පඨමභාණවාරං නිට්ඨිතං.
දුතියභාණවාරං
13. අස්සොසුං ඛො වෙසාලිකා වජ්ජිපුත්තකා භික්ඛූ යසො කිර කාකණ්ඩකපුත්තො ඉමං{1} අධිකරණං ආදියිතුකාමො පක්ඛං පරියෙසති. ලභති ච කිර පක්ඛන්ති. අථ ඛො වෙසාලිකානං වජ්ජිපුත්තකානං භික්ඛූනං එතදහොසි: ඉදං ඛො අධිකරණං කක්ඛළඤ්ච වාලඤ්ච. කන්නු ඛො{2} මයං පක්ඛං ලභෙය්යාම යෙන මයං ඉමස්මිං අධිකරණෙ බලවන්තතරා අස්සාමාති. අථ ඛො වෙසාලිකානං වජ්ජිපුත්තකානං භික්ඛූනං එතදහොසි: අයං ඛො ආයස්මා රෙවතො බහුස්සුතො ආගතාගමො ධම්මධරො විනයධරො මාතිකාධරො පණ්ඩිතො ව්යත්තො මෙධාවී ලජ්ජී කුක්කුච්චකො සික්ඛාකාමො. සචෙ මයං ආයස්මන්තං රෙවතං පක්ඛං ලභෙය්යාම එවං මයං ඉමස්මිං අධිකරණෙ බලවන්තතරා අස්සාමාති.
අථ ඛො වෙසාලිකා වජ්ජිපුත්තකා භික්ඛූ පහූතං සාමණකං පරික්ඛාරං පටියාදෙසුං පත්තම්පි චීවරම්පි නිසීදනම්පි සූචිඝරම්පි කායබන්ධනම්පි පරිස්සාවනම්පි ධම්මකරණම්පි. අථ ඛො වෙසාලිකා වජ්ජිපුත්තකා භික්ඛූ තං සාමණකං පරික්ඛාරං ආදාය නාවාය සහජාතිං උජ්ජවිංසු. නාවාය පච්චොරොහිත්වා අඤ්ඤතරස්මිං රුක්ඛමූලෙ භත්තවිස්සග්ගං කරොන්ති.
14. අථ ඛො ආයස්මතො සාළ්හස්ස රහොගතස්ස පටිසල්ලීනස්ස එවං චෙතසො පරිවිතක්කො උදපාදි. කො නු ඛො ධම්මවාදිනො පාචීනකා වා භික්ඛූ පාවෙය්යකා වාති. අථ ඛො ආයස්මතො සාළ්හස්ස ධම්මඤ්ච විනයඤ්ච{3} චෙතසා පච්චවෙක්ඛන්තස්ස එතදහොසි: අධම්මවාදිනො පාචීනකා භික්ඛූ ධම්මවාදිනො පාවෙය්යකා භික්ඛූති. අථ ඛො අඤ්ඤතරා සුද්ධාවාසකායිකා දෙවතා ආයස්මතො සාළ්හස්ස චෙතසා චෙතො පරිවිතක්කමඤ්ඤාය සෙය්යථාපි නාම බලවා පුරිසො සම්මිඤ්ජිතං වා බාහං පසාරෙය්ය පසාරිතං වා බාහං සම්මිඤ්ජෙය්ය එවමෙව සුද්ධාවාසෙසු දෙවෙසු අන්තරහිතා ආයස්මතො සාළ්හස්ස පමුඛෙ{4} පාතුරහොසි. අථ ඛො සා දෙවතා ආයස්මන්තං සාළ්හං එතදවොච: සාධු සාධු{5} භන්තෙ සාළ්හ, අධම්මවාදිනො{6} පාචීනකා භික්ඛූ ධම්මවාදිනො{7} පාවෙය්යකා භික්ඛූ. තෙන හි භන්තෙ සාළ්හ, යථා ධම්මො තථා තිට්ඨාහීති. පුබ්බෙපි චාහං දෙවතෙ එතරහි ච යථා ධම්මො තථා ඨිතො. අපි චාහං න තාව දිට්ඨිං ආවීකරොමි. අප්පෙවනාම මං ඉමස්මිං අධිකරණෙ සම්මන්නෙය්යාති.
