“යෙ ච ඛො ත්වං ගොතමි ධම්මෙ ජානෙය්යාසි ඉමෙ ධම්මා විරාගාය සංවත්තන්ති නො සරාගාය. විසඤ්ඤොගාය සංවත්තන්ති නො සඤ්ඤොගාය, අපචයාය සංවත්තන්ති නො ආචයාය. අප්පිච්ඡතාය සංවත්තන්ති නො මහිච්ඡතාය. සන්තුට්ඨියා සංවත්තන්ති නො අසන්තුට්ඨියා. පවිවෙකාය සංවත්තන්ති නො සඞ්ගණිකාය. විරියාරම්භාය සංවත්තන්ති නො කොසජ්ජාය. සුභරතාය සංවත්තන්ති නො දුභරතාය. එකංසෙන ගොතමි, ධාරෙය්යාසි එසො ධම්මො එසො විනයො එතං සත්ථුසාසනන්ති.”
11. තෙන ඛො පන සමයෙන භික්ඛුනීනං පාතිමොක්ඛං න උද්දිසීයති. භගවතො එතමත්ථං ආරොචෙසුං.
“අනුජානාමි භික්ඛවෙ භික්ඛුනීනං පාතිමොක්ඛං උද්දිසිතුන්ති.”
අථ ඛො භික්ඛූනං එතදහොසි: “කෙන නු ඛො භික්ඛුනීනං පාතිමොක්ඛං උද්දිසිතබ්බන්ති. භගවතො එතමත්ථං ආරොචෙසුං.
“අනුජානාමි භික්ඛවෙ භික්ඛූහි භික්ඛුනීනං පාතිමොක්ඛං උද්දිසිතුන්ති.”
තෙන ඛො පන සමයෙන භික්ඛූ භික්ඛුනූපස්සයං උපසඞ්කමිත්වා භික්ඛුනීනං පාතිමොක්ඛං උද්දිසන්ති. මනුස්සා උජ්ඣායන්ති ඛීයන්ති විපාචෙන්ති: “ජායායො ඉමා ඉමෙසං ජාරියො ඉමා ඉමෙසං ඉදානි ඉමෙ ඉමාහි සද්ධිං අභිරමිස්සන්තී”ති.
අස්සොසුං ඛො භික්ඛූ තෙසං මනුස්සානං උජ්ඣායන්තානං ඛීයන්තානං විපාචෙන්තානං අථ ඛො තෙ භික්ඛූ භගවතො එතමත්ථං ආරොචෙසුං. “න භික්ඛවෙ භික්ඛූහි භික්ඛුනීනං පාතිමොක්ඛං උද්දිසිතබ්බං. යො උද්දිසෙය්ය ආපත්ති දුක්කටස්ස. අනුජානාමි භික්ඛවෙ, භික්ඛුනීහි භික්ඛුනීනං පාතිමොක්ඛං උද්දිසිතුන්ති.”
භික්ඛුනියො න ජානන්ති එවං පාතිමොක්ඛං උද්දිසිතබ්බන්ති. භගවතො එතමත්ථං ආරොචෙසුං. “අනුජානාමි භික්ඛවෙ, භික්ඛූහි භික්ඛුනීනං ආචික්ඛිතුං. එවං පාතිමොක්ඛං උද්දිසෙය්යාථා”ති.
12. තෙන ඛො පන සමයෙන භික්ඛුනියො ආපත්තිං න පටිකරොන්ති. භගවතො එතමත්ථං ආරොචෙසුං. “න භික්ඛවෙ භික්ඛුනියා ආපත්ති න පටිකාතබ්බා. යා න පටිකරෙය්ය, ආපත්ති දුක්කටස්සා”ති.
භික්ඛුනියො න ජානන්ති: “එවං ආපත්ති පටිකාතබ්බා’ති . භගවතො එතමත්ථං ආරොචෙසුං. “අනුජානාමි භික්ඛවෙ භික්ඛූහි භික්ඛුනීනං ආචික්ඛිතුං එවං ආපත්තිං පටිකරෙය්යාථා’ති.”
අථ ඛො භික්ඛූනං එතදහොසි: “කෙන නු ඛො භික්ඛුනීනං ආපත්ති පටිග්ගහෙතබ්බා’ති. භගවතො එතමත්ථං ආරොචෙසුං. “අනුජානාමි භික්ඛවෙ භික්ඛූහි භික්ඛුනීනං ආපත්තිං පටිග්ගහෙතු’න්ති.”
13. තෙන ඛො පන සමයෙන භික්ඛුනියො රථිකායපි{1} ව්යූහෙ’පි සිඞ්ඝාටකෙපි භික්ඛුං පස්සිත්වා පත්තං භූමියං නික්ඛිපිත්වා එකංසං උත්තරාසඞ්ගං කරිත්වා උක්කුටිකං නිසීදිත්වා අඤ්ජලිං පග්ගහෙත්වා ආපත්තිං පටිකරොන්ති. මනුස්සා උජ්ඣායන්ති ඛීයන්ති විපාචෙන්ති: ‘ජායායො ඉමා ඉමෙසං, ජාරියො ඉමා ඉමෙසං. රත්තිං විමානෙත්වා ඉදානි ඛමාපෙන්තී”ති. භගවතො එතමත්ථං ආරොචෙසුං. “න භික්ඛවෙ භික්ඛූහි භික්ඛුනීනං ආපත්ති පටිග්ගහෙතබ්බා. යො පටිගණ්හෙය්ය ආපත්ති දුක්කටස්ස. අනුජානාමි භික්ඛවෙ භික්ඛුනීහි භික්ඛුනීනං ආපත්තිං පටිග්ගහෙතුන්ති.”
භික්ඛුනියො න ජානන්ති: එවං ආපත්ති පටිග්ගහෙතබ්බා’ති. භගවතො එතමත්ථං ආරොචෙසුං. “අනුජානාමි භික්ඛවෙ භික්ඛූහි භික්ඛුනීනං ආචික්ඛිතුං එවං ආපත්තිං පටිගණ්හෙය්යාථා”ති.
14. තෙන ඛො පන සමයෙන භික්ඛුනීනං කම්මං න කරීයති. භගවතො එතමත්ථං ආරොචෙසුං. “අනුජානාමි භික්ඛවෙ භික්ඛුනීනං කම්මං කාතුන්ති.”
අථ ඛො භික්ඛූනං එතදහොසි. “කෙන නු ඛො භික්ඛුනීනං කම්මං කාතබ්බන්ති? භගවතො එතමත්ථං ආරොචෙසුං. “අනුජානාමි භික්ඛවෙ භික්ඛූහි භික්ඛුනීනං කම්මං කාතුන්ති.”
15. තෙන ඛො පන සමයෙන කතකම්මා භික්ඛුනියො රථිකායපි{1} ව්යූහෙපි සිංඝාටකෙපි භික්ඛුං පස්සිත්වා පත්තං භූමියං නික්ඛිපිත්වා එකංසං උත්තරාසඞ්ගං කරිත්වා උක්කුටිකං නිසීදිත්වා අඤ්ජලිං පග්ගහෙත්වා ඛමාපෙන්ති එවං නූන කාතබ්බන්ති මඤ්ඤමානා. මනුස්සා තථෙව උජ්ඣායන්ති ඛීයන්ති විපාචෙන්ති: ‘ජායායො ඉමා ඉමෙසං ජාරියො ඉමා ඉමෙසං. රත්තිං විමානෙත්වා ඉදානි ඛමාපෙන්තී”ති. භගවතො එතමත්ථං ආරොචෙසුං.
“න භික්ඛවෙ භික්ඛූහි භික්ඛුනීනං කම්මං කාතබ්බං. යො කරෙය්ය ආපත්ති දුක්කටස්ස. අනුජානාමි භික්ඛවෙ භික්ඛුනීහි භික්ඛුනීනං කම්මං කාතුන්ති.”
භික්ඛුනියො න ජානන්ති: ‘එවං කම්මං කාතබ්බන්ති’. භගවතො එතමත්ථං ආරොචෙසුං. “අනුජානාමි භික්ඛවෙ භික්ඛූහි භික්ඛුනීනං ආචික්ඛිතුං ‘එවං කම්මං කරෙය්යාථා’ති.
16. තෙන ඛො පන සමයෙන භික්ඛුනියො සඞ්ඝමජ්ඣෙ භණ්ඩනජාතා කලහජාතා විවාදාපන්නා අඤ්ඤමඤ්ඤං මුඛසත්තීහි විතුදන්තී{2} විහරන්ති. න සක්කොන්ති තං අධිකරණං වූපසමෙතුං. භගවතො එතමත්ථං ආරොචෙසුං. “අනුජානාමි භික්ඛවෙ භික්ඛූහි භික්ඛුනීනං අධිකරණං වූපසමෙතුන්ති.”
17. තෙන ඛො පන සමයෙන භික්ඛූ භික්ඛුනීනං අධිකරණං වූපසමෙන්ති. තස්මිං ඛො පන අධිකරණෙ විනිච්ඡියමානෙ දිස්සන්ති භික්ඛුනියො කම්මප්පත්තායො’පි ආපත්තිගාමිනියොපි. භික්ඛුනියො එවමාහංසු: “සාධු භන්තෙ අය්යාව භික්ඛුනීනං කම්මං කරොන්තු අය්යාව භික්ඛුනීනං ආපත්තිං පටිගණ්හන්තු. එවං හි භගවතා පඤ්ඤත්තං “භික්ඛූහි භික්ඛුනීනං අධිකරණං වූපසමෙතබ්බන්ති.” භගවතො එතමත්ථං ආරොචෙසුං.
