31. තෙන ඛො පන සමයෙන ආචරියා අන්තෙවාසිකෙසු න සම්මා වත්තන්ති. යෙ තෙ භික්ඛූ අප්පිච්ඡා සන්තුට්ඨා ලජ්ජිනො කුක්කුච්චකා සික්ඛාකාමා තෙ උජ්ඣායන්ති ඛීයන්ති විපාචෙන්ති: “කථං හි නාම ආචරියා අන්තෙවාසිකෙසු න සම්මා වත්තිස්සන්තී”ති. අථ ඛො තෙ භික්ඛූ භගවතො එතමත්ථං ආරොචෙසුං.
අථ ඛො භගවා එතස්මිං නිදානෙ එතස්මිං පකරණෙ භික්ඛුසඞ්ඝං සන්නිපාතාපෙත්වා භික්ඛූ පටිපුච්ඡි: “සච්චං කිර භික්ඛවෙ ආචරියා අන්තෙවාසිකෙසු න සම්මා වත්තන්තී”ති. “සච්චං භගවා”. -පෙ- විගරහිත්වා ධම්මිං කථං කත්වා භික්ඛූ ආමන්තෙසි. “තෙන හි භික්ඛවෙ, ආචරියානං අන්තෙවාසිකෙසු වත්තං පඤ්ඤාපෙස්සාමි යථා ආචරියෙහි අන්තෙවාසිකෙසු වත්තිතබ්බං”.
“ආචරියෙන භික්ඛවෙ අන්තෙවාසිකම්හි සම්මා වත්තිතබ්බං. තත්රායං සම්මාවත්තනා:
ආචරියෙන භික්ඛවෙ, අන්තෙවාසිකො සඞ්ගහෙතබ්බො. අනුග්ගහෙතබ්බො උද්දෙසෙන පරිපුච්ඡාය ඔවාදෙන අනුසාසනියා. සචෙ ආචරියස්ස පත්තො හොති, අන්තෙවාසිකස්ස පත්තො න හොති, ආචරියෙන අන්තෙවාසිකස්ස පත්තො දාතබ්බො. උස්සුක්කං වා කාතබ්බං ‘කින්ති නු ඛො අන්තෙවාසිකස්ස පත්තො උප්පජ්ජියෙථා’ති.
සචෙ ආචරියස්ස චීවරං හොති අන්තෙවාසිකස්ස චීවරං න හොති ආචරියෙන අන්තෙවාසිකස්ස චීවරං දාතබ්බං. උස්සුක්කං වා කාතබ්බං ‘කින්ති නු ඛො අන්තෙවාසිකස්ස චීවරං උප්පජ්ජියෙථා’ති.
සචෙ ආචරියස්ස පරික්ඛාරො හොති අන්තෙවාසිකස්ස පරික්ඛාරො න හොති. ආචරියෙන අන්තෙවාසිකස්ස පරික්ඛාරො දාතබ්බො. උස්සුක්කං වා කාතබ්බං ‘කින්ති නු ඛො අන්තෙවාසිකස්ස පරික්ඛාරො උප්පජ්ජියෙථා’ති.
32. සචෙ අන්තෙවාසිකො ගිලානො හොති කාලස්සෙව උට්ඨාය දන්තකට්ඨං දාතබ්බං. මුඛොදකං දාතබ්බං. ආසනං පඤ්ඤාපෙතබ්බං. සචෙ යාගු හොති භාජනං ධොවිත්වා යාගු උපනාමෙතබ්බා. යාගුපීතස්ස උදකං දත්වා භාජනං පටිග්ගහෙත්වා නීචං කත්වා සාධුකං අපරිඝංසන්තෙන ධොවිත්වා පටිසාමෙතබ්බං. අන්තෙවාසිකම්හි උට්ඨිතෙ ආසනං උද්ධරිතබ්බං. සචෙ සො දෙසො උක්ලාපො හොති සො දෙසො සම්මජ්ජිතබ්බො.
