකම්මකතො සම්මා වත්තති. ලොමං පාතෙති. නෙත්ථාරං වත්තති. තජ්ජනීයස්ස කම්මස්ස පටිප්පස්සද්ධිං යාචති. තත්ර චෙ භික්ඛූනං එවං හොති: “අයං ඛො ආවුසො භික්ඛු සඞ්ඝෙන තජ්ජනීයකම්මකතො සම්මා වත්තති. ලොමං පාතෙති. නෙත්ථාරං වත්තති. තජ්ජනීයස්ස කම්මස්ස පටිප්පස්සද්ධිං යාචති. හන්දස්ස මයං තජ්ජනීයකම්මං පටිප්පස්සම්භෙමා”ති. තෙ තස්ස තජ්ජනීයකම්මං පටිප්පස්සම්භෙන්ති ධම්මෙන වග්ගා. තත්රට්ඨො සඞ්ඝො විවදති: “අධම්මෙන වග්ගකම්මං. අධම්මෙන සමග්ගකම්මං. ධම්මෙන වග්ගකම්මං. ධම්මපතිරූපකෙන වග්ගකම්මං. ධම්මපතිරූපකෙන සමග්ගකම්මං. අකතං කම්මං. දුක්කතං කම්මං. පුන කාතබ්බං කම්ම”න්ති. තත්ර භික්ඛවෙ, යෙ තෙ භික්ඛූ එවමාහංසු: “ධම්මෙන වග්ගකම්ම”න්ති, යෙ ච තෙ භික්ඛූ එවමාහංසු: “අකතං කම්මං. දුක්කතං කම්මං පුන කාතබ්බං කම්ම”න්ති, ඉමෙ තත්ථ භික්ඛූ ධම්මවාදිනො.
110. ඉධ පන භික්ඛවෙ, භික්ඛු සඞ්ඝෙන තජ්ජනීයකම්මකතො සම්මා වත්තති. ලොමං පාතෙති. නෙත්ථාරං වත්තති. තජ්ජනීයස්ස කම්මස්ස පටිප්පස්සද්ධිං යාචති. තත්ර චෙ භික්ඛූනං එවං හොති: “අයං ඛො ආවුසො භික්ඛු සඞ්ඝෙන තජ්ජනීයකම්මකතො සම්මා වත්තති. ලොමං පාතෙති. නෙත්ථාරං වත්තති. තජ්ජනීයස්ස කම්මස්ස පටිප්පස්සද්ධිං යාචති. හන්දස්ස මයං තජ්ජනීයකම්මං පටිප්පස්සම්භෙමා”ති. තෙ තස්ස තජ්ජනීයකම්මං පටිප්පස්සම්භෙන්ති ධම්මපතිරූපකෙන වග්ගා. තත්රට්ඨො සඞ්ඝො විවදති: “අධම්මෙන වග්ගකම්මං. අධම්මෙන සමග්ගකම්මං. ධම්මෙන වග්ගකම්මං. ධම්මපතිරූපකෙන වග්ගකම්මං. ධම්මපතිරූපකෙන සමග්ගකම්මං. අකතං කම්මං. දුක්කතං කම්මං. පුන කාතබ්බං කම්ම”න්ති. තත්ර භික්ඛවෙ, යෙ තෙ භික්ඛූ එවමාහංසු: “ධම්මපතිරූපකෙන වග්ගකම්ම”න්ති, යෙ ච තෙ භික්ඛූ එවමාහංසු: “අකතං කම්මං. දුක්කතං කම්මං. පුන කාතබ්බං කම්ම”න්ති, ඉමෙ තත්ථ භික්ඛූ ධම්මවාදිනො.
