“අනුජානාමි භික්ඛවෙ, කවාටං පිට්ඨිසඞ්ඝාටං{2} උදුක්ඛලිකං උත්තරපාසකං අග්ගලවට්ටිං කපිසීසකං සූචිකං ඝටිකං තාළච්ඡිද්දං ආවිඤ්ඡනච්ඡිද්දං ආවිඤ්ඡනරජ්ජුන්ති”.
කොට්ඨකෙ තිණචුණ්ණං පරිපතති.
“අනුජානාමි භික්ඛවෙ, ඔගුම්බෙත්වා උල්ලිත්තාවලිත්තං කාතුං: සෙතවණ්ණං කාළවණ්ණං ගෙරුකපරිකම්මං මාලාකම්මං ලතාකම්මං මකරදන්තකං පඤ්චපටිකන්ති.
පරිවෙණං චික්ඛල්ලං හොති.
“අනුජානාමි භික්ඛවෙ, මරුම්බං උපකිරිතුන්ති”.
න පරියාපුණන්ති.
“අනුජානාමි භික්ඛවෙ, පදරසිලං නික්ඛිපිතුන්ති”.
උදකං සන්තිට්ඨති.
“අනුජානාමි භික්ඛවෙ, උදකනිද්ධමනන්ති”.
ආචමනකුම්භී න හොති.
“අනුජානාමි භික්ඛවෙ, ආචමනකුම්භින්ති”.
ආචමනසරාවකො න හොති. “අනුජානාමි භික්ඛවෙ, ආචමනසරාවකන්ති”.
දුක්ඛං නිසින්නා ආචමෙන්ති.
“අනුජානාමි භික්ඛවෙ, ආචමනපාදුකන්ති”.
ආචමනපාදුකා පාකටා හොන්ති. භික්ඛූ හිරීයන්ති ආචමෙතුං.
“අනුජානාමි භික්ඛවෙ පරික්ඛිපිතුං තයො පාකාරෙ: ඉට්ඨකාපාකාරං සිලාපාකාරං දාරුපාකාරන්ති”.
ආචමනකුම්භී අපාරුතා හොති. තිණචුණ්ණෙහි පි පංසුකෙහි පි ඔකිරීයති.
“අනුජානාමි භික්ඛවෙ අපිධානන්ති”.
147. තෙන ඛො පන සමයෙන ඡබ්බග්ගියා භික්ඛූ එවරූපං අනාචාරං ආචරන්ති: මාලාවච්ඡං රොපෙන්තිපි රොපාපෙන්තිපි, සිඤ්චන්තිපි සිඤ්චාපෙන්තිපි, ඔචිනන්තිපි ඔචිනාපෙන්තිපි, ගන්ථෙන්තිපි ගන්ථාපෙන්තිපි, එකතො වණ්ටිකමාලං කරොන්තිපි කාරාපෙන්තිපි, උභතොවණ්ටිකමාලං කරොන්තිපි කාරාපෙන්තිපි, මඤ්ජරිකං කරොන්තිපි කාරාපෙන්තිපි, විධූතිකං කරොන්තිපි කාරාපෙන්තිපි, වටංසකං කරොන්තිපි කාරාපෙන්තිපි, ආවෙළකං කරොන්තිපි කාරාපෙන්තිපි, උරච්ඡදං කරොන්තිපි කාරාපෙන්තිපි.
තෙ කුලිත්ථීනං කුලධීතානං කුලකුමාරීනං කුලසුණ්හානං කුලදාසීනං එකතො වණ්ටිකමාලං හරන්තිපි හරාපෙන්තිපි, උභතො වණ්ටිකමාලං හරන්තිපි හරාපෙන්තිපි, මඤ්ජරිකං හරන්තිපි හරාපෙන්තිපි, විධූතිකං හරන්තිපි හරාපෙන්තිපි, වටංසකං හරන්තිපි හරාපෙන්තිපි, ආවෙළකං හරන්තිපි හරාපෙන්තිපි, උරච්ඡදං හරන්තිපි හරාපෙන්තිපි.