“අනුජානාමි භික්ඛවෙ භික්ඛූහි භික්ඛුනීනං කම්මං ආරොපෙත්වා භික්ඛුනීනං නිය්යාදෙතුං, භික්ඛුනීහි භික්ඛුනීනං කම්මං කාතුං. භික්ඛූහි භික්ඛුනීනං ආපත්තිං ආරොපෙත්වා භික්ඛුනීනං නිය්යාදෙතුං, භික්ඛුනීහි භික්ඛුනීනං ආපත්තිං පටිග්ගහෙතුන්ති”.
18. තෙන ඛො පන සමයෙන උප්පලවණ්ණාය භික්ඛුනියා අන්තෙවාසිනී භික්ඛුනී සත්ත වස්සානි භගවන්තං අනුබද්ධා හොති විනයං පරියාපුණන්ති. තස්සා මුට්ඨස්සතිනියා ගහිතො ගහිතො මුස්සති. අස්සොසි ඛො සා භික්ඛුනී භගවා කිර සාවත්ථිං ගන්තුකාමො’ති. අථ තස්සා භික්ඛුනියා එතදහොසි: අහං ඛො සත්ත වස්සානි භගවන්තං අනුබන්ධිං විනයං පරියාපුණන්තී. තස්සා මෙ මුට්ඨස්සතිනියා ගහිතො ගහිතො මුස්සති. දුක්කරං ඛො පන මාතුගාමෙන යාවජීවං සත්ථාරං අනුබන්ධිතුං. කථං නු ඛො මයා පටිපජ්ජිතබ්බන්ති? අථ ඛො සා භික්ඛුනී භික්ඛුනීනං එතමත්ථං ආරොචෙසි. භික්ඛුනියො භික්ඛූනං එතමත්ථං ආරොචෙසුං. භික්ඛූ භගවතො එතමත්ථං ආරොචෙසුං. “අනුජානාමි භික්ඛවෙ භික්ඛූහි භික්ඛුනීනං විනයං වාචෙතුන්ති.”
පඨම භාණවාරං.
19. අථ ඛො භගවා වෙසාලියං යථාභිරන්තං විහරිත්වා යෙන සාවත්ථි තෙන චාරිකං පක්කාමි. අනුපුබ්බෙන චාරිකං චරමානො යෙන සාවත්ථි තදවසරි. තත්ර සුදං භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ.
20. තෙන ඛො පන සමයෙන ඡබ්බග්ගියා භික්ඛූ භික්ඛුනියො කද්දමොදකෙන ඔසිඤ්චන්ති ‘අප්පෙවනාම අම්හෙසු සාරජ්ජෙය්යුන්ති.’ භගවතො එතමත්ථං ආරොචෙසුං. “න භික්ඛවෙ භික්ඛුනා භික්ඛුනියො කද්දමොදකෙන ඔසිඤ්චිතබ්බා. යො ඔසිඤ්චෙය්ය ආපත්ති දුක්කටස්ස. අනුජානාමි. භික්ඛවෙ තස්ස භික්ඛුනො දණ්ඩකම්මං කාතුන්ති.”
අථ ඛො භික්ඛූනං එතදහොසි: ‘කින්නු ඛො දණ්ඩකම්මං කාතබ්බන්ති.’ භගවතො එතමත්ථං ආරොචෙසුං. “අවන්දියො සො භික්ඛවෙ භික්ඛු භික්ඛුනිසඞ්ඝෙන කාතබ්බො”ති.
21. තෙන ඛො පන සමයෙන ඡබ්බග්ගියා භික්ඛූ කායං විවරිත්වා භික්ඛුනීනං දස්සෙන්ති -පෙ- ඌරුං විවරිත්වා භික්ඛුනීනං දස්සෙන්ති, අඞ්ගජාතං විවරිත්වා භික්ඛුනීනං දස්සෙන්ති, භික්ඛුනියො ඔභාසෙන්ති, භික්ඛුනීහි සද්ධිං සම්පයොජෙන්ති ‘අප්පෙවනාම අම්හෙසු සාරජ්ජෙය්යුන්ති.’ භගවතො එතමත්ථං ආරොචෙසුං.
“න භික්ඛවෙ භික්ඛුනා කායො විවරිත්වා භික්ඛුනීනං දස්සෙතබ්බො. න ඌරු විවරිත්වා භික්ඛුනීනං දස්සෙතබ්බො. න අඞ්ගජාතං විවරිත්වා භික්ඛුනීනං දස්සෙතබ්බං. න භික්ඛුනියො ඔභාසෙතබ්බා. න භික්ඛුනීහි සද්ධිං සම්පයොජෙතබ්බං යො සම්පයොජෙය්ය ආපත්ති දුක්කටස්ස. අනුජානාමි භික්ඛවෙ තස්ස භික්ඛුනො දණ්ඩකම්මං කාතුන්ති.”
අථ ඛො භික්ඛූනං එතදහොසි කින්නු ඛො දණ්ඩකම්මං කාතබ්බන්ති. භගවතො එතමත්ථං ආරොචෙසුං. “අවන්දියො සො භික්ඛවෙ භික්ඛු භික්ඛුනිසඞ්ඝෙන කාතබ්බොති.”
22. තෙන ඛො පන සමයෙන ඡබ්බග්ගියා භික්ඛුනියො භික්ඛූ කද්දමොදකෙන ඔසිඤ්චන්ති ‘අප්පෙවනාම අම්හෙසු සාරජ්ජෙය්යුන්ති.’ භගවතො එතමත්ථං ආරොචෙසුං. න භික්ඛවෙ භික්ඛුනියා භික්ඛු කද්දමොදකෙන ඔසිඤ්චිතබ්බො. යා ඔසිඤ්චෙය්ය ආපත්ති දුක්කටස්ස. අනුජානාමි භික්ඛවෙ තස්සා භික්ඛුනියා දණ්ඩකම්මං කාතුන්ති.”
අථ ඛො භික්ඛූනං එතදහොසි “කින්නු ඛො දණ්ඩකම්මං කාතබ්බන්ති.” භගවතො එතමත්ථං ආරොචෙසුං. “අනුජානාමි භික්ඛවෙ ආවරණං කාතුන්ති.”
ආවරණෙ කතෙ න ආදියන්ති. භගවතො එතමත්ථං ආරොචෙසුං. “අනුජානාමි භික්ඛවෙ ඔවාදං ඨපෙතුන්ති.”
23. තෙන ඛො පන සමයෙන ඡබ්බග්ගියා භික්ඛුනියො කායං විවරිත්වා භික්ඛූනං දස්සෙන්ති. ථනං විවරිත්වා භික්ඛූනං දස්සෙන්ති. ඌරුං විවරිත්වා භික්ඛූනං දස්සෙන්ති. අඞ්ගජාතං විවරිත්වා භික්ඛූනං දස්සෙන්ති. භික්ඛූ ඔභාසෙන්ති. භික්ඛූහි සද්ධිං සම්පයොජෙන්ති. “අප්පෙවනාම අම්හෙසු සාරජ්ජෙය්යුන්ති. භගවතො එතමත්ථං ආරොචෙසුං. “න භික්ඛවෙ භික්ඛුනියා කායො විවරිත්වා භික්ඛූනං දස්සෙතබ්බො, න ථනං විවරිත්වා භික්ඛූනං දස්සෙතබ්බං, න ඌරු විවරිත්වා භික්ඛූනං දස්සෙතබ්බො, න අඞ්ගජාතං විවරිත්වා භික්ඛූනං දස්සෙතබ්බං, න භික්ඛූ ඔභාසිතබ්බා, න භික්ඛූහි සද්ධිං සම්පයොජෙතබ්බං. යා සම්පයොජෙය්ය ආපත්ති දුක්කටස්ස. අනුජානාමි භික්ඛවෙ තස්සා භික්ඛුනියා දණ්ඩකම්මං කාතුන්ති.
අථ ඛො භික්ඛූනං එතදහොසි ‘කින්නු ඛො දණ්ඩකම්මං කාතබ්බන්ති. භගවතො එතමත්ථං ආරොචෙසුං. අනුජානාමි භික්ඛවෙ ආවරණං කාතුන්ති. ආවරණෙ කතෙ න ආදියන්ති. භගවතො එතමත්ථං ආරොචෙසුං. “අනුජානාමි භික්ඛවෙ ඔවාදං ඨපෙතුන්ති.”
අථ ඛො භික්ඛූනං එතදහොසි ‘කප්පති නු ඛො ඔවාදඨපිතාය භික්ඛුනියා සද්ධිං උපොසථං කාතුං න නු ඛො කප්පතී”ති. භගවතො එතමත්ථං ආරොචෙසුං. “න භික්ඛවෙ ඔවාදට්ඨපිතාය භික්ඛුනියා සද්ධිං උපොසථො කාතබ්බො යාව න තං අධිකරණං වූපසන්තං හොතී”ති.
