Cullavagga

10. තෙන ඛො පන සමයෙන අඤ්ඤතරො භික්ඛු ජරාදුබ්බලො නහායමානො න සක්කොති අත්තනො කායං උග්ඝංසෙතුං. භගවතො එතමත්ථං ආරොචෙසුං.

11. තෙන ඛො පන සමයෙන භික්ඛූ පිට්ඨිපරිකම්මං කාතුං කුක්කුච්චායන්ති. භගවතො එතමත්ථං ආරොචෙසුං.

12-19. තෙන ඛො පන සමයෙන ඡබ්බග්ගියා භික්ඛූ වල්ලිකං, ධාරෙන්ති -පෙ- පාමඞ්ගං ධාරෙන්ති, -පෙ- කණ්ඨසුත්තකං ධාරෙන්ති -පෙ- කටිසුත්තකං ධාරෙන්ති, -පෙ- ඔවට්ටිකං ධාරෙන්ති, -පෙ- කෙයූරං{1} ධාරෙන්ති, -පෙ- හත්ථාභරණං ධාරෙන්ති, -පෙ- අඞ්ගුලිමුද්දිකං ධාරෙන්ති. මනුස්සා උජ්ඣායන්ති ඛීයන්ති විපාචෙන්ති “සෙය්යථාපි ගිහී කාමභොගිනො”ති. අස්සොසුං ඛො භික්ඛූ තෙසං මනුස්සානං උජ්ඣායන්තානං ඛීයන්තානං විපාචෙන්තානං. අථ ඛො තෙ භික්ඛූ භගවතො එතමත්ථං ආරොචෙසුං “සච්චං කිර භික්ඛවෙ ඡබ්බග්ගියා භික්ඛූ වල්ලිකං ධාරෙන්ති. පාමඞ්ගං ධාරෙන්ති -පෙ- කණ්ඨසුත්තකං ධාරෙන්ති. -පෙ- කටිසුත්තකං ධාරෙන්ති. ඔවට්ටිකං ධාරෙන්ති -පෙ- කෙයූරං ධාරෙන්ති -පෙ- හත්ථාභරණං ධාරෙන්ති. -පෙ- අඞ්ගුලිමුද්දිකං ධාරෙන්තී”ති. ‘සච්චං භගවා’. -පෙ- විගරහිත්වා ධම්මිං කථං කත්වා භික්ඛූ ආමන්තෙසි:

20. තෙන ඛො පන සමයෙන ඡබ්බග්ගියා භික්ඛූ දීඝෙ කෙසෙ ධාරෙන්ති. මනුස්සා උජ්ඣායන්ති ඛීයන්ති විපාචෙන්ති ‘සෙය්යථාපි ගිහී කාමභොගිනොති. භගවතො එතමත්ථං ආරොචෙසුං. -පෙ-

21-25. තෙන ඛො පන සමයෙන ඡබ්බග්ගියා භික්ඛූ කොච්ඡෙන කෙසෙ ඔසණෙහන්ති. -පෙ- ඵණකෙන කෙසෙ ඔසණෙහන්ති. -පෙ- හත්ථඵණකෙන කෙසෙ ඔසණෙහන්ති. -පෙ- සිත්ථතෙලකෙන කෙසෙ ඔසණෙහන්ති. උදකතෙලකෙන කෙසෙ ඔසණෙහන්ති. මනුස්සා උජ්ඣායන්ති ඛීයන්ති විපාචෙන්ති සෙය්යථාපි ගිහී කාමභොගිනො”ති. භගවතො එතමත්ථං ආරොචෙසුං. -පෙ-

26. තෙන ඛො පන සමයෙන ඡබ්බග්ගියා භික්ඛූ ආදාසෙ’පි උදකපත්තෙ’පි මුඛනිමිත්තං ඔලොකෙන්ති. මනුස්සා උජ්ඣායන්ති ඛීයන්ති විපාචෙන්ති ‘සෙය්යථාපි ගිහී කාමභොගිනො’ති. භගවතො එතමත්ථං ආරොචෙසුං.

