19. නග්ගා කුසා වාකචීරං, ඵලකො කෙසකම්බලං, වාලඋලූකපක්ඛඤ්ච අජිනං අක්කනාළ ච{6}.
20. පොත්ථකං නීලපීතඤ්ච ලොහිතං මඤ්ජෙට්ඨෙන ච{7}, කණ්හා මහාරඞ්ගනාමා{8} අච්ඡින්නදසිකං තථා.
21. දීඝපුප්ඵඵණදසා කඤ්චුතිරීටවෙඨනං, අනුප්පන්නෙ පක්කමති සඞ්ඝො භිජ්ජති තාවදෙ.
22. පක්ඛෙ දදන්ති සඞ්ඝස්ස ආයස්මා රෙවතො පහි, විස්සාසගාහාධිට්ඨාති, අට්ඨ චීවරමාතිකාති.
9.
චම්පෙය්යක්ඛන්ධකං
1. තෙන සමයෙන බුද්ධො භගවා චම්පායං විහරති ගග්ගරාය පොක්ඛරණියා තීරෙ. තෙන ඛො පන සමයෙන කාසීසු ජනපදෙ වාසභගාමො නාම හොති. තත්ථ කස්සපගොත්තො නාම භික්ඛු ආවාසිකො හොති තන්තිබද්ධො උස්සුක්කං ආපන්නො “කින්ති අනාගතා ච පෙසලා භික්ඛූ ආගච්ඡෙය්යුං, ආගතා ච පෙසලා භික්ඛූ ඵාසුං{1} විහරෙය්යුං, අයඤ්ච ආවාසො වුද්ධිං විරූළ්හිං වෙපුල්ලං ආපජ්ජෙය්යා”ති.
2. තෙන ඛො පන සමයෙන සම්බහුලා භික්ඛූ කාසීසු චාරිකං චරමානා යෙන වාසභගාමො තදවසරුං. අද්දසා ඛො කස්සපගොත්තො භික්ඛු තෙ භික්ඛූ දූරතොව ආගච්ඡන්තෙ. දිස්වාන ආසනං පඤ්ඤාපෙසි. පාදොදකං පාදපීඨං පාදකඨලිකං උපනික්ඛිපි. පච්චුග්ගන්ත්වා පත්තචීවරං පටිග්ගහෙසි. පානීයෙන ආපුච්ඡි. නහානෙ උස්සුක්කං අකාසි. උස්සුක්කම්පි අකාසි යාගුයා ඛාදනීයෙ භත්තස්මිං.
3. අථ ඛො තෙසං ආගන්තුකානං භික්ඛූනං එතදහොසි: “භද්දකො ඛො අයං ආවුසො, ආවාසිකො භික්ඛු නහානෙ උස්සුක්කං කරොති. උස්සුක්කම්පි කරොති යාගුයා ඛාදනීයෙ භත්තස්මිං. හන්ද මයං ආවුසො ඉධෙව වාසභගාමෙ නිවාසං කප්පෙමා”ති. අථ ඛො තෙ ආගන්තුකා භික්ඛූ තත්ථෙව වාසභගාමෙ නිවාසං කප්පෙසුං.
4. අථ ඛො කස්සපගොත්තස්ස භික්ඛුනො එතදහොසි: “යො ඛො ඉමෙසං ආගන්තුකානං භික්ඛූනං ආගන්තුකකිලමථො සො පටිපස්සද්ධො. යෙපි මෙ ගොචරෙ අප්පකතඤ්ඤුනො, තෙ දානිමෙ ගොචරෙ පකතඤ්ඤුනො. දුක්කරං ඛො පන පරකුලෙසු යාවජීවං උස්සුක්කං කාතුං. විඤ්ඤත්ති ච මනුස්සානං අමනාපා. යන්නූනාහං න උස්සුක්කං කරෙය්යං යාගුයා ඛාදනීයෙ භත්තස්මි”න්ති. සො න උස්සුක්කං අකාසි යාගුයා ඛාදනීයෙ භත්තස්මිං.
5. අථ ඛො තෙසං ආගන්තුකානං භික්ඛූනං එතදහොසි: “පුබ්බෙ ඛ්වායං ආවුසො ආවාසිකො භික්ඛු නහානෙ උස්සුක්කං අකාසි: උස්සුක්කම්පි අකාසි යාගුයා ඛාදනීයෙ භත්තස්මිං. සො දානායං න උස්සුක්කං කරොති යාගුයා ඛාදනීයෙ භත්තස්මිං. දුට්ඨො දානායං ආවුසො, ආවාසිකො භික්ඛු. හන්ද මයං ආවුසො, ආවාසිකං{2} භික්ඛුං උක්ඛිපාමා”ති.
6. අථ ඛො තෙ ආගන්තුකා භික්ඛූ සන්නිපතිත්වා කස්සපගොත්තං භික්ඛුං එතදවොචුං: “පුබ්බෙ ඛො ත්වං ආවුසො නහානෙ උස්සුක්කං කරොසි. උස්සුක්කම්පි කරොසි යාගුයා ඛාදනීයෙ භත්තස්මිං. සොදානි ත්වං න උස්සුක්කං කරොසි යාගුයා ඛාදනීයෙ භත්තස්මිං. ආපත්තිං ත්වං, ආවුසො, ආපන්නො. පස්සසෙතං ආපත්ති”න්ති. “නත්ථි මෙ ආවුසො ආපත්ති, යමහං පස්සෙය්ය”න්ති.
7. අථ ඛො තෙ ආගන්තුකා භික්ඛූ කස්සපගොත්තං භික්ඛුං ආපත්තියා අදස්සනෙ උක්ඛිපිංසු. අථ ඛො කස්සපගොත්තස්ස භික්ඛුනො එතදහොසි: “අහං ඛො එතං න ජානාමි - ආපත්ති වා එසා අනාපත්ති වා? ආපන්නො චම්හි අනාපන්නො වා? උක්ඛිත්තො චම්හි අනුක්ඛිත්තො වා ධම්මිකෙන වා අධම්මිකෙන වා කුප්පෙන වා අකුප්පෙන වා ඨානාරහෙන වා අට්ඨානාරහෙන වා? යන්නූනාහං චම්පං ගන්ත්වා භගවන්තං එතමත්ථං පුච්ඡෙය්ය”න්ති.
8. අථ ඛො කස්සපගොත්තො භික්ඛු සෙනාසනං සංසාමෙත්වා පත්තචීවරමාදාය යෙන චම්පා තෙන පක්කාමි. අනුපුබ්බෙන යෙන චම්පා යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං නිසීදි.
9. ආචිණ්ණං ඛො පනෙතං බුද්ධානං භගවන්තානං ආගන්තුකෙහි භික්ඛූහි සද්ධිං පටිසම්මොදිතුං. අථ ඛො භගවා කස්සපගොත්තං භික්ඛුං එතදවොච: “කච්චි භික්ඛු ඛමනීයං? කච්චි යාපනීයං? කච්චිසි{1} අප්පකිලමථෙන අද්ධානං ආගතො? කුතො ච ත්වං භික්ඛු ආගච්ඡසී?”ති.
10. “ඛමනීයං භගවා. යාපනීයං භගවා. අප්පකිලමථෙන චාහං භන්තෙ අද්ධානං ආගතො. අත්ථි භන්තෙ කාසීසු ජනපදෙ වාසභගාමො නාම. තත්ථාහං ආවාසිකො තන්තිබද්ධො උස්සුක්කං ආපන්නො: “කින්ති අනාගතා ච පෙසලා භික්ඛූ ආගච්ඡෙය්යුං. ආගතා ච පෙසලා භික්ඛූ ඵාසු විහරෙය්යුං. අයඤ්ච ආවාසො වුද්ධිං විරූළ්හිං වෙපුල්ලං ආපජ්ජෙය්යා”ති.
11. “අථ ඛො භන්තෙ සම්බහුලා භික්ඛූ කාසීසු චාරිකං චරමානා යෙන වාසභගාමො තදවසරුං. අද්දසං ඛො අහං භන්තෙ, තෙ භික්ඛූ දූරතොව ආගච්ඡන්තෙ දිස්වාන ආසනං පඤ්ඤාපෙසිං. පාදොදකං පාදපීඨං පාදකඨලිකං උපනික්ඛිපිං. පච්චුග්ගන්ත්වා පත්තචීවරං පටිග්ගහෙසිං. පානීයෙන ආපුච්ඡිං. නහානෙ උස්සුක්කං අකාසිං. උස්සුක්කම්පි අකාසිං යාගුයා ඛාදනීයෙ භත්තස්මිං.
