129. තෙන ඛො පන සමයෙන ඡබ්බග්ගියා භික්ඛූ උච්චාවචෙ විධෙ ධාරෙන්ති සොවණ්ණමයං රූපියමයං. මනුස්සා උජ්ඣායන්ති ඛීයන්ති විපාචෙන්ති: ‘සෙය්යථාපි ගිහී කාමභොගිනො’ති. භගවතො එතමත්ථං ආරොචෙසුං.
“න භික්ඛවෙ උච්චාවචා වීඨා ධාරෙතබ්බා. යො ධාරෙය්ය ආපත්ති දුක්කටස්ස. අනුජානාමි භික්ඛවෙ අට්ඨිමයං දන්තමයං විසාණමයං නළමයං වෙළුමයං කට්ඨමයං ජතුමයං ඵලමයං ලොහමයං සඞ්ඛනාභිමයං සුත්තමයන්ති.”
130. තෙන ඛො පන සමයෙන ආයස්මා ආනන්දො ලහුකා සඞ්ඝාටියො පාරුපිත්වා ගාමං පිණ්ඩාය පාවිසි. වාතමණ්ඩලිකාය සඞ්ඝාටියො උක්ඛීපියිංසු{1}. අථ ඛො ආයස්මා ආනන්දො ආරාමං ගන්ත්වා භික්ඛූනං එතමත්ථං ආරොචෙසි. භික්ඛූ භගවතො එතමත්ථං ආරොචෙසුං.
“අනුජානාමි භික්ඛවෙ ගණ්ඨිකං පාසකන්ති.”
තෙන ඛො පන සමයෙන ඡබ්බග්ගියා භික්ඛූ උච්චාවචා ගණ්ඨිකායො ධාරෙන්ති සොවණ්ණමයං රූපියමයං. මනුස්සා උජ්ඣායන්ති ඛීයන්ති විපාචෙන්ති: ‘සෙය්යථාපි ගිහී කාමභොගිනො’ති. භගවතො එතමත්ථං ආරොචෙසුං.
“න භික්ඛවෙ උච්චාවචා ගණ්ඨිකා ධාරෙතබ්බා. යො ධාරෙය්ය ආපත්ති දුක්කටස්ස. අනුජානාමි භික්ඛවෙ, අට්ඨිමයං දන්තමයං විසාණමයං නළමයං වෙළුමයං කට්ඨමයං ජතුමයං ඵලමයං ලොහමයං සඞ්ඛනාභිමයං සුත්තමයන්ති.”
131. තෙන ඛො පන සමයෙන භික්ඛූ ගණ්ඨිකම්පි පාසකම්පි චීවරෙ අප්පෙන්ති. චීවරං ජීරති. භගවතො එතමත්ථං ආරොචෙසුං.
“අනුජානාමි භික්ඛවෙ ගණ්ඨිකඵලකං පාසකඵලකන්ති.”
ගණ්ඨිකඵලකම්පි පාසකඵලකම්පි අන්තෙ අප්පෙන්ති. කොණො විවරීයති. භගවතො එතමත්ථං ආරොචෙසුං.
“අනුජානාමි භික්ඛවෙ ගණ්ඨිකඵලකං අන්තෙ අප්පෙතුං පාසකඵලකං සත්තඞ්ගුලං වා අට්ඨඞ්ගුලං වා ඔගාහෙත්වා අප්පෙතුන්ති.”
132. තෙන ඛො පන සමයෙන ඡබ්බග්ගියා භික්ඛූ ගිහීනිවත්ථං නිවාසෙන්ති: හත්ථිසොණ්ඩකං මච්ඡාවාළකං චතුකණ්ණකං තාලවණ්ටකං සතවලිකං. මනුස්සා උජ්ඣායන්ති ඛීයන්ති විපාචෙන්ති: ‘සෙය්යථාපි ගිහී කාමභොගිනො’ති. භගවතො එතමත්ථං ආරොචෙසුං.
“න භික්ඛවෙ ගිහීනිවත්ථං නිවාසෙතබ්බං: හත්ථිසොණ්ඩකං මච්ඡවාළකං චතුකණ්ණකං තාලවණ්ටකං සතවලිකං. යො නිවාසෙය්ය ආපත්ති දුක්කටස්සා”ති.
