9. අථ ඛො ආයස්මා ආනන්දො ථෙරෙ භික්ඛූ එතදවොච: භගවා මං භන්තෙ පරිනිබ්බානකාලෙ එවමාහ: ආකඞ්ඛමානො ආනන්ද සඞ්ඝො මමච්චයෙන ඛුද්දානුඛුද්දකානි සික්ඛාපදානි සමූහනෙය්යාති. පුච්ඡි පන ත්වං ආවුසො ආනන්ද භගවන්තං කතමානි පන භන්තෙ ඛුද්දානුඛුද්දකානි සික්ඛාපදානීති. න ඛො අහං භන්තෙ භගවන්තං පුච්ඡිං, කතමානි පන භන්තෙ ඛුද්දානුඛුද්දකානි සික්ඛාපදානීති.
එකච්චෙ ථෙරා එවමාහංසු: චත්තාරි පාරාජිකානි ඨපෙත්වා අවසෙසානි ඛුද්දානුඛුද්දකානි සික්ඛාපදානීති. එකච්චෙ ථෙරා එවමාහංසු: චත්තාරි පාරාජිකානි ඨපෙත්වා තෙරස සඞ්ඝාදිසෙසෙ ඨපෙත්වා අවසෙසානි ඛුද්දානුඛුද්දකානි සික්ඛාපදානීති. එකච්චෙ ථෙරා එවමාහංසු: චත්තාරි පාරාජිකානි ඨපෙත්වා තෙරස සඞ්ඝාදිසෙසෙ ඨපෙත්වා ද්වෙ අනියතෙ ඨපෙත්වා අවසෙසානි ඛුද්දානුඛුද්දකානි සික්ඛාපදානීති. එකච්චෙ ථෙරා එවමාහංසු: චත්තාරි පාරාජිකානි ඨපෙත්වා තෙරස සඞ්ඝාදිසෙසෙ ඨපෙත්වා ද්වෙ අනියතෙ ඨපෙත්වා තිංස නිස්සග්ගියෙ පාචිත්තියෙ ඨපෙත්වා අවසෙසානි ඛුද්දානුඛුද්දකානි සික්ඛාපදානීති. එකච්චෙ ථෙරා එවමාහංසු:– චත්තාරි පාරාජිකානි ඨපෙත්වා තෙරස සඞ්ඝාදිසෙසෙ ඨපෙත්වා ද්වෙ අනියතෙ ඨපෙත්වා තිංස නිස්සග්ගියෙ පාචිත්තියෙ ඨපෙත්වා ද්වෙනවුති පාචිත්තියෙ ඨපෙත්වා අවසෙසානි ඛුද්දානුඛුද්දකානි සික්ඛාපදානීති. එකච්චෙ ථෙරා එවමාහංසු: චත්තාරි පාරාජිකානි ඨපෙත්වා තෙරස සඞ්ඝාදිසෙසෙ ඨපෙත්වා ද්වෙ අනියතෙ ඨපෙත්වා තිංස නිස්සග්ගියෙ පාචිත්තියෙ ඨපෙත්වා ද්වෙනවුති පාචිත්තියෙ ඨපෙත්වා චත්තාරො පාටිදෙසනීයෙ ඨපෙත්වා අවසෙසානි ඛුද්දානුඛුද්දකානි සික්ඛාපදානීති.
10. අථ ඛො ආයස්මා මහාකස්සපො සඞ්ඝං ඤාපෙසි: සුණාතු මෙ ආවුසො සඞ්ඝො. සන්තම්හාකං සික්ඛාපදානි ගිහිගතානි ගිහීනොපි ජානන්ති ‘ඉදං වො සමණානං සක්යපුත්තියානං කප්පති, ඉදං වො න කප්පතීති. සචෙ මයං ඛුද්දානුඛුද්දකානි සික්ඛාපදානි සමූහනිස්සාම භවිස්සන්ති වත්තාරො: ධූමකාලිකං සමණෙන ගොතමෙන සාවකානං සික්ඛාපදං පඤ්ඤත්තං. යාවිමෙසං සත්ථා අට්ඨාසි තාවිමෙ සික්ඛාපදෙසු සික්ඛිංසු. යතො ඉමෙසං සත්ථා පරිනිබ්බුතො න දානිමෙ සික්ඛාපදෙසු සික්ඛන්තීති. යදි සඞ්ඝස්ස පත්තකල්ලං සඞ්ඝො අප්පඤ්ඤත්තං න පඤ්ඤාපෙය්ය. පඤ්ඤත්තං න සමුච්ඡින්දෙය්ය. යථාපඤ්ඤත්තෙසු සික්ඛාපදෙසු සමාදාය වත්තෙය්ය. එසා ඤත්ති.
සුණාතු මෙ ආවුසො සඞ්ඝො. සන්තම්හාකං සික්ඛාපදානි ගිහීගතානි ගිහීනොපි ජානන්ති ඉදං වො සමණානං සක්යපුත්තියානං කප්පති. ඉදං වො න කප්පතීති. සචෙ මයං ඛුද්දානුඛුද්දකානි සික්ඛාපදානි සමූහනිස්සාම, භවිස්සන්ති වත්තාරො: ධූමකාලිකං සමණෙන ගොතමෙන සාවකානං සික්ඛාපදං පඤ්ඤත්තං. යාවිමෙසං සත්ථා අට්ඨාසි තාවිමෙ සික්ඛාපදෙසු සික්ඛිංසු. යතො ඉමෙසං සත්ථා පරිනිබ්බුතො න දානිමෙ සික්ඛාපදෙසු සික්ඛන්තීති. සඞ්ඝො අප්පඤ්ඤත්තං න පඤ්ඤාපෙති පඤ්ඤත්තං න සමුච්ඡින්දති. යථාපඤ්ඤත්තෙසු සික්ඛාපදෙසු සමාදාය වත්තති. යස්සායස්මතො ඛමති අපඤ්ඤත්තස්ස අපඤ්ඤාපනා{1} පඤ්ඤත්තස්ස අසමුච්ඡෙදො, යථාපඤ්ඤත්තෙසු සික්ඛාපදෙසු සමාදාය වත්තනා, සො තුණ්හස්ස. යස්ස නක්ඛමති සො භාසෙය්ය.
සඞ්ඝො අපඤ්ඤත්තං න පඤ්ඤාපෙති පඤ්ඤත්තං න සමුච්ඡින්දති, යථා පඤ්ඤත්තෙසු සික්ඛාපදෙසු සමාදාය වත්තති. ඛමති සඞ්ඝස්ස තස්මා තුණ්හී. එවමෙතං ධාරයාමීති.
11. අථ ඛො ථෙරා භික්ඛූ ආයස්මන්තං ආනන්දං එතදවොචුං: ඉදං තෙ ආවුසො ආනන්ද දුක්කටං යං ත්වං භගවන්තං න පුච්ඡි-කතමානි පන භන්තෙ ඛුද්දානුඛුද්දකානි සික්ඛාපදානීති. දෙසෙහි තං දුක්කටන්ති.
අහං ඛො භන්තෙ අසතියා{2} භගවන්තං න පුච්ඡිං කතමානි පන භන්තෙ ඛුද්දානුඛුද්දකානි සික්ඛාපදානීති. නාහං තං දුක්කටං පස්සාමි. අපිචායස්මන්තානං සද්ධාය දෙසෙමි තං දුක්කටන්ති.