27. තෙන ඛො පන සමයෙන අඤ්ඤතරස්ස භික්ඛුනො මුඛෙ වණො හොති. සො භික්ඛූ පුච්ඡි ‘කීදිසො මෙ ආවුසො වණො’ති. භික්ඛූ එවමාහංසු ‘ඊදිසො තෙ ආවුසො වණො’ති. සො න සද්දහති. භගවතො එතමත්ථං ආරොචෙසුං.

28. තෙන ඛො පන සමයෙන ඡබ්බග්ගියා භික්ඛූ මුඛං ආලිම්පන්ති, -පෙ- මුඛං උම්මද්දෙන්ති, මුඛං චුණ්ණෙන්ති, මනොසිලිකාය මුඛං ලඤ්ඡෙන්ති, අඞ්ගරාගං කරොන්ති, මුඛරාගං කරොන්ති, අඞ්ගරාගමුඛරාගං කරොන්ති. මනුස්සා උජ්ඣායන්ති ඛීයන්ති විපාචෙන්ති ‘සෙය්යථාපි ගිහී කාමභොගිනො’ති. භගවතො එතමත්ථං ආරොචෙසුං. -පෙ-

29. තෙන ඛො පන සමයෙන අඤ්ඤතරස්ස භික්ඛුනො චක්ඛුරොගාබාධො හොති. භගවතො එතමත්ථං ආරොචෙසුං.

30. තෙන ඛො පන සමයෙන රාජගහෙ ගිරග්ගසමජ්ජොහොති. ඡබ්බග්ගියා භික්ඛූ ගිරග්ගසමජ්ජං දස්සනාය අගමංසු. මනුස්සා උජ්ඣායන්ති ඛීයන්ති විපාචෙන්ති “කථං හි නාම සමණා සක්යපුත්තියා නච්චම්පි ගීතම්පි වාදිතම්පි දස්සනාය ගච්ඡිස්සන්ති, සෙය්යථාපි ගිහී කාමභොගිනො”ති. භගවතො එතමත්ථං ආරොචෙසුං. -පෙ-

31. තෙන ඛො පන සමයෙන ඡබ්බග්ගියා භික්ඛූ ආයතකෙන ගීතස්සරෙන ධම්මං ගායන්ති. මනුස්සා උජ්ඣායන්ති ඛීයන්ති විපාචෙන්ති ‘යථෙව මයං ගායාම, එවමෙවිමෙ සමණා සක්යපුත්තියා ආයතකෙන ගීතස්සරෙන ධම්මං ගායන්තී’ති. අස්සොසුං ඛො භික්ඛූ තෙසං මනුස්සානං උජ්ඣායන්තානං ඛීයන්තානං විපාචෙන්තානං. යෙ තෙ භික්ඛූ අප්පිච්ඡා සන්තුට්ඨා ලජ්ජිනො කුක්කුච්චකා සික්ඛාකාමා තෙ උජ්ඣායන්ති ඛීයන්ති විපාචෙන්ති කථං හි නාම ඡබ්බග්ගියා භික්ඛූ ආයතකෙන ගීතස්සරෙන ධම්මං ගායිස්සන්තී’ති. අථ ඛො තෙ භික්ඛූ භගවතො එතමත්ථං ආරොචෙසුං. සච්චං කිර භික්ඛවෙ -පෙ- සච්චං භගවාති -පෙ- විගරහිත්වා ධම්මිං කථං කත්වා භික්ඛූ ආමන්තෙසි.

තෙන ඛො පන සමයෙන භික්ඛූ සරභඤ්ඤෙ කුක්කුච්චායන්ති. භගවතො එතමත්ථං ආරොචෙසුං. “අනුජානාමි භික්ඛවෙ සරභඤ්ඤන්ති.”

