80. තෙන ඛො පන සමයෙන භික්ඛූ අජ්ඣොකාසෙ චඞ්කමන්තා සීතෙනපි උණ්හෙනපි කිලමන්ති. භගවතො එතමත්ථං ආරොචෙසුං. “අනුජානාමි භික්ඛවෙ චඞ්කමනසාලති”ති.
චඞ්කමනසාලායං{1} තිණචුණ්ණං පරිපතති. “අනුජානාමි භික්ඛවෙ ඔගුම්බෙත්වා{2} උල්ලිත්තාවලිත්තං කාතුං: සෙතවණ්ණං කාළවණ්ණං ගෙරුකපරිකම්මං මාලාකම්මං ලතාකම්මං මකරදන්තකං පඤ්චපටිකං චීවරවංසං චීවරරජ්ජුන්ති.”
81. ජන්තාඝරං නීචවත්ථුකං හොති. උදකෙන ඔත්ථරීයති. “අනුජානාමි භික්ඛවෙ උච්චවත්ථුකං කාතුන්ති.” චයො පරිපතති. “අනුජානාමි භික්ඛවෙ චිනිතුං තයො චයෙ: ඉට්ඨකාචයං සිලාචයං දාරුචයන්ති.”
ආරොහන්තා විහඤ්ඤන්ති. “අනුජානාමි භික්ඛවෙ තයො සොපාණෙ ඉට්ඨකාසොපාණං, සිලාසොපාණං, දාරුසොපාණන්ති”.
ආරොහන්තා පරිපතන්ති. “අනුජානාමි භික්ඛවෙ ආලම්බනබාහන්ති”.
ජන්තාඝරස්ස කවාටං න හොති. “අනුජානාමි භික්ඛවෙ කවාටං පිට්ඨසඞ්ඝාටං උදුක්ඛලිකං උත්තරපාසකං අග්ගලවට්ටිකං කපිසීසකං සූචිකං ඝටිකං තාලච්ඡිද්දං ආවිඤ්ජනඡිද්දං ආවිඤ්ජනරජ්ජුන්ති”.
82. ජන්තාඝරස්ස කුඩ්ඩපාදො ජීරති. භගවතො එතමත්ථං ආරොචෙසුං. “අනුජානාමි භික්ඛවෙ මණ්ඩලිකං කාතුන්ති.”
ජන්තාඝරස්ස ධූමනෙත්තං න හොති. “අනුජානාමි භික්ඛවෙ ධූමනෙත්තන්ති.”
83. තෙන ඛො පන සමයෙන භික්ඛූ ඛුද්දකෙ ජන්තාඝරෙ මජ්ඣෙ අග්ගිට්ඨානං කරොන්ති. උපචාරො න හොති. “අනුජානාමි භික්ඛවෙ ඛුද්දකෙ ජන්තාඝරෙ එකමන්තං අග්ගිට්ඨානං කාතුං, මහල්ලකෙ මජ්ඣෙ”ති.
ජන්තාඝරෙ අග්ගි මුඛං ඩහති. “අනුජානාමි භික්ඛවෙ මුඛමත්තිකන්ති.”
හත්ථෙ{1} මත්තිකං තෙමෙන්ති. “අනුජානාමි භික්ඛවෙ මත්තිකාදොණිකන්ති.”
මත්තිකා දුග්ගන්ධා හොති. “අනුජානාමි භික්ඛවෙ වාසෙතුන්ති.”
ජන්තාඝරෙ අග්ගි කායං ඩහති. “අනුජානාමි භික්ඛවෙ උදකං අතිහරිතුන්ති.”
පාතියාපි පත්තෙනපි උදකං අතිහරන්ති. “අනුජානාමි භික්ඛවෙ උදකාධානං, උදකසරාවකන්ති.”
84. ජන්තාඝරං තිණච්ඡදනං සාදෙති{2}. “අනුජානාමි භික්ඛවෙ ඔගුම්බෙත්වා{3} උල්ලිත්තාවලිත්තං කාතුන්ති.”
ජන්තාඝරං චික්ඛල්ලං හොති. “අනුජානාමි භික්ඛවෙ සන්ථරිතුං තයො සන්ථරෙ{4}: ඉට්ඨකාසන්ථරං සිලාසන්ථරං දාරුසන්ථරන්ති.” චික්ඛල්ලඤ්ඤෙව හොති. “අනුජානාමි භික්ඛවෙ ධොවිතුන්ති.”
උදකං සන්තිට්ඨති, “අනුජානාමි භික්ඛවෙ උදකනිද්ධමනන්ති.”
තෙන ඛො පන සමයෙන භික්ඛූ ජන්තාඝරෙ ඡමාය නිසීදන්ති. ගත්තානි කණ්ඩූවන්ති. “අනුජානාමි භික්ඛවෙ ජන්තාඝරපීඨන්ති”.
85. තෙන ඛො පන සමයෙන ජන්තාඝරං අපරික්ඛිත්තං හොති. “අනුජානාමි භික්ඛවෙ පරික්ඛිපිතුං, තයො පාකාරෙ ඉට්ඨකාපාකාරං, සිලාපාකාරං දාරුපාකාරන්ති.”
කොට්ඨකො න හොති. “අනුජානාමි භික්ඛවෙ කොට්ඨකන්ති.”
කොට්ඨකො නීචවත්ථුකො හොති, උදකෙන ඔත්ථරියති. “අනුජානාමි භික්ඛවෙ උච්චවත්ථුකං කාතුන්ති.”