ඉදම්පි තෙ ආවුසො ආනන්ද දුක්කටං යං ත්වං භගවතො වස්සිකසාටිකං අක්කමිත්වා සිබ්බෙසි. දෙසෙහි තං දුක්කටන්ති.
නාහං ඛො භන්තෙ අගාරවෙන භගවතො වස්සිකසාටිකං අක්කමිත්වා සිබ්බෙසිං. නාහන්තං දුක්කටං පස්සාමි. අපිචායස්මන්තානං සද්ධාය දෙසෙමි තං දුක්කටන්ති.
ඉදම්පි තෙ ආවුසො ආනන්ද දුක්කටං යං ත්වං මාතුගාමෙහි භගවතො සරීරං පඨමං වන්දාපෙසි. තාසං රොදන්තීනං භගවතො සරීරං අස්සුකෙන මක්ඛිතං. දෙසෙහි තං දුක්කටන්ති.
අහං ඛො භන්තෙ මායිමා{1} විකාලෙ අහෙසුන්ති මාතුගාමෙහි භගවතො සරීරං පඨමං වන්දාපෙසිං. නාහං තං දුක්කටං පස්සාමි. අපිචායස්මන්තානං සද්ධාය දෙසෙමි තං දුක්කටන්ති.
ඉදම්පි තෙ ආවුසො ආනන්ද දුක්කටං යං ත්වං භගවතා ඔළාරිකෙ නිමිත්තෙ කයිරමානෙ ඔළාරිකෙ ඔභාසෙ කයිරමානෙ න භගවන්තං යාචි-තිට්ඨතු භගවා කප්පං. තිට්ඨතු සුගතො කප්පං බහුජනහිතාය බහුජනසුඛාය ලොකානුකම්පාය අත්ථාය හිතාය සුඛාය දෙවමනුස්සානන්ති. දෙසෙහි තං දුක්කටන්ති.
අහං ඛො භන්තෙ මාරෙන පරියුට්ඨිතචිත්තො න භගවන්තං යාචිං තිට්ඨතු භගවා කප්පං, තිට්ඨතු සුගතො කප්පං බහුජනහිතාය බහුජනසුඛාය ලොකානුකම්පාය අත්ථාය හිතාය සුඛාය දෙවමනුස්සානන්ති. නාහන්තං දුක්කටං පස්සාමි. අපිචායස්මන්තානං සද්ධාය දෙසෙමි තං දුක්කටන්ති.
ඉදම්පි තෙ ආවුසො ආනන්ද දුක්කටං-යං ත්වං මාතුගාමස්ස තථාගතප්පවෙදිතෙ ධම්මවිනයෙ පබ්බජ්ජං උස්සුක්කං අකාසි. දෙසෙහි තං දුක්කටන්ති.
අහං ඛො භන්තෙ අයං මහාපජාපති ගොතමී භගවතො මාතුච්ඡා ආපාදිකා පොසිකා ඛීරස්ස දායිකා භගවන්තං ජනෙත්තියා කාලකතාය{2} ථඤ්ඤං පායෙසීති මාතුගාමස්ස තථාගතප්පවෙදිතෙ ධම්මවිනයෙ පබ්බජ්ජං උස්සුක්කං අකාසිං. නාහං තං දුක්කටං පස්සාමි. අපිචායස්මන්තානං සද්ධාය දෙසෙමි තං දුක්කටන්ති.
12. තෙන ඛො පන සමයෙන ආයස්මා පුරාණො දක්ඛිණාගිරිස්මිං චාරිකං චරති මහතා භික්ඛුසඞ්ඝෙන සද්ධිං පඤ්චමත්තෙහි භික්ඛුසතෙහි. අථ ඛො ආයස්මා පුරාණො ථෙරෙහි භික්ඛූහි ධම්මෙ ච විනයෙ ච සංගීතෙ දක්ඛිණාගිරිස්මිං යථාභිරන්තං විහරිත්වා යෙන රාජගහං යෙන වෙළුවනං කලන්දකනිවාපො යෙන ථෙරා භික්ඛූ තෙනුපසඞ්කමි, උපසඞ්කමිත්වා ථෙරෙහි භික්ඛූහි සද්ධිං පටිසම්මොදිත්වා එකමන්තං නිසීදි. එකමන්තං නිසින්නං ඛො ආයස්මන්තං පුරාණං ථෙරා භික්ඛූ එතදවොචුං: ථෙරෙහි ආවුසො පුරාණ, ධම්මො ච විනයො ච සංගීතො. උපෙහි තං සඞ්ගීතින්ති. සුසංගීතාවුසො ථෙරෙහි ධම්මො ච විනයො ච. අපි ච යථෙව මයා භගවතො සම්මුඛා සුතං සම්මුඛා පටිග්ගහිතං තථෙවාහං ධාරෙස්සාමීති.
බ්රහ්මදණ්ඩකථා
13. අථ ඛො ආයස්මා ආනන්දො ථෙරෙ භික්ඛූ එතදවොච: භගවා මං භන්තෙ පරිනිබ්බානකාලෙ එවමාහ: තෙනහානන්ද සඞ්ඝො මමච්චයෙන ඡන්නස්ස භික්ඛුනො බ්රහ්මදණ්ඩං ආණාපෙතූති. පුච්ඡි පන ත්වං ආවුසො ආනන්ද භගවන්තං කතමො ච පන භන්තෙ බ්රහ්මදණ්ඩොති. පුච්ඡිං ඛො අහං භන්තෙ භගවන්තං කතමො පන භන්තෙ බ්රහ්මදණ්ඩොති. ඡන්නො ආනන්ද භික්ඛු යං ඉච්ඡෙය්ය තං වදෙය්ය. භික්ඛූහි ඡන්නො භික්ඛු නෙව වත්තබ්බො. න ඔවදිතබ්බො. නානුසාසිතබ්බොති. තෙනහාවුසො ආනන්ද ත්වඤ්ඤෙව ඡන්නස්ස භික්ඛුනො බ්රහ්මදණ්ඩං ආණාපෙහීති.
කථාහං භන්තෙ ඡන්නස්ස භික්ඛුනො බ්රහ්මදණ්ඩං ආණාපෙමි? චණ්ඩො සො භික්ඛු ඵරුසොති. තෙනහාවුසො ආනන්ද බහුකෙහි භික්ඛූහි සද්ධිං ගච්ඡාහීති. එවං භන්තෙති ඛො ආයස්මා ආනන්දො ථෙරානං භික්ඛූනං පටිස්සුත්වා මහතා භික්ඛුසඞ්ඝෙන සද්ධිං පඤ්චමත්තෙහි භික්ඛුසතෙහි නාවාය කොසම්බිං උජ්ජවි{1}. නාවාය පච්චොරොහිත්වා රඤ්ඤො උදෙනස්ස උය්යානස්ස අවිදූරෙ අඤ්ඤතරස්මිං රුක්ඛමූලෙ නිසීදි.