32. තෙන ඛො පන සමයෙන ඡබ්බග්ගියා භික්ඛූ බාහිරලොමිං උණ්ණිං ධාරෙන්ති. මනුස්සා උජ්ඣායන්ති ඛීයන්ති විපාචෙන්ති ‘සෙය්යථාපි ගිහී කාමභොගිනො’ති. භගවතො එතමත්ථං ආරොචෙසුං -පෙ-

33. තෙන ඛො පන සමයෙන රඤ්ඤො මාගධස්ස සෙනියස්ස බිම්බිසාරස්ස ආරාමෙ අම්බා ඵලිනො හොන්ති. රඤ්ඤා මාගධෙන සෙනියෙන බිම්බිසාරෙන අනුඤ්ඤාතං හොති ‘යථාසුඛං අය්යා අම්බං පරිභුඤ්ජන්තූ’ති. ඡබ්බග්ගියා භික්ඛූ තරුණඤ්චෙව අම්බං පාතාපෙත්වා පරිභුඤ්ජිංසු. රඤ්ඤො ච මාගධස්ස සෙනියස්ස බිම්බිසාරස්ස අම්බෙන අත්ථො හොති. අථ ඛො රාජා මාගධො සෙනියො බිම්බිසාරො මනුස්සෙ ආණාපෙසි ‘ගච්ඡථ භණෙ ආරාමං, ගන්ත්වා අම්බං ආහරථා’ති . ‘එවං දෙවා’ති ඛො තෙ මනුස්සා රඤ්ඤො මාගධස්ස සෙනියස්ස බිම්බිසාරස්ස පටිස්සුත්වා ආරාමං ගන්ත්වා ආරාමපාලං එතදවොචුං ‘දෙවස්ස භණෙ අම්බෙන අත්ථො අම්බං දෙථා’ති. ‘නත්ථාය්යා අම්බං. තරුණං යෙව අම්බං පාතාපෙත්වා භික්ඛූ පරිභුඤ්ජිංසූ’ති.

අථ ඛො තෙ මනුස්සා රඤ්ඤො මාගධස්ස සෙනියස්ස බිම්බිසාරස්ස එතමත්ථං ආරොචෙසුං. “සුපරිභූත්තං භණෙ අය්යෙහි අම්බං. අපි ච භගවතා මත්තා වණ්ණිතා’ති. මනුස්සා උජ්ඣායන්ති ඛීයන්ති විපාචෙන්ති ‘කථං හි නාම සමණා සක්යපුත්තියා න මත්තං ජානිත්වා රඤ්ඤො අම්බං පරිභුඤ්ජිස්සන්තී’ති. අස්සොසුං ඛො භික්ඛූ තෙසං මනුස්සානං උජ්ඣායන්තානං ඛීයන්තානං විපාචෙන්තානං. අථ ඛො තෙ භික්ඛූ භගවතො එතමත්ථං ආරොචෙසුං. -පෙ-

34. තෙන ඛො පන සමයෙන අඤ්ඤතරස්ස පූගස්ස සඞ්ඝභත්තං හොති. සූපෙ අම්බපෙසිකායො පක්ඛිත්තා හොන්ති. භික්ඛූ කුක්කුච්චායන්තා න පටිගණ්හන්ති.

තෙන ඛො පන සමයෙන අඤ්ඤතරස්ස පූගස්ස සඞ්ඝභත්තං හොති. තෙ න පරියාපුණිංසු අම්බපෙසිකං කාතුං. භත්තග්ගෙ සකලෙහෙව අම්බෙහි චරන්ති. භික්ඛූ කුක්කුච්චායන්තා න පටිගණ්හන්ති.

35. තෙන ඛො පන සමයෙන අඤ්ඤතරො භික්ඛු අහිනා දට්ඨො කාලකතො{1} හොති. භගවතො එතමත්ථං ආරොචෙසුං. නහ නූන සො භික්ඛවෙ භික්ඛු ඉමානි චත්තාරි අහිරාජකුලානි මෙත්තෙන චිත්තෙන ඵරි. සචෙ හි සො භික්ඛවෙ, භික්ඛු ඉමානි චත්තාරි අහිරාජකුලානි මෙත්තෙන චිත්තෙන ඵරෙය්ය, න හි සො භික්ඛවෙ භික්ඛු අහිනා දට්ඨො කාලං කරෙය්ය. කතමානි චත්තාරි අහිරාජකුලානි: විරූපක්ඛං අහිරාජකුලං, එරාපථං අහිරාජකුලං, ඡබ්යාපුත්තං අහිරාජකුලං, කණ්හාගොතමකං අහිරාජකුලං, නහ{2} නූන සො භික්ඛවෙ භික්ඛු ඉමානි චත්තාරි අහිරාජකුලානි මෙත්තෙන චිත්තෙන ඵරි. සචෙ හි සො භික්ඛවෙ භික්ඛු ඉමානි චත්තාරි අහිරාජකුලානි මෙත්තෙන චිත්තෙන ඵරෙය්ය, න හි සො භික්ඛවෙ භික්ඛු අහිනා දට්ඨො කාලං කරෙය්ය. අනුජානාමි භික්ඛවෙ ඉමානි චත්තාරි අහිරාජකුලානි මෙත්තෙන චිත්තෙන ඵරිතුං, අත්තගුත්තියා අත්තරක්ඛාය අත්තපරිත්තං කාතුං. එවඤ්ච පන භික්ඛවෙ කාතබ්බං:

“විරූපක්ඛෙහි මෙ මෙත්තං මෙත්තං එරාපථෙහි මෙ ඡබ්යාපුත්තෙහි මෙ මෙත්තං මෙත්තං කණ්හාගොතමකෙහි ච

අපාදකෙහි මෙ මෙත්තං මෙත්තං දිපාදකෙහි මෙ චතුප්පදෙහි මෙ මෙත්තං මෙත්තං බහුප්පදෙහි මෙ

මා මං අපාදකො හිංසි මා මං හිංසි දිපාදකො මා මං චතුප්පදො හිංසි මා මං හිංසි බහුප්පදො

සබ්බෙ සත්තා සබ්බෙ පාණා සබ්බෙ භූතා ච කෙවලා සබ්බෙ භද්රානි පස්සන්තු මා කඤ්චි පාපමාගමා

අප්පමාණො බුද්ධො අප්පමාණො ධම්මො අප්පමාණො සඞ්ඝො

පමාණවන්තානි සිරිංසපානි{1} අහි විච්ඡිකා සතපදී උණ්ණනාභි

සරබූ මූසිකා කතා මෙ රක්ඛා කතා මෙ පරිත්තා පටික්කමන්තු භූතානි

සො’හං නමො භගවතො නමො සත්තන්නං සම්මාසම්බුද්ධානන්ති.”

36. තෙන ඛො පන සමයෙන අඤ්ඤතරො භික්ඛු අනභිරතියා පීළිතො අත්තනො අඞ්ගජාතං ඡින්දි. භගවතො එතමත්ථං ආරොචෙසුං. “අඤ්ඤම්හි සො භික්ඛවෙ මොඝපුරිසො ඡෙත්තබ්බම්හි, අඤ්ඤං ඡින්දි.

37. තෙන ඛො පන සමයෙන රාජගහකස්ස සෙට්ඨිස්ස මහග්ඝස්ස චන්දනස්ස චන්දනගණ්ඨි උප්පන්නා හොති. අථ ඛො රාජගහකස්ස සෙට්ඨිස්ස එතදහොසි: ‘යන්නූනාහං ඉමාය චන්දනගණ්ඨියා පත්තං ලිඛාපෙය්යං, ලෙඛඤ්ච මෙ පරිභොගං භවිස්සති, පත්තං ච දානං, දස්සාමී’ති. අථ ඛො රාජගහකො සෙට්ඨි තාය චන්දනගණ්ඨියා පත්තං ලිඛාපෙත්වා සික්කාය වාහිත්වා වෙළග්ගෙ ආලග්ගෙත්වා වෙළුපරම්පරාය බන්ධිත්වා එවමාහ: ‘යො සමණො වා බ්රාහ්මණො වා අරහා චෙව ඉද්ධිමා ච දින්නං යෙව පත්තං ඔහරතූ’ති.

අථ ඛො පූරණො කස්සපො යෙන රාජගහකො සෙට්ඨි තෙනුපසඞ්කමි. උපසඞ්කමිත්වා රාජගහකං සෙට්ඨිං එතදවොච: ‘අහං හි ගහපති, අරහා චෙව ඉද්ධිමා ච දෙහි මෙ පත්තන්ති. ‘සචෙ භන්තෙ ආයස්මා අරහා චෙව ඉද්ධිමා ච දින්නං යෙව පත්තං ඔහරතූ’ති.