තෙ කුලිත්ථීහි කුලධීතාහි කුලකුමාරීහි කුලසුණ්හාහි කුලදාසීහි සද්ධිං එකභාජනෙපි භුඤ්ජන්ති, එකථාලකෙපි පිවන්ති, එකාසනෙපි නිසීදන්ති, එකමඤ්චෙපි තුවට්ටෙන්ති, එකත්ථරණාපි තුවට්ටෙන්ති, එකපාවුරණාපි තුවට්ටෙන්ති, එකත්ථරණපාවුරණාපි තුවට්ටෙන්ති, විකාලෙපි භුඤ්ජන්ති, මජ්ජම්පි පිවන්ති, මාලාගන්ධවිලෙපනම්පි ධාරෙන්ති, නච්චන්තිපි, ගායන්තිපි, වාදෙන්තිපි, ලාසෙන්තිපි, නච්චන්තියාපි නච්චන්ති, නච්චන්තියාපි ගායන්ති, නච්චන්තියාපි වාදෙන්ති, නච්චන්තියාපි ලාසෙන්ති ගායන්තියාපි නච්චන්ති.... ගායන්ති ... ලාසෙන්ති වාදෙන්තියාපි නච්චන්ති ... ගායන්ති ... වාදෙන්ති ... ලාසෙන්ති, ලාසෙන්තියාපි නච්චන්ති, ලාසෙන්තියාපි ගායන්ති, ලාසෙන්තියාපි වාදෙන්ති, ලාසෙන්තියාපි ලාසෙන්ති. අට්ඨපදෙපි කීළන්ති, දසපදෙපි කීළන්ති, ආකාසෙපි කීළන්ති, පරිහාරපථෙපි කීළන්ති,
සන්තිකායපි කීළන්ති, ඛලිකායපි කීළන්ති, ඝටිකායපි කීළන්ති, සලාකහත්ථෙනපි කීළන්ති, අක්ඛෙනපි කීළන්ති, පඞ්ගචීරෙනපි කීළන්ති, වඞ්කකෙනපි කීළන්ති, මොක්ඛචිකායපි කීළන්ති, චිඞ්ගුලකෙනපි කීළන්ති, පත්තාළ්හකෙනපි කීළන්ති, රථකෙනපි කීළන්ති, ධනුකෙනපි කීළන්ති, අක්ඛරිකායපි කීළන්ති, මනෙසිකායපි කීළන්ති, යථාවජ්ජෙනපි කීළන්ති, හත්ථිස්මිම්පි සික්ඛන්ති, අස්සස්මිම්පි සික්ඛන්ති, රථස්මිම්පි සික්ඛන්ති, ධනුස්මිම්පි සික්ඛන්ති, ථරුස්මිම්පි සික්ඛන්ති, හත්ථිස්සපි පුරතො ධාවන්ති, අස්සස්සපි පුරතො ධාවන්ති, රථස්සපි පුරතො ධාවන්ති. ධාවන්තිපි ආධාවන්තිපි, උස්සොළෙහන්තිපි{1}, අප්පොඨෙන්තිපි, නිබ්බුජ්ඣන්තිපි, මුට්ඨීහිපි යුජ්ඣන්ති, රඞ්ගමජ්ඣෙපි සඞ්ඝාටිං පත්ථරිත්වා නච්චන්තිං{2} එවං වදෙන්ති ‘ඉධ භගිනි නච්චස්සූ’ති නලාටිකම්පි දෙන්ති, විවිධම්පි අනාචාරං ආචරන්ති. භගවතො එතමත්ථං ආරොචෙසුං -පෙ- “න භික්ඛවෙ විවිධං අනාචාරං ආචරිතබ්බං. යො ආචරෙය්ය යථාධම්මො කාරෙතබ්බො”ති.
148. තෙන ඛො පන සමයෙන ආයස්මන්තෙ උරුවෙලකස්සපෙ පබ්බජිතෙ සඞ්ඝස්ස බහුං ලොහභණ්ඩං දාරුභණ්ඩං මත්තිකාභණ්ඩං උප්පන්නං හොති. අථ ඛො භික්ඛූනං එතදහොසි “කින්නු ඛො භගවතා ලොහභණ්ඩං අනුඤ්ඤාතං කිං අනනුඤ්ඤාතං, කිං දාරුභණ්ඩං අනුඤ්ඤාතං, කිං අනනුඤ්ඤාතං, කිං මත්තිකාභණ්ඩං අනුඤ්ඤාතං, කිං අනනුඤ්ඤාතන්ති”.
