115. “එවං භන්තෙ”ති ඛො ආයස්මා සොණො ආයස්මතො මහාකච්චානස්ස පටිස්සුත්වා උට්ඨායාසනා ආයස්මන්තං මහාකච්චානං අභිවාදෙත්වා පදක්ඛිණං කත්වා සෙනාසනං සංසාමෙත්වා පත්තචීවරං ආදාය යෙන සාවත්ථි තෙන පක්කාමි.
116. අනුපුබ්බෙන යෙන සාවත්ථි ජෙතවනං අනාථපිණ්ඩිකස්ස ආරාමො යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං නිසීදි. අථ ඛො භගවා ආයස්මන්තං ආනන්දං ආමන්තෙසි: “ඉමස්ස ආනන්ද, ආගන්තුකස්ස භික්ඛුනො සෙනාසනං පඤ්ඤාපෙහී”ති.
117. අථ ඛො ආයස්මා ආනන්දො “යස්ස ඛො මං භගවා ආණාපෙති ‘ඉමස්ස ආනන්ද, ආගන්තුකස්ස භික්ඛුනො සෙනාසනං පඤ්ඤාපෙහී’ති, ඉච්ඡති භගවා තෙන භික්ඛුනා සද්ධිං එකවිහාරෙ වත්ථුං. ඉච්ඡති භගවා ආයස්මතා සොණෙන සද්ධිං එකවිහාරෙ වත්ථු”න්ති යස්මිං විහාරෙ භගවා විහරති, තස්මිං විහාරෙ ආයස්මතො සොණස්ස සෙනාසනං පඤ්ඤාපෙසි.
118. අථ ඛො භගවා බහුදෙව රත්තිං අජ්ඣොකාසෙ වීතිනාමෙත්වා විහාරං පාවිසි. ආයස්මාපි ඛො සොණො බහුදෙව රත්තිං අජ්ඣොකාසෙ වීතිනාමෙත්වා විහාරං පාවිසි.
119. අථ ඛො භගවා රත්තියා පච්චූසසමයං පච්චුට්ඨාය ආයස්මන්තං සොණං අජ්ඣෙසි: “පටිභාතු තං භික්ඛු ධම්මො භාසිතු”න්ති. “එවං භන්තෙ”ති ඛො ආයස්මා සොණො භගවතො පටිස්සුණිත්වා සබ්බානෙව අට්ඨකවග්ගිකානි සරෙන අභාසි.
120. අථ ඛො භගවා ආයස්මතො සොණස්ස සරභඤ්ඤපරියොසානෙ අබ්භනුමොදි: සාධු. සාධු. භික්ඛු. ‘සුග්ගහීතානි ඛො තෙ භික්ඛු, අට්ඨකවග්ගිකානි සුමනසිකතානි සූපධාරිතානි. කල්යාණියාසි{1} වාචාය සමන්නාගතො විස්සට්ඨාය, අත්ථස්ස විඤ්ඤාපනියා. කති වස්සොසි ත්වං භික්ඛූ?”ති. “එකවස්සො අහං භගවා”ති. “කිස්ස පන ත්වං භික්ඛු, එවං චිරං අකාසී?”ති. “චිරදිට්ඨො{2} මෙ භන්තෙ, කාමෙසු ආදීනවො. අපි ච සම්බාධා ඝරාවාසො{3} බහුකිච්චො බහුකරණීයො{4}”ති.
121. අථ ඛො භගවා එතමත්ථං විදිත්වා තායං වෙලායං ඉමං උදානං උදානෙසි:
“දිස්වා ආදීනවං ලොකෙ ඤත්වා ධම්මං නිරූපධිං, අරියො න රමති පාපෙ පාපෙ න රමතී සුචී” ති.
122. අථ ඛො ආයස්මා සොණො “පටිසම්මොදති ඛො මං භගවා. අයං ඛ්වස්ස කාලො යං මෙ උපජ්ඣායො පරිදස්සී”ති{1} උට්ඨායාසනා එකංසං උත්තරාසඞ්ගං කරිත්වා භගවතො පාදෙ සිරසා නිපතිත්වා භගවන්තං එතදවොච: “උපජ්ඣායො මෙ භන්තෙ, ආයස්මා මහාකච්චානො භගවතො පාදෙ සිරසා වන්දති. එවඤ්ච වදෙති:
123. “අවන්තිදක්ඛිණාපථො භන්තෙ, අප්පභික්ඛුකො. තිණ්ණං මෙ වස්සානං අච්චයෙන කිච්ඡෙන කසිරෙන තතො තතො දසවග්ගං භික්ඛුසඞ්ඝං සන්නිපාතාපෙත්වා උපසම්පදං අලත්ථං. අප්පෙව නාම භගවා අවන්තිදක්ඛිණාපථෙ අප්පතරෙන ගණෙන උපසම්පදං අනුජානෙය්ය.
124. “අවන්තිදක්ඛිණාපථෙ භන්තෙ, කණ්හුත්තරා භූමි ඛරා ගොකණ්ටකහතා. අප්පෙවනාම භගවා අවන්ති දක්ඛිණාපථෙ ගුණඞ්ගණූපාහනං අනුජානෙය්ය.
125. “අවන්තිදක්ඛිණාපථෙ භන්තෙ, නහානගරුකා මනුස්සා උදකසුද්ධිකා. අප්පෙව නාම භගවා අවන්තිදක්ඛිණාපථෙ ධුවනහානං අනුජානෙය්ය.
126. “අවන්තිදක්ඛිණාපථෙ භන්තෙ, චම්මානි අත්ථරණානි: එළකචම්මං අජචම්මං මිගචම්මං. සෙය්යථාපි භන්තෙ, මජ්ඣිමෙසු ජනපදෙසු එරගු මොරගු මජ්ජාරු ජන්තු, එවමෙව ඛො භන්තෙ අවන්තිදක්ඛිණාපථෙ චම්මානි අත්ථරණානි එළකචම්මං අජචම්මං මිගචම්මං. අප්පෙව නාම භගවා අවන්තිදක්ඛිණාපථෙ චම්මානි අත්ථරණානි අනුජානෙය්ය: එළකචම්මං අජචම්මං මිගචම්මං.”
127. “එතරහි භන්තෙ, මනුස්සා නිස්සීමගතානං භික්ඛූනං චීවරං දෙන්ති: ‘ඉමං චීවරං ඉත්ථන්නාමස්ස දෙමා’ති. තෙ ආගන්ත්වා ආරොචෙන්ති: ‘ඉත්ථන්නාමෙහි තෙ ආවුසො මනුස්සෙහි චීවරං දින්න’න්ති. තෙ කුක්කුච්චායන්තා න සාදියන්ති ‘මා නො නිස්සග්ගියං අහොසී’ති. අප්පෙව නාම භගවා චීවරෙ පරියායං ආචික්ඛෙය්යා”ති.
128. අථ ඛො භගවා එතස්මිං නිදානෙ එතස්මිං පකරණෙ, ධම්මිං කථං කත්වා භික්ඛූ ආමන්තෙසි. “අවන්තිදක්ඛිණාපථො භික්ඛවෙ, අප්පභික්ඛුකො. අනුජානාමි භික්ඛවෙ, සබ්බපච්චන්තිමෙසු ජනපදෙසු විනයධරපඤ්චමෙන ගණෙන උපසම්පදං.