සචෙ අන්තෙවාසිකො ගාමං පවිසිතුකාමො හොති නිවාසනං දාතබ්බං. පටිනිවාසනං පටිග්ගහෙතබ්බං. කායබන්ධනං දාතබ්බං. සගුණං කත්වා සඞ්ඝාටියො දාතබ්බා. ධොවිත්වා පත්තො සඋදකො දාතබ්බො. ‘එත්තාවතා නිවත්තිස්සතී’ති ආසනං පඤ්ඤාපෙතබ්බං. පාදොදකං පාදපීඨං පාදකඨලිකං උපනික්ඛිපිතබ්බං. පච්චුග්ගන්ත්වා පත්තචීවරං පටිග්ගහෙතබ්බං. පටිනිවාසනං දාතබ්බං. නිවාසනං පටිග්ගහෙතබ්බං.
සචෙ චීවරං සින්නං හොති මුහුත්තං උණ්හෙ ඔතාපෙතබ්බං. න ච උණ්හෙ චීවරං නිදහිතබ්බං. චීවරං සඞ්ඝරිතබ්බං. චීවරං සඞ්ඝරන්තෙන චතුරඞ්ගුලං කණ්ණං උස්සාදෙත්වා චීවරං සඞ්ඝරිතබ්බං මා මජ්ඣෙ භඞ්ගො අහොසීති. ඔභොගෙ කායබන්ධනං කාතබ්බං.
33. සචෙ පිණ්ඩපාතො හොති, අන්තෙවාසිකො ච භුඤ්ජිතුකාමො හොති, උදකං දත්වා පිණ්ඩපාතො උපනාමෙතබ්බො. අන්තෙවාසිකො පානීයෙන පුච්ඡිතබ්බො. භුත්තාවිස්ස උදකං දත්වා පත්තං පටිග්ගහෙත්වා නීචං කත්වා සාධුකං අපරිඝංසන්තෙන ධොවිත්වා වොදකං කත්වා මුහුත්තං උණ්හෙ ඔතාපෙතබ්බො. න ච උණ්හෙ පත්තො නිදහිතබ්බො. පත්තචීවරං නික්ඛිපිතබ්බං. පත්තං නික්ඛිපන්තෙන එකෙන හත්ථෙන පත්තං ගහෙත්වා එකෙන හත්ථෙන හෙට්ඨා මඤ්චං වා හෙට්ඨා පීඨං වා පරාමසිත්වා පත්තො නික්ඛිපිතබ්බො. න ච අනන්තරහිතාය භූමියා පත්තො නික්ඛිපිතබ්බො. චීවරං නික්ඛිපන්තෙන එකෙන හත්ථෙන චීවරං ගහෙත්වා එකෙන හත්ථෙන චීවරවංසං වා චීවරරජ්ජුං වා පමජ්ජිත්වා පාරතො අන්තං ඔරතො භොගං කත්වා චීවරං නික්ඛිපිතබ්බං. අන්තෙවාසිකම්හි උට්ඨිතෙ ආසනං උද්ධරිතබ්බං. පාදොදකං පාදපීඨං පාදකඨලිකං පටිසාමෙතබ්බං.
සචෙ සො දෙසො උක්ලාපො හොති සො දෙසො සම්මජ්ජිතබ්බො. සචෙ අන්තෙවාසිකො නහායිතුකාමො හොති නහානං පටියාදෙතබ්බං. සචෙ සීතෙන අත්ථො හොති සීතං පටියාදෙතබ්බං. සචෙ උණ්හෙන අත්ථො හොති උණ්හං පටියාදෙතබ්බං. සචෙ අන්තෙවාසිකො ජන්තාඝරං පවිසිතුකාමො හොති චුණ්ණං සන්නෙතබ්බං. මත්තිකා තෙමෙතබ්බා. ජන්තාඝරපීඨං ආදාය ගන්ත්වා ජන්තාඝරපීඨං දත්වා චීවරං පටිග්ගහෙත්වා එකමන්තං නික්ඛිපිතබ්බං. චුණ්ණං දාතබ්බං. මත්තිකා දාතබ්බා. සචෙ උස්සහති ජන්තාඝරං පවිසිතබ්බං. ජන්තාඝරං පවිසන්තෙන මත්තිකාය මුඛං මක්ඛෙත්වා පුරතො ච පච්ඡතො ච පටිච්ඡාදෙත්වා ජන්තාඝරං පවිසිතබ්බං.