භගවතො එතමත්ථං ආරොචෙසුං. අථ ඛො භගවා එතස්මිං නිදානෙ එතස්මිං පකරණෙ ධම්මිං කථං කත්වා භික්ඛූ ආමන්තෙසි.
“අනුජානාමි භික්ඛවෙ ඨපෙත්වා පහරණිං සබ්බං ලොහභණ්ඩං, ඨපෙත්වා ආසන්දිං පල්ලඞ්කං දාරුපත්තං දාරුපාදුකං සබ්බං දාරුභණ්ඩං, ඨපෙත්වා කතකං ච කුම්භකාරිකඤ්ච සබ්බං මත්තිකාභණ්ඩන්ති”.
ඛුද්දක වත්ථුක්ඛන්ධකං පඤ්චමං{3}.
තස්සුද්දානං:
1. රුක්ඛෙ ථම්භෙ ච කුඩ්ඩෙ ච අට්ඨානෙ ගන්ධසුත්තියා විග්ගය්හ මල්ලකො කච්ඡු ජරා ච පුථුපාණිකා.
2. වල්ලිකාපි ච පාමඞ්ගං කණ්ඨසුත්තං න ධාරයෙ කටි ඔවට්ටි කෙයූරං හත්ථාභරණ මුද්දිකා.
3. දීඝෙ කොච්ඡෙ ඵණෙ හත්ථෙ සිත්ථා උදකතෙලකෙ ආදාසුද පත්තවණා ආලෙප මද්ද චුණ්ණනා
4. ලඤ්ඡෙන්ති අඞ්ගරාගඤ්ච මුඛරාගං තදූභයං චක්ඛුරොගං ගිරග්ගඤ්ච ආයතං සරබාහිරං.
5. අම්බපෙසි සකලෙහි අහි ඡින්දි ච චන්දනං උච්චාවචා පත්තමූලං සුවණ්ණො බහලා වලී
6. චිත්රා දුස්සති දුග්ගන්ධො උණ්හෙ භිජ්ජිංසු මිඩ්ඪියා පරිභණ්ඩං තිණං චොළං මාලං කුණ්ඩොලිකාය ච. ථවිකඤ්ච අංසබන්ධකං, තථා බන්ධනසුත්තකා
7. ඛිලෙ මඤ්චෙ ච පීඨෙ ච අංකෙ ඡත්තෙ පණාමනා තුම්බඝටී ඡවසීසං චලකානි පටිග්ගහො.
8. විප්ඵාලි දණ්ඩ සොවණ්ණං පත්තෙ පෙසි ච නාළිකා කිණ්ණං සත්තු සරිතඤ්ච මධුසිත්ථං සිපාටිකං.
9. විකණ්ණං බන්ධි විසමං ඡමා ජිර පහොති ච කළිම්බං මොඝසුත්තඤ්ච අධොතල්ලං උපාහනා
10. අඞ්ගුලී පටිග්ගහඤ්ච විත්ථකං අංසබන්ධකා අජ්ඣොකාසෙ නීචවත්ථු චයො චාපි විහඤ්ඤරෙ.