129. “තත්රිමෙ පච්චන්තිමා ජනපදා: පුරත්ථිමාය දිසාය කජඞ්ගලං{2} නාම නිගමො. තස්සාපරෙන{3} මහාසාලා. තතො පරා පච්චන්තිමා ජනපදා. ඔරතො මජ්ඣෙ. පුරත්ථිමදක්ඛිණාය දිසාය සල්ලවතී{4} නාම නදී. තතො පරා පච්චන්තිමා ජනපදා. ඔරතො මජ්ඣෙ. දක්ඛිණාය දිසාය සෙතකණ්ණිකං නාම නිගමො. තතො පරා පච්චන්තිමා ජනපදා. ඔරතො මජ්ඣෙ. පච්ඡිමාය දිසාය ථූණං නාම බ්රාහ්මණගාමො. තතො පරා පච්චන්තිමා ජනපදා, ඔරතො මජ්ඣෙ. උත්තරාය දිසාය උසීරද්ධජො නාම පබ්බතො. තතො පරා පච්චන්තිමා ජනපදා. ඔරතො මජ්ඣෙ. අනුජානාමි භික්ඛවෙ, එවරූපෙසු පච්චන්තිමෙසු ජනපදෙසු විනයධරපඤ්චමෙන ගණෙන උපසම්පදං.”
130. “අවන්තිදක්ඛිණාපථෙ භික්ඛවෙ, කණ්හුත්තරා භූමි ඛරා ගොකණ්ටකහතා. අනුජානාමි භික්ඛවෙ, සබ්බපච්චන්තිමෙසු ජනපදෙසු ගණඞ්ගණූපාහනං.”
131. “අවන්තිදක්ඛිණාපථෙ භික්ඛවෙ, නහානගරුකා මනුස්සා උදකසුද්ධිකා. අනුජානාමි භික්ඛවෙ, සබ්බපච්චන්තිමෙසු ජනපදෙසු ධුවනහානං.”
132. “අවන්තිදක්ඛිණාපථෙ භික්ඛවෙ, චම්මානි අත්ථරණානි: එළකචම්මං අජචම්මං මිගචම්මං සෙය්යථාපි භික්ඛවෙ, මජ්ඣිමෙසු ජනපදෙසු එරගු මොරගු මජ්ජාරු ජන්තු, එවමෙව ඛො භික්ඛවෙ, අවන්තිදක්ඛිණාපථෙ චම්මානි අත්ථරණානි: එළකචම්මං අජචම්මං මිගචම්මං. අනුජානාමි භික්ඛවෙ, සබ්බපච්චන්තිමෙසු ජනපදෙසු චම්මානි අත්ථරණානි: එළකචම්මං අජචම්මං මිගචම්මං.”
133. “ඉධ පන භික්ඛවෙ, මනුස්සා නිස්සීමගතානං භික්ඛූනං චීවරං දෙන්ති: ‘ඉමං චීවරං ඉත්ථන්නාමස්ස දෙමා’ති. අනුජානාමි භික්ඛවෙ, සාදියිතුං{1}. න තාව තං ගණනූපගං යාව න හත්ථං ගච්ඡතී”ති.
චම්මක්ඛන්ධකො නිට්ඨිතො පංචමො.
ඉමම්හි ඛන්ධකෙ වත්ථූ තෙසට්ඨි.
තස්ස උද්දානං:
1. රාජා ච මාගධො සොණො අසීතිසහස්සිස්සරො, සාගතො ගිජ්ඣකූටම්හි බහුං දස්සෙසි උත්තරිං{1}.
2. පබ්බජ්ජාරද්ධභිජ්ජිංසු වීණං එකපලාසිකං, නීලා පීතා ලොහිතිකා{2} මඤ්ජෙට්ඨා කණ්හමෙව ච.
3. මහාරඞ්ගා මහානාමා වට්ටිකා ච{3} පටික්ඛිපි; ඛල්ලිකා{4} පුට පාළී ච තූලතිත්තිරමෙණ්ඩජා.
4. විච්ඡිකා මොරචිත්රා ච{5} සීහබ්යග්ඝා ච දීපිකා, අජිනුද්දා මජ්ජාරී ච කාළොලුක{6} පරික්ඛටා.
5. ඵලිතූපාහනා{7} ඛීලා ධොතඛාණුඛටඛටා, තාලවෙළුතිණඤ්චෙ ව මුඤ්ජබබ්බජහින්තලා{8}.
6. කමලකම්බලසොවණ්ණා රූපිකා මණි වෙළුරි, ඵළිකා කංසකාචා ච තිපු සීසඤ්ච තම්බකා.
7. ගාවී යානං ගිලානො ච පුරිසායුත්තං{9} සිවිකා, සයනානි මහාචම්මා, ගොචම්මෙහි ච පාපකො.
8. ගිහීනං චම්මවද්ධෙහි පවිසන්ති ගිලානකා{10} මහාකච්චායනො සොණො, සරෙනට්ඨකවග්ගිකං{11}.
9. උපසම්පදං පඤ්චහි ගණඞ්ගණා ධුවසිනායනා{12}, චම්මත්ථරණානුඤ්ඤාසි න තාව ගණනූපගං; අදාසි’ මෙ වරෙ පඤ්ච සොණත්ථෙරස්ස නායකොති.
විනයපිටකෙ
මහාවග්ගපාළියා
දුතියො භාගො
නමො තස්ස භගවතො අරහතො සම්මාසම්බුද්ධස්ස.
6.
භෙසජ්ජක්ඛන්ධකං
1. තෙන සමයෙන බුද්ධො භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. තෙන ඛො පන සමයෙන භික්ඛූනං සාරදිකෙන ආබාධෙන ඵුට්ඨානං යාගුපි පීතා උග්ගච්ඡති. භත්තම්පි භුත්තං උග්ගච්ඡති. තෙ තෙන කිසා හොන්ති ලූඛා දුබ්බණ්ණා උප්පණ්ඩුප්පණ්ඩුකජාතා ධමනිසන්ථතගත්තා. අද්දසා ඛො භගවා තෙ භික්ඛූ කිසෙ ලූඛෙ දුබ්බණ්ණෙ උප්පණ්ඩුප්පණ්ඩුකජාතෙ ධමනිසන්ථතගත්තෙ. දිස්වාන ආයස්මන්තං ආනන්දං ආමන්තෙසි: “කින්නුඛො ආනන්ද එතරහි භික්ඛූ කිසා ලූඛා දුබ්බණ්ණා උප්පණ්ඩුප්පණ්ඩුකජාතා, ධමනිසන්ථතගත්තා?”ති.
2. “එතරහි භන්තෙ භික්ඛූනං සාරදිකෙන ආබාධෙන ඵුට්ඨානං යාගුපි පීතා උග්ගච්ඡති. භත්තම්පි භුත්තං උග්ගච්ඡති. තෙ තෙන කිසා හොන්ති{1} ලූඛා දුබ්බණ්ණා උප්පණ්ඩුප්පණ්ඩුකජාතා, ධමනිසන්ථතගත්තා”ති.
3. අථ ඛො භගවතො රහොගතස්ස පතිසල්ලීනස්ස එවං චෙතසො පරිවිතක්කො උදපාදි: “එතරහි ඛො භික්ඛූනං සාරදිකෙන ආබාධෙන ඵුට්ඨානං යාගුපි පීතා උග්ගච්ඡති. භත්තම්පි භුත්තං උග්ගච්ඡති. තෙ තෙන කිසා ලූඛා දුබ්බණ්ණා උප්පණ්ඩුප්පණ්ඩුකජාතා ධමනිසන්ථතගත්තා. කින්නු ඛො අහං භික්ඛූනං භෙසජ්ජං අනුජානෙය්යං, යං භෙසජ්ජඤ්චෙව අස්ස භෙසජ්ජසම්මතඤ්ච ලොකස්ස. ආහාරත්ථඤ්ච ඵරෙය්ය. න ච ඔළාරිකො ආහාරො පඤ්ඤායෙය්යා”ති.