න ථෙරෙ භික්ඛූ අනුපඛජ්ජ නිසීදිතබ්බං. න නවා භික්ඛූ ආසනෙන පටිබාහිතබ්බා. ජන්තාඝරෙ අන්තෙවාසිකස්ස පරිකම්මං කාතබ්බං. ජන්තාඝරා නික්ඛමන්තෙන ජන්තාඝරපීඨං ආදාය පුරතො ච පච්ඡතො ච පටිච්ඡාදෙත්වා ජන්තාඝරා නික්ඛමිතබ්බං. උදකෙපි අන්තෙවාසිකස්ස පරිකම්මං කාතබ්බං. නහාතෙන පඨමතරං උත්තරිත්වා අත්තනො ගත්තං වොදකං කත්වා නිවාසෙත්වා අන්තෙවාසිකස්ස ගත්තතො උදකං පමජ්ජිතබ්බං. නිවාසනං දාතබ්බං. සඞ්ඝාටි දාතබ්බා ජන්තාඝරපීඨං ආදාය පඨමතරං ආගන්ත්වා ආසනං පඤ්ඤාපෙතබ්බං. පාදොදකං පාදපීඨං පාදකඨලිකං උපනික්ඛිපිතබ්බං. අන්තෙවාසිකො පානීයෙන පුච්ඡිතබ්බො. යස්මිං විහාරෙ අන්තෙවාසිකො විහරති සචෙ සො විහාරො උක්ලාපො හොති සචෙ උස්සහති සොධෙතබ්බො. විහාරං සොධෙන්තෙන පඨමං පත්තචීවරං නීහරිත්වා එකමන්තං නික්ඛිපිතබ්බං -පෙ- සචෙ ආචමනකුම්භියා උදකං න හොති ආචමනකුම්භියා උදකං ආසිඤ්චිතබ්බං.
34. සචෙ අන්තෙවාසිකස්ස අනභිරති උප්පන්නා හොති ආචරියෙන වූපකාසෙතබ්බො, වූපකාසාපෙතබ්බො. ධම්මකථා වාස්ස කාතබ්බා. සචෙ අන්තෙවාසිකස්ස කුක්කුච්චං උප්පන්නං හොති ආචරියෙන විනොදෙතබ්බං, විනොදාපෙතබ්බං, ධම්මකථා වාස්ස කාතබ්බා. සචෙ අන්තෙවාසිකස්ස දිට්ඨිගතං උප්පන්නං හොති ආචරියෙන විවෙචෙතබ්බං, විවෙචාපෙතබ්බං, ධම්මකථා වාස්ස කාතබ්බා.
සචෙ අන්තෙවාසිකො ගරුධම්මං අජ්ඣාපන්නො හොති පරිවාසාරහො, ආචරියෙන උස්සුක්කං කාතබ්බං ‘කින්ති නු ඛො සඞ්ඝො අන්තෙවාසිකස්ස පරිවාසං දදෙය්යා’ති. සචෙ අන්තෙවාසිකො මූලායපටිකස්සනාරහො හොති, ආචරියෙන උස්සුක්කං කාතබ්බං ‘කින්ති නු ඛො සඞ්ඝො අන්තෙවාසිකං මූලාය පටිකස්සෙය්යා’ති. සචෙ අන්තෙවාසිකො මානත්තාරහො හොති ආචරියෙන උස්සුක්කං කාතබ්බං ‘කින්ති නු ඛො සඞ්ඝො අන්තෙවාසිකස්ස මානත්තං දදෙය්යා’ති. සචෙ අන්තෙවාසිකො අබ්භානාරහො හොති ආචරියෙන උස්සුක්කං කාතබ්බං ‘කින්ති නු ඛො සඞ්ඝො අන්තෙවාසිකං අබ්භෙය්යා’ති.