11. පරිපතති තිණචුණ්ණං උල්ලිත්තාවලිත්තකං සෙතං කාළකවණ්ණඤ්ච පරිකම්මඤ්ච ගෙරුකං
12. මාලාකම්මං ලතාකම්මං මකරදන්තක පට්ටිකා චීවරවංසං රජ්ජුඤ්ච අනුඤ්ඤාසි විනායකො
13. උජ්ඣිත්වා පක්කමන්ති ඛජ්ජති පරිභිජ්ජති. විනිවෙඨියති කුඩ්ඩෙපි පත්තෙනාදාය ගච්ඡරෙ
14. ථවිකා බන්ධසුත්තඤ්ච බන්ධිත්වා ච උපාහනා උපාහනත්ථවිකඤ්ච අංසබන්ධන සුත්තකං
15. උදකාකප්පියං මග්ගෙ පරිස්සාවනචොළකං ධම්මකරකං ද්වෙ භික්ඛූ වෙසාලිං අගමා මුනි
16. දණ්ඩං ඔත්ථරකං තත්ථ අනුඤ්ඤාසි පරිස්සාවනං මකසෙහි පණීතෙන බහ්වාබාධා ච ජීවකො
17. චඞ්කමනං ජන්තාඝරං විසමෙ නීචවත්ථුකො තයො චයෙ විහඤ්ඤන්ති සොපාණාලම්බ වෙදිකං
18. අජ්ඣොකාසෙ තිණචුණ්ණං උල්ලිත්තාවලිත්තකං සෙතකං කාළවණ්ණඤ්ච පරිකම්මඤ්ච ගෙරුකං
19. මාලාකම්මං ලතාකම්මං මකරදන්තකපට්ටිකං වංසං චීවරරජ්ජුඤ්ච උච්චං ච වත්ථුකං කරෙ
20. තයො සොපාණ බාහඤ්ච කවාටං පිට්ඨිසඞ්ඝාටං උදුක්ඛලුත්තරපාසකං වට්ටිඤ්ච කපිසීසකං
21. සූචි ඝටි තාලච්ඡිද්දං ආවිඤ්ඡනඤ්ච රජ්ජුකං. මණ්ඩලං ධූමනෙත්තඤ්ච මජ්ඣෙ ච මුඛමත්තිකං
22. මත්තිකාදොණි දුග්ගන්ධො ඩහතී උදකාධානං සරාවකං ච සෙදෙති චික්ඛල්ලං ධොවි නිද්ධමනං
23. පීඨඤ්ච කොට්ඨකෙ කම්මං මරුම්බාසිලා නිද්ධමනං නග්ගා ඡමායං වස්සන්තෙ පටිච්ඡාදී තයො තහිං
24. උදපානං ලුජ්ජති ච වල්ලියා කායබන්ධනං තූලං කරකටං චක්කං බහූ භිජ්ජන්ති භාජනා
25. ලොහදාරු චම්මඛණ්ඩං සාලා තිණං පිධානි ච දොණිං චන්දනි පාකාරං චික්ඛල්ලං නිද්ධමනෙන ච
26. සීතිගතං පොක්ඛරණිං පුරාණඤ්ච නිල්ලෙඛනං. චාතුමාසං සයන්ති ච නමතකඤ්ච නධිට්ඨහෙ
27. ආසිත්තකං මළොරිකං භුඤ්ජන්තෙකං තුවට්ටිසුං වඩ්ඪො බොධි න අක්කමි ඝටං කතකං සම්මජ්ජනි
28. සක්ඛරං කඨලඤ්චෙව ඵෙණකං පාදඝංසනිං විධූපනං තාලවණ්ටං මකසං චාපි චාමරී
29. ඡත්තං විනා ච ආරාමෙ තයො සික්කාය සම්මති රොම සිත්ථා නඛා දීඝා ඡින්දන්තඞ්ගුලිකා දුක්ඛා
30. සලොහිතං පමාණඤ්ච වීසති දීඝකෙසතා ඛුරං සීලං සිපාටිකං නමතකං ඛුරභණ්ඩකං
31. මස්සුං කප්පෙන්ති වඩ්ඪෙන්ති ගොලොමි චතුරස්සකං පරිමුඛං අඩ්ඪුරකඤ්ච දාඨි සම්බාධසංහරෙ
32. ආබාධා කත්තරි වණො දීඝං සක්ඛරිකාය පලිතං ථකිතං උච්චා ලොහභණ්ඩඤ්ජනී චයා;
33. පල්ලත්ථිකං ච ආයොගො වටං සලාකබන්ධනං කලාබුකං දෙඩ්ඩුභකං මුරජං මද්දවීණකං
34. පට්ටිකං සූකරන්තඤ්ච දසා මුරජ වෙණිතා අන්තො සොභං ගණකඤ්චෙව පවනන්තොපි ජීරති.
35. වීඨෙ ගණ්ඨි ච පාසකං{1} ඵලකන්තෙ ච ඔගහෙ ගිහීනිවත්ථං හත්ථිසොණ්ඩං මච්ඡකං චතුකණ්ණකං.
36. තාලවණ්ටං සතවල්ලිං සාවෙල්ලිං ගිහිපාරුතං උභතොකාජං{1} න හරෙය්ය දන්තකට්ඨං ආකොටනං.