111. ඉධ පන භික්ඛවෙ, භික්ඛු සඞ්ඝෙන තජ්ජනීයකම්මකතො සම්මා වත්තති. ලොමං පාතෙති. නෙත්ථාරං වත්තති. තජ්ජනීයස්ස කම්මස්ස පටිප්පස්සද්ධිං යාචති. තත්ර චෙ භික්ඛූනං එවං හොති: “අයං ඛො ආවුසො භික්ඛු සඞ්ඝෙන තජ්ජනීයකම්මකතො සම්මා වත්තති. ලොමං පාතෙති. නෙත්ථාරං වත්තති. තජ්ජනීයස්ස කම්මස්ස පටිප්පස්සද්ධිං යාචති. හන්දස්ස මයං තජ්ජනීයකම්මං පටිප්පස්සම්භෙමා”ති. තෙ තස්ස තජ්ජනීයකම්මං පටිප්පස්සම්භෙන්ති ධම්මපතිරූපකෙන සමග්ගා. තත්රට්ඨො සඞ්ඝො විවදති: “අධම්මෙන වග්ගකම්මං. අධම්මෙන සමග්ගකම්මං. ධම්මෙන වග්ගකම්මං. ධම්මපතිරූපකෙන වග්ගකම්මං. ධම්මපතිරූපකෙන සමග්ගකම්මං. අකතං කම්මං. දුක්කතං කම්මං. පුන කාතබ්බං කම්ම”න්ති. තත්ර භික්ඛවෙ, යෙ තෙ භික්ඛූ එවමාහංසු: “ධම්මපතිරූපකෙන සමග්ගකම්ම”න්ති, යෙ ච තෙ භික්ඛූ එවමාහංසු: “අකතං කම්මං. දුක්කතං කම්මං. පුන කාතබ්බං කම්ම”න්ති, ඉමෙ තත්ථ භික්ඛූ ධම්මවාදිනො.
112. ඉධ පන භික්ඛවෙ, භික්ඛු සඞ්ඝෙන නියස්සකම්මකතො සම්මා වත්තති. ලොමං පාතෙති. නෙත්ථාරං වත්තති. නියස්සස්ස කම්මස්ස පටිප්පස්සද්ධිං යාචති. තත්ර චෙ භික්ඛූනං එවං හොති: “අයං ඛො ආවුසො, භික්ඛු සඞ්ඝෙන නියස්සකම්මකතො සම්මා වත්තති. ලොමං පාතෙති. නෙත්ථාරං වත්තති. නියස්සස්ස කම්මස්ස පටිප්පස්සද්ධිං යාචති. හන්දස්ස මයං නියස්සකම්මං පටිප්පස්සම්භෙමා”ති. තෙ තස්ස නියස්සකම්මං පටිප්පස්සම්භෙන්ති අධම්මෙන වග්ගා. -පෙ- අධම්මෙන සමග්ගා. -පෙ- ධම්මෙන වග්ගා. -පෙ- ධම්මපතිරූපකෙන වග්ගා -පෙ- ධම්මපතිරූපකෙන සමග්ගා. තත්රට්ඨො සඞ්ඝො විවදති: “අධම්මෙන වග්ගකම්මං. අධම්මෙන සමග්ගකම්මං. ධම්මෙන වග්ගකම්මං. ධම්මපතිරූපකෙන වග්ගකම්මං. ධම්මපතිරූපකෙන සමග්ගකම්මං. අකතං කම්මං. දුක්කතං කම්මං. පුන කාතබ්බං කම්ම”න්ති. තත්ර භික්ඛවෙ, යෙ තෙ භික්ඛූ එවමාහංසු: “ධම්මපතිරූපකෙන සමග්ගකම්ම”න්ති, යෙ ච තෙ භික්ඛූ එවමාහංසු: “අකතං කම්මං. දුක්කතං කම්මං. පුන කාතබ්බං කම්ම”න්ති, ඉමෙ{1} තත්ථ භික්ඛූ ධම්මවාදිනො. ඉමෙ පඤ්ච වාරා සංඛිත්තා.
