15. චොදකෙන භන්තෙ භික්ඛුනා පරං චොදෙතුකාමෙන කති ධම්මෙ අජ්ඣත්තං පච්චවෙක්ඛිත්වා පරො චොදෙතබ්බොති.
චොදකෙන උපාලි භික්ඛුනා පරං චොදෙතුකාමෙන පඤ්ච ධම්මෙ අජ්ඣත්තං පච්චවෙක්ඛිත්වා පරො චොදෙතබ්බො.
චොදකෙන උපාලි භික්ඛුනා පරං චොදෙතුකාමෙන එවං පච්චවෙක්ඛිතබ්බං: පරිසුද්ධකායසමාචාරො නු ඛොම්හි පරිසුද්ධෙනම්හි කායසමාචාරෙන සමන්නාගතො අච්ඡිද්දෙන අප්පතිමංසෙන{2}. සංවිජ්ජති නු ඛො මෙ එසො ධම්මො උදාහු නොති. නො චෙ උපාලි භික්ඛු පරිසුද්ධකායසමාචාරො හොති පරිසුද්ධෙන කායසමාචාරෙන සමන්නාගතො අච්ඡිද්දෙන අප්පතිමංසෙන. තස්ස භවන්ති වත්තාරො: ඉඞ්ඝ තාව ආයස්මා කායිකං සික්ඛස්සූති. ඉතිස්ස භවන්ති වත්තාරො.
පුන ච පරං උපාලි චොදකෙන භික්ඛුනා පරං චොදෙතුකාමෙන එවං පච්චවෙක්ඛිතබ්බං: පරිසුද්ධවචීසමාචාරො නු ඛොම්හි පරිසුද්ධෙනම්හි වචීසමාචාරෙන සමන්නාගතො අච්ඡිද්දෙන අප්පතිමංසෙන. සංවිජ්ජති නු ඛො මෙ එසො ධම්මො උදාහු නොති. නො චෙ උපාලි භික්ඛු පරිසුද්ධවචීසමාචාරො හොති පරිසුද්ධෙන වචීසමාචාරෙන සමන්නාගතො අච්ඡිද්දෙන අප්පතිමංසෙන තස්ස භවන්ති වත්තාරො: ඉඞ්ඝ තාව ආයස්මා වාචසිකං සික්ඛස්සූති. ඉතිස්ස භවන්ති වත්තාරො.
පුන චපරං උපාලි, චොදකෙන භික්ඛුනා පරං චොදෙතුකාමෙන එවං පච්චවෙක්ඛිතබ්බං: මෙත්තං නු ඛො මෙ චිත්තං පච්චුපට්ඨිතං සබ්රහ්මචාරීසු අනාඝාති{1}, සංවිජ්ජති නු ඛො මෙ එසො ධම්මො උදාහු නොති? නො චෙ උපාලි භික්ඛුනො මෙත්තචිත්තං පච්චුපට්ඨිතං හොති සබ්රහ්මචාරීසු අනාඝාති, තස්ස භවන්ති වත්තාරො: ඉඞ්ඝ තාව ආයස්මා සබ්රහ්මචාරීසු මෙත්තං චිත්තං උපට්ඨාපෙහීති.{2} ඉතිස්ස භවන්ති වත්තාරො.
පුන චපරං උපාලි චොදකෙන භික්ඛුනා පරං චොදෙතුකාමෙන එවං පච්චවෙක්ඛිතබ්බං: බහුස්සුතො නු ඛොම්හි සුතධරො සුතසන්නිච්චයො. යෙ තෙ ධම්මා ආදිකල්යාණා මජ්ඣෙකල්යාණා පරියොසානකල්යාණා සාත්ථං සව්යඤ්ජනං කෙවලපරිපුණ්ණං පරිසුද්ධං බ්රහ්මචරියං අභිවදන්ති, තථාරූපා මෙ ධම්මා බහුස්සුතා හොන්ති ධතා{3} වචසා පරිචිතා මනසානුපෙක්ඛිතා දිට්ඨියා සුප්පටිවිද්ධා. සංවිජ්ජති නු ඛො මෙ එසො ධම්මො උදාහු නොති. නො චෙ උපාලි භික්ඛු බහුස්සුතො හොති සුතධරො සුතසන්නිචයො. යෙ තෙ ධම්මා ආදිකල්යාණා මජ්ඣෙකල්යාණා පරියොසානකල්යාණා සාත්ථං සව්යඤ්ජනං කෙවලපරිපුණ්ණං පරිසුද්ධං බ්රහ්මචරියං අභිවදන්ති. තථාරූපස්ස ධම්මා න බහුස්සුතා හොන්ති ධාතා වචසා පරිචිතා මනසානුපෙක්ඛිතා දිට්ඨියා සුප්පටිවිද්ධා. තස්ස භවන්ති වත්තාරො ඉඞ්ඝ තාව ආයස්මා ආගමං පරියාපුණස්සුති: ඉතිස්ස භවන්ති වත්තාරො.