සචෙ සඞ්ඝො අන්තෙවාසිකස්ස කම්මං කත්තුකාමො හොති තජ්ජනීයං වා නියස්සං වා පබ්බාජනීයං වා පටිසාරණීයං වා උක්ඛෙපනීයං වා ආචරියෙන උස්සුක්කං කාතබ්බං ‘කින්ති නු ඛො සඞ්ඝො අන්තෙවාසිකස්ස කම්මං න කරෙය්ය ලහුකාය වා පරිණාමෙය්යා’ති. කතං වා පනස්ස හොති සඞ්ඝෙන කම්මං තජ්ජනීයං වා නියස්සං වා පබ්බාජනීයං වා පටිසාරණීයං වා උක්ඛෙපනීයං වා ආචරියෙන උස්සුක්කං කාතබ්බං ‘කින්ති නු ඛො අන්තෙවාසිකො සම්මා වත්තෙය්ය ලොමං පාතෙය්ය නෙත්ථාරං වත්තෙය්ය සඞ්ඝො තං කම්මං පටිප්පස්සම්භෙය්යා’ති.
සචෙ අන්තෙවාසිකස්ස චීවරං ධොවිතබ්බං හොති ආචරියෙන ආචික්ඛිතබ්බං ‘එවං ධොවෙය්යාසී’ති, උස්සුක්කං වා කාතබ්බං ‘කින්ති නු ඛො අන්තෙවාසිකස්ස චීවරං ධොවියෙථා’ති. සචෙ අන්තෙවාසිකස්ස චීවරං කාතබ්බං හොති ආචරියෙන ආචික්ඛිතබ්බං ‘එවං කරෙය්යාසී’ති, උස්සුක්කං වා කාතබ්බං ‘කින්ති නු ඛො අන්තෙවාසිකස්ස චීවරං කරියෙථා’ති. සචෙ අන්තෙවාසිකස්ස රජනං පචිතබ්බං හොති. ආචරියෙන ආචික්ඛිතබ්බං ‘එවං පචෙය්යාසී’ති, උස්සුක්කං වා කාතබ්බං ‘කින්ති නු ඛො අන්තෙවාසිකස්ස රජනං පචීයෙථා’ති.
සචෙ අන්තෙවාසිකස්ස චීවරං රජිතබ්බං හොති ආචරියෙන ආචික්ඛිතබ්බං ‘එවං රජෙය්යාසී’ති, උස්සුක්කං වා කාතබ්බං ‘කින්ති නු ඛො අන්තෙවාසිකස්ස චීවරං රජියෙථා’ති. චීවරං රජන්තෙන සාධුකං සම්පරිවත්තකං සම්පරිවත්තකං රජිතබ්බං, න ච අච්ඡින්නෙ ථෙවෙ පක්කමිතබ්බං. සචෙ අන්තෙවාසිකො ගිලානො හොති යාවජීවං උපට්ඨාතබ්බො, වුට්ඨානමස්ස ආගමෙතබ්බං.
ඉදං ඛො භික්ඛවෙ ආචරියානං අන්තෙවාසිකෙසු වත්තං යථා ආචරියෙහි අන්තෙවාසිකෙසු වත්තිතබ්බන්ති”.
වත්තක්ඛන්ධකං අට්ඨමං.{1}
ඉමම්හි ඛන්ධකෙ වත්ථුපඤ්චපණ්ණාස
තස්සුද්දානං:
1. ස උපාහනා ඡත්තා ච ඔගුණ්ඨිසීසං පානීයං නාභිවාදෙ න පුච්ඡන්ති අහි උජ්ඣන්ති පෙසලා.
2. ඔමුඤ්චි ඡත්තං ඛන්ධෙ ච අතරඤ්ච පටික්කමං පත්තචීවරං නික්ඛිපි පතිරූපඤ්ච පුච්ඡිතා
3. ආසිඤ්චෙය්ය ධොවිතෙන සුක්ඛෙනල්ලෙනුපාහනා වුඩ්ඪො නවකො පුච්ඡෙය්ය අජ්ඣාවුත්ථං ච ගොචරා.