113. ඉධ පන භික්ඛවෙ, භික්ඛු සඞ්ඝෙන පබ්බාජනීයකම්මකතො සම්මා වත්තති. ලොමං පාතෙති. නෙත්ථාරං වත්තති. පබ්බාජනීයස්ස කම්මස්ස පටිප්පස්සද්ධිං යාචති. තත්ර චෙ භික්ඛූනං එවං හොති: “අයං ඛො ආවුසො භික්ඛු සඞ්ඝෙන පබ්බාජනීයකම්මකතො සම්මා වත්තති. ලොමං පාතෙති. නෙත්ථාරං වත්තති. පබ්බාජනීයස්ස කම්මස්ස පටිප්පස්සද්ධිං යාචති. හන්දස්ස මයං පබ්බාජනීයකම්මං පටිප්පස්සම්භෙමා”ති. තෙ තස්ස පබ්බාජනීයකම්මං පටිප්පස්සම්භෙන්ති අධම්මෙන වග්ගා. -පෙ- අධම්මෙන සමග්ගා. -පෙ- ධම්මෙන වග්ගා. -පෙ- ධම්මපතිරූපකෙන වග්ගා. -පෙ- ධම්මපතිරූපකෙන සමග්ගා. තත්රට්ඨො සඞ්ඝො විවදති: “අධම්මෙන වග්ගකම්මං. අධම්මෙන සමග්ගකම්මං. ධම්මෙන වග්ගකම්මං. ධම්මපතිරූපකෙන වග්ගකම්මං. ධම්මපතිරූපකෙන සමග්ගකම්මං. අකතං කම්මං. දුක්කතං කම්මං. පුන කාතබ්බං කම්ම”න්ති. තත්ර භික්ඛවෙ, යෙ තෙ භික්ඛූ එවමාහංසු: “ධම්මපතිරූපකෙන සමග්ගකම්ම”න්ති, යෙ ච තෙ භික්ඛූ එවමාහංසු: “අකතං කම්මං දුක්කතං කම්මං පුන කාතබ්බං කම්ම”න්ති. ඉමෙ තත්ථ භික්ඛූ ධම්මවාදිනො. ඉමෙපි පඤ්ච වාරා සංඛිත්තා.
114. ඉධ පන භික්ඛවෙ, භික්ඛු සඞ්ඝෙන පටිසාරණීයකම්මකතො සම්මා වත්තති. ලොමං පාතෙති. නෙත්ථාරං වත්තති. පටිසාරණීයස්ස කම්මස්ස පටිප්පස්සද්ධිං යාචති. තත්ර චෙ භික්ඛූනං එවං හොති: “අයං ඛො ආවුසො භික්ඛු සඞ්ඝෙන පටිසාරණීයකම්මකතො සම්මා වත්තති. ලොමං පාතෙති. නෙත්ථාරං වත්තති. පටිසාරණීයස්ස කම්මස්ස පටිප්පස්සද්ධිං යාචති. හන්දස්ස මයං පටිසාරණීයකම්මං පටිප්පස්සම්භෙමා”ති. තෙ තස්ස පටිසාරණීයකම්මං පටිප්පස්සම්භෙන්ති අධම්මෙන වග්ගා. -පෙ- අධම්මෙන සමග්ගා. -පෙ- ධම්මෙන වග්ගා. -පෙ- ධම්මපතිරූපකෙන වග්ගා. -පෙ- ධම්මපතිරූපකෙන සමග්ගා. තත්රට්ඨො සඞ්ඝො විවදති: “අධම්මෙන වග්ගකම්මං. අධම්මෙන සමග්ගකම්මං. ධම්මෙන වග්ගකම්මං. ධම්මපතිරූපකෙන වග්ගකම්මං. ධම්මපතිරූපකෙන සමග්ගකම්මං. අකතං කම්මං. දුක්කතං කම්මං. පුන කාතබ්බං කම්ම”න්ති. තත්ර භික්ඛවෙ, යෙ තෙ භික්ඛූ එවමාහංසු: “ධම්මපතිරූපකෙන සමග්ගකම්ම”න්ති, යෙ ච තෙ භික්ඛූ එවමාහංසු: “අකතං කම්මං. දුක්කතං කම්මං. පුන කාතබ්බං කම්ම”න්ති, ඉමෙ තත්ථ භික්ඛූ ධම්මවාදිනො. ඉමෙ පඤ්ච වාරා සංඛිත්තා.