15. අථ ඛො වෙසාලිකා වජ්ජිපුත්තකා භික්ඛූ තං සාමණකං පරික්ඛාරං ආදාය යෙනායස්මා රෙවතො තෙනුපසඞ්කමිංසු. උපසඞ්කමිත්වා ආයස්මන්තං රෙවතං එතදවොචුං: පටිගණ්හාතු භන්තෙ ථෙරො සාමණකං පරික්ඛාරං පත්තම්පි චීවරම්පි නිසීදනම්පි සූචිඝරම්පි කායබන්ධනම්පි පරිස්සාවනම්පි ධම්මකරණම්පීති. අලං ආවුසො, පරිපුණ්ණං මෙ පත්තචීවරන්ති න ඉච්ඡි පටිග්ගහෙතුං.
තෙන ඛො පන සමයෙන උත්තරො නාම භික්ඛු වීසති වස්සො ආයස්මතො රෙවතස්ස උපට්ඨාකො හොති. අථ ඛො වෙසාලිකා වජ්ජිපුත්තකා භික්ඛූ යෙනායස්මා උත්තරො තෙනුපසඞ්කමිංසු. උපසඞ්කමිත්වා ආයස්මන්තං උත්තරං එතදවොචුං පටිගණ්හාතු ආයස්මා උත්තරො සාමණකං පරික්ඛාරං පත්තම්පි චීවරම්පි නිසීදනම්පි සූචිඝරම්පි කායබන්ධනම්පි පරිස්සාවනම්පි ධම්මකරකම්පීති. අලං ආවුසො පරිපුණ්ණං මෙ පත්තචීවරන්ති. න ඉච්ඡි පටිග්ගහෙතුං.
මනුස්සා ඛො ආවුසො උත්තර, භගවතො සාමණකං පරික්ඛාරං උපනාමෙන්ති. සචෙ භගවා පටිගණ්හාති තෙනෙව තෙ අත්තමනා හොන්ති. නො චෙ භගවා පටිගණ්හාති ආයස්මතො ආනන්දස්ස උපනාමෙන්ති. පටිගණ්හාතු භන්තෙ ථෙරො සාමණකං පරික්ඛාරං, යථා භගවතා පටිග්ගහිතො එවමෙව සො භවිස්සතීති. පටිගණ්හාතු ආයස්මා උත්තරො සාමණකං පරික්ඛාරං. යථා ථෙරෙන පටිග්ගහිතො එවමෙව සො භවිස්සතීති.
16. අථ ඛො ආයස්මා උත්තරො වෙසාලිකෙහි වජ්ජිපුත්තකෙහි භික්ඛූහි නිප්පීළියමානො එකං චීවරං අග්ගහෙසි. වදෙය්යාථාවුසො, යෙනත්ථොති. එත්තකං ආයස්මා උත්තරො ථෙරං වදෙතු: එත්තකං භන්තෙ ථෙරො සඞ්ඝමජ්ඣෙ වදෙතු. පුරත්ථිමෙසු ජනපදෙසු බුද්ධා භගවන්තො උප්පජ්ජන්ති. ධම්මවාදිනො පාචීනකා භික්ඛූ අධම්මවාදිනො පාවෙය්යකා භික්ඛූති. එවමාවුසොති ඛො ආයස්මා උත්තරො වෙසාලිකානං වජ්ජිපුත්තකානං භික්ඛූනං පටිස්සුත්වා යෙනායස්මා රෙවතො තෙනුපසඞ්කමි. උපසඞ්කමිත්වා ආයස්මන්තං රෙවතං එතදවොච එත්තකං භන්තෙ ථෙරො සඞ්ඝමජ්ඣෙ වදෙතු. පුරත්ථිමෙසු ජනපදෙසු බුද්ධා භගවන්තො උප්පජ්ජන්ති. ධම්මවාදිනො පාචීනකා භික්ඛූ අධම්මවාදිනො පාවෙය්යකා භික්ඛූති.