12. “අථ ඛො තෙසං භන්තෙ, ආගන්තුකානං භික්ඛූනං එතදහොසි: “භද්දකො ඛො අයං ආවුසො ආවාසිකො භික්ඛු නහානෙ උස්සුක්කං කරොති. උස්සුක්කම්පි කරොති යාගුයා ඛාදනීයෙ භත්තස්මිං. හන්ද මයං ආවුසො ඉධෙව වාසභගාමෙ නිවාසං කප්පෙමා”ති. අථ ඛො තෙ භන්තෙ, ආගන්තුකා භික්ඛූ තත්ථෙව වාසභගාමෙ නිවාසං කප්පෙසුං.
13. “තස්ස මය්හං භන්තෙ, එතදහොසි: “යො ඛො ඉමෙසං ආගන්තුකානං භික්ඛූනං ආගන්තුකකිලමථො සො පටිප්පස්සද්ධො. යෙපිමෙ ගොචරෙ අප්පකතඤ්ඤුනො තෙ’දානි’මෙ ගොචරෙ පකතඤ්ඤුනො. දුක්කරං ඛො පන පරකුලෙසු යාවජීවං උස්සුක්කං කාතුං. විඤ්ඤත්ති ච මනුස්සානං අමනාපා. යන්නූනාහං න උස්සුක්කං කරෙය්යං යාගුයා ඛාදනීයෙ භත්තස්මි”න්ති. සො ඛො අහං භන්තෙ, න උස්සුක්කං අකාසිං යාගුයා ඛාදනීයෙ භත්තස්මිං.
14. අථ ඛො තෙසං භන්තෙ, ආගන්තුකානං භික්ඛූනං එතදහොසි: ‘පුබ්බෙ ඛ්වායං, ආවුසො ආවාසිකො භික්ඛු නහානෙ උස්සුක්කං කරොති. උස්සුක්කම්පි කරොති යාගුයා ඛාදනීයෙ භත්තස්මිං. සො’දානායං න උස්සුක්කං කරොති යාගුයා ඛාදනීයෙ භත්තස්මිං. දුට්ඨොදා‘නායං ආවුසො, ආවාසිකො භික්ඛු. හන්ද මයං ආවුසො, ආවාසිකං භික්ඛුං උක්ඛිපාමා’ති.
15. “අථ ඛො තෙ භන්තෙ, ආගන්තුකා භික්ඛූ සන්නිපතිත්වා මං එතදවොචුං: ‘පුබ්බෙ ඛො ත්වං ආවුසො, නහානෙ උස්සුක්කං කරොසි. උස්සුක්කම්පි කරොසි යාගුයා ඛාදනීයෙ භත්තස්මිං. සො’දානි ත්වං න උස්සුක්කං කරොසි යාගුයා ඛාදනීයෙ භත්තස්මිං. ආපත්තිං ත්වං, ආවුසො ආපන්නො. පස්සසෙතං ආපත්ති’න්ති. ‘නත්ථි මෙ ආවුසො ආපත්ති, යමහං පස්සෙය්ය’න්ති.
16. “අථ ඛො තෙ භන්තෙ, ආගන්තුකා භික්ඛූ මං ආපත්තියා අදස්සනෙ උක්ඛිපිංසු. තස්ස මය්හං භන්තෙ, එතදහොසි: ‘අහං ඛො එතං න ජානාමි: ආපත්ති වා එසා අනාපත්ති වා, ආපන්නො චම්හි අනාපන්නො වා, උක්ඛිත්තො චම්හි අනුක්ඛිත්තො වා ධම්මිකෙන වා අධම්මිකෙන වා කුප්පෙන වා අකුප්පෙන වා, ඨානාරහෙන වා අට්ඨානාරහෙන වා. යන්නූනාහං චම්පං ගන්ත්වා භගවන්තං එතමත්ථං පුච්ඡෙය්ය’න්ති. තතොහං භගවා ආගච්ඡාමී”ති.
17. “අනාපත්ති එසා භික්ඛු. නෙසා ආපත්ති. අනාපන්නොසි. නසි ආපන්නො. අනුක්ඛිත්තොසි. නසි උක්ඛිත්තො. අධම්මිකෙනාසි කම්මෙන උක්ඛිත්තො කුප්පෙන අට්ඨානාරහෙන. ගච්ඡ ත්වං භික්ඛු, තත්ථෙව වාසභගාමෙ නිවාසං කප්පෙහී”ති. “එවං, භන්තෙ”ති ඛො කස්සපගොත්තො භික්ඛු භගවතො පටිස්සුත්වා උට්ඨායාසනා භගවන්තං අභිවාදෙත්වා පදක්ඛිණං කත්වා යෙන වාසභගාමො තෙන පක්කාමි.
18. අථ ඛො තෙසං ආගන්තුකානං භික්ඛූනං අහුදෙව කුක්කුච්චං. අහු විප්පටිසාරො: “අලාභා වත නො, න වත නො ලාභා, දුල්ලද්ධං වත නො, න වත නො සුලද්ධං, යෙ මයං සුද්ධං භික්ඛුං අනාපත්තිකං අවත්ථුස්මිං අකාරණෙ උක්ඛිපිම්හ. හන්ද මයං ආවුසො, චම්පං ගන්ත්වා භගවතො සන්තිකෙ අච්චයං අච්චයතො දෙසෙමා”ති.
19. අථ ඛො තෙ ආගන්තුකා භික්ඛූ සෙනාසනං සංසාමෙත්වා පත්තචීවරං ආදාය යෙන චම්පා තෙන පක්කමිංසු. අනුපුබ්බෙන යෙන චම්පා යෙන භගවා තෙනුපසඞ්කමිංසු. උපසඞ්කමිත්වා භගවන්තං අභිවාදෙත්වා එකමන්තං නිසීදිංසු.
20. ආචිණ්ණං ඛො පනෙතං බුද්ධානං භගවන්තානං ආගන්තුකෙහි භික්ඛූහි සද්ධිං පටිසම්මොදිතුං. අථ ඛො භගවා තෙ භික්ඛූ එතදවොච: “කච්චි භික්ඛවෙ, ඛමනීයං? කච්චි යාපනීයං? කච්චිත්ථ අප්පකිලමථෙන අද්ධානං ආගතා? කුතො ච තුම්හෙ භික්ඛවෙ, ආගච්ඡථා”ති. “ඛමනීයං භගවා. යාපනීයං භගවා. අප්පකිලමථෙන ච මයං භන්තෙ, අද්ධානං ආගතා. අත්ථි භන්තෙ කාසීසු ජනපදෙසු වාසභගාමො නාම. තතො මයං භගවා ආගච්ඡාමා”ති. “තුම්හෙ භික්ඛවෙ, ආවාසිකං භික්ඛුං උක්ඛිපිත්ථා”ති. “එවං භන්තෙ”ති. “කිස්මිං භික්ඛවෙ, වත්ථුස්මිං කාරණෙ”ති. “අවත්ථුස්මිං භගවා අකාරණෙ”ති.
21. විගරහි බුද්ධො භගවා. “අනනුච්ඡවියං මොඝපුරිසා, අනනුලොමිකං අප්පතිරූපං අස්සාමණකං අකප්පියං අකරණීයං. කථං හි නාම තුම්හෙ මොඝපුරිසා, සුද්ධං භික්ඛුං අනාපත්තිකං අවත්ථුස්මිං අකාරණෙ උක්ඛිපිස්සථ? නෙතං මොඝපුරිසා, අප්පසන්නානං වා පසාදාය -පෙ- විගරහිත්වා ධම්මිං කථං කත්වා භික්ඛූ ආමන්තෙසි: “න භික්ඛවෙ, සුද්ධො භික්ඛු අනාපත්තිකො අවත්ථුස්මිං අකාරණෙ උක්ඛිපිතබ්බො. යො උක්ඛිපෙය්ය, ආපත්ති දුක්කටස්සා”ති.
22. අථ ඛො තෙ භික්ඛූ උට්ඨායාසනා එකංසං උත්තරාසඞ්ගං කරිත්වා භගවතො පාදෙසු සිරසා නිපතිත්වා භගවන්තං එතදවොචුං: “අච්චයො නො භන්තෙ, අච්චගමා යථා බාලෙ යථා මූළ්හෙ යථා අකුසලෙ, යෙ මයං සුද්ධං භික්ඛුං අනාපත්තිකං අවත්ථුස්මිං අකාරණෙ උක්ඛිපිම්හ. තෙසං නො භන්තෙ භගවා අච්චයං අච්චයතො පතිගණ්හාතු ආයතිං සංවරායා”ති. “තග්ඝ තුම්හෙ භික්ඛවෙ, අච්චයො අච්චගමා යථා බාලෙ යථා මූළ්හෙ යථා අකුසලෙ, යෙ තුම්හෙ සුද්ධං භික්ඛුං අනාපත්තිකං අවත්ථුස්මිං අකාරණෙ උක්ඛිපිත්ථ. යතො ච ඛො තුම්හෙ භික්ඛවෙ, අච්චයං අච්චයතො දිස්වා යථාධම්මං පටිකරොථ, තං වො මයං පතිගණ්හාම. වුද්ධි හෙසා භික්ඛවෙ, අරියස්ස විනයෙ යො අච්චයං අච්චයතො දිස්වා යථාධම්මං පටිකරොති, ආයතිං සංවරං ආපජ්ජතී”ති.