4. සෙක්ඛා වච්චා පානී පරි කත්තරං කතිකං තතො කාලං මුහුත්තං උක්ලාපො භුම්මත්ථරණං නීහරෙ
5. පටිපාදො භිසිබිම්බො මඤ්චපීඨං ච මල්ලකං අපස්සෙනුල්ලොක කණ්හා ගෙරුකා කාළ අකතා
6. සඞ්කාරං ච භුම්මත්ථරං පටිපාදකං මඤ්චපීඨං භිසිබිම්බො නිසීදනං මල්ලකං අපස්සෙන ච
7. පත්තචීවරං භූමි ච පාරන්තං ඔරතො භොගං පුරත්ථිමා පච්ඡිමා ච උත්තරා අථ දක්ඛිණා
8. සීතුණ්හෙ ච දිවා රත්තිං පරිවෙණං ච කොට්ඨකො උපට්ඨානග්ගිසාලා ච වත්තං වච්චකුටීසු ච.
9. පානීපරිභොජනියා කුම්භි ආචමනෙසු ච අනොපමෙන පඤ්ඤත්තං වත්තං ආගන්තුකෙහි මෙ
10. නෙවාසනං න උදකං න පච්චු න ච පානීයං නාභිවාදෙ න පඤ්ඤපෙ උජ්ඣායන්ති ච පෙසලා.
11. වුඩ්ඪාසනං ච උදකං පච්චුග්ගන්ත්වා ච පානීයං උපාහනෙ එකමන්තං අභිවාදෙ ච පඤ්ඤපෙ.
12. වුත්ථං ගොචර සෙඛො ච ඨානං පානිය භොජනං කත්තරං කතිකං කාලං නවකස්ස නිසින්නකෙ.
13. අභිවාදයෙ ආචික්ඛෙ යථා හෙට්ඨා තථා නයෙ නිද්දිට්ඨං සත්ථවාහෙන වත්තං ආවාසිකෙහිමෙ.
14. ගමිකා දාරුමත්ති ච, විවරිත්වා න පුච්ඡිය; නස්සන්ති ච අගුත්තං ච උජ්ඣායන්ති ච පෙසලා.
15. පටිසාමෙත්වා ථකෙත්වා ආපුච්ඡිත්වා ච පක්කමෙ භික්ඛු වා සාමණෙරො වා ආරාමිකො උපාසකො
16. පාසාණකෙසු ච පුඤ්ජං පටිසාමෙ ථකෙය්ය ච උස්සහති උස්සුක්කං වා අනොවස්සෙ තථෙව ච.
17. සබ්බො ඔවස්සති ගාමං අජ්ඣොකාසෙ තථෙව ච අප්පෙවඞ්ගානි සෙසෙය්යුං වත්තං ගමිකභික්ඛුනා.
18. නානුමොදන්ති ථෙරෙන ඔහාය චතු පඤ්චහි වච්චතො මුච්ඡිතො ආසි වත්තානුමොදනෙසුමෙ
19. ඡබ්බග්ගියා දුන්නිවත්ථා අථො පි ච දුපාරුතා අනාකප්පා ච වොක්කම්ම ථෙරෙ අනුපඛජ්ජනෙ
20. නවෙ භික්ඛූ ච සඞ්ඝාටි උජ්ඣායන්ති ච පෙසලා තිමණ්ඩලං නිවාසෙත්වා කාය සගුණ ගණ්ඨිකා
21. න වොක්කම්ම පටිච්ඡන්නං සුසංවුතොක්ඛිත්තචක්ඛුනා උක්ඛිත්තොජ්ජග්ඝිකා සද්දො තයො චෙව පචාලනා.
22. ඛම්භොගුණ්ඨි උක්කුටිකා පටිච්ඡන්නං සුසංවුතො ඔක්ඛිත්තචිත්තා උජ්ජග්ඝි අප්පසද්දො තයො චලා.