අධම්මෙ මං ත්වං භික්ඛු නියොජෙසීති ථෙරො ආයස්මන්තං උත්තරං පණාමෙසි. අථ ඛො වෙසාලිකා වජ්ජිපුත්තකා භික්ඛූ ආයස්මන්තං උත්තරං එතදවොචුං: කිං ආවුසො උත්තර ථෙරො ආහාති. පාපිකං නො ආවුසො කතං. අධම්මෙ මං ත්වං භික්ඛු නියොජෙසීති ථෙරො මං පණාමෙසීති.
නනු ත්වං ආවුසො වුඩ්ඪො වීසතිවස්සොසීති, ආමාවුසොති. අපි ච මයං ගරුනිස්සයං ගණ්හාමාති.
17. අථ ඛො සඞ්ඝො තං අධිකරණං විනිච්ඡිනිතුකාමො සන්නිපති. අථ ඛො ආයස්මා රෙවතො සඞ්ඝං ඤාපෙසි: සුණාතු මෙ ආවුසො සඞ්ඝො. සචෙ මයං ඉමං අධිකරණං ඉධ වූපසමෙය්යාම{1} සියාපි මූලාදායකා භික්ඛූ පුනකම්මාය උක්කොටෙය්යුං. යදි සඞ්ඝස්ස පත්තකල්ලං යත්ථෙවිමං අධිකරණං සමුප්පන්නං. සඞ්ඝො තත්ථෙවිමං අධිකරණං වූපසමෙය්යාති. අථ ඛො ථෙරා භික්ඛූ වෙසාලිං අගමංසු තං අධිකරණං විනිච්ඡිනිතුකාමා.
18. තෙන ඛො පන සමයෙන සබ්බකාමී නාම පථව්යා සඞ්ඝත්ථෙරො වීසවස්සසතිකො{2} උපසම්පදාය ආයස්මතො ආනන්දස්ස සද්ධිවිහාරිකො වෙසාලියං පටිවසති. අථ ඛො ආයස්මා රෙවතො ආයස්මන්තං සම්භූතං සාණවාසිං එතදවොච: අහං ආවුසො යස්මිං විහාරෙ සබ්බකාමී ථෙරො විහරති තං විහාරං උපගච්ඡාමි. සො ත්වං කාලස්සෙව ආයස්මන්තං සබ්බකාමිං උපසඞ්කමිත්වා ඉමානි දසවත්ථූනි පුච්ඡෙය්යාසීති. එවම්භන්තෙති ඛො ආයස්මා සම්භූතො සාණවාසී ආයස්මතො රෙවතස්ස පච්චස්සොසි. අථ ඛො ආයස්මා රෙවතො යස්මිං විහාරෙ සබ්බකාමී ථෙරො විහරති තං විහාරං උපගඤ්ඡි.
ගබ්භෙ ආයස්මතො සබ්බකාමිස්ස සෙනාසනං පඤ්ඤත්තං හොති, ගබ්භ පමුඛෙ ආයස්මතො රෙවතස්ස. අථ ඛො ආයස්මා රෙවතො අයං ථෙරො මහල්ලකො න නිපජ්ජතීති න සෙය්යං කප්පෙසි. ආයස්මා සබ්බකාමී අයං භික්ඛු ආගන්තුකො කිලන්තො න නිපජ්ජතීති න සෙය්යං කප්පෙසි.
අථ ඛො ආයස්මා සබ්බකාමී රත්තියා පච්චූසසමයං පච්චුට්ඨාය ආයස්මන්තං රෙවතං එතදවොච: කතමෙන ත්වං භුම්මි විහාරෙන එතරහි බහුලං විහරසීති. මෙත්තාවිහාරෙන ඛො අහං භන්තෙ එතරහි බහුලං විහරාමීති. කුල්ලකවිහාරෙන කිර ත්වං භුම්මි එතරහි බහුලං විහරසි’ කුල්ලකවිහාරො එසො භුම්මි යදිදං මෙත්තාති.
පුබ්බෙපි මෙ භන්තෙ ගිහීභූතස්ස ආචිණ්ණා මෙත්තා. තෙනාහං එතරහිපි මෙත්තාවිහාරෙන බහුලං විහරාමි. අපි ච ඛො මයා චිරප්පත්තං අරහත්තං. ථෙරො පන භන්තෙ කතමෙන විහාරෙන එතරහි බහුලං විහරතීති. සුඤ්ඤතා විහාරෙන ඛො අහං භුම්මි එතරහි බහුලං විහරාමීති?
