පඨමං භික්ඛු යාචිතබ්බො. යාචිත්වා ව්යත්තෙන භික්ඛුනා පටිබලෙන සඞ්ඝො ඤාපෙතබ්බො:
සුණාතු මෙ භන්තෙ සඞ්ඝො. යදි සඞ්ඝස්ස පත්තකල්ලං සඞ්ඝො ඉත්ථන්නාමං භික්ඛුං චීවරභාජකං සම්මන්නෙය්ය. එසා ඤත්ති.
සුණාතු මෙ භන්තෙ සඞ්ඝො. සඞ්ඝො ඉත්ථන්නාමං භික්ඛුං චීවරභාජකං සම්මන්නති. යස්සායස්මතො ඛමති ඉත්ථන්නාමස්ස භික්ඛුනො චීවරභාජකස්ස සම්මුති සො තුණ්හස්ස. යස්ස නක්ඛමති. සො භාසෙය්ය.
සම්මතො සඞ්ඝෙන ඉත්ථන්නාමො භික්ඛු චීවරභාජකො. ඛමති සඞ්ඝස්ස තස්මා තුණ්හී. එවමෙතං ධාරයාමී”ති.
68. තෙන ඛො පන සමයෙන සඞ්ඝස්ස යාගුභාජකො න හොති. භගවතො එතමත්ථං ආරොචෙසුං.
“අනුජානාමි භික්ඛවෙ පඤ්චහඞ්ගෙහි සමන්නාගතං භික්ඛුං යාගුංභාජකං සම්මන්නිතුං: යො න ඡන්දාගතිං ගච්ඡෙය්ය -පෙ- භාජිතාභාජිතඤ්ච ජානෙය්ය. එවඤ්ච පන භික්ඛවෙ සම්මන්නිතබ්බො: පඨමං භික්ඛු යාචිතබ්බො. යාචිත්වා, -පෙ- සම්මතො සඞ්ඝෙන ඉත්ථන්නාමො භික්ඛු යාගුභාජකො. ඛමති සඞ්ඝස්ස තස්මා තුණ්හී. එවමෙතං ධාරයාමී”ති.
තෙන ඛො පන සමයෙන සඞ්ඝස්ස ඵලභාජකො න හොති. භගවතො එතමත්ථං ආරොචෙසුං.
“අනුජානාමි භික්ඛවෙ පඤ්චහඞ්ගෙහි සමන්නාගතං භික්ඛුං ඵලභාජකං සම්මන්නිතුං: යො න ඡන්දාගතිං ගච්ඡෙය්ය -පෙ- භාජිතාභාජිතඤ්ච ජානෙය්ය. එවඤ්ච පන භික්ඛවෙ සම්මන්නිතබ්බො: පඨමං භික්ඛු යාචිතබ්බො -පෙ- සම්මතො සඞ්ඝෙන ඉත්ථන්නාමො භික්ඛු ඵලභාජකො. ඛමති සඞ්ඝස්ස තස්මා තුණ්හී. එවමෙතං ධාරයාමී”ති.
69. තෙන ඛො පන සමයෙන සඞ්ඝස්ස ඛජ්ජකභාජකො න හොති. ඛජ්ජකං අභාජියමානං නස්සති. භගවතො එතමත්ථං ආරොචෙසුං.
“අනුජානාමි භික්ඛවෙ පඤ්චහඞ්ගෙහි සමන්නාගතං භික්ඛුං ඛජ්ජකභාජකං සම්මන්නිතුං: යො න ඡන්දාගතිං -පෙ- භාජිතාභාජිතඤ්ච ජානෙය්ය. එවඤ්ච පන භික්ඛවෙ සම්මන්නිතබ්බො: පඨමං භික්ඛු යාචිතබ්බො. යාචිත්වා ව්යත්තෙන භික්ඛුනා පටිබලෙන සඞ්ඝො ඤාපෙතබ්බො:
සුණාතු මෙ භන්තෙ සඞ්ඝො. යදි සඞ්ඝස්ස පත්තකල්ලං සඞ්ඝො ඉත්ථන්නාමං භික්ඛුං ඛජ්ජකභාජකං සම්මන්නෙය්ය. එසා ඤත්ති.