චයො පරිපතති “අනුජානාමි භික්ඛවෙ චිනිතුං තයො චයෙ ඉට්ඨකාචයං සිලාචයං දාරුචයන්ති.”
ආරොහන්තා විහඤ්ඤන්ති. “අනුජානාමි භික්ඛවෙ තයො සොපාණෙ ඉට්ඨකාසොපාණං සිලාසොපාණං, දාරුසොපාණන්ති”.
ආරොහන්තා පරිපතන්ති. “අනුජානාමි භික්ඛවෙ ආලම්බනබාහන්ති.”
කොට්ඨකස්ස කවාටං න හොති. “අනුජානාමි භික්ඛවෙ කවාටං පිට්ඨසඞ්ඝාටං උදුක්ඛලිකං උත්තරපාසකං අග්ගලවට්ටිං කපිසීසකං සූචිකං ඝටිකං තාලච්ඡිද්දං ආවිඤ්ජනඡිද්දං ආවිඤ්ජනරජ්ජුන්ති.”
කොට්ඨකෙ තිණචුණ්ණං පරිපතති. “අනුජානාමි භික්ඛවෙ ඔගුම්බෙත්වා උල්ලිත්තාවලිත්තං කාතුං සෙතවණ්ණං කාළවණ්ණං ගෙරුකපරිකම්මං මාලාකම්මං ලතාකම්මං මකරදන්තකං පඤ්චපටිකන්ති.
පරිවෙණං චික්ඛල්ලං හොති. “අනුජානාමි භික්ඛවෙ මරුම්බං උපකිරිතුන්ති.”
න පරියාපුණන්ති. “අනුජානාමි භික්ඛවෙ පදරසිලං නික්ඛිපිතුන්ති.” උදකං සන්තිට්ඨති. “අනුජානාමි භික්ඛවෙ උදකනිද්ධමනන්ති.”
86. තෙන ඛො පන සමයෙන භික්ඛූ නග්ගා නග්ගං අභිවාදෙන්ති. නග්ගා නග්ගං අභිවාදාපෙන්ති. නග්ගා නග්ගස්ස පරිකම්මං කරොන්ති. නග්ගා නග්ගස්ස පරිකම්මං කාරාපෙන්ති{1}. නග්ගා නග්ගස්ස දෙන්ති. නග්ගා පටිගණ්හන්ති{2}. නග්ගා ඛාදන්ති. නග්ගා භුඤ්ජන්ති. නග්ගා සායන්ති. නග්ගා පිවන්ති. භගවතො එතමත්ථං ආරොචෙසුං. “න භික්ඛවෙ නග්ගෙන නග්ගො අභිවාදෙතබ්බො. යො අභිවාදෙය්ය ආපත්ති දුක්කටස්ස. න නග්ගෙන නග්ගො අභිවාදාපෙතබ්බො -පෙ- න නග්ගෙන අභිවාදෙතබ්බං -පෙ- න නග්ගෙන අභිවාදාපෙතබ්බං -පෙ- න නග්ගෙන නග්ගස්ස පරිකම්මං කාතබ්බං -පෙ- න නග්ගෙන නග්ගස්ස පරිකම්මං කාරාපෙතබ්බං -පෙ- න නග්ගෙන නග්ගස්ස දාතබ්බං -පෙ- න නග්ගෙන පටිග්ගහෙතබ්බං -පෙ- න නග්ගෙන ඛාදිතබ්බං -පෙ- න නග්ගෙන භුඤ්ජිතබ්බං -පෙ- න නග්ගෙන සායිතබ්බං -පෙ- න නග්ගෙන පාතබ්බං යො පිවෙය්ය ආපත්ති දුක්කටස්සාති.
87. තෙන ඛො පන සමයෙන භික්ඛූ ජන්තාඝරෙ ඡමාය චීවරං නික්ඛිපන්ති. චීවරං පංසුකිතං හොති. භගවතො එතමත්ථං ආරොචෙසුං. “අනුජානාමි භික්ඛවෙ ජන්තාඝරෙ චීවරවංසං චීවරරජ්ජුන්ති.”
දෙවෙ වස්සෙන්තෙ චීවරං ඔවස්සති. “අනුජානාමි භික්ඛවෙ ජන්තාඝරසාලන්ති.”
ජන්තාඝරසාලා නීචවත්ථුකා හොති, උදකෙන ඔත්ථරියති. -පෙ- “අනුජානාමි භික්ඛවෙ උච්චවත්ථුකං කාතුන්ති.”
චයො පරිපතති. අනුජානාමි භික්ඛවෙ චිනිතුං තයො චයෙ -පෙ- ආරොහන්තා විහඤ්ඤන්ති -පෙ- ආරොහන්තා පරිපතන්ති. “අනුජානාමි භික්ඛවෙ ආලම්බනබාහන්ති.”
ජන්තාඝරසාලාය තිණචුණ්ණං පරිපතති. “අනුජානාමි භික්ඛවෙ ඔගුම්බෙත්වා උල්ලිත්තාවලිත්තං කාතුං සෙතවණ්ණං කාළවණ්ණං ගෙරුකපරිකම්මං මාලාකම්මං ලතාකම්මං මකරදන්තකං පඤ්චපටිකං -පෙ- චීවරවංසං චීවරරජ්ජුන්ති.”
තෙන ඛො පන සමයෙන භික්ඛූ ජන්තාඝරෙපි උදකෙපි පරිකම්මං කාතුං කුක්කුච්චායන්ති. භගවතො එතමත්ථං ආරොචෙසුං. “අනුජානාමි භික්ඛවෙ තිස්සො පටිච්ඡාදියො ජන්තාඝරපටිච්ඡාදිං උදකපටිච්ඡාදිං වත්ථපටිච්ඡාදින්ති.”