පුන චපරං උපාලි චොදකෙන භික්ඛුනා පරං චොදෙතුකාමෙන එවං පච්චවෙක්ඛිතබ්බං: උභයානි ඛො මෙ පාතිමොක්ඛානි විත්ථාරෙන ස්වාගතානි හොන්ති සුවිභත්තානි සුප්පවත්තීනි සුවිනිච්ඡිතානි සුත්තසො අනුව්යඤ්ජනසො, සංවිජ්ජති නු ඛො මෙ එසො ධම්මො උදාහු නොති? නො චෙ උපාලි භික්ඛුනො උභයානි පාතිමොක්ඛානි විත්ථාරෙන ස්වාගතානි හොන්ති සුවිභත්තානි සුප්පවත්තීනි සුවිනිච්ඡිතානි සුත්තසො අනුව්යඤ්ජනසො- ඉදං පනාවුසො කත්ථ වුත්තං භගවතාති ඉති පුට්ඨො න සම්පායති. තස්ස භවන්ති වත්තාරො ඉඞ්ඝ තාව ආයස්මා විනයං පරියාපුණස්සූති. ඉතිස්ස භවන්ති වත්තාරො.
චොදකෙන උපාලි භික්ඛුනා පරං චොදෙතුකාමෙන ඉමෙ පඤ්ච ධම්මෙ අජ්ඣත්තං පච්චවෙක්ඛිත්වා පරො චොදෙතබ්බොති.
16. චොදකෙන භන්තෙ භික්ඛුනා පරං චොදෙතුකාමෙන කති ධම්මෙ අජ්ඣත්තං උපට්ඨාපෙත්වා පරො චොදෙතබ්බොති?
චොදකෙන උපාලි භික්ඛුනා පරං චොදෙතුකාමෙන පඤ්ච ධම්මෙ අජ්ඣත්තං උපට්ඨාපෙත්වා පරො චොදෙතබ්බො: කාලෙන වක්ඛාමි නො අකාලෙන: භූතෙන වක්ඛාමි නො අභූතෙන සණ්හෙන වක්ඛාමි නො ඵරුසෙන. අත්ථසංහිතෙන වක්ඛාමි නො අනත්ථසංහිතෙන. මෙත්තචිත්තො වක්ඛාමි නො දොසන්තරොති. චොදකෙනුපාලි භික්ඛුනා පරං චොදෙතුකාමෙන ඉමෙ පඤ්ච ධම්මෙ අජ්ඣත්තං උපට්ඨාපෙත්වා පරො චොදෙතබ්බාති.
17. අධම්මචොදකස්ස භන්තෙ භික්ඛුනො කතීහාකාරෙහි විප්පටිසාරො උපදහාතබ්බොති?
අධම්මචොදකස්ස උපාලි භික්ඛුනො පඤ්චහාකාරෙහි විප්පටිසාරො උපදහාතබ්බො: අකාලෙන ආයස්මා චොදෙසි නො කාලෙන අලං තෙ විප්පටිසාරාය, අභූතෙනායස්මා චොදෙසි නො භූතෙන අලං තෙ විප්පටිසාරාය, ඵරුසෙනායස්මා චොදෙසි නො සණ්හෙන අලං තෙ විප්පටිසාරාය, අනත්ථසංහිතෙනායස්මා චොදෙසි නො අත්ථසංහිතෙන අලං තෙ විප්පටිසාරාය, දොසන්තරො ආයස්මා චොදෙසි නො මෙත්තචිත්තො. අලං තෙ විප්පටිසාරායාති. අධම්මචොදකස්ස උපාලි භික්ඛුනො ඉමෙහි පඤ්චහාකාරෙහි විප්පටිසාරො උපදහාතබ්බො: තං කිස්ස හෙතු? යථා න අඤ්ඤොපි භික්ඛු අභූතෙන චොදෙතබ්බං මඤ්ඤෙය්යාති.
18. අධම්මචුදිතකස්ස{1} පන භන්තෙ භික්ඛුනො කතිහාකාරෙහි අවිප්පටිසාරො උපදහාතබ්බොති?
අධම්මචුදිතස්ස{1} උපාලි භික්ඛුනො පඤ්චහාකාරෙහි අවිප්පටිසාරො උපදහාතබ්බො, අකාලෙනායස්මා චුදිතො නො කාලෙන, අලං තෙ අවිප්පටිසාරාය{2}, අභූතෙනායස්මා චුදිතො නො භූතෙන, අලං තෙ අවිප්පටිසාරාය. ඵරුසෙනායස්මා චුදිතො නො සණ්හෙන, අලං තෙ අවිප්පටිසාරාය{3}. අනත්ථසංහිතෙනායස්මා චුදිතො නො අත්ථසංහිතෙන, අලං තෙ අවිප්පටිසාරාය.3 දොසන්තරෙනායස්මා චුදිතො නො මෙත්තචිත්තෙන, අලං තෙ අවිප්පටිසාරායාති. අධම්මචුදිතකස්ස1 උපාලි භික්ඛුනො ඉමෙහි පඤ්චහාකාරෙහි අවිප්පටිසාරො උපදහාතබ්බොති.
19. ධම්මචොදකස්ස භන්තෙ භික්ඛුනො කතිහාකාරෙහි අවිප්පටිසාරො උපදහාතබ්බොති?
ධම්මචොදකස්ස උපාලි භික්ඛුනො පඤ්චහාකාරෙහි අවිප්පටිසාරො උපදහාතබ්බො: කාලෙනායස්මා චොදෙසි නො අකාලෙන, අලං තෙ අවිප්පටිසාරාය. භූතෙනායස්මා චොදෙසි නො අභූතෙන. අලං තෙ අවිප්පටිසාරාය. සණ්හෙනායස්මා චොදෙසි නො ඵරුසෙන, අලං තෙ අවිප්පටිසාරාය. අත්ථසංහිතෙනායස්මා චොදෙසි නො අනත්ථසංහිතෙන, අලං තෙ අවිප්පටිසාරාය. මෙත්තචිත්තො ආයස්මා චොදෙසි නො දොසන්තරො. අලං තෙ අවිප්පටිසාරායාති. ධම්මචොදකස්ස උපාලි භික්ඛුනො ඉමෙහි පඤ්චහාකාරෙහි අවිප්පටිසාරො උපදහාතබ්බො. තං කිස්ස හෙතු? යථා අඤ්ඤොපි භික්ඛු භූතෙන චොදෙතබ්බං මඤ්ඤෙය්යාති.