4. අථ ඛො භගවතො එතදහොසි: “ඉමානි ඛො පඤ්ච භෙසජ්ජානි. සෙය්යථිදං: සප්පි නවනීතං තෙලං මධු ඵාණිතං භෙසජ්ජානි චෙව භෙසජ්ජසම්මතානි ච ලොකස්ස. ආහාරත්ථඤ්ච ඵරන්ති. න ච ඔළාරිකො ආහාරො පඤ්ඤායති. යන්නූනාහං භික්ඛූනං ඉමානි පඤ්ච භෙසජ්ජානි අනුජානෙය්යං කාලෙ පටිග්ගහෙත්වා කාලෙ පරිභුඤ්ජිතු”න්ති.
5. අථ ඛො භගවා සායණ්හසමයං පතිසල්ලානා වුට්ඨිතො එතස්මිං නිදානෙ එතස්මිං පකරණෙ ධම්මිං කථං කත්වා භික්ඛූ ආමන්තෙසි: “ඉධ මය්හං. භික්ඛවෙ, රහොගතස්ස පතිසල්ලීනස්ස එවං චෙතසො පරිවිතක්කො උදපාදි: ‘එතරහි ඛො භික්ඛූනං සාරදිකෙන ආබාධෙන ඵුට්ඨානං යාගුපි පීතා උග්ගච්ඡති. භත්තම්පි භුත්තං උග්ගච්ඡති. තෙ තෙන කිසා ලූඛා දුබ්බණ්ණා උප්පණ්ඩුප්පණ්ඩුකජාතා ධමනිසන්ථතගත්තා. කින්නු ඛො අහං භික්ඛූනං භෙසජ්ජං අනුජානෙය්යං යං ඛො{1} භෙසජ්ජං චෙව අස්ස, භෙසජ්ජසම්මතඤ්ච ලොකස්ස. ආහාරත්ථඤ්ච ඵරෙය්ය. න ච ඔළාරිකො ආහාරො පඤ්ඤායෙය්යා”ති.
6. තස්ස මය්හං භික්ඛවෙ, එතදහොසි: “ඉමානි ඛො පඤ්ච භෙසජ්ජානි. සෙය්යථිදං: සප්පි නවනීතං තෙලං මධු ඵාණිතං භෙසජ්ජානි චෙව භෙසජ්ජසම්මතානි ච ලොකස්ස. ආහාරත්ථඤ්ච ඵරන්ති. න ච ඔළාරිකො ආහාරො පඤ්ඤායති. යන්නූනාහං භික්ඛූනං ඉමානි පඤ්ච භෙසජ්ජානි අනුජානෙය්යං කාලෙ පටිග්ගහෙත්වා කාලෙ පරිභුඤ්ජිතු”න්ති. “අනුජානාමි භික්ඛවෙ, තානි පඤ්ච භෙසජ්ජානි කාලෙ පටිග්ගහෙත්වා කාලෙ පරිභුඤ්ජිතු”න්ති.
7. තෙන ඛො පන සමයෙන භික්ඛූ තානි පඤ්ච භෙසජ්ජානි කාලෙ පටිග්ගහෙත්වා කාලෙ පරිභුඤ්ජන්ති. තෙසං යානිපි තානි පාකතිකානි ලූඛානි භොජනානි, තානිපි නච්ඡාදෙන්ති. පගෙව සෙනෙසිතානි{2}. තෙ තෙන චෙව සාරදිකෙන ආබාධෙන ඵුට්ඨා ඉමිනා ච භත්තච්ඡාදකෙන{3} තදුභයෙන භියොසොමත්තාය කිසා හොන්ති ලූඛා දුබ්බණ්ණා උප්පණ්ඩුප්පණ්ඩුකජාතා ධමනිසන්ථතගත්තා.
8. අද්දසා ඛො භගවා තෙ භික්ඛූ භිය්යොසොමත්තාය කිසෙ ලූඛෙ දුබ්බණ්ණෙ උප්පණ්ඩුප්පණ්ඩුකජාතෙ ධමනිසන්ථතගත්තෙ, දිස්වාන ආයස්මන්තං ආනන්දං ආමන්තෙසි: “කින්නු ඛො, ආනන්ද, එතරහි භික්ඛූ භිය්යොසොමත්තාය කිසා ලූඛා දුබ්බණ්ණා උප්පණ්ඩුප්පණ්ඩුකජාතා ධමනිසන්ථතගත්තා?”ති.
9. “එතරහි, භන්තෙ, භික්ඛූ තානි පඤ්ච භෙසජ්ජානි කාලෙ පටිග්ගහෙත්වා කාලෙ පරිභුඤ්ජන්ති. තෙසං යානිපි තානි පාකතිකානි ලූඛානි භොජනානි තානිපි නච්ඡාදෙන්ති. පගෙව සෙනෙසිකානි. තෙ තෙන චෙව සාරදිකෙන ආබාධෙන ඵුට්ඨා ඉමිනා ච භත්තාච්ඡාදකෙන තදුභයෙන භිය්යොසොමත්තාය කිසා ලූඛා දුබ්බණ්ණා උප්පණ්ඩුප්පණ්ඩුකජාතා ධමනිසන්ථතගත්තා”ති.
10. අථ ඛො භගවා එතස්මිං නිදානෙ එතස්මිං පකරණෙ ධම්මිං කථං කත්වා භික්ඛූ ආමන්තෙසි: “අනුජානාමි භික්ඛවෙ, තානි පඤ්ච භෙසජ්ජානි පටිග්ගහෙත්වා කාලෙපි විකාලෙපි පරිභුඤ්ජිතු”න්ති.
11. තෙන ඛො පන සමයෙන ගිලානානං භික්ඛූනං වසෙහි භෙසජ්ජෙහි අත්ථො හොති. භගවතො එතමත්ථං ආරොචෙසුං. “අනුජානාමි භික්ඛවෙ, වසානි භෙසජ්ජානි: අච්ඡවසං මච්ඡවසං, සුසුකාවසං සූකරවසං ගද්රභවසං කාලෙ පටිග්ගහිතං කාලෙ නිප්පක්කං{1} කාලෙ සංසත්තං{2} තෙලපරිභොගෙන පරිභුඤ්ජිතුං. විකාලෙ චෙ භික්ඛවෙ, පටිග්ගහිතං විකාලෙ නිප්පක්කං විකාලෙ සංසත්තං, තඤ්චෙ පරිභුඤ්ජෙය්ය, ආපත්ති තිණ්ණං දුක්කටානං. කාලෙ චෙ භික්ඛවෙ, පටිග්ගහිතං විකාලෙ නිප්පක්කං විකාලෙ සංසත්තං, තඤ්චෙ පරිභුඤ්ජෙය්ය, ආපත්ති ද්වින්නං දුක්කටානං. කාලෙ චෙ භික්ඛවෙ, පටිග්ගහිතං කාලෙ නිප්පක්කං විකාලෙ සංසත්තං, තං චෙ පරිභුඤ්ජෙය්ය, ආපත්ති දුක්කටස්ස. කාලෙ චෙ භික්ඛවෙ, පටිග්ගහිතං කාලෙ නිප්පක්කං කාලෙ සංසත්තං, තඤ්චෙ පරිභුඤ්ජෙය්ය, අනාපත්තී”ති.