24. තෙන ඛො පන සමයෙන ආයස්මා උදායී ඔවාදං ඨපෙත්වා චාරිකං පක්කාමි. භික්ඛුනියො උජ්ඣායන්ති ඛීයන්ති විපාචෙන්ති: “කථං හි නාම අය්යො උදායී ඔවාදං ඨපෙත්වා චාරිකං පක්කමිස්සතී?ති. භගවතො එතමත්ථං ආරොචෙසුං. “න භික්ඛවෙ ඔවාදං ඨපෙත්වා චාරිකා පක්කමිතබ්බා යො පක්කමෙය්ය ආපත්ති දුක්කටස්සා”ති.
25. තෙන ඛො පන සමයෙන බාලා අව්යත්තා ඔවාදං ඨපෙන්ති. භගවතො එතමත්ථං ආරොචෙසුං. “න භික්ඛවෙ බාලෙන අව්යත්තෙන ඔවාදො ඨපෙතබ්බො. යො ඨපෙය්ය ආපත්ති දුක්කටස්සාති.
26. තෙන ඛො පන සමයෙන භික්ඛූ අවත්ථුස්මිං අකාරණෙ ඔවාදං ඨපෙන්ති. භගවතො එතමත්ථං ආරොචෙසුං. “න භික්ඛවෙ අවත්ථුස්මිං අකාරණෙ ඔවාදො ඨපෙතබ්බො. යො ඨපෙය්ය ආපත්ති දුක්කටස්සා”ති.
27. තෙන ඛො පන සමයෙන භික්ඛූ ඔවාදං ඨපෙත්වා විනිච්ඡයං න දෙන්ති. භගවතො එතමත්ථං ආරොචෙසුං. “න භික්ඛවෙ ඔවාදං ඨපෙත්වා විනිච්ඡයො න දාතබ්බො. යො න දදෙය්ය ආපත්ති දුක්කටස්සා”ති.
28. තෙන ඛො පන සමයෙන භික්ඛුනියො ඔවාදං න ගච්ඡන්ති. භගවතො එතමත්ථං ආරොචෙසුං: “න භික්ඛවෙ භික්ඛුනියා ඔවාදො න ගන්තබ්බො. යා න ගච්ඡෙය්ය යථාධම්මො කාරෙතබ්බො”ති.
29. තෙන ඛො පන සමයෙන සබ්බො භික්ඛුනීසඞ්ඝො ඔවාදං ගච්ඡති. මනුස්සා උජ්ඣායන්ති ඛීයන්ති විපාචෙන්ති: “ජායායො ඉමා ඉමෙසං, ජාරියො ඉමා ඉමෙසං, ඉදානි ඉමා ඉමෙහි සද්ධිං අභිරමිස්සන්තී”ති. භගවතො එතමත්ථං ආරොචෙසුං. “න භික්ඛවෙ සබ්බෙන භික්ඛුනිසඞ්ඝෙන ඔවාදො ගන්තබ්බො. ගච්ඡෙය්ය චෙ ආපත්ති දුක්කටස්ස. අනුජානාමි භික්ඛවෙ චතූහි පඤ්චහි භික්ඛුනීහි ඔවාදං ගන්තුන්ති.
30. තෙන ඛො පන සමයෙන චතස්සො පඤ්ච භික්ඛුනියො ඔවාදං ගච්ඡන්ති. මනුස්සා තථෙව උජ්ඣායන්ති ඛීයන්ති විපාචෙන්ති ‘ජායායො ඉමා ඉමෙසං, ජාරියො ඉමා ඉමෙසං, ඉදානි ඉමා ඉමෙහි සද්ධිං අභිරමිස්සන්තී’ති. භගවතො එතමත්ථං ආරොචෙසුං. “න භික්ඛවෙ චතූහි පඤ්චහි භික්ඛුනීහි ඔවාදො ගන්තබ්බො. ගච්ඡෙය්යුං චෙ ආපත්ති දුක්කටස්ස. අනුජානාමි භික්ඛවෙ ද්වෙ තිස්සො භික්ඛුනියො ඔවාදං ගන්තුං එකං භික්ඛුං උපසඞ්කමිත්වා එකංසං උත්තරාසඞ්ගං කරිත්වා පාදෙ වන්දිත්වා උක්කුටිකං නිසීදිත්වා අඤ්ජලිම්පග්ගහෙත්වා එවමස්ස වචනීයො භික්ඛුනීසඞ්ඝො අය්ය, භික්ඛුසඞ්ඝස්ස පාදෙ වන්දති ඔවාදූපසඞ්කමනඤ්ච යාචති. ලභතු කිර අය්ය, භික්ඛුනී සඞ්ඝො ඔවාදූපසඞ්කමනන්ති.
තෙන භික්ඛුනා පාතිමොක්ඛුද්දෙසකො භික්ඛු උපසඞ්කමිත්වා එවමස්ස වචනීයො: ‘භික්ඛුනී සඞ්ඝො භන්තෙ භික්ඛුසඞ්ඝස්ස පාදෙ වන්දති ඔවාදූපසඞ්කමනඤ්ච යාචති. ලභතු කිර භන්තෙ භික්ඛුනී සඞ්ඝො ඔවාදූපසඞ්කමනන්ති.’ පාතිමොක්ඛුද්දෙසකෙන වත්තබ්බො. “අත්ථි කොචි භික්ඛු භික්ඛුනොවාදකො සම්මතො”ති. සචෙ හොති කොචි භික්ඛු භික්ඛුනොවාදකො සම්මතො පාතිමොක්ඛුද්දෙසකෙන වත්තබ්බො: “ඉත්ථන්නාමො භික්ඛු භික්ඛුනොවාදකො සම්මතො. තං භික්ඛුනීසඞ්ඝො උපසඞ්කමතූ”ති. සචෙ න හොති කොචි භික්ඛු භික්ඛුනොවාදකො සම්මතො පාතිමොක්ඛුද්දෙසකෙන වත්තබ්බො: කො ආයස්මා උස්සහති භික්ඛුනියො ඔවදිතුන්ති?
සචෙ කොචි උස්සහති භික්ඛුනියො ඔවදිතුං, සො ච හොති අට්ඨහඞ්ගෙහි සමන්නාගතො සම්මන්නිත්වා වත්තබ්බො: “ඉත්ථන්නාමො භික්ඛු භික්ඛුනොවාදකො සම්මතො. තං භික්ඛුනීසඞ්ඝො උපසඞ්කමතූ’ති. සචෙ න කොචි උස්සහති භික්ඛුනියො ඔවදිතුං පාතිමොක්ඛුද්දෙසකෙන වත්තබ්බො: නත්ථි කොචි භික්ඛු භික්ඛුනොවාදකො සම්මතො. පාසාදිකෙන භික්ඛුනී සඞ්ඝො සම්පාදෙතූ”ති.
31. තෙන ඛො පන සමයෙන භික්ඛූ ඔවාදං න ගණ්හන්ති. භගවතො එතමත්ථං ආරොචෙසුං. ‘න භික්ඛවෙ ඔවාදො න ගහෙතබ්බො යො න ගණ්හෙය්ය ආපත්ති දුක්කටස්සා’ති.
තෙන ඛො පන සමයෙන අඤ්ඤතරො භික්ඛු බාලො හොති. තං භික්ඛුනියො උපසඞ්කමිත්වා එතදවොචුං: ඔවාදං අය්ය ගණ්හාහී’ති .
“අහං හි භගිනි බාලො. කථාහං ඔවාදං ගණ්හාමී”ති. ගණ්හාහය්ය ඔවාදං. එවං හි භගවතා පඤ්ඤත්තං භික්ඛූහි භික්ඛුනීනං ඔවාදො ගහෙතබ්බො’ති. භගවතො එතමත්ථං ආරොචෙසුං. “අනුජානාමි භික්ඛවෙ ඨපෙත්වා බාලං අවසෙසෙහි ඔවාදං ගහෙතුන්ති”.
32. තෙන ඛො පන සමයෙන අඤ්ඤතරො භික්ඛු ගිලානො හොති. තං භික්ඛුනියො උපසඞ්කමිත්වා එතදවොචුං “ඔවාදං අය්ය ගණ්හාහී”ති. “අහං හි භගිනි ගිලානො. කථාහං ඔවාදං ගණ්හාමී”ති. “ගණ්හාහය්ය ඔවාදං. එවං හි භගවතා පඤ්ඤත්තං: ඨපෙත්වා බාලං අවසෙසෙහි ඔවාදො ගහෙතබ්බො”ති.
භගවතො එතමත්ථං ආරොචෙසුං. “අනුජානාමි භික්ඛවෙ ඨපෙත්වා බාලං ඨපෙත්වා ගිලානං අවසෙසෙහි ඔවාදං ගහෙතුන්ති”.
33. තෙන ඛො පන සමයෙන අඤ්ඤතරො භික්ඛු ගමිකො හොති. තං භික්ඛුනියො උපසඞ්කමිත්වා එතදවොචුං: “ඔවාදං අය්ය ගණ්හාහී”ති. “අහං හි භගිනි, ගමිකො. කථාහං ඔවාදං ගණ්හාමී”ති “ගණ්හාහය්ය ඔවාදං. එවං හි භගවතා පඤ්ඤත්තං: ඨපෙත්වා බාලං ඨපෙත්වා ගිලානං අවසෙසෙහි ඔවාදො ගහෙතබ්බො”ති.
භගවතො එතමත්ථං ආරොචෙසුං. “අනුජානාමි භික්ඛවෙ ඨපෙත්වා බාලං ඨපෙත්වා ගිලානං ඨපෙත්වා ගමිකං අවසෙසෙහි ඔවාදං ගහෙතුන්ති”.
