කවාටා න ඵස්සීයන්ති{2} භගවතො එතමත්ථං ආරොචෙසුං.
“අනුජානාමි භික්ඛවෙ ආවිඤ්ජනරජ්ජුන්ති.”
කවාටා න ථකීයන්ති. භගවතො එතමත්ථං ආරොචෙසුං.
“අනුජානාමි භික්ඛවෙ අග්ගලවට්ටිං කපිසීසකං සූචිකං ඝටිකන්ති.”
තෙන ඛො පන සමයෙන භික්ඛූ න සක්කොන්ති කවාටං අවාපුරිතුං?{3} භගවතො එතමත්ථං ආරොචෙසුං.
“අනුජානාමි භික්ඛවෙ තාලච්ඡිද්දං තීණි තාලානි ලොහතාලං කට්ඨතාලං විසාණතාලන්ති.”
යෙ පි තෙ උග්ඝාටෙත්වා පවිසන්ති විහාරා අගුත්තා හොන්ති. භගවතො එතමත්ථං ආරොචෙසුං.
“අනුජානාමි භික්ඛවෙ යන්තකං සූචිකන්ති.”
7. තෙන ඛො පන සමයෙන විහාරා තිණච්ඡදනා හොන්ති. සීතකාලෙ සීතා උණ්හකාලෙ උණ්හා. භගවතො එතමත්ථං ආරොචෙසුං.
“අනුජානාමි භික්ඛවෙ ඔගුම්බෙත්වා උල්ලිත්තාවලිත්තං කාතුන්ති.”
8. තෙන ඛො පන සමයෙන විහාරා අවාතපානකා{1} හොන්ති අචක්ඛුස්සා දුග්ගන්ධා. භගවතො එතමත්ථං ආරොචෙසුං.
“අනුජානාමි භික්ඛවෙ තීණි වාතපානානි: වෙදිකාවාතපානං ජාලවාතපානං සලාකවාතපානන්ති.”
වාතපානන්තරිකාය කාලකාපි වග්ගුලියොපි පවිසන්ති. භගවතො එතමත්ථං ආරොචෙසුං.
“අනුජානාමි භික්ඛවෙ වාතපානචක්කලිකංති.”
චක්කලිකන්තරිකායපි කාලකාපි වග්ගුලියොපි පවිසන්ති -පෙ-
“අනුජානාමි භික්ඛවෙ වාතපානකවාටකං වාතපානභිසිකංති.”
9. තෙන ඛො පන සමයෙන භික්ඛූ ඡමායං සයන්ති. ගත්තානිපි චීවරානිපි පංසුකිතානි හොන්ති භගවතො එතමත්ථං ආරොචෙසුං.
“අනුජානාමි භික්ඛවෙ තිණසන්ථාරකන්ති.”
තිණසන්ථාරකො උන්දූරෙහිපි උපචිකාහිපි ඛජ්ජති -පෙ-
“අනුජානාමි භික්ඛවෙ මිඪින්ති.”
මිඪියා ගත්තානි දුක්ඛා හොන්ති -පෙ-
“අනුජානාමි භික්ඛවෙ බිදලමඤ්චකන්ති.”
10. තෙන ඛො පන සමයෙන සඞ්ඝස්ස සොසානිකො මසාරකො මඤ්චො උප්පන්නො හොති භගවතො එතමත්ථං ආරොචෙසුං.
“අනුජානාමි භික්ඛවෙ මසාරකං මඤ්චන්ති.”
මසාරකං පීඨං උප්පන්නං හොති. භගවතො එතමත්ථං ආරොචෙසුං.
“අනුජානාමි භික්ඛවෙ මසාරකං පීඨන්ති.”
තෙන ඛො පන සමයෙන සඞ්ඝස්ස සොසානිකො බුන්දිකාබද්ධො මඤ්චො උප්පන්නො හොති. භගවතො එතමත්ථං ආරොචෙසුං.