115. ඉධ පන භික්ඛවෙ, භික්ඛු සඞ්ඝෙන ආපත්තියා අදස්සනෙ උක්ඛෙපනීයකම්මකතො සම්මා වත්තති. ලොමං පාතෙති. නෙත්ථාරං වත්තති. ආපත්තියා අදස්සනෙ උක්ඛෙපනීයස්ස කම්මස්ස පටිප්පස්සද්ධිං යාචති. තත්ර චෙ භික්ඛූනං එවං හොති: “අයං ඛො ආවුසො භික්ඛු සඞ්ඝෙන ආපත්තියා අදස්සනෙ උක්ඛෙපනීයකම්මකතො සම්මා වත්තති. ලොමං පාතෙති. නෙත්ථාරං වත්තති. ආපත්තියා අදස්සනෙ උක්ඛෙපනීයස්ස කම්මස්ස පටිප්පස්සද්ධිං යාචති. හන්දස්ස මයං ආපත්තියා අදස්සනෙ උක්ඛෙපනීයකම්මං පටිප්පස්සම්භෙමා”ති. තෙ තස්ස ආපත්තියා අදස්සනෙ උක්ඛෙපනීයකම්මං පටිප්පස්සම්භෙන්ති – අධම්මෙන වග්ගා. -පෙ- අධම්මෙන සමග්ගා -පෙ- ධම්මෙන වග්ගා -පෙ- ධම්මපතිරූපකෙන වග්ගා -පෙ- ධම්මපතිරූපකෙන සමග්ගා. තත්රට්ඨො සඞ්ඝො විවදති: “අධම්මෙන වග්ගකම්මං. අධම්මෙන සමග්ගකම්මං. ධම්මෙන වග්ගකම්මං. ධම්මපතිරූපකෙන වග්ගකම්මං. ධම්මපතිරූපකෙන සමග්ගකම්මං. අකතං කම්මං. දුක්කතං කම්මං. පුන කාතබ්බං කම්ම”න්ති. තත්ර භික්ඛවෙ, යෙ තෙ භික්ඛූ එවමාහංසු: “ධම්මපතිරූපකෙන සමග්ගකම්ම”න්ති, යෙ ච තෙ භික්ඛූ එවමාහංසු: “අකතං කම්මං. දුක්කතං කම්මං. පුන කාතබ්බං කම්ම”න්ති, ඉමෙ තත්ථ භික්ඛූ ධම්මවාදිනො. ඉමෙ පඤ්ච වාරා සංඛිත්තා.
116. ඉධ පන භික්ඛවෙ, භික්ඛු සඞ්ඝෙන ආපත්තියා අප්පටිකම්මෙ උක්ඛෙපනීයකම්මකතො සම්මා වත්තති, ලොමං පාතෙති. නෙත්ථාරං වත්තති. ආපත්තියා අප්පටිකම්මෙ උක්ඛෙපනීයස්ස කම්මස්ස පටිප්පස්සද්ධිං යාචති. තත්ර චෙ භික්ඛූනං එවං හොති: “අයං ඛො ආවුසො භික්ඛු සඞ්ඝෙන ආපත්තියා අප්පටිකම්මෙ උක්ඛෙපනීයකම්මකතො සම්මා වත්තති. ලොමං පාතෙති. නෙත්ථාරං වත්තති. ආපත්තියා අප්පටිකම්මෙ උක්ඛෙපනීයස්ස කම්මස්ස පටිප්පස්සද්ධිං යාචති. හන්දස්ස මයං ආපත්තියා අප්පටිකම්මෙ උක්ඛෙපනීයකම්මං පටිප්පස්සම්භෙමා”ති. තෙ තස්ස ආපත්තියා අප්පටිකම්මෙ උක්ඛෙපනීයකම්මං පටිප්පස්සම්භෙන්ති අධම්මෙන වග්ගා -පෙ- අධම්මෙන සමග්ගා -පෙ- ධම්මෙන වග්ගා -පෙ- ධම්මපතිරූපකෙන වග්ගා -පෙ- ධම්මපතිරූපකෙන සමග්ගා. තත්රට්ඨො සඞ්ඝො විවදති: “අධම්මෙන වග්ගකම්මං. අධම්මෙන සමග්ගකම්මං. ධම්මෙන වග්ගකම්මං. ධම්මපතිරූපකෙන වග්ගකම්මං. ධම්මපතිරූපකෙන සමග්ගකම්මං. අකතං කම්මං. දුක්කතං කම්මං. පුන කාතබ්බං කම්ම”න්ති. තත්ර භික්ඛවෙ, යෙ තෙ භික්ඛූ එවමාහංසු: “ධම්මපතිරූපකෙන සමග්ගකම්ම”න්ති, යෙ ච තෙ භික්ඛූ එවමාහංසු: “අකතං කම්මං. දුක්කතං කම්මං. පුන කාතබ්බං කම්ම”න්ති, ඉමෙ තත්ථ භික්ඛූ ධම්මවාදිනො. ඉමෙ පඤ්ච වාරා සංඛිත්තා.