88. තෙන ඛො පන සමයෙන ජන්තාඝරෙ උදකං න හොති. භගවතො එතමත්ථං ආරොචෙසුං. “අනුජානාමි භික්ඛවෙ උදපානන්ති.”
උදපානස්ස කූලං ලුජ්ජති. “අනුජානාමි භික්ඛවෙ චිනිතුං තයො චයෙ: ඉට්ඨකාචයං, සිලාචයං දාරුචයන්ති.”
උදපානො නීචවත්ථුකො හොති. උදකෙන ඔත්ථරීයති. “අනුජානාමි භික්ඛවෙ උච්චවත්ථුකං කාතුන්ති.”
චයො පරිපතති -පෙ- ආරොහන්තා විහඤ්ඤන්ති -පෙ- ආරොහන්තා පරිපතන්ති. “අනුජානාමි භික්ඛවෙ ආලම්බනබාහන්ති.”
89. තෙන ඛො පන සමයෙන භික්ඛූ වල්ලියාපි කායබන්ධනෙනපි උදකං වාහෙන්ති. භගවතො එතමත්ථං ආරොචෙසුං. “අනුජානාමි භික්ඛවෙ උදකවාහනරජ්ජුන්ති.”
හත්ථා දුක්ඛා හොන්ති. “අනුජානාමි භික්ඛවෙ තුලං කරකටකං චක්කවට්ටකන්ති.”
භාජනා බහූ භිජ්ජන්ති. “අනුජානාමි භික්ඛවෙ තයො වාරකෙ ලොහවාරකං දාරුවාරකං චම්මඛණ්ඩන්ති.”
90. තෙන ඛො පන සමයෙන භික්ඛූ අජ්ඣොකාසෙ උදකං වාහන්තො සීතෙනපි උණ්හෙනපි කිලමන්ති. භගවතො එතමත්ථං ආරොචෙසුං. “අනුජානාමි භික්ඛවෙ උදපානසාලන්ති.”
උදපානසාලාය තිණචුණ්ණං පරිපතති. “අනුජානාමි භික්ඛවෙ ඔගුම්බෙත්වා උල්ලිත්තාවලිත්තං කාතුං සෙතවණ්ණං කාළවණ්ණං ගෙරුකපරිකම්මං මාලාකම්මං ලතාකම්මං මකරදන්තකං පඤ්චපටිකං චීවරවංසං චීවරරජ්ජුන්ති.”
උදපානො අපාරුතො හොති. තිණචුණ්ණෙහිපි පංසුකෙහිපි ඔකිරියති. “අනුජානාමි භික්ඛවෙ අපිධානන්ති.”
උදකභාජනං න සංවිජ්ජති. “අනුජානාමි භික්ඛවෙ උදකදොණිං උදකකටාහන්ති.”
91. තෙන ඛො පන සමයෙන භික්ඛූ ආරාමෙ තහං තහං නහායන්ති. ආරාමො චික්ඛල්ලො හොති. භගවතො එතමත්ථං ආරොචෙසුං. “අනුජානාමි භික්ඛවෙ චන්දනිකන්ති.”
චන්දනිකා අපාරුතා{1} හොති. භික්ඛූ හිරීයන්ති නහායිතුං. “අනුජානාමි භික්ඛවෙ පරික්ඛිතුං තයො පාකාරෙ ඉට්ඨකාපාකාරං සිලාපාකාරං දාරුපාකාරන්ති.”
චන්දනිකා චික්ඛල්ලා හොති. “අනුජානාමි භික්ඛවෙ සන්ථරිතුං තයො සන්ථරෙ{2} ඉට්ඨකාසන්ථරං සිලාසන්ථරං දාරුසන්ථරන්ති.”
උදකං සන්තිට්ඨති. “අනුජානාමි භික්ඛවෙ උදකනිද්ධමනන්ති.”
92. තෙන ඛො පන සමයෙන භික්ඛූනං ගත්තානි සීතිකානි හොන්ති. භගවතො එතමත්ථං ආරොචෙසුං. “අනුජානාමි භික්ඛවෙ උදකපුඤ්ජචොලකෙන පි පච්චුද්ධරිතුන්ති.”
තෙන ඛො පන සමයෙන අඤ්ඤතරො උපාසකො සඞ්ඝස්ස අත්ථාය පොක්ඛරණිං කාරෙතුකාමො හොති. භගවතො එතමත්ථං ආරොචෙසුං. “අනුජානාමි භික්ඛවෙ පොක්ඛරණින්ති.”
පොක්ඛරණියා කූලං ලුජ්ජති. “අනුජානාමි භික්ඛවෙ චිනිතුං තයො චයෙ ඉට්ඨකාචයං සිලාචයං දාරුචයන්ති.”
ආරොහන්තා විහඤ්ඤන්ති. “අනුජානාමි භික්ඛවෙ තයො සොපාණෙ ඉට්ඨකාසොපාණං සිලාසොපාණං, දාරුසොපාණන්ති.”
ආරොහන්තා පරිපතන්ති. “අනුජානාමි භික්ඛවෙ ආලම්බනබාහන්ති.”
පොක්ඛරණියා උදකං පුරාණං හොති. “අනුජානාමි භික්ඛවෙ උදකමාතිකං උදකනිද්ධමනන්ති.”