“අනුජානාමි භික්ඛවෙ බුන්දිකාබද්ධං මඤ්චන්ති.”
බුන්දිකාබද්ධං පීඨං උප්පන්නං හොති -පෙ-
“අනුජානාමි භික්ඛවෙ බුන්දිකාබද්ධං පීඨන්ති.”
තෙන ඛො පන සමයෙන සඞ්ඝස්ස සොසානිකො කුළීරපාදකො මඤ්චො උප්පන්නො හොති. භගවතො එතමත්ථං ආරොචෙසුං.
“අනුජානාමි භික්ඛවෙ කුළීරපාදකං මඤ්චන්ති.”
කුළීරපාදකං පීඨං උප්පන්නං හොති.
“අනුජානාමි භික්ඛවෙ කුළීරපාදකං පීඨන්ති.”
තෙන ඛො පන සමයෙන සඞ්ඝස්ස සොසානිකො ආහච්චපාදකො මඤ්චො උප්පන්නො හොති. භගවතො එතමත්ථං ආරොචෙසුං.
“අනුජානාමි භික්ඛවෙ ආහච්චපාදකං මඤ්චන්ති.”
ආහච්චපාදකං පීඨං උප්පන්නං හොති. භගවතො එතමත්ථං ආරොචෙසුං.
“අනුජානාමි භික්ඛවෙ ආහච්චපාදකං පීඨන්ති.”
11. තෙන ඛො පන සමයෙන සඞ්ඝස්ස ආසන්දිකො උප්පන්නො හොති. භගවතො එතමත්ථං ආරොචෙසුං.
“අනුජානාමි භික්ඛවෙ ආසන්දිකන්ති.”
උච්චකො ආසන්දිකො උප්පන්නො හොති. භගවතො එතමත්ථං ආරොචෙසුං.
“අනුජානාමි භික්ඛවෙ උච්චකම්පි ආසන්දිකන්තී.”
සත්තඞ්ගො උප්පන්නො හොති. භගවතො එතමත්ථං ආරොචෙසුං.
“අනුජානාමි භික්ඛවෙ සත්තඞ්ගන්ති.”
උච්චකො සත්තඞ්ගො උප්පන්නො හොති. භගවතො එතමත්ථං ආරොචෙසුං.
“අනුජානාමි භික්ඛවෙ උච්චකම්පි සත්තඞ්ගන්ති.”
භද්දපීඨං උප්පන්නං හොති. භගවතො එතමත්ථං ආරොචෙසුං.
“අනුජානාමි භික්ඛවෙ භද්දපීඨන්ති.”
පීඨිකා{1} උප්පන්නා හොති. භගවතො එතමත්ථං ආරොචෙසුං.
“අනුජානාමි භික්ඛවෙ පීඨිකන්ති.”
එලකපාදකං පීඨං උප්පන්නං හොති. භගවතො එතමත්ථං ආරොචෙසුං.
“අනුජානාමි භික්ඛවෙ එලකපාදකං පීඨන්ති.”
ආමලකවට්ටිකපීඨං{2} උප්පන්නං හොති. භගවතො එතමත්ථං ආරොචෙසුං.
“අනුජානාමි භික්ඛවෙ ආමලකවට්ටිකං පීඨන්ති.”
ඵලකං උප්පන්නං හොති. භගවතො එතමත්ථං ආරොචෙසුං.
“අනුජානාමි භික්ඛවෙ ඵලකන්ති.”
කොච්ඡං උප්පන්නං හොති. භගවතො එතමත්ථං ආරොචෙසුං.
“අනුජානාමි භික්ඛවෙ කොච්ඡන්ති.”
පලාලපීඨං උප්පන්නං හොති. භගවතො එතමත්ථං ආරොචෙසුං .
“අනුජානාමි භික්ඛවෙ පලාලපීඨන්ති.”