මහාපුරිසවිහාරෙන කිර භන්තෙ ථෙරො එතරහි බහුලං විහරති. මහාපුරිසවිහාරො එසො භන්තෙ යදිදං සුඤ්ඤතාති. පුබ්බෙපි මෙ භූමි ගිහීභූතස්ස ආචිණ්ණා සුඤ්ඤතා. තෙනාහං එතරහිපි සුඤ්ඤතාවිහාරෙන බහුලං විහරාමි. අපි ච මයා චිරපත්තං අරහත්තන්ති. අයඤ්චරහි ථෙරානං භික්ඛූනං අන්තරා කථා විප්පකතා.
19. අථායස්මා සම්භූතො සාණවාසී තස්මිං අනුප්පත්තො හොති. අථ ඛො ආයස්මා සම්භූතො සාණවාසී යෙනායස්මා සබ්බකාමී තෙනුපසඞ්කමි. උපසඞ්කමිත්වා ආයස්මන්තං සබ්බකාමිං අභිවාදෙත්වා එකමන්තං නිසීදි. එකමන්තං නිසින්නො ඛො ආයස්මා සම්භූතො සාණවාසී ආයස්මන්තං සබ්බකාමිං එතදවොච: ඉමෙ භන්තෙ වෙසාලිකා වජ්ජිපුත්තකා භික්ඛූ වෙසාලියං දසවත්ථූනි දීපෙන්ති: කප්පති සිඞ්ගිලොණ කප්පො. කප්පති ද්වඞ්ගුලකප්පො. කප්පති ගාමන්තරකප්පො. කප්පති ආවාසකප්පො. කප්පති අනුමතිකප්පො. කප්පති ආචිණ්ණකප්පො. කප්පති අමථිතකප්පො. කප්පති ජලොගි පාතුං. කප්පති අදසකං නිසීදනං. කප්පති ජාතරූපරජතන්ති. ථෙරෙන භන්තෙ උපජ්ඣායස්ස මූලෙ බහුධම්මො ච විනයො ච පරියත්තො. ථෙරස්ස භන්තෙ ධම්මඤ්ච විනයඤ්ච පච්චවෙක්ඛන්තස්ස කථං හොති කෙ නු ඛො ධම්මවාදිනො පාචීනකා වා භික්ඛූ පාවෙය්යකා වාති.
තයාපි ඛො ආවුසො උපජ්ඣායස්ස මූලෙ බහු ධම්මො ච විනයො ච පරියත්තො. තුය්හං පනාවුසො ධම්මඤ්ච විනයඤ්ච පච්චවෙක්ඛන්තස්ස කථං හොති. කෙ නු ඛො ධම්මවාදිනො පාචීනකා වා භික්ඛූ පාවෙය්යකා වාති. මය්හං ඛො භන්තෙ ධම්මඤ්ච විනයඤ්ච පච්චවෙක්ඛන්තස්ස එවං හොති: අධම්මවාදී පාචීනකා භික්ඛූ ධම්මවාදිනො පාවෙය්යකා භික්ඛූති. අපිචාහං න තාව දිට්ඨිං ආවීකරොමි අප්පෙව නාම මං ඉමස්මිං අධිකරණෙ සම්මන්නෙය්යාති.
මය්හම්පි ඛො ආවුසො ධම්මඤ්ච විනයඤ්ච පච්චවෙක්ඛන්තස්ස එවං හොති: අධම්මවාදිනො පාචීනකා භික්ඛූ ධම්මවාදිනො පාවෙය්යකා භික්ඛූති. අපිචාහං න තාව දිට්ඨිං ආවීකරොමි අප්පෙවනාම මං ඉමස්මිං අධිකරණෙ සම්මන්නෙය්යාති.