තෙන ඛො පන සමයෙන අඤ්ඤතරො භික්ඛු සඞ්ඝස්ස අත්ථාය නිල්ලෙඛං ජන්තාඝරං කත්තුකාමො හොති. භගවතො එතමත්ථං ආරොචෙසුං. “අනුජානාමි භික්ඛවෙ නිල්ලෙඛං ජන්තාඝරන්ති.”
93. තෙන ඛො පන සමයෙන ඡබ්බග්ගියා භික්ඛූ චාතුමාසං නිසීදනෙන විප්පවසන්ති. භගවතො එතමත්ථං ආරොචෙසුං “න භික්ඛවෙ චාතුමාසං නිසීදනෙන විප්පවසිතබ්බං. යො විප්පවසෙය්ය ආපත්ති දුක්කටස්සා”ති.
94. තෙන ඛො පන සමයෙන ඡබ්බග්ගියා භික්ඛූ පුප්ඵාභිකිණ්ණෙසු සයනෙසු සයන්ති මනුස්සා විහාරචාරිකං ආහිණ්ඩන්තා පස්සිත්වා උජ්ඣායන්ති ඛීයන්ති විපාචෙන්ති: ‘සෙය්යථාපි ගිහී කාමභොගිනො’ති. භගවතො එතමත්ථං ආරොචෙසුං. “න භික්ඛවෙ පුප්ඵාභිකිණ්ණෙසු සයනෙසු සයිතබ්බං. යො සයෙය්ය ආපත්ති දුක්කටස්සා”ති .
තෙන ඛො පන සමයෙන මනුස්සා ගන්ධම්පි මාලම්පි ආදාය ආරාමං ආගච්ඡන්ති. භික්ඛූ කුක්කුච්චායන්තා න පටිගණ්හන්ති. භගවතො එතමත්ථං ආරොචෙසුං. “අනුජානාමි භික්ඛවෙ ගන්ධං ගහෙත්වා කවාටෙ පඤ්චඞ්ගුලිකං දාතුං, පුප්ඵං ගහෙත්වා විහාරෙ එකමන්තං නික්ඛිපිතුන්ති.”
95. තෙන ඛො පන සමයෙන සඞ්ඝස්ස නමතකං උප්පන්නං හොති. භගවතො එතමත්ථං ආරොචෙසුං. “අනුජානාමි භික්ඛවෙ නමතකන්ති.”
අථ ඛො භික්ඛූනං එතදහොසි: ‘නමතකං අධිට්ඨාතබ්බං නු ඛො උදාහු විකප්පෙතබ්බන්ති.’ “න භික්ඛවෙ නමතකං අධිට්ඨාතබ්බං, න විකප්පෙතබ්බන්ති.”
තෙන ඛො පන සමයෙන ඡබ්බග්ගියා භික්ඛූ ආසිත්තකූපධානෙ භුඤ්ජන්ති. මනුස්සා උජ්ඣායන්ති ඛීයන්ති විපාචෙන්ති ‘සෙය්යථාපි ගිහී කාමභොගිනො’ති. භගවතො එතමත්ථං ආරොචෙසුං. “න භික්ඛවෙ ආසිත්තකූපධානෙ භුඤ්ජිතබ්බං. යො භුඤ්ජෙය්ය ආපත්ති දුක්කටස්සා”ති .
96. තෙන ඛො පන සමයෙන අඤ්ඤතරො භික්ඛු ගිලානො හොති. සො භුඤ්ජමානො න සක්කොති හත්ථෙන පත්තං සන්ධාරෙතුං. භගවතො එතමත්ථං ආරොචෙසුං. “අනුජානාමි භික්ඛවෙ මළොරිකන්ති.”
97. තෙන ඛො පන සමයෙන ඡබ්බග්ගියා භික්ඛූ එකභාජනෙ පි භුඤ්ජන්ති. එකථාලකෙ පි පිවන්ති. එකමඤ්චෙ පි තුවට්ටෙන්ති. එකත්ථරණා{1} පි තුවට්ටෙන්ති. එකපාපුරණා{2} පි තුවට්ටෙන්ති. එකත්ථරණාපාපුරණා පි තුවට්ටෙන්ති. මනුස්සා උජ්ඣායන්ති ඛීයන්ති විපාචෙන්ති: ‘සෙය්යථාපි ගිහී කාමභොගිනො’ති. භගවතො එතමත්ථං ආරොචෙසුං, “න භික්ඛවෙ එකභාජනෙ භුඤ්ජිතබ්බං. න එකථාලකෙ පාතබ්බං. න එකමඤ්චෙ තුවට්ටිතබ්බං. න එකත්ථරණෙ තුවට්ටිතබ්බං. න එකපාපුරණෙපි තුවට්ටිතබ්බං. න එකත්ථරණපාපුරණෙපි තුවට්ටිතබ්බං. යො තුවට්ටෙය්ය ආපත්ති දුක්කටස්සා”ති.