12. තෙන ඛො පන සමයෙන ගිලානානං භික්ඛූනං මූලෙහි භෙසජ්ජෙහි අත්ථො හොති. භගවතො එතමත්ථං ආරොචෙසුං. “අනුජානාමි භික්ඛවෙ, මූලානි භෙසජ්ජානි: හලිද්දිං, සිඞ්ගිවෙරං වචං වචත්ථං අතිවිසං කටුකරොහිණිං උසීරං, භද්දමුත්තකං. යානි වා පනඤ්ඤානිපි අත්ථි මූලානි භෙසජ්ජානි, නෙව ඛාදනීයෙ ඛාදනීයත්ථං ඵරන්ති, න භොජනීයෙ භොජනීයත්ථං ඵරන්ති, තානි පටිග්ගහෙත්වා යාවජීවං පරිහරිතුං, සති පච්චයෙ පරිභුඤ්ජිතුං. අසති පච්චයෙ පරිභුඤ්ජන්තස්ස ආපත්ති දුක්කටස්සා”ති.
13. තෙන ඛො පන සමයෙන ගිලානානං භික්ඛූනං මූලෙහි භෙසජ්ජෙහි පිට්ඨෙහි අත්ථො හොති. භගවතො එතමත්ථං ආරොචෙසුං. “අනුජානාමි භික්ඛවෙ, නිසදං නිසදපොතක”න්ති.{3}
14. තෙන ඛො පන සමයෙන ගිලානානං භික්ඛූනං කසාවෙහි භෙසජ්ජෙහි අත්ථො හොති. භගවතො එතමත්ථං ආරොචෙසුං. “අනුජානාමි භික්ඛවෙ, කසාවානි භෙසජ්ජානි: නිම්බකසාවං කුටජකසාවං පටොලකසාවං සිග්ගවකසාවං නත්තමාලකසාවං. යානි වා පනඤ්ඤානිපි අත්ථි කසාවානි{4} භෙසජ්ජානි නෙව ඛාදනීයෙ ඛාදනීයත්ථං ඵරන්ති, න භොජනීයෙ භොජනීයත්ථං ඵරන්ති තානි – පටිග්ගහෙත්වා යාවජීවං පරිහරිතුං, සති පච්චයෙ පරිභුඤ්ජිතුං. අසති පච්චයෙ පරිභුඤ්ජන්තස්ස ආපත්ති දුක්කටස්සා’ති.
15. තෙන ඛො පන සමයෙන ගිලානානං භික්ඛූනං පණ්ණෙහි භෙසජ්ජෙහි අත්ථො හොති. භගවතො එතමත්ථං ආරොචෙසුං. “අනුජානාමි භික්ඛවෙ, පණ්ණානි භෙසජ්ජානි: නිම්බපණ්ණං කුටජපණ්ණං පටොලපණ්ණං සුලසිපණ්ණං කප්පාසපණ්ණං{5}. යානි වා පනඤ්ඤානිපි අත්ථි පණ්ණානි භෙසජ්ජානි නෙව ඛාදනීයෙ ඛාදනීයත්ථං ඵරන්ති, න භොජනීයෙ භොජනීයත්ථං ඵරන්ති, තානි පටිග්ගහෙත්වා යාවජීවං පරිහරිතුං, සති පච්චයෙ පරිභුඤ්ජිතුං. අසති පච්චයෙ පරිභුඤ්ජන්තස්ස ආපත්ති දුක්කටස්සා”ති.
16. තෙන ඛො පන සමයෙන ගිලානානං භික්ඛූනං ඵලෙහි භෙසජ්ජෙහි අත්ථො හොති. භගවතො එතමත්ථං ආරොචෙසුං. “අනුජානාමි භික්ඛවෙ, ඵලානි භෙසජ්ජානි: විළඞ්ගං පිප්ඵලිං මරිචං හරීටකං විභීටකං ආමලකං ගොට්ඨඵලං{1}, යානි වා පනඤ්ඤානි පි අත්ථි ඵලානි භෙසජ්ජානි, නෙව ඛාදනීයෙ ඛාදනීයත්ථං ඵරන්ති, න භොජනීයෙ භොජනීයත්ථං ඵරන්ති, තානි පටිග්ගහෙත්වා යාවජීවං පරිහරිතුං. සති පච්චයෙ පරිභුඤ්ජිතුං. අසති පච්චයෙ පරිභුඤ්ජන්තස්ස ආපත්ති දුක්කටස්සා”ති.
17. තෙන ඛො පන සමයෙන ගිලානානං භික්ඛූනං ජතූහි භෙසජ්ජෙහි අත්ථො හොති. භගවතො එතමත්ථං ආරොචෙසුං. “අනුජානාමි භික්ඛවෙ, ජතූනි භෙසජ්ජානි: හිංගු හිංගුජතු{2} හිංගුසිපාටිකං තකං තකපත්තිං තකපණ්ණිං සජ්ජුලසං, යානි වා පනඤ්ඤානිපි අත්ථි ජතූනි භෙසජ්ජානි නෙව ඛාදනීයෙ ඛාදනීයත්ථං ඵරන්ති, න භොජනීයෙ භොජනීයත්ථං ඵරන්ති, තානි පටිග්ගහෙත්වා යාවජීවං පරිහරිතුං, සති පච්චයෙ පරිභුඤ්ජිතුං. අසති පච්චයෙ පරිභුඤ්ජන්තස්ස ආපත්ති දුක්කටස්සා”ති.
18. තෙන ඛො පන සමයෙන ගිලානානං භික්ඛූනං ලොණෙහි භෙසජ්ජෙහි අත්ථො හොති. භගවතො එතමත්ථං ආරොචෙසුං. “අනුජානාමි භික්ඛවෙ, ලොණානි භෙසජ්ජානි: සාමුද්දං කාළලොණං, සින්ධවං උබ්භිදං බිළාලං{3}, යානි වා පනඤ්ඤානිපි අත්ථි ලොණානි භෙසජ්ජානි, නෙව ඛාදනීයෙ ඛාදනීයත්ථං ඵරන්ති, න භොජනීයෙ භොජනීයත්ථං ඵරන්ති, තානි පටිග්ගහෙත්වා යාවජීවං පරිහරිතුං. සති පච්චයෙ පරිභුඤ්ජිතුං. අසති පච්චයෙ පරිභුඤ්ජන්තස්ස ආපත්ති දුක්කටස්සා”ති.
19. තෙන ඛො පන සමයෙන ආයස්මතො ආනන්දස්ස උපජ්ඣායස්ස ආයස්මතො බෙලට්ඨසීසස්ස{4} ථුල්ලකච්ඡාබාධො හොති. තස්ස ලසිකාය චීවරානි කායෙ ලග්ගන්ති. තානි භික්ඛූ උදකෙන තෙමෙත්වා තෙමෙත්වා අපකඩ්ඪන්ති.
20. අද්දසා ඛො භගවා සෙනාසනචාරිකං ආහිණ්ඩන්තො තෙ භික්ඛූ තානි චීවරානි උදකෙන තෙමෙත්වා තෙමෙත්වා අපකඩ්ඪන්තෙ, දිස්වාන යෙන තෙ භික්ඛූ තෙනුපසඞ්කමි. උපසඞ්කමිත්වා තෙ භික්ඛූ එතදවොච: “කිං ඉමස්ස භික්ඛවෙ, භික්ඛුනො ආබාධො”ති? “ඉමස්ස භන්තෙ ආයස්මතො ථුල්ලකච්ඡාබාධො. ලසිකාය චීවරානි කායෙ ලග්ගන්ති. තානි මයං උදකෙන තෙමෙත්වා තෙමෙත්වා අපකඩ්ඪාමා”ති .