20. ධම්මචුදිතකස්ස{1} පන භන්තෙ භික්ඛුනො කතිහාකාරෙහි විප්පටිසාරො උපදහාතබ්බොති?
ධම්මචුදිතස්ස උපාලි භික්ඛුනො පඤ්චහාකාරෙහි විප්පටිසාරො උපදහාතබ්බො: කාලෙනායස්මා චුදිතො නො අකාලෙන, අලං තෙ විප්පටිසාරාය. භූතෙනායස්මා චුදිතො නො අභූතෙන, අලං තෙ විප්පටිසාරාය, සණ්හෙනායස්මා චුදිතො නො ඵරුසෙන, අලං තෙ විප්පටිසාරාය. අත්ථසංහිතෙනායස්මා චුදිතො නො අනත්ථසංහිතෙන, අලං තෙ විප්පටිසාරාය. මෙත්තචිත්තෙනායස්මා චුදිතො නො දොසන්තරෙන, අලං තෙ විප්පටිසාරායාති. ධම්මචුදිතකස්ස1 උපාලි භික්ඛුනො ඉමෙහි පඤ්චහාකාරෙහි විප්පටිසාරො උපදහාතබ්බොති.
21. චොදකෙන භන්තෙ භික්ඛුනා පරං චොදෙතුකාමෙන කතිධම්මෙ අජ්ඣත්තං මනසිකරිත්වා පරො චොදෙතබ්බොති?
චොදකෙනුපාලි භික්ඛුනා පරං චොදෙතුකාමෙන පඤ්ච ධම්මෙ අජ්ඣත්තං මනසිකරිත්වා පරො චොදෙතබ්බො: කාරුඤ්ඤතා, හිතෙසිතා අනුකම්පතා{2} ආපත්තිවුට්ඨානතා විනයපුරෙක්ඛාරතාති. චොදකෙන උපාලි භික්ඛුනා පරං චොදෙතුකාමෙන ඉමෙ පඤ්ච ධම්මෙ අජ්ඣත්තං මනසිකරිත්වා පරො චොදෙතබ්බොති.
චුදිතකෙන{1} පන භන්තෙ භික්ඛුනා කතීසු ධම්මෙසු පතිට්ඨාතබ්බන්ති?
චුදිතකෙනුපාලි භික්ඛුනා ද්වීසු ධම්මෙසු පතිට්ඨාතබ්බං: සච්චෙ ච අකුප්පෙ චාති.
දුතිය භාණවාරං.
පාතිමොක්ඛට්ඨපනක්ඛන්ධකං නවමං.
ඉමම්හි ඛන්ධකෙ වත්ථු තිංස,
තස්සුද්දානං:
1. උපොසථෙ යාවතිකං පාපභික්ඛු න නික්ඛමි මොග්ගල්ලානෙන නිච්ඡුද්ධො අච්ඡරියං ජිනසාසනෙ
2. නින්නොනුපුබ්බසික්ඛා ච ඨිතධම්මො නාතික්කම්ම{2} කුණපුක්ඛිපතී සඞ්ඝො සවන්තියො ජහන්ති ච.
3. සවන්ති පරිනිබ්බන්ති එකරස විමුත්ති ච බහු ධම්මවිනයොපි භූතට්ඨාරියපුග්ගලා.
4. සමුද්දං උපමං කත්වා වාචෙසි සාසනෙ ගුණං උපොසථෙ පාතිමොක්ඛං න අම්හෙ කොචි ජානාති.
5. පටිගච්චෙව උජ්ඣන්ති එකො ද්වෙ තීණි චත්තාරි පඤ්ච ඡ සත්ත අට්ඨ නව ච දසමානි ච.
6. සීල ආචාර දිට්ඨි ච ආජීවං චතුභාගිකෙ{3} පාරාජිකං ච සඞ්ඝාදි පාචිත්ති පාටිදෙසනි.
7. දුක්කටං පඤ්චභාගෙසු සීලාචාර විපත්ති ච අකතාය කතාය ච ඡ භාගෙසු යථාවිධි.
8. පාරාජිකඤ්ච සඞ්ඝාදි ථුල්ල පාචිත්තියෙන ච පාටිදෙසනියඤ්චෙව දුක්කටං ච දුබ්භාසිතං.
9. සීලාචාරවිපත්ති ච දිට්ඨි ආජීව විපත්ති යා ච අට්ඨා කතාකතෙ තෙනෙතා සීලාචාර දිට්ඨියා
10. අකතාය කතායා පි කතාකතාය මෙව ච එවං නවවිධා වුත්තා යථාභූතෙන ඤායතො.{4}
11. පාරාජිකො විප්පකතො පච්චක්ඛාතො තථෙව ච උපෙති පච්චාදියති පච්ච දානකථා ච යා.