12. තෙන ඛො පන සමයෙන ඡබ්බග්ගියා භික්ඛූ උච්චෙ මඤ්චෙ සයන්ති. මනුස්සා විහාරචාරිකං ආහිණ්ඩන්තා පස්සිත්වා උජ්ඣායන්ති ඛීයන්ති විපාචෙන්ති ‘සෙය්යථාපි ගිහීකාමභොගිනො’ති. භගවතො එතමත්ථං ආරොචෙසුං.
“න භික්ඛවෙ උච්චෙ මඤ්චෙ සයිතබ්බං යො යෙය්ය, ආපත්ති දුක්කටස්සා”ති.
තෙන ඛො පන සමයෙන අඤ්ඤතරො භික්ඛු නීචෙ මඤ්චෙ සයන්තො අහිනා දට්ඨො හොති. භගවතො එතමත්ථං ආරොචෙසුං.
“අනුජානාමි භික්ඛවෙ මඤ්චපටිපාදකන්ති.”
තෙන ඛො පන සමයෙන ඡබ්බග්ගියා භික්ඛූ උච්චෙ මඤ්චපටිපාදකෙ ධාරෙන්ති. සහ මඤ්චපටිපාදකෙහි පලොඨෙන්ති{3} -පෙ-
“න භික්ඛවෙ උච්චා පටිපාදකා ධාරෙතබ්බා. යො ධාරෙය්ය ආපත්ති දුක්කටස්ස. අනුජානාමි භික්ඛවෙ අට්ඨඞ්ගුලපරමං මඤ්චපටිපාදකන්ති.”
13. තෙන ඛො පන සමයෙන සඞ්ඝස්ස සුත්තං උප්පන්නං හොති. භගවතො එතමත්ථං ආරොචෙසුං.
“අනුජානාමි භික්ඛවෙ මඤ්චං වෙතුන්ති.”
අඞ්ගානි බහුං සුත්තං පරියාදියන්ති -පෙ-
“අනුජානාමි භික්ඛවෙ අඞ්ගෙ විජ්ඣිත්වා අට්ඨපාදකං වෙතුන්ති.”
චොළකං උප්පන්නං හොති -පෙ-
“අනුජානාමි භික්ඛවෙ චිලිමිකා{1} කාතුන්ති.”
තූලිකා උප්පන්නා හොති -පෙ-
“අනුජානාමි භික්ඛවෙ විජටෙත්වා බිබ්බොහනං කාතුං. තීණි තූලානි රුක්ඛතූලං ලතාතූලං පොටකිතූලන්ති.”
තෙන ඛො පන සමයෙන ඡබ්බග්ගියා භික්ඛූ අඩ්ඪකායිකානි බිම්බොහනානි ධාරෙන්ති. මනුස්සා විහාරචාරිකං ආහිණ්ඩන්තා පස්සිත්වා උජ්ඣායන්ති ඛීයන්ති විපාචෙන්ති ‘සෙය්යථාපි ගිහී කාමභොගිනො’ති. භගවතො එතමත්ථං ආරොචෙසුං.
“න භික්ඛවෙ අඩ්ඪකායිකානි බිම්බොහනානි ධාරෙතබ්බානි. යො ධාරෙය්ය ආපත්ති දුක්කටස්ස. අනුජානාමි භික්ඛවෙ සීසප්පමාණං බිම්බොහනන්ති.”
14. තෙන ඛො පන සමයෙන රාජගහෙ ගිරග්ගසමජ්ජො හොති. මනුස්සා මහාමත්තානං අත්ථාය භිසියො පටියාදෙන්ති උණ්ණභිසිං චොළභිසිං වාකභිසිං තිණභිසිං පණ්ණභිසින්ති. තෙ වීතිවත්තෙ සමජ්ජෙ ඡවිං උප්පාටෙත්වා හරන්ති. අද්දසාසුං ඛො භික්ඛූ සමජ්ජට්ඨානෙ බහුං උණ්ණම්පි චොළකම්පි වාකම්පි තිණම්පි පණ්ණම්පි ඡඩ්ඩිතං. දිස්වාන භගවතො එතමත්ථං ආරොචෙසුං.