20. අථ ඛො සඞ්ඝො තං අධිකරණං විනිච්ඡිනිතුකාමො සන්නිපති. තස්මිං ඛො පන අධිකරණෙ විනිච්ඡියමානෙ අනග්ගානි චෙව භස්සානි ජායන්ති. න චෙකස්ස භාසිතස්ස අත්ථො විඤ්ඤායති. අථ ඛො ආයස්මා රෙවතො සඞ්ඝං ඤාපෙසි: සුණාතු මෙ භන්තෙ සඞ්ඝො. අම්හාකං ඉමස්මිං අධිකරණෙ විනිච්ඡියමානෙ අනග්ගානි චෙව භස්සානි ජායන්ති න චෙකස්ස භාසිතස්ස අත්ථො විඤ්ඤායති. යදි සඞ්ඝස්ස පත්තකල්ලං සඞ්ඝො ඉමං අධිකරණං උබ්බාහිකාය වූපසමෙය්ය. සඞ්ඝො චත්තාරො පාචීනකෙ භික්ඛූ චත්තාරො පාවෙය්යකෙ භික්ඛූ උච්චිනි. පාචීනකානං භික්ඛූනං ආයස්මන්තඤ්ච සබ්බකාමිං ආයස්මන්තඤ්ච සාළ්හං ආයස්මන්තඤ්ච ඛුජ්ජසොභිතං ආයස්මන්තඤ්ච වාසභගාමිකං. පාවෙය්යකානං භික්ඛූනං ආයස්මන්තඤ්ච රෙවතං. ආයස්මන්තඤ්ච සම්භූතං සාණවාසිං. ආයස්මන්තඤ්ච යසං කාකණ්ඩකපුත්තං. ආයස්මන්තඤ්ච සුමනං. අථ ඛො ආයස්මා රෙවතො සඞ්ඝං ඤාපෙසි: සුණාතු මෙ භන්තෙ සඞ්ඝො. අම්හාකං ඉමස්මිං අධිකරණෙ විනිච්ඡියමානෙ අනග්ගානි චෙව භස්සානි ජායන්ති න චෙකස්ස භාසිතස්ස අත්ථො විඤ්ඤායති. යදි සඞ්ඝස්ස පත්තකල්ලං සඞ්ඝො චත්තාරො පාචීනකෙ භික්ඛූ චත්තාරො පාවෙය්යකෙ භික්ඛූ සම්මන්නෙය්ය උබ්බාහිකාය ඉමං අධිකරණං වූපසමෙතුං. එසා ඤත්ති.
සුණාතු මෙ භන්තෙ සඞ්ඝො. අම්හාකං ඉමස්මිං අධිකරණෙ විනිච්ඡියමානෙ අනග්ගානි චෙව භස්සානි ජායන්ති න චෙකස්ස භාසිතස්ස අත්ථො විඤ්ඤායති. සඞ්ඝො චත්තාරො පාචීනකෙ භික්ඛූ චත්තාරො පාවෙය්යකෙ භික්ඛූ සම්මන්නති උබ්බාහිකාය ඉමං අධිකරණං වූපසමෙතුං. යස්සායස්මතො ඛමති චතුණ්ණං පාචීනකානං භික්ඛූනං චතුණ්ණං පාවෙය්යකානං භික්ඛූනං සම්මුති උබ්බාහිකාය ඉමං අධිකරණං වූපසමෙතුං. සො තුණ්හස්ස. යස්ස නක්ඛමති සො භාසෙය්ය.
සම්මතා සඞ්ඝෙන චත්තාරො පාචීනකා භික්ඛූ චත්තාරො පාවෙය්යකා භික්ඛූ උබ්බාහිකාය ඉමං අධිකරණං වූපසමෙතුං. ඛමති සඞ්ඝස්ස තස්මා තුණ්හී එවමෙතං ධාරයාමීති.