98. තෙන ඛො පන සමයෙන වඩ්ඪො ලිච්ඡවී මෙත්තියභුම්මජකානං භික්ඛූනං සහායො හොති. අථ ඛො වඩ්ඪො ලිච්ඡවී යෙන මෙත්තියභුම්මජකා භික්ඛූ තෙනුපසඞ්කමි. උපසඞ්කමිත්වා මෙත්තියභුම්මජකෙ භික්ඛූ එතදවොච: ‘වන්දාමි අය්යා’ති. එවං වුත්තෙ මෙත්තියභුම්මජකා භික්ඛූ නාලපිංසු. දුතියම්පි ඛො වඩ්ඪො ලිච්ඡවී මෙත්තියභුම්මජකෙ භික්ඛූ එතදවොච. ‘වන්දාමි අය්යා’ති. දුතියම්පි ඛො මෙත්තියභුම්මජකා භික්ඛූ නාලපිංසු. තතියම්පි ඛො වඩ්ඪො ලිච්ඡවී මෙත්තියභුම්මජකෙ භික්ඛූ එතදවොච: ‘වන්දාමි අය්යා’ති. තතියම්පි ඛො මෙත්තියභුම්මජකා භික්ඛූ නාලපිංසු. “ක්යාහං අය්යානං අපරජ්ඣාමි? කිස්ස මං අය්යා නාලපන්තී”ති. “තථා හි පන ත්වං ආවුසො වඩ්ඪ අම්හෙ දබ්බෙන මල්ලපුත්තෙන විහෙඨියමානෙ අජ්ඣුපෙක්ඛසී?ති”
‘ක්යාහං අය්යා කරොමී?”ති
‘සචෙ ඛො ත්වං ආවුසො වඩ්ඪ, ඉච්ඡෙය්යාසි, අජ්ජෙව භගවා ආයස්මන්තං දබ්බං මල්ලපුත්තං නාසාපෙය්යා’ති.
‘ක්යාහං අය්යා කරොමි? කිං මයා සක්කා කාතුන්ති’
‘එහි ත්වං ආවුසො වඩ්ඪ, යෙන භගවා තෙනුපසඞ්කම, උපසඞ්කමිත්වා භගවන්තං එවං වදෙහි: “ඉදං භන්තෙ නච්ඡන්නං නප්පතිරූපං යායං භන්තෙ දිසා අභයා අනීතිකා අනුපද්දවා, සායං දිසා සභයා සඊතිකා සඋපද්දවා. යතො නිවාතං, තතො පවාතං උදකං මඤ්ඤෙ ආදිත්තං. අය්යෙන මෙ දබ්බෙන මල්ලපුත්තෙන පජාපති දූසිතා”ති.
‘එවං අය්යා’ති ඛො වඩ්ඪො ලිච්ඡවී මෙත්තියභුම්මජකානං භික්ඛූනං පටිස්සුත්වා යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං නිසීදි. එකමන්තං නිසින්නො ඛො වඩ්ඪො ලිච්ඡවී භගවන්තං එතදවොච: “ඉදං භන්තෙ නච්ඡන්නං නප්පතිරූපං, යායං භන්තෙ දිසා අභයා අනීතිකා අනුපද්දවා සායං දිසා සභයා සඊතිකා සඋපද්දවා, යතො නිවාතං තතො පවාතං උදකං මඤ්ඤෙ ආදිත්තං. අය්යෙන මෙ දබ්බෙන මල්ලපුත්තෙන පජාපති දූසිතා”ති.
අථ ඛො භගවා එතස්මිං නිදානෙ එතස්මිං පකරණෙ භික්ඛුසඞ්ඝං සන්නිපාතාපෙත්වා ආයස්මන්තං දබ්බං මල්ලපුත්තං පටිපුච්ඡි: “සරසි ත්වං දබ්බ එවරූපං කත්තා යථායං වඩ්ඪො ආහා?”ති.
“යථා මං භන්තෙ භගවා ජානාතී”ති.
දුතියම්පි ඛො භගවා -පෙ- තතියම්පි ඛො භගවා ආයස්මන්තං දබ්බං මල්ලපුත්තං එතදවොච: “සරසි ත්වං දබ්බ එවරූපං කත්තා යථායං වඩ්ඪො ආහා”ති.
යථා මං භන්තෙ භගවා ජානාතී”ති.
“න ඛො දබ්බ දබ්බා එවං නිබ්බෙඨෙන්ති. සචෙ තයා කතං කතන්ති වදෙහි. සචෙ අකතං අකතන්ති වදෙහී”ති.
“යතොහං භන්තෙ ජාතො, නාභිජානාමි සුපිනන්තෙන’පි මෙථුනං ධම්මං පටිසෙවිතා, පගෙව ජාගරො”ති.
අථ ඛො භගවා භික්ඛූ ආමන්තෙසි: “තෙන හි භික්ඛවෙ සඞ්ඝො වඩ්ඪස්ස ලිච්ඡවිස්ස පත්තං නික්කුජ්ජතු අසම්භොගං සඞ්ඝෙන කරොතු. අට්ඨහි භික්ඛවෙ අඞ්ගෙහි සමන්නාගතස්ස උපාසකස්ස පත්තො නික්කුජ්ජිතබ්බො: භික්ඛූනං අලාභාය පරිසක්කති, භික්ඛූනං අනත්ථාය පරිසක්කති, භික්ඛූනං අවාසාය පරිසක්කති. භික්ඛූ අක්කොසති පරිභාසති. භික්ඛූ භික්ඛූහි භෙදෙති. බුද්ධස්ස අවණ්ණං භාසති. ධම්මස්ස අවණ්ණං භාසති. සඞ්ඝස්ස අවණ්ණං භාසති. අනුජානාමි භික්ඛවෙ ඉමෙහි අට්ඨහඞ්ගෙහි සමන්නාගතස්ස උපාසකස්ස පත්තං නික්කුජ්ජිතුං.
එවඤ්ච පන භික්ඛවෙ නික්කුජ්ජිතබ්බො: ව්යත්තෙන භික්ඛුනා පටිබලෙන සඞ්ඝො ඤාපෙතබ්බො:
“සුණාතු මෙ භන්තෙ සඞ්ඝො: වඩ්ඪො ලිච්ඡවී ආයස්මන්තං දබ්බං මල්ලපුත්තං අමූලිකාය සීලවිපත්තියා අනුද්ධංසෙති. යදි සඞ්ඝස්ස පත්තකල්ලං සඞ්ඝො වඩ්ඪස්ස ලිච්ඡවිස්ස පත්තං නික්කුජ්ජෙය්ය අසම්භොගං සඞ්ඝෙන කරෙය්ය”. එසා ඤත්ති.