“අනුජානාමි භික්ඛවෙ පඤ්චභිසියො උණ්ණාභිසිං චොළභිසිං වාකභිසිං තිණභිසිං, පණ්ණභිසින්ති.”
තෙන ඛො පන සමයෙන සඞ්ඝස්ස සෙනාසනපරික්ඛාරිකං දුස්සං උප්පන්නං හොති. භගවතො එතමත්ථං ආරොචෙසුං.
“අනුජානාමි භික්ඛවෙ භිසිං ඔනන්ධිතුන්ති.”
තෙන ඛො පන සමයෙන භික්ඛූ මඤ්චභිසිං පීඨෙ සන්ථරන්ති, පීඨභිසිං මඤ්චෙ සන්ථරන්ති භිසියො පරිභිජ්ජන්ති. භගවතො එතමත්ථං ආරොචෙසුං.
“අනුජානාමි භික්ඛවෙ ඔනද්ධමඤ්චං ඔනද්ධපීඨන්ති.”
උල්ලොකං අකරිත්වා සන්ථරන්ති. හෙට්ඨතො නිප්ඵටන්ති -පෙ-
“අනුජානාමි භික්ඛවෙ උල්ලොකං කත්වා සන්ථරිත්වා භිසිං ඔනන්ධිතුන්ති.”
ඡවිං උප්පාටෙත්වා හරන්ති -පෙ-
“අනුජානාමි භික්ඛවෙ ඵොසෙතුන්ති.”
හරන්ති යෙව -පෙ-
“අනුජානාමි භික්ඛවෙ භත්තිකම්මන්ති.”
හරන්ති යෙව -පෙ-
“අනුජානාමි භික්ඛවෙ හත්ථභත්තින්ති.”
15. තෙන ඛො පන සමයෙන තිත්ථියානං සෙය්යා සෙතවණ්ණා හොන්ති කාළවණ්ණකතා භූමි ගෙරුකපරිකම්මකතා භිත්ති. බහූ මනුස්සා සෙය්යාපෙක්ඛකා ගච්ඡන්ති. භගවතො එතමත්ථං ආරොචෙසුං.
“අනුජානාමි භික්ඛවෙ විහාරෙ සෙතවණ්ණං කාළවණ්ණං ගෙරුකපරිකම්මන්ති.”
තෙන ඛො පන සමයෙන ඵරුසාය භිත්තියා සෙතවණ්ණො න නිපතති. භගවතො එතමත්ථං ආරොචෙසුං.
“අනුජානාමි භික්ඛවෙ ථුසපිණ්ඩං දත්වා පාණිකාය පටිබාහෙත්වා සෙතවණ්ණං නිපාතෙතුන්ති.”
සෙතවණ්ණො අනිබන්ධනීයො හොති. භගවතො එතමත්ථං ආරොචෙසුං.
“අනුජානාමි භික්ඛවෙ සණ්හමත්තිකං දත්වා පාණිකාය පටිබාහෙත්වා සෙතවණ්ණං නිපාතෙතුන්ති.”
සෙතවණ්ණො අනිබන්ධනියො හොති -පෙ-
“අනුජානාමි භික්ඛවෙ ඉක්කාසං පිට්ඨමද්දන්ති.”
තෙන ඛො පන සමයෙන ඵරුසාය භිත්තියා ගෙරුකා න නිපතති. භගවතො එතමත්ථං ආරොචෙසුං.
“අනුජානාමි භික්ඛවෙ ථුසපිණ්ඩං දත්වා පාණිකාය පටිබාහෙත්වා ගෙරුකං නිපාතෙතුන්ති.”