“න භික්ඛවෙ, ඡත්තෙ පත්තො නික්ඛිපිතබ්බො. යො නික්ඛිපෙය්ය ආපත්ති දුක්කටස්සා”ති.
53. තෙන ඛො පන සමයෙන භික්ඛූ පත්තහත්ථා කවාටං පණාමෙන්ති. කවාටො ආවට්ටිත්වා පත්තො භිජ්ජති. භගවතො එතමත්ථං ආරොචෙසුං.
“න භික්ඛවෙ, පත්තහත්ථෙන කවාටො පණාමෙතබ්බො. යො පණාමෙය්ය ආපත්ති දුක්කටස්සා”ති.
54. තෙන ඛො පන සමයෙන භික්ඛූ තුම්බකටාහෙ පිණ්ඩාය චරන්ති. මනුස්සා උජ්ඣායන්ති ඛීයන්ති විපාචෙන්ති ‘සෙය්යථාපි තිත්ථියා’ති. භගවතො එතමත්ථං ආරොචෙසුං.
“න භික්ඛවෙ, තුම්බකටාහෙ පිණ්ඩාය චරිතබ්බං. යො චරෙය්ය ආපත්ති දුක්කටස්සා”ති.
55. තෙන ඛො පන සමයෙන භික්ඛූ ඝටිකටාහෙ පිණ්ඩාය චරන්ති. මනුස්සා උජ්ඣායන්ති ඛීයන්ති විපාචෙන්ති: සෙය්යථාපි තිත්ථියා’ති. භගවතො එතමත්ථං ආරොචෙසුං -පෙ-
“න භික්ඛවෙ, ඝටිකටාහෙ පිණ්ඩාය චරිතබ්බං, යො චරෙය්ය ආපත්ති දුක්කටස්සා”ති.
56. තෙන ඛො පන සමයෙන අඤ්ඤතරො භික්ඛු සබ්බපංසුකූලිකො හොති. සො ඡවසීසස්ස පත්තං ධාරෙති, අඤ්ඤතරා ඉත්ථී පස්සිත්වා භීතා විස්සරමකාසි ‘අබ්භුං මෙ, පිසාචො වතායන්ති’. මනුස්සා උජ්ඣායන්ති ඛීයන්ති විපාචෙන්ති, ‘කථං හි නාම සමණා සක්යපුත්තියා ඡවසීසස්ස පත්තං ධාරෙස්සන්ති, සෙය්යථාපි පිසාචිල්ලිකා’ති. භගවතො එතමත්ථං ආරොචෙසුං.
“න භික්ඛවෙ, ඡවසීසස්ස පත්තො ධාරෙතබ්බො. යො ධාරෙය්ය ආපත්ති දුක්කටස්ස. න ච භික්ඛවෙ, සබ්බපංසුකූලිකෙන භවිතබ්බං. යො භවෙය්ය ආපත්ති දුක්කටස්සා”ති.
57. තෙන ඛො පන සමයෙන භික්ඛූ චලකානිපි අට්ඨිකානිපි උච්ඡිට්ඨොදකම්පි පත්තෙන නීහරන්ති. මනුස්සා උජ්ඣායන්ති ඛීයන්ති විපාචෙන්ති ‘යස්මිං යෙවිමෙ සමණා සක්යපුත්තියා භුඤ්ජන්ති සොව නෙසං පටිග්ගහොති’. භගවතො එතමත්ථං ආරොචෙසුං -පෙ-
“න භික්ඛවෙ, චලකානි වා අට්ඨිකානි වා උච්චිට්ඨොදකං වා පත්තෙන නීහරිතබ්බං. යො නීහරෙය්ය, ආපත්ති දුක්කටස්ස. අනුජානාමි භික්ඛවෙ, පටිග්ගහ”න්ති.
58. තෙන ඛො පන සමයෙන භික්ඛූ හත්ථෙන විපාටෙත්වා චීවරං සිබ්බෙන්ති. චීවරං විලොමං හොති. භගවතො එතමත්ථං ආරොචෙසුං.
“අනුජානාමි භික්ඛවෙ, සත්ථකං නමතක”න්ති.