37. කණ්ඨෙ විලග්ගං දායඤ්ච පටග්ගි රුක්ඛ හත්ථිනා යමෙළු ලොකායතකං පරියාපුණිංසු වාචයුං.
38. තිරච්ඡවිජ්ජා වාචනා{2} ඛිපි මඞ්ගල ලසුණං ච{3} වාතාබාධො දුස්සති ච දුග්ගන්ධො දුක්ඛපාදුකා.
39. හිරීයන්ති අපාරු{4} දුග්ගන්ධො තහං තහං කරොන්ති ච දුග්ගන්ධො කූපං ලුජ්ජති උච්චවත්ථු චයෙපි{5} ච.
40. සොපාණාලම්බණ බාහා අන්තෙ දුක්ඛඤ්ච පාදුකා බහිද්ධා දොණි කට්ඨඤ්ච පිඨරො ච අපාරුතො
41. වච්චකුටී කවාටඤ්ච පිට්ඨසඞ්ඝාටමෙව ච උදුක්ඛලුත්තරපාසො වට්ටිං ච කපිසීසකං.
42. සූචි ඝටි තාලච්ඡිද්දං ආවිඤ්ඡනච්ඡිද්දමෙව ච රජ්ජු උල්ලිත්තාවලිත්තං සෙතවණ්ණඤ්ච කාළකං.
43. මාලාකම්මං ලතාකම්මං මකරං පඤ්චපට්ටිකං චීවරවංසං රජ්ජුං ච ජරා දුබ්බල පාකාරං.
44. පරිවෙණෙ චාපි{6} තත්ථෙව මරුම්බං පදරසිලා සන්තිට්ඨති නිද්ධමනං කුම්භිඤ්චාපි සරාවකං.
45. දුක්ඛං හිරි අපිධානං අනාචාරඤ්ච ආචරුං ලොහභණ්ඩං අනුඤ්ඤාසි ඨපයිත්වා පහරණිං.
46. ඨපයිත්වා සන්දිපල්ලඞ්කං දාරුපත්තඤ්ච පාදුකං සබ්බං දාරුමයං භණ්ඩං අනුඤ්ඤාසි මහාමුනි
47. කතකං කුම්භකාරඤ්ච ඨපයිත්වා තථාගතො සබ්බම්පි මත්තිකාභණ්ඩං අනුඤ්ඤාසි අනුකම්පකො
48. යස්ස වත්ථුස්ස නිද්දෙසො පුරිමෙන සමම්පි ච තංපි සංඛිත්තමුද්දානෙ නයතො තං විජානියා.
49. එවං දසසතා වත්ථූ විනයෙ ඛුද්දකවත්ථුකෙ සද්ධම්මට්ඨිතියා චෙව පෙසලානං චනුග්ගහො
50. සුසික්ඛිතො විනයධරො හිතචිත්තො සුපෙසලො පදීපකරණො{1} ධීරො පූජාරහො බහුස්සුතොති.
උද්දානං නිට්ඨිතං.
6.
සෙනාසනක්ඛන්ධකං
1. තෙන සමයෙන බුද්ධො භගවා රාජගහෙ විහරති වෙළුවනෙ කලන්දකනිවාපෙ. තෙන ඛො පන සමයෙන භගවතා භික්ඛූනං සෙනාසනං අපඤ්ඤත්තං හොති. තෙ ච{1} භික්ඛූ තහං තහං{2} විහරන්ති අරඤ්ඤෙ රුක්ඛමූලෙ පබ්බතෙ කන්දරායං ගිරිගුහායං{3} සුසානෙ වනපත්ථෙ, අජ්ඣොකාසෙ පලාලපුඤ්ජෙ. තෙ කාලස්සෙව තතො තතො උපනික්ඛමන්ති අරඤ්ඤා රුක්ඛමූලා පබ්බතා කන්දරා ගිරිගුහා සුසානා වනපත්ථා අජ්ඣොකාසා පලාලපුඤ්ජා, පාසාදිකෙන අභික්කන්තෙන පටික්කන්තෙන ආලොකිතෙන විලොකිතෙන සම්මිඤ්ජිතෙන පසාරිතෙන ඔක්ඛිත්තචක්ඛූඉරියාපථසම්පන්නා.