23. ඛම්භොගුණ්ඨි පල්ලත්ථි අනුපඛජ්ජනාසනෙ ඔත්ථරිත්වාන උදකෙ නීචං කත්වා න සිඤ්චියා.
24. පටිසාමන්තෙ සඞ්ඝාටි ඔදනෙ ච පටිග්ගහෙ සූපං උත්තරිභඞ්ගෙන සබ්බෙසං සමතිත්ති ච.
25. සක්කච්චං පත්තසඤ්ඤී ච සපදානඤ්ච සූපකං න ථූපතො පටිච්ඡාදෙ විඤ්ඤත්තුජ්ඣානසඤ්ඤිනා
26. මහන්තං මණ්ඩල ද්වාරං සබ්බහත්ථො න බ්යාහරී උක්ඛෙපො ඡෙදනා ගණ්ඩ ධුනං සිත්ථාවකාරකං
27. ජිව්හානිච්ඡාරකඤ්චෙව චපු සුරු සුරෙන ච හත්ථපත්තොට්ඨනිල්ලෙහං සාමිසෙන පටිග්ගහෙ
28. යාව න සබ්බෙ උදකෙ නීචං කත්වාන සිඤ්චිය පටිසාමන්තං සඞ්ඝාටි නීචං කත්වා ඡමාය ච.
29. සසිත්ථකං නිවත්තන්තෙ සුප්පටිච්ඡන්නමුක්කුටි ධම්මරාජෙන පඤ්ඤත්තං ඉදං භත්තග්ගවත්තනං
30. දුන්නිවත්ථා අනාකප්පා අසල්ලක්ඛෙත්වා ච සහසා{1} දූරෙ අච්ච චිරං ලහුං තථෙව පිණ්ඩචාරිකො.
31. පටිච්ඡන්නෙන ගච්ඡෙය්ය සුංසවුතොක්ඛිත්තචක්ඛුනා උක්ඛිත්තොජ්ජග්ඝිකා සද්දො තයො චෙව පචාලනා
32. ඛම්භොගුණ්ඨි උක්කුටිකා සල්ලක්ඛෙත්වා ච සහසා{1} දූරෙ අච්ච චිරං ලහුං ආමසනං කටච්ඡුකා.
33. භාජනං වා ඨපෙති ච උච්චාරෙත්වා පණාමෙත්වා පටිග්ගහෙ න උල්ලොකෙ සූපෙසු පි තථෙව තං
34. භික්ඛු සඞ්ඝාටියා ඡාදෙ පටිච්ඡන්නෙව ගච්ඡියං සුසංවුතොක්ඛිත්තචක්ඛු උක්ඛිත්තොජ්ජග්ඝිකාය ච
35. අප්පසද්දො තයො චාලා ඛම්භොගුණ්ඨික උක්කුටි පඨමාසනවක්කාරං පානීයං පරිභොජනීං පච්ඡාකඞ්ඛති භුඤ්ජෙය්ය ඔපිලාපෙය්ය උද්ධරෙ.
36. පටිසාමෙය්ය සම්මජ්ජෙ රිත්තං තුච්ඡං උපට්ඨපෙ හත්ථවිකාරෙ භින්දෙය්ය වත්තඤ්ච පිණ්ඩපාතිකෙ.
37. පාණිපරි අග්යාරණි නක්ඛත්තං දිසාචොරා ච සබ්බං නත්ථීති කොටෙත්වා පත්තංසෙ චීවරං තතො
38. ඉදානි අංසෙ ලග්ගෙත්වා තිමණ්ඩලං පරිමණ්ඩලං යථා පිණ්ඩචාරිවත්තං නයෙ ආරඤ්ඤිකෙසු පි.
