ගෙරුකං අනිබන්ධනීයා හොති -පෙ-
“අනුජානාමි භික්ඛවෙ කුණ්ඩකමත්තිකං දත්වා පාණිකාය පටිබාහෙත්වා ගෙරුකං නිපාතෙතුන්ති.”
ගෙරුකා අනිබන්ධනියං හොති. භගවතො එතමත්ථං ආරොචෙසුං.
“අනුජානාමි භික්ඛවෙ සාසපකුණ්ඩං සිත්ථතෙලකන්ති.”
අච්චුස්සන්නං හොති. භගවතො එතමත්ථං ආරොචෙසුං.
“අනුජානාමි භික්ඛවෙ චොළකෙන පච්චුද්ධරිතුන්ති.”
16. තෙන ඛො පන සමයෙන ඵරුසාය භූමියා කාළවණ්ණො න නිපතති -පෙ- අනුජානාමි භික්ඛවෙ ථුසපිණ්ඩං දත්වා පාණිකාය පටිබාහෙත්වා කාළවණ්ණං නිපාතෙතුන්ති.
කාළවණ්ණො අනිබන්ධනීයො හොති. භගවතො එතමත්ථං ආරොචෙසුං. “අනුජානාමි භික්ඛවෙ ගණ්ඩමත්තිකං දත්වා පාණිකාය පටිබාහෙත්වා කාළවණ්ණං නිපාතෙතුන්ති.”
කාළවණ්ණො අනිබන්ධනියො හොති. භගවතො එතමත්ථං ආරොචෙසුං.
“අනුජානාමි භික්ඛවෙ ඉක්කාසං කසාවන්ති.”
17. තෙන ඛො පන සමයෙන ඡබ්බග්ගියා භික්ඛූ විහාරෙ පටිභානචිත්තං කාරාපෙන්ති ඉත්ථිරූපකං පුරිසරූපකං. මනුස්සා විහාරචාරිකං ආහිණ්ඩන්තා පස්සිත්වා උජ්ඣායන්ති ඛීයන්ති විපාචෙන්ති ‘සෙය්යථාපි ගිහී කාමභොගිනො’ති. භගවතො එතමත්ථං ආරොචෙසුං.
“න භික්ඛවෙ පටිභානචිත්තං කාරාපෙතබ්බං ඉත්ථිරූපකං පුරිසරූපකං. යො කාරාපෙය්ය ආපත්ති දුක්කටස්ස.
“අනුජානාමි භික්ඛවෙ මාලාකම්මං ලතාකම්මං මකරදන්තකං පඤ්චපටිකන්ති.”
18. තෙන ඛො පන සමයෙන විහාරා නීචවත්ථුකා හොන්ති, උදකෙන ඔත්ථරීයන්ති. භගවතො එතමත්ථං ආරොචෙසුං.
“අනුජානාමි භික්ඛවෙ උච්චවත්ථුකං කාතුන්ති.”
චයො පරිපතති -පෙ-
“අනුජානාමි භික්ඛවෙ චිනිතුං තයො චයෙ: ඉට්ඨකාචයං සිලාචයං දාරුචයන්ති.”
ආරොහන්තා විහඤ්ඤන්ති. -පෙ-
අනුජානාමි භික්ඛවෙ තයො සොපාණෙ: ඉට්ඨකාසොපාණං සිලාසොපාණං දාරුසොපාණන්ති.”
ආරොහන්තා පරිපතන්තී -පෙ-
“අනුජානාමි භික්ඛවෙ ආලම්බනබාහන්ති.”
19. තෙන ඛො පන සමයෙන විහාරා ආලකමන්දා හොන්ති. භික්ඛූ හිරීයන්ති නිපජ්ජිතුං. භගවතො එතමත්ථං ආරොචෙසුං.
“අනුජානාමි භික්ඛවෙ තිරොකරණින්ති.”
තිරොකරණිං උක්ඛිපිත්වා ඔලොකෙන්ති -පෙ-
“අනුජානාමි භික්ඛවෙ අඩ්ඪකුඩ්ඩකන්ති.”
අඩ්ඪකුඩ්ඩකා උපරිතො ඔලොකෙන්ති -පෙ-
“අනුජානාමි භික්ඛවෙ තයො ගබ්භෙ: සිවිකාගබ්භං නාළිකාගබ්භං හම්මියගබ්භන්ති.”
තෙන ඛො පන සමයෙන භික්ඛූ ඛුද්දකෙ විහාරෙ මජ්ඣෙ ගබ්භං කරොන්ති. උපචාරො න හොති. භගවතො එතමත්ථං ආරොචෙසුං.
“අනුජානාමි භික්ඛවෙ ඛුද්දකෙ විහාරෙ එකමන්තං ගබ්භං කාතුං මහල්ලකෙ මජ්ඣෙ”ති.
20. තෙන ඛො පන සමයෙන විහාරස්ස කුඩ්ඩපාදො ජීරති. භගවතො එතමත්ථං ආරොචෙසුං.