අථ ඛො මක්ඛලිගොසාලො අජිතො කෙසකම්බලො පකුධො කච්චායනො සඤ්ජයො බෙලට්ඨිපුත්තො නිගණ්ඨො නාතපුත්තො යෙන රාජගහකො සෙට්ඨි තෙනුපසඞ්කමි. උපසඞ්කමිත්වා රාජගහකං සෙට්ඨිං එතදවොච: ‘අහං හි, ගහපති අරහා චෙව ඉද්ධිමා ච, දෙහි මෙ පත්තන්ති’. ‘සචෙ භන්තෙ, ආයස්මා අරහා චෙව ඉද්ධිමා ච දින්නං යෙව පත්තං, ඔහරතූ’ති.

තෙන ඛො පන සමයෙන ආයස්මා ච මහාමොග්ගල්ලානො ආයස්මා ච පිණ්ඩොලභාරද්වාජො පුබ්බන්හසමයං නිවාසෙත්වා පත්තචීවරමාදාය රාජගහං පිණ්ඩාය පවිසිංසු. අථ ඛො ආයස්මා පිණ්ඩොලභාරද්වාජො ආයස්මන්තං මහාමොග්ගල්ලානං එතදවොච: ‘ආයස්මා ඛො මහාමොග්ගල්ලානො අරහා චෙව ඉද්ධිමා ච ගච්ඡාවුසො මොග්ගල්ලාන, එතං පත්තං ඔහර, තුය්හෙසො පත්තො’ති. ‘ආයස්මාපි ඛො පිණ්ඩොලභාරද්වාජො අරහා චෙව ඉද්ධිමා ච. ගච්ඡාවුසො භාරද්වාජ, එතං පත්තං ඔහර. තුය්හෙසො පත්තො’ති. අථ ඛො ආයස්මා පිණ්ඩොලභාරද්වාජො වෙහාසං අබ්භුග්ගන්ත්වා තං පත්තං ගහෙත්වා තික්ඛත්තුං රාජගහං අනුපරියායි.

තෙන ඛො පන සමයෙන රාජගහකො සෙට්ඨි සපුත්තදාරො සකෙ නිවෙසනෙ ඨිතො හොති පඤ්ජලිකො නමස්සමානො. ‘ඉධෙව භන්තෙ අය්යො භාරද්වාජො අම්හාකං නිවෙසනෙ පතිට්ඨාතූ’ති. අථ ඛො ආයස්මා පිණ්ඩොලභාරද්වාජො රාජගහකස්ස සෙට්ඨිස්ස නිවෙසනෙ පතිට්ඨාසි. අථ ඛො රාජගහකො සෙට්ඨි ආයස්මතො පිණ්ඩොලභාරද්වාජස්ස හත්ථතො පත්තං ගහෙත්වා මහග්ඝස්ස ඛාදනීයස්ස පූරෙත්වා ආයස්මතො පිණ්ඩොලභාරද්වාජස්ස පාදාසි. අථ ඛො ආයස්මා පිණ්ඩොලභාරද්වාජො තං පත්තං ගහෙත්වා ආරාමං අගමාසි. අස්සොසුං ඛො මනුස්සා ‘අය්යෙන කිර පිණ්ඩොලභාරද්වාජෙන රාජගහකස්ස සෙට්ඨිස්ස පත්තො ඔහාරිතො’ති. තෙ ච මනුස්සා උච්චාසද්දා මහාසද්දා ආයස්මන්තං පිණ්ඩොලභාරද්වාජං පිට්ඨිතො අනුබන්ධිංසු. අස්සොසි ඛො භගවා උච්චාසද්දං, මහාසද්දං, සුත්වාන ආයස්මන්තං ආනන්දං ආමන්තෙසි: කින්නු ඛො සො ආනන්ද, උච්චාසද්දා මහාසද්දා’ති.