21. අථ ඛො භගවා එතස්මිං නිදානෙ එතස්මිං පකරණෙ ධම්මිං කථං කත්වා භික්ඛූ ආමන්තෙසි: “අනුජානාමි භික්ඛවෙ, යස්ස කණ්ඩු වා පිළකා වා අස්සාවො වා ථුල්ලකච්ඡු වා ආබාධො, කායො වා දුග්ගන්ධො, චුණ්ණානි භෙසජ්ජානි. අගිලානස්ස ඡකණං මත්තිකං රජනනිප්පක්කං. අනුජානාමි භික්ඛවෙ, උදුක්ඛලමුසල”න්ති.
22. තෙන ඛො පන සමයෙන ගිලානානං භික්ඛූනං චුණ්ණෙහි භෙසජ්ජෙහි චාලිතෙහි අත්ථො හොති. භගවතො එතමත්ථං ආරොචෙසුං. “අනුජානාමි භික්ඛවෙ, චුණ්ණචාලිනි”න්ති. සණ්හෙහි අත්ථො හොති. “අනුජානාමි භික්ඛවෙ, දුස්සචාලිනි”න්ති.
23. තෙන ඛො පන සමයෙන අඤ්ඤතරස්ස භික්ඛුනො අමනුස්සිකාබාධො හොති. තං ආචරියුපජ්ඣායා උපට්ඨහන්තා නාසක්ඛිංසු අරොගං කාතුං. සො සූකරසූනං ගන්ත්වා ආමකමංසඤ්ච{1} ඛාදි. ආමකලොහිතඤ්ච{2} පිවි. තස්ස සො අමනුස්සිකාබාධො පටිප්පස්සම්භි. භගවතො එතමත්ථං ආරොචෙසුං. “අනුජානාමි භික්ඛවෙ, අමනුස්සිකාබාධෙ ආමකමංසං ආමකලොහිත”න්ති.
24. තෙන ඛො පන සමයෙන අඤ්ඤතරස්ස භික්ඛුනො චක්ඛුරොගාබාධො හොති. තං භික්ඛූ පරිග්ගහෙත්වා උච්චාරම්පි පස්සාවම්පි නික්ඛාමෙන්ති.
25. අද්දසා ඛො භගවා සෙනාසනචාරිකං ආහිණ්ඩන්තො තෙ භික්ඛූ තං භික්ඛුං පරිග්ගහෙත්වා උච්චාරම්පි පස්සාවම්පි නික්ඛාමෙන්තෙ. දිස්වාන යෙන තෙ භික්ඛූ තෙනුපසඞ්කමි. උපසඞ්කමිත්වා තෙ භික්ඛූ එතදවොච: “කිං ඉමස්ස භික්ඛවෙ, භික්ඛුනො ආබාධො”ති. “ඉමස්ස භන්තෙ, ආයස්මතො චක්ඛුරොගාබාධො. ඉමං මයං පරිග්ගහෙත්වා උච්චාරම්පි පස්සාවම්පි නික්ඛාමෙමා”ති.
26. අථ ඛො භගවා එතස්මිං නිදානෙ එතස්මිං පකරණෙ ධම්මිං කථං කත්වා භික්ඛූ ආමන්තෙසි: “අනුජානාමි භික්ඛවෙ, අඤ්ජනං: කාළඤ්ජනං රසඤ්ජනං සොතඤ්ජනං ගෙරුකං කපල්ලක”{3}න්ති. අඤ්ජනූපපිංසනෙහි{4} අත්ථො හොති. භගවතො එතමත්ථං ආරොචෙසුං. “අනුජානාමි භික්ඛවෙ, චන්දනං තගරං කාළානුසාරියං තාලීසං භද්දමුත්තක”න්ති.
27. තෙන ඛො පන සමයෙන භික්ඛූ පිට්ඨානි අඤ්ජනානි ථාලකෙසුපි{5} සරාවකෙසුපි නික්ඛිපන්ති. තිණචුණ්ණෙහිපි පංසුකෙහිපි ඔකිරීයන්ති. භගවතො එතමත්ථං ආරොචෙසුං. “අනුජානාමි භික්ඛවෙ, අඤ්ජනි”න්ති.
28. තෙන ඛො පන සමයෙන ඡබ්බග්ගියා භික්ඛූ උච්චාවචා අඤ්ජනියො ධාරෙන්ති: සොවණ්ණමයං රූපීයමයං. මනුස්සා උජ්ඣායන්ති, ඛීයන්ති, විපාචෙන්ති: “සෙය්යථාපි ගිහී කාමභොගිනො”ති. භගවතො එතමත්ථං ආරොචෙසුං. “න භික්ඛවෙ, උච්චාවචා අඤ්ජනියො{6} ධාරෙතබ්බා. යො ධාරෙය්ය, ආපත්ති දුක්කටස්ස. අනුජානාමි භික්ඛවෙ, අට්ඨිමයං දන්තමයං විසාණමයං නළමයං වෙළුමයං කට්ඨමයං ජතුමයං ඵලමයං ලොහමයං සඞ්ඛනාභිමය”න්ති.
29. තෙන ඛො පන සමයෙන අඤ්ජනියො අපාරුතා හොන්ති, තිණචුණ්ණෙහිපි පංසුකෙහිපි ඔකිරීයන්ති. භගවතො එතමත්ථං ආරොචෙසුං. “අනුජානාමි භික්ඛවෙ, අපිධාන”න්ති. අපිධානං පතති{7}. “අනුජානාමි භික්ඛවෙ, සුත්තකෙන බන්ධිත්වා අඤ්ජනියා බන්ධිතු”න්ති. අඤ්ජනී ඵලති{8}. “අනුජානාමි භික්ඛවෙ, සුත්තකෙන සිබ්බෙතු”න්ති.
30. තෙන ඛො පන සමයෙන භික්ඛූ අඞ්ගුලියා අඤ්ජන්ති. අක්ඛීනි දුක්ඛානි හොන්ති. භගවතො එතමත්ථං ආරොචෙසුං. “අනුජානාමි භික්ඛවෙ, අඤ්ජනිසලාක”න්ති.
31. තෙන ඛො පන සමයෙන ඡබ්බග්ගියා භික්ඛූ උච්චාවචා අඤ්ජනිසලාකායො ධාරෙන්ති සොවණ්ණමයං රූපිමයං.{1} මනුස්සා උජ්ඣායන්ති, ඛීයන්ති, විපාචෙන්ති: “සෙය්යථාපි ගිහී කාමභොගිනො”ති. භගවතො එතමත්ථං ආරොචෙසුං. “න භික්ඛවෙ, උච්චාවචා අඤ්ජනිසලාකා ධාරෙතබ්බා. යො ධාරෙය්ය, ආපත්ති දුක්කටස්ස. “අනුජානාමි භික්ඛවෙ, අට්ඨිමයං -පෙ- සඞ්ඛනාභිමය”න්ති.
32. තෙන ඛො පන සමයෙන අඤ්ජනිසලාකා භූමියං පතිතා ඵරුසා හොති. භගවතො එතමත්ථං ආරොචෙසුං. “අනුජානාමි භික්ඛවෙ, සලාකොධානිය”න්ති.{2}
33. තෙන ඛො පන සමයෙන භික්ඛූ අඤ්ජනිම්පි අඤ්ජනිසලාකම්පි හත්ථෙන පරිහරන්ති. භගවතො එතමත්ථං ආරොචෙසුං. “අනුජානාමි භික්ඛවෙ, අඤ්ජනිත්ථවික”න්ති. අංසවට්ටකො{3} න හොති. භගවතො එතමත්ථං ආරොචෙසුං. “අනුජානාමි භික්ඛවෙ, අංසවට්ටකං{4} බන්ධනසුත්ත”න්ති.