“අනුජානාමි භික්ඛවෙ කුලුඞ්කපාදකන්ති.”
විහාරස්ස කුඩ්ඩො ඔවස්සති. -පෙ-
“අනුජානාමි භික්ඛවෙ පරිත්තානකිටිකං උද්දසුධන්ති.”{1}
තෙන ඛො පන සමයෙන අඤ්ඤතරස්ස භික්ඛුනො තිණච්ඡදනා අහි ඛන්ධෙ පපති. සො භීතො විස්සරමකාසි. භික්ඛූ උපධාවිත්වා තං භික්ඛුං එතදවොචුං. “කිස්ස ත්වං ආවුසො විස්සරමකාසී”ති. අථ ඛො සො භික්ඛූනං එතමත්ථං ආරොචෙසි. භික්ඛූ භගවතො එතමත්ථං ආරොචෙසුං.
“අනුජානාමි භික්ඛවෙ විතානන්ති.”
21. තෙන ඛො පන සමයෙන භික්ඛූ මඤ්චපාදෙපි පීඨපාදෙපි ථවිකායො ලග්ගෙන්ති. උන්දූරෙහිපි උපචිකාහිපි ඛජ්ජන්ති. භගවතො එතමත්ථං ආරොචෙසුං.
“අනුජානාමි භික්ඛවෙ භිත්තිඛිලං නාගදන්තකන්ති.”
තෙන ඛො පන සමයෙන භික්ඛූ මඤ්චෙ’පි පීඨෙ’පි චීවරං නික්ඛිපන්ති. චීවරං පරිභිජ්ජිති. භගවතො එතමත්ථං ආරොචෙසුං.
“අනුජානාමි භික්ඛවෙ චීවරවංසං චීවරරජ්ජුන්ති.”
තෙන ඛො පන සමයෙන විහාරා අනාලින්දකා හොන්ති අප්පටිස්සරණා. භගවතො එතමත්ථං ආරොචෙසුං.
“අනුජානාමි භික්ඛවෙ ආලින්දං පඝනං පකුඩ්ඩං ඔසාරකන්ති.”
ආලින්දා පාකටා හොන්ති. භික්ඛූ හිරීයන්ති නිපජ්ජිතුං -පෙ-
“අනුජානාමි භික්ඛවෙ සංසරණකිටිකං උග්ඝාටනකිටිකන්ති.”
22. තෙන ඛො පන සමයෙන භික්ඛූ අජ්ඣොකාසෙ භත්තවිස්සග්ගං කරොන්තා සීතෙන’පි උණ්හෙන’පි කිලමන්ති. භගවතො එතමත්ථං ආරොචෙසුං.
“අනුජානාමි භික්ඛවෙ උපට්ඨානසාලන්ති.”
උපට්ඨානසාලා නීචවත්ථුකා හොති. උදකෙන ඔත්ථරීයති. -පෙ-
“අනුජානාමි භික්ඛවෙ උච්චවත්ථුකං කාතුන්ති.”
චයො පරිපතති.
“අනුජානාමි භික්ඛවෙ චිනිතුං තයො චයෙ: ඉට්ඨකාචයං සිලාචයං දාරුචයන්ති.”
ආරොහන්තා විහඤ්ඤන්ති.
“අනුජානාමි භික්ඛවෙ තයො සොපාණෙ: ඉට්ඨකාසොපාණං සිලාසොපාණං දාරුසොපාණන්ති.”
ආරොහන්තා පරිපතන්ති. -පෙ-
“අනුජානාමි භික්ඛවෙ ආලම්බනබාහන්ති.”
උපට්ඨානසාලාය තිණචුණ්ණං පරිපතති. -පෙ-
“අනුජානාමි භික්ඛවෙ ඔගුම්බෙත්වා උල්ලිත්තාවලිත්තං කාතුං. සෙතවණ්ණං කාළවණ්ණං ගෙරුකපරිකම්මං මාලාකම්මං ලතාකම්මං මකරදන්තකං පඤ්චපටිකං චීවරවංසං චීවරරජ්ජුන්ති.”
තෙන ඛො පන සමයෙන භික්ඛූ අජ්ඣොකාසෙ ඡමාය චීවරං පත්ථරන්ති. චීවරං පංසුකිතං හොති. -පෙ-
“අනුජානාමි භික්ඛවෙ අජ්ඣොකාසෙ චීවරවංසං චීවරරජ්ජුන්ති.”
පානීයං ඔතප්පති -පෙ-
“අනුජානාමි භික්ඛවෙ පානීයසාලං පානීයමණ්ඩපන්ති.”
පානීයසාලා නීචවත්ථුකා හොති උදකෙන ඔත්ථරීයති. -පෙ-
“අනුජානාමි භික්ඛවෙ උච්චවත්ථුකං කාතුන්ති.”
චයො පරිපතති -පෙ-
“අනුජානාමි භික්ඛවෙ චිනිතුං තයො චයෙ: ඉට්ඨකාචයං සිලාචයං දාරුචයන්ති.”