23. තෙන ඛො පන සමයෙන චම්පායං භික්ඛූ එවරූපානි කම්මානි කරොන්ති: අධම්මෙන වග්ගකම්මං කරොන්ති, අධම්මෙන සමග්ගකම්මං කරොන්ති. ධම්මෙන වග්ගකම්මං කරොන්ති. ධම්මපතිරූපකෙන වග්ගකම්මං කරොන්ති. ධම්මපතිරූපකෙන සමග්ගකම්මං කරොන්ති. එකොපි එකං උක්ඛිපති, එකොපි ද්වෙ උක්ඛිපති. එකොපි සම්බහුලෙ උක්ඛිපති. එකොපි සඞ්ඝං උක්ඛිපති. ද්වෙපි එකං උක්ඛිපන්ති. ද්වෙපි ද්වෙ උක්ඛිපන්ති, ද්වෙපි සම්බහුලෙ උක්ඛිපන්ති, ද්වෙපි සඞ්ඝං උක්ඛිපන්ති. සම්බහුලාපි එකං උක්ඛිපන්ති. සම්බහුලාපි ද්වෙ උක්ඛිපන්ති. සම්බහුලාපි සම්බහුලෙ උක්ඛිපන්ති. සම්බහුලාපි සඞ්ඝං උක්ඛිපන්ති. සඞ්ඝොපි සඞ්ඝං උක්ඛිපති.
24. යෙ තෙ භික්ඛූ අප්පිච්ඡා -පෙ- තෙ උජ්ඣායන්ති, ඛීයන්ති, විපාචෙන්ති: “කථං හි නාම චම්පායං භික්ඛූ එවරූපානි කම්මානි කරිස්සන්ති? අධම්මෙන වග්ගකම්මං කරිස්සන්ති? අධම්මෙන සමග්ගකම්මං කරිස්සන්ති? ධම්මෙන වග්ගකම්මං කරිස්සන්ති? ධම්මපතිරූපකෙන වග්ගකම්මං කරිස්සන්ති? ධම්මපතිරූපකෙන සමග්ගකම්මං කරිස්සන්ති? එකොපි එකං උක්ඛිපිස්සති? එකොපි ද්වෙ උක්ඛිපිස්සති? එකොපි සම්බහුලෙ උක්ඛිපිස්සති? එකොපි සඞ්ඝං උක්ඛිපිස්සති? ද්වෙපි එකං උක්ඛිපිස්සන්ති? ද්වෙපි ද්වෙ උක්ඛිපිස්සන්ති? ද්වෙපි සම්බහුලෙ උක්ඛිපිස්සන්ති? ද්වෙපි සඞ්ඝං උක්ඛිපිස්සන්ති? සම්බහුලාපි එකං උක්ඛිපිස්සන්ති? සම්බහුලාපි ද්වෙ උක්ඛිපිස්සන්ති? සම්බහුලාපි සම්බහුලෙ උක්ඛිපිස්සන්ති? සම්බහුලාපි සඞ්ඝං උක්ඛිපිස්සන්ති? සඞ්ඝොපි සඞ්ඝං උක්ඛිපිස්සතී”ති.
25. අථ ඛො තෙ භික්ඛූ භගවතො එතමත්ථං ආරොචෙසුං. “සච්චං කිර භික්ඛවෙ, චම්පායං භික්ඛූ එවරූපානි කම්මානි කරොන්ති? අධම්මෙන වග්ගකම්මං කරොන්ති? -පෙ- සඞ්ඝොපි සඞ්ඝං උක්ඛිපතී”ති. “සච්චං භගවා.”
26. විගරහි බුද්ධො භගවා “අනනුච්ඡවියං භික්ඛවෙ, තෙසං මොඝපුරිසානං අනනුලොමිකං අප්පතිරූපං අස්සාමණකං අකප්පියං අකරණීයං. කථං හි නාම තෙ භික්ඛවෙ මොඝපුරිසා එවරූපානි කම්මානි කරිස්සන්ති? අධම්මෙන වග්ගකම්මං කරිස්සන්ති? -පෙ- සඞ්ඝොපි සඞ්ඝං උක්ඛිපිස්සති.
27. “නෙතං භික්ඛවෙ, අප්පසන්නානං වා පසාදාය -පෙ- විගරහිත්වා -පෙ- ධම්මිං කථං කත්වා භික්ඛූ ආමන්තෙසි: “අධම්මෙන චෙ භික්ඛවෙ, වග්ගකම්මං අකම්මං. න ච කරණීයං. අධම්මෙන{1} සමග්ගකම්මං අකම්මං. න ච කරණීයං. ධම්මෙන වග්ගකම්මං අකම්මං. න ච කරණීයං. ධම්මපතිරූපකෙන වග්ගකම්මං අකම්මං. න ච කරණීයං. ධම්මපතිරූපකෙන සමග්ගකම්මං අකම්මං. න ච කරණීයං. එකොපි එකං උක්ඛිපති, අකම්මං න ච කරණීයං. එකොපි ද්වෙ උක්ඛිපති, අකම්මං. න ච කරණීයං. එකොපි සම්බහුලෙ උක්ඛිපති, අකම්මං. න ච කරණීයං. එකොපි සඞ්ඝං උක්ඛිපති, අකම්මං න ච කරණීයං. ද්වෙපි එකං උක්ඛිපන්ති, අකම්මං න ච කරණීයං. ද්වෙපි ද්වෙ උක්ඛිපන්ති, අකම්මං. න ච කරණීයං. ද්වෙපි සම්බහුලෙ උක්ඛිපන්ති, අකම්මං. න ච කරණීයං. ද්වෙපි සඞ්ඝං උක්ඛිපන්ති, අකම්මං. න ච කරණීයං. සම්බහුලාපි එකං උක්ඛිපන්ති, අකම්මං. න ච කරණීයං. සම්බහුලාපි ද්වෙ උක්ඛිපන්ති, අකම්මං න ච කරණීයං. සම්බහුලාපි සම්බහුලෙ උක්ඛිපන්ති, අකම්මං. න ච කරණීයං. සම්බහුලාපි සඞ්ඝං උක්ඛිපන්ති අකම්මං න ච කරණීයං. සඞ්ඝොපි සඞ්ඝං උක්ඛිපති, අකම්මං. න ච කරණීයං.
28. “චත්තාරිමානි, භික්ඛවෙ, කම්මානි: අධම්මෙන වග්ගකම්මං. අධම්මෙන සමග්ගකම්මං. ධම්මෙන වග්ගකම්මං. ධම්මෙන සමග්ගකම්මං.
29. “තත්ර භික්ඛවෙ, යමිදං අධම්මෙන වග්ගකම්මං, ඉදං භික්ඛවෙ, කම්මං අධම්මත්තා වග්ගත්තා කුප්පං අට්ඨානාරහං. න භික්ඛවෙ, එවරූපං කම්මං කාතබ්බං. න ච මයා එවරූපං කම්මං අනුඤ්ඤාතං.
30. “තත්ර භික්ඛවෙ, යමිදං{2} අධම්මෙන සමග්ගකම්මං, ඉදං භික්ඛවෙ කම්මං අධම්මත්තා කුප්පං අට්ඨානාරහං. න භික්ඛවෙ, එවරූපං කම්මං කාතබ්බං, න ච මයා එවරූපං කම්මං අනුඤ්ඤාතං.
31. “තත්ර භික්ඛවෙ, යමිදං ධම්මෙන වග්ගකම්මං, ඉදං භික්ඛවෙ, කම්මං වග්ගත්තා කුප්පං අට්ඨානාරහං. න භික්ඛවෙ, එවරූපං කම්මං කාතබ්බං, න ච මයා එවරූපං කම්මං අනුඤ්ඤාතං.
32. “තත්ර භික්ඛවෙ, යමිදං ධම්මෙන සමග්ගකම්මං, ඉදං භික්ඛවෙ කම්මං ධම්මත්තා සමග්ගත්තා අකුප්පං ඨානාරහං. එවරූපං භික්ඛවෙ, කම්මං කාතබ්බං. එවරූපඤ්ච මයා කම්මං අනුඤ්ඤාතං. තස්මාතිහ භික්ඛවෙ, එවරූපං කම්මං කරිස්සාම ‘යදිදං ධම්මෙන සමග්ග’න්ති එවං හි වො භික්ඛවෙ සික්ඛිතබ්බ”න්ති.