34. තෙන ඛො පන සමයෙන ආයස්මතො පිලින්දිවච්ඡස්ස{5} සීසාභිතාපො හොති. භගවතො එතමත්ථං ආරොචෙසුං. “අනුජානාමි භික්ඛවෙ, මුද්ධනි තෙලක”න්ති. නක්ඛමණීයො හොති. භගවතො එතමත්ථං ආරොචෙසුං. “අනුජානාමි භික්ඛවෙ, නත්ථුංකම්මන්ති. නත්ථුං ගලති. භගවතො එතමත්ථං ආරොචෙසුං. “අනුජානාමි භික්ඛවෙ, නත්ථුංකරණි”න්ති.
35. තෙන ඛො පන සමයෙන ඡබ්බග්ගියා භික්ඛූ උච්චාවචා නත්ථුංකරණියො ධාරෙන්ති සොවණ්ණමයං රූපිමයං. මනුස්සා උජ්ඣායන්ති, ඛීයන්ති, විපාචෙන්ති: “සෙය්යථාපි ගිහී කාමභොගිනො”ති. භගවතො එතමත්ථං ආරොචෙසුං. “න භික්ඛවෙ, උච්චාවචා නත්ථුංකරණී ධාරෙතබ්බා. යො ධාරෙය්ය, ආපත්ති දුක්කටස්ස. අනුජානාමි භික්ඛවෙ, අට්ඨිමයං -පෙ- සඞ්ඛනාභිමය”න්ති. නත්ථුං විසමං ආසිඤ්චීන්ති.{6} භගවතො එතමත්ථං ආරොචෙසුං. “අනුජානාමි භික්ඛවෙ, යමකං නත්ථුකරණි”න්ති.{7} නක්ඛමනියො හොති. භගවතො එතමත්ථං ආරොචෙසුං. “අනුජානාමි භික්ඛවෙ, ධූමං පාතු”න්ති. තඤ්ඤෙව වට්ටිං ආලිම්පෙත්වා පිවන්ති. කණ්ඨො{8} ඩහති. භගවතො එතමත්ථං ආරොචෙසුං. “අනුජානාමි භික්ඛවෙ, ධූමනෙත්ත”න්ති.
36. තෙන ඛො පන සමයෙන ඡබ්බග්ගියා භික්ඛූ උච්චාවචානි ධූමනෙත්තානි, ධාරෙන්ති සොවණ්ණමයං රූපීමයං. මනුස්සා උජ්ඣායන්ති. ඛීයන්ති, විපාචෙන්ති: සෙය්යථාපි ගිහී කාමභොගිනො”ති. “න භික්ඛවෙ, උච්චාවචානි ධූමනෙත්තානි ධාරෙතබ්බානි. යො ධාරෙය්ය, ආපත්ති දුක්කටස්ස. “අනුජානාමි භික්ඛවෙ, අට්ඨිමයං -පෙ- සඞ්ඛනාභිමය”න්ති.
37. තෙන ඛො පන සමයෙන ධූමනෙත්තානි අපාරුතානි හොන්ති. පාණකා පවිසන්ති. භගවතො එතමත්ථං ආරොචෙසුං. “අනුජානාමි භික්ඛවෙ, අපිධාන”න්ති.
38. තෙන ඛො පන සමයෙන භික්ඛූ ධූමනෙත්තානි හත්ථෙන පරිහරන්ති. භගවතො එතමත්ථං ආරොචෙසුං. “අනුජානාමි භික්ඛවෙ, ධූමනෙත්තත්ථවික”න්ති. එකතො ඝංසීයන්ති. භගවතො එතමත්ථං ආරොචෙසුං. “අනුජානාමි භික්ඛවෙ, යමකත්ථවික”න්ති. අංසවට්ටකො න හොති. භගවතො එතමත්ථං ආරොචෙසුං. “අනුජානාමි භික්ඛවෙ, අංසවට්ටකං බන්ධනසුත්ත”න්ති.
39. තෙන ඛො පන සමයෙන ආයස්මතො පිලින්දිවච්ඡස්ස වාතාබාධො හොති. වෙජ්ජා එවමාහංසු: “තෙලං පචිතබ්බ”න්ති. භගවතො එතමත්ථං ආරොචෙසුං. “අනුජානාමි භික්ඛවෙ, තෙලපාක”න්ති. තස්මිං ඛො පන තෙලපාකෙ මජ්ජං පක්ඛිපිතබ්බං හොති. භගවතො එතමත්ථං ආරොචෙසුං. “අනුජානාමි භික්ඛවෙ, තෙලපාකෙ මජ්ජං පක්ඛිපිතු”න්ති.
40. තෙන ඛො පන සමයෙන ඡබ්බග්ගියා භික්ඛූ අතිපක්ඛිත්තමජ්ජානි තෙලානි පචන්ති. තානි පිවිත්වා මජ්ජන්ති. භගවතො එතමත්ථං ආරොචෙසුං. “න භික්ඛවෙ, අතිපක්ඛිත්තමජ්ජං තෙලං පාතබ්බං. යො පිවෙය්ය, යථා ධම්මො කාරෙතබ්බො. අනුජානාමි භික්ඛවෙ, යස්මිං තෙලපාකෙ මජ්ජස්ස න ච වණ්ණො{1} න ච ගන්ධො න ච රසො පඤ්ඤායති, එවරූපං මජ්ජපක්ඛිත්තං තෙලං පාතු”න්ති.
41. තෙන ඛො පන සමයෙන භික්ඛූනං බහුං අතිපක්ඛිත්තමජ්ජං තෙලං පක්කං හොති. අථ ඛො භික්ඛූනං එතදහොසි: “කථන්නු ඛො අතිපක්ඛිත්තමජ්ජෙ තෙලෙ පටිපජ්ජිතබ්බ”න්ති. භගවතො එතමත්ථං ආරොචෙසුං. “අනුජානාමි භික්ඛවෙ, අබ්භඤ්ජනං අධිට්ඨාතු”න්ති.
42. තෙන ඛො පන සමයෙන ආයස්මතො පිලින්දිවච්ඡස්ස බහුතරං තෙලං පක්කං හොති, තෙලභාජනං න විජ්ජති{2}. භගවතො එතමත්ථං ආරොචෙසුං. “අනුජානාමි භික්ඛවෙ, තීණි තුම්බානි: ලොහතුම්බං කට්ඨතුම්බං ඵලතුම්බ”න්ති.
43. තෙන ඛො පන සමයෙන ආයස්මතො පිලින්දිවච්ඡස්ස අඞ්ගවාතො හොති. භගවතො එතමත්ථං ආරොචෙසුං. “අනුජානාමි භික්ඛවෙ, සෙදකම්ම”න්ති. නක්ඛමනියො හොති. -පෙ- භගවතො එතමත්ථං ආරොචෙසුං. “අනුජානාමි භික්ඛවෙ, සම්භාරසෙද”න්ති. නක්ඛමනියො හොති. -පෙ- “අනුජානාමි භික්ඛවෙ, මහාසෙද”න්ති. නක්ඛමනියො හොති. -පෙ- “අනුජානාමි භික්ඛවෙ, භඞ්ගොදක”න්ති. නක්ඛමනියො හොති. භගවතො එතමත්ථං ආරොචෙසුං. “අනුජානාමි භික්ඛවෙ, උදකකොට්ඨක”න්ති.