59. තෙන ඛො පන සමයෙන සඞ්ඝස්ස දණ්ඩසත්ථකං උප්පන්නං හොති. භගවතො එතමත්ථං ආරොචෙසුං.
“අනුජානාමි භික්ඛවෙ, දණ්ඩසත්ථක”න්ති.
60. තෙන ඛො පන සමයෙන ඡබ්බග්ගියා භික්ඛූ උච්චාවචෙ සත්ථකදණ්ඩෙ ධාරෙන්ති සොවණ්ණමයං රූපියමයං. මනුස්සා උජ්ඣායන්ති ඛීයන්ති විපාචෙන්ති: ‘සෙය්යථාපි ගිහී කාමභොගිනො’ති. භගවතො එතමත්ථං ආරොචෙසුං. -පෙ-
“න භික්ඛවෙ, උච්චාවචා සත්ථකදණ්ඩා ධාරෙතබ්බා. යො ධාරෙය්ය ආපත්ති දුක්කටස්ස. අනුජානාමි භික්ඛවෙ අට්ඨිමයං දන්තමයං විසාණමයං නළමයං වෙළුමයං කට්ඨමයං ජතුමයං ඵලමයං ලොහමයං සඞ්ඛනාභිමයන්ති.”
61. තෙන ඛො පන සමයෙන භික්ඛූ කුක්කුටපත්තෙන පි වෙළුපෙසිකාය පි චීවරං සිබ්බෙන්ති චීවරං දුස්සිබ්බිතං හොති. භගවතො එතමත්ථං ආරොචෙසුං.
“අනුජානාමි භික්ඛවෙ, සූචික”න්ති.
සූචියො කණ්ණකිතායො හොන්ති.
“අනුජානාමි භික්ඛවෙ, සූචිනාළික”න්ති.
සූචිනාළිකායපි කණ්ණකිතායො හොන්ති.
“අනුජානාමි භික්ඛවෙ, කිණ්ණෙන පූරෙතු”න්ති.
කිණ්ණෙපි කණ්ණකිතායො හොන්ති.
“අනුජානාමි භික්ඛවෙ, සත්තුයා පූරෙතු”න්ති.
සත්තුයාපි කණ්ණකිතායො හොන්ති.
“අනුජානාමි භික්ඛවෙ සරිතක”න්ති.
සරිතකෙනපි කණ්ණකිතායො හොන්ති.
“අනුජානාමි භික්ඛවෙ මධුසිත්ථකෙන සාරෙතු”න්ති.
සරිතකං පරිභිජ්ජති.
“අනුජානාමි භික්ඛවෙ සරිතකසිපාටික”න්ති.
62. තෙන ඛො පන සමයෙන භික්ඛූ තත්ථ තත්ථ ඛිලං නිඛනිත්වා සම්බන්ධිත්වා චීවරං සිබ්බන්ති. චීවරං විකණ්ණං හොති. භගවතො එතමත්ථං ආරොචෙසුං.
“අනුජානාමි භික්ඛවෙ, කඨිනං, කඨිනරජ්ජුං. තත්ථ තත්ථ ඔබන්ධිත්වා චීවරං සිබ්බෙතුන්ති”.
විසමෙ කඨිනං පත්ථරන්ති. කඨිනං පරිභිජ්ජති.
“න භික්ඛවෙ, විසමෙ කඨිනං පත්ථරිතබ්බං. යො පත්ථරෙය්ය ආපත්ති දුක්කටස්සා”ති.
ඡමාය කඨිනං පත්ථරන්ති. කඨිනං පංසුකිතං හොති.
“අනුජානාමි භික්ඛවෙ තිණසන්ථාරකන්ති”.
කඨිනස්ස අන්තො ජීරති.
“අනුජානාමි භික්ඛවෙ, අනුවාතං පරිභණ්ඩං ආරොපෙතුන්ති”.
කඨිනං නප්පහොති.
“අනුජානාමි භික්ඛවෙ, දණ්ඩකඨිනං විදලකං සලාකං විනන්ධනරජ්ජුං විනන්ධනසුත්තකං විනන්ධිත්වා චීවරං සිබ්බෙතුන්ති”.
සුත්තන්තරිකායො විසමා හොන්ති.