133. තෙන ඛො පන සමයෙන ඡබ්බග්ගියා භික්ඛූ සංවෙල්ලියං නිවාසෙන්ති. මනුස්සා උජ්ඣායන්ති ඛීයන්ති විපාචෙන්ති: ‘සෙය්යථාපි රඤ්ඤො මුණ්ඩවට්ටී’ති. භගවතො එතමත්ථං ආරොචෙසුං.
“න භික්ඛවෙ, සංවෙල්ලියං නිවාසෙතබ්බං. යො නිවාසෙය්ය, ආපත්ති දුක්කටස්සා”ති.
තෙන ඛො පන සමයෙන ඡබ්බග්ගියා භික්ඛූ ගිහීපාරුතං පාරුපන්ති. මනුස්සා උජ්ඣායන්ති ඛීයන්ති විපාචෙන්ති: ‘සෙය්යථාපි ගිහී කාමභොගිනො’ති. භගවතො එතමත්ථං ආරොචෙසුං.
“න භික්ඛවෙ ගිහීපාරුතං පාරුපිතබ්බං. යො පාරුපෙය්ය ආපත්ති දුක්කටස්සා”ති.
134. තෙන ඛො පන සමයෙන ඡබ්බග්ගියා භික්ඛූ උභතොකාජං හරන්ති. මනුස්සා උජ්ඣායන්ති ඛීයන්ති විපාචෙන්ති: ‘සෙය්යථාපි රඤ්ඤො මුණ්ඩවට්ටීති. භගවතො එතමත්ථං ආරොචෙසුං.
“න භික්ඛවෙ උභතොකාජං හරිතබ්බං. යො හරෙය්ය ආපත්ති දුක්කටස්ස. අනුජානාමි භික්ඛවෙ එකතො කාජං අන්තරාකාජං සීසභාරං ඛන්ධභාරං කටිභාරං ඔලම්බකන්ති.”
135. තෙන ඛො පන සමයෙන භික්ඛූ දන්තකට්ඨං න ඛාදන්ති. මුඛං දුග්ගන්ධං හොති. භගවතො එතමත්ථං ආරොචෙසුං.
“පඤ්චිමෙ භික්ඛවෙ, ආදීනවා දන්තකට්ඨස්ස අඛාදනෙ: අචක්ඛුස්සං, මුඛං දුග්ගන්ධං හොති, රසහරණියො න විසුජ්ඣන්ති, පිත්තං සෙම්හං භත්තං පරියොනන්ධති, භත්තමස්ස නච්ඡාදෙති. ඉමෙ ඛො භික්ඛවෙ පඤ්ච ආදීනවා දන්තකට්ඨස්ස අඛාදනෙ.
“පඤ්චිමෙ භික්ඛවෙ ආනිසංසා දන්තකට්ඨස්ස ඛාදනෙ: චක්ඛුස්සං, මුඛං න දුග්ගන්ධං හොති, රසහරණියො විසුජ්ඣන්ති, පිත්තං සෙම්හං භත්තං න පරියොනන්ධති, භත්තමස්ස ඡාදෙති. ඉමෙ ඛො භික්ඛවෙ පඤ්ච ආනිසංසා දන්තකට්ඨස්ස ඛාදනෙ. අනුජානාමි භික්ඛවෙ දන්තකට්ඨන්ති.”
136. තෙන ඛො පන සමයෙන ඡබ්බග්ගියා භික්ඛූ දීඝානි දන්තකට්ඨානි ඛාදන්ති. තෙහෙව සාමණෙරං ආකොටෙන්ති. භගවතො එතමත්ථං ආරොචෙසුං.
“න භික්ඛවෙ දීඝං දන්තකට්ඨං ඛාදිතබ්බං. යො ඛාදෙය්ය ආපත්ති දුක්කටස්ස. අනුජානාමි භික්ඛවෙ අට්ඨඞ්ගුලපරමං දන්තකට්ඨං, න ච තෙන සාමණෙරො ආකොටෙතබ්බො. යො ආකොටෙය්ය ආපත්ති දුක්කටස්සා”ති.
137. තෙන ඛො පන සමයෙන අඤ්ඤතරස්ස භික්ඛුනො අතිමටාහකං දන්තකට්ඨං ඛාදන්තස්ස කණ්ඨෙ විලග්ගං හොති. භගවතො එතමත්ථං ආරොචෙසුං.