“සුණාතු මෙ භන්තෙ සඞ්ඝො: වඩ්ඪො ලිච්ඡවී ආයස්මන්තං දබ්බං මල්ලපුත්තං අමූලිකාය සීලවිපත්තියා අනුද්ධංසෙති. සඞ්ඝො වඩ්ඪස්ස ලිච්ඡවිස්ස පත්තං නික්කුජ්ජති. අසම්භොගං සඞ්ඝෙන කරොති. යස්සායස්මතො ඛමති වඩ්ඪස්ස ලිච්ඡවිස්ස පත්තස්ස නික්කුජ්ජනා අසම්භොගං සඞ්ඝෙන කරණං, සො තුණ්හස්ස, යස්ස නක්ඛමති සො භාසෙය්ය. නික්කුජ්ජිතො සඞ්ඝෙන වඩ්ඪස්ස ලිච්ඡවිස්ස පත්තො අසම්භොගො සඞ්ඝෙන, ඛමති සඞ්ඝස්ස තස්මා තුණ්හී. එවමෙතං ධාරයාමී”ති.
99. අථ ඛො ආයස්මා ආනන්දො පුබ්බන්හසමයං නිවාසෙත්වා පත්තචීවරමාදාය යෙන වඩ්ඪස්ස ලිච්ඡවිස්ස නිවෙසනං තෙනුපසඞ්කමි උපසඞ්කමිත්වා වඩ්ඪං ලිච්ඡවිං එතදවොච: “සඞ්ඝෙන තෙ ආවුසො වඩ්ඪ පත්තො නික්කුජ්ජිතො. අසම්භොගො’සි සඞ්ඝෙනා”ති. අථ ඛො වඩ්ඪො ලිච්ඡවී “සඞ්ඝෙන කිර මෙ පත්තො නික්කුජ්ජිතො අසම්භොගො’ම්හි කිර සඞ්ඝෙනා”ති තත්ථෙව මුච්ඡිතො පපති. අථ ඛො වඩ්ඪස්ස ලිච්ඡවිස්ස මිත්තාමච්චා ඤාතිසාලොහිතා වඩ්ඪං ලිච්ඡවිං එතදවොචුං: “අලං ආවුසො වඩ්ඪ, මා සොචි, මා පරිදෙවි. මයං භගවන්තං පසාදෙස්සාම භික්ඛුසඞ්ඝඤ්චා”ති.
අථ ඛො වඩ්ඪො ලිච්ඡවී සපුත්තදාරො සමිත්තාමච්චො සඤාතිසාලොහිතො අල්ලවත්ථො අල්ලකෙසො යෙන භගවා තෙනුපසඞ්කමි. උපසඞ්කමිත්වා භගවතො පාදෙසු සිරසා නිපතිත්වා භගවන්තං එතදවොච: “අච්චයො මං භන්තෙ අච්චගමා යථාබාලං යථාමූළ්හං යථාඅකුසලං, යොහං අය්යං දබ්බං මල්ලපුත්තං අමූලිකාය සීලවිපත්තියා අනුද්ධංසෙසිං. තස්ස මෙ භන්තෙ භගවා අච්චයං අච්චයතො පටිගණ්හාතු ආයතිං සංවරායා”ති.
“තග්ඝ ත්වං ආවුසො වඩ්ඪ අච්චයො අච්චගමා යථාබාලං යථාමූළ්හං යථාඅකුසලං යං ත්වං දබ්බං මල්ලපුත්තං අමූලිකාය සීලවිපත්තියා අනුද්ධංසෙසි. යතො ච ඛො ත්වං ආවුසො වඩ්ඪ අච්චයං අච්චයතො දිස්වා යථාධම්මං පටිකරොසි, තං තෙ මයං පටිගණ්හාම. වුද්ධිහෙසා ආවුසො වඩ්ඪ අරියස්ස විනයෙ යො අච්චයං අච්චයතො දිස්වා යථාධම්මං පටිකරොති ආයතිං සංවරං ආපජ්ජතී”ති.
අථ ඛො භගවා භික්ඛූ ආමන්තෙසි: “තෙන හි භික්ඛවෙ සඞ්ඝො වඩ්ඪස්ස ලිච්ඡවිස්ස පත්තං උක්කුජ්ජතු සම්භොගං සඞ්ඝෙන කරොතු. අට්ඨහි භික්ඛවෙ අඞ්ගෙහි සමන්නාගතස්ස උපාසකස්ස පත්තො උක්කුජ්ජිතබ්බො: න භික්ඛූනං අලාභාය පරිසක්කති. න භික්ඛූනං අනත්ථාය පරිසක්කති. න භික්ඛූනං අවාසාය පරිසක්කති. න භික්ඛූ අක්කොසති පරිභාසති, න භික්ඛූ භික්ඛූහි භෙදෙති. න බුද්ධස්ස අවණ්ණං භාසති. න ධම්මස්ස අවණ්ණං භාසති. න සඞ්ඝස්ස අවණ්ණං භාසති. අනුජානාමි භික්ඛවෙ ඉමෙහි අට්ඨහඞ්ගෙහි සමන්නාගතස්ස උපාසකස්ස පත්තං උක්කුජ්ජිතුං.