“අනුජානාමි භික්ඛවෙ කලිම්බභකන්ති”.
සුත්තා වඞ්කා හොන්ති.
“අනුජානාමි භික්ඛවෙ මොඝසුත්තකන්ති.”
63. තෙන ඛො පන සමයෙන භික්ඛූ අධොතෙහි පාදෙහි කඨිනං අක්කමන්ති. කඨිනං දුස්සති. භගවතො එතමත්ථං ආරොචෙසුං.
“න භික්ඛවෙ අධොතෙහි පාදෙහි කඨිනං අක්කමිතබ්බං. යො අක්කමෙය්ය ආපත්ති දුක්කටස්සාති”.
64. තෙන ඛො පන සමයෙන භික්ඛූ අල්ලෙහි පාදෙහි කඨිනං අක්කමන්ති. කඨිනං දුස්සති. භගවතො එතමත්ථං ආරොචෙසුං.
“න භික්ඛවෙ අල්ලෙහි පාදෙහි කඨිනං අක්කමිතබ්බං. යො අක්කමෙය්ය ආපත්ති දුක්කටස්සා”ති.
65. තෙන ඛො පන සමයෙන භික්ඛූ සඋපාහනා කඨිනං අක්කමන්ති. කඨිනං දුස්සති. භගවතො එතමත්ථං ආරොචෙසුං.
“න භික්ඛවෙ සඋපාහනෙන කඨිනං අක්කමිතබ්බං. යො අක්කමෙය්ය ආපත්ති දුක්කටස්සා”ති.
66. තෙන ඛො පන සමයෙන භික්ඛූ චීවරං සිබ්බෙන්තා අඞ්ගුලියා පටිගණ්හන්ති, අඞ්ගුලියො දුක්ඛා හොන්ති. භගවතො එතමත්ථං ආරොචෙසුං.
“අනුජානාමි භික්ඛවෙ පටිග්ගහන්ති”
67. තෙන ඛො පන සමයෙන ඡබ්බග්ගියා භික්ඛූ උච්චාවචෙ පටිග්ගහොධාරෙන්ති සොවණ්ණමයං රූපීමයං. මනුස්සා උජ්ඣායන්ති ඛීයන්ති විපාචෙන්ති. ‘සෙය්යථාපි ගිහී කාමභොගිනො’ති. භගවතො එතමත්ථං ආරොචෙසුං.
“න භික්ඛවෙ උච්චාවචා පටිග්ගහා ධාරෙතබ්බා. යො ධාරෙය්ය ආපත්ති දුක්කටස්ස. අනුජානාමි භික්ඛවෙ අට්ඨිමයං දන්තමයං විසාණමයං නළමයං වෙළුමයං කට්ඨමයං ජතුමයං ඵලමයං ලොහමයං සඞ්ඛනාභිමයන්ති”.
68. තෙන ඛො පන සමයෙන සූචියොපි සත්ථකාපි පටිග්ගහාපි නස්සන්ති. භගවතො එතමත්ථං ආරොචෙසුං.
“අනුජානාමි භික්ඛවෙ ආවෙසනවිත්ථකන්ති”.
ආවෙසනවිත්ථකෙ සමාකුලා හොන්ති. භගවතො එතමත්ථං ආරොචෙසුං.
“අනුජානාමි භික්ඛවෙ පටිග්ගහන්ති”.
අංසබද්ධකො න හොති.
“අනුජානාමි භික්ඛවෙ අංසබද්ධකං බන්ධනසුත්තකන්ති”.
69. තෙන ඛො පන සමයෙන භික්ඛූ අබ්භොකාසෙ චීවරං සිබ්බන්තා සීතෙනපි උණ්හෙනපි කිලමන්ති. භගවතො එතමත්ථං ආරොචෙසුං.
“අනුජානාමි භික්ඛවෙ, කඨිනසාලං කඨිනමණ්ඩපන්ති”.
කඨිනසාලා නීචවත්ථුකා හොති, උදකෙන ඔත්ථරියති. භගවතො එතමත්ථං ආරොචෙසුං.
“අනුජානාමි භික්ඛවෙ උච්චවත්ථුකං කාතුන්ති”.