“න භික්ඛවෙ අතිමටාහකං දන්තකට්ඨං ඛාදිතබ්බං. යො ඛාදෙය්ය ආපත්ති දුක්කටස්ස. අනුජානාමි භික්ඛවෙ චතුරඞ්ගුලපච්ඡිමං දන්තකට්ඨන්ති.”
138. තෙන ඛො පන සමයෙන ඡබ්බග්ගියා භික්ඛූ දායං ආලිම්පෙන්ති. මනුස්සා උජ්ඣායන්ති ඛීයන්ති විපාචෙන්ති: සෙය්යථාපි දවඩාහකා’ති. භගවතො එතමත්ථං ආරොචෙසුං.
“න භික්ඛවෙ දායො ආලිම්පිතබ්බො. යො ආලිම්පෙය්ය ආපත්ති දුක්කටස්සා”ති.
තෙන ඛො පන සමයෙන විහාරා තිණගහණා හොන්ති. දවඩාහෙ ඩය්හමානෙ විහාරා ඩය්හන්ති. භික්ඛූ කුක්කුච්චායන්ති පටග්ගිං දාතුං පරිත්තං කාතුං. භගවතො එතමත්ථං ආරොචෙසුං.
“අනුජානාමි භික්ඛවෙ දවඩාහෙ ඩය්හමානෙ පටග්ගිං දාතුං පරිත්තං කාතුන්ති.”
139. තෙන ඛො පන සමයෙන ඡබ්බග්ගියා භික්ඛූ රුක්ඛං අභිරුහන්ති. රුක්ඛා රුක්ඛං සඞ්කමන්ති. මනුස්සා උජ්ඣායන්ති ඛීයන්ති විපාචෙන්ති: ‘සෙය්යථාපි මක්කටා’ති. භගවතො එතමත්ථං ආරොචෙසුං.
“න භික්ඛවෙ රුක්ඛො අභිරුහිතබ්බො. යො අභිරුහෙය්ය ආපත්ති දුක්කටස්සා”ති.
තෙන ඛො පන සමයෙන අඤ්ඤතරස්ස භික්ඛුනො කොසලෙසු ජනපදෙ සාවත්ථිං ගච්ඡන්තස්ස අන්තරාමග්ගෙ හත්ථී පරියුට්ඨාති. අථ ඛො සො භික්ඛු රුක්ඛමූලං උපධාවිත්වා කුක්කුච්චායන්තො රුක්ඛං න අභිරුහි. සො හත්ථී අඤ්ඤෙන අගමාසි. අථ ඛො සො භික්ඛු සාවත්ථිං ගන්ත්වා භික්ඛූනං එතමත්ථං ආරොචෙසි. භික්ඛූ භගවතො එතමත්ථං ආරොචෙසුං.
“අනුජානාමි භික්ඛවෙ සති කරණීයෙ පොරිසං රුක්ඛං අභිරුහිතුං ආපදාසු යාවදත්ථන්ති”.
140. තෙන ඛො පන සමයෙන යමෙළුතෙකුලා නාම භික්ඛූ ද්වෙ භාතිකා හොන්ති බ්රාහ්මණජාතිකා කල්යාණවාචා කල්යාණවාක්කරණා. තෙ යෙන භගවා තෙනුපසඞ්කමිංසු. උපසඞ්කමිත්වා භගවන්තං අභිවාදෙත්වා එකමන්තං නිසීදිංසු. එකමන්තං නිසින්නා ඛො තෙ භික්ඛූ භගවන්තං එතදවොචුං: “එතරහි භන්තෙ භික්ඛූ නානානාමා නානාගොත්තා නානාජච්චා නානාකුලා පබ්බජිතා. තෙ සකාය නිරුත්තියා බුද්ධවචනං දූසෙන්ති. හන්ද මයං භන්තෙ බුද්ධවචනං ඡන්දසො ආරොපෙමා”ති. විගරහි බුද්ධො භගවා. “කථං හි නාම තුම්හෙ මොඝපුරිසා එවං වක්ඛථ ‘හන්ද මයං භන්තෙ බුද්ධවචනං ඡන්දසො ආරොපෙමා’ති. නෙතං මොඝපුරිසා අප්පසන්නානං වා පසාදාය පසන්නානං වා භිය්යොභාවාය. අථ ඛ්වෙතං භික්ඛවෙ අප්පසන්නානං චෙව අප්පසාදාය පසන්නානඤ්ච එකච්චානං අඤ්ඤථත්තායා”ති. විගරහිත්වා ධම්මිං කථං කත්වා භික්ඛූ ආමන්තෙසි:
“න භික්ඛවෙ බුද්ධවචනං ඡන්දසො ආරොපෙතබ්බං. යො ආරොපෙය්ය ආපත්ති දුක්කටස්ස. අනුජානාමි භික්ඛවෙ සකාය නිරුත්තියා බුද්ධවචනං පරියාපුණිතුන්ති”.