14. තෙන ඛො පන සමයෙන රාජා උදෙනො උය්යානෙ පරිචාරෙති සද්ධිං ඔරොධෙන. අස්සොසි ඛො රඤ්ඤො උදෙනස්ස ඔරොධො අම්හාකං කිර ආචරියො අය්යො ආනන්දො උය්යානස්ස අවිදූරෙ අඤ්ඤතරස්මිං රුක්ඛමූලෙ නිසින්නොති. අථ ඛො රඤ්ඤො උදෙනස්ස ඔරොධො රාජානං උදෙනං එතදවොච: අම්හාකං කිර දෙව ආචරියො අය්යො ආනන්දො උය්යානස්ස අවිදූරෙ අඤ්ඤතරස්මිං රුක්ඛමූලෙ නිසින්නො. ඉච්ඡාම මයං දෙව අය්යං ආනන්දං පස්සිතුන්ති. තෙන හි තුම්හෙ සමණං ආනන්දං පස්සථාති.
අථ ඛො රඤ්ඤො උදෙනස්ස ඔරොධො යෙනායස්මා ආනන්දො තෙනුපසඞ්කමි. උපසඞ්කමිත්වා ආයස්මන්තං ආනන්දං අභිවාදෙත්වා එකමන්තං නිසීදි. එකමන්තං නිසින්නං ඛො රඤ්ඤො උදෙනස්ස ඔරොධං ආයස්මා ආනන්දො ධම්මියා කථාය සන්දස්සෙසි, සමාදපෙසි, සමුත්තෙජෙසි සම්පහංසෙසි. අථ ඛො රඤ්ඤො උදෙනස්ස ඔරොධො ආයස්මතා ආනන්දෙන ධම්මියා කථාය සන්දස්සිතො සමාදපිතො සමුත්තෙජිතො සම්පහංසිතො ආයස්මතො ආනන්දස්ස පඤ්ච උත්තරාසඞ්ගසතානි පාදාසි. අථ ඛො රඤ්ඤො උදෙනස්ස ඔරොධො ආයස්මතො ආනන්දස්ස භාසිතං අභිනන්දිත්වා අනුමොදිත්වා උට්ඨායාසනා ආයස්මන්තං ආනන්දං අභිවාදෙත්වා පදක්ඛිණං කත්වා යෙන රාජා උදෙනො තෙනුපසඞ්කමි.
අද්දසා ඛො රාජා උදෙනො ඔරොධං දූරතොව ආගච්ඡන්තං. දිස්වාන ඔරොධං එතදවොච: අපි නු තුම්හෙ සමණං ආනන්දං පස්සිත්ථාති. අපස්සිම්හා ඛො මයං දෙව අය්යං ආනන්දන්ති. අපි නු තුම්හෙ සමණස්ස ආනන්දස්ස කිඤ්චි අදත්ථාති. අදම්හා ඛො මයං දෙව අය්යස්ස ආනන්දස්ස පඤ්චඋත්තරාසඞ්ගසතානීති. රාජා උදෙනො උජ්ඣායති ඛීයති විපාචෙති: කථං හි නාම සමණො ආනන්දො තාව බහුං චීවරං පටිග්ගහෙස්සති. දුස්සවණිජ්ජං වා සමණො ආනන්දො කරිස්සති පග්ගාහිකසාලං වා පසාරෙස්සතීති.
15. අථ ඛො රාජා උදෙනො යෙනායස්මා ආනන්දො තෙනුපසඞ්කමි. උපසඞ්කමිත්වා ආයස්මතා ආනන්දෙන සද්ධිං සම්මොදි. සම්මොදනීයං කථං සාරාණීයං{1} වීතිසාරෙත්වා එකමන්තං නිසීදි. එකමන්තං නිසින්නො ඛො රාජා උදෙනො ආයස්මන්තං ආනන්දං එතදවොච: ආගමා නු ඛොධ{2} භො ආනන්ද අම්හාකං ඔරොධොති.
ආගමා ඛො තෙධ{3} මහාරාජ ඔරොධොති”.
“අපි පන භොතො ආනන්දස්ස කිඤ්චි අදාසීති”.
“අදාසි ඛො මෙ මහාරාජ පඤ්චඋත්තරාසඞ්ගසතානී”ති.
“කිම්පන භවං ආනන්දො තාව බහුං චීවරං කරිස්සතී”ති.
යෙ පන තෙ මහාරාජ භික්ඛූ දුබ්බලචීවරා තෙහි සද්ධිං සංවිභජිස්සාමීති.
යානි ඛො පන භො ආනන්ද පොරාණකානි දුබ්බලචීවරානි තානි කථං කරිස්සථාති.
තානි මහාරාජ උත්තරත්ථරණං කරිස්සාමාති.
යානි ඛො පන භො ආනන්ද පොරාණකානි උත්තරත්ථරණානි තානි කථං කරිස්සථාති.
තානි මහාරාජ භිසිච්ඡවියො කරිස්සාමාති.
යානි පන{4} භො ආනන්ද පොරාණකානි භිසිච්ඡවියො තානි කථං කරිස්සථාති.
තානි මහාරාජ භුම්මත්ථරණං කරිස්සාමාති.
යානි පන භො ආනන්ද පොරාණකානි භුම්මත්ථරණානි තානි කථං කරිස්සථාති.
තානි මහාරාජ පාදපුඤ්ඡනියො කරිස්සාමාති.
යා පන භො ආනන්ද පොරාණකා පාදපුඤ්ඡනියො තා කථං කරිස්සථාති.
තා මහාරාජ රජොහරණං කරිස්සාමාති.
යානි පන භො ආනන්ද පොරාණකානි රජොහරණානි තානි කථං කරිස්සථාති.
තානි මහාරාජ කොට්ටෙත්වා චික්ඛල්ලෙන මද්දිත්වා පරිභණ්ඩං ලිම්පිස්සාමාති.
අථ ඛො රාජා උදෙනො සබ්බෙවිමෙ සමණා සක්යපුත්තියා යොනිසො උපනෙන්ති. න කුලවං{1} ගමෙන්තීති ආයස්මතො ආනන්දස්ස අඤ්ඤානිපි පඤ්ච දුස්සසතානි පාදාසි. අයං චරහි ආයස්මතො ආනන්දස්ස පඨමං චීවරභික්ඛා උප්පජ්ජි චීවරසහස්සං.
16. අථ ඛො ආයස්මා ආනන්දො යෙන ඝොසිතාරාමො තෙනුපසඞ්කමි. උපසඞ්කමිත්වා පඤ්ඤත්තෙ ආසනෙ නිසීදි. අථ ඛො ආයස්මා ඡන්නො යෙන ආයස්මා ආනන්දො තෙනුපසඞ්කමි. උපසඞ්කමිත්වා ආයස්මන්තං ආනන්දං අභිවාදෙත්වා එකමන්තං නිසීදි. එකමන්තං නිසින්නං ඛො ආයස්මන්තං ඡන්නං ආයස්මා ආනන්දො එතදවොච: සඞ්ඝෙන තෙ ආවුසො ඡන්න බ්රහ්මදණ්ඩො ආණත්තොති.{2} කතමො පන භන්තෙ ආනන්ද බ්රහ්මදණ්ඩොති.{3}
ත්වං ආවුසො ඡන්න භික්ඛූ{4} යං ඉච්ඡෙය්යාසි තං වදෙය්යාසි. භික්ඛූහි ත්වං නෙව වත්තබ්බො න ඔවදිතබ්බො නානුසාසිතබ්බොති. නන්වාහං භන්තෙ ආනන්ද හතො එත්තාවතා යතොහං භික්ඛූහි නෙව වත්තබ්බො න ඔවදිතබ්බො නානුසාසිතබ්බොති- තත්ථෙව මුච්ඡිතො පපති.{5}
17. අථ ඛො ආයස්මා ඡන්නො බ්රහ්මදණ්ඩෙන අට්ටීයමානො හරායමානො ජිගුච්ඡමානො එකො වූපකට්ඨො අප්පමත්තො ආතාපී පහිතත්තො විහරන්තො නචිරස්සෙව යස්සත්ථාය කුලපුත්තා සම්මදෙව අගාරස්මා අනගාරියං පබ්බජන්ති තදනුත්තරං බ්රහ්මචරියපරියොසානං දිට්ඨෙව ධම්මෙ සයං අභිඤ්ඤා සච්ඡිකත්වා උපසම්පජ්ජ විහාසි. ඛීණා ජාති, වුසිතං බ්රහ්මචරියං, කතං කරණීයං නාපරං ඉත්ථත්තායාති අබ්භඤ්ඤාසි. අඤ්ඤතරො ච පනායස්මා ඡන්නො අරහතං අහොසි.