එවඤ්ච පන භික්ඛවෙ උක්කුජ්ජිතබ්බො. තෙන භික්ඛවෙ වඩ්ඪෙන ලිච්ඡවිනා සඞ්ඝං උපසඞ්කමිත්වා එකංසං උත්තරාසඞ්ගං කරිත්වා භික්ඛූනං පාදෙ වන්දිත්වා උක්කුටිකං නිසීදිත්වා අඤ්ජලිං පග්ගහෙත්වා එවමස්ස වචනීයො: සඞ්ඝෙන මෙ භන්තෙ පත්තො නික්කුජ්ජිතො, අසම්භොගොම්’හි සඞ්ඝෙන, සො’හං භන්තෙ සම්මා වත්තාමි ලොමං පාතෙමි. නෙත්ථාරං වත්තාමි. සඞ්ඝං පත්තුක්කුජ්ජනං යාචාමීති. දුතියම්පි යාචිතබ්බො. තතියම්පි යාචිතබ්බො. ව්යත්තෙන භික්ඛුනා පටිබලෙන සඞ්ඝො ඤාපෙතබ්බො:
“සුණාතු මෙ භන්තෙ සඞ්ඝො. සඞ්ඝෙන වඩ්ඪස්ස ලිච්ඡවිස්ස පත්තො නික්කුජ්ජිතො අසම්භොගො සඞ්ඝෙන. සො සම්මා වත්තති. ලොමං පාතෙති. නෙත්ථාරං වත්තති. සඞ්ඝං පත්තුක්කුජ්ජනං යාචති. යදි සඞ්ඝස්ස පත්තකල්ලං සඞ්ඝො වඩ්ඪස්ස ලිච්ඡවිස්ස පත්තං උක්කුජ්ජෙය්ය සම්භොගං සඞ්ඝෙන කරෙය්ය. එසා ඤත්ති.
සුණාතු මෙ භන්තෙ සඞ්ඝො: සඞ්ඝෙන වඩ්ඪස්ස ලිච්ඡවිස්ස පත්තො නික්කුජ්ජිතො අසම්භොගො සඞ්ඝෙන. සො සම්මා වත්තති ලොමං පාතෙති නෙත්ථාරං වත්තති. සඞ්ඝං පත්තුක්කුජ්ජනං යාචති. සඞ්ඝො වඩ්ඪස්ස ලිච්ඡවිස්ස පත්තං උක්කුජ්ජති. සම්භොගං සඞ්ඝෙන කරොති. යස්සායස්මතො ඛමති වඩ්ඪස්ස ලිච්ඡවිස්ස පත්තස්ස උක්කුජ්ජනං, සම්භොගං සඞ්ඝෙන කරණං. සො තුණ්හස්ස. යස්ස නක්ඛමති සො භාසෙය්ය.
“උක්කුජ්ජිතො සඞ්ඝෙන වඩ්ඪස්ස ලිච්ඡවිස්ස පත්තො සම්භොගො සඞ්ඝෙන. ඛමති සඞ්ඝස්ස තස්මා තුණ්හී. එවමෙතං ධාරයාමී”ති.
දුතිය භාණවාරං.
තතිය භාණවාරං
100. අථ ඛො භගවා වෙසාලියං යථාභිරන්තං විහරිත්වා යෙන භග්ගා තෙන චාරිකං පක්කාමි. අනුපුබ්බෙන චාරිකං චරමානො යෙන භග්ගා තදවසරි. තත්ර සුදං භගවා භග්ගෙසු විහරති සුංසුමාරගිරෙ භෙසකලාවනෙ මිගදායෙ.
තෙන ඛො පන සමයෙන බොධිස්ස රාජකුමාරස්ස කොකනදො නාම පාසාදො අචිරකාරිතො හොති අනජ්ඣාවුත්ථො සමණෙන වා බ්රාහ්මණෙන වා කෙනචි වා මනුස්සභූතෙන.
අථ ඛො බොධිරාජකුමාරො සඤ්ජිකාපුත්තං මාණවං ආමන්තෙසි: “එහි ත්වං සම්ම සඤ්චිකාපුත්ත, යෙන භගවා තෙනුපසඞ්කම. උපසඞ්කමිත්වා මම වචනෙන භගවතො පාදෙ සිරසා වන්ද, අප්පාබාධං අප්පාතඞ්කං ලහුට්ඨානං බලං ඵාසුවිහාරං පුච්ඡ ‘බොධි භන්තෙ රාජකුමාරො භගවතො පාදෙ සිරසා වන්දති අප්පාබාධං අප්පාතඞ්කං ලහුට්ඨානං බලං ඵාසුවිහාරං පුච්ඡතී’ති. එවඤ්ච වදෙහි: ‘අධිවාසෙතු කිර භන්තෙ භගවා බොධිස්ස රාජකුමාරස්ස ස්වාතනාය භත්තං සද්ධිං භික්ඛුසඞ්ඝෙනා’ති.
‘එවං භො’ති ඛො සඤ්චිකාපුත්තො මාණවො බොධිස්ස රාජකුමාරස්ස පටිස්සුත්වා යෙන භගවා තෙනුපසඞ්කමි. උපසඞ්කමිත්වා භගවතා සද්ධිං සම්මොදි සම්මොදනීයං කථං සාරාණීයං වීතිසාරෙත්වා එකමන්තං නිසීදි. එකමන්තං නිසින්නො ඛො සඤ්චිකාපුත්තො මාණවො භගවන්තං එතදවොච: බොධි ඛො රාජකුමාරො භොතො ගොතමස්ස පාදෙ සිරසා වන්දති, අප්පාබාධං අප්පාතඞ්කං ලහුට්ඨානං බලං ඵාසුවිහාරං පුච්ඡති. එවඤ්ච වදෙති ‘අධිවාසෙතු කිර භන්තෙ භගවා බොධිස්ස රාජකුමාරස්ස ස්වාතනාය භත්තං සද්ධිං භික්ඛුසඞ්ඝෙනා’ති. අධිවාසෙසි භගවා තුණ්හීභාවෙන.