141. තෙන ඛො පන සමයෙන ඡබ්බග්ගියා භික්ඛූ ලොකායතං පරියාපුණන්ති. මනුස්සා උජ්ඣායන්ති ඛීයන්ති විපාචෙන්ති: ‘සෙය්යථාපි ගිහී කාමභොගිනො’ති. අස්සොසුං ඛො භික්ඛූ තෙසං මනුස්සානං උජ්ඣායන්තානං ඛීයන්තානං විපාචෙන්තානං. අථ ඛො තෙ භික්ඛූ භගවතො එතමත්ථං ආරොචෙසුං.
“අපි නු ඛො භික්ඛවෙ ලොකායතෙ සාරදස්සාවී ඉමස්මිං ධම්මවිනයෙ වුද්ධිං විරූළ්හිං වෙපුල්ලං ආපජ්ජෙය්යා”ති.
“නොහෙතං භන්තෙ”.
“ඉමස්මිං වා පන ධම්මවිනයෙ සාරදස්සාවී ලොකායතං පරියාපුණෙය්යා”ති.
“නොහෙතං භන්තෙ”.
“න භික්ඛවෙ ලොකායතං පරියාපුණිතබ්බං. යො පරියාපුණෙය්ය ආපත්ති දුක්කටස්සා”ති.
තෙන ඛො පන සමයෙන ඡබ්බග්ගියා භික්ඛූ ලොකායතං වාචෙන්ති. මනුස්සා උජ්ඣායන්ති ඛීයන්ති විපාචෙන්ති: ‘සෙය්යථාපි ගිහී කාමභොගිනො’ති. භගවතො එතමත්ථං ආරොචෙසුං.
“න භික්ඛවෙ ලොකායතං වාචෙතබ්බං. යො වාචෙය්ය ආපත්ති දුක්කටස්සා”ති.
තෙන ඛො පන සමයෙන ඡබ්බග්ගියා භික්ඛූ තිරච්ඡානවිජ්ජං පරියාපුණන්ති. -පෙ- භගවතො එතමත්ථං ආරොචෙසුං.
“න භික්ඛවෙ තිරච්ඡානවිජ්ජා පරියාපුණිතබ්බා යො පරියාපුණෙය්ය ආපත්ති දුක්කටස්සා”ති.
තෙන ඛො පන සමයෙන ඡබ්බග්ගියා භික්ඛූ තිරච්ඡානවිජ්ජං වාචෙන්ති. මනුස්සා උජ්ඣායන්ති ඛීයන්ති විපාචෙන්ති: ‘සෙය්යථාපි ගිහී කාමභොගිනො’ති. භගවතො එතමත්ථං ආරොචෙසුං.
“න භික්ඛවෙ තිරච්ඡානවිජ්ජා වාචෙතබ්බා. යො වාචෙය්ය ආපත්ති දුක්කටස්සා”ති.
142. තෙන ඛො පන සමයෙන භගවා මහතියා පරිසාය පරිවුතො ධම්මං දෙසෙන්තො ඛිපි. භික්ඛූ “ජීවතු භන්තෙ භගවා ජීවතු සුගතො”ති උච්චාසද්දං මහාසද්දං අකංසු. තෙන සද්දෙන ධම්මකථා අන්තරා අහොසි. අථ ඛො භගවා භික්ඛූ ආමන්තෙසි. “අපි නු ඛො භික්ඛවෙ ඛිපිතෙ ජීවාති වුත්තෙ තප්පච්චයා ජීවෙය්ය වා මරෙය්ය වා”ති.
“නොහෙතං භන්තෙ”.
“න භික්ඛවෙ ඛිපිතෙ ජීවාති වත්තබ්බො. යො වදෙය්ය ආපත්ති දුක්කටස්සා”ති.