44. තෙන ඛො පන සමයෙන ආයස්මතො පිලින්දිවච්ඡස්ස පබ්බවාතො හොති. භගවතො එතමත්ථං ආරොචෙසුං. “අනුජානාමි භික්ඛවෙ, ලොහිතං මොචෙතු”න්ති. නක්ඛමනීයො හොති. -පෙ- “අනුජානාමි භික්ඛවෙ, ලොහිතං මොචෙත්වා විසාණෙන ගහෙතු”න්ති.{3}
45. තෙන ඛො පන සමයෙන ආයස්මතො පිලින්දිවච්ඡස්ස පාදා ඵලිතා{4} හොන්ති. භගවතො එතමත්ථං ආරොචෙසුං. “අනුජානාමි භික්ඛවෙ, පාදබ්භඤ්ජන”න්ති. නක්ඛමනීයො හොති. -පෙ- “අනුජානාමි භික්ඛවෙ, පජ්ජං අභිසඞ්ඛරිතු”න්ති.
46. තෙන ඛො පන සමයෙන අඤ්ඤතරස්ස භික්ඛුනො ගණ්ඩාබාධො හොති. භගවතො එතමත්ථං ආරොචෙසුං. “අනුජානාමි භික්ඛවෙ, සත්ථකම්ම”න්ති. කසාවොදකෙන අත්ථො හොති. “අනුජානාමි භික්ඛවෙ, කසාවොදක”න්ති. තිලකක්කෙන අත්ථො හොති. -පෙ- “අනුජානාමි භික්ඛවෙ, තිලකක්කන්ති. කබලිකාය අත්ථො හොති. -පෙ- “අනුජානාමි භික්ඛවෙ, කබලික”න්ති. වණබන්ධනචොලකෙන{1} අත්ථො හොති. -පෙ- “අනුජානාමි භික්ඛවෙ, වණබන්ධනචොලක”න්ති. වණො කණ්ඩුවති. -පෙ- “අනුජානාමි භික්ඛවෙ, සාසපකුණ්ඩෙන{2} ඵොසිතු”න්ති.{3} වණො කිලිජ්ජිත්ථ{4} -පෙ- “අනුජානාමි භික්ඛවෙ, “ධූමං කාතු”න්ති. වඩ්ඪමංසං{5} වුට්ඨාති. -පෙ- “අනුජානාමි භික්ඛවෙ, ලොණසක්ඛරිකාය ඡින්දිතු”න්ති. වණො න රූහති. -පෙ- “අනුජානාමි භික්ඛවෙ, වණතෙල”න්ති. තෙලං ගලති. භගවතො එතමත්ථං ආරොචෙසුං. “අනුජානාමි භික්ඛවෙ, විකාසිකං සබ්බං වණපටිකම්ම”න්ති.
47. තෙන ඛො පන සමයෙන අඤ්ඤතරො භික්ඛු අහිනා දට්ඨො හොති. භගවතො එතමත්ථං ආරොචෙසුං. “අනුජානාමි භික්ඛවෙ, චත්තාරි මහාවිකටානි දාතුං: ගූථං මුත්තං ඡාරිකං මත්තික”න්ති. අථ ඛො භික්ඛූනං එතදහොසි: “අප්පටිග්ගහිතානි නු ඛො උදාහු පටිග්ගහෙතබ්බානී”ති. භගවතො එතමත්ථං ආරොචෙසුං. “අනුජානාමි භික්ඛවෙ, සති කප්පියකාරකෙ පටිග්ගහාපෙතුං, අසති කප්පියකාරකෙ සාමං ගහෙත්වා පරිභුඤ්ජිතු”න්ති.
48. තෙන ඛො පන සමයෙන අඤ්ඤතරෙන භික්ඛුනා විසං පීතං හොති. භගවතො එතමත්ථං ආරොචෙසුං. “අනුජානාමි භික්ඛවෙ, ගූථං පායෙතු”න්ති. අථ ඛො භික්ඛූනං එතදහොසි: “අප්පටිග්ගහිතො නු ඛො උදාහු පටිග්ගහෙතබ්බො”ති. භගවතො එතමත්ථං ආරොචෙසුං. “අනුජානාමි භික්ඛවෙ, යං කරොන්තො පතිගණ්හාති, ස්වෙව පටිග්ගහො කතො හොති. න පුන පටිග්ගහාපෙතබ්බො”ති.
49. තෙන ඛො පන සමයෙන අඤ්ඤතරස්ස භික්ඛුනො ඝරදින්නකාබාධො හොති. භගවතො එතමත්ථං ආරොචෙසුං. “අනුජානාමි භික්ඛවෙ, සීතාළොලිං පායෙතු”න්ති.
50. තෙන ඛො පන සමයෙන අඤ්ඤතරො භික්ඛු දුට්ඨගහණිකො හොති. භගවතො එතමත්ථං ආරොචෙසුං. “අනුජානාමි භික්ඛවෙ, ආමිසඛාරං පායෙතු”න්ති.
51. තෙන ඛො පන සමයෙන අඤ්ඤතරස්ස භික්ඛුනො පණ්ඩුරොගාබාධො හොති. භගවතො එතමත්ථං ආරොචෙසුං . “අනුජානාමි භික්ඛවෙ, මුත්තහරීටකං පායෙතු”න්ති.
52. තෙන ඛො පන සමයෙන අඤ්ඤතරස්ස භික්ඛුනො ඡවිදොසාබාධො හොති. භගවතො එතමත්ථං ආරොචෙසුං. “අනුජානාමි භික්ඛවෙ, ගන්ධාලෙපං කාතු”න්ති.
53. තෙන ඛො පන සමයෙන අඤ්ඤතරො භික්ඛු අභිසන්නකායො හොති. භගවතො එතමත්ථං ආරොචෙසුං . “අනුජානාමි භික්ඛවෙ, විරෙචනං පාතු”න්ති. අච්ඡකඤ්ජියා අත්ථො හොති. -පෙ- “අනුජානාමි භික්ඛවෙ, අච්ඡකඤ්ජි”න්ති. අකටයූසෙන අත්ථො හොති. -පෙ- “අනුජානාමි භික්ඛවෙ, අකටයූස”න්ති. කටාකටෙන අත්ථො හොති. -පෙ- “අනුජානාමි භික්ඛවෙ, කටාකට”න්ති. පටිච්ඡාදනීයෙන අත්ථො හොති. භගවතො එතමත්ථං ආරොචෙසුං. “අනුජානාමි භික්ඛවෙ, පටිච්ඡාදනීය”න්ති.
54. තෙන ඛො පන සමයෙන ආයස්මා පිලින්දිවච්ඡො රාජගහෙ පබ්භාරං සොධාපෙති ලෙණං කත්තුකාමො. අථ ඛො රාජා මාගධො සෙනියො බිම්බිසාරො යෙනායස්මා පිලින්දිවච්ඡො තෙනුපසඞ්කමි. උපසඞ්කමිත්වා ආයස්මන්තං පිලින්දිවච්ඡං අභිවාදෙත්වා එකමන්තං නිසීදි. එකමන්තං නිසින්නො ඛො රාජා මාගධො සෙනියො බිම්බිසාරො ආයස්මන්තං පිලින්දිවච්ඡං එතදවොච: “කිං භන්තෙ ථෙරො කාරාපෙතී”ති. “පබ්භාරං, මහාරාජ, සොධාපෙමි ලෙණං කත්තුකාමො”ති. “අත්ථො භන්තෙ, අය්යස්ස ආරාමිකෙනා”ති. “න ඛො මහාරාජ, භගවතා ආරාමිකො අනුඤ්ඤාතො”ති. “තෙන හි භන්තෙ, භගවන්තං පටිපුච්ඡිත්වා මම ආරොචෙය්යාථා”ති. “එවං මහාරාජා”ති ඛො ආයස්මා පිලින්දිවච්ඡො රඤ්ඤො මාගධස්ස සෙනියස්ස බිම්බිසාරස්ස පච්චස්සොසි.