චයො පරිපතති.
“අනුජානාමි භික්ඛවෙ චිනිතුං තයො චයෙ ඉට්ඨකාචයං සිලාචයං දාරුචයන්ති”.
ආරොහන්තා විහඤ්ඤන්ති.
“අනුජානාමි භික්ඛවෙ තයො සොපාණෙ ඉට්ඨකාසොපාණං සිලාසොපාණං දාරුසොපාණන්ති”.
ආරොහන්තා පරිපතන්ති.
“අනුජානාමි භික්ඛවෙ ආලම්බනබාහන්ති”.
කඨිනසාලාය තිණචුණ්ණං පරිපතති. “අනුජානාමි භික්ඛවෙ ඔගුම්බෙත්වා උල්ලිත්තාවලිත්තං කාතුං සෙතවණ්ණං කාළවණ්ණං ගෙරුකපරිකම්මං මාලාකම්මං ලතාකම්මං මකරදන්තකං පඤ්චපටිකං චීවරවංසං චීවරරජ්ජුකන්ති”.
70. තෙන ඛො පන සමයෙන භික්ඛූ චීවරං සිබ්බෙත්වා තත්ථෙව කඨිනං උජ්ඣිත්වා පක්කමන්ති. උන්දුරෙහි පි උපචිකාහි පි ඛජ්ජති. භගවතො එතමත්ථං ආරොචෙසුං. “අනුජානාමි භික්ඛවෙ කඨිනං සඞ්ඝරිතුන්ති”.
කඨිනං පරිභිජ්ජති. “අනුජානාමි භික්ඛවෙ ගොඝංසිකාය කඨිනං සඞ්ඝරිතුන්ති”.
කඨිනං විනිවෙඨියති. “අනුජානාමි භික්ඛවෙ බන්ධනරජ්ජුන්ති”.
71. තෙන ඛො පන සමයෙන භික්ඛූ කුඩ්ඩෙ පි ථම්භෙ පි කඨිනං උස්සාපෙත්වා පක්කමන්ති. පරිපතිත්වා කඨිනං භිජ්ජති. භගවතො එතමත්ථං ආරොචෙසුං.
“අනුජානාමි භික්ඛවෙ භිත්තිඛීලෙ වා නාගදන්තෙ වා ලග්ගෙතුන්ති”.
72. අථ ඛො භගවා රාජගහෙ යථාභිරන්තං විහරිත්වා යෙන වෙසාලී තෙන චාරිකං පක්කාමි. තෙන ඛො පන සමයෙන භික්ඛූ සූචිකම්පි සත්ථකම්පි භෙසජ්ජම්පි පත්තෙන ආදාය ගච්ඡන්ති. භගවතො එතමත්ථං ආරොචෙසුං.
“අනුජානාමි භික්ඛවෙ, භෙසජ්ජත්ථවිකන්ති”.
අංසබද්ධකො න හොති.
“අනුජානාමි භික්ඛවෙ අංසබද්ධකං බන්ධනසුත්තකන්ති”.
73. තෙන ඛො පන සමයෙන අඤ්ඤතරො භික්ඛු උපාහනායො කායබන්ධනෙන බන්ධිත්වා ගාමං පිණ්ඩාය පාවිසි. අඤ්ඤතරො උපාසකො තං භික්ඛුං අභිවාදෙන්තො උපාහනායො සීසෙන ඝට්ටෙසි. සො භික්ඛු මඞ්කූ අහොසි. අථ ඛො සො භික්ඛු ආරාමං ගන්ත්වා භික්ඛූනං එතමත්ථං ආරොචෙසි. භික්ඛූ භගවතො එතමත්ථං ආරොචෙසුං.
“අනුජානාමි භික්ඛවෙ උපාහනත්ථවිකන්ති”.
අංසබද්ධකො න හොති.
“අනුජානාමි භික්ඛවෙ අංසබද්ධකං බන්ධනසුත්තකන්ති”.
74. තෙන ඛො පන සමයෙන අන්තරාමග්ගෙ උදකං අකප්පියං හොති. පරිස්සාවනං න හොති. භගවතො එතමත්ථං ආරොචෙසුං. “අනුජානාමි භික්ඛවෙ පරිස්සාවනන්ති”.