තෙන ඛො පන සමයෙන මනුස්සා භික්ඛූනං ඛිපිතෙ ‘ජීවථ භන්තෙ’ති වදන්ති. භික්ඛූ කුක්කුච්චායන්තා නාලපන්ති. මනුස්සා උජ්ඣායන්ති ඛීයන්ති විපාචෙන්ති: “කථං හි නාම සමණා සක්යපුත්තියා ජීවථ භන්තෙති වුච්චමානා නාලපිස්සන්තී’ති. භගවතො එතමත්ථං ආරොචෙසුං.
“ගිහී භික්ඛවෙ මඞ්ගලිකා. අනුජානාමි භික්ඛවෙ ගිහීනං ජීවථ භන්තෙති වුච්චමානෙන චිරං ජීවාති වත්තුන්ති”.
143. තෙන ඛො පන සමයෙන භගවා මහතියා පරිසාය පරිවුතො ධම්මං දෙසෙන්තො නිසින්නො හොති. අඤ්ඤතරෙන භික්ඛුනා ලසුනං ඛායිතං හොති. සො ‘මා භික්ඛූ බ්යාබාධිංසූ’ති එකමන්තං නිසීදි. අද්දසා ඛො භගවා තං භික්ඛුං එකමන්තං නිසින්නං. දිස්වාන භික්ඛූ ආමන්තෙසි. “කින්නු ඛො සො භික්ඛවෙ භික්ඛු එකමන්තං නිසින්නො”ති.
“එතෙන භන්තෙ භික්ඛුනා ලසුනං ඛායිතං. ‘සො මා භික්ඛූ ව්යබාධියිංසූ’ති එකමන්තං නිසින්නො”ති.
“අපි නු ඛො භික්ඛවෙ තං ඛාදිතබ්බං යං ඛාදිත්වා එවරූපාය ධම්මකථාය පරිබාහිරො{1} අස්සා”ති.
“නොහෙතං භන්තෙ”.
“න භික්ඛවෙ ලසුනං ඛාදිතබ්බං. යො ඛාදෙය්ය ආපත්ති දුක්කටස්සා”ති.
තෙන ඛො පන සමයෙන ආයස්මතො සාරිපුත්තස්ස උදරවාතාබාධො හොති. අථ ඛො ආයස්මා මහාමොග්ගල්ලානො යෙනායස්මා සාරිපුත්තො තෙනුපසඞ්කමි. උපසඞ්කමිත්වා ආයස්මන්තං සාරිපුත්තං එතදවොච: “පුබ්බෙ තෙ ආවුසො සාරිපුත්ත, උදරවාතාබාධො කෙන ඵාසු හොතී”ති?
“ලසුනෙන මෙ ආවුසො”ති.
භගවතො එතමත්ථං ආරොචෙසුං. “අනුජානාමි භික්ඛවෙ ආබාධප්පච්චයා ලසුනං ඛාදිතුං”ති.
144. තෙන ඛො පන සමයෙන භික්ඛූ ආරාමෙ තහං තහං පස්සාවං කරොන්ති. ආරාමො දුස්සති. භගවතො එතමත්ථං ආරොචෙසුං.
“අනුජානාමි භික්ඛවෙ, එකමන්තං පස්සාවං කාතුන්ති”.
ආරාමො දුග්ගන්ධො හොති. “අනුජානාමි භික්ඛවෙ, පස්සාවකුම්භින්ති”.
දුක්ඛං නිසින්නා පස්සාවං කරොන්ති.
“අනුජානාමි භික්ඛවෙ, පස්සාවපාදුකන්ති” පස්සාවපාදුකා පාකටා හොන්ති. භික්ඛූ හිරීයන්ති පස්සාවං කාතුං.
“අනුජානාමි භික්ඛවෙ පරික්ඛිපිතුං තයො පාකාරෙ: ඉට්ඨකාපාකාරං සිලාපාකාරං, දාරුපාකාරන්ති”.
පස්සාවකුම්භී අපාරුතා දුග්ගන්ධා හොති. “අනුජානාමි භික්ඛවෙ අපිධානන්ති”.
145. තෙන ඛො පන සමයෙන භික්ඛූ ආරාමෙ තහං තහං වච්චං කරොන්ති. ආරාමො දුස්සති. භගවතො එතමත්ථං ආරොචෙසුං.
“අනුජානාමි භික්ඛවෙ, එකමන්තං වච්චං කාතුන්ති”.
ආරාමො දුග්ගන්ධො හොති. “අනුජානාමි භික්ඛවෙ, වච්චකූපන්ති”.