33. තෙන ඛො පන සමයෙන ඡබ්බග්ගියා භික්ඛූ එවරූපානි කම්මානි කරොන්ති: අධම්මෙන වග්ගකම්මං කරොන්ති. අධම්මෙන සමග්ගකම්මං කරොන්ති. ධම්මෙන වග්ගකම්මං කරොන්ති. ධම්මපතිරූපකෙන වග්ගකම්මං කරොන්ති, ධම්මපතිරූපකෙන සමග්ගකම්මං කරොන්ති. ඤත්තිවිපන්නම්පි කම්මං කරොන්ති අනුසාවනසම්පන්නං. අනුස්සාවනවිපන්නම්පි කම්මං කරොන්ති ඤත්තිසම්පන්නං. ඤත්තිවිපන්නම්පි අනුස්සාවන විපන්නම්පි කම්මං කරොන්ති. අඤ්ඤත්රාපි ධම්මා කම්මං කරොන්ති. අඤ්ඤත්රාපි විනයා කම්මං කරොන්ති. අඤ්ඤත්රාපි සත්ථුසාසනා කම්මං කරොන්ති. පටිකුට්ඨකතම්පි{1} කම්මං කරොන්ති අධම්මිකං කුප්පං අට්ඨානාරහං.
34. යෙ තෙ භික්ඛූ අප්පිච්ඡා -පෙ- තෙ උජ්ඣායන්ති ඛීයන්ති විපාචෙන්ති: “කථං හි නාම ඡබ්බග්ගියා භික්ඛූ එවරූපානි කම්මානි කරිස්සන්ති: අධම්මෙන වග්ගකම්මං කරිස්සන්ති? අධම්මෙන සමග්ගකම්මං කරිස්සන්ති? ධම්මෙන වග්ගකම්මං කරිස්සන්ති? ධම්මපතිරූපකෙන වග්ගකම්මං කරිස්සන්ති? ධම්මපතිරූපකෙන සමග්ගකම්මං කරිස්සන්ති? ඤත්තිවිපන්නම්පි කම්මං කරිස්සන්ති අනුස්සාවනසම්පන්නං? අනුස්සාවනවිපන්නම්පි කම්මං කරිස්සන්ති? ඤත්තිසම්පන්නං? ඤත්තිවිපන්නම්පි අනුස්සාවනවිපන්නම්පි කම්මං කරිස්සන්ති? අඤ්ඤත්රාපි ධම්මා කම්මං කරිස්සන්ති? අඤ්ඤත්රාපි විනයා කම්මං කරිස්සන්ති? අඤ්ඤත්රාපි සත්ථුසාසනා කම්මං කරිස්සන්ති? පටිකුට්ඨකතම්පි කම්මං කරිස්සන්ති අධම්මිකං කුප්පං අට්ඨානාරහ”න්ති.
35. අථ ඛො තෙ භික්ඛූ භගවතො එතමත්ථං ආරොචෙසුං “සච්චං කිර භික්ඛවෙ, ඡබ්බග්ගියා භික්ඛූ එවරූපානි කම්මානි කරොන්ති? අධම්මෙන වග්ගකම්මං කරොන්ති? -පෙ- පටිකුට්ඨකතම්පි කම්මං කරොන්ති අධම්මිකං කුප්පං අට්ඨානාරහ”න්ති.
36. “සච්චං භගවා” -පෙ- විගරහිත්වා ධම්මිං කථං කත්වා භික්ඛූ ආමන්තෙසි: “අධම්මෙන චෙ භික්ඛවෙ, වග්ගකම්මං අකම්මං. න ච කරණීයං. අධම්මෙන සමග්ගකම්මං අකම්මං. න ච කරණීයං, ධම්මෙන වග්ගකම්මං අකම්මං. න ච කරණීයං. ධම්මපතිරූපකෙන වග්ගකම්මං අකම්මං. න ච කරණීයං. ධම්මපතිරූපකෙන සමග්ගකම්මං අකම්මං. න ච කරණීයං. ඤත්තිවිපන්නං චෙ භික්ඛවෙ, කම්මං අනුස්සාවනසම්පන්නං අකම්මං. න ච කරණීයං. අනුස්සාවනවිපන්නං චෙ භික්ඛවෙ, කම්මං ඤත්තිසම්පන්නං අකම්මං. න ච කරණීයං. ඤත්තිවිපන්නං චෙ භික්ඛවෙ, කම්මං අනුස්සාවනවිපන්නං අකම්මං. න ච කරණීයං. අඤ්ඤත්රාපි ධම්මා කම්මං අකම්මං න ච කරණීයං. අඤ්ඤත්රාපි විනයා කම්මං අකම්මං. න ච කරණීයං. අඤ්ඤත්රාපි සත්ථුසාසනා කම්මං අකම්මං. න ච කරණීයං. පටිකුට්ඨකතඤ්චෙ භික්ඛවෙ, කම්මං අධම්මිකං කුප්පං අට්ඨානාරහං අකම්මං. න ච කරණීයං.”
37. “ඡයිමානි භික්ඛවෙ, කම්මානි: අධම්මකම්මං, වග්ගකම්මං, සමග්ගකම්මං, ධම්මපතිරූපකෙන වග්ගකම්මං, ධම්මපතිරූපකෙන සමග්ගකම්මං, ධම්මෙන සමග්ගකම්මං.
38. “කතමඤ්ච භික්ඛවෙ, අධම්මකම්මං? ඤත්තිදුතියෙ චෙ භික්ඛවෙ, කම්මෙ එකාය ඤත්තියා කම්මං කරොති, න ච කම්මවාචං අනුස්සාවෙති, අධම්මකම්මං.
39. “ඤත්තිදුතියෙ චෙ භික්ඛවෙ, කම්මෙ ද්වීහි ඤත්තීහි කම්මං කරොති, න ච කම්මවාචං අනුස්සාවෙති, අධම්මකම්මං.
40. “ඤත්තිදුතියෙ චෙ භික්ඛවෙ, කම්මෙ එකාය කම්මවාචාය කම්මං කරොති, න ච ඤත්තිං ඨපෙති, අධම්මකම්මං.
41. “ඤත්තිදුතියෙ චෙ භික්ඛවෙ, කම්මෙ ද්වීහි කම්මවාචාහි කම්මං කරොති, න ච ඤත්තිං ඨපෙති, අධම්මකම්මං.
42. “ඤත්තිචතුත්ථෙ චෙ භික්ඛවෙ, කම්මෙ එකාය ඤත්තියා කම්මං කරොති, න ච කම්මවාචං අනුස්සාවෙති, අධම්මකම්මං.
43. “ඤත්තිචතුත්ථෙ චෙ භික්ඛවෙ, කම්මෙ ද්වීහි ඤත්තීහි කම්මං කරොති, න ච කම්මවාචං අනුස්සාවෙති, අධම්මකම්මං.
44. “ඤත්තිචතුත්ථෙ චෙ භික්ඛවෙ, කම්මෙ තීහි ඤත්තීහි කම්මං කරොති, න ච කම්මවාචං අනුස්සාවෙති, අධම්මකම්මං.
45. “ඤත්තිචතුත්ථෙ චෙ භික්ඛවෙ, කම්මෙ චතූහි ඤත්තීහි කම්මං කරොති, න ච කම්මවාචං අනුස්සාවෙති, අධම්මකම්මං.
46. “ඤත්තිචතුත්ථෙ චෙ භික්ඛවෙ, කම්මෙ එකාය කම්මවාචාය කම්මං කරොති, න ච ඤත්තිං ඨපෙති, අධම්මකම්මං.
47. “ඤත්තිචතුත්ථෙ චෙ භික්ඛවෙ, කම්මෙ ද්වීහි කම්මවාචාහි කම්මං කරොති, න ච ඤත්තිං ඨපෙති, අධම්මකම්මං.
48. “ඤත්තිචතුත්ථෙ චෙ භික්ඛවෙ, කම්මෙ තීහි කම්මවාචාහි කම්මං කරොති, න ච ඤත්තිං ඨපෙති, අධම්මකම්මං.
49. “ඤත්තිචතුත්ථෙ චෙ භික්ඛවෙ, කම්මෙ චතූහි කම්මවාචාහි කම්මං කරොති, න ච ඤත්තිං ඨපෙති, අධම්මකම්මං. ඉදං වුච්චති භික්ඛවෙ, අධම්මකම්මං.