‘ආයස්මතා භන්තෙ, පිණ්ඩොලභාරද්වාජෙන රාජගහකස්ස සෙට්ඨිස්ස පත්තො ඔහාරිතො, අස්සොසුං ඛො භන්තෙ, මනුස්සා අය්යෙන කිර පිණ්ඩොලභාරද්වාජෙන රාජගහකස්ස සෙට්ඨිස්ස පත්තො ඔහාරිතොති. තෙ ච භන්තෙ මනුස්සා උච්චාසද්දා මහාසද්දා ආයස්මන්තං පිණ්ඩොලභාරද්වාජං පිට්ඨිතො පිට්ඨිතො අනුබද්ධා. සො එසො භන්තෙ, භගවා, උච්චාසද්දො මහාසද්දො’ති.

අථ ඛො භගවා එතස්මිං නිදානෙ එතස්මිං පකරණෙ භික්ඛුසඞ්ඝං සන්නිපාතාපෙත්වා ආයස්මන්තං පිණ්ඩොලභාරද්වාජං පටිපුච්ඡි ‘සච්චං කිර තයා භාරද්වාජ, රාජගහකස්ස සෙට්ඨිස්ස පත්තො ඔහාරිතො’ති.

‘සච්චං භගවා’.

විගරහි බුද්ධො භගවා, ‘අනනුච්ඡවිකං භාරද්වාජ අනනුලොමිකං අප්පතිරූපං අස්සාමණකං අකප්පියං අකරණීයං කථං හි නාම ත්වං භාරද්වාජ, ඡවස්ස දාරුපත්තස්ස කාරණා ගිහීනං උත්තරිමනුස්සධම්මං ඉද්ධිපාටිහාරියං දස්සෙස්සසි. සෙය්යථාපි භාරද්වාජ, මාතුගාමො ඡවස්ස මාසකරූපස්ස කාරණා කොපීනං දස්සෙති, එවමෙව ඛො තයා භාරද්වාජ, ඡවස්ස දාරුපත්තස්ස කාරණා ගිහීනං උත්තරිමනුස්සධම්මං ඉද්ධිපාටිහාරියං දස්සිතං. නෙතං භාරද්වාජ, අප්පසන්නානං වා පසාදාය පසන්නානං වා වා භිය්යොභාවාය. අථ ඛ්වෙතං භාරද්වාජ අප්පසන්නානං චෙව අප්පසාදාය පසන්නානං ච එකච්චානං අඤ්ඤථත්තායා’ති.

විගරහිත්වා ධම්මිං කථං කත්වා භික්ඛූ ආමන්තෙසි:

38. තෙන ඛො පන සමයෙන ඡබ්බග්ගියා භික්ඛූ උච්චාවචෙ පත්තෙ ධාරෙන්ති සොවණ්ණමයං රූපියමයං. මනුස්සා උජ්ඣායන්ති ඛීයන්ති විපාචෙන්ති, ‘සෙය්යථාපි ගිහී කාමභොගිනො’ති. භගවතො එතමත්ථං ආරොචෙසුං -පෙ-

39. තෙන ඛො පන සමයෙන පත්තමූලං ඝංසියති. භගවතො එතමත්ථං ආරොචෙසුං.

තෙන ඛො පන සමයෙන ඡබ්බග්ගියා භික්ඛූ උච්චාවචානි පත්තමණ්ඩලානි ධාරෙන්ති සොවණ්ණමයං රූපියමයං. මනුස්සා උජ්ඣායන්ති ඛීයන්ති විපාචෙන්ති: ‘සෙය්යථාපි ගිහී කාමභොගිනො’ති. භගවතො එතමත්ථං ආරොචෙසුං. -පෙ-

බහලානි මණ්ඩලානි නාච්ඡුපියන්ති. භගවතො එතමත්ථං ආරොචෙසුං.

වලී හොන්ති -පෙ-

40. තෙන ඛො පන සමයෙන ඡබ්බග්ගියා භික්ඛූ චිත්රානි පත්තමණ්ඩලානි ධාරෙන්ති රූපකාකිණ්ණානි භිත්තිකම්මකතානි. තානි රථිකායපි දස්සෙන්තා ආහිණ්ඩන්ති. මනුස්සා උජ්ඣායන්ති ඛීයන්ති විපාචෙන්ති, ‘සෙය්යථාපි ගිහී කාමභොගිනොති’. භගවතො එතමත්ථං ආරොචෙසුං. -පෙ-

41. තෙන ඛො පන සමයෙන භික්ඛූ සඋදකං පත්තං පටිසාමෙන්ති. පත්තො දුස්සති. භගවතො එතමත්ථං ආරොචෙසුං.