34. තෙන ඛො පන සමයෙන අඤ්ඤතරො භික්ඛු අරඤ්ඤෙ විහරති. තං භික්ඛුනියො උපසඞ්කමිත්වා එතදවොචුං “ඔවාදං අය්ය, ගණ්හාහී”ති. “අහං හි භගිනි, අරඤ්ඤෙ විහරාමි කථාහං ඔවාදං ගණ්හාමී”ති. “ගණ්හාහය්ය ඔවාදං එවං හි භගවතා පඤ්ඤත්තං: ඨපෙත්වා බාලං ඨපෙත්වා ගිලානං ඨපෙත්වා ගමිකං අවසෙසෙහි ඔවාදො ගහෙතබ්බො”ති.
භගවතො එතමත්ථං ආරොචෙසුං. “අනුජානාමි භික්ඛවෙ ආරඤ්ඤකෙන භික්ඛුනා ඔවාදං ගහෙතුං සංකෙතඤ්ච කාතුං අත්ර පටිහරිස්සාමී”ති.
35. තෙන ඛො පන සමයෙන භික්ඛූ ඔවාදං ගහෙත්වා න ආරොචෙන්ති. භගවතො එතමත්ථං ආරොචෙසුං. “න භික්ඛවෙ ඔවාදො න ආරොචෙතබ්බො. යො න ආරොචෙය්ය ආපත්ති දුක්කටස්සා”ති.
36. තෙන ඛො පන සමයෙන භික්ඛූ ඔවාදං ගහෙත්වා න පච්චාහරන්ති. භගවතො එතමත්ථං ආරොචෙසුං. “න භික්ඛවෙ ඔවාදො න පච්චාහරිතබ්බො. යො න පච්චාහරෙය්ය ආපත්ති දුක්කටස්සා”ති.
37. තෙන ඛො පන සමයෙන භික්ඛුනියො සංකෙතං න ගච්ඡන්ති. භගවතො එතමත්ථං ආරොචෙසුං. “න භික්ඛවෙ භික්ඛුනියා සංකෙතං න ගන්තබ්බං. යා න ගච්ඡෙය්ය ආපත්ති දුක්කටස්සා”ති.
38. තෙන ඛො පන සමයෙන භික්ඛුනියො දීඝානි කායබන්ධනානි ධාරෙන්ති. තෙහෙව ඵාසුකෙ නමෙන්ති. මනුස්සා උජ්ඣායන්ති ඛීයන්ති විපාචෙන්ති: සෙය්යථාපි ගිහී කාමභොගිනියො’ති. භගවතො එතමත්ථං ආරොචෙසුං. “න භික්ඛවෙ භික්ඛුනියා දීඝං කායබන්ධනං ධාරෙතබ්බං. යා ධාරෙය්ය, ආපත්ති දුක්කටස්ස. අනුජානාමි භික්ඛවෙ භික්ඛුනියා එකපරියාකතං කායබන්ධනං. න ච තෙන ඵාසුකෙ නාමෙතබ්බා. යා නාමෙය්ය ආපත්ති දුක්කටස්සා”ති.
39. තෙන ඛො පන සමයෙන භික්ඛුනියො විලීවෙන පට්ටෙන ඵාසුකෙ නමෙන්ති, චම්මපට්ටෙන ඵාසුකෙ නමෙන්ති, දුස්සට්ටෙන ඵාසුකෙ නමෙන්ති, දුස්සවෙණියා ඵාසුකෙ නමෙන්ති, දුස්සවට්ටියා ඵාසුකෙ නමෙන්ති, චොළපට්ටෙන ඵාසුකෙ නමෙන්ති, චොළවෙණියා ඵාසුකෙ නමෙන්ති, චොළවට්ටියා ඵාසුකෙ නමෙන්ති, සුත්තවෙණියා ඵාසුකෙ නමෙන්ති, සුත්තවට්ටියා ඵාසුකෙ නමෙන්ති. මනුස්සා උජ්ඣායන්ති ඛීයන්ති විපාචෙන්ති: ‘සෙය්යථාපි ගිහී කාමභොගිනියො’ති. භගවතො එතමත්ථං ආරොචෙසුං . “න භික්ඛවෙ භික්ඛුනියා විලීවෙන පට්ටෙන ඵාසුකා නාමෙතබ්බා, න චම්මපට්ටෙන ඵාසුකා නමෙතබ්බා, න දුස්සපට්ටෙන ඵාසුකා නමෙතබ්බා, න දුස්සවෙණියා ඵාසුකා නමෙතබ්බා, න දුස්සවට්ටියා ඵාසුකා නමෙතබ්බා, න චොළපට්ටෙන ඵාසුකා නමෙතබ්බා, න චොළවෙණියා ඵාසුකා නමෙතබ්බා, න චොළවට්ටියා ඵාසුකා නමෙතබ්බා, න සුත්තවෙණියා ඵාසුකා නමෙතබ්බා, න සුත්තවට්ටියා ඵාසුකා නාමෙතබ්බා. යා නාමෙය්ය ආපත්ති දුක්කටස්සාති.
40. තෙන ඛො පන සමයෙන භික්ඛුනියො අට්ඨිල්ලෙන ජඝනං ඝංසාපෙන්ති, ගොහනුකෙන ජඝනං කොට්ටාපෙන්ති, හත්ථං කොට්ටාපෙන්ති, හත්ථකොච්ඡං කොට්ටාපෙන්ති පාදං කොට්ටාපෙන්ති. පාදකොච්ඡං කොට්ටාපෙන්ති, ඌරුං කොට්ටාපෙන්ති. මුඛං කොට්ටාපෙන්ති, දන්තමංසං කොට්ටාපෙන්ති. මනුස්සා උජ්ඣායන්ති ඛීයන්ති විපාචෙන්ති: සෙය්යථාපි ගිහී කාමභොගිනියො’ති. භගවතො එතමත්ථං ආරොචෙසුං. “න භික්ඛවෙ භික්ඛුනියා අට්ඨිල්ලෙන ජඝනං ඝංසාපෙතබ්බං -පෙ- න දන්තමංසං කොට්ටාපෙතබ්බං. යා කොට්ටාපෙය්ය ආපත්ති දුක්කටස්සා”ති.
41. තෙන ඛො පන සමයෙන ඡබ්බග්ගියා භික්ඛුනියො මුඛං ආලිම්පන්ති,- මුඛං උම්මද්දෙන්ති, මුඛං චුණ්ණෙන්ති, මනොසිලිකාය මුඛං ලඤ්ඡෙන්ති, අඞ්ගරාගං කරොන්ති, මුඛරාගං කරොන්ති, අඞ්ගරාගමුඛරාගං කරොන්ති. මනුස්සා උජ්ඣායන්ති ඛීයන්ති විපාචෙන්ති: සෙය්යථාපි ගිහී කාමභොගිනියොති. භගවතො එතමත්ථං ආරොචෙසුං. “න භික්ඛවෙ භික්ඛුනියා මුඛං ආලිම්පිතබ්බං, න මුඛං උම්මද්දෙතබ්බං, න මුඛං චුණ්ණෙතබ්බං, න මනොසිලිකාය මුඛං ලඤ්ඡෙතබ්බං, න අඞ්ගරාගො කාතබ්බො, න මුඛරාගො කාතබ්බො, න අඞ්ගරාගමුඛරාගො කාතබ්බො, යා කරෙය්ය{1} ආපත්ති දුක්කටස්සා”ති.
42. තෙන ඛො පන සමයෙන ඡබ්බග්ගියා භික්ඛුනියො අවඞ්ගං කරොන්ති, විසෙසකං කරොන්ති, ඔලොකනකෙන ඔලොකෙන්ති, සාලොකෙ තිට්ඨන්ති, නච්චං{2} කාරාපෙන්ති, වෙසිං උට්ඨාපෙන්ති, පානාගාරං ඨපෙන්ති, සූනං ඨපෙන්ති, ආපණං පසාරෙන්ති. වඩ්ඪිං පයොජෙන්ති, වණිජ්ජං පයොජෙන්ති, දාසං උපට්ඨාපෙන්ති, දාසිං උපට්ඨාපෙන්ති, කම්මකාරං උපට්ඨාපෙන්ති, කම්මකාරිං උපට්ඨාපෙන්ති, තිරච්ඡානගතං උපට්ඨාපෙන්ති, හරීතකපක්කිකං පකිණන්ති, නමතකං ධාරෙන්ති. මනුස්සා උජ්ඣායන්ති ඛීයන්ති විපාචෙන්ති: සෙය්යථාපි ගිහී කාමභොගිනියොති. භගවතො එතමත්ථං ආරොචෙසුං. “න භික්ඛවෙ භික්ඛුනියා අවඞ්ගං කාතබ්බං. -පෙ- න නමතකං ධාරෙතබ්බං. යා ධාරෙය්ය ආපත්ති දුක්කටස්සා”ති.