අථ ඛො සඤ්ජිකාපුත්තො මාණවො භගවතො අධිවාසනං විදිත්වා උට්ඨායාසනා යෙන බොධිරාජකුමාරො තෙනුපසඞ්කමි. උපසඞ්කමිත්වා බොධිං රාජකුමාරං එතදවොච: “අවොචුම්හ ඛො මයං භොතො වචනෙන තං භවන්තං ගොතමං ‘බොධි ඛො රාජකුමාරො භොතො ගොතමස්ස පාදෙ සිරසා වන්දති, අප්පාබාධං අප්පාතඞ්කං ලහුට්ඨානං බලං ඵාසුවිහාරං පුච්ඡති. එවඤ්ච වදෙති: අධිවාසෙතු කිර භන්තෙ භගවා බොධිස්ස රාජකුමාරස්ස ස්වාතනාය භත්තං සද්ධිං භික්ඛුසඞ්ඝෙනා’ති. අධිවුත්ථඤ්ච පන සමණෙන ගොතමෙනා”ති.
101. අථ ඛො බොධිරාජකුමාරො තස්සා රත්තියා අච්චයෙන පණීතං ඛාදනීයං භොජනීයං පටියාදාපෙත්වා, කොකනදඤ්ච පාසාදං ඔදාතෙහි දුස්සෙහි සන්ථරාපෙත්වා යාව පච්ඡිමා සොපානකලෙබරා සඤ්චිකාපුත්තං මාණවං ආමන්තෙසි: එහි ත්වං සම්ම සඤ්චිකාපුත්ත, යෙන භගවා තෙනුපසඞ්කම, උපසඞ්කමිත්වා භගවතො කාලං ආරොචෙහි ‘කාලො භන්තෙ නිට්ඨිතං භත්තන්ති’. ‘එවම්භො’ති ඛො සඤ්චිකාපුත්තො මාණවො බොධිස්ස රාජකුමාරස්ස පටිස්සුත්වා යෙන භගවා තෙනුපසඞ්කමි. උපසඞ්කමිත්වා භගවතො කාලං ආරොචෙසි ‘කාලො භො ගොත, නිට්ඨිතං භත්තන්ති’.
අථ ඛො භගවා පුබ්බන්හසමයං නිවාසෙත්වා පත්තචීවරමාදාය යෙන බොධිස්ස රාජකුමාරස්ස නිවෙසනං තෙනුපසඞ්කමි සද්ධිං භික්ඛුසඞ්ඝෙන. තෙන ඛො පන සමයෙන බොධිරාජකුමාරො බහිද්වාරකොට්ඨකෙ ඨිතො හොති භගවන්තං ආගමයමානො. අද්දසා ඛො බොධිරාජකුමාරො භගවන්තං දූරතොව ආගච්ඡන්තං. දිස්වාන තතො පච්චුග්ගන්ත්වා භගවන්තං අභිවාදෙත්වා පුරක්ඛත්වා යෙන කොකනදො පාසාදො තෙනුපසඞ්කමි.
අථ ඛො භගවා පච්ඡිමං සොපාණකලෙබරං නිස්සාය අට්ඨාසි. අථ ඛො බොධිරාජකුමාරො භගවන්තං එතදවොච: ‘අක්කමතු භන්තෙ භගවා දුස්සානි, අක්කමතු සුගතො දුස්සානි, යං මම අස්ස දීඝරත්තං හිතාය සුඛායා’ති. එවං වුත්තෙ භගවා තුණ්හී අහොසි. දුතියම්පි ඛො -පෙ- තතියම්පි ඛො බොධිරාජකුමාරො භගවන්තං එතදවොච: ‘අක්කමතු භන්තෙ භගවා දුස්සානි, අක්කමතු සුගතො දුස්සානි, යං මම අස්ස දීඝරත්තං හිතාය සුඛායා’ති. අථ ඛො භගවා ආයස්මන්තං ආනන්දං අපලොකෙසි. අථ ඛො ආයස්මා ආනන්දො බොධිං රාජකුමාරං එතදවොච: ‘සංහරතු රාජකුමාර දුස්සානි, න භගවා චෙලපත්තිකං{1} අක්කමිස්සති. පච්ඡිමං ජනතං තථාගතො අනුකම්පතී’ති.
අථ ඛො බොධි රාජකුමාරො දුස්සානි [සංහරාපෙත්වා උපරිකොකනදෙ පාසාදෙ ආසනං පඤ්ඤාපෙසි. අථ ඛො භගවා කොකනදං පාසාදං අභිරූහිත්වා පඤ්ඤත්තෙ ආසනෙ නිසීදි සද්ධිං භික්ඛුසඞ්ඝෙන. අථ ඛො බොධිරාජකුමාරො බුද්ධපමුඛං භික්ඛුසඞ්ඝං පණීතෙන ඛාදනීයෙන භොජනීයෙන සහත්ථා සන්තප්පෙත්වා සම්පවාරෙත්වා භගවන්තං භුත්තාවිං ඔනීතපත්තපාණිං එකමන්තං නිසීදි.