117. ඉධ පන භික්ඛවෙ, භික්ඛු සඞ්ඝෙන පාපිකාය දිට්ඨියා අප්පටිනිස්සග්ගෙ උක්ඛෙපනීයකම්මකතො සම්මා වත්තති. ලොමං පාතෙති. නෙත්ථාරං වත්තති. පාපිකාය දිට්ඨියා අප්පටිනිස්සග්ගෙ උක්ඛෙපනීයස්ස කම්මස්ස පටිප්පස්සද්ධිං යාචති. තත්ර චෙ භික්ඛූනං එවං හොති “අයං ඛො ආවුසො භික්ඛු සඞ්ඝෙන පාපිකාය දිට්ඨියා අප්පටිනිස්සග්ගෙ උක්ඛෙපනීයකම්මකතො සම්මා වත්තති. ලොමං පාතෙති. නෙත්ථාරං වත්තති. පාපිකාය දිට්ඨියා අප්පටිනිස්සග්ගෙ උක්ඛෙපනීයස්ස කම්මස්ස පටිප්පස්සද්ධිං යාචති. හන්දස්ස මයං පාපිකාය දිට්ඨියා අප්පටිනිස්සග්ගෙ උක්ඛෙපනීයකම්මං පටිප්පස්සම්භෙමා”ති. තෙ තස්ස පාපිකාය දිට්ඨියා අප්පටිනිස්සග්ගෙ උක්ඛෙපනීයකම්මං පටිප්පස්සම්භෙන්ති අධම්මෙන වග්ගා. -පෙ- අධම්මෙන සමග්ගා. -පෙ- ධම්මෙන වග්ගා. -පෙ- ධම්මපතිරූපකෙන වග්ගා. -පෙ- ධම්මපතිරූපකෙන සමග්ගා. තත්රට්ඨො සඞ්ඝො විවදති: “අධම්මෙන වග්ගකම්මං. අධම්මෙන සමග්ගකම්මං. ධම්මෙන වග්ගකම්මං. ධම්මපතිරූපකෙන වග්ගකම්මං. ධම්මපතිරූපකෙන සමග්ගකම්මං. අකතං කම්මං. දුක්කතං කම්මං. පුන කාතබ්බං කම්ම”න්ති. තත්ර භික්ඛවෙ, යෙ තෙ භික්ඛූ එවමාහංසු: “ධම්මපතිරූපකෙන සමග්ගකම්ම”න්ති, යෙ ච තෙ භික්ඛූ එවමාහංසු: “අකතං කම්මං. දුක්කතං කම්මං. පුන කාතබ්බං කම්ම”න්ති, ඉමෙ තත්ථ භික්ඛූ ධම්මවාදිනො. ඉමෙ පඤ්ච වාරා සංඛිත්තා.
චම්පෙය්යක්ඛන්ධකො නිට්ඨිතො නවමො.
ඉමෙහි ඛන්ධකෙ වත්ථූනි ඡත්තිංස.
තස්ස උද්දානං:
1. චම්පායං භගවා ආසි වත්ථු වාසභගාමකෙ, ආගන්තුකානං උස්සුක්කං අකාසි ඉච්ඡිතබ්බකෙ{1}.
2. පකතඤ්ඤුනොති ඤත්වා උස්සුක්කං න කරී තදා, උක්ඛිත්තො න කරොතීති සාගමා{2} ජිනසන්තිකෙ.
3. අධම්මෙන වග්ගකම්මං සමග්ගං අධම්මෙන ච, ධම්මෙන වග්ගකම්මඤ්ච පතිරූපකෙන වග්ගකං.
4. පතිරූපකෙන සමග්ගං එකො උක්ඛිපතෙකකං, එකො ච ද්වෙ සම්බහුලෙ සඞ්ඝං උක්ඛිපතෙකකො.