43. තෙන ඛො පන සමයෙන ඡබ්බග්ගියා භික්ඛුනියො සබ්බනීලකානි චීවරානි ධාරෙන්ති, සබ්බපීතකානි චීවරානි ධාරෙන්ති, සබ්බලොහිතකානි චීවරානි ධාරෙන්ති, සබ්බමඤ්ජෙට්ඨිකානි චීවරානි ධාරෙන්ති, සබ්බකණ්හානි චීවරානි ධාරෙන්ති, සබ්බමහාරඞ්ගරත්තානි චීවරානි ධාරෙන්ති, සබ්බමහානාමරත්තානි චීවරානි ධාරෙන්ති, අච්ඡින්නදසානි චීවරානි ධාරෙන්ති, දීඝදසානි චීවරානි ධාරෙන්ති, පුප්ඵදසානි චීවරානි ධාරෙන්ති, ඵණදසානි චීවරානි ධාරෙන්ති, කඤ්චුකං ධාරෙන්ති, තිරීටකං ධාරෙන්ති. මනුස්සා උජ්ඣායන්ති ඛීයන්ති විපාචෙන්ති: ‘සෙය්යථාපි ගිහී කාමභොගිනියො’ති. භගවතො එතමත්ථං ආරොචෙසුං. “න භික්ඛවෙ, භික්ඛුනියා සබ්බනීලකානි චීවරානි ධාරෙතබ්බානි -පෙ- න තිරීටකං ධාරෙතබ්බං. යා ධාරෙය්ය, ආපත්ති දුක්කටස්සා”ති.
44. තෙන ඛො පන සමයෙන අඤ්ඤතරා භික්ඛුනී කාලං කරොන්තී එවමාහ: ‘මමච්චයෙන මය්හං පරික්ඛාරො සඞ්ඝස්ස හොතූ”ති. තත්ථ භික්ඛූ ච භික්ඛුනියො ච විවදන්ති ‘අම්හාකං හොති, අම්හාකං හොතී’ති. භගවතො එතමත්ථං ආරොචෙසුං. “භික්ඛුනී චෙ භික්ඛවෙ කාලං කරොන්ති එවං වදෙය්ය ‘මමච්චයෙන මය්හං පරික්ඛාරො සඞ්ඝස්ස හොතූ’ති, අනිස්සරො තත්ථ භික්ඛුසඞ්ඝො, භික්ඛුනිසඞ්ඝස්සෙවෙතං. සික්ඛමානා චෙ භික්ඛවෙ -පෙ- සාමණෙරී චෙ භික්ඛවෙ කාලං කරොන්තී එවං වදෙය්ය: ‘මමච්චයෙන මය්හං පරික්ඛාරො සඞ්ඝස්ස හොතූ’ති, අනිස්සරො තත්ථ භික්ඛු සඞ්ඝො භික්ඛුනිසඞ්ඝස්සෙවෙතං. භික්ඛු චෙ භික්ඛවෙ කාලං කරොන්තො එවං වදෙය්ය: ‘මමච්චයෙන මය්හං පරික්ඛාරො සඞ්ඝස්ස හොතූ’ති, අනිස්සරො තත්ථ භික්ඛුනීසඞ්ඝො, භික්ඛුසඞ්ඝස්සෙවෙතං. සාමණෙරො චෙ භික්ඛවෙ -පෙ- උපාසකො චෙ භික්ඛවෙ -පෙ- උපාසිකා චෙ භික්ඛවෙ -පෙ- අඤ්ඤො චෙ භික්ඛවෙ කොචි කාලං කරොන්තො එවං වදෙය්ය: ‘මමච්චයෙන මය්හං පරික්ඛාරො සඞ්ඝස්ස හොතූ’ති. අනිස්සරො තත්ථ භික්ඛුනීසඞ්ඝො භික්ඛුසඞ්ඝස්සෙවෙතන්ති”.
45. තෙන ඛො පන සමයෙන අඤ්ඤතරා ඉත්ථී පුරාණමල්ලී භික්ඛුනීසු පබ්බජිතා හොති. සා රථිකාය දුබ්බලකං භික්ඛුං පස්සිත්වා අංසකූටෙන පහාරං දත්වා පවට්ටෙසි.{1} භික්ඛූ උජ්ඣායන්ති ඛීයන්ති විපාචෙන්ති: ‘කථං හි නාම භික්ඛුනී භික්ඛුස්ස පහාරං දස්සතී’ති. භගවතො එතමත්ථං ආරොචෙසුං. “න භික්ඛවෙ භික්ඛුනියා භික්ඛුස්ස පහාරො දාතබ්බො. යා දදෙය්ය ආපත්ති දුක්කටස්ස. අනුජානාමි භික්ඛවෙ භික්ඛුනියා භික්ඛුං පස්සිත්වා දූරතොව ඔක්කමිත්වා මග්ගං දාතුන්ති.”
46. තෙන ඛො පන සමයෙන අඤ්ඤතරා ඉත්ථී පවුත්ථපතිකා ජාරෙන ගබ්භිනී හොති. සා ගබ්භං පාතෙත්වා කුලූපිකං භික්ඛුනිං එතදවොච: ‘හන්දය්යෙ ඉමං ගබ්භං පත්තෙන නීහරා’ති. අථ ඛො සා භික්ඛුනී තං ගබ්භං පත්තෙ පක්ඛිපිත්වා සඞ්ඝාටියා පටිච්ඡාදෙත්වා අගමාසි. තෙන ඛො පන සමයෙන අඤ්ඤතරෙන පිණ්ඩචාරිකෙන භික්ඛුනා සමාදානං කතං හොති ‘යමහං පඨමං භික්ඛං ලභිස්සාමි න තං අදත්වා භික්ඛුස්ස වා භික්ඛුනියා වා පරිභුඤ්ජිස්සාමී’ති.
අථ ඛො සො භික්ඛු තං භික්ඛුනිං පස්සිත්වා එතදවොච: ‘හන්ද භගිනි භික්ඛං පතිගණ්හා’ති{1}. ‘අලං අය්යා’ති. දුතියම්පි ඛො සො භික්ඛු තං භික්ඛුනිං එතදවොච: ‘හන්ද භගිනි භික්ඛං පතිගණ්හා’ති. ‘අලං අය්යා’ති. තතියම්පි ඛො සො භික්ඛු තං භික්ඛුනිං එතදවොච: ‘හන්ද භගිනි භික්ඛං පතිගණ්හා’ති ‘අලං අය්යා’ති. ‘මයා ඛො භගිනි සමාදානං කතං ‘යමහං පඨමං භික්ඛං ලභිස්සාමි න තං අදත්වා භික්ඛුස්ස වා භික්ඛුනියා වා පරිභුඤ්ජිස්සාමීති. හන්ද භගිනි භික්ඛං පතිගණ්හා’ති.
අථ ඛො සා භික්ඛුනී තෙන භික්ඛුනා නිප්පීළියමානා නීහරිත්වා පත්තං දස්සෙසි: ‘පස්ස අය්ය - පත්තෙ ගබ්භං. මා ච කස්සචි ආරොචෙසී’ති. අථ ඛො සො භික්ඛු උජ්ඣායති ඛීයති, විපාචෙති: ‘කථං හි නාම භික්ඛුනී පත්තෙන ගබ්භං නීහරිස්සතී’ති. අථ ඛො සො භික්ඛු භික්ඛූනං එතමත්ථං ආරොචෙසි. යෙ තෙ භික්ඛූ අප්පිච්ඡා සන්තුට්ඨා ලජ්ජිනො කුක්කුච්චකා සික්ඛාකාමා තෙ උජ්ඣායන්ති ඛීයන්ති, විපාචෙන්ති: ‘කථං හි නාම භික්ඛුනී පත්තෙන ගබ්භං නීහරිස්සතී’ති. භගවතො එතමත්ථං ආරොචෙසුං. “න භික්ඛවෙ භික්ඛුනියා පත්තෙන ගබ්භො නීහරිතබ්බො. යා නීහරෙය්ය ආපත්ති දුක්කටස්ස. අනුජානාමි භික්ඛවෙ භික්ඛුනියා භික්ඛුං පස්සිත්වා නීහරිත්වා පත්තං දස්සෙතුන්ති.”
47. තෙන ඛො පන සමයෙන ඡබ්බග්ගියා භික්ඛුනියො භික්ඛුං පස්සිත්වා පරිවත්තෙත්වා පත්තමූලං දස්සෙන්ති. භික්ඛූ උජ්ඣායන්ති, ඛීයන්ති, විපාචෙන්ති: ‘කථං හි නාම ඡබ්බග්ගියා භික්ඛුනියො භික්ඛුං පස්සිත්වා පරිවත්තෙත්වා පත්තමූලං දස්සෙස්සන්තී’ති. අථ ඛො භික්ඛූ භගවතො එතමත්ථං ආරොචෙසුං. “න භික්ඛවෙ භික්ඛුනියා භික්ඛුං පස්සිත්වා පරිවත්තෙත්වා පත්තමූලං දස්සෙතබ්බං. යා දස්සෙය්ය ආපත්ති දුක්කටස්ස. අනුජානාමි භික්ඛවෙ භික්ඛුනියා භික්ඛුං පස්සිත්වා උක්කුජ්ජිත්වා පත්තං දස්සෙතුං. යඤ්ච පත්තෙ ආමිසං හොති තෙන ච භික්ඛු නිමන්තෙතබ්බොති”.