සුණාතු මෙ භන්තෙ සඞ්ඝො. සඞ්ඝො ඉත්ථන්නාමං භික්ඛුං ඛජ්ජකභාජකං සම්මන්නති. යස්සායස්මතො ඛමති ඉත්ථන්නාමස්ස භික්ඛුනො ඛජ්ජකභාජකස්ස සම්මුති. සො තුණ්හස්ස. යස්ස නක්ඛමති සො භාසෙය්ය.
සම්මතො සඞ්ඝෙන ඉත්ථන්නාමො භික්ඛු ඛජ්ජකභාජකො. ඛමති සඞ්ඝස්ස තස්මා තුණ්හී. එවමෙතං ධාරයාමී”ති.
70. තෙන ඛො පන සමයෙන සඞ්ඝස්ස භණ්ඩාගාරෙ අප්පමත්තකො පරික්ඛාරො උප්පන්නො හොති. භගවතො එතමත්ථං ආරොචෙසුං.
“අනුජානාමි භික්ඛවෙ පඤ්චහඞ්ගෙහි සමන්නාගතං භික්ඛුං අප්පමත්තකවිස්සජ්ජකං සම්මන්නිතුං: යො න ඡන්දාගතිං ගච්ඡෙය්ය -පෙ- විස්සජ්ජිතාවිස්සජ්ජිතඤ්ච ජානෙය්ය.
එවඤ්ච පන භික්ඛවෙ සම්මන්නිතබ්බො: පඨමං භික්ඛු යාචිතබ්බො. යාචිත්වා ව්යත්තෙන භික්ඛුනා පටිබලෙන සඞ්ඝො ඤාපෙතබ්බො:
සුණාතු මෙ භන්තෙ සඞ්ඝො. යදි සඞ්ඝස්ස පත්තකල්ලං සඞ්ඝො ඉත්ථන්නාමං භික්ඛුං අප්පමත්තකවිස්සජ්ජකං සම්මන්නෙය්ය. එසා ඤත්ති.
සුණාතු මෙ භන්තෙ සඞ්ඝො. සඞ්ඝො ඉත්ථන්නාමං භික්ඛුං අප්පමත්තකවිස්සජ්ජකං සම්මන්නති. යස්සායස්මතො ඛමති ඉත්ථන්නාමස්ස භික්ඛුනො අප්පමත්තකවිස්සජ්ජකස්ස සම්මුති, සො තුණ්හස්ස. යස්ස නක්ඛමති. සො භාසෙය්ය.
සම්මතො සඞ්ඝෙන ඉත්ථන්නාමො භික්ඛු අප්පමත්තකවිස්සජ්ජකො. ඛමති සඞ්ඝස්ස. තස්මා තුණ්හී. එවමෙතං ධාරයාමී”ති.
“තෙන අප්පමත්තකවිස්සජ්ජකෙන භික්ඛුනා එකෙකා සූචි දාතබ්බා. සත්ථකං දාතබ්බං. උපාහනා දාතබ්බා. කායබන්ධනං දාතබ්බං. අංසබන්ධකො දාතබ්බො. පරිස්සාවනං දාතබ්බං. ධම්මකරකො දාතබ්බො. කුසි දාතබ්බා. අඩ්ඪකුසි දාතබ්බා මණ්ඩලං දාතබ්බං. අඩ්ඪමණ්ඩලං දාතබ්බං. අනුවාතො දාතබ්බො. පරිභණ්ඩං දාතබ්බං. සචෙ හොති සඞ්ඝස්ස සප්පි වා තෙලං වා මධු වා ඵාණිතං වා සකිං පටිසායිතුං දාතබ්බං. සචෙ පුනපි අත්ථො හොති පුනපි දාතබ්බන්ති.
71. තෙන ඛො පන සමයෙන සඞ්ඝස්ස සාටියගාහාපකො න හොති. භගවතො එතමත්ථං ආරොචෙසුං.
“අනුජානාමි භික්ඛවෙ පඤ්චහඞ්ගෙහි සමන්නාගතං භික්ඛුං සාටියගාහාපකං සම්මන්නිතුං: යො න ඡන්දාගතිං ගච්ඡෙය්ය -පෙ- ගහිතාගහිතඤ්ච ජානෙය්ය. එවඤ්ච පන භික්ඛවෙ සම්මන්නිතබ්බො: පඨමං භික්ඛු යාචිතබ්