5. දුවෙපි සම්බහුලාපි සඞ්ඝො සඞ්ඝඤ්ච උක්ඛිපි, සබ්බඤ්ඤූ පවරො සුත්වා අධම්මන්ති පටික්ඛිපි.
6. ඤත්තිවිපන්නං යං කම්මං සම්පන්නං අනුසාවණං, අනුස්සාවනවිපන්නං සම්පුණ්ණං ඤත්තියා ච යං.
7. උභයෙන විපන්නඤ්ච අඤ්ඤත්ර ධම්මමෙව ච, විනයා සත්ථු පටිකුට්ඨං කුප්පං අට්ඨානාරහිකං.
8. අධම්මවග්ගං සාමග්ගිං{1} පතිරූපානි යෙ දුවෙ, ධම්මෙනෙව ච සාමග්ගිං අනුඤ්ඤාසි තථාගතො.
9. චතුවග්ගො පඤ්චවග්ගො දසවග්ගො ච වීසති” පරො වීසතිවග්ගො ච{2} සඞ්ඝො පඤ්චවිධො තථා.
10. ඨපෙත්වා උපසම්පදං යඤ්ච කම්මං පවාරණං, අබ්භානකම්මෙන සහ චතුවග්ගෙහි කම්මිකො.
11. දුවෙ කම්මෙ ඨපෙත්වාන මජ්ඣදෙසූපසම්පදං{3}, අබ්භානං පඤ්චවග්ගිකො සබ්බකම්මෙසු කම්මිකො.
12. අබ්භානෙකං ඨපෙත්වාන යෙ භික්ඛූ දසවග්ගිකා{4}, සබ්බකම්මකරො සඞ්ඝො වීසො සබ්බත්ථ කම්මිකො.
13. භික්ඛුනී සික්ඛමානා ච සාමණෙරො සාමණෙරිකා{5}, පච්චක්ඛාතන්තිමවත්ථු{6} උක්ඛිත්තාපත්තිදස්සනෙ.
14. අප්පටිකම්මෙ දිට්ඨියා පණ්ඩකථෙය්යසංවාසකං{7}, තිත්ථියතිරච්ඡානගතං{8} මාතු ච පිතුඝාතකං{9}.
15. අරහං භික්ඛුනීදූසිං{10} භෙදකං ලොහිතුප්පාදකං{11}, බ්යඤ්ජනං නානාසංවාසං{12} නානාසීමාය ඉද්ධියා.
16. යස්ස සඞ්ඝො කරෙ කම්මං හොන්තෙ තෙ චතුවීසති. සම්බුද්ධෙන පටික්ඛිත්තා{13} න හෙතෙ ගණපූරකා.
17. පාරිවාසිකචතුත්ථො පරිවාසං දදෙය්ය වා, මූලා මානත්තං අබ්භෙය්ය අකම්මං න ච කාරණං{14}.
18. මූලා අරහමානත්තා අබ්භානාරහමෙව ච, න කම්මකාරකා{15} පඤ්ච සම්බුද්ධෙන පකාසිතා.
19. භික්ඛුනී සික්ඛමානා ච සාමණෙරො සාමණෙරිකා, පච්චක්ඛන්තිම උම්මත්තා ඛිත්තවෙදනදස්සනෙ{16}.
20. අප්පටිකම්මෙ දිට්ඨියා පණ්ඩකා චෙව{1} බ්යඤ්ජනා, නානාසංවාසකා සීමා වෙහාසං යස්ස කම්ම ච.
21. අට්ඨාරසන්නං එතෙසං, පටික්කොසං න රූහති, භික්ඛුස්ස පකතත්තස්ස රූහති පටික්කොසනා.
22. සුද්ධස්ස දුන්නිසාරිතො බාලො හි සුනිස්සාරිතො, පණ්ඩකො ථෙය්යසංවාසො පක්කන්තො තිරච්ඡානගතො.
23. මාතු පිතු අරහන්ත දූසකො සඞ්ඝභෙදකො, ලොහිතුප්පාදකො චෙව උභතොබ්යඤ්ජනො ච යො.