12. සීලාචාර විපත්ති ච තථා දිට්ඨිවිපත්තියා දිට්ඨසුතපරිසඞ්කි දසධා තං විජානාථ.{1}
13. භික්ඛු විපස්සති භික්ඛුං අඤ්ඤො චාරො චායෙනං{2} සුද්ධො ච තස්ස අක්ඛාති පාතිමොක්ඛං ඨපෙති සො.
14. වුට්ඨාති අන්තරායෙන රාජචොරග්ගුදකා ච, මනුස්ස අමනුස්සා ච වාළ සිරිංසපජීවිබ්රහ්මං{3}
15. දසන්නමඤ්ඤතරෙන තස්මිං අඤ්ඤතරෙසු වා ධම්මිකාධම්මිකා චෙව යථා මග්ගෙන ජානථ.{4}
16. කාලභූතත්ථසංහිතං ලභිස්සාමි භවිස්සති කායවාචසිකා මෙත්තා බාහුසච්චං උභයානි.
17. කාලභූතෙන සණ්හෙන අත්ථමෙත්තෙන චොදයෙ විප්පටිසාරධම්මෙන තථා වාචා විනොදයෙ.
18. ධම්මචොද චුදිතස්ස විනොදෙති විප්පටිසාරො කරුණා හිතානුකම්පී වුට්ඨාන පුරෙක්ඛාරතා.
19. චොදකස්ස පටිපත්ති සම්බුද්ධෙන පකාසිතා සච්චෙ චෙව අකුප්පෙ ච චුදිතස්සෙ ච ධම්මතාති.
10.
භික්ඛුනීක්ඛන්ධකං
1. තෙන සමයෙන බුද්ධො භගවා සක්කෙසු විහරති කපිලවත්ථුස්මිං නිග්රොධාරාමෙ. අථ ඛො මහාපජාපති ගොතමී යෙන භගවා තෙනුපසඞ්කමි උපසඞ්කමිත්වා භගවන්තං අභිවාදෙත්වා එකමන්තං අට්ඨාසි. එකමන්තං ඨිතා ඛො මහාපජාපති ගොතමී භගවන්තං එතදවොච: “සාධු භන්තෙ ලභෙය්ය මාතුගාමො තථාගතප්පවෙදිතෙ ධම්මවිනයෙ අගාරස්මා අනගාරියං පබ්බජ්ජන්ති.”
“අලං ගොතමී, මා තෙ රුච්චි මාතුගාමස්ස තථාගතප්පවෙදිතෙ ධම්මවිනයෙ අගාරස්මා අනගාරියං පබ්බජ්ජා”ති.
දුතියම්පි ඛො මහාපජාපති ගොතමී භගවන්තං එතදවොච: “සාධු භන්තෙ ලභෙය්ය මාතුගාමො -පෙ- පබ්බජ්ජන්ති”.
“අලං ගොතමී, මා තෙ රුච්චි මාතුගාමස්ස -පෙ- පබ්බජ්ජා”ති.
තතියම්පි ඛො මහාපජාපතී ගොතමී භගවන්තං එතදවොච: “සාධු භන්තෙ ලභෙය්ය මාතුගාමො තථාගතප්පවෙදිතෙ ධම්මවිනයෙ අගාරස්මා අනගාරියං පබ්බජ්ජන්ති”.
“අලං ගොතමී, මා තෙ රුච්චි මාතුගාමස්ස තථාගතප්පවෙදිතෙ ධම්මවිනයෙ අගාරස්මා අනගාරියං පබ්බජ්ජා”ති.
අථ ඛො මහාපජාපති ගොතමී “න භගවා අනුජානාති මාතුගාමස්ස තථාගතප්පවෙදිතෙ ධම්මවිනයෙ අගාරස්මා අනගාරියං පබ්බජ්ජන්ති” දුක්ඛී දුම්මනා අස්සුමුඛී රුදමානා භගවන්තං අභිවාදෙත්වා පදක්ඛිණං කත්වා පක්කාමි. අථ ඛො භගවා කපිලවත්ථුස්මිං යථාභිරන්තං විහරිත්වා යෙන වෙසාලී තෙන චාරිකං පක්කාමි. අනුපුබ්බෙන චාරිකං චරමානො යෙන වෙසාලී තදවසරි. තත්ර සුදං භගවා වෙසාලියං විහරති මහාවනෙ කූටාගාරසාලායං.
අථ ඛො මහාපජාපති ගොතමී කෙසෙ ඡෙදාපෙත්වා කාසායානි වත්ථානි අච්ඡාදෙත්වා සම්බහුලාහි සාකියානීහි සද්ධිං යෙන වෙසාලී තෙන පක්කාමි. අනුපුබ්බෙන යෙන වෙසාලී මහාවනං කූටාගාරසාලා තෙනුපසඞ්කමි. අථ ඛො මහාපජාපති ගොතමී සූනෙහි පාදෙහි රජොකිණ්ණෙන ගත්තෙන දුක්ඛී දුම්මනා අස්සුමුඛී රුදමානා බහිද්වාරකොට්ඨකෙ අට්ඨාසි අද්දසා ඛො ආයස්මා ආනන්දො මහාපජාපතිං ගොතමිං සූනෙහි පාදෙහි රජොකිණ්ණෙන ගත්තෙන දුක්ඛිං දුම්මනං අස්සුමුඛිං රුදමානං බහිද්වාරකොට්ඨකෙ ඨිතං, දිස්වාන මහාපජාපතිං ගොතමිං එතදවොච: “කිස්ස ත්වං ගොතමී සූනෙහි පාදෙහි රජොකිණ්ණෙන ගත්තෙන දුක්ඛී දුම්මනා අස්සුමුඛී රුදමානා බහිද්වාරකොට්ඨකෙ ඨිතා”ති. “තථා හි පන භන්තෙ ආනන්ද න භගවා අනුජානාති මාතුගාමස්ස තථාගතප්පවෙදිතෙ ධම්මවිනයෙ අගාරස්මා අනගාරියං පබ්බජ්ජන්ති.”