39. පත්තංසෙ චීවරං සීසෙ ආරොහිත්වා ච පානීයං පරිභොජනීයං අග්ගි අරණී චාපි කත්තරී
40. නක්ඛත්තං සබ්බදෙසං වා දිසාපි කුසලො භවෙ සත්තුත්තමෙන පඤ්ඤත්තං වත්තං ආරඤ්ඤිකෙසුමෙ
41. අජ්ඣොකාසෙ ඔකිරිංසු උජ්ඣායන්ති ච පෙසලා සචෙ විහාරො උක්ලාපො පඨමං පත්තචීවරං
42. භිසිබිම්බොහනං මඤ්චං පීඨඤ්ච ඛෙළමල්ලකං අපස්සෙනුල්ලොකකණ්ණා ගෙරුකං කාළවාකතං
43. සඞ්කාරං භික්ඛු සාමන්තා සෙනා විහාරපානියං පරිභොජන සාමන්තා පටිවාතෙ ච පඞ්ගණෙ.
44. අධොවාතෙ අත්ථරණං පටිපාදක මඤ්චකං පීඨං භිසි නිසීදනං මල්ලකං අපස්සෙන ච.
45. පත්ත චීවරං භූමි ච පාරන්තං ඔරභොගතො පුරත්ථිමා ච පච්ඡිමා උත්තරා අථ දක්ඛිණා.
46. සීතුණ්හෙ ච දිවා රත්තිං පරිවෙණඤ්ච කොට්ඨකො උපට්ඨානග්ගිසාලා ච වච්චකුටී ච පානීයං.
47. ආචමකුම්භි වුඩ්ඪෙ ච උද්දෙස පරිපුච්ඡනා සජ්ඣා ධම්මො පදීපං විජ්ඣාපෙ න විවරෙ නාපි ථකෙ
48. යෙන වුඩ්ඪො පරිවත්ති කණ්ණෙනපි න ඝට්ටයෙ පඤ්ඤපෙසි මහාවීරො වත්තං සෙනාසනෙසු තං.
49. නිවාරියමානා ද්වාරං මුච්ඡිතුජ්ඣන්ති පෙසලා ඡාරිකං ඡඩ්ඩයෙ ජන්තා පරිභණ්ඩං තථෙව ච
50. පරිවෙණං කොට්ඨකො සාලා චුණ්ණ මත්තික දොණිකා මුඛං පුරතො න ථෙරෙ න නවෙ උස්සහති සචෙ
51. පුරතො උපරිමග්ගො චික්ඛල්ලං මත්ති පීඨකං විජ්ඣාපෙත්වා පක්කමෙ වත්තං ජන්තාඝරෙසුමෙ
52. නාචමෙති යථාවුඩ්ඪං පටිපාටි ච සහසා උබ්භජි නිත්ථුනො කට්ඨං වච්චං පස්සාව ඛෙළකං
53. ඵරුසා කූප සහසා උබ්භජ්ජි චපු සෙසෙන බහි අන්තො ච උක්කාසෙ රජ්ජු අතරමානඤ්ච
54. සහසා උබ්භුජ්ජිත්වාන නිත්ථුනෙ කට්ඨවච්චකං. පස්සාව ඛෙළ ඵරුසා කූපඤ්ච වච්චපාදුකෙ.
55. නාතිසහසා උබ්භුජ්ජි පාදුකාය චපුචපු න සෙසයෙ පටිච්ඡාදෙ ඌහන පීඨරෙන ච.
56. වච්චකුටී පරිභණ්ඩං පරිවෙණඤ්ච කොට්ඨකො ආචමනෙ ච උදකං වත්තං වච්චකුටීසුමෙ.
57. උපාහනා දන්තකට්ඨං මුඛොදකඤ්ච ආසනං යාගු උදකං ධොවිත්වා උද්ධාරුක්ලාප ගාම ච.
58. නිවාසනං කායබන්ධං{1}. සගුණං පත්තසොදකං පච්ඡා තිමණ්ඩලො චෙව පරිමණ්ඩලබන්ධනං.
59. සගුණං ධොවිත්වා පච්ඡා නාතිදූරෙ පටිග්ගහෙ භණමානස්ස ආපත්ති පඨමා ගන්ත්වාන ආසනං.