50. “කතමඤ්ච භික්ඛවෙ, වග්ගකම්මං? ඤත්තිදුතියෙ චෙ භික්ඛවෙ, කම්මෙ යාවතිකා භික්ඛූ කම්මප්පත්තා, තෙ අනාගතා හොන්ති, ඡන්දාරහානං ඡන්දො අනාහටො හොති, සම්මුඛීභූතා පටික්කොසන්ති, වග්ගකම්මං.
51. “ඤත්තිදුතියෙ චෙ භික්ඛවෙ, කම්මෙ යාවතිකා භික්ඛූ කම්මප්පත්තා, තෙ ආගතා හොන්ති, ඡන්දාරහානං ඡන්දො අනාහටො හොති, සම්මුඛීභූතා පටික්කොසන්ති, වග්ගකම්මං.
52. “ඤත්තිදුතියෙ චෙ භික්ඛවෙ, කම්මෙ යාවතිකා භික්ඛූ කම්මප්පත්තා, තෙ ආගතා හොන්ති, ඡන්දාරහානං ඡන්දො ආහටො හොති, සම්මුඛීභූතා පටික්කොසන්ති, වග්ගකම්මං.
53. “ඤත්තිචතුත්ථෙ චෙ භික්ඛවෙ, කම්මෙ යාවතිකා භික්ඛූ කම්මප්පත්තා තෙ අනාගතා හොන්ති, ඡන්දාරහානං ඡන්දො අනාහටො හොති, සම්මුඛීභූතා පටික්කොසන්ති, වග්ගකම්මං.
54. “ඤත්තිචතුත්ථෙ චෙ භික්ඛවෙ, කම්මෙ යාවතිකා භික්ඛූ කම්මප්පත්තා, තෙ ආගතා හොන්ති, ඡන්දාරහානං ඡන්දො අනාහටො හොති, සම්මුඛීභූතා පටික්කොසන්ති, වග්ගකම්මං.
55. “ඤත්තිචතුත්ථෙ චෙ භික්ඛවෙ, කම්මෙ යාවතිකා භික්ඛූ කම්මප්පත්තා, තෙ ආගතා හොන්ති, ඡන්දාරහානං ඡන්දො ආහටො හොති, සම්මුඛීභූතා පටික්කොසන්ති, වග්ගකම්මං. ඉදං වුච්චති භික්ඛවෙ, වග්ගකම්මං.
56. “කතමඤ්ච භික්ඛවෙ, සමග්ගකම්මං? ඤත්තිදුතියෙ චෙ භික්ඛවෙ, කම්මෙ යාවතිකා භික්ඛූ කම්මප්පත්තා, තෙ ආගතා හොන්ති, ඡන්දාරහානං ඡන්දො ආහටො හොති, සම්මුඛීභූතා න පටික්කොසන්ති, සමග්ගකම්මං.
57. “ඤත්තිචතුත්ථෙ චෙ භික්ඛවෙ, කම්මෙ යාවතිකා භික්ඛූ කම්මප්පත්තා, තෙ ආගතා හොන්ති, ඡන්දාරහානං ඡන්දො ආහටො හොති, සම්මුඛීභූතා න පටික්කොසන්ති, සමග්ගකම්මං. ඉදං වුච්චති භික්ඛවෙ, සමග්ගකම්මං.
58. “කතමඤ්ච භික්ඛවෙ, ධම්මපතිරූපකෙන වග්ගකම්මං? ඤත්තිදුතියෙ චෙ භික්ඛවෙ, කම්මෙ පඨමං කම්මවාචං අනුස්සාවෙති, පච්ඡා ඤත්තිං ඨපෙති, යාවතිකා භික්ඛූ කම්මප්පත්තා තෙ අනාගතා හොන්ති, ඡන්දාරහානං ඡන්දො අනාහටො හොති, සම්මුඛීභූතා පටික්කොසන්ති, ධම්මපතිරූපකෙන වග්ගකම්මං.
59. “ඤත්තිදුතියෙ චෙ භික්ඛවෙ, කම්මෙ පඨමං කම්මවාචං අනුස්සාවෙති, පච්ඡා ඤත්තිං ඨපෙති, යාවතිකා භික්ඛූ කම්මප්පත්තා, තෙ ආගතා හොන්ති, ඡන්දාරහානං ඡන්දො අනාහටො හොති, සම්මුඛීභූතා පටික්කොසන්ති, ධම්මපතිරූපකෙන වග්ගකම්මං.
60. “ඤත්තිදුතියෙ චෙ භික්ඛවෙ, කම්මෙ පඨමං කම්මවාචං අනුසාවෙති, පච්ඡා ඤත්තිං ඨපෙති, යාවතිකා භික්ඛූ කම්මප්පත්තා, තෙ ආගතා හොන්ති, ඡන්දාරහානං ඡන්දො ආහටො හොති, සම්මුඛීභූතා පටික්කොසන්ති, ධම්මපතිරූපකෙන වග්ගකම්මං.
61. “ඤත්තිචතුත්ථෙ චෙ භික්ඛවෙ, කම්මෙ පඨමං කම්මවාචං අනුසාවෙති, පච්ඡා ඤත්තිං ඨපෙති, යාවතිකා භික්ඛූ කම්මප්පත්තා තෙ අනාගතා හොන්ති, ඡන්දාරහානං ඡන්දො අනාහටො හොති, සම්මුඛීභූතා පටික්කොසන්ති, ධම්මපතිරූපකෙන වග්ගකම්මං.
62. “ඤත්තිචතුත්ථෙ චෙ භික්ඛවෙ, කම්මෙ පඨමං කම්මවාචං අනුසාවෙති, පච්ඡා ඤත්තිං ඨපෙති, යාවතිකා භික්ඛූ කම්මප්පත්තා තෙ ආගතා හොන්ති, ඡන්දාරහානං ඡන්දො අනාහටො හොති, සම්මුඛීභූතා පටික්කොසන්ති, ධම්මපතිරූපකෙන වග්ගකම්මං.
63. “ඤත්තිචතුත්ථෙ චෙ භික්ඛවෙ, කම්මෙ පඨමං කම්මවාචං අනුසාවෙති, පච්ඡා ඤත්තිං ඨපෙති, යාවතිකා භික්ඛූ කම්මප්පත්තා, තෙ ආගතා හොන්ති, ඡන්දො ආහටො හොති, සම්මුඛීභූතා පටික්කොසන්ති, ධම්මපතිරූපකෙන වග්ගකම්මං. ඉදං වුච්චති භික්ඛවෙ, ධම්මපතිරූපකෙන වග්ගකම්මං.
64. “කතමඤ්ච භික්ඛවෙ, ධම්මපතිරූපකෙන සමග්ගකම්මං? ඤත්තිදුතියෙ චෙ භික්ඛවෙ, කම්මෙ පඨමං කම්මවාචං අනුසාවෙති, පච්ඡා ඤත්තිං ඨපෙති, යාවතිකා භික්ඛූ කම්මප්පත්තා, තෙ ආගතා හොන්ති, ඡන්දො ආහටො හොති, සම්මුඛීභූතා න පටික්කොසන්ති, – ධම්මපතිරූපකෙන සමග්ගකම්මං.
65. “ඤත්තිචතුත්ථෙ චෙ භික්ඛවෙ, කම්මෙ පඨමං කම්මවාචං අනුසාවෙති, පච්ඡා ඤත්තිං ඨපෙති, යාවතිකා භික්ඛූ කම්මප්පත්තා, තෙ ආගතා හොන්ති, ඡන්දාරහානං ඡන්දො ආහටො හොති, සම්මුඛීභූතා න පටික්කොසන්ති, ධම්මපතිරූපකෙන සමග්ගකම්මං, ඉදං වුච්චති භික්ඛවෙ, ධම්මපතිරූපකෙන සමග්ගකම්මං.
66. “කතමඤ්ච භික්ඛවෙ, ධම්මෙන සමග්ගකම්මං? ඤත්තිදුතියෙ චෙ භික්ඛවෙ, කම්මෙ පඨමං ඤත්තිං ඨපෙති, පච්ඡා එකාය කම්මවාචාය කම්මං කරොති, යාවතිකා භික්ඛූ කම්මප්පත්තා, තෙ ආගතා හොන්ති, ඡන්දාරහානං ඡන්දො ආහටො හොති, සම්මුඛීභූතා න පටික්කොසන්ති, ධම්මෙන සමග්ගකම්මං.
67. “ඤත්තිචතුත්ථෙ චෙ භික්ඛවෙ, කම්මෙ පඨමං ඤත්තිං ඨපෙති, පච්ඡා තීහි කම්මවාචාහි කම්මං කරොති, යාවතිකා භික්ඛූ කම්මප්පත්තා, තෙ ආගතා හොන්ති, ඡන්දාරහානං ඡන්දො ආහටො හොති, සම්මුඛීභූතා න පටික්කොසන්ති, ධම්මෙන සමග්ගකම්මං. ඉදං වුච්චති භික්ඛවෙ, ධම්මෙන සමග්ගකම්මං.”