48. තෙන ඛො පන සමයෙන සාවත්ථියං රථිකාය පුරිසව්යඤ්ජනං ඡඩ්ඩිතං හොති. තං භික්ඛුනියො සක්කච්චං උපනිජ්ඣායිංසු. මනුස්සා උක්කුට්ඨිං අකංසු. තා භික්ඛුනියො මංකූ අහෙසුං. අථ ඛො තා භික්ඛුනියො උපස්සයං ගන්ත්වා භික්ඛුනීනං එතමත්ථං ආරොචෙසුං. යා තා භික්ඛුනියො අප්පිච්ඡා සන්තුට්ඨා ලජ්ජිනො කුක්කුච්චකා සික්ඛාකාමා තා උජ්ඣායන්ති, ඛීයන්ති, විපාචෙන්ති: ‘කථං හි නාම භික්ඛුනියො පුරිසව්යඤ්ජනං උපනිජ්ඣායිස්සන්තීති: අථ ඛො තා භික්ඛුනියො භික්ඛූනං එතමත්ථං ආරොචෙසුං. භික්ඛූ භගවතො එතමත්ථං ආරොචෙසුං. “න භික්ඛවෙ භික්ඛුනියා පුරිසව්යඤ්ජනං උපනිජ්ඣායිතබ්බං. යා උපනිජ්ඣායෙය්ය, ආපත්ති දුක්කටස්සා”ති.
49. තෙන ඛො පන සමයෙන මනුස්සා භික්ඛූනං ආමිසං දෙන්ති. භික්ඛූ භික්ඛුනීනං දෙන්ති. මනුස්සා උජ්ඣායන්ති, ඛීයන්ති, විපාචෙන්ති: ‘කථං හි නාම භදන්තා අත්තනො පරිභොගත්ථාය දින්නං අඤ්ඤෙසං දස්සන්ති. මයම්පි න ජානාම දානං දාතුන්ති’. භගවතො එතමත්ථං ආරොචෙසුං. “න භික්ඛවෙ අත්තනො පරිභොගත්ථාය දින්නං අඤ්ඤෙසං දාතබ්බං. යො දදෙය්ය ආපත්ති දුක්කටස්සාති”.
50. තෙන ඛො පන සමයෙන භික්ඛූනං ආමිසං උස්සන්නං හොති. භගවතො එතමත්ථං ආරොචෙසුං. “අනුජානාමි භික්ඛවෙ සඞ්ඝස්ස දාතුන්ති.” බාළ්හතරං උස්සන්නං හොති. භගවතො එතමත්ථං ආරොචෙසුං. “අනුජානාමි භික්ඛවෙ පුග්ගලිකම්පි දාතුන්ති.” තෙන ඛො පන සමයෙන භික්ඛූනං සන්නිධිකතං ආමිසං උස්සන්නං හොති. භගවතො එතමත්ථං ආරොචෙසුං. “අනුජානාමි භික්ඛවෙ භික්ඛූනං සන්නිධිං භික්ඛුනීහි භික්ඛූහි{1} පටිග්ගහාපෙත්වා පරිභුඤ්ජිතුන්ති.”
51. තෙන ඛො පන සමයෙන මනුස්සා භික්ඛුනීනං ආමිසං දෙන්ති. භික්ඛුනියො භික්ඛූනං දෙන්ති. මනුස්සා උජ්ඣායන්ති, ඛීයන්ති, විපාචෙන්ති: ‘කථං හි නාම භික්ඛුනියො අත්තනො පරිභොගත්ථාය දින්නං අඤ්ඤෙසං දස්සන්ති. මයම්පි න ජානාම දානං දාතුන්ති’. භගවතො එතමත්ථං ආරොචෙසුං. “න භික්ඛවෙ භික්ඛුනියා අත්තනො පරිභොගත්ථාය දින්නං අඤ්ඤෙසං දාතබ්බං. යා දදෙය්ය ආපත්ති දුක්කටස්සා”ති.
52. තෙන ඛො පන සමයෙන භික්ඛුනීනං ආමිසං උස්සන්නං හොති. භගවතො එතමත්ථං ආරොචෙසුං. “අනුජානාමි භික්ඛවෙ සඞ්ඝස්ස දාතුන්ති”. බාළ්හතරං උස්සන්නං හොති. භගවතො එතමත්ථං ආරොචෙසුං. “අනුජානාමි භික්ඛවෙ පුග්ගලිකම්පි දාතුන්ති”. තෙන ඛො පන සමයෙන භික්ඛුනීනං සන්නිධිකතං ආමිසං උස්සන්නං හොති. භගවතො එතමත්ථං ආරොචෙසුං. “අනුජානාමි භික්ඛවෙ භික්ඛුනීනං සන්නිධිං භික්ඛූහි භික්ඛුනීහි{1} පටිග්ගහාපෙත්වා{2} පරිභුඤ්ජිතුන්ති”.
53. තෙන ඛො පන සමයෙන භික්ඛූනං සෙනාසනං උස්සන්නං හොති. භික්ඛුනීනං න හොති. භික්ඛුනියො භික්ඛූනං සන්තිකෙ දූතං පාහෙසුං: ‘සාධු භන්තෙ අය්යා අම්හාකං සෙනාසනං දෙන්තු තාවකාලිකන්ති’. භගවතො එතමත්ථං ආරොචෙසුං. “අනුජානාමි භික්ඛවෙ භික්ඛුනීනං සෙනාසනං දාතුං තාවකාලිකන්ති”.
54. තෙන ඛො පන සමයෙන උතුනියො භික්ඛුනියො ඔනද්ධමඤ්චං ඔනද්ධපීඨං අභිනිසීදන්තිපි අභිනිපජ්ජන්තිපි. සෙනාසනං ලොහිතෙන මක්ඛීයති. භගවතො එතමත්ථං ආරොචෙසුං. “න භික්ඛවෙ උතුනියා{3} භික්ඛුනියා ඔනද්ධමඤ්චං ඔනද්ධපීඨං අභිනිසීදිතබ්බං. අභිනිපජ්ජිතබ්බං. යා අභිනිසීදෙය්ය වා අභිනිපජ්ජෙය්ය වා ආපත්ති දුක්කටස්ස. අනුජානාමි භික්ඛවෙ ආවසථචීවරන්ති”
ආවසථචීවරං{4} ලොහිතෙන මක්ඛීයති. භගවතො එතමත්ථං ආරොචෙසුං. “අනුජානාමි භික්ඛවෙ ආණිචොළකන්ති”. චොළකං නිපතති{5}. භගවතො එතමත්ථං ආරොචෙසුං. “අනුජානාමි භික්ඛවෙ සුත්තකෙන බන්ධිත්වා ඌරුයා බන්ධිතුන්ති”. සුත්තකං ඡිජ්ජති. භගවතො එතමත්ථං ආරොචෙසුං. “අනුජානාමි භික්ඛවෙ සංවෙල්ලියං කටිසුත්තකන්ති”.
55. තෙන ඛො පන සමයෙන ඡබ්බග්ගියා භික්ඛුනියො සබ්බකාලං කටිසුත්තකං ධාරෙන්ති. මනුස්සා උජ්ඣායන්ති, ඛීයන්ති, විපාචෙන්ති. ‘සෙය්යථාපි ගිහී කාමභොගිනියොති’. භගවතො එතමත්ථං ආරොචෙසුං: “න භික්ඛවෙ භික්ඛුනියා සබ්බකාලං කටිසුත්තකං ධාරෙතබ්බං. යා ධාරෙය්ය ආපත්ති දුක්කටස්ස. අනුජානාමි භික්ඛවෙ උතුනියා කටිසුත්තකන්ති”.
දුතිය භාණවාරං.
56. තෙන ඛො පන සමයෙන උපසම්පන්නායො දිස්සන්ති අනිමිත්තාපි නිමිත්තමත්තාපි අලොහිතාපි{1} ධුවලොහිතාපි පග්ඝරන්තීපි සිඛරිණීපි{2} ඉත්ථිපණ්ඩකාපි වෙපුරිසිකාපි සම්භින්නාපි උභතොබ්යඤ්ජනකාපි{3}. භගවතො එතමත්ථං ආරොචෙසුං. “අනුජානාමි භික්ඛවෙ උපසම්පාදෙන්තියා චතුවීසති අන්තරායිකෙ ධම්මෙ පුච්ඡිතුං. එවඤ්ච පන භික්ඛවෙ පුච්ඡිතබ්බා: “නසි අනිමිත්තා, නසි නිමිත්තමත්තා, නසි අලොහිතා, නසි ධුවලොහිතා, නසි ධුවචොළා, නසි පග්ඝරන්තී, නසි සිඛරිණී, නසි ඉත්ථිපණ්ඩකා, නසි වෙපුරිසිකා, නසි සම්භින්නා, නසි උභතොබ්යඤ්ජනකා. සන්ති තෙ එවරූපා ආබාධා: කුට්ඨං ගණ්ඩො කිලාසො සොසො අපමාරො. මනුස්සාසි, ඉත්ථීසි, භුජිස්සාසි, අනණාසි, නසි රාජභටී, අනුඤ්ඤාතාසි මාතාපිතූහි සාමිකෙන, පරිපුණ්ණවීසතිවස්සාසි, පරිපුණ්ණං තෙ පත්තචීවරං, කිං නාමාසි, කා නාමා තෙ පවත්තිනී”ති.
57. තෙන ඛො පන සමයෙන භික්ඛූ භික්ඛුනීනං අන්තරායිකෙ ධම්මෙ පුච්ඡන්ති. උපසම්පදාපෙඛායො{4} විත්ථායන්ති මඞ්කූ හොන්ති න සක්කොන්ති විස්සජ්ජෙතුං. භගවතො එතමත්ථං ආරොචෙසුං. “අනුජානාමි භික්ඛවෙ එකතො උපසම්පන්නාය භික්ඛුනීසඞ්ඝෙ විසුද්ධාය භික්ඛුසඞ්ඝෙ උපසම්පාදන්ති{5}”.