60. උදකං පීඨ කඨලි පච්චුග්ගන්ත්වා නිවාසනං ඔතාපෙ නිදහි භඞ්ගො ඔභොගෙ භුඤ්ජිතුන්නමෙ.
61. පානීයං උදකං නීචං මුහුත්තං න ච නිදහෙ පත්තචීවර භූමි ච පාරන්තං ඔරභොගතො.
62. උද්ධරෙ පටිසාමෙ ච උක්ලාපො ච නහායිතුං සීතං උණ්හං ජන්තාඝරං චුණ්ණං මත්තිකපිට්ඨිතො
63. පීඨඤ්ච චීවරං චුණ්ණං මත්තිකුස්සහති මුඛං පුරතො ථෙරෙ නවෙ ච පරිකම්මඤ්ච නික්ඛමෙ.
64. පුරතො උදකෙ නහානෙ නිවාසෙත්වා උපජ්ඣායං නිවාසනඤ්ච සඞ්ඝාටි පීඨකං ආසනෙන ච.
65. පාදො පීඨං කඨලිඤ්ච පානීයුද්දෙසපුච්ඡනා උක්ලාපං සුසොධෙය්ය පඨමං පත්තචීවරං.
66. නිසීදනපච්චත්ථරණං භිසිබිම්බොහනානි ච මඤ්චො පීඨං පටිපාදං මල්ලකං අපස්සෙන ච.
67. භුම්ම සන්තාන ආලොක ගෙරුකා කාළ අකතා භුම්මත්ථර පටිපාදා මඤ්චො පීඨං බිබ්බොහනං
68. නිසීදනත්ථරණං ඛෙළ අපස්සෙ පත්තචීවරං පුරත්ථිමා පච්ඡිමා චෙව උත්තරා අථ දක්ඛිණා.
69. සීතුණ්හඤ්ච දිවා රත්තිං පරිවෙණඤ්ච කොට්ඨකො උපට්ඨානග්ගිසාලා ච වච්ච පානිය භොජනි.
70. ආචමං අනභිරති කුක්කුච්චං දිට්ඨි ච ගරු මූලමානත්ත අබ්භානං තජ්ජනීයං නියස්සකං.
71. පබ්බාජ පටිසාරණී උක්ඛෙපඤ්ච කතං යදි ධොවෙ කාතබ්බං රජඤ්ච රජෙ සම්පරිවත්තකං.
72. පත්තඤ්ච චීවරං චාපි පරික්ඛාරඤ්ච ඡෙදනං පරිකම්මං වෙය්යාවච්චං පච්ඡා පිණ්ඩං පවිසනං.
73. න සුසානං දිසා චෙව යාවජීවං උපට්ඨහෙ සද්ධිවිහාරිකෙනෙතං වත්තුපජ්ඣායකෙසුමෙ{1}
74. ඔවාද සාසනුද්දෙසා පුච්ඡා පත්තඤ්ච චීවරං පරික්ඛාර ගිලානො ච න පච්ඡාසමණො භවෙ.
75. උපජ්ඣායෙසු යෙ වත්තා එවං ආචරියෙසුපි සද්ධිවිහාරිකෙ වත්තා තථෙව අන්තෙවාසිකෙ.
76. ආගන්තුකෙසු යෙ වත්තා පුන ආවාසිකෙසු ච ගමිකානුමොදනිකා භත්තග්ගෙ පිණ්ඩචාරිකෙ.
77. ආරඤ්ඤිකෙසු යං වත්තං යඤ්ච සෙනාසනෙසු පි ජන්තාඝරෙ වච්චකුටී උපජ්ඣා සද්ධිවිහාරිකෙ.
78. ආචරියෙසු යං වත්තං තථෙව අන්තෙවාසිකෙ එකූනවීසති වත්ථු වුත්තා සොළසඛන්ධකෙ{1}
79. වත්තං අපරිපූරෙන්තො න සීලං පරිපූරති අසුද්ධසීලො දුප්පඤ්ඤො චිත්තෙකග්ගං න වින්දති.