2. තෙන හි ත්වං ගොතමී මුහුත්තං ඉධෙව තාව හොහි, යාවාහං භගවන්තං යාචාමි මාතුගාමස්ස තථාගතප්පවෙදිතෙ ධම්මවිනයෙ අගාරස්මා අනගාරියං පබ්බජ්ජන්ති.
අථ ඛො ආයස්මා ආනන්දො යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං නිසීදි. එකමන්තං නිසින්නො ඛො ආයස්මා ආනන්දො භගවන්තං එතදවොච: එසා භන්තෙ මහාපජාපති ගොතමී සූනෙහි පාදෙහි රජො කිණ්ණෙන ගත්තෙන දුක්ඛී දුම්මනා අස්සුමුඛී රුදමානා බහිද්වාරකොට්ඨකෙ ඨිතා “න භගවා අනුජානාති මාතුගාමස්ස තථාගතප්පවෙදිතෙ ධම්මවිනයෙ අගාරස්මා අනගාරියං පබ්බජ්ජන්ති”. සාධු භන්තෙ ලභෙය්ය මාතුගාමො තථාගතප්පවෙදිතෙ ධම්මවිනයෙ අගාරස්මා අනගාරියං පබ්බජ්ජන්ති.
“අලං ආනන්ද මා තෙ රුච්චි මාතුගාමස්ස තථාගතප්පවෙදිතෙ ධම්මවිනයෙ අගාරස්මා අනගාරියං පබ්බජ්ජා”ති.
දුතියම්පි ඛො ආයස්මා ආනන්දො භගවන්තං එතදවොච: “සාධු භන්තෙ ලභෙය්ය මාතුගාමො -පෙ- පබ්බජ්ජන්ති.
“අලං ආනන්ද මා තෙ රුච්චි මාතුගාමස්ස -පෙ- පබ්බජ්ජා”ති.
තතියම්පි ඛො ආයස්මා ආනන්දො භගවන්තං එතදවොච: සාධු භන්තෙ ලභෙය්ය මාතුගාමො -පෙ- පබ්බජ්ජන්ති.
“අලං ආනන්ද මා තෙ රුච්චි මාතුගාමස්ස තථාගතප්පවෙදිතෙ ධම්මවිනයෙ අගාරස්මා අනගාරියං පබ්බජ්ජා”ති.
අථ ඛො ආයස්මා ආනන්දො “න භගවා අනුජානාති මාතුගාමස්ස තථාගතප්පවෙදිතෙ ධම්මවිනයෙ අගාරස්මා අනගාරියං පබ්බජ්ජං යන්නූනාහං අඤ්ඤෙනපි පරියායෙන භගවන්තං යාචෙය්යං මාතුගාමස්ස තථාගතප්පවෙදිතෙ ධම්මවිනයෙ අගාරස්මා අනගාරියං පබ්බජ්ජන්ති”. අථ ඛො ආයස්මා ආනන්දො භගවන්තං එතදවොච: “භබ්බො නු ඛො භන්තෙ මාතුගාමො තථාගතප්පවෙදිතෙ ධම්මවිනයෙ අගාරස්මා අනගාරියං පබ්බජිත්වා සොතාපත්තිඵලං වා සකදාගාමිඵලං වා අනාගාමිඵලං වා අරහත්තඵලං වා සච්ඡිකාතුන්ති”?
“භබ්බො ආනන්ද මාතුගාමො තථාගතප්පවෙදිතෙ ධම්මවිනයෙ අගාරස්මා අනගාරියං පබ්බජිත්වා සොතාපත්තිඵලම්පි සකදාගාමිඵලම්පි අනාගාමිඵලම්පි අරහත්තම්පි සච්ඡිකාතුන්ති”.
“සචෙ භන්තෙ භබ්බො මාතුගාමො -පෙ- අරහත්තම්පි සච්ඡිකාතුං බහූපකාරා භන්තෙ මහාපජාපති ගොතමී භගවතො මාතුච්ඡා ආපාදිකා පොසිකා ඛීරස්ස දායිකා භගවන්තං ජනෙත්තියා කාලකතාය ථඤ්ඤං පායෙසි. සාධු භන්තෙ ලභෙය්ය මාතුගාමො තථාගතප්පවෙදිතෙ ධම්මවිනයෙ අගාරස්මා අනගාරියං පබ්බජ්ජන්ති”.
3. “සචෙ ආනන්ද මහාපජාපතී ගොතමී අට්ඨ ගරුධම්මෙ පටිගණ්හාති සාවස්සා හොතු උපසම්පදා.
වස්සසතූපසම්පන්නාය භික්ඛුනියා තදහුපසම්පන්නස්ස භික්ඛුනො අභිවාදනං පච්චුට්ඨානං අඤ්ජලිකම්මං සාමීචිකම්මං කාතබ්බං. අයම්පි ධම්මො සක්කත්වා ගරුකත්වා මානෙත්වා පූජෙත්වා යාවජීවං අනතික්කමනීයො.
