63. තෙන ඛො පන සමයෙන භික්ඛුනියො භික්ඛූහි සද්ධිං එකතො පවාරෙන්තියො කොලාහලං අකංසු. භගවතො එතමත්ථං ආරොචෙසුං. “න භික්ඛවෙ භික්ඛුනියා භික්ඛූහි සද්ධිං එකතො පවාරෙතබ්බං. යා පවාරෙය්ය ආපත්ති දුක්කටස්සා”ති.
තෙන ඛො පන සමයෙන භික්ඛුනියො පුරෙභත්තං පවාරෙන්තියො කාලං වීතිනාමෙසුං. භගවතො එතමත්ථං ආරොචෙසුං. “අනුජානාමි භික්ඛවෙ පච්ඡාභත්තං පවාරෙතුන්ති”. පච්ඡාභත්තං පවාරෙන්තියො විකාලෙ අහෙසුං. භගවතො එතමත්ථං ආරොචෙසුං. “අනුජානාමි භික්ඛවෙ අජ්ජතනා භික්ඛුනීසඞ්ඝං පවාරෙත්වා අපරජ්ජු භික්ඛුසඞ්ඝං පවාරෙතුන්ති”.
64. තෙන ඛො පන සමයෙන සබ්බො භික්ඛුනීසඞ්ඝො පවාරෙන්තො කොලාහලං අකාසි. භගවතො එතමත්ථං ආරොචෙසුං. “අනුජානාමි භික්ඛවෙ එකං භික්ඛුනිං වියත්තං පටිබලං සම්මන්නිතුං භික්ඛුනීසඞ්ඝස්ස අත්ථාය භික්ඛුසඞ්ඝං පවාරෙතුං. එවඤ්ච පන භික්ඛවෙ සම්මන්නිතබ්බා: පඨමං භික්ඛුනී යාචිතබ්බා. යාචිත්වා ව්යත්තාය භික්ඛුනියා පටිබලාය සඞ්ඝො ඤාපෙතබ්බො: සුණාතු මෙ අය්යෙ සඞ්ඝො. යදි සඞ්ඝස්ස පත්තකල්ලං සඞ්ඝො ඉත්ථන්නාමං භික්ඛුනිං සම්මන්නෙය්ය භික්ඛුනිසඞ්ඝස්ස අත්ථාය භික්ඛුසඞ්ඝං පවාරෙතුං”. එසා ඤත්ති.
“සුණාතු මෙ අය්යෙ සඞ්ඝො, සඞ්ඝො ඉත්ථන්නාමං භික්ඛුනිං සම්මන්නති භික්ඛුනීසඞ්ඝස්ස අත්ථාය භික්ඛුසඞ්ඝං පවාරෙතුං. යස්සා අය්යාය ඛමති ඉත්ථන්නාමාය භික්ඛුනියා සම්මුති භික්ඛුනීසඞ්ඝස්ස අත්ථාය භික්ඛුසඞ්ඝං පවාරෙතුං. සා තුණ්හස්ස. යස්සා නක්ඛමති සා භාසෙය්ය. සම්මතා සඞ්ඝෙන ඉත්ථන්නාමා භික්ඛුනී භික්ඛුනිසඞ්ඝස්ස අත්ථාය භික්ඛුසඞ්ඝං පවාරෙතුං. ඛමති සඞ්ඝස්ස තස්මා තුණ්හී එවමෙතං ධාරයාමීති”.
තාය සම්මතාය භික්ඛුනියා භික්ඛුනීසඞ්ඝං ආදාය භික්ඛුසඞ්ඝං උපසඞ්කමිත්වා එකංසං උත්තරාසඞ්ගං කරිත්වා භික්ඛූනං පාදෙ වන්දිත්වා උක්කුටිකං නිසීදිත්වා අඤ්ජලිම්පග්ගහෙත්වා එවමස්ස වචනීයො භික්ඛුනීසඞ්ඝො අය්යා භික්ඛුසඞ්ඝං පවාරෙති දිට්ඨෙන වා සුතෙන වා පරිසඞ්කාය වා. වදතු අය්යා භික්ඛුසඞ්ඝො භික්ඛුනීසඞ්ඝං අනුකම්පං උපාදාය. පස්සන්තො පටිකරිස්සති. දුතියම්පි අය්යා භික්ඛුනීසඞ්ඝො භික්ඛුසඞ්ඝං පවාරෙති දිට්ඨෙන වා සුතෙන වා පරිසඞ්කාය වා. වදතු අය්යා භික්ඛුසඞ්ඝො භික්ඛුනීසඞ්ඝං අනුකම්පං උපාදාය පස්සන්තො පටිකරිස්සති. තතියම්පි අය්යා භික්ඛුනීසඞ්ඝො භික්ඛුසඞ්ඝං පවාරෙති දිට්ඨෙන වා සුතෙන වා පරිසඞ්කාය වා. වදතු අය්යා භික්ඛුසඞ්ඝො භික්ඛුනීසඞ්ඝං අනුකම්පං උපාදාය. පස්සන්තො පටිකරිස්සතීති.
65. තෙන ඛො පන සමයෙන භික්ඛුනියො භික්ඛූනං උපොසථං ඨපෙන්ති, පවාරණං ඨපෙන්ති, සවචනීයං කරොන්ති, අනුවාදං පට්ඨපෙන්ති, ඔකාසං කාරෙන්ති, චොදෙන්ති, සාරෙන්ති. භගවතො එතමත්ථං ආරොචෙසුං. “න භික්ඛවෙ භික්ඛුනියා භික්ඛුස්ස උපොසථො ඨපෙතබ්බො, ඨපිතොපි අට්ඨපිතො, ඨපෙන්තියා ආපත්ති දුක්කටස්ස. න පවාරණා ඨපෙතබ්බා, ඨපිතාපි අට්ඨපිතා, ඨපෙන්තියා ආපත්ති දුක්කටස්ස. න සවචනීයං කාතබ්බං, කතම්පි අකතං, කරොන්තියා ආපත්ති දුක්කටස්ස. න අනුවාදො පට්ඨපෙතබ්බො, පට්ඨපිතොපි අපට්ඨපිතො, පට්ඨපෙන්තියා ආපත්ති දුක්කටස්ස. න ඔකාසො කාරෙතබ්බො, කාරිතොපි අකාරිතො, කාරෙන්තියා ආපත්ති දුක්කටස්ස. න චොදෙතබ්බො, චොදිතොපි අචොදිතො, චොදෙන්තියා ආපත්ති දුක්කටස්ස. න සාරෙතබ්බො, සාරිතොපි අසාරිතො, සාරෙන්තියා ආපත්ති දුක්කටස්සාති”.