චොළකං නප්පහොති.
“අනුජානාමි භික්ඛවෙ කටච්ඡුපරිස්සාවනන්ති”. චොළකං නප්පහොති. භගවතො එතමත්ථං ආරොචෙසුං. “අනුජානාමි භික්ඛවෙ ධම්මකරකන්ති”.
75. තෙන ඛො පන සමයෙන ද්වෙ භික්ඛූ කොසලෙසු ජනපදෙසු අද්ධානමග්ගපටිපන්නා හොන්ති. එකො භික්ඛු අනාචාරං ආචරති. දුතියො භික්ඛු තං භික්ඛුං එතදවොච, ‘මා ආවුසො එවරූපං අකාසි. නෙතං කප්පතී’ති. සො තස්මිං උපනද්ධි{1}. අථ ඛො සො භික්ඛු පිපාසාය පීළිතො උපනද්ධං භික්ඛුං එතදවොච ‘දෙහි මෙ ආවුසො පරිස්සාවනං පානීයං පිවිස්සාමී’ති. උපනද්ධො භික්ඛු න අදාසි. සො භික්ඛු පිපාසාය පීළිතො කාලමකාසි. අථ ඛො සො භික්ඛු ආරාමං ගන්ත්වා භික්ඛූනං එතමත්ථං ආරොචෙසි. “කිම්පන ත්වං ආවුසො පරිස්සාවනං යාචියමානො න අදාසී”ති. ‘එවමාවුසො’ති. යෙ තෙ භික්ඛූ අප්පිච්ඡා සන්තුට්ඨා ලජ්ජිනො කුක්කුච්චකා සික්ඛාකාමා තෙ උජ්ඣායන්ති ඛීයන්ති විපාචෙන්ති, ‘කථං හි නාම භික්ඛු පරිස්සාවනං යාචියමානො න දස්සතී’ති. අථ ඛො තෙ භික්ඛූ භගවතො එතමත්ථං ආරොචෙසුං.
අථ ඛො භගවා එතස්මිං නිදානෙ එතස්මිං පකරණෙ භික්ඛුසඞ්ඝං සන්නිපාතාපෙත්වා තං භික්ඛුං පටිපුච්ඡි ‘සච්චං කිර ත්වං භික්ඛු පරිස්සාවනං යාචියමානො න අදාසී’ති. ‘සච්චං භගවා’. විගරහි බුද්ධො භගවා, ‘අනනුච්ඡවිකං මොඝපුරිස අනනුලොමිකං අප්පතිරූපං අස්සාමණකං අකප්පියං අකරණීයං, කථං හි නාම ත්වං මොඝපුරිස, පරිස්සාවනං යාචියමානො න දස්සසි? නෙතං මොඝපුරිස අප්පසන්නානං වා පසාදාය පසන්නානං වා භිය්යොභාවාය. අථ ඛ්වෙතං මොඝපුරිස අප්පසන්නානං චෙව අප්පසාදාය පසන්නානඤ්ච එකච්චානං අඤ්ඤථත්තායා’ති. විගරහිත්වා ධම්මිං කථං කත්වා භික්ඛූ ආමන්තෙසි. “න භික්ඛවෙ, අද්ධානමග්ගප්පටිපන්නෙන භික්ඛුනා පරිස්සාවනං යාචියමානෙන න දාතබ්බං යො න දදෙය්ය ආපත්ති දුක්කටස්ස, න ච භික්ඛවෙ අපරිස්සාවනකෙන අද්ධානො පටිපජ්ජිතබ්බො. යො පටිපජ්ජෙය්ය ආපත්ති දුක්කටස්ස. සචෙ න හොති පරිස්සාවනං වා ධම්මකරණො වා සඞ්ඝාටිකණ්ණො පි අධිට්ඨාතබ්බො ඉමිනා පරිස්සාවෙත්වා පිවිස්සාමී”ති.
76. අථ ඛො භගවා අනුපුබ්බෙන චාරිකං චරමානො යෙන වෙසාලී තදවසරි. තත්ර සුදං භගවා වෙසාලියං විහරති මහාවනෙ කූටාගාරසාලායං . තෙන ඛො පන සමයෙන භික්ඛූ නවකම්මං කරොන්ති. පරිස්සාවනං න සම්මති. භගවතො එතමත්ථං ආරොචෙසුං.