න භික්ඛුනියා අභික්ඛුකෙ ආවාසෙ වස්සං වසිතබ්බං, අයම්පි ධම්මො -පෙ- යාවජීවං අනතික්කමනීයො.
අන්වද්ධමාසං භික්ඛුනියා භික්ඛුසඞ්ඝතො ද්වෙ ධම්මා පච්චාසිංසිතබ්බා: උපොසථපුච්ඡකඤ්ච ඔවාදූපසඞ්කමනඤ්ච. අයම්පි ධම්මො -පෙ- යාවජීවං අනතික්කමනීයො.
වස්සං වුත්ථාය භික්ඛුනියා උභතො සඞ්ඝෙ තීහි ඨානෙහි පවාරෙතබ්බං: දිට්ඨෙන වා සුතෙන වා පරිසඞ්කාය වා. අයම්පි ධම්මො -පෙ- යාව ජීවං අනතික්කමනීයො.
ගරුධම්මං අජ්ඣාපන්නාය භික්ඛුනියා උභතො සඞ්ඝෙ පක්ඛමානත්තං චරිතබ්බං, අයම්පි ධම්මො -පෙ- යාවජීවං අනතික්කමනීයො.
ද්වෙ වස්සානි ඡසු ධම්මෙසු සික්ඛිතසික්ඛාය සික්ඛමානාය උභතොසඞ්ඝෙ උපසම්පදා පරියෙසිතබ්බා. අයම්පි ධම්මො -පෙ- යාවජීවං අනතික්කමනීයො.
න භික්ඛුනියා කෙනචි පරියායෙන භික්ඛු අක්කොසිතබ්බො පරිභාසිතබ්බො, අයම්පි ධම්මො -පෙ- අනතික්කමනීයො.
අජ්ජතග්ගෙ ඔවටො භික්ඛුනීනං භික්ඛූසු වචනපථො, අනොවටො භික්ඛූනං භික්ඛුනීසු වචනපථො, අයම්පි ධම්මො සක්කත්වා ගරුකත්වා මානෙත්වා පූජෙත්වා යාවජීවං අනතික්කමනීයො.
සචෙ ආනන්ද මහාපජාපති ගොතමී ඉමෙ අට්ඨ ගරුධම්මෙ පටිගණ්හාති සා’වස්සා හොතු උපසම්පදා”ති.
අථ ඛො ආයස්මා ආනන්දො භගවතො සන්තිකෙ අට්ඨ ගරුධම්මෙ උග්ගහෙත්වා යෙන මහාපජාපති ගොතමී තෙනුපසඞ්කමි. උපසඞ්කමිත්වා මහාපජාපතිං ගොතමිං එතදවොච: “සචෙ ඛො ත්වං ගොතමි අට්ඨ ගරුධම්මෙ පටිගණ්හෙය්යාසි සා’ව තෙ භවිස්සති උපසම්පදා.
වස්සසතූපසම්පන්නාය භික්ඛුනියා තදහුපසම්පන්නස්ස භික්ඛුනො අභිවාදනං පච්චුට්ඨානං අඤ්ජලිකම්මං සාමීචිකම්මං කාතබ්බං -පෙ- අජ්ජතග්ගෙ ඔවටො භික්ඛුනීනං භික්ඛූසු වචනපථො, අනොවටො භික්ඛූනං භික්ඛුනීසු වචනපථො අයම්පි ධම්මො සක්කත්වා ගරුකත්වා මානෙත්වා පූජෙත්වා යාවජීවං අනතික්කමනීයො”.
“සචෙ ඛො ත්වං, ගොතමි, ඉමෙ අට්ඨ ගරුධම්මෙ පටිගණ්හෙය්යාසි “සාව තෙ භවිස්සති උපසම්පදා”ති.
“සෙය්යථාපි භන්තෙ ආනන්ද ඉත්ථී වා පුරිසො වා දහරො යුවා මණ්ඩනකජාතිකො සීසං නහාතො උප්පලමාලං වා වස්සිකමාලං වා අතිමුත්තකමාලං වා ලභිත්වා උභොහි හත්ථෙහි පටිග්ගහෙත්වා උත්තමඞ්ගෙ සිරස්මිං පතිට්ඨාපෙය්ය, එවමෙව ඛො අහං භන්තෙ ආනන්ද ඉමෙ අට්ඨ ගරුධම්මෙ පටිගණ්හාමි යාවජීවං අනතික්කමනීයෙ”ති.
4. අථ ඛො ආයස්මා ආනන්දො යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං නිසීදි. එකමන්තං නිසින්නො ඛො ආයස්මා ආනන්දො භගවන්තං එතදවොච: පටිග්ගහිතා භන්තෙ මහාපජාපතියා ගොතමියා අට්ඨ ගරුධම්මා උපසම්පන්නා භගවතො මාතුච්ඡා”ති.
“සචෙ ආනන්ද නාලභිස්සා මාතුගාමො තථාගතප්පවෙදිතෙ ධම්මවිනයෙ අගාරස්මා අනගාරියං පබ්බජ්ජං, චිරට්ඨිතිකං, ආනන්ද බ්රහ්මචරියං අභවිස්ස වස්සසහස්සං සද්ධම්මො තිට්ඨෙය්ය. යතො ච ඛො ආනන්ද මාතුගාමො තථාගතප්පවෙදිතෙ ධම්මවිනයෙ අගාරස්මා අනගාරියං පබ්බජිතො න’දානි ආනන්ද බ්රහ්මචරියං චිරට්ඨිතිකං භවිස්සති. පඤ්චෙව’දානි, ආනන්ද වස්සසතානි සද්ධම්මො ඨස්සති.