58. තෙන ඛො පන සමයෙන භික්ඛුනියො අනනුසිට්ඨා උපසම්පදාපෙඛායො අන්තරායිකෙ ධම්මෙ පුච්ඡන්ති. උපසම්පදාපෙඛායො විත්ථායන්ති. මඞ්කූ හොන්ති. න සක්කොන්ති විස්සජ්ජෙතුං භගවතො එතමත්ථං ආරොචෙසුං. “අනුජානාමි භික්ඛවෙ පඨමං අනුසාසිත්වා පච්ඡා අන්තරායිකෙ ධම්මෙ පුච්ඡිතුන්ති”. තත්ථෙව සඞ්ඝමජ්ඣෙ අනුසාසන්ති, උපසම්පදාපෙඛායො තථෙව විත්ථායන්ති. මඞ්කූ හොන්ති. න සක්කොන්ති විස්සජ්ජෙතුං. භගවතො එතමත්ථං ආරොචෙසුං. “අනුජානාමි භික්ඛවෙ එකමන්තං අනුසාසිත්වා සඞ්ඝමජ්ඣෙ අන්තරායිකෙ ධම්මෙ පුච්ඡිතුං.
එවඤ්ච පන භික්ඛවෙ අනුසාසිතබ්බා: පඨමං උපජ්ඣං ගාහාපෙතබ්බා. උපජ්ඣං ගාහාපෙත්වා පත්තචීවරං ආචික්ඛිතබ්බං: අයං තෙ පත්තො, අයං සඞ්ඝාටි, අයං උත්තරාසඞ්ගො, අයං අන්තරවාසකො, ඉදං සඞ්කච්චිකං, අයං උදකසාටිකා. ගච්ඡ අමුම්හි ඔකාසෙ තිට්ඨාහීති. බාලා අව්යත්තා අනුසාසන්ති. දුරනුසිට්ඨා උපසම්පදාපෙඛායො විත්ථායන්ති, මඞ්කූ හොන්ති. න සක්කොන්ති විස්සජ්ජෙතුං. භගවතො එතමත්ථං ආරොචෙසුං. “න භික්ඛවෙ බාලාය අව්යත්තාය අනුසාසිතබ්බා. යා අනුසාසෙය්ය ආපත්ති දුක්කටස්ස. අනුජානාමි භික්ඛවෙ ව්යත්තාය භික්ඛුනියා පටිබලාය අනුසාසිතුන්ති”. අසම්මතා අනුසාසන්ති. භගවතො එතමත්ථං ආරොචෙසුං. “න භික්ඛවෙ අසම්මතාය අනුසාසිතබ්බා. යා අනුසාසෙය්ය ආපත්ති දුක්කටස්ස. අනුජානාමි භික්ඛවෙ සම්මතාය අනුසාසිතුං”.
එවඤ්ච පන භික්ඛවෙ සම්මන්නිතබ්බා: අත්තනා වා අත්තානං සම්මන්නිතබ්බං. පරාය වා පරා සම්මන්නිතබ්බා. කථඤ්ච අත්තනාව අත්තානං සම්මන්නිතබ්බං? ව්යත්තාය භික්ඛුනියා පටිබලාය සඞ්ඝො ඤාපෙතබ්බො: “සුණාතු මෙ අය්යෙ සඞ්ඝො: ඉත්ථන්නාමා ඉත්ථන්නාමාය අය්යාය උපසම්පදාපෙඛා. යදි සඞ්ඝස්ස පත්තකල්ලං අහං ඉත්ථන්නාමා ඉත්ථන්නාමං අනුසාසෙය්යන්ති”. එවං අත්තනාව අත්තානං සම්මන්නිතබ්බං. කථඤ්ච පරායපරා සම්මන්නිතබ්බා? ව්යත්තාය භික්ඛුනියා පටිබලාය සඞ්ඝො ඤාපෙතබ්බො: “සුණාතු මෙ අය්යෙ සඞ්ඝො. ඉත්ථන්නාමා ඉත්ථන්නාමාය අය්යාය උපසම්පදාපෙඛා. යදි සඞ්ඝස්ස පත්තකල්ලං ඉත්ථන්නාමා ඉත්ථන්නාමං අනුසාසෙය්යාති”. එවං පරාය පරා සම්මන්නිතබ්බා.
තාය සම්මතාය භික්ඛුනියා උපසම්පදාපෙඛං උපසඞ්කමිත්වා එවමස්ස වචනීයා: “සුණසි ඉත්ථන්නාමෙ අයං තෙ සච්චකාලො භූතකාලො යං ජාතං තං සඞ්ඝමජ්ඣෙ පුච්ඡන්තෙ සන්තං අත්ථීති වත්තබ්බං. අසන්තං නත්ථීති වත්තබ්බං. මා ඛො විත්ථාසි{1} මා ඛො මඞ්කු අහොසි. එවං තං පුච්ඡිස්සන්ති: නසි අනිමිත්තා, නසි නිමිත්තමත්තා, නසි අලොහිතා{2}, නසි ධුවලොහිතා, නසි ධුවචොළා, නසි පග්ඝරන්ති, නසි සිඛරිණී{3}, නසි ඉත්ථිපණ්ඩකා, නසි වෙපුරිසිකා, නසි සම්භින්නා,
නසි උභතොබ්යඤ්ජනකා{1}, සන්ති තෙ එවරූපා ආබාධා–කුට්ඨං, ගණ්ඩො, කිලාසො, සොසො, අපමාරො. මනුස්සාසි, ඉත්ථීසි, භුජිස්සාසි, අනණාසි, නසි රාජභටී, අනුඤ්ඤාතාසි මාතාපිතූහි සාමිකෙන, පරිපුණ්ණවීසතිවස්සාසි, පරිපුණ්ණං තෙ පත්තචීවරං, කිං නාමාසි, කා නාමා තෙ පවත්තිනී”ති.
59. එකතො ආගච්ඡන්ති. න එකතො ආගන්තබ්බං. අනුසාසිකාය පඨමතරං ආගන්ත්වා සඞ්ඝො ඤාපෙතබ්බො: සුණාතු මෙ අය්යෙ සඞ්ඝො. ඉත්ථන්නාමා{2} ඉත්ථන්නාමාය අය්යාය උපසම්පදාපෙඛා. අනුසිට්ඨා සා මයා. යදි සඞ්ඝස්ස පත්තකල්ලං ඉත්ථන්නාමා ආගච්ඡෙය්යාති. ආගච්ඡාහීති වත්තබ්බා. එකංසං උත්තරාසඞ්ගං කාරාපෙත්වා භික්ඛුනීනං පාදෙ වන්දාපෙත්වා උක්කුටිකං නිසීදාපෙත්වා අඤ්ජලිං පග්ගණ්හාපෙත්වා උපසම්පදං යාචාපෙතබ්බා: සඞ්ඝං අය්යෙ උපසම්පදං යාචාමි. උල්ලුම්පතු මං අය්යෙ සඞ්ඝො අනුකම්පං උපාදාය. දුතියම්පි අය්යෙ සඞ්ඝං උපසම්පදං යාචාමි. උල්ලුම්පතු මං අය්යෙ සඞ්ඝො අනුකම්පං උපාදාය. තතියම්පි අය්යෙ සඞ්ඝං උපසම්පදං යාචාමි. උල්ලුම්පතු මං අය්යෙ සඞ්ඝො අනුකම්පං උපාදායාති.
ව්යත්තාය භික්ඛුනියා පටිබලාය සඞ්ඝො ඤාපෙතබ්බො: සුණාතු මෙ අය්යෙ සඞ්ඝො. අයං ඉත්ථන්නාමා ඉත්ථන්නාමාය අය්යාය උපසම්පදාපෙඛා, යදි සඞ්ඝස්ස පත්තකල්ලං අහං ඉත්ථන්නාමං අන්තරායිකෙ ධම්මෙ පුච්ඡෙය්යං. සුණසි ඉත්ථන්නාමෙ, අයං තෙ සච්චකාලො, භූතකාලො. යං ජාතං තං පුච්ඡාමි. සන්තං අත්ථීති වත්තබ්බං, අසන්තං නත්ථීති වත්තබ්බං, නසි අනිමිත්තා. නසි නිමිත්තමත්තා -පෙ- කිං නාමාසි? කා නාමා තෙ පවත්තිනීති.{3}
ව්යත්තාය භික්ඛුනියා පටිබලාය සඞ්ඝො ඤාපෙතබ්බො: සුණාතු මෙ අය්යෙ සඞ්ඝො, අයං ඉත්ථන්නාමා ඉත්ථන්නාමාය අය්යාය උපසම්පදාපෙඛා. පරිසුද්ධා අන්තරායිකෙහි ධම්මෙහි. පරිපුණ්ණස්සා පත්තචීවරං. ඉත්ථන්නාමා සඞ්ඝං උපසම්පදං යාචති ඉත්ථන්නාමාය අය්යාය පවත්තිනියා. යදි සඞ්ඝස්ස පත්තකල්ලං සඞ්ඝො ඉත්ථන්නාමං උපසම්පාදෙය්ය ඉත්ථන්නාමාය අය්යාය පවත්තිනියා. එසා ඤත්ති.