අථ ඛො ආයස්මා ඡන්නො අරහත්තං පත්තො යෙනායස්මා ආනන්දො තෙනුපසඞ්කමි. උපසඞ්කමිත්වා ආයස්මන්තං ආනන්දං එතදවොච: පටිප්පස්සම්භෙහි දානි මෙ භන්තෙ ආනන්ද බ්රහ්මදණ්ඩන්ති. යදග්ගෙන තයා ආවුසො ඡන්න අරහත්තං සච්ඡිකතං තදග්ගෙන තෙ බ්රහ්මදණ්ඩො පටිප්පස්සද්ධොති.
ඉමාය ඛො පන විනයසඞ්ගීතියා පඤ්ච භික්ඛුසතානි අනූනානි අනධිකානි අහෙසුං. තස්මා අයං විනයසඞ්ගීති පඤ්චසතිකාති වුච්චතීති.
පඤ්චසතිකක්ඛන්ධකං එකාදසමං.{1}
ඉමම්හි ඛන්ධකෙ වත්ථු තෙවීසති
තස්සුද්දානං:
1. පරිනිබ්බුතම්හි සම්බුද්ධෙ ථෙරො කස්සපසව්හයො ආමන්තයී භික්ඛුගණං සද්ධම්මමනුපාලකො.
2. පාවායද්ධානමග්ගම්හි සුභද්දෙන පවෙදිතං සඞ්ගායිස්සාම සද්ධම්මං අධම්මො පුරෙ දිප්පති.
3. එකෙනූනපඤ්චසතං ආනන්දම්පි ච උච්චිනි ධම්මවිනයසඞ්ගීතිං වසන්තො ගුහමුත්තමෙ.
4. උපාලිං විනයං පුච්ඡි සුත්තන්තානන්දපණ්ඩිතං පිටකං තීණි සඞ්ගීතිං අකංසු ජිනසාවකා.
5. ඛුද්දානුඛුද්දකා නානා යථා පඤ්ඤත්ති වත්තනා න පුච්ඡි අක්කමිත්වා ච වන්දාපෙසි න යාචි ච පබ්බජ්ජං මාතුගාමස්ස සද්ධාය දුක්කටානිමෙ
6. පුරාණො බ්රහ්මදණ්ඩං ච ඔරොධො උදෙනෙන සහ තාව බහූ දුබ්බලං ච උත්තරත්ථරණා භිසි.
7. භුම්මත්ථරණා පුඤ්ඡනියො රජො චික්ඛල්ලමද්දනා සහස්සචීවරුප්පජ්ජි පඨමානන්දසව්හයා.
8. තජ්ජිතො බ්රහ්මදණ්ඩෙන චතුස්සච්චං අපාපුණි වසීභූතා පඤ්චසතා තස්මා පඤ්චසතී ඉති.
12.
සත්තසතිකක්ඛන්ධකං
පඨම භාණවාරං
1. තෙන ඛො පන සමයෙන වස්සසතපරිනිබ්බුතෙ භගවති වෙසාලිකාවජ්ජිපුත්තකා භික්ඛූ වෙසාලියං දසවත්ථුනි දීපෙන්ති: කප්පති සිඞ්ගිලොණකප්පො. කප්පති ද්වඞ්ගුලකප්පො. කප්පති ගාමන්තරකප්පො. කප්පති ආවාසකප්පො. කප්පති අනුමතිකප්පො. කප්පති ආචිණ්ණකප්පො. කප්පති අමථිතකප්පො. කප්පති ජලොගිපාතුං,{1} කප්පති අදසකං නිසීදනං. කප්පති ජාතරූපරජතන්ති.
2. තෙන ඛො පන සමයෙන ආයස්මා යසො කාකණ්ඩකපුත්තො වජ්ජීසු චාරිකං චරමානො යෙන වෙසාලී තදවසරි. තත්ර සුදං ආයස්මා යසො කාකණ්ඩකපුත්තො වෙසාලියං විහරති මහාවනෙ කූටාගාරසාලායං. තෙන ඛො පන සමයෙන වෙසාලිකා වජ්ජිපුත්තකා භික්ඛූ තදහුපොසථෙ කංසපාතිං උදකෙන පූරෙත්වා මජ්ඣෙ භික්ඛුසඞ්ඝස්ස ඨපෙත්වා ආගතාගතෙ වෙසාලිකෙ උපාසකෙ එවං වදෙන්ති:{2} දෙථාවුසො සඞ්ඝස්ස කහාපණම්පි අඩ්ඪම්පි පාදම්පි මාසකරූපම්පි. භවිස්සති සඞ්ඝස්ස පරික්ඛාරෙන කරණීයන්ති. එවං වුත්තෙ ආයස්මා යසො කාකණ්ඩකපුත්තො වෙසාලිකෙ උපාසකෙ එතදවොච: මාවුසො අදත්ථ සඞ්ඝස්ස කහාපණම්පි අඩ්ඪම්පි පාදම්පි මාසකරූපම්පි. න කප්පති සමණානං සක්යපුත්තියානං ජාතරූපරජතං. න සාදියන්ති සමණා සක්යපුත්තියා ජාතරූපරජතං. න පටිගණ්හන්ති සමණා සක්යපුත්තියා ජාතරූපරජතං. නික්ඛිත්තමණිසුවණ්ණා සමණා සක්යපුත්තියා, අපෙතජාතරූපරජතාති.
එවම්පි ඛො වෙසාලිකා උපාසකා ආයස්මතා යසෙන කාකණ්ඩකපුත්තෙන වුච්චමානා අදංසු යෙව සඞ්ඝස්ස කහාපණම්පි අඩ්ඪම්පි පාදම්පි මාසකරූපම්පි. අථ ඛො වෙසාලිකා වජ්ජිපුත්තකා භික්ඛූ තස්සා රත්තියා අච්චයෙන තං හිරඤ්ඤං භික්ඛග්ගෙන පටිවිංසං{3} ඨපෙත්වා භාජෙසුං.
3. අථ ඛො වෙසාලිකා වජ්ජිපුත්තකා භික්ඛූ ආයස්මන්තං යසං කාකණ්ඩකපුත්තං එතදවොචුං: එසො තෙ ආවුසො යස හිරඤ්ඤස්ස පටිවිංසොති. නත්ථි මෙ ආවුසො හිරඤ්ඤස්ස පටිවිංසො නාහං හිරඤ්ඤං සාදියාමීති.