සෙය්යථාපි ආනන්ද යානි කානිචි කුලානි බහුඉත්ථිකානි{1} අප්පපුරිසකානි තානි සුප්පධංසියානි හොන්ති චොරෙහි කුම්භත්ථෙනකෙහි, එවමෙව ඛො ආනන්ද යස්මිං ධම්මවිනයෙ ලභති මාතුගාමො අගාරස්මා අනගාරියං පබ්බජ්ජං, න තං බ්රහ්මචරියං චිරට්ඨිතිකං හොති.
සෙය්යථාපි ආනන්ද සම්පන්නෙ සාලික්ඛෙත්තෙ සෙතට්ඨිකා නාම රොගජාති නිපතති, එවං තං සාලික්ඛෙත්තං න චිරට්ඨිතිකං හොති. එවමෙව ඛො ආනන්ද යස්මිං ධම්මවිනයෙ ලභති මාතුගාමො අගාරස්මා අනගාරියං පබ්බජ්ජං, න තං බ්රහ්මචරියං චිරට්ඨිතිකං හොති. සෙය්යථාපි ආනන්ද සම්පන්නෙ උච්ඡුක්ඛෙත්තෙ මඤ්ජෙට්ඨිකා නාම රොගජාති නිපතති එවං තං උච්ඡුක්ඛෙත්තං න චිරට්ඨිතිකං හොති, එවමෙව ඛො ආනන්ද යස්මිං ධම්මවිනයෙ ලභති මාතුගාමො අගාරස්මා අනගාරියං පබ්බජ්ජං න තං බ්රහ්මචරියං චිරට්ඨිතිකං හොති.
සෙය්යථාපි ආනන්ද පුරිසො මහතො තළාකස්ස පටිගච්චෙව{2} ආළිං බන්ධෙය්ය, යාවදෙව උදකස්ස අනතික්කමනාය, එවමෙව ඛො ආනන්ද මයා පටිගච්චෙව භික්ඛුනීනං අට්ඨ ගරුධම්මා{3} පඤ්ඤත්තා යාවජීවං අනතික්කමනීයා”ති.
භික්ඛුනීනං අට්ඨ ගරුධම්මා.
5. අථ ඛො මහාපජාපති ගොතමී යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං අට්ඨාසි. එකමන්තං ඨිතා ඛො මහාපජාපතී ගොතමී භගවන්තං එතදවොච: “කථාහම්භන්තෙ ඉමාසු සාකියානීසු පටිපජ්ජාමී”ති.
අථ ඛො භගවා මහාපජාපතිං ගොතමිං ධම්මියා කථාය සන්දස්සෙසි සමාදපෙසි සමුත්තෙජෙසි සම්පහංසෙසි. අථ ඛො මහාපජාපති ගොතමී භගවතා ධම්මියා කථාය සන්දස්සිතා සමාදපිතා සමුත්තෙජිතා සම්පහංසිතා භගවන්තං අභිවාදෙත්වා පදක්ඛිණං කත්වා පක්කාමි. අථ ඛො භගවා එතස්මිං නිදානෙ එතස්මිං පකරණෙ ධම්මිං කථං කත්වා භික්ඛූ ආමන්තෙසි: “අනුජානාමි භික්ඛවෙ භික්ඛූහි භික්ඛුනියො උපසම්පාදෙතුන්ති”.
6. අථ ඛො තා භික්ඛුනියො මහාපජාපතිං ගොතමිං එතදවොචුං. “අය්යා අනුපසම්පන්නා, මයම්හා උපසම්පන්නා. එවං හි භගවතා පඤ්ඤත්තං: “භික්ඛූහි භික්ඛුනියො උපසම්පාදෙතබ්බා”ති.
අථ ඛො මහාපජාපති ගොතමී යෙනායස්මා ආනන්දො තෙනුපසඞ්කමි. උපසඞ්කමිත්වා ආයස්මන්තං ආනන්දං අභිවාදෙත්වා එකමන්තං අට්ඨාසි. එකමන්තං ඨිතා ඛො මහාපජාපති ගොතමී ආයස්මන්තං ආනන්දං එතදවොච: “ඉමා මං භන්තෙ ආනන්ද භික්ඛුනියො එවමාහංසු “අය්යා අනුපසම්පන්නා මයම්හා{1} උපසම්පන්නා එවං හි භගවතා පඤ්ඤත්තං භික්ඛූහි භික්ඛුනියො උපසම්පාදෙතබ්බා’ති.
7. අථ ඛො ආයස්මා ආනන්දො යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං නිසීදි, එකමන්තං නිසින්නො ඛො ආයස්මා ආනන්දො භගවන්තං එතදවොච: “මහාපජාපති භන්තෙ ගොතමී එවමාහ “ඉමා මං භන්තෙ ආනන්ද භික්ඛුනියො එවමාහංසු: අය්යා අනුපසම්පන්නා, මයම්හා{2} උපසම්පන්නා, එවං හි භගවතා පඤ්ඤත්තං භික්ඛූහි භික්ඛුනියො උපසම්පාදෙතබ්බා’ති.
“යදග්ගෙන ආනන්ද මහාපජාපතියා ගොතමියා අට්ඨ ගරුධම්මා පටිග්ගහිතා තදෙව සා උපසම්පන්නා”ති.