2. තෙන ඛො පන සමයෙන රාජගහකො සෙට්ඨී කාලස්සෙව උය්යානං අගමාසි. අද්දසා ඛො රාජගහකො සෙට්ඨී තෙ භික්ඛූ කාලස්සෙව තතො තතො උපනික්ඛමන්තෙ අරඤ්ඤා රුක්ඛමූලා පබ්බතා කන්දරා ගිරිගුහා සුසානා වනපත්ථා අජ්ඣොකාසා පලාලපුඤ්ජා, පාසාදිකෙන අභික්කන්තෙන පටික්කන්තෙන ආලොකිතෙන විලොකිතෙන සම්මිඤ්ජිතෙන පසාරිතෙන ඔක්ඛිත්තචක්ඛූ ඉරියාපථසම්පන්නෙ. දිස්වානස්ස චිත්තං පසීදි. අථ ඛො රාජගහකො සෙට්ඨී යෙන තෙ භික්ඛූ තෙනුපසඞ්කමි. උපසඞ්කමිත්වා තෙ භික්ඛූ එතදවොච: “සචාහං භන්තෙ විහාරෙ කාරාපෙය්යං වසෙය්යාථ මෙ විහාරෙසූති”.
3. ‘න ඛො ගහපති භගවතා විහාරා අනුඤ්ඤාතා’ති. ‘තෙන හි භන්තෙ භගවන්තං පටිපුච්ඡිත්වා මම ආරොචෙය්යාථා’ති.
‘එවං ගහපතී’ති ඛො තෙ භික්ඛූ රාජගහකස්ස සෙට්ඨිස්ස පටිස්සුත්වා යෙන භගවා තෙනුපසඞ්කමිංසු. උපසඞ්කමිත්වා භගවන්තං අභිවාදෙත්වා එකමන්තං නිසීදිංසු. එකමන්තං නිසින්නා ඛො තෙ භික්ඛූ භගවන්තං එතදවොචුං: ‘රාජගහකො භන්තෙ සෙට්ඨී විහාරෙ කාරෙතුකාමො{4} කථන්නු ඛො භන්තෙ පටිපජ්ජිතබ්බන්ති’. අථ ඛො භගවා එතස්මිං නිදානෙ එතස්මිං පකරණෙ ධම්මිං කථං කත්වා භික්ඛූ ආමන්තෙසි: “අනුජානාමි භික්ඛවෙ පඤ්ච ලෙනානි විහාරං අඩ්ඪයොගං පාසාදං හම්මියං ගුහාති.”
අථ ඛො තෙ භික්ඛූ යෙන රාජගහකො සෙට්ඨී තෙනුපසඞ්කමිංසු. උපසඞ්කමිත්වා රාජගහකං සෙට්ඨිං එතදවොචුං: “අනුඤ්ඤාතා ඛො ගහපති භගවතා විහාරා යස්ස’දානි කාලං මඤ්ඤසී”ති. අථ ඛො රාජගහකො සෙට්ඨී එකාහෙනෙව සට්ඨි විහාරෙ පතිට්ඨාපෙසි.
4. අථ ඛො රාජගහකො සෙට්ඨී තෙ සට්ඨි විහාරෙ පරියොසාපෙත්වා යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං නිසීදි. එකමන්තං නිසින්නො ඛො රාජගහකො සෙට්ඨී භගවන්තං එතදවොච: “අධිවාසෙතු මෙ භන්තෙ භගවා ස්වාතනාය භත්තං සද්ධිං භික්ඛුසඞ්ඝෙනා”ති. අධිවාසෙසි භගවා තුණ්හීභාවෙන. අථ ඛො රාජගහකො සෙට්ඨී භගවතො අධිවාසනං විදිත්වා උට්ඨායාසනා භගවන්තං අභිවාදෙත්වා පදක්ඛිණං කත්වා පක්කාමි.