අථ ඛො වෙසාලිකා වජ්ජිපුත්තකා භික්ඛූ අයං ආවුසො යසො කාකණ්ඩකපුත්තො උපාසකෙ සද්ධෙ පසන්නෙ අක්කොසති, පරිභාසති, අප්පසාදං කරොති. හන්දස්ස මයං පටිසාරණීයකම්මං කරොමාති, තෙ තස්ස පටිසාරණීයකම්මං අකංසු. අථ ඛො ආයස්මා යසො කාකණ්ඩකපුත්තො වෙසාලිකෙ වජ්ජිපුත්තකෙ භික්ඛූ එතදවොච: භගවතා ආවුසො පඤ්ඤත්තං පටිසාරණීයකම්මකතස්ස භික්ඛුනො අනුදූතො දාතබ්බොති. දෙථ මෙ ආවුසො අනුදූතං භික්ඛුන්ති. අථ ඛො වෙසාලිකා වජ්ජිපුත්තකා භික්ඛූ එකං භික්ඛුං සම්මන්නිත්වා ආයස්මතො යසස්ස කාකණ්ඩකපුත්තස්ස අනුදූතං අදංසු.
4. අථ ඛො ආයස්මා යසො කාකණ්ඩකපුත්තො අනුදූතෙන භික්ඛුනා සද්ධිං වෙසාලිං පවිසිත්වා වෙසාලිකෙ උපාසකෙ එතදවොච: අහං කිරායස්මන්තෙ උපාසකෙ සද්ධෙ පසන්නෙ අක්කොසාමි, පරිභාසාමි, අප්පසාදං කරොමි. සොහං අධම්මං අධම්මොති වදාමි. ධම්මං ධම්මොති වදාමි. අවිනයං අවිනයොති වදාමි. විනයං විනයොති වදාමි.
එකමිදං ආවුසො සමයං භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. තත්ර ඛො ආවුසො භගවා භික්ඛූ ආමන්තෙසි: චත්තාරො මෙ භික්ඛවෙ චන්දිමසුරියානං උපක්කිලෙසා යෙහි උපක්කිලෙසෙහි උපක්කිලිට්ඨා චන්දිමසූරියා න තපන්ති න භාසන්ති න විරොචන්ති. කතමෙ චත්තාරො? අබ්භං භික්ඛවෙ චන්දිමසුරියානං උපක්කිලෙසො යෙන උපක්කිලෙසෙන උපක්කිලිට්ඨා චන්දිමසූරියා න තපන්ති න භාසන්ති න විරොචන්ති. මහිකා භික්ඛවෙ චන්දිමසුරියානං උපක්කිලෙසො -පෙ- ධූමරජො භික්ඛවෙ චන්දිමසුරියානං උපක්කිලෙසො -පෙ- රාහු භික්ඛවෙ අසුරින්දො චන්දිමසුරියානං උපක්කිලෙසො යෙහි උපක්කිලෙසෙහි උපක්කිලිට්ඨා චන්දිමසූරියා න තපන්ති න භාසන්ති න විරොචන්ති.
එවමෙව ඛො භික්ඛවෙ චත්තාරොමෙ සමණබ්රාහ්මණානං උපක්කිලෙසායෙහි උපක්කිලෙසෙහි උපක්කිලිට්ඨා එකෙ සමණබ්රාහ්මණා න තපන්ති න භාසන්ති න විරොචන්ති. කතමෙ චත්තාරො? සන්ති භික්ඛවෙ එකෙ සමණබ්රාහ්මණා සුරං පිවන්ති. මෙරයං පිවන්ති. සුරාමෙරයපානා අප්පටිවිරතා. අයං භික්ඛවෙ පඨමො සමණබ්රාහ්මණානං උපක්කිලෙසො යෙන උපක්කිලෙසෙන උපක්කිලිට්ඨා එකෙ සමණබ්රාහ්මණා න තපන්ති. න භාසන්ති. න විරොචන්ති. පුන ච පරං භික්ඛවෙ එකෙ සමණබ්රාහ්මණා මෙථුනං ධම්මං පතිසෙවන්ති, මෙථුනධම්මා අප්පටිවිරතා. අයං භික්ඛවෙ දුතියො සමණබ්රාහ්මණානං උපක්කිලෙසො
-පෙ- පුන ච පරං භික්ඛවෙ එකෙ සමණබ්රාහ්මණා ජාතරූපරජතං සාදියන්ති ජාතරූපරජතපටිග්ගහණා අප්පටිවිරතා. අයං භික්ඛවෙ තතියො සමණබ්රාහ්මණානං උපක්කිලෙසො -පෙ- පුන ච පරං භික්ඛවෙ එකෙ සමණබ්රාහ්මණා මිච්ඡාජීවෙන ජීවිතං කප්පෙන්ති මිච්ඡාජීවා අප්පටිවිරතා. අයං භික්ඛවෙ චතුත්ථො සමණබ්රාහ්මණානං උපක්කිලෙසො -පෙ- ඉමෙ ඛො භික්ඛවෙ චත්තාරො සමණබ්රාහ්මණානං උපක්කිලෙසා යෙහි උපක්කිලෙසෙහි උපක්කිලිට්ඨා එකෙ සමණබ්රාහ්මණා න තපන්ති න භාසන්ති න විරොචන්තීති. ඉදමවොචාවුසො භගවා. ඉදං වත්වාන සුගතො අථාපරං එතදවොච සත්ථා:
රාගදොසපරික්ලිට්ඨා එකෙ සමණබ්රාහ්මණා අවිජ්ජා නිවුතා පොසා පියරූපාභිනන්දිනො,
සුරං පිවන්ති මෙරයං පටිසෙවන්ති මෙථුනං රජතං ජාතරූපඤ්ච සාදියන්ති අවිද්දසූ.
මිච්ඡාජීවෙන ජීවන්ති එකෙ සමණබ්රාහ්මණා එතෙ උපක්කිලෙසා වුත්තා බුද්ධෙනාදිච්චබන්ධුනා.
යෙහි උපක්කිලෙසෙහි උපක්කිලිට්ඨා එකෙ සමණබ්රාහ්මණා න තපන්ති න භාසන්ති න විරොචන්ති{1} අසුද්ධා සරජා මගා.
අන්ධකාරෙන ඔනද්ධා තණ්හාදාසා සනෙත්තිකා වඩ්ඪෙන්ති කටසිං ඝොරං ආදියන්ති පුනබ්භවන්ති.
එවංවාදී කිරාහං ආයස්මන්තෙ උපාසකෙ සද්ධෙ පසන්නෙ අක්කොසාමි, පරිභාසාමි, අප්පසාදං කරොමි. සොහං{2} අධම්මං අධම්මොති වදාමි. ධම්මං ධම්මොති වදාමි. අවිනයං අවිනයොති වදාමි. විනයං විනයොති වදාමි.
5. එකමිදං ආවුසො සමයං භගවා රාජගහෙ විහරති වෙළුවනෙ කලන්දකනිවාපෙ. තෙන ඛො පනාවුසො සමයෙන{3} රාජන්තෙපුරෙ රාජපරිසායං සන්නිසින්නානං සන්නිපතිතානං අයමන්තරා කථා උදපාදි: කප්පති සමණානං සක්යපුත්තියානං ජාතරූපරජතං. සාදියන්ති සමණා සක්යපුත්තියා ජාතරූපරජතං. පටිගණ්හන්ති සමණා සක්යපුත්තියා ජාතරූපරජතන්ති. තෙන ඛො පනාවුසො සමයෙන මණිචූළකො ගාමණී තස්සං පරිසායං නිසින්නො හොති.