55. අථ ඛො ආයස්මා පිලින්දිවච්ඡො රාජානං මාගධං සෙනියං බිම්බිසාරං ධම්මියා කථාය සන්දස්සෙසි. සමාදපෙසි. සමුත්තෙජෙසි. සම්පහංසෙසි. අථ ඛො රාජා මාගධො සෙනියො බිම්බිසාරො ආයස්මතා පිලින්දිවච්ඡෙන ධම්මියා කථාය සන්දස්සිතො සමාදපිතො සමුත්තෙජිතො සම්පහංසිතො උට්ඨායාසනා ආයස්මන්තං පිලින්දිවච්ඡං අභිවාදෙත්වා පදක්ඛිණං කත්වා පක්කාමි.
56. අථ ඛො ආයස්මා පිලින්දිවච්ඡො භගවතො සන්තිකෙ දූතං පාහෙසි: “රාජා භන්තෙ, මාගධො සෙනියො බිම්බිසාරො ආරාමිකං දාතුකාමො. කථන්නු ඛො භන්තෙ{1} පටිපජ්ජිතබ්බ”න්ති? අථ ඛො භගවා එතස්මිං නිදානෙ එතස්මිං පකරණෙ ධම්මිං කථං කත්වා භික්ඛූ ආමන්තෙසි: “අනුජානාමි භික්ඛවෙ, ආරාමික”න්ති.
57. දුතියම්පි ඛො රාජා මාගධො සෙනියො බිම්බිසාරො යෙනායස්මා පිලින්දිවච්ඡො තෙනුපසඞ්කමි. උපසඞ්කමිත්වා ආයස්මන්තං පිලින්දිවච්ඡං අභිවාදෙත්වා එකමන්තං නිසීදි. එකමන්තං නිසින්නො ඛො රාජා මාගධො සෙනියො බිම්බිසාරො ආයස්මන්තං පිලින්දිවච්ඡං එතදවොච: “අනුඤ්ඤාතො භන්තෙ, භගවතා ආරාමිකො”ති. “එවං මහාරාජා”ති. “තෙන හි භන්තෙ, අය්යස්ස ආරාමිකං දම්මී”ති.
58. අථ ඛො රාජා මාගධො සෙනියො බිම්බිසාරො ආයස්මතො පිලින්දිවච්ඡස්ස ආරාමිකං පටිස්සුත්වා විස්සරිත්වා චිරෙන සතිං පටිලභිත්වා අඤ්ඤතරං සබ්බත්ථකං මහාමත්තං ආමන්තෙසි: “යො මයා භණෙ, අය්යස්ස ආරාමිකො පටිස්සුතො, දින්නො සො ආරාමිකො”ති. “න ඛො, දෙව, අය්යස්ස ආරාමිකො දින්නො”ති. “කීව චිරන්නු ඛො භණෙ, ඉතො හි{1} තං හොතී”ති. අථ ඛො සො මහාමත්තො රත්තියො විගණෙත්වා{2} රාජානං මාගධං සෙනියං බිම්බිසාරං එතදවොච: “පඤ්ච දෙව රත්තිසතානී”ති. “තෙන හි භණෙ, අය්යස්ස පඤ්ච ආරාමිකසතානි දෙහී”ති.{3} “එවං දෙවා”ති ඛො සො මහාමත්තො රඤ්ඤො මාගධස්ස සෙනියස්ස බිම්බිසාරස්ස පටිස්සුත්වා ආයස්මතො පිලින්දිවච්ඡස්ස පඤ්ච ආරාමිකසතානි පාදාසි. පාටියෙක්කො ගාමො නිවිසි. ආරාමිකගාමොතිපි{4} නං ආහංසු. පිලින්දිගාමොතිපි{5} නං ආහංසු.
59. තෙන ඛො පන සමයෙන ආයස්මා පිලින්දිවච්ඡො තස්මිං ගාමකෙ කුලූපගො හොති. අථ ඛො ආයස්මා පිලින්දිවච්ඡො පුබ්බන්හසමයං* නිවාසෙත්වා පත්තචීවරමාදාය පිලින්දිගාමං පිණ්ඩාය පාවිසි.
60. තෙන ඛො පන සමයෙන තස්මිං ගාමකෙ උස්සවො හොති. දාරකා අලඞ්කිතා{6} මාලාකිතා කීළන්ති. අථ ඛො ආයස්මා පිලින්දිවච්ඡො පිලින්දිගාමකෙ සපදානං පිණ්ඩාය චරමානො යෙන අඤ්ඤතරස්ස ආරාමිකස්ස නිවෙසනං තෙනුපසඞ්කමි, උපසඞ්කමිත්වා පඤ්ඤත්තෙ ආසනෙ නිසීදි.
61. තෙන ඛො පන සමයෙන තස්සා ආරාමිකිනියා ධීතා අඤ්ඤෙ දාරකෙ අලඞ්කතෙ මාලාකිතෙ පස්සිත්වා රොදති: “මාලං මෙ දෙථ. අලංකාරං මෙ දෙථා”ති. අථ ඛො ආයස්මා පිලින්දිවච්ඡො තං ආරාමිකිනිං එතදවොච: “කිස්සායං දාරිකා රොදතී”ති. “අයං භන්තෙ, දාරිකා අඤ්ඤෙ දාරකෙ අලඞ්කිතෙ මාලාකිතෙ පස්සිත්වා රොදති: ‘මාලං මෙ දෙථ. අලඞ්කාරං මෙ දෙථා’ති. කුතො අම්හාකං දුග්ගතානං මාලා. කුතො අලඞ්කාරො”ති.
62. අථ ඛො ආයස්මා පිලින්දිවච්ඡො අඤ්ඤතරං තිණණ්ඩුපකං ගහෙත්වා තං ආරාමිකිනිං එතදවොච: “හන්දිමං තිණණ්ඩුපකං තස්සා දාරිකාය සීසෙ පටිමුඤ්චා”ති. අථ ඛො සා ආරාමිකිනී තං තිණණ්ඩුපකං ගහෙත්වා තස්සා දාරිකාය සීසෙ පටිමුඤ්චි. සා අහොසි සුවණ්ණමාලා අභිරූපා දස්සනීයා පාසාදිකා. නත්ථි තාදිසා රඤ්ඤොපි අන්තෙපුරෙ සුවණ්ණමාලා. මනුස්සා රඤ්ඤො මාගධස්ස සෙනියස්ස බිම්බිසාරස්ස ආරොචෙසුං: “අමුකස්ස දෙව, ආරාමිකස්ස ඝරෙ සුවණ්ණමාලා අභිරූපා දස්සනීයා පාසාදිකා. නත්ථි තාදිසා දෙවස්සපි අන්තෙපුරෙ සුවණ්ණමාලා. කුතො තස්ස දුග්ගතස්ස? නිස්සංසයං චොරිකාය ආභතා”ති. අථ ඛො රාජා මාගධො සෙනියො බිම්බිසාරො තං ආරාමිකකුලං බන්ධාපෙසි.