අථ ඛො රාජගහකො සෙට්ඨී තස්සා රත්තියා අච්චයෙන පණීතං ඛාදනීයං භොජනීයං පටියාදාපෙත්වා භගවතො කාලං ආරොචාපෙසි ‘කාලො භන්තෙ නිට්ඨිතං භත්තන්ති’. අථ ඛො භගවා පුබ්බන්හසමයං නිවාසෙත්වා පත්තචීවරමාදාය යෙන රාජගහකස්ස සෙට්ඨිස්ස නිවෙසනං තෙනුපසඞ්කමි. උපසඞ්කමිත්වා පඤ්ඤත්තෙ ආසනෙ නිසීදි සද්ධිං භික්ඛුසඞ්ඝෙන. අථ ඛො රාජගහකො සෙට්ඨී බුද්ධපමුඛං භික්ඛුසඞ්ඝං පණීතෙන ඛාදනීයෙන භොජනීයෙන සහත්ථා සන්තප්පෙත්වා සම්පවාරෙත්වා භගවන්තං භුත්තාවිං ඔනීතපත්තපාණිං එකමන්තං නිසීදි. එකමන්තං නිසින්නො ඛො රාජගහකො සෙට්ඨී භගවන්තං එතදවොච: “එතෙ මෙ භන්තෙ සට්ඨිවිහාරා පුඤ්ඤත්ථිකෙන සග්ගත්ථිකෙන කාරාපිතා, කථාහං භන්තෙ තෙසු විහාරෙසු පටිපජ්ජාමී”ති.
“තෙන හි ත්වං ගහපති තෙ සට්ඨි විහාරෙ ආගතානාගතස්ස චාතුද්දිසස්ස සඞ්ඝස්ස පතිට්ඨාපෙහී”ති.
“එවං භන්තෙ”ති ඛො රාජගහකො සෙට්ඨී භගවතො පටිස්සුත්වා තෙ සට්ඨි විහාරෙ ආගතානාගතස්ස චාතුද්දිසස්ස සඞ්ඝස්ස පතිට්ඨාපෙසි.
5. අථ ඛො භගවා රාජගහකං සෙට්ඨිං ඉමාහි ගාථාහි අනුමොදි:
සීතං උණ්හං පටිහන්ති තතො වාලමීගානි ච සිරිංසපෙ{1} ච මකසෙ සිසිරෙ චාපි වුට්ඨියො.
තතො වාතාතපො ඝොරෙ සඤ්ජාතො පටිහඤ්ඤති ලෙනත්ථඤ්ච සුඛත්ථඤ්ච ඣායිතුං ච විපස්සිතුං.
විහාරදානං සඞ්ඝස්ස අග්ගං බුද්ධෙන වණ්ණිතං තස්මා හි පණ්ඩිතො පොසො සම්පස්සං අත්ථමත්තනො
විහාරෙ කාරයෙ රම්මෙ වාසයෙත්ථ බහුස්සුතෙ තෙසං අන්නඤ්ච පානඤ්ච වත්ථසෙනාසනානි ච
දදෙය්ය උජුභූතෙසු විප්පසන්නෙන චෙතසා තෙ තස්ස ධම්මං දෙසෙන්ති සබ්බදුක්ඛාපනූදනං යං සො ධම්මං ඉධඤ්ඤාය පරිනිබ්බාති අනාසවො ති.
අථ ඛො භගවා රාජගහකං සෙට්ඨිං ඉමාහි ගාථාහි අනුමොදිත්වා උට්ඨායාසනා පක්කාමි.
6. අස්සොසුං ඛො මනුස්සා “භගවතා කිර විහාරා අනුඤ්ඤාතා”ති සක්කච්චං විහාරෙ කාරාපෙන්ති. තෙ විහාරා අකවාටකා හොන්ති. අහීපි විච්ඡිකාපි සතපදියොපි පවිසන්ති. භගවතො එතමත්ථං ආරොචෙසුං.
“අනුජානාමි භික්ඛවෙ කවාටන්ති.”
භිත්තිච්ඡිද්දං කරිත්වා වල්ලියා පි රජ්ජුයා පි කවාටං බන්ධන්ති. උන්දූරෙහිපි උපචිකාහිපි ඛජ්ජන්ති. ඛයිතබන්ධනානි කවාටානි පතන්ති{1}. භගවතො එතමත්ථං ආරොචෙසුං.
“අනුජානාමි භික්ඛවෙ පිට්ඨිසඞ්ඝාටං උදුක්ඛලිකං උත්තරපාසකන්ති.”