21. තෙන ඛො පන සමයෙන අජිතො නාම භික්ඛු දසවස්සො සඞ්ඝස්ස පාතිමොක්ඛුද්දෙසකො හොති. අථ ඛො සඞ්ඝො ආයස්මන්තම්පි අජිතං සම්මන්නති ථෙරානං භික්ඛූනං ආසනපඤ්ඤාපකං. අථ ඛො ථෙරානං භික්ඛූනං එතදහොසි: කත්ථ නු ඛො මයං ඉමං අධිකරණං වූපසමෙය්යාමාති. අථ ඛො ථෙරානං භික්ඛූනං එතදහොසි: අයං ඛො වාලිකාරාමො රමණීයො අප්පසද්දො අප්පනිග්ඝොසො. යන්නූන මයං වාලිකාරාමෙ ඉමං අධිකරණං වූපසමෙය්යාමාති. අථ ඛො ථෙරා භික්ඛූ වාලිකාරාමං අගමංසු තං අධිකරණං විනිච්ඡිනිතුකාමා. අථ ඛො ආයස්මා රෙවතො සඞ්ඝං ඤාපෙසි: සුණාතු මෙ භන්තෙ සඞ්ඝො. යදි සඞ්ඝස්ස පත්තකල්ලං අහං ආයස්මන්තං සබ්බකාමිං විනයං පුච්ඡෙය්යන්ති. ආයස්මා සබ්බකාමී සඞ්ඝං ඤාපෙසි: සුණාතු මෙ ආවුසො සඞ්ඝො. යදි සඞ්ඝස්ස පත්තකල්ලං අහං රෙවතෙන විනයං පුට්ඨො විස්සජ්ජෙය්යන්ති. අථ ඛො ආයස්මා රෙවතො ආයස්මන්තං සබ්බකාමිං එතදවොච.
1. කප්පති භන්තෙ සිඞ්ගිලොණකප්පොති. කො සො ආවුසො සිඞ්ගිලොණකප්පොති. කප්පති භන්තෙ සිඞ්ගිනා ලොණං පරිහරිතුං යත්ථ අලොණකං භවිස්සති තත්ථ පරිභුඤ්ජිස්සාමාති. නාවුසො කප්පතීති. කත්ථ පටික්ඛිත්තන්ති. සාවත්ථියං සුත්තවිභඞ්ගෙති. කිං ආපජ්ජතීති. සන්නිධිකාරකභොජනෙ පාචිත්තියන්ති. සුණාතු මෙ භන්තෙ සඞ්ඝො. ඉදං පඨමං වත්ථු සඞ්ඝෙන විනිච්ඡිතං. ඉතිපිදං වත්ථුං උද්ධම්මං උබ්බිනයං අපගතසත්ථුසාසනං. ඉදං පඨමං සලාකං නික්ඛිපාමි.
2. කප්පති භන්තෙ ද්වඞ්ගුලකප්පොති. කො සො ආවුසො ද්වඞ්ගුලකප්පොති. කප්පති භන්තෙ ද්වඞ්ගුලාය ඡායාය වීතිවත්තාය විකාලෙ භොජනං භුඤ්ජිතුන්ති. නාවුසො කප්පතීති. කත්ථ පටික්ඛිත්තන්ති. රාජගහෙ සුත්තවිභඞ්ගෙති. කිං ආපජ්ජතීති. විකාලභොජනෙ පාචිත්තියන්ති. සුණාතු මෙ භන්තෙ සඞ්ඝො. ඉදං දුතියං වත්ථුං සඞ්ඝෙන විනිච්ඡිතං. ඉතිපිදං වත්ථුං උද්ධම්මං උබ්බිනයං අපගතසත්ථුසාසනං. ඉදං දුතියං සලාකං නික්ඛිපාමි.
3. කප්පති භන්තෙ ගාමන්තරකප්පොති. කො සො ආවුසො ගාමන්තරකප්පොති. කප්පති භන්තෙ ඉදානි ගාමන්තරං ගමිස්සාමීති භුත්තාවිනා පවාරිතෙන අනතිරිත්තං භොජනං භුඤ්ජිතුන්ති. නාවුසො කප්පතීති. කත්ථ පටික්ඛිත්තන්ති. සාවත්ථියා සුත්තවිභඞ්ගෙති. කිං ආපජ්ජතීති. අනතිරිත්තභොජනෙ පාචිත්තියන්ති. සුණාතු මෙ භන්තෙ සඞ්ඝො. ඉදං තතියං වත්ථු සඞ්ඝෙන විනිච්ඡිතං. ඉතිපිදං වත්ථු උද්ධම්මං උබ්බිනයං අපගතසත්ථුසාසනං. ඉදං තතියං සලාකං නික්ඛිපාමි.