24. එකාදසන්නං එතෙසං ඔසාරණං න යුජ්ජති, හත්ථපාදං{2} තදුභයං කණ්ණනාසං තදූභයං.
25. අඞ්ගුලි අළකණ්ඩරං ඵණං ඛුජ්ජො ච වාමනො, ගණ්ඩී ලක්ඛණකසා ච ලිඛිතකො ච සීපදී.
26. පාපාපරිස කාණො ච{3} කුණී ඛඤ්ජො හතොපි ච, ඉරියාපථදුබ්බලො අන්ධො මූගො ච බධිරො{4}.
27. අන්ධමූගො අන්ධබධිරො{5} මූගබධිරමෙව ච, අන්ධමූගබධිරො ච ද්වත්තිංසෙතෙ අනූනකා{6}.
28. තෙසං ඔසාරණං හොති සම්බුද්ධෙන පකාසිතං, දට්ඨබ්බා පටිකාතබ්බා නිස්සජෙතා{7} න විජ්ජති.
29. තස්ස උක්ඛෙපනා කම්මා සත්ත හොන්ති අධම්මිකා, ආපන්නං අනුවත්තන්තං සත්තෙතෙපි{8} අධම්මිකා.
30. ආපන්නං නානුවත්තන්තං සත්ත කම්මා සුධම්මිකා{9}, සම්මුඛා පටිපුච්ඡා ච පටිඤ්ඤාය ච කාරණා.
31. සති අමූළ්හ පාපිකා තජ්ජනීනියස්සෙන ච, පබ්බාජනීය පටිසාරො උක්ඛෙපපරිවාස ච.
32. මූලමානත්ත අබ්භානා තථෙව උපසම්පදා, අඤ්ඤං කරෙය්ය අඤ්ඤස්ස සොළසෙතෙ අධම්මිකා.
33. තං තං කරෙය්ය තං තස්ස සොළසෙතෙ සුධම්මිකා, පච්චාරොපෙය්ය අඤ්ඤඤ්ඤං{10} සොළසෙතෙ අධම්මිකා.
34. ද්වෙ ද්වෙ තම්මූලකන්තස්ස{11} තෙපි සොළසධම්මිකා, එකෙකමූලකං චක්කං අධම්මන්ති ජිනො බ්රවී.
35. අකාසි තජ්ජනීයං කම්මං, සඞ්ඝො භණ්ඩනකාරකෙ, අධම්මෙන වග්ගකම්මං අඤ්ඤං ආවාසං ගඤ්ඡි සො.
36. තත්ථාධම්මෙන සමග්ගා තස්ස තජ්ජනීයං කරුං, අඤ්ඤත්ථ වග්ගා ධම්මෙන තස්ස තජ්ජනීයං කරුං.
37. පතිරූපෙන වග්ගාපි සමග්ගාපි තථා කරුං, අධම්මෙන සමග්ගා ච ධම්මෙන වග්ගමෙව ච.
38. පතිරූපෙන වග්ගා ච සමග්ගා ච ඉමෙ පදා, එකෙකමූලං කත්වා චක්කං බන්ධෙ විචක්ඛණො.
39. බාලාව්යත්තස්ස නියස්සං පබ්බාජෙ කුලදූසකං, පටිසාරණීයං කම්මං කරෙ අක්කොසකස්ස ච.
40. අදස්සනාප්පටිකම්මෙ යො ච දිට්ඨිං න නිස්සජෙ, තෙසං උක්ඛෙපනීයකම්මං{1} සත්ථවාහෙන භාසිතං.
41. උපරිනයකම්මානං{2} පඤ්හෙ{3} තජ්ජනීයං නයෙ, තෙසංයෙව අනුලොමං සම්මා වත්තති යාචිතො{4}.
42. පස්සද්ධිං{5} තෙසං කම්මානං හෙට්ඨා කම්මනයෙන ච, තස්මිං තස්මිං තු කම්මෙසු තත්රට්ඨො ච විවාදති{6}.
43. අකතං දුක්කතඤ්චෙව පුන කාතබ්බකන්ති ච, කම්මෙ පස්සද්ධියා චාපි තෙ භික්ඛූ ධම්මවාදිනො.