“අනුජානාමි භික්ඛවෙ දණ්ඩපරිස්සාවනන්ති”. දණ්ඩපරිස්සාවනං න සම්මති. භගවතො එතමත්ථං ආරොචෙසුං. “අනුජානාමි භික්ඛවෙ ඔත්ථරකන්ති”.
77. තෙන ඛො පන සමයෙන භික්ඛූ මකසෙහි උබ්බාළ්හා හොන්ති. භගවතො එතමත්ථං ආරොචෙසුං. “අනුජානාමි භික්ඛවෙ මකසකුටිකන්ති”.
78. තෙන ඛො පන සමයෙන වෙසාලියං පණීතානං භත්තානං භත්තපටිපාටි අධිට්ඨිතා හොති. භික්ඛූ පණීතානි භොජනානි භුඤ්ජිත්වා අභිසන්නකායා හොන්ති බහ්වාබාධා. අථ ඛො ජීවකො කොමාරභච්චො වෙසාලිං අගමාසි කෙනචිදෙව කරණීයෙන. අද්දසා ඛො ජීවකො කොමාරභච්චො භික්ඛූ අභිසන්නකායෙ බහ්වාබාධෙ. දිස්වාන යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං නිසීදි. එකමන්තං නිසින්නො ඛො ජීවකො කොමාරභච්චො භගවන්තං එතදවොච: එතරහි භන්තෙ භික්ඛූ අභිසන්නකායා බහ්වාබාධා. සාධු භන්තෙ භගවා භික්ඛූනං චඞ්කමඤ්ච ජන්තාඝරඤ්ච අනුජානාතු. එවං භික්ඛූ අප්පාබාධා භවිස්සන්තීති.
අථ ඛො භගවා ජීවකං කොමාරභච්චං ධම්මියා කථාය සන්දස්සෙසි සමාදපෙසි සමුත්තෙජෙසි සම්පහංසෙසි. අථ ඛො ජීවකො කොමාරභච්චො භගවතා ධම්මියා කථාය සන්දස්සිතො සමාදපිතො සමුත්තෙජිතො සම්පහංසිතො උට්ඨායාසනා භගවන්තං අභිවාදෙත්වා පදක්ඛිණං කත්වා පක්කාමි.
අථ ඛො භගවා එතස්මිං නිදානෙ එතස්මිං පකරණෙ ධම්මිං කථං කත්වා භික්ඛූ ආමන්තෙසි: “අනුජානාමි භික්ඛවෙ චඞ්කමඤ්ච ජන්තාඝරඤ්චාති.
තෙන ඛො පන සමයෙන භික්ඛූ විසමෙ චඞ්කමෙ චඞ්කමන්ති. පාදා දුක්ඛා හොන්ති. භගවතො එතමත්ථං ආරොචෙසුං. “අනුජානාමි භික්ඛවෙ සමං කාතුන්ති”. චඞ්කමො නීචවත්ථුකො හොති. උදකෙන ඔත්ථරියති “අනුජානාමි භික්ඛවෙ උච්චවත්ථුකං කාතුන්ති.” චයො පරිපතති. “අනුජානාමි භික්ඛවෙ චිනිතුං තයො චයෙ: ඉට්ඨකාචයං සිලාචයං දාරුචයන්ති.”
ආරොහන්තා විහඤ්ඤන්ති. “අනුජානාමි භික්ඛවෙ තයො සොපාණෙ ඉට්ඨකාසොපාණං සිලාසොපාණං, දාරුසොපාණන්ති.”
ආරොහන්තා පරිපතන්ති. අනුජානාමි භික්ඛවෙ ආලම්බනබාහන්ති.
79. තෙන ඛො පන සමයෙන භික්ඛූ චඞ්කමෙ චඞ්කමන්තා පරිපතන්ති. භගවතො එතමත්ථං ආරොචෙසුං. “අනුජානාමි භික්ඛවෙ චඞ්කමනවෙදිකන්ති.”