අථ ඛො ආවුසො මණිචූළකො ගාමණී තං පරිසං එතදවොච: මා අය්යො{1} එවං අවචුත්ථ. න කප්පති සමණානං සක්යපුත්තියානං ජාතරූපරජතං. න සාදියන්ති සමණා සක්යපුත්තියා ජාතරූපරජතං. න පටිගණ්හන්ති සමණා සක්යපුත්තියා ජාතරූපරජතං. නික්ඛිත්තමණිසුවණ්ණා සමණා සක්යපුත්තියා අපෙතජාතරූපරජතාති. අසක්ඛි ඛො ආවුසො මණිචූළකො ගාමණී තං පරිසං සඤ්ඤාපෙතුං.
6. අථ ඛො ආවුසො මණිචූළකො ගාමණී තං පරිසං සඤ්ඤාපෙත්වා යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං නිසීදි. එකමන්තං නිසින්නො ඛො ආවුසො මණිචූළකො ගාමණී භගවන්තං එතදවොච: ඉධ භන්තෙ රාජන්තෙපුරෙ රාජපරිසායං සන්නිසින්නානං සන්නිපතිතානං අයමන්තරා{2} කථා උදපාදි: කප්පති සමණානං සක්යපුත්තියානං ජාතරූපරජතං. සාදියන්ති සමණා සක්යපුත්තියා ජාතරූපරජතං. පටිගණ්හන්ති{3} සමණා සක්යපුත්තියා ජාතරූපරජතන්ති. එවං වුත්තෙ අහං භන්තෙ තං පරිසං එතදවොචං: මා අය්යො එවං අවචුත්ථ. න කප්පති සමණානං සක්යපුත්තියානං ජාතරූපරජතං. න සාදියන්ති සමණා සක්යපුත්තියා ජාතරූපරජතං. න පටිගණ්හන්ති සමණා සක්යපුත්තියා ජාතරූපරජතං. නික්ඛිත්තමණිසුවණ්ණා සමණා සක්යපුත්තියා අපෙතජාතරූපරජතාති. අසක්ඛිං ඛො අහං භන්තෙ තං පරිසං සඤ්ඤාපෙතුං. කච්චාහං භන්තෙ එවං ව්යාකරමානො වුත්තවාදී චෙව භගවතො හොමි. න ච භගවන්තං අභූතෙන අබ්භාචික්ඛාමි. ධම්මස්ස චානුධම්මං ව්යාකරොමි. න ච කොචි සහධම්මිකො වාදානුවාදො ගාරය්හං ඨානං ආගච්ඡතීති?
තග්ඝ ත්වං ගාමණි එවං ව්යාකරමානො වුත්තවාදී චෙව මෙ අහොසි න ච මං අභූතෙන අබ්භාචික්ඛසි. ධම්මස්ස චානුධම්මං ව්යාකරොසි. න ච කොචි සහධම්මිකො වාදානුවාදො ගාරය්හං ඨානං ආගච්ඡති. න හි ගාමණි කප්පති සමණානං සක්යපුත්තියානං ජාතරූපරජතං. න සාදියන්ති සමණා සක්යපුත්තියා ජාතරූපරජතං. න පටිගණ්හන්ති සමණා සක්යපුත්තියා ජාතරූපරජතං. නික්ඛිත්තමණිසුවණ්ණා සමණා සක්යපුත්තියා අපෙතජාතරූපරජතාති. යස්ස ඛො ගාමණි ජාතරූපරජතං කප්පති, පඤ්චපි තස්ස කාමගුණා කප්පන්ති. යස්ස පඤ්ච කාමගුණා කප්පන්ති, එකංසෙනෙතං ගාමණි ධාරෙය්යාසි අස්සමණධම්මො අසක්යපුත්තියධම්මොති. අපිචාහං ගාමණි එවං වදාමි: තිණං තිණත්ථිකෙන පරියෙසිතබ්බං. දාරුං දාරුත්ථිකෙන පරියෙසිතබ්බං. සකටං සකටත්ථිකෙන පරියෙසිතබ්බං. පුරිසො පුරිසත්ථිකෙන පරියෙසිතබ්බො. නත්වෙවාහං ගාමණි කෙනචි පරියායෙන ජාතරූපරජතං සාදිතබ්බං පරියෙසිතබ්බන්ති වදාමීති. එවංවාදී කිරාහං ආයස්මන්තෙ උපාසකෙ සද්ධෙ පසන්නෙ අක්කොසාමි පරිභාසාමි අප්පසාදං කරොමි. සොහං අධම්මං අධම්මොති වදාමි. ධම්මං ධම්මොති වදාමි. අවිනයං අවිනයොති වදාමි. විනයං විනයොති වදාමි.
7. එකමිදං ආවුසො සමයං භගවා තත්ථෙව{1} රාජගහෙ ආයස්මන්තං උපනන්දං සක්යපුත්තං ආරබ්භ ජාතරූපරජතං පටික්ඛිපි සික්ඛාපදං ච පඤ්ඤාපෙසි. එවංවාදී කිරාහං ආයස්මන්තෙ උපාසකෙ සද්ධෙ පසන්නෙ අක්කොසාමි, පරිභාසාමි, අප්පසාදං කරොමි සොහං අධම්මං අධම්මොති වදාමි. ධම්මං ධම්මොති වදාමි. අවිනයං අවිනයොති වදාමි. විනයං විනයොති වදාමීති. එවං වුත්තෙ වෙසාලිකා උපාසකා ආයස්මන්තං යසං කාකණ්ඩකපුත්තං එතදවොචුං: එකොව භන්තෙ අය්යො යසො කාකණ්ඩකපුත්තො සමණො සක්යපුත්තියො. සබ්බෙවිමෙ අස්සමණා අසක්යපුත්තියා. වසතු භන්තෙ අය්යො යසො කාකණ්ඩකපුත්තො වෙසාලියං. මයං අය්යස්ස යසස්ස කාකණ්ඩකපුත්තස්ස උස්සුක්කං කරිස්සාම චීවරපිණ්ඩපාතසෙනාසනගිලානපච්චයභෙසජ්ජපරික්ඛාරානන්ති. අථ ඛො ආයස්මා යසො කාකණ්ඩකපුත්තො වෙසාලිකෙ උපාසකෙ සඤ්ඤාපෙත්වා අනුදූතෙන භික්ඛුනා සද්ධිං ආරාමං අගමාසි.
8. අථ ඛො වෙසාලිකා වජ්ජිපුත්තකා භික්ඛූ අනුදූතං භික්ඛුං පුච්ඡිංසු: ඛමාපිතා ආවුසො යසෙන කාකණ්ඩකපුත්තෙන වෙසාලිකා උපාසකාති? උපාසකෙහි පාපිකං නො ආවුසො කතා.{2} එකොව යසො කාකණ්ඩකපුත්තො සමණො සක්යපුත්තියො කතො. සබ්බෙව මයං අස්සමණා අසක්යපුත්තියා කතාති.