ආරොහන්තා විහඤ්ඤන්ති. -පෙ-
“අනුජානාමි භික්ඛවෙ තයො සොපාණෙ: ඉට්ඨකාසොපාණං සිලාසොපාණං, දාරුසොපාණන්ති.”
ආරොහන්තා පරිපතන්ති. -පෙ-
“අනුජානාමි භික්ඛවෙ ආලම්බනබාහන්ති.”
පානීයසාලාය තිණචුණ්ණං පරිපතති. -පෙ-
“අනුජානාමි භික්ඛවෙ ඔගුම්බෙත්වා උල්ලිත්තාවලිත්තං කාතුං සෙතවණ්ණං කාළවණ්ණං ගෙරුකපරිකම්මං මාලාකම්මං ලතාකම්මං මකරදන්තකං පඤ්චපටිකං චීවරවංසං චීවරරජ්ජුන්ති.”
පානීයභාජනං න සංවිජ්ජති -පෙ-
“අනුජානාමි භික්ඛවෙ පානීයසඞ්ඛං පානීයසරාවකන්ති.”
23. තෙන ඛො පන සමයෙන විහාරා අපරික්ඛිත්තා හොන්ති. -පෙ-
“අනුජානාමි භික්ඛවෙ පරික්ඛිපිතුං තයො පාකාරෙ ඉට්ඨකාපාකාරං සිලාපාකාරං දාරුපාකාරන්ති.”
කොට්ඨකො න හොති.
“අනුජානාමි භික්ඛවෙ කොට්ඨකන්ති.”
කොට්ඨකො නීචවත්ථුකො හොති. උදකෙන ඔත්ථරීයති -පෙ-
“අනුජානාමි භික්ඛවෙ උච්චවත්ථුකං කාතුන්ති.”
කොට්ඨකස්ස කවාටං න හොති. -පෙ-
“අනුජානාමි භික්ඛවෙ කවාටං පිට්ඨසඞ්ඝාටං උදුක්ඛලිකං උත්තරපාසකං අග්ගළවට්ටිං කපිසීසකං සූචිකං ඝටිකං තාළච්ඡිද්දං ආවිඤ්ඡනච්ඡිද්දං ආවිඤ්ඡනරජ්ජුන්ති.”
කොට්ඨකෙ තිණචුණ්ණං පරිපතති. -පෙ-
“අනුජානාමි භික්ඛවෙ ඔගුම්බෙත්වා උල්ලිත්තාවලිත්තං කාතුං සෙතවණ්ණං කාළවණ්ණං ගෙරුකපරිකම්මං මාලාකම්මං ලතාකම්මං මකරදන්තකං පඤ්චපටිකන්ති.”
24. තෙන ඛො පන සමයෙන පරිවෙණං චික්ඛල්ලං හොති. භගවතො එතමත්ථං ආරොචෙසුං. -පෙ-
“අනුජානාමි භික්ඛවෙ මරුම්බං උපකිරිතුන්ති.”
න පරියාපුණන්ති. -පෙ-
“අනුජානාමි භික්ඛවෙ පදරසිලං නික්ඛිපිතුන්ති.”
උදකං සන්තිට්ඨති. -පෙ-
“අනුජානාමි භික්ඛවෙ උදකනිද්ධමනන්ති.”
තෙන ඛො පන සමයෙන භික්ඛූ පරිවෙනෙ තහං තහං අග්ගිට්ඨානං කරොන්ති. පරිවෙණං උක්ලාපං හොති. භගවතො එතමත්ථං ආරොචෙසුං.
“අනුජානාමි භික්ඛවෙ එකමන්තං අග්ගිසාලං කාතුන්ති.”
අග්ගිසාලා නීචවත්ථුකා හොති. උදකෙන ඔත්ථරීයති. -පෙ-
“අනුජානාමි භික්ඛවෙ උච්චවත්ථුකං කාතුන්ති.”
චයො පරිපතති. -පෙ-
“අනුජානාමි භික්ඛවෙ චිනිතුං තයො චයෙ ඉට්ඨකාචයං සිලාචයං දාරුචයන්ති.”
ආරොහන්තා විහඤ්ඤන්ති. -පෙ-
“අනුජානාමි භික්ඛවෙ තයො සොපාණෙ ඉට්ඨකාසොපාණං සිලාසොපාණං දාරුසොපාණන්ති.”
ආරොහන්තා පරිපතන්ති. -පෙ-
“අනුජානාමි භික්ඛවෙ ආලම්බනබාහන්ති.”
අග්ගිසාලාය කවාටං න හොති. -පෙ-
“අනුජානාමි භික්ඛවෙ කවාටං පිට්ඨසඞ්ඝාටං උදුක්ඛලිකං උත්තරපාසකං අග්ගළවට්ටිං කපිසීසකං සූචිකං ඝටිකං තාළච්ඡිද්දං ආවිඤ්ඡනච්ඡිද්දං ආවිඤ්ඡනරජ්ජුන්ති.”
අග්ගිසාලාය තිණචුණ්ණං පරිපතති. -පෙ-