68. “පඤ්ච සඞ්ඝා: චතුවග්ගො භික්ඛුසඞ්ඝො පඤ්චවග්ගො භික්ඛුසඞ්ඝො, දසවග්ගො භික්ඛුසඞ්ඝො, වීසතිවග්ගො භික්ඛුසඞ්ඝො, අතිරෙකවීසතිවග්ගො භික්ඛුසඞ්ඝො.
69. “තත්ර භික්ඛවෙ, ය්වායං චතුවග්ගො භික්ඛුසඞ්ඝො, ඨපෙත්වා තීණි කම්මානි: උපසම්පදං පවාරණං අබ්භානං, ධම්මෙන සමග්ගො සබ්බකම්මෙසු කම්මප්පත්තො.
70. “තත්ර භික්ඛවෙ, ය්වායං පඤ්චවග්ගො භික්ඛුසඞ්ඝො, ඨපෙත්වා ද්වෙ කම්මානි: මජ්ඣිමෙසු ජනපදෙසු උපසම්පදං, අබ්භානං, ධම්මෙන සමග්ගො සබ්බකම්මෙසු කම්මප්පත්තො.
71. “තත්ර භික්ඛවෙ, ය්වායං දසවග්ගො භික්ඛුසඞ්ඝො, ඨපෙත්වා එකං කම්මං: අබ්භානං, ධම්මෙන සමග්ගො සබ්බකම්මෙසු කම්මප්පත්තො.
72. “තත්ර භික්ඛවෙ, ය්වායං වීසතිවග්ගො භික්ඛුසඞ්ඝො ධම්මෙන සමග්ගො සබ්බකම්මෙසු කම්මප්පත්තො.
73. “තත්ර භික්ඛවෙ, ය්වායං අතිරෙකවීසතිවග්ගො භික්ඛුසඞ්ඝො, ධම්මෙන සමග්ගො සබ්බකම්මෙසු කම්මප්පත්තො.”
74. “චතුවග්ගකරණං චෙ භික්ඛවෙ, කම්මං භික්ඛුනීචතුත්ථො කම්මං කරෙය්ය, අකම්මං. න ච කරණීයං. චතුවග්ගකරණං චෙ භික්ඛවෙ, කම්මං සික්ඛමානාචතුත්ථො කම්මං කරෙය්ය, අකම්මං. න ච කරණීයං. -පෙ- සාමණෙරචතුත්ථො කම්මං කරෙය්ය, අකම්මං න ච කරණීයං. සාමණෙරිචතුත්ථො කම්මං කරෙය්ය, අකම්මං. න ච කරණීයං. සික්ඛං පච්චක්ඛාතකචතුත්ථො කම්මං කරෙය්ය, අකම්මං. න ච කරණීයං. අන්තිමවත්ථුං අජ්ඣාපන්නකචතුත්ථො කම්මං කරෙය්ය, අකම්මං. න ච කරණීයං. ආපත්තියා අදස්සනෙ උක්ඛිත්තකචතුත්ථො කම්මං කරෙය්ය, අකම්මං. න ච කරණීයං. ආපත්තියා අප්පටිකම්මෙ උක්ඛිත්තකචතුත්ථො කම්මං කරෙය්ය, අකම්මං. න ච කරණීයං. පාපිකාය දිට්ඨියා අප්පටිනිස්සග්ගෙ උක්ඛිත්තකචතුත්ථො කම්මං කරෙය්ය, අකම්මං. න ච කරණීයං. පණ්ඩකචතුත්ථො කම්මං කරෙය්ය, අකම්මං. න ච කරණීයං. ථෙය්යසංවාසකචතුත්ථො කම්මං කරෙය්ය, අකම්මං න ච කරණීයං. තිත්ථියපක්කන්තකචතුත්ථො කම්මං කරෙය්ය, අකම්මං න ච කරණීයං. තිරච්ඡානගතචතුත්ථො කම්මං කරෙය්ය, අකම්මං න ච කරණීයං. මාතුඝාතකචතුත්ථො කම්මං කරෙය්ය, අකම්මං න ච කරණීයං. පිතුඝාතකචතුත්ථො කම්මං කරෙය්ය, අකම්මං. න ච කරණීයං. අරහන්තඝාතකචතුත්ථො කම්මං කරෙය්ය, අකම්මං න ච කරණීයං. භික්ඛුනිදූසකචතුත්ථො කම්මං කරෙය්ය, අකම්මං න ච කරණීයං. සඞ්ඝභෙදකචතුත්ථො කම්මං කරෙය්ය, අකම්මං න ච කරණීයං. ලොහිතුප්පාදකචතුත්ථො කම්මං කරෙය්ය, අකම්මං න ච කරණීයං. උභතොබ්යඤ්ජනකචතුත්ථො කම්මං කරෙය්ය, අකම්මං න ච කරණීයං. නානාසංවාසකචතුත්ථො කම්මං කරෙය්ය, අකම්මං. න ච කරණීයං. නානාසීමාය ඨිතචතුත්ථො කම්මං කරෙය්ය, අකම්මං න ච කරණීයං. ඉද්ධියා වෙහාසෙ ඨිතචතුත්ථො කම්මං කරෙය්ය, අකම්මං න ච කරණීයං. යස්ස සඞ්ඝො කම්මං කරොති, තංචතුත්ථො කම්මං කරෙය්ය, අකම්මං න ච කරණීයං.”{1}
චතුවග්ගකරණං.
1. “පඤ්චවග්ගකරණං චෙ භික්ඛවෙ, කම්මං භික්ඛුනීපඤ්චමො කම්මං කරෙය්ය, අකම්මං. න ච කරණීයං. පඤ්චවග්ගකරණං චෙ භික්ඛවෙ, කම්මං සික්ඛමානපඤ්චමො{1} කම්මං කරෙය්ය, අකම්මං. න ච කරණීයං -පෙ- සාමණෙරපඤ්චමො කම්මං කරෙය්ය -පෙ- සාමණෙරිපඤ්චමො කම්මං කරෙය්ය -පෙ- සික්ඛං පච්චක්ඛාතකපඤ්චමො කම්මං කරෙය්ය -පෙ- අන්තිමවත්ථුං අජ්ඣාපන්නකපඤ්චමො කම්මං කරෙය්ය -පෙ- ආපත්තියා අදස්සනෙ උක්ඛිත්තකපඤ්චමො කම්මං කරෙය්ය -පෙ- ආපත්තියා අප්පටිකම්මෙ උක්ඛිත්තකපඤ්චමො කම්මං කරෙය්ය -පෙ- පාපිකාය දිට්ඨියා අප්පටිනිස්සග්ගෙ උක්ඛිත්තකපඤ්චමො කම්මං කරෙය්ය -පෙ- පණ්ඩකපඤ්චමො කම්මං කරෙය්ය -පෙ- ථෙය්යසංවාසකපඤ්චමො කම්මං කරෙය්ය -පෙ- තිත්ථියපක්කන්තකපඤ්චමො කම්මං කරෙය්ය -පෙ- තිරච්ඡානගතපඤ්චමො කම්මං කරෙය්ය -පෙ- මාතුඝාතකපඤ්චමො කම්මං කරෙය්ය -පෙ- පිතුඝාතකපඤ්චමො කම්මං කරෙය්ය -පෙ- අරහන්තඝාතකපඤ්චමො කම්මං කරෙය්ය -පෙ- භික්ඛුනිදූසකපඤ්චමො කම්මං කරෙය්ය -පෙ- සඞ්ඝභෙදකපඤ්චමො කම්මං කරෙය්ය -පෙ- ලොහිතුප්පාදකපඤ්චමො කම්මං කරෙය්ය -පෙ- උභතොබ්යඤ්ජනකපඤ්චමො කම්මං කරෙය්ය -පෙ- නානාසංවාසකපඤ්චමො කම්මං කරෙය්ය -පෙ- නානාසීමාය ඨිතපඤ්චමො කම්මං කරෙය්ය -පෙ- ඉද්ධියා වෙහාසෙ ඨිතපඤ්චමො කම්මං කරෙය්ය -පෙ- යස්ස සඞ්ඝො කම්මං කරොති, තංපඤ්චමො කම්මං කරෙය්ය, අකම්මං. න ච කරණීයං.”{2}
පඤ්චවග්ගකරණං.