42. තෙන ඛො පන සමයෙන භික්ඛූ සොදකං පත්තං ඔතාපෙන්ති. පත්තො දුග්ගන්ධො හොති. භගවතො එතමත්ථං ආරොචෙසුං.

43. තෙන ඛො පන සමයෙන භික්ඛූ උණ්හෙ පත්තං නිදහන්ති. පත්තස්ස වණ්ණො දුස්සති. භගවතො එතමත්ථං ආරොචෙසුං.

44. තෙන ඛො පන සමයෙන සම්බහුලා පත්තා අජ්ඣොකාසෙ අනාධාරා නික්ඛිත්තා හොන්ති. වාතමණ්ඩලිකාය ආවට්ටිත්වා පත්තා භිජ්ජිංසු. භගවතො එතමත්ථං ආරොචෙසුං.

45. තෙන ඛො පන සමයෙන භික්ඛූ මිඪන්තෙ පත්තං නික්ඛිපන්ති. පරිපතිත්වා පත්තො භිජ්ජති. භගවතො එතමත්ථං ආරොචෙසුං.

46. තෙන ඛො පන සමයෙන භික්ඛූ පරිභණ්ඩන්තෙ පත්තං නික්ඛිපන්ති. පරිපතිත්වා පත්තො භිජ්ජති. භගවතො එතමත්ථං ආරොචෙසුං.

47. තෙන ඛො පන සමයෙන භික්ඛූ ඡමාය පත්තං නික්කුජ්ජන්ති. ඔට්ඨො ඝංසියති. භගවතො එතමත්ථං ආරොචෙසුං.

තිණසන්ථාරකො උපචිකාහි ඛජ්ජති. භගවතො එතමත්ථං ආරොචෙසුං.

චොළකං උපචිකාහි ඛජ්ජති. භගවතො එතමත්ථං ආරොචෙසුං.

පත්තමාලකා පරිපතිත්වා පත්තො භිජ්ජති. භගවතො එතමත්ථං ආරොචෙසුං.

පත්තකණ්ඩොලිකාය පත්තො ඝංසියති. භගවතො එතමත්ථං ආරොචෙසුං.

අංසබන්ධකො න හොති. භගවතො එතමත්ථං ආරොචෙසුං.

48. තෙන ඛො පන සමයෙන භික්ඛූ භිත්තිඛිලෙපි නාගදන්තකෙපි පත්තං ලග්ගෙන්ති. පරිපතිත්වා පත්තො භිජ්ජති. භගවතො එතමත්ථං ආරොචෙසුං.

49. තෙන ඛො පන සමයෙන භික්ඛූ මඤ්චෙ පත්තං නික්ඛිපන්ති, සතිසම්මොසා නිසීදන්තා ඔත්ථරිත්වා පත්තං භින්දන්ති, භගවතො එතමත්ථං ආරොචෙසුං.

50. තෙන ඛො පන සමයෙන භික්ඛූ පීඨෙ පත්තං නික්ඛිපන්ති, සතිසම්මොසා නිසීදන්තා ඔත්ථරිත්වා පත්තං භින්දන්ති. භගවතො එතමත්ථං ආරොචෙසුං.

51. තෙන ඛො පන සමයෙන භික්ඛූ අඞ්කෙ පත්තං නික්ඛිපන්ති, සතිසම්මොසා වුට්ඨහන්ති. පරිපතිත්වා පත්තො භිජ්ජති. භගවතො එතමත්ථං ආරොචෙසුං.

52. තෙන ඛො පන සමයෙන භික්ඛූ ඡත්තෙ පත්තං නික්ඛිපන්ති. වාතමණ්ඩලිකාය ඡත්තං උක්ඛිපීයති. පරිපතිත්වා පත්තො භිජ්ජති. භගවතො එතමත්ථං ආරොචෙසුං.