4. කප්පති භන්තෙ ආවාසකප්පොති. කො සො ආවුසො ආවාසකප්පොති. කප්පති භන්තෙ සම්බහුලා ආවාසා සමානසීමා නානුපොසථං කාතුන්ති. නාවුසො කප්පතීති. කත්ථ පටික්ඛිත්තන්ති. රාජගහෙ උපොසථසඤ්ඤුත්තෙති. කිං ආපජ්ජතීති. විනයාතිසාරෙ දුක්කටන්ති. සුණාතු මෙ භන්තෙ සඞ්ඝො. ඉදං චතුත්ථං වත්ථුං සඞ්ඝෙන විනිච්ඡිතං. ඉතිපිදං වත්ථුං උද්ධම්මං උබ්බිනයං අපගතසත්ථුසාසනං ඉදං චතුත්ථං සලාකං නික්ඛිපාමි.
5. කප්පති භන්තෙ අනුමතිකප්පොති. කො සො ආවුසො අනුමතිකප්පොති. කප්පති භන්තෙ වග්ගෙන සඞ්ඝෙන කම්මං කාතුං ආගතෙ භික්ඛූ අනුමානෙස්සාමාති. නාවුසො කප්පතීති. කත්ථ පටික්ඛිත්තන්ති. චම්පෙය්යකෙ විනයවත්ථුස්මින්ති. කිං ආපජ්ජතීති. විනයාතිසාරෙ දුක්කටන්ති. සුණාතු මෙ භන්තෙ සඞ්ඝො. ඉදං පඤ්චමං වත්ථුං සඞ්ඝෙන විනිච්ඡිතං. ඉතිපිදං වත්ථුං උද්ධම්මං උබ්බිනයං අපගතසත්ථුසාසනං. ඉදං පඤ්චමං සලාකං නික්ඛිපාමි.
6. කප්පති භන්තෙ ආචිණ්ණකප්පොති. කො සො ආවුසො ආචිණ්ණකප්පොති. කප්පති භන්තෙ ඉදං මෙ උපජ්ඣායෙන අජ්ඣාචිණ්ණං ඉදං මෙ ආචරියෙන අජ්ඣාචිණ්ණං තං අජ්ඣාචරිතුන්ති. ආචිණ්ණකප්පො ඛො ආවුසො එකච්චො කප්පති එකච්චො න කප්පතීති. සුණාතු මෙ භන්තෙ සඞ්ඝො. ඉදං ඡට්ඨං වත්ථුං සඞ්ඝෙන විනිච්ඡිතං. ඉතිපිදං වත්ථුං උද්ධම්මං උබ්බිනයං අපගතසත්ථුසාසනං. ඉදං ඡට්ඨං සලාකං නික්ඛිපාමි.
7. කප්පති භන්තෙ අමථිතකප්පොති. කො සො ආවුසො අමථිතකප්පොති. කප්පති භන්තෙ යං තං ඛීරං ඛීරභාවං විජහිතං අසම්පත්තං දධිභාවං, තං භුත්තාවිනා පවාරිතෙන අනතිරිත්තං පාතුන්ති. නාවුසො කප්පතීති. කත්ථ පටික්ඛිත්තන්ති. සාවත්ථියා සුත්තවිභඞ්ගෙති. කිං ආපජ්ජතීති. අනතිරිත්තභොජනෙ පාචිත්තියන්ති. සුණාතු මෙ භන්තෙ සඞ්ඝො. ඉදං සත්තමං වත්ථුං සඞ්ඝෙන විනිච්ඡිතං. ඉතිපිදං වත්ථු උද්ධම්මං උබ්බිනයං අපගතසත්ථුසාසනං. ඉදං සත්තමං සලාකං නික්ඛිපාමි.
8. කප්පති භන්තෙ ජලොගිං පාතුන්ති කො සා ආවුසො ජලොගීති. කප්පති භන්තෙ යා සා සුරා ආසුතා අසම්පත්තා මජ්ජභාවං, සා පාතුන්ති. නාවුසො කප්පතීති. කත්ථ පටික්ඛිත්තන්ති. කොසම්බියං සුත්තවිභඞ්ගෙති. කිං ආපජ්ජතීති. සුරාමෙරයපානෙ පාචිත්තියන්ති. සුණාතු මෙ භන්තෙ සඞ්ඝො. ඉදං අට්ඨමං වත්ථුං සඞ්ඝෙන විනිච්ඡිතං. ඉතිපිදං වත්ථුං උද්ධම්මං උබ්බිනයං අපගතසත්ථුසාසනං. ඉදං අට්ඨමං සලාකං නික්ඛිපාමි.