වච්චකූපස්ස කූලං ලුජ්ජති, “අනුජානාමි භික්ඛවෙ, චිනිතුං තයො චයෙ: ඉට්ඨකාචයං, සිලාචයං දාරුචයන්ති”.
වච්චකූපො නීචවත්ථුකො හොති. උදකෙන ඔත්ථරීයති.
“අනුජානාමි භික්ඛවෙ, උච්චවත්ථුකං කාතුන්ති”.
චයො පරිපතති. “අනුජානාමි භික්ඛවෙ, චිනිතුං, තයො චයෙ: ඉට්ඨකාචයං සිලාචයං, දාරුචයන්ති”.
ආරොහන්තා විහඤ්ඤන්ති.
“අනුජානාමි භික්ඛවෙ, තයො සොපාණෙ, ඉට්ඨකාසොපාණං සිලාසොපාණං දාරුසොපාණන්ති”.
ආරොහන්තා පරිපතන්ති. “අනුජානාමි භික්ඛවෙ, ආලම්බනබාහන්ති”. අන්තෙ නිසින්නා වච්චං කරොන්තා පරිපතන්ති.
“අනුජානාමි භික්ඛවෙ, සන්ථරිත්වා මජ්ඣෙ ඡිද්දං කත්වා වච්චං කාතුන්ති”.
දුක්ඛං නිසින්නා වච්චං කරොති.
“අනුජානාමි භික්ඛවෙ වච්චපාදුකන්ති”.
බහිද්ධා පස්සාවං කරොන්ති.
“අනුජානාමි භික්ඛවෙ පස්සාවදොණිකන්ති”.
අවලෙඛනකට්ඨං න හොති.
“අනුජානාමි භික්ඛවෙ අවලෙඛනකට්ඨන්ති”.
අවලෙඛනපිඨරො න හොති.
“අනුජානාමි භික්ඛවෙ අවලෙඛනපිඨරන්ති”.
වච්චකූපො අපාරුතො දුග්ගන්ධො හොති. “අනුජානාමි භික්ඛවෙ අපිධානන්ති”.
අජ්ඣොකාසෙ වච්චං කරොන්තා සීතෙනපි උණ්හෙනපි කිලමන්ති. “අනුජානාමි භික්ඛවෙ වච්චකුටින්ති”.
වච්චකුටියා කවාටං න හොති.
“අනුජානාමි භික්ඛවෙ, කවාටං, පිට්ඨිසඞ්ඝාටං{1}, උදුක්ඛලිකං, උත්තරපාසකං, අග්ගලවට්ටිං, කපිසීසකං, සූචිකං, ඝටිකං, තාලච්ඡිද්දං, ආවිඤ්ඡනච්ඡිද්දං, ආවිඤ්ඡනරජ්ජුන්ති”.
වච්චකුටියා තිණචුණ්ණං පරිපතති.
“අනුජානාමි භික්ඛවෙ ඔගුම්බෙත්වා උල්ලිත්තාවලිත්තං කාතුං, සෙතවණ්ණං කාළවණ්ණං ගෙරුකපරිකම්මං මාලාකම්මං ලතාකම්මං මකරදන්තකං පඤ්චපටිකං චීවරවංසං චීවරරජ්ජුන්ති”.
146. තෙන ඛො පන සමයෙන අඤ්ඤතරො භික්ඛු ජරාදුබ්බලො වච්චං කත්වා වුට්ඨහන්තො පරිපති{1} භගවතො එතමත්ථං ආරොචෙසුං.
“අනුජානාමි භික්ඛවෙ, ඔලම්බකන්ති”.
වච්චකුටි අපරික්ඛිත්තා හොති.
“අනුජානාමි භික්ඛවෙ පරික්ඛිපිතුං තයො පාකාරෙ: ඉට්ඨකාපාකාරං සිලාපාකාරං දාරුපාකාරන්ති”.
කොට්ඨකො න හොති.
“අනුජානාමි භික්ඛවෙ, කොට්ඨකන්ති”.
කොට්ඨකො නීචවත්ථුකො හොති -පෙ- අනුජානාමි භික්ඛවෙ උච්චවත්ථුකං කාතුන්ති. චයො පරිපතති -පෙ- ආරොහන්තා විහඤ්ඤන්ති -පෙ- අනුජානාමි භික්ඛවෙ, තයො සොපාණෙති -පෙ- අනුජානාමි භික්ඛවෙ ආලම්බනබාහන්ති.
කොට්ඨකස්ස කවාටං න හොති.