අථ ඛො වෙසාලිකා වජ්ජිපුත්තකා භික්ඛූ අයං ආවුසො යසො කාකණ්ඩකපුත්තො අම්හෙහි අසම්මතො ගිහීනං පකාසෙසි. හන්දස්ස මයං උක්ඛෙපනීයකම්මං කරොමාති. තෙ තස්ස උක්ඛෙපනීයකම්මං කත්තුකාමා සන්නිපතිංසු. අථ ඛො ආයස්මා යසො කාකණ්ඩකපුත්තො වෙහාසං අබ්භුග්ගන්ත්වා කොසම්බියං පච්චුට්ඨාසි. අථ ඛො ආයස්මා යසො කාකණ්ඩකපුත්තො පාවෙය්යකානඤ්ච අවන්තිදක්ඛිණාපථකානඤ්ච භික්ඛූනං සන්තිකෙ දූතං පාහෙසි: ආගච්ඡන්තු ආයස්මන්තා ඉමං අධිකරණං ආදියිස්සාම, පුරෙ අධම්මො දිප්පති ධම්මො පටිබාහීයති, අවිනයො දිප්පති විනයො පටිබාහීයති, පුරෙ අධම්මවාදිනො බලවන්තො හොන්ති ධම්මවාදිනො දුබ්බලා හොන්ති. අවිනයවාදිනො බලවන්තො හොන්ති විනයවාදිනො දුබ්බලා හොන්තීති. තෙන ඛො පන සමයෙන ආයස්මා සම්භූතො සාණවාසී අහොගඞ්ගෙ පබ්බතෙ පටිවසති. අථ ඛො ආයස්මා යසො කාකණ්ඩකපුත්තො යෙන අහොගඞ්ගො පබ්බතො යෙනායස්මා සම්භූතො සාණවාසී තෙනුපසඞ්කමි. උපසඞ්කමිත්වා ආයස්මන්තං සම්භූතං සාණවාසිං අභිවාදෙත්වා එකමන්තං නිසීදි. එකමන්තං නිසින්නො ඛො ආයස්මා යසො කාකණ්ඩකපුත්තො ආයස්මන්තං සම්භූතං සාණවාසිං එතදවොච:
ඉමෙ භන්තෙ වෙසාලිකා වජ්ජිපුත්තකා භික්ඛූ වෙසාලියං දසවත්ථූනි දීපෙන්ති-කප්පති සිඞ්ගිලොණකප්පො. කප්පති ද්වඞ්ගුලකප්පො. කප්පති ගාමන්තරකප්පො. කප්පති ආවාසකප්පො. කප්පති අනුමතිකප්පො. කප්පති ආචිණ්ණකප්පො. කප්පති අමථිතකප්පො. කප්පති ජලොගිපාතුං{1}. කප්පති අදසකං නිසීදනං. කප්පති ජාතරූපරජතන්ති. හන්ද මයං භන්තෙ ඉමං අධිකරණං ආදියිස්සාම. පුරෙ අධම්මො දිප්පති ධම්මො පටිබාහීයති. අවිනයො දිප්පති විනයො පටිබාහීයති. පුරෙ අධම්මවාදිනො බලවන්තො හොන්ති ධම්මවාදිනො දුබ්බලා හොන්ති අවිනයවාදිනො බලවන්තො හොන්ති විනයවාදිනො දුබ්බලා හොන්තීති. එවමාවුසොති ඛො ආයස්මා සම්භූතො සාණවාසී ආයස්මතො යසස්ස කාකණ්ඩකපුත්තස්ස පච්චස්සොසි.
9. අථ ඛො සට්ඨිමත්තා පාවෙය්යකා භික්ඛූ සබ්බෙ ආරඤ්ඤිකා, සබ්බෙ පිණ්ඩපාතිකා, සබ්බෙ පංසුකූලිකා, සබ්බෙ තෙචීවරිකා, සබ්බෙව අරහන්තො අහොගඞ්ගෙ පබ්බතෙ සන්නිපතිංසු. අට්ඨඅසීතිමත්තා අවන්ති දක්ඛිණාපථකා භික්ඛූ අප්පෙකච්චෙ ආරඤ්ඤිකා, අප්පෙකච්චෙ පිණ්ඩපාතිකා, අප්පෙකච්චෙ පංසුකූලිකා, අප්පෙකච්චෙ තෙචීවරිකා සබ්බෙව අරහන්තො අහොගඞ්ගෙ පබ්බතෙ සන්නිපතිංසු.
අථ ඛො ථෙරානං භික්ඛූනං මන්තයමානානං එතදහොසි: ඉදං ඛො අධිකරණං කක්ඛළඤ්ච වාලඤ්ච. කං නු ඛො මයං පක්ඛං ලභෙය්යාම යෙන මයං ඉමස්මිං අධිකරණෙ බලවන්තතරා අස්සාමාති. තෙන ඛො පන සමයෙන ආයස්මා රෙවතො සොරෙය්යෙ පටිවසති බහුස්සුතො ආගතාගමො ධම්මධරො විනයධරො මාතිකාධරො පණ්ඩිතො ව්යත්තො මෙධාවී ලජ්ජී කුක්කුච්චකො සික්ඛාකාමො. අථ ඛො ථෙරානං භික්ඛූනං එතදහොසි: “අයං ඛො ආයස්මා රෙවතො සොරෙය්යෙ පටිවසති බහුස්සුතො ආගතාගමො ධම්මධරො විනයධරො මාතිකාධරො පණ්ඩිතො ව්යත්තො මෙධාවී ලජ්ජී කුක්කුච්චකො සික්ඛාකාමො. සචෙ මයං ආයස්මන්තං රෙවතං පක්ඛං ලභිස්සාම එවං මයං ඉමස්මිං අධිකරණෙ බලවන්තතරා අස්සාමාති.
අස්සොසි ඛො ආයස්මා රෙවතො දිබ්බාය සොතධාතුයා විසුද්ධාය අතික්කන්තමානුසිකාය ථෙරානං භික්ඛූනං මන්තයමානානං සුත්වානස්ස එතදහොසි: ඉදං ඛො අධිකරණං කක්ඛළඤ්ච වාලඤ්ච. න ඛො මෙතං පතිරූපං සොහං එවරූපෙ අධිකරණෙ ඔසක්කෙය්යං. ඉදානි ච පන තෙ භික්ඛූ ආගච්ඡිස්සන්ති. සොහං තෙහි ආකිණ්ණො න ඵාසුං{2} ගමිස්සාමි. යන්නූනාහං පටිගච්චෙව ගච්ඡෙය්යන්ති. අථ ඛො ආයස්මා රෙවතො සොරෙය්යා සඞ්කස්සං අගමාසි.