1. “දසවග්ගකරණං චෙ භික්ඛවෙ, කම්මං භික්ඛුනීදසමො කම්මං කරෙය්ය, අකම්මං. න ච කරණීයං. දසවග්ගකරණං චෙ භික්ඛවෙ, කම්මං සික්ඛමානදසමො කම්මං කරෙය්ය, අකම්මං න ච කරණීයං -පෙ- යස්ස සඞ්ඝො කම්මං කරොති, තංදසමො කම්මං කරෙය්ය, අකම්මං. න ච කරණීයං.”{2}
දසවග්ගකරණං.
1. “වීසතිවග්ගකරණඤ්චෙ භික්ඛවෙ, කම්මං භික්ඛුණීවීසො කම්මං කරෙය්ය, අකම්මං. න ච කරණීයං. වීසතිවග්ගකරණඤ්චෙ භික්ඛවෙ, කම්මං සික්ඛමානවීසො කම්මං කරෙය්ය, අතම්මං. න ච කරණීයං. -පෙ- සාමණෙරවීසො කම්මං කරෙය්ය -පෙ- සාමණෙරීවීසො කම්මං කරෙය්ය -පෙ- සික්ඛං පච්චක්ඛාතකවීසො කම්මං කරෙය්ය -පෙ- අන්තිමවත්ථුං අජ්ඣාපන්නකවීසො කම්මං කරෙය්ය -පෙ- ආපත්තියා අදස්සනෙ උක්ඛිත්තකවීසො කම්මං කරෙය්ය -පෙ- ආපත්තියා අප්පටිකම්මෙ උක්ඛිත්තකවීසො කම්මං කරෙය්ය -පෙ- පාපිකාය දිට්ඨියා අප්පටිනිස්සග්ගෙ උක්ඛිත්තකවීසො කම්මං කරෙය්ය -පෙ- පණ්ඩකවීසො කම්මං කරෙය්ය -පෙ- ථෙය්යසංවාසකවීසො කම්මං කරෙය්ය -පෙ- තිත්ථියපක්කන්තකවීසො කම්මං කරෙය්ය -පෙ- තිරච්ඡානගතවීසො කම්මං කරෙය්ය -පෙ- මාතුඝාතකවීසො කම්මං කරෙය්ය -පෙ- පිතුඝාතකවීසො කම්මං කරෙය්ය -පෙ- අරහන්තඝාතකවීසො කම්මං කරෙය්ය -පෙ- භික්ඛුණීදූසකවීසො කම්මං කරෙය්ය -පෙ- සඞ්ඝභෙදකවීසො කම්මං කරෙය්ය -පෙ- ලොහිතුප්පාදකවීසො කම්මං කරෙය්ය -පෙ- උභතොබ්යඤ්ජනකවීසො කම්මං කරෙය්ය -පෙ- නානාසංවාසකවීසො කම්මං කරෙය්ය -පෙ- නානාසීමාය ඨිතවීසො කම්මං කරෙය්ය -පෙ- ඉද්ධියා වෙහාසෙ ඨිතවීසො කම්මං කරෙය්ය -පෙ- යස්ස සඞ්ඝො කම්මං කරොති, තංවීසො කම්මං කරෙය්ය, අකම්මං න ච කරණීයං.”
වීසතිවග්ගකරණං
1. “පාරිවාසිකචතුත්ථො චෙ භික්ඛවෙ, පරිවාසං දදෙය්ය, මූලාය පටිකස්සෙය්ය, මානත්තං දදෙය්ය, තංවීසො අබ්භෙය්ය, අකම්මං. න ච කරණීයං. මූලාය පටිකස්සනාරහචතුත්ථො චෙ භික්ඛවෙ, පරිවාසං දදෙය්ය, මූලාය පටිකස්සෙය්ය, මානත්තං දදෙය්ය, තංවීසො අබ්භෙය්ය, අකම්මං. න ච කරණීයං. මානත්තාරහචතුත්ථො චෙ භික්ඛවෙ, පරිවාසං දදෙය්ය, මූලාය පටිකස්සෙය්ය, මානත්තං දදෙය්ය, තංවීසො අබ්භෙය්ය. අකම්මං න ච කරණීයං. මානත්තචාරිකචතුත්ථො චෙ භික්ඛවෙ, පරිවාසං දදෙය්ය, මූලාය පටිකස්සෙය්ය, මානත්තං දදෙය්ය, තංවීසො අබ්භෙය්ය, අකම්මං. න ච කරණීයං. අබ්භානාරහචතුත්ථො චෙ භික්ඛවෙ, පරිවාසං දදෙය්ය, මූලාය පටිකස්සෙය්ය, මානත්තං දදෙය්ය, තංවීසො අබ්භෙය්ය, අකම්මං. න ච කරණීයං.”
2. “එකච්චස්ස භික්ඛවෙ, සඞ්ඝමජ්ඣෙ පටික්කොසනා රූහති, එකච්චස්ස න රූහති. කස්ස ච භික්ඛවෙ, සඞ්ඝමජ්ඣෙ පටික්කොසනා න රූහති? භික්ඛුනියා භික්ඛවෙ, සඞ්ඝමජ්ඣෙ පටික්කොසනා න රූහති. සික්ඛමානාය භික්ඛවෙ -පෙ- සාමණෙරස්ස භික්ඛවෙ, -පෙ- සාමණෙරාය{1} භික්ඛවෙ, -පෙ- සික්ඛං පච්චක්ඛාතකස්ස භික්ඛවෙ, -පෙ- අන්තිමවත්ථුං අජ්ඣාපන්නකස්ස භික්ඛවෙ, -පෙ- උම්මත්තකස්ස භික්ඛවෙ, -පෙ- ඛිත්තචිත්තස්ස භික්ඛවෙ, -පෙ- වෙදනාට්ටස්ස භික්ඛවෙ, -පෙ- ආපත්තියා අදස්සනෙ උක්ඛිත්තකස්ස භික්ඛවෙ, -පෙ- ආපත්තියා අප්පටිකම්මෙ උක්ඛිත්තකස්ස භික්ඛවෙ, -පෙ- පාපිකාය දිට්ඨියා අප්පටිනිස්සග්ගෙ උක්ඛිත්තකස්ස භික්ඛවෙ, -පෙ- පණ්ඩකස්ස භික්ඛවෙ -පෙ- ථෙය්යසංවාසකස්ස භික්ඛවෙ, -පෙ- තිත්ථියපක්කන්තකස්ස භික්ඛවෙ -පෙ- තිරච්ඡානගතස්ස භික්ඛවෙ, -පෙ- මාතුඝාතකස්ස භික්ඛවෙ -පෙ- පිතුඝාතකස්ස භික්ඛවෙ, -පෙ- අරහන්තඝාතකස්ස භික්ඛවෙ, -පෙ- භික්ඛුනීදූසකස්ස භික්ඛවෙ, -පෙ- සඞ්ඝභෙදකස්ස භික්ඛවෙ, -පෙ- ලොහිතුප්පාදකස්ස භික්ඛවෙ, -පෙ- උභතොබ්යඤ්ජනකස්ස භික්ඛවෙ, -පෙ- නානාසංවාසකස්ස භික්ඛවෙ, -පෙ- නානාසීමාය ඨිතස්ස භික්ඛවෙ, -පෙ- ඉද්ධියා වෙහාසෙ ඨිතස්ස භික්ඛවෙ, -පෙ- යස්ස සඞ්ඝො කම්මං කරොති, තස්ස ච{2} භික්ඛවෙ, සඞ්ඝමජ්ඣෙ පටික්කොසනා න රූහති. ඉමෙසං ඛො භික්ඛවෙ, සඞ්ඝමජ්ඣෙ පටික්කොසනා න රූහති.
3. “කස්ස ච භික්ඛවෙ, සඞ්ඝමජ්ඣෙ පටික්කොසනා රූහති? භික්ඛුස්ස භික්ඛවෙ, පකතත්තස්ස සමානසංවාසකස්ස සමානසීමාය ඨිතස්ස අන්තමසො ආනන්තරිකස්සාපි{3} භික්ඛුනො විඤ්ඤාපෙන්තස්ස සඞ්ඝමජ්ඣෙ පටික්කොසනා රූහති. ඉමස්ස ඛො භික්ඛවෙ, සඞ්ඝමජ්ඣෙ පටික්කොසනා රූහති.
4. “ද්වෙමා භික්ඛවෙ, නිස්සාරණා: අත්ථි භික්ඛවෙ, පුග්ගලො අප්පත්තො නිස්සාරණං, තඤ්චෙ සඞ්ඝො නිස්සාරෙති, එකච්චො සුනිස්සාරිතො. එකච්චො දුන්නිස්සාරිතො.