8. අථ ඛො මහාපජාපති ගොතමී යෙනායස්මා ආනන්දො තෙනුපසඞ්කමි. උපසඞ්කමිත්වා ආයස්මන්තං ආනන්දං අභිවාදෙත්වා එකමන්තං අට්ඨාසි එකමන්තං ඨිතා ඛො මහාපජාපති ගොතමී ආයස්මන්තං ආනන්දං එතදවොච. “එකාහං භන්තෙ ආනන්ද භගවන්තං වරං යාචාමි. සාධු භන්තෙ භගවා අනුජානෙය්ය භික්ඛූනඤ්ච භික්ඛුනීනඤ්ච යථාවුඩ්ඪං අභිවාදනං පච්චුට්ඨානං අඤ්ජලිකම්මං සාමීචිකම්ම”න්ති.
අථ ඛො ආයස්මා ආනන්දො යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං නිසීදි. එකමන්තං නිසින්නො ඛො ආයස්මා ආනන්දො භගවන්තං එතදවොච: “මහාපජාපති භන්තෙ ගොතමී එවමාහ ‘එකාහං භන්තෙ ආනන්ද භගවන්තං වරං යාචාමි. සාධු භන්තෙ භගවා අනුජානෙය්ය භික්ඛූනඤ්ච භික්ඛුනීනඤ්ච යථාවුඩ්ඪං අභිවාදනං පච්චුට්ඨානං අඤ්ජලිකම්මං සාමීචිකම්ම’න්ති.
“අට්ඨානමෙතං ආනන්ද අනවකාසො යං තථාගතො අනුජානෙය්ය මාතුගාමස්ස අභිවාදනං පච්චුට්ඨානං අඤ්ජලිකම්මං සාමීචිකම්මං. ඉමෙ හි නාම ආනන්ද අඤ්ඤතිත්ථියා දුරක්ඛාතධම්මා මාතුගාමස්ස අභිවාදනං පච්චුට්ඨානං අඤ්ජලිකම්මං සාමීචිකම්මං න කරිස්සන්ති. කිමඞ්ගං පන තථාගතො අනුජානිස්සති මාතුගාමස්ස අභිවාදනං පච්චුට්ඨානං අඤ්ජලිකම්මං සාමීචිකම්මන්ති. අථ ඛො භගවා එතස්මිං නිදානෙ එතස්මිං පකරණෙ ධම්මිං කථං කත්වා භික්ඛූ ආමන්තෙසි: “න භික්ඛවෙ මාතුගාමස්ස අභිවාදනං පච්චුට්ඨානං අඤ්ජලිකම්මං සාමීචිකම්මං කාතබ්බං. යො කරෙය්ය ආපත්ති දුක්කටස්සා”ති.
9. අථ ඛො මහාපජාපති ගොතමී යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං අට්ඨාසි. එකමන්තං ඨිතා ඛො මහාපජාපති ගොතමී භගවන්තං එතදවොච: “යානි තානි භන්තෙ භික්ඛුනීනං සික්ඛාපදානි භික්ඛූහි සාධාරණානි කථං මයං භන්තෙ තෙසු සික්ඛාපදෙසු පටිපජ්ජාමා”ති.
“යානි තානි ගොතමී භික්ඛුනීනං සික්ඛාපදානි භික්ඛූහි සාධාරණානි යථා භික්ඛූ සික්ඛන්ති තථා තෙසු සික්ඛාපදෙසු සික්ඛථා”ති.
“යානි පන තානි භන්තෙ භික්ඛුනීනං සික්ඛාපදානි භික්ඛූහි අසාධාරණානි, කථං මයං භන්තෙ තෙසු සික්ඛාපදෙසු පටිපජ්ජාමා”ති.
“යානි තානි ගොතමී භික්ඛුනීනං සික්ඛාපදානි භික්ඛූහි අසාධාරණානි යථා පඤ්ඤත්තෙසු සික්ඛාපදෙසු සික්ඛථාති.”
10. අථ ඛො මහාපජාපති ගොතමී යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං අට්ඨාසි. එකමන්තං ඨිතා ඛො මහාපජාපති ගොතමී භගවන්තං එතදවොච: “සාධු මෙ භන්තෙ භගවා සංඛිත්තෙන ධම්මං දෙසෙතු යාහං ධම්මං{1} සුත්වා එකා වූපකට්ඨා අප්පමත්තා ආතාපිනී පහිතත්තා විහරෙය්යන්ති.”
“යෙ ච ඛො{1} ත්වං ගොතමි, ධම්මෙ ජානෙය්යාසි ඉමෙ ධම්මා සරාගාය සංවත්තන්ති නො විරාගාය, සංයොගාය සංවත්තන්ති නො විසංයොගාය. ආචයාය සංවත්තන්ති නො අපචයාය. මහිච්ඡතාය සංවත්තන්ති නො අප්පිච්ඡතාය. අසන්තුට්ඨියා සංවත්තන්ති නො සන්තුට්ඨියා සඞ්ගණිකාය සංවත්තන්ති නො පවිවෙකාය කොසජ්ජාය සංවත්තන්ති නො විරියාරම්භාය. දුභරතාය{2} සංවත්තන්ති නො සුභරතාය. එකංසෙන ගොතමි ධාරෙය්යාසි නෙසො ධම්මො නෙසො විනයො නෙතං සත්ථුසාසනන්ති.