10. අථ ඛො ථෙරා භික්ඛූ සොරෙය්යං ගන්ත්වා පුච්ඡිංසු කහං ආයස්මා රෙවතොති. තෙ එවමාහංසු: එසායස්මා රෙවතො සඞ්කස්සං ගතොති. අථ ඛො ආයස්මා රෙවතො සඞ්කස්සා කණ්ණකුජ්ජං අගමාසි. අථ ඛො ථෙරා භික්ඛූ සඞ්කස්සං ගන්ත්වා පුච්ඡිංසු කහං ආයස්මා රෙවතොති. තෙ එවමාහංසු: එසායස්මා රෙවතො කණ්ණකුජ්ජං ගතොති. අථ ඛො ආයස්මා රෙවතො කණ්ණකුජ්ජා උදුම්බරං අගමාසි. අථ ඛො ථෙරා භික්ඛූ කණ්ණකුජ්ජං ගන්ත්වා පුච්ඡිංසු කහං ආයස්මා රෙවතොති. තෙ එවමාහංසු: එසායස්මා රෙවතො උදුම්බරං ගතොති. අථ ඛො ආයස්මා රෙවතො උදුම්බරා අග්ගළපුරං අගමාසි. අථ ඛො ථෙරා භික්ඛූ උදුම්බරං ගන්ත්වා පුච්ඡිංසු කහං ආයස්මා රෙවතොති? තෙ එවමාහංසු: එසායස්මා රෙවතො අග්ගළපුරං ගතොති. අථ ඛො ආයස්මා රෙවතො අග්ගළපුරා සහජාතිං අගමාසි. අථ ඛො ථෙරා භික්ඛූ අග්ගළපුරං ගන්ත්වා පුච්ඡිංසු කහං ආයස්මා රෙවතොති. තෙ එවමාහංසු: එසායස්මා රෙවතො සහජාතිං ගතොති. අථ ඛො ථෙරා භික්ඛූ ආයස්මන්තං රෙවතං සහජාතියා සම්භාවෙසුං.
11. අථ ඛො ආයස්මා සම්භූතො සාණවාසී ආයස්මන්තං යසං කාකණ්ඩකපුත්තං එතදවොච: අයං ආවුසො ආයස්මා රෙවතො බහුස්සුතො ආගතාගමො ධම්මධරො විනයධරො මාතිකාධරො පණ්ඩිතො ව්යත්තො මෙධාවී ලජ්ජී කුක්කුච්චකො සික්ඛාකාමො සචෙ මයං ආයස්මන්තං රෙවතං පඤ්හං පුච්ඡිස්සාම පටිබලො ආයස්මා රෙවතො එකෙනෙව පඤ්හෙන සකලම්පි රත්තිං වීතිනාමෙතුං. ඉදානි ච පනායස්මා රෙවතො අන්තෙවාසිකං සරභාණකං භික්ඛුං අජ්ඣෙසිස්සති. සො ත්වං තස්ස භික්ඛුනො සරභඤ්ඤපරියොසානෙ ආයස්මන්තං රෙවතං උපසඞ්කමිත්වා ඉමානි දසවත්ථූනි පුච්ඡෙය්යාසීති.
එවම්භන්තෙති ඛො ආයස්මා යසො කාකණ්ඩකපුත්තො ආයස්මතො සම්භූතස්ස සාණවාසිස්ස පච්චස්සොසි. අථ ඛො ආයස්මා රෙවතො අන්තෙවාසිකං සරභාණකං භික්ඛුං අජ්ඣෙසි. අථ ඛො ආයස්මා යසො කාකණ්ඩකපුත්තො තස්ස භික්ඛුනො සරභඤ්ඤපරියොසානෙ යෙනායස්මා රෙවතො තෙනුපසඞ්කමි. උපසඞ්කමිත්වා ආයස්මන්තං රෙවතං අභිවාදෙත්වා එකමන්තං නිසීදි. එකමන්තං නිසින්නො ඛො ආයස්මා යසො කාකණ්ඩකපුත්තො ආයස්මන්තං රෙවතං එතදවොච:
12.1. කප්පති භන්තෙ සිඞ්ගිලොණකප්පොති. කො සො ආවුසො සිඞ්ගිලොණකප්පොති. කප්පති භන්තෙ සිඞ්ගිනා ලොණං පරිහරිතුං, යත්ථ අලොණකං භවිස්සති-තත්ථ පරිභුඤ්ජිස්සාමීති. නාවුසො කප්පතීති.
2. කප්පති භන්තෙ ද්වඞ්ගුලකප්පොති. කො සො ආවුසො ද්වඞ්ගුලකප්පොති. කප්පති භන්තෙ ද්වඞ්ගුලාය ඡායාය වීතිවත්තාය විකාලෙ භොජනං භුඤ්ජිතුන්ති. නාවුසො කප්පතීති.
3. කප්පති භන්තෙ ගාමන්තරකප්පොති. කො සො ආවුසො ගාමන්තරකප්පොති. කප්පති භන්තෙ ඉදානි ගාමන්තරං ගමිස්සාමීති භුත්තාවිනා පවාරිතෙන අනතිරිත්තං භොජනං භුඤ්ජිතුන්ති. නාවුසො කප්පතීති.
4. කප්පති භන්තෙ ආවාසකප්පොති. කො සො ආවුසො ආවාසකප්පොති. කප්පති භන්තෙ සම්බහුලා ආවාසා සමානසීමා නානුපොසථං කාතුන්ති. නාවුසො කප්පතීති.
5. කප්පති භන්තෙ අනුමතිකප්පොති. කො සො ආවුසො අනුමතිකප්පොති? කප්පති භන්තෙ වග්ගෙන සඞ්ඝෙන කම්මං කාතුං ආගතෙ භික්ඛූ අනුජානිස්සාමාතී.{1} නාවුසො කප්පතීති.
6. කප්පති භන්තෙ ආචිණ්ණකප්පොති? කො සො ආවුසො ආචිණ්ණකප්පොති. කප්පති භන්තෙ ඉදං මෙ උපජ්ඣායෙන අජ්ඣාචිණ්ණං ඉදං මෙ ආචරියෙන අජ්ඣාචිණ්ණන්ති තං අජ්ඣාචරිතුන්ති. ආචිණ්ණකප්පො ඛො ආවුසො එකච්චො කප්පති එකච්චො න කප්පතීති.
7. කප්පති භන්තෙ අමථිතකප්පොති. කො සො ආවුසො අමථිතකප්පොති. කප්පති භන්තෙ යං තං ඛීරං ඛීරභාවං විජහිතං අසම්පත්තං දධිභාවං තං භුත්තාවිනා පවාරිතෙන අනතිරිත්තං පාතුන්ති, නාවුසො කප්පතීති.
8. කප්පති භන්තෙ ජලොගිපාතුන්ති.{2} කො සො ආවුසො ජලොගීති{3}. කප්පති භන්තෙ යා සා සුරා අසුත්තා{4} අසම්පත්තා මජ්ජභාවං. තං පාතුන්ති. නාවුසො කප්පතීති.
9. කප්පති භන්තෙ අදසකං නිසීදනන්ති. නාවුසො කප්පතීති.
10. කප්පති භන්තෙ ජාතරූපරජතන්ති. නාවුසො කප්පතීති.
ඉමෙ භන්තෙ වෙසාලිකා වජ්ජිපුත්තකා භික්ඛූ වෙසාලියං ඉමානි දසවත්ථූනි දීපෙන්ති. හන්ද මයං භන්තෙ ඉමං අධිකරණං ආදියාම{5}. පුරෙ අධම්මො දිප්පති ධම්මො පටිබාහීයති. අවිනයො දිප්පති විනයො පටිබාහීයති. පුරෙ අධම්මවාදිනො බලවන්තො හොන්ති ධම්මවාදිනො දුබ්බලා හොන්ති. අවිනයවාදිනො බලවන්තො හොන්ති. විනයවාදිනො දුබ්බලා හොන්තීති. එවමාවුසොති ඛො ආයස්මා රෙවතො ආයස්මතො යසස්ස කාකණ්ඩකපුත්තස්ස පච්චස්සොසි.