5. “කතමො ච භික්ඛවෙ, පුග්ගලො අප්පත්තො නිස්සාරණං, තඤ්චෙ සඞ්ඝො නිස්සාරෙති දුන්නිස්සාරිතො? ඉධ පන භික්ඛවෙ, භික්ඛු සුද්ධො හොති අනාපත්තිකො. තඤ්චෙ සඞ්ඝො නිස්සාරෙති, දුන්නිස්සාරිතො. අයං වුච්චති භික්ඛවෙ, පුග්ගලො අප්පත්තො නිස්සාරණං, තඤ්චෙ සඞ්ඝො නිස්සාරෙති, දුන්නිස්සාරිතො.
6. “කතමො ච භික්ඛවෙ, පුග්ගලො අප්පත්තො නිස්සාරණං, තඤ්චෙ සඞ්ඝො නිස්සාරෙති සුනිස්සාරිතො? ඉධ පන භික්ඛවෙ, භික්ඛු බාලො හොති අබ්යත්තො ආපත්තිබහුලො අනපදානො ගිහීහි{4} සංසට්ඨො විහරති අනනුලොමිකෙහි ගිහීසංසග්ගෙහි, තඤ්චෙ සඞ්ඝො නිස්සාරෙති, සුනිස්සාරිතො. අයං වුච්චති භික්ඛවෙ, පුග්ගලො අප්පත්තො නිස්සාරණං, තඤ්චෙ සඞ්ඝො නිස්සාරෙති, සුනිස්සාරිතො.
7. “ද්වෙමා භික්ඛවෙ, ඔසාරණා: අත්ථි භික්ඛවෙ, පුග්ගලො අප්පත්තො ඔසාරණං. තඤ්චෙ සඞ්ඝො ඔසාරෙති, එකච්චො සොසාරිතො. එකච්චො දොසාරිතො.
8. “කතමො ච භික්ඛවෙ, පුග්ගලො අප්පත්තො ඔසාරණං, තඤ්චෙ සඞ්ඝො ඔසාරෙති, දොසාරිතො? පණ්ඩකො භික්ඛවෙ, අප්පත්තො ඔසාරණං, තඤ්චෙ සඞ්ඝො ඔසාරෙති, දොසාරිතො. ථෙය්යසංවාසකො භික්ඛවෙ, අප්පත්තො ඔසාරණං, තඤ්චෙ සඞ්ඝො ඔසාරෙති දොසාරිතො -පෙ- තිත්ථියපක්කන්තකො භික්ඛවෙ, -පෙ- තිරච්ඡානගතො භික්ඛවෙ, -පෙ- මාතුඝාතකො භික්ඛවෙ, -පෙ- පිතුඝාතකො භික්ඛවෙ, -පෙ- අරහන්තඝාතකො භික්ඛවෙ, -පෙ- භික්ඛුණීදූසකො භික්ඛවෙ, -පෙ- සඞ්ඝභෙදකො භික්ඛවෙ, -පෙ- ලොහිතුප්පාදකො භික්ඛවෙ -පෙ- උභතොබ්යඤ්ජනකො භික්ඛවෙ, අප්පත්තො ඔසාරණං, තඤ්චෙ සඞ්ඝො ඔසාරෙති, දොසාරිතො. අයං වුච්චති භික්ඛවෙ, පුග්ගලො අප්පත්තො ඔසාරණං, තඤ්චෙ{1} සඞ්ඝො ඔසාරෙති, දොසාරිතො. ඉමෙ වුච්චන්ති භික්ඛවෙ, පුග්ගලා අප්පත්තා ඔසාරණං, තෙ චෙ සඞ්ඝො ඔසාරෙති, දොසාරිතා.
9. “කතමො ච භික්ඛවෙ, පුග්ගලො අප්පත්තො ඔසාරණං, තඤ්චෙ සඞ්ඝො ඔසාරෙති සොසාරිතො? හත්ථච්ඡින්නො භික්ඛවෙ, අප්පත්තො ඔසාරණං, තඤ්චෙ සඞ්ඝො ඔසාරෙති, සොසාරිතො. පාදච්ඡින්නො භික්ඛවෙ, -පෙ- හත්ථපාදච්ඡින්නො භික්ඛවෙ, -පෙ- කණ්ණච්ඡින්නො භික්ඛවෙ, -පෙ- නාසච්ඡින්නො භික්ඛවෙ, -පෙ- කණ්ණනාසච්ඡින්නො භික්ඛවෙ, -පෙ- අඞ්ගුලිච්ඡින්නො භික්ඛවෙ, -පෙ- අළච්ඡින්නො භික්ඛවෙ, -පෙ- කණ්ඩරච්ඡින්නො භික්ඛවෙ, -පෙ- ඵණහත්ථකො භික්ඛවෙ, -පෙ- ඛුජ්ජො භික්ඛවෙ, -පෙ- වාමනො භික්ඛවෙ, -පෙ- ගලගණ්ඩී භික්ඛවෙ, -පෙ- ලක්ඛණාහතො භික්ඛවෙ, -පෙ- කසාහතො භික්ඛවෙ, -පෙ- ලිඛිතකො භික්ඛවෙ, -පෙ- සීපදිකො භික්ඛවෙ, -පෙ- පාපරොගී භික්ඛවෙ, -පෙ- පරිසදූසකො භික්ඛවෙ, -පෙ- කාණො භික්ඛවෙ, -පෙ- කුණී භික්ඛවෙ, -පෙ- ඛඤ්ජො භික්ඛවෙ, -පෙ- පක්ඛහතො භික්ඛවෙ, -පෙ- ඡින්නිරියාපථො භික්ඛවෙ, -පෙ- ජරාදුබ්බලො භික්ඛවෙ, -පෙ- අන්ධො භික්ඛවෙ, -පෙ- මූගො භික්ඛවෙ, -පෙ- බධිරො භික්ඛවෙ, -පෙ- අන්ධමූගො භික්ඛවෙ, -පෙ- අන්ධබධිරො භික්ඛවෙ, -පෙ- මූගබධිරො භික්ඛවෙ, -පෙ- අන්ධමූගබධිරො භික්ඛවෙ, අප්පත්තො ඔසාරණං. තඤ්චෙ සඞ්ඝො ඔසාරෙති, සොසාරිතො. අයං වුච්චති භික්ඛවෙ, පුග්ගලො අප්පත්තො ඔසාරණං, තඤ්චෙ සඞ්ඝො ඔසාරෙති, සොසාරිතො. ඉමෙ වුච්චන්ති භික්ඛවෙ, පුග්ගලා අප්පත්තා ඔසාරණං, තෙ චෙ සඞ්ඝො ඔසාරෙති, සොසාරිතා.”
වාසභගාමභාණවාරං පඨමං.
1. “ඉධ පන භික්ඛවෙ, භික්ඛුස්ස න හොති ආපත්ති දට්ඨබ්බා. තමෙනං චොදෙති සඞ්ඝො වා සම්බහුලා වා එකපුග්ගලො වා ‘ආපත්තිං ත්වං ආවුසො, ආපන්නො, පස්සසෙතං ආපත්ති’න්ති? සො එවං වදෙති: “නත්ථි මෙ ආවුසො, ආපත්ති යමහං පස්සෙය්ය’න්ති. තං සඞ්ඝො ආපත්තියා අදස්සනෙ උක්ඛිපති, අධම්මකම්මං.
2. “ඉධ පන, භික්ඛවෙ, භික්ඛුස්ස න හොති ආපත්ති පටිකාතබ්බා. තමෙනං චොදෙති සඞ්ඝො වා සම්බහුලා වා එකපුග්ගලො වා ‘ආපත්තිං ත්වං ආවුසො, ආපන්නො. පටිකරොහි තං ආපත්ති’න්ති. සො එවං වදෙති:– “නත්ථි මෙ ආවුසො, ආපත්ති යමයං පටිකරෙය්ය”න්ති. තං සඞ්ඝො ආපත්තියා අප්පටිකම්මෙ උක්ඛිපති, අධම්මකම්මං.
3. “ඉධ පන භික්ඛවෙ, භික්ඛුස්ස න හොති පාපිකා දිට්ඨි පටිනිස්සජෙතා. තමෙනං චොදෙති සඞ්ඝො වා සම්බහුලා වා එකපුග්ගලො වා ‘පාපිකා තෙ ආවුසො, දිට්ඨි. පටිනිස්සජෙතං පාපිකං දිට්ඨි’න්ති. සො එවං වදෙති: ‘නත්ථි මෙ ආවුසො, පාපිකා දිට්ඨි යමහං පටිනිස්සජ්ජෙය්ය’න්ති. තං සඞ්ඝො පාපිකාය දිට්ඨියා අප්පටිනිස්සග්ගෙ උක්ඛිපති, අධම්මකම්මං.