44. විපත්තිබ්යාධිතෙ දිස්වා කම්මප්පත්තෙ මහාමුනි, පටිප්පස්සද්ධිමක්ඛාසි සල්ලකත්තොව ඔසධන්ති.
10.
කොසම්බක්ඛන්ධකං
1. තෙන සමයෙන බුද්ධො භගවා කොසම්බියං විහරති ඝොසිතාරාමෙ. තෙන ඛො පන සමයෙන අඤ්ඤතරො භික්ඛු ආපත්තිං ආපන්නො. සො තස්සා ආපත්තියා ආපත්තිදිට්ඨි හොති. අඤ්ඤෙ භික්ඛූ තස්සා ආපත්තියා අනාපත්තිදිට්ඨිනො හොන්ති.
2. සො අපරෙන සමයෙන තස්සා ආපත්තියා අනාපත්තිදිට්ඨි හොති. අඤ්ඤෙ භික්ඛූ තස්සා ආපත්තියා ආපත්තිදිට්ඨිනො හොන්ති.
3. අථ ඛො තෙ භික්ඛූ තං භික්ඛුං එතදවොචුං: “ආපත්තිං ත්වං ආවුසො, ආපන්නො. පස්සසෙතං ආපත්ති”න්ති. “නත්ථි මෙ ආවුසො, ආපත්ති, යමහං පස්සෙය්ය”න්ති.
4. අථ ඛො තෙ භික්ඛූ සාමග්ගිං ලභිත්වා තං භික්ඛුං ආපත්තියා අදස්සනෙ උක්ඛිපිංසු.
5. සො ච භික්ඛු බහුස්සුතො හොති ආගතාගමො ධම්මධරො විනයධරො මාතිකාධරො පණ්ඩිතො ව්යත්තො මෙධාවී ලජ්ජී කුක්කුච්චකො සික්ඛාකාමො.
6. අථ ඛො සො භික්ඛු සන්දිට්ඨෙ සම්භත්තෙ භික්ඛූ උපසඞ්කමිත්වා එතදවොච: “අනාපත්ති එසා ආවුසො. නෙසා ආපත්ති. අනාපන්නොම්හි. නම්හි ආපන්නො. අනුක්ඛිත්තොම්හි. නම්හි උක්ඛිත්තො. අධම්මිකෙනම්හි කම්මෙන උක්ඛිත්තො කුප්පෙන අට්ඨානාරහෙන. හොථ මෙ ආයස්මන්තො ධම්මතො විනයතො පක්ඛා”ති. අලභි ඛො සො භික්ඛු සන්දිට්ඨෙ සම්භත්තෙ භික්ඛූ පක්ඛෙ.
7. ජානපදානම්පි සන්දිට්ඨානං සම්භත්තානං භික්ඛූනං සන්තිකෙ දූතං පාහෙසි: “අනාපත්ති එසා ආවුසො, නෙසා ආපත්ති. අනාපන්නොම්හි. නම්හි ආපන්නො. අනුක්ඛිත්තොම්හි. නම්හි උක්ඛිත්තො. අධම්මිකෙනම්හි කම්මෙන උක්ඛිත්තො කුප්පෙන අට්ඨානාරහෙන. හොන්තු මෙ ආයස්මන්තො ධම්මතො විනයතො පක්ඛා”ති. අලභි ඛො සො භික්ඛු ජානපදෙපි සන්දිට්ඨෙ සම්භත්තෙ භික්ඛූ පක්ඛෙ.
8. අථ ඛො තෙ උක්ඛිත්තානුවත්තකා භික්ඛූ යෙන උක්ඛෙපකා භික්ඛූ තෙනුපසඞ්කමිංසු. උපසඞ්කමිත්වා උක්ඛෙපකෙ භික්ඛූ එතදවොචුං: “අනාපත්ති එසා ආවුසො. නෙසා ආපත්ති. අනාපන්නො එසො භික්ඛු. නෙසො භික්ඛු ආපන්නො. අනුක්ඛිත්තො එසො භික්ඛු. නෙසො භික්ඛු උක්ඛිත්තො. අධම්මිකෙන කම්මෙන උක්ඛිත්තො කුප්පෙන අට්ඨානාරහෙනා”ති.