“සුණාතු මෙ අය්යෙ සඞ්ඝො. අයං ඉත්ථන්නාමා ඉත්ථන්නාමාය අය්යාය උපසම්පදාපෙඛා. පරිසුද්ධා අන්තරායිකෙහි ධම්මෙහි. පරිපුණ්ණස්සා පත්තචීවරං. ඉත්ථන්නාමා සඞ්ඝං උපසම්පදං යාචති ඉත්ථන්නාමාය අය්යාය පවත්තිනියා. සඞ්ඝො ඉත්ථන්නාමං උපසම්පාදෙති ඉත්ථන්නාමාය අය්යාය පවත්තිනියා. යස්සා අය්යාය ඛමති ඉත්ථන්නාමාය උපසම්පදා ඉත්ථන්නාමාය අය්යාය පවත්තිනියා. සා තුණ්හස්ස. යස්සා නක්ඛමති සා භාසෙය්ය.
දුතියම්පි එතමත්ථං වදාමි -පෙ- තතියම්පි එතමත්ථං වදාමි. සුණාතු මෙ අය්යෙ සඞ්ඝො. අයං ඉත්ථන්නාමා ඉත්ථන්නාමාය අය්යාය උපසම්පදාපෙඛා. පරිසුද්ධා අන්තරායිකෙහි ධම්මෙහි. පරිපුණ්ණස්සා පත්තචීවරං. ඉත්ථන්නාමා සඞ්ඝං උපසම්පදං යාචති ඉත්ථන්නාමාය අය්යාය පවත්තිනියා. සඞ්ඝො ඉත්ථන්නාමං උපසම්පාදෙති ඉත්ථන්නාමාය අය්යාය පවත්තිනියා. යස්සා අය්යාය ඛමති ඉත්ථන්නාමාය උපසම්පදා ඉත්ථන්නාමාය අය්යාය පවත්තිනියා. සා තුණ්හස්ස. යස්සා නක්ඛමති සා භාසෙය්ය.
උපසම්පන්නා සඞ්ඝෙන ඉත්ථන්නාමා ඉත්ථන්නාමාය අය්යාය පවත්තිනියා. ඛමති සඞ්ඝස්ස තස්මා තුණ්හී. එවමෙතං ධාරයාමී”ති.
තාවදෙව තං ආදාය භික්ඛුසඞ්ඝං උපසඞ්කමිත්වා එකංසං උත්තරාසඞ්ගං කාරාපෙත්වා භික්ඛූනං පාදෙ වන්දාපෙත්වා උක්කුටිකං නිසීදාපෙත්වා අඤ්ජලිං පග්ගණ්හාපෙත්වා උපසම්පදං යාචාපෙතබ්බා. “අහං අය්යා ඉත්ථන්නාමා ඉත්ථන්නාමාය අය්යාය උපසම්පදාපෙඛා. එකතො උපසම්පන්නා භික්ඛුනීසඞ්ඝෙ විසුද්ධා, සඞ්ඝං අය්යා උපසම්පදං යාචාමි. උල්ලුම්පතු මං අය්යා සඞ්ඝො අනුකම්පං උපාදාය. අහං අය්යා ඉත්ථන්නාමා ඉත්ථන්නාමාය අය්යාය උපසම්පදාපෙඛා. එකතො උපසම්පන්නා භික්ඛුනීසඞ්ඝෙ විසුද්ධා, දුතියම්පි අය්යා සඞ්ඝං උපසම්පදං යාචාමි. උල්ලුම්පතු මං අය්යා සඞ්ඝො අනුකම්පං උපාදාය. අහං අය්යා ඉත්ථන්නාමා ඉත්ථන්නාමාය අය්යාය උපසම්පදාපෙඛා එකතො උපසම්පන්නා භික්ඛුනීසඞ්ඝෙ විසුද්ධා, තතියම්පි අය්යා සඞ්ඝං උපසම්පදං යාචාමි. උල්ලුම්පතු මං අය්යා සඞ්ඝො අනුකම්පං උපාදායා”ති.
ව්යත්තෙන භික්ඛුනා පටිබලෙන සඞ්ඝො ඤාපෙතබ්බො: සුණාතු මෙ භන්තෙ සඞ්ඝො. අයං ඉත්ථන්නාමා ඉත්ථන්නාමාය උපසම්පදාපෙඛා එකතො උපසම්පන්නා භික්ඛුනීසඞ්ඝෙ විසුද්ධා. ඉත්ථන්නාමා සඞ්ඝං උපසම්පදං යාචති ඉත්ථන්නාමාය පවත්තිනියා. යදි සඞ්ඝස්ස පත්තකල්ලං සඞ්ඝො ඉත්ථන්නාමං උපසම්පාදෙය්ය ඉත්ථන්නාමාය පවත්තිනියා. එසා ඤත්ති.
සුණාතු මෙ භන්තෙ සඞ්ඝො. අයං ඉත්ථන්නාමා ඉත්ථන්නාමාය උපසම්පදාපෙඛා එකතො උපසම්පන්නා භික්ඛුනීසඞ්ඝෙ විසුද්ධා. ඉත්ථන්නාමා සඞ්ඝං උපසම්පදං යාචති ඉත්ථන්නාමාය පවත්තිනියා. සඞ්ඝො ඉත්ථන්නාමං උපසම්පාදෙති ඉත්ථන්නාමාය පවත්තිනියා. යස්සායස්මතො ඛමති ඉත්ථන්නාමාය උපසම්පදා ඉත්ථන්නාමාය පවත්තිනියා. සො තුණ්හස්ස. යස්ස නක්ඛමති සො භාසෙය්ය.
දුතියම්පි එතමත්ථං වදාමි -පෙ- තතියම්පි එතමත්ථං වදාමි. සුණාතු මෙ භන්තෙ සඞ්ඝො. අයං ඉත්ථන්නාමා ඉත්ථන්නාමාය උපසම්පදාපෙඛා එකතො උපසම්පන්නා භික්ඛුනීසඞ්ඝෙ විසුද්ධා. ඉත්ථන්නාමා සඞ්ඝං උපසම්පදං යාචති ඉත්ථන්නාමාය පවත්තිනියා. සඞ්ඝො ඉත්ථන්නාමං උපසම්පාදෙති ඉත්ථන්නාමාය පවත්තිනියා. යස්සායස්මතො ඛමති ඉත්ථන්නාමාය උපසම්පදා ඉත්ථන්නාමාය පවත්තිනියා, සො තුණ්හස්ස. යස්ස නක්ඛමති සො භාසෙය්ය.
උපසම්පන්නා සඞ්ඝෙන ඉත්ථන්නාමා ඉත්ථන්නාමාය පවත්තිනියා. ඛමති සඞ්ඝස්ස තස්මා තුණ්හී එවමෙතං ධාරයාමීති.
තාවදෙව ඡායා මෙතබ්බා. උතුපමාණං ආචික්ඛිතබ්බං. දිවසභාගො ආචික්ඛිතබ්බො, සඞ්ගීති ආචික්ඛිතබ්බා, භික්ඛුනියො වත්තබ්බා ඉමිස්සා තයො ච නිස්සයෙ අට්ඨ ච අකරණීයානි ආචික්ඛෙය්යාථාති.
60. තෙන ඛො පන සමයෙන භික්ඛුනියො භත්තග්ගෙ ආසනං සඞ්කසායන්තියො{1} කාලං වීතිනාමෙසුං. භගවතො එතමත්ථං ආරොචෙසුං. “අනුජානාමි භික්ඛවෙ අට්ඨන්නං භික්ඛුනීනං යථාවුඩ්ඪං අවසෙසානං යථාගතිකන්ති”.
61. තෙන ඛො පන සමයෙන භික්ඛුනියො භගවතා අනුඤ්ඤාතං අට්ඨන්නං භික්ඛුනීනං යථාවුඩ්ඪං අවසෙසානං යථාගතිකන්ති සබ්බත්ථ අට්ඨාව{1}. භික්ඛුනියො යථාවුඩ්ඪං පටිබාහන්ති අවසෙසායො යථාගතිකං. භගවතො එතමත්ථං ආරොචෙසුං. “අනුජානාමි භික්ඛවෙ භත්තග්ගෙ අට්ඨන්නං භික්ඛුනීනං යථාවුඩ්ඪං අවසෙසානං යථාගතිකං. අඤ්ඤත්ථ සබ්බත්ථ යථාවුඩ්ඪං න පටිබාහිතබ්බං. යා පටිබාහෙය්ය ආපත්ති දුක්කටස්සාති”.
62. තෙන ඛො පන සමයෙන භික්ඛුනියො න පවාරෙන්ති. භගවතො එතමත්ථං ආරොචෙසුං. “න භික්ඛවෙ භික්ඛුනියා න පවාරෙතබ්බං. යා න පවාරෙය්ය යථාධම්මො කාරෙතබ්බොති”. තෙන ඛො පන සමයෙන භික්ඛුනියො අත්තනා පවාරෙත්වා භික්ඛුසඞ්ඝං න පවාරෙන්ති. භගවතො එතමත්ථං ආරොචෙසුං. “න භික්ඛවෙ භික්ඛුනියා අත්තනා පවාරෙත්වා භික්ඛුසඞ්ඝො න පවාරෙතබ්බො. යා න පවාරෙය්ය යථාධම්මො කාරෙතබ්බො”ති.