9. කප්පති භන්තෙ අදසකං නිසීදනන්ති. නාවුසො කප්පතීති. කත්ථ පටික්ඛිත්තන්ති. සාවත්ථියා සුත්තවිභඞ්ගෙති. කිං ආපජ්ජතීති. ඡෙදනකෙ පාචිත්තියන්ති. සුණාතු මෙ භන්තෙ සඞ්ඝො. ඉදං නවමං වත්ථු සඞ්ඝෙන විනිච්ඡිතං. ඉතිපිදං වත්ථු උද්ධම්මං උබ්බිනයං අපගතසත්ථුසාසනං. ඉදං නවමං සලාකං නික්ඛිපාමි.
10. කප්පති භන්තෙ ජාතරූපරජතන්ති. නාවුසො කප්පතීති. කත්ථ පටික්ඛිත්තන්ති. රාජගහෙ සුත්තවිභඞ්ගෙති. කිං ආපජ්ජතීති. ජාතරූපරජතපටිග්ගහණෙ පාචිත්තියන්ති. සුණාතු මෙ භන්තෙ සඞ්ඝො. ඉදං දසමං වත්ථු සඞ්ඝෙන විනිච්ඡිතං. ඉතිපිදං වත්ථු උද්ධම්මං උබ්බිනයං අපගතසත්ථුසාසනං. ඉදං දසමං සලාකං නික්ඛිපාමි.
සුණාතු මෙ භන්තෙ සඞ්ඝො. ඉමානි දස වත්ථූනි සඞ්ඝෙන විනිච්ඡිතානි. ඉතිපිමානි දසවත්ථූනි උද්ධම්මානි උබ්බිනයානි අපගතසත්ථුසාසනානීති. නිහතමෙතං ආවුසො අධිකරණං සන්තං වූපසන්තං සුවූපසන්තං. අපි ච මං ත්වං ආවුසො සඞ්ඝමජ්ඣෙපි ඉමානි දසවත්ථූනි පුච්ඡෙය්යාසි තෙසං භික්ඛූනං සඤ්ඤත්තියාති.
22. අථ ඛො ආයස්මා රෙවතො ආයස්මන්තං සබ්බකාමිං සඞ්ඝමජ්ඣෙපි ඉමානි දසවත්ථූනි පුච්ඡි. පුට්ඨො පුට්ඨො ආයස්මා සබ්බකාමී විස්සජ්ජෙසි. ඉමාය ඛො පන විනයසඞ්ගීතියා සත්ත භික්ඛුසතානි අනූනානි අනධිකානි අහෙසුං. තස්මායං විනයසඞ්ගීති සත්තසතිකාති වුච්චතීති.
සත්තසතිකක්ඛන්ධකං.
ඉමම්හි ඛන්ධකෙ වත්ථූ පඤ්චවීසති.
තස්සුද්දානං:
1. දසවත්ථූනි පූරෙත්වා කම්මං දූතෙන පාවිසි චත්තාරො පුන රූපඤ්ච කොසම්බි ච පාවෙය්යකො.
2. මග්ගො සොරෙය්යං සඞ්කස්සං කණ්ණකුජ්ජං උදුම්බරං අග්ගළං සහජාති ච අස්සොසි කන්නු ඛො මයං.
3. පත්තනාවාය උජ්ජවී රහොසි උපනාමයං ගරු සඞ්ඝො ච වෙසාලී මෙත්තා සඞ්ඝො උබ්බාහිකාති.
4. කම්මං ච පරිවාසො ච සමුච්චයො සමථොපි ච ඛුද්දං සෙනාසනං භෙදා වත්තූපොසථෙ භික්ඛුනී පඤ්චසති සත්තසතී ඛන්ධකා චුල්ලවග්ගම්හි [වුත්තා ද්වාදසමා සියුං]
චුල්ලවග්ගො නිට්ඨිතො.