66. තෙන ඛො පන සමයෙන භික්ඛූ භික්ඛුනීනං උපොසථං ඨපෙන්ති, පවාරණං ඨපෙන්ති, සවචනීයං කරොන්ති, අනුවාදං පට්ඨපෙන්ති, ඔකාසං කාරෙන්ති, චොදෙන්ති, සාරෙන්ති. භගවතො එතමත්ථං ආරොචෙසුං. “අනුජානාමි භික්ඛවෙ භික්ඛුනා භික්ඛුනීනං{1} උපොසථං ඨපෙතුං, ඨපිතොපි සුට්ඨපිතො, ඨපෙන්තස්ස අනාපත්ති. පවාරණං ඨපෙතුං, ඨපිතාපි සුට්ඨපිතා, ඨපෙන්තස්ස අනාපත්ති. සවචනීයං කාතුං, කතම්පි සුකතං, කරොන්තස්ස අනාපත්ති. අනුවාදං පට්ඨපෙතුං, පට්ඨපිතොපි සුපට්ඨපිතො{2}. පට්ඨපෙන්තස්ස අනාපත්ති. ඔකාසං කාරෙතුං. කාරිතොපි සුකාරිතො, කාරෙන්තස්ස අනාපත්ති. චොදෙතුං, චොදිතාපි සුචොදිතා, චොදෙන්තස්ස අනාපත්ති. සාරෙතුං. සාරිතාපි සුසාරිතා, සාරෙන්තස්ස අනාපත්තී”ති.
67. තෙන ඛො පන සමයෙන ඡබ්බග්ගියා භික්ඛුනියො යානෙන යායන්ති ඉත්ථියුත්තෙනපි පුරිසන්තරෙන පුරිසයුත්තෙනපි ඉත්ථන්තරෙන. මනුස්සා උජ්ඣායන්ති ඛීයන්ති විපාචෙන්ති: “සෙය්යථාපි ගඞ්ගාමහීයාති.{3} භගවතො එතමත්ථං ආරොචෙසුං. “න භික්ඛවෙ භික්ඛුනියා යානෙන යායිතබ්බං. යා යායෙය්ය යථාධම්මො කාරෙතබ්බො”ති. තෙන ඛො පන සමයෙන අඤ්ඤතරා භික්ඛුනී ගිලානා හොති. න සක්කොති පදසා ගන්තුං. භගවතො එතමත්ථං ආරොචෙසුං. “අනුජානාමි භික්ඛවෙ ගිලානාය යානන්ති”. අථ ඛො භික්ඛුනීනං එතදහොසි: “ඉත්ථියුත්තන්නු ඛො පුරිසයුත්තන්නු ඛොති. භගවතො එතමත්ථං ආරොචෙසුං. “අනුජානාමි භික්ඛවෙ ඉත්ථියුත්තං පුරිසයුත්තං හත්ථවට්ටකන්ති”. තෙන ඛො පන සමයෙන අඤ්ඤතරාය{4} භික්ඛුනියා යානුග්ඝාතෙන බාළ්හතරං අඵාසු අහොසි. භගවතො එතමත්ථං ආරොචෙසුං. “අනුජානාමි භික්ඛවෙ සිවිකං පාටඞ්කින්ති”.
68. තෙන ඛො පන සමයෙන අඩ්ඪකාසී ගණිකා භික්ඛුනීසු පබ්බජිතා හොති. සා සාවත්ථිං ගන්තුකාමා හොති භගවතො සන්තිකෙ උපසම්පජ්ජිස්සාමීති. අස්සොසුං ඛො ධුත්තා ‘අඩ්ඪකාසී කිර ගණිකා සාවත්ථිං ගන්තුකාමා’ති. තෙ මග්ගෙ පරියුට්ඨිංසු. අස්සොසි ඛො අඩ්ඪකාසී ගණිකා ‘ධුත්තා කිර මග්ගෙ පරියුට්ඨිතා’ති. භගවතො සන්තිකෙ දූතං පාහෙසි. “අහං හි උපසම්පජ්ජිතුකාමා කථන්නු ඛො මයා පටිපජ්ජිතබ්බන්ති.
අථ ඛො භගවා එතස්මිං නිදානෙ එතස්මිං පකරණෙ ධම්මිං කථං කත්වා භික්ඛූ ආමන්තෙසි: “අනුජානාමි භික්ඛවෙ දූතෙනපි උපසම්පාදෙතුන්ති”. භික්ඛුදූතෙන උපසම්පාදෙන්ති. භගවතො එතමත්ථං ආරොචෙසුං. “න භික්ඛවෙ භික්ඛුදූතෙන උපසම්පාදෙතබ්බා. යො උපසම්පාදෙය්ය ආපත්ති දුක්කටස්සාති”. සික්ඛමානදූතෙන උපසම්පාදෙන්ති -පෙ- සාමණෙරදූතෙන උපසම්පාදෙන්ති -පෙ- සාමණෙරීදූතෙන උපසම්පාදෙන්ති -පෙ- බාලාය අව්යත්තාය දූතෙන උපසම්පාදෙන්ති. “න භික්ඛවෙ බාලාය අව්යත්තාය දූතෙන උපසම්පාදෙතබ්බා යා{1} උපසම්පාදෙය්ය ආපත්ති දුක්කටස්ස. අනුජානාමි භික්ඛවෙ ව්යත්තාය භික්ඛුනියා පටිබලාය දූතෙන උපසම්පාදෙතුං. තාය දූතාය භික්ඛුනියා සඞ්ඝං උපසඞ්කමිත්වා එකංසං උත්තරාසඞ්ගං කරිත්වා භික්ඛූනං පාදෙ වන්දිත්වා උක්කුටිකං නිසීදිත්වා අඤ්ජලිම්පග්ගහෙත්වා එවමස්ස වචනීයො:
ඉත්ථන්නාමා අය්යා ඉත්ථන්නාමාය අය්යාය උපසම්පදාපෙඛා{2} එකතො උපසම්පන්නා භික්ඛුනීසඞ්ඝෙ විසුද්ධා. සා කෙනචිදෙව අන්තරායෙන න ආගච්ඡති. ඉත්ථන්නාමා අය්යා සඞ්ඝං උපසම්පදං යාචති උල්ලුම්පතු තං අය්යා සඞ්ඝො අනුකම්පං උපාදාය.
ඉත්ථන්නාමා අය්යා ඉත්ථන්නාමාය අය්යාය උපසම්පදාපෙඛා එකතො උපසම්පන්නා භික්ඛුනීසඞ්ඝෙ විසුද්ධා. සා කෙනචිදෙව අන්තරායෙන න ආගච්ඡති. දුතියම්පි අය්යා ඉත්ථන්නාමා සඞ්ඝං උපසම්පදං යාචති. උල්ලුම්පතු තං අය්යා සඞ්ඝො අනුකම්පං උපාදාය.
ඉත්ථන්නාමා අය්යා ඉත්ථන්නාමාය අය්යාය උපසම්පදාපෙඛා එකතො උපසම්පන්නා භික්ඛුනීසඞ්ඝෙ විසුද්ධා. සා කෙනචිදෙව අන්තරායෙන න ආගච්ඡති. තතියම්පි අය්යා ඉත්ථන්නාමා සඞ්ඝං උපසම්පදං යාචති. උල්ලුම්පතු තං අය්යා, සඞ්ඝො අනුකම්පං උපාදායාති.
ව්යත්තෙන භික්ඛුනා පටිබලෙන සඞ්ඝො ඤාපෙතබ්බො: සුණාතු මෙ භන්තෙ සඞ්ඝො. ඉත්ථන්නාමා ඉත්ථන්නාමාය උපසම්පදාපෙඛා. එකතො උපසම්පන්නා භික්ඛුනීසඞ්ඝෙ විසුද්ධා. සා කෙනචිදෙව අන්තරායෙන න ආගච්ඡති. ඉත්ථන්නාමා සඞ්ඝං උපසම්පදං යාචති ඉත්ථන්නාමාය පවත්තිනියා. යදි සඞ්ඝස්ස පත්තකල්ලං සඞ්ඝො ඉත්ථන්නාමං උපසම්පාදෙය්ය ඉත්ථන්නාමාය පවත්තිනියා”. එසා ඤත්ති.
“සුණාතු මෙ භන්තෙ සඞ්ඝො. ඉත්ථන්නාමා ඉත්ථන්නාමාය උපසම්පදාපෙඛා එකතො උපසම්පන්නා භික්ඛුනීසඞ්ඝෙ විසුද්ධා. සා කෙනචිදෙව අන්තරායෙන නාගච්ඡති. ඉත්ථන්නාමා සඞ්ඝං උපසම්පදං යාචති ඉත්ථන්නාමාය පවත්තිනියා. සඞ්ඝො ඉත්ථන්නාමං උපසම්පාදෙති ඉත්ථන්නාමාය පවත්තිනියා. යස්සායස්මතො ඛමති ඉත්ථන්නාමාය උපසම්පදා ඉත්ථන්නාමාය පවත්තිනියා. සො තුණ්හස්ස. යස්ස නක්ඛමති සො භාසෙය්ය.
දුතියම්පි එතමත්ථං වදාමි -පෙ- තතියම්පි එතමත්ථං වදාමි: සුණාතු මෙ භන්තෙ සඞ්ඝො. ඉත්ථන්නාමා ඉත්ථන්නාමාය උපසම්පදාපෙඛා. එකතො උපසම්පන්නා භික්ඛුනීසඞ්ඝෙ විසුද්ධා. සා කෙනචිදෙව අන්තරායෙන නාගච්ඡති. ඉත්ථන්නාමා සඞ්ඝං උපසම්පදං යාචති ඉත්ථන්නාමාය පවත්තිනියා. සඞ්ඝො ඉත්ථන්නාමං උපසම්පාදෙති ඉත්ථන්නාමාය පවත්තිනියා. යස්සායස්මතො ඛමති ඉත්ථන්නාමාය උපසම්පදා ඉත්ථන්නාමාය පවත්තිනියා. සො තුණ්හස්ස. යස්ස නක්ඛමති සො භාසෙය්ය.
උපසම්පන්නා සඞ්ඝෙන ඉත්ථන්නාමා ඉත්ථන්නාමාය පවත්තිනියා. ඛමති සඞ්ඝස්ස. තස්මා තුණ්හී. එවමෙතං ධාරයාමී”ති.
තාවදෙව ඡායා මෙතබ්බා, උතුපමාණං ආචික්ඛිතබ්බං. දිවසභාගො ආචික්ඛිතබ්බො. සංගීති ආචික්ඛිතබ්බා. භික්ඛුනියො වත්තබ්බා තස්සා තයො ච නිස්සයෙ අට්ඨ ච අකරණීයානි ආචික්ඛෙය්යාථාති.
69. තෙන ඛො පන සමයෙන භික්ඛුනියො අරඤ්ඤෙ විහරන්ති. ධුත්තා දූසෙන්ති. භගවතො එතමත්ථං ආරොචෙසුං. “න භික්ඛවෙ භික්ඛුනියා අරඤ්ඤෙ වත්ථබ්බං, යා වසෙය්ය ආපත්ති දුක්කටස්සාති”. තෙන ඛො පන සමයෙන අඤ්ඤතරෙන උපාසකෙන භික්ඛුනීසඞ්ඝස්ස උද්දොසිතො දින්නො හොති. භගවතො එතමත්ථං ආරොචෙසුං. “අනුජානාමි භික්ඛවෙ උද්දොසිතන්ති”. උද්දොසිතො න සම්මති. භගවතො එතමත්ථං ආරොචෙසුං. “අනුජානාමි භික්ඛවෙ උපස්සයන්ති”. උපස්සයො න සම්මති. භගවතො එතමත්ථං ආරොචෙසුං. “අනුජානාමි භික්ඛවෙ නවකම්මන්ති”. නවකම්මං න සම්මති. භගවතො එතමත්ථං ආරොචෙසුං. “අනුජානාමි භික්ඛවෙ පුග්ගලිකම්පි කාතුන්ති”.
70. තෙන ඛො පන සමයෙන අඤ්ඤතරා ඉත්ථී සන්නිසින්නගබ්භා භික්ඛුනීසු පබ්බජිතා හොති. තස්සා පබ්බජිතාය ගබ්භො වුට්ඨාති. අථ ඛො තස්සා භික්ඛුනියා එතදහොසි: කථන්නු ඛො මයා ඉමස්මිං දාරකෙ පටිපජ්ජිතබ්බන්ති. භගවතො එතමත්ථං ආරොචෙසුං. “අනුජානාමි භික්ඛවෙ පොසෙතුං යාව සො දාරකො විඤ්ඤුතං පාපුණාතී”ති.
අථ ඛො තස්සා භික්ඛුනියා එතදහොසි: මයා ච න ලබ්භා එකිකාය වත්ථුං, අඤ්ඤාය ච භික්ඛුනියා න ලබ්භා දාරකෙන සහ වත්ථුං, කථන්නු ඛො මයා පටිපජ්ජිතබ්බන්ති. භගවතො එතමත්ථං ආරොචෙසුං. “අනුජානාමි භික්ඛවෙ එකං භික්ඛුනිං සම්මන්නිත්වා තස්සා භික්ඛුනියා දුතියං දාතුං. එවඤ්ච පන භික්ඛවෙ සම්මන්නිතබ්බා: පඨමං භික්ඛුනී යාචිතබ්බා. යාචිත්වා ව්යත්තාය භික්ඛුනියා පටිබලාය සඞ්ඝො ඤාපෙතබ්බො: සුණාතු මෙ අය්යෙ සඞ්ඝො. යදි සඞ්ඝස්ස පත්තකල්ලං සඞ්ඝො ඉත්ථන්නාමං භික්ඛුනිං සම්මන්නෙය්ය ඉත්ථන්නාමාය භික්ඛුනියා දුතියං. එසා ඤත්ති.
සුණාතු මෙ අය්යෙ සඞ්ඝො, සඞ්ඝො ඉත්ථන්නාමං භික්ඛුනිං සම්මන්නති ඉත්ථන්නාමාය භික්ඛුනියා දුතියං. යස්සා අය්යාය ඛමති ඉත්ථන්නාමාය භික්ඛුනියා සම්මුති ඉත්ථන්නාමාය භික්ඛුනියා දුතියාය. සා තුණ්හස්ස. යස්සා නක්ඛමති සා භාසෙය්ය. සම්මතා සඞ්ඝෙන ඉත්ථන්නාමා භික්ඛුනී ඉත්ථන්නාමාය භික්ඛුනියා දුතියා. ඛමති සඞ්ඝස්ස තස්මා තුණ්හී. එවමෙතං ධාරයාමී”ති.
අථ ඛො තස්සා දුතියිකාය භික්ඛුනියා එතදහොසි: කථන්නු ඛො මයා ඉමස්මිං දාරකෙ පටිපජ්ජිතබ්බන්ති. භගවතො එතමත්ථං ආරොචෙසුං. “අනුජානාමි භික්ඛවෙ ඨපෙත්වා සාගාරං යථා අඤ්ඤස්මිං පුරිසෙ පටිපජ්ජන්ති එවං තස්මිං දාරකෙ පටිපජ්ජිතුන්ති”.
තෙන ඛො පන සමයෙන අඤ්ඤතරා භික්ඛුනී ගරුධම්මං අජ්ඣාපන්නා හොති මානත්තචාරිනී. අථ ඛො තස්සා භික්ඛුනියා එතදහොසි: මයා ච න ලබ්භා එකිකාය වත්ථුං. අඤ්ඤාය ච භික්ඛුනියා න ලබ්භා සහ මයා වත්ථුං. කථන්නු ඛො මයා පටිපජ්ජිතබ්බන්ති. භගවතො එතමත්ථං ආරොචෙසුං. “අනුජානාමි භික්ඛවෙ එකං භික්ඛුනිං සම්මන්නිත්වා තස්සා භික්ඛුනියා දුතියං දාතුං. එවඤ්ච පන භික්ඛවෙ සම්මන්නිතබ්බා. පඨමං භික්ඛුනී යාචිතබ්බා. යාචිත්වා ව්යත්තාය භික්ඛුනියා පටිබලාය සඞ්ඝො ඤාපෙතබ්බො: සුණාතු මෙ අය්යෙ සඞ්ඝො යදි සඞ්ඝස්ස පත්තකල්ලං සඞ්ඝො ඉත්ථන්නාමං භික්ඛුනිං සම්මන්නෙය්ය ඉත්ථන්නාමාය භික්ඛුනියා දුතියං. එසා ඤත්ති.
“සුණාතු මෙ අය්යෙ සඞ්ඝො. සඞ්ඝො ඉත්ථන්නාමං භික්ඛුනිං සම්මන්නති ඉත්ථන්නාමාය භික්ඛුනියා දුතියං. යස්සා අය්යාය ඛමති ඉත්ථන්නාමාය භික්ඛුනියා සම්මුති ඉත්ථන්නාමාය භික්ඛුනියා දුතියං. සා තුණ්හස්ස, යස්සා නක්ඛමති සා භාසෙය්ය. සම්මතා සඞ්ඝෙන ඉත්ථන්නාමා භික්ඛුනී ඉත්ථන්නාමාය භික්ඛුනියා දුතියා. ඛමති සඞ්ඝස්ස. තස්මා තුණ්හී. එවමෙතං ධාරයාමීති”.
71. තෙන ඛො පන සමයෙන අඤ්ඤතරා භික්ඛුනී සික්ඛං පච්චක්ඛාය විබ්භමි. සා පුන පච්චාගන්ත්වා භික්ඛුනියො උපසම්පදං යාචි. භගවතො එතමත්ථං ආරොචෙසුං. “න{1} භික්ඛවෙ භික්ඛුනියා සික්ඛාපච්චක්ඛානං යදෙව සා විබ්භන්තා තදෙව සා අභික්ඛුනී”ති.
තෙන ඛො පන සමයෙන අඤ්ඤතරා භික්ඛුනී සකාසාවා{2} තිත්ථායතනං සඞ්කමි. සා පුන පච්චාගන්ත්වා භික්ඛුනියො උපසම්පදං යාචි. භගවතො එතමත්ථං ආරොචෙසුං. යා “සා භික්ඛවෙ භික්ඛුනී සකාවාසා තිත්ථායතනං සඞ්කන්තා සා පුන ආගතා න උපසම්පාදෙතබ්බා”ති.
72. තෙන ඛො පන සමයෙන භික්ඛුනියො පුරිසෙහි අභිවාදනං කෙසච්ඡෙදනං නඛච්ඡෙදනං වණපටිකම්මං කුක්කුච්චායන්තා න සාදියන්ති. භගවතො එතමත්ථං ආරොචෙසුං. “අනුජානාමි භික්ඛවෙ සාදිතුන්ති.
තෙන ඛො පන සමයෙන භික්ඛුනියො පල්ලඞ්කෙන නිසීදන්ති. පණ්හීසම්ඵස්සං සාදියන්ති. භගවතො එතමත්ථං ආරොචෙසුං. “න භික්ඛවෙ භික්ඛුනියා පල්ලඞ්කෙන නිසීදිතබ්බං. යා නිසීදෙය්ය ආපත්ති දුක්කටස්සාති”.
73. තෙන ඛො පන සමයෙන අඤ්ඤතරා භික්ඛුනී ගිලානා හොති. තස්සා විනා පල්ලඞ්කෙන න ඵාසු හොති. භගවතො එතමත්ථං ආරොචෙසුං. “අනුජානාමි භික්ඛවෙ භික්ඛුනියා අඩ්ඪපල්ලඞ්කන්ති”.
තෙන ඛො පන සමයෙන භික්ඛුනියො වච්චකුටියා වච්චං කරොන්ති. ඡබ්බග්ගියා භික්ඛුනියො තත්ථෙව ගබ්භං පාතෙන්ති. භගවතො එතමත්ථං ආරොචෙසුං. “න භික්ඛවෙ භික්ඛුනියා වච්චකුටියා වච්චො කාතබ්බො. යා කරෙය්ය ආපත්ති දුක්කටස්ස. අනුජානාමි භික්ඛවෙ හෙට්ඨා විවටෙ උපරි පටිච්ඡන්නෙ වච්චං කාතුන්ති”.
74. තෙන ඛො පන සමයෙන භික්ඛුනියො චුණ්ණෙන නහායන්ති. මනුස්සා උජ්ඣායන්ති ඛීයන්ති විපාචෙන්ති සෙය්යථාපි ගිහී කාමභොගිනියොති{1}. භගවතො එතමත්ථං ආරොචෙසුං. “න භික්ඛවෙ භික්ඛුනියා චුණ්ණෙන නහායිතබ්බං. යා නහායෙය්ය ආපත්ති දුක්කටස්ස. අනුජානාමි භික්ඛවෙ කුක්කුසං මත්තිකන්ති”.
තෙන ඛො පන සමයෙන භික්ඛුනියො වාසිතකාය මත්තිකාය නහායන්ති. මනුස්සා උජ්ඣායන්ති ඛීයන්ති විපාචෙන්ති. සෙය්යථාපි ගිහී කාමභොගිනියොති. භගවතො එතමත්ථං ආරොචෙසුං. “න භික්ඛවෙ භික්ඛුනියා වාසිතකාය මත්තිකාය නහායිතබ්බං. යා නහායෙය්ය ආපත්ති දුක්කටස්ස. අනුජානාමි භික්ඛවෙ පකතිමත්තිකන්ති”.
75. තෙන ඛො පන සමයෙන භික්ඛුනියො ජන්තාඝරෙ නහායන්තියො කොලාහලං අකංසු. භගවතො එතමත්ථං ආරොචෙසුං. “න භික්ඛවෙ භික්ඛුනියා ජන්තාඝරෙ නහායිතබ්බං. යා නහායෙය්ය ආපත්ති දුක්කටස්සාති”.
තෙන ඛො පන සමයෙන භික්ඛුනියො පටිසොතෙ නහායන්ති ධාරාසම්ඵස්සං සාදියන්තා. භගවතො එතමත්ථං ආරොචෙසුං. “න භික්ඛවෙ භික්ඛුනියා පටිසොතෙ නහායිතබ්බං. යා නහායෙය්ය ආපත්ති දුක්කටස්සාති”.
තෙන ඛො පන සමයෙන භික්ඛුනියො අතිත්ථෙ නහායන්ති. ධුත්තා දූසෙන්ති. භගවතො එතමත්ථං ආරොචෙසුං. “න භික්ඛවෙ භික්ඛුනියා අතිත්ථෙ නහායිතබ්බං. යා නහායෙය්ය ආපත්ති දුක්කටස්සාති”.
76. තෙන ඛො පන සමයෙන භික්ඛුනියො පුරිසතිත්ථෙ නහායන්ති. මනුස්සා උජ්ඣායන්ති ඛීයන්ති විපාචෙන්ති සෙය්යථාපි ගිහී කාමභොගිනියොති. භගවතො එතමත්ථං ආරොචෙසුං. “න භික්ඛවෙ භික්ඛුනියා පුරිසතිත්ථෙ නහායිතබ්බං. යා නහායෙය්ය ආපත්ති දුක්කටස්ස. අනුජානාමි භික්ඛවෙ මහිලාතිත්ථෙ නහායිතුන්ති”.
තතිය භාණවාරං.
භික්ඛුනීක්ඛන්ධකං දසමං.
ඉමම්හි ඛන්ධකෙ වත්ථූ එකසතං ඡ{2}
තස්සුද්දානං:
1. පබ්බජ්ජං ගොතමී යාචි නානුඤ්ඤාසි තථාගතො කපිලවත්ථු වෙසාලිං අගමාසි විනායකො.
2. රජොකිණ්ණෙන කොට්ඨකෙ ආනන්දස්ස පවෙදයි භබ්බොති නයතො යාචි මාතාති පොසිකාති ච.
3. වස්සසතං තදහු ච අභික්ඛුපච්චාසිංසනා පවාරණා ගරුධම්මා ද්වෙ වස්සා අනක්කොසනා.
4. ඔවටො ච අට්ඨ ධම්මා යාවජීවානුවත්තනා ගරුධම්මපටිග්ගාහො සාවස්සා උපසම්පදා.
5. වස්සසහස්සං පඤ්චෙව කුම්භථෙනක සෙතට්ඨි මඤ්ජෙට්ඨික උපමාහි එවං සද්ධම්මහිංසනා.
6. ආලිං බන්ධෙය්යුපමාහි{1} පුන සද්ධම්මසණ්ඨිති උපසම්පාදෙතුං අය්යා යථා වුඩ්ඪාභිවාදනා.
7. න කරිස්සන්ති කිමෙව සාධාරණාසාධාරණං ඔවාදං පාතිමොක්ඛඤ්ච කෙන නු ඛො උපස්සයං.
8. න ජානන්ති ච ආචික්ඛි න කරොන්ති ච භික්ඛූහි පටිග්ගහෙතුං භික්ඛූහි භික්ඛුනීහි පටිග්ගහො.
9. ආචික්ඛි කම්මං භික්ඛූහි උජ්ඣායන්ති භික්ඛුනීහි වා ආචික්ඛං භණ්ඩනඤ්ච රොපෙත්වා උපලාය ච.
10. සාවත්ථියා කද්දමොද අවන්දි කාය ඌරු ච අඞ්ගජාතඤ්ච ඔභාසං සම්පයොජෙන්ති වග්ගිකා
11. අවන්දියො දණ්ඩකම්මං භික්ඛුනියො තථා පුන ආවරණඤ්ච ඔවාදං කප්පති නු ඛො පක්කමි.
12. බාලා වත්ථු විනිච්ඡයො ඔවාදං සඞ්ඝො පඤ්චහි දුවෙ තිස්සො න ගණ්හන්ති බාලා ගිලාන ගමිකා.
13. ආරඤ්ඤිකා නාරොචෙන්ති න පච්චාගච්ඡන්ති ච. දීඝං විලීව චම්මඤ්ච දුස්සා ච වෙණි වට්ටි ච; චොළවෙණි ච වට්ටි ච සුත්තවෙණි ච වට්ටිකා.
14. අට්ඨිල්ලං ගොහනුකෙන හත්ථකොච්ඡං පාදං තථා ඌරුං මුඛං දන්තමංසං ආලිම්පො මද්ද චුණ්ණනා.
15. ලඤ්ඡෙන්ති අඞ්ගරාගඤ්ච මුඛරාගං තථා දුවෙ අවඞ්ගවිසෙසොලොකො සාලොකො සනච්චෙන ච
16. වෙසී පානාගාරං සූනං ආපණං වඩ්ඪි වාණිජා දාසං දාසිං කම්මකරං කම්මකාරිං උපට්ඨහං{2}.
17. තිරච්ඡාන හරීතකී සන්ධාරයන්ති නමතකං නීලං පීතං ලොහිතකං මඤ්ජෙට්ඨ කණ්හ චීවරා.
18. මහාරඞ්ග මහානාම අච්ඡින්නා දීඝමෙව ච පුප්ඵ ඵල කංචුකඤ්ච තිරීටකඤ්ච ධාරයුං.
19. භික්ඛුනී සික්ඛමානාය සාමණෙරාය අච්චයෙ නීයාදිතෙ පරික්ඛාරෙ භික්ඛුනි චෙව ඉස්සරා.
20. භික්ඛුස්ස සාමණෙරස්ස, උපාසකස්සුපාසිකා අඤ්ඤෙසඤ්ච පරික්ඛාරෙ නිය්යාතෙ භික්ඛු ඉස්සරා
21. මල්ලිගබ්භං පත්තමූලං බ්යඤ්ජනං ආමිසෙන ච උස්සන්නඤ්ච බාළ්හතරං සන්නිධිකත මාමිසං.
22. භික්ඛූනං යාදිසං හෙට්ඨං භික්ඛුනීනං තථා කරෙ සෙනාසනං උතුනියො මක්ඛීයති පටානි ච.
23. ඡිජ්ජන්ති සබ්බකාලඤ්ච අනිමිත්තාපි දිස්සරෙ නිමිත්තා ලොහිතා චෙව තථෙව ධුවලොහිතා.
24. ධුවචොළ පග්ඝරණී සිඛරිණිත්ථි පණ්ඩකා වෙපුරිසී ච සම්භින්නා උභතොබ්යඤ්ජනා පි ච.
25. අනිමිත්තාදිතො කත්වා යා ව උභතොබ්යඤ්ජනා එතං පෙය්යාලතො හෙට්ඨා කුට්ඨං ගණ්ඩො කිලාසි.
26. සොසාපමාරො මානුසි ඉත්ථීසි භුජිස්සාසි ච අණනා න රාජභටී අනුඤ්ඤාතා ච වීසති.
27. පරිපුණ්ණා ච කින්නාමා කා නාමා තෙ පවත්තිනී චතුවීසන්තරායානං පුච්ඡිත්වා උපසම්පදා.
28. විත්ථායන්ති අනනුසිට්ඨා සඞ්ඝමජ්ඣෙ තථෙව ච උපජ්ඣා ගාහ සඞ්ඝාටි උත්තරන්තරවාසකො.
29. සංකච්චුදකසාටි ච ආචික්ඛිත්වාන පෙසයෙ බාලා අසම්මතෙ කතො යා චෙ පුච්ඡන්තරායිකා.
30. එකතො උපසම්පන්නා භික්ඛුසඞ්ඝෙ තථා පුන ඡායා උතු දිවසඤ්ච සංගීති තයො නිස්සයෙ
31. අට්ඨ අකරණීයානි කාලං සබ්බත්ථ අට්ඨධා න පවාරෙන්ති භික්ඛුනියො භික්ඛුසඞ්ඝං තථෙව ච.
32. කොලාහලං පුරෙභත්තං විකාලෙ ච කොලාහලං උපොසථං පවාරණං සවචනීයානුවාදනං.
33. ඔකාසං චොදෙ සාරෙන්ති පටික්ඛිත්තං මහෙසිනා තථෙව භික්ඛු භික්ඛුනී අනුඤ්ඤාතං මහෙසිනා.
34. යානං ගිලානයුත්තඤ්ච යානුග්ඝාතඩ්ඪකාසිකා භික්ඛු සික්ඛා සාමණෙරා සාමණෙරී ච බාලකා.
35. අරඤ්ඤෙ උපාසකෙන උද්දොසිතො උපස්සයං න සම්මති නවකම්මං නිසින්නගබ්භා එකිකා.
36. සාගාරඤ්ච ගරුධම්මං පච්චක්ඛාය ච සඞ්කමි අභිවාදන කෙසා ච නඛා වණකම්මනා.
37. පල්ලඞ්කෙන ගිලානා ච වච්චං චුණ්ණෙන වාසිතං ජන්තාඝරෙ පටිසොතෙ අතිත්ථෙ පුරිසෙන ච.
38. මහාගොතමී ආයාචි ආනන්දො චාපි යොනිසො පරිසා චතස්සො හොන්ති පබ්බජ්ජා{1} ජිනසාසනෙ.
39. සංවෙගජනනත්ථාය සද්ධම්මස්ස ච වුද්ධියා ආතුරස්සෙව භෙසජ්ජං එවං බුද්ධෙන දෙසිතං.
40. එවං විනීතා සද්ධම්මෙ මාතුගාමාපි ඉත්තරා{2} තා යන්ති අච්චුතං ඨානං යත්ථ ගන්ත්වා න සොචරෙති.
11.
පඤ්චසතිකක්ඛන්ධකං
සංගීති නිදානං
1. අථ ඛො ආයස්මා මහාකස්සපො භික්ඛූ ආමන්තෙසි: එකමිදාහං ආවුසො සමයං පාවාය කුසිනාරං අද්ධානමග්ගප්පටිපන්නො මහතා භික්ඛුසඞ්ඝෙන සද්ධිං පඤ්චමත්තෙහි භික්ඛුසතෙහි. අථ ඛ්වාහං ආවුසො මග්ගා ඔක්කම්ම අඤ්ඤතරස්මිං රුක්ඛමූලෙ නිසීදිං. තෙන ඛො පන සමයෙන අඤ්ඤතරො ආජීවකො කුසිනාරාය{1} මන්දාරවපුප්ඵං ගහෙත්වා පාවං අද්ධානමග්ගප්පටිපන්නො හොති. අද්දසං ඛො අහං ආවුසො තං ආජීවකං දූරතොව ආගච්ඡන්තං. දිස්වාන තං ආජීවකං එතදවොචං: “අපාවුසො අම්හාකං සත්ථාරං ජානාසී”ති? ‘ආමාවුසො ජානාමි. අජ්ජ සත්තාහපරිනිබ්බුතො සමණො ගොතමො. තතො මෙ ඉදං මන්දාරවපුප්ඵං ගහිතන්ති”.
2. තත්රාවුසො යෙ තෙ භික්ඛූ අවීතරාගා, අප්පෙකච්චෙ බාහා පග්ගය්හ කන්දන්ති. ඡින්නපපාතං{2} පපතන්ති, ආවට්ටන්ති, විවට්ටන්ති, අතිඛිප්පං භගවා පරිනිබ්බුතො, අතිඛිප්පං සුගතො පරිනිබ්බුතො, අතිඛිප්පං චක්ඛුං{3} ලොකෙ අන්තරහිතන්ති. යෙ පන තෙ භික්ඛූ වීතරාගා තෙ සතා සම්පජානා අධිවාසෙන්ති “අනිච්චා සඞ්ඛාරා තං කුතෙත්ථ ලබ්භා”ති. අථඛ්වාහං ආවුසො තෙ භික්ඛූ එතදවොචං: “අලං ආවුසො මා සොචිත්ථ. මා පරිදෙවිත්ථ. නන්වෙතං ආවුසො භගවතා පටිගච්චෙව{4} අක්ඛාතං සබ්බෙහෙව පියෙහි මනාපෙහි නානාභාවො විනාභාවො අඤ්ඤථාභාවො? තං කුතෙත්ථ ආවුසො ලබ්භා යං තං ජාතං භූතං සඞ්ඛතං පලොකධම්මං තං වත මා පලුජ්ජීති නෙතං ඨානං විජ්ජතීති”.
3. තෙන ඛො පනාවුසො සමයෙන සුභද්දො නාම වුඩ්ඪපබ්බජිතො තස්සං පරිසායං නිසින්නො හොති. අථ ඛො ආවුසො සුභද්දො වුඩ්ඪපබ්බජිතො තෙ භික්ඛූ එතදවොච: “අලං ආවුසො. මා සොචිත්ථ. මා පරිදෙවිත්ථ. සුමුත්තා මයං තෙන මහාසමණෙන. උපද්දුතා ච මයං හොම ‘ඉදං වො කප්පති, ඉදං වො න කප්පතී’ති. ඉදානි පන මයං යං ඉච්ඡිස්සාම තං කරිස්සාම, යං න ඉච්ඡිස්සාම න තං කරිස්සාමාති”.
හන්ද මයං ආවුසො ධම්මඤ්ච විනයඤ්ච සඞ්ගායාම පුරෙ අධම්මො දිප්පති ධම්මො පටිබාහීයති. පුරෙ අවිනයො දිප්පති විනයො පටිබාහීයති. පුරෙ අධම්මවාදිනො බලවන්තො හොන්ති. ධම්මවාදිනො දුබ්බලා හොන්ති. පුරෙ අවිනයවාදිනො බලවන්තො හොන්ති. විනයවාදිනො දුබ්බලා හොන්තීති.
“තෙන හි භන්තෙ ථෙරො භික්ඛූ උච්චිනතූති. අථ ඛො ආයස්මා මහාකස්සපො එකෙනූනානි පඤ්ච අරහන්තසතානි{1} උච්චිනි. භික්ඛූ ආයස්මන්තං මහාකස්සපං එතදවොචුං: අයං භන්තෙ ආයස්මා ආනන්දො කිඤ්චාපි සෙක්ඛො අභබ්බො ඡන්දා දොසා මොහා භයා අගතිං ගන්තුං. බහු ච අනෙන භගවතො සන්තිකෙ ධම්මො ච විනයො ච පරියත්තො. තෙන හි භන්තෙ ථෙරො ආයස්මන්තම්පි ආනන්දං උච්චිනතූති.
4. අථ ඛො ආයස්මා මහාකස්සපො ආයස්මන්තම්පි ආනන්දං උච්චිනි. අථ ඛො ථෙරානං භික්ඛූනං එතදහොසි: කත්ථ නු ඛො මයං ධම්මඤ්ච විනයඤ්ච සඞ්ගායෙය්යාමාති. අථ ඛො ථෙරානං භික්ඛූනං එතදහොසි: රාජගහං ඛො මහාගොචරං පහූතසෙනාසනං. යන්නූන මයං රාජගහෙ වස්සං වසන්තා{2} ධම්මඤ්ච විනයඤ්ච සඞ්ගායෙය්යාම. න අඤ්ඤෙ භික්ඛූ රාජගහෙ වස්සං උපගච්ඡෙය්යුන්ති. අථ ඛො ආයස්මා මහාකස්සපො සඞ්ඝං ඤාපෙසි: සුණාතු මෙ ආවුසො සඞ්ඝො. යදි සඞ්ඝස්ස පත්තකල්ලං සඞ්ඝො ඉමානි පඤ්ච භික්ඛුසතානි සම්මන්නෙය්ය රාජගහෙ වස්සං වසන්තා ධම්මඤ්ච විනයඤ්ච සඞ්ගායිතුං. න අඤ්ඤෙහි භික්ඛූහි රාජගහෙ වස්සං වසිතබ්බන්ති. එසා ඤත්ති.
සුණාතු මෙ ආවුසො සඞ්ඝො. ඉමානි පඤ්චභික්ඛුසතානි සම්මන්නති රාජගහෙ වස්සං වසන්තානි ධම්මඤ්ච විනයඤ්ච සඞ්ගායිතුං. න අඤ්ඤෙහි භික්ඛූහි රාජගහෙ වස්සං වසිතබ්බන්ති. යස්සායස්මතො ඛමති ඉමෙසං පඤ්චන්නං භික්ඛුසතානං සම්මුති රාජගහෙ වස්සං වසන්තානං ධම්මඤ්ච විනයඤ්ච සඞ්ගායිතුං. න අඤ්ඤෙහි භික්ඛූහි රාජගහෙ වස්සං වසිතබ්බන්ති, සො තුණ්හස්ස. යස්ස නක්ඛමති සො භාසෙය්ය.
සම්මතානි සඞ්ඝෙන ඉමානි පඤ්චභික්ඛුසතානි රාජගහෙ වස්සං වසන්තා ධම්මඤ්ච විනයඤ්ච සඞ්ගායිතුං. න අඤ්ඤෙහි භික්ඛූහි රාජගහෙ වස්සං වසිතබ්බන්ති. ඛමති සඞ්ඝස්ස. තස්මා තුණ්හී. එවමෙතං ධාරයාමීති.
5. අථ ඛො ථෙරා භික්ඛූ රාජගහං අගමංසු ධම්මඤ්ච විනයඤ්ච සඞ්ගායිතුං. අථ ඛො ථෙරානං භික්ඛූනං එතදහොසි: භගවතා ඛො ආවුසො ඛණ්ඩඵුල්ලපටිසඞ්ඛරණං වණ්ණිතං. හන්ද මයං ආවුසො පඨමං මාසං ඛණ්ඩඵුල්ලං පටිසඞ්ඛරොම. මජ්ඣිමං මාසං සන්නිපතිත්වා ධම්මඤ්ච විනයඤ්ච සඞ්ගායිස්සාමාති. අථ ඛො ථෙරා භික්ඛූ පඨමං මාසං ඛණ්ඩඵුල්ලං පටිසඞ්ඛරිංසු. අථ ඛො ආයස්මා ආනන්දො ස්වෙ සන්නිපාතො, න ඛො මෙතං පතිරූපං යොහං සෙඛො{1} සමානො සන්නිපාතං ගච්ඡෙය්යන්ති බහුදෙවරත්තිං කායගතාය සතියා වීතිනාමෙත්වා රත්තියා පච්චූසසමයං නිපජ්ජිස්සාමීති කායං ආවජ්ජෙසි. අප්පත්තං ච සීසං බිම්බොහනං, භූමිතො ච පාදා මුත්තා, එතස්මිං අන්තරෙ අනුපාදාය ආසවෙහි චිත්තං විමුච්චි. අථ ඛො ආයස්මා ආනන්දො අරහා සමානො සන්නිපාතං අගමාසි.
6. අථ ඛො ආයස්මා මහාකස්සපො සඞ්ඝං ඤාපෙසි: සුණාතු මෙ ආවුසො සඞ්ඝො. යදි සඞ්ඝස්ස පත්තකල්ලං අහං උපාලිං විනයං පුච්ඡෙය්යන්ති. ආයස්මාපි උපාලි සඞ්ඝං ඤාපෙසි: සුණාතු මෙ භන්තෙ සඞ්ඝො. යදි සඞ්ඝස්ස පත්තකල්ලං අහං ආයස්මතා මහාකස්සපෙන විනයං පුට්ඨො විස්සජ්ජෙය්යන්ති. අථ ඛො ආයස්මා මහාකස්සපො ආයස්මන්තං උපාලිං එතදවොච: පඨමං ආවුසො උපාලි පාරාජිකං කත්ථ පඤ්ඤත්තන්ති. වෙසාලියං භන්තෙති. කං ආරබ්භාති. සුදින්නං කලන්දපුත්තං ආරබ්භාති. කිස්මිං වත්ථුස්මින්ති. මෙථුනධම්මෙති. අථ ඛො ආයස්මා මහාකස්සපො ආයස්මන්තං උපාලිං පඨමස්ස පාරාජිකස්ස වත්ථුම්පි පුච්ඡි, නිදානම්පි පුච්ඡි, පුග්ගලම්පි පුච්ඡි, පඤ්ඤත්තිම්පි පුච්ඡි, අනුපඤ්ඤත්තිම්පි පුච්ඡි, ආපත්තිම්පි පුච්ඡි, අනාපත්තිම්පි පුච්ඡි.
7. දුතියම්පනාවුසො උපාලි පාරාජිකං කත්ථ පඤ්ඤත්තන්ති. රාජගහෙ භන්තෙති. කං ආරබ්භාති. ධනියං කුම්භකාරපුත්තං ආරබ්භාති. කිස්මිං වත්ථුස්මින්ති. අදින්නාදානෙති. අථ ඛො ආයස්මා මහාකස්සපො ආයස්මන්තං උපාලිං දුතියස්ස පාරාජිකස්ස වත්ථුම්පි පුච්ඡි, නිදානම්පි පුච්ඡි, පුග්ගලම්පි පුච්ඡි, පඤ්ඤත්තිම්පි පුච්ඡි, අනුපඤ්ඤත්තිම්පි පුච්ඡි, ආපත්තිම්පි පුච්ඡි, අනාපත්තිම්පි පුච්ඡි.
තතියම්පනාවුසො උපාලි පාරාජිකං කත්ථ පඤ්ඤත්තන්ති. වෙසාලියං භන්තෙති. කං ආරබ්භාති. සම්බහුලෙ භික්ඛූ ආරබ්භාති. කිස්මිං වත්ථුස්මින්ති. මනුස්සවිග්ගහෙති. අථ ඛො ආයස්මා මහාකස්සපො ආයස්මන්තං උපාලිං තතියස්ස පාරාජිකස්ස වත්ථුම්පි පුච්ඡි, නිදානම්පි පුච්ඡි, පුග්ගලම්පි පුච්ඡි, පඤ්ඤත්තිම්පි පුච්ඡි, අනුපඤ්ඤත්තිම්පි පුච්ඡි, ආපත්තිම්පි පුච්ඡි, අනාපත්තිම්පි පුච්ඡි.
චතුත්ථම්පනාවුසො උපාලි පාරාජිකං කත්ථ පඤ්ඤත්තන්ති. වෙසාලියං භන්තෙති. කං ආරබ්භාති. වග්ගුමුදාතීරියෙ භික්ඛූ ආරබ්භාති. කිස්මිං වත්ථුස්මින්ති. උත්තරිමනුස්සධම්මෙති. අථ ඛො ආයස්මා මහාකස්සපො ආයස්මන්තං උපාලිං චතුත්ථස්ස පාරාජිකස්ස වත්ථුම්පි පුච්ඡි, නිදානම්පි පුච්ඡි, පුග්ගලම්පි පුච්ඡි, පඤ්ඤත්තිම්පි පුච්ඡි, අනුපඤ්ඤත්තිම්පි පුච්ඡි, ආපත්තිම්පි පුච්ඡි, අනාපත්තිම්පි පුච්ඡි. එතෙනෙව උපායෙන උභතො විභඞ්ගෙ{1} පුච්ඡි. පුට්ඨො පුට්ඨො ආයස්මා උපාලි විස්සජ්ජෙසි.
8. අථ ඛො ආයස්මා මහාකස්සපො සඞ්ඝං ඤාපෙසි: සුණාතු මෙ ආවුසො සඞ්ඝො. යදි සඞ්ඝස්ස පත්තකල්ලං අහං අයස්මන්තං ආනන්දං ධම්මං පුච්ඡෙය්යන්ති. අථ ඛො ආයස්මා ආනන්දො සඞ්ඝං ඤාපෙසි: සුණාතු මෙ භන්තෙ සඞ්ඝො. යදි සඞ්ඝස්ස පත්තකල්ලං අහං ආයස්මතා මහාකස්සපෙන ධම්මං පුට්ඨො{2} විස්සජ්ජෙය්යන්ති. අථ ඛො ආයස්මා මහාකස්සපො ආයස්මන්තං ආනන්දං එතදවොච: බ්රහ්මජාලං ආවුසො ආනන්ද කත්ථ භාසිතන්ති. අන්තරා ච භන්තෙ රාජගහං අන්තරා ච නාලන්දං රාජාගාරකෙ අම්බලට්ඨිකායන්ති. කං ආරබ්භාති. සුප්පියඤ්ච පරිබ්බාජකං බ්රහ්මදත්තඤ්ච මාණවන්ති. අථ ඛො ආයස්මා මහාකස්සපො ආයස්මන්තං ආනන්දං බ්රහ්මජාලස්ස නිදානම්පි පුච්ඡි, පුග්ගලම්පි පුච්ඡි.
සාමඤ්ඤඵලං පනාවුසො ආනන්ද කත්ථ භාසිතන්ති. රාජගහෙ භන්තෙ ජීවකම්බවනෙති. කෙන සද්ධින්ති. අජාතසත්තුනා වෙදෙහිපුත්තෙන සද්ධින්ති. අථ ඛො ආයස්මා මහාකස්සපො ආයස්මන්තං ආනන්දං සාමඤ්ඤඵලස්ස නිදානම්පි පුච්ඡි, පුග්ගලම්පි පුච්ඡි. එතෙනෙව උපායෙන පඤ්චපි නිකායෙ පුච්ඡි. පුට්ඨො පුට්ඨො ආයස්මා ආනන්දො විස්සජ්ජෙසි.
ඛුද්දානුඛුද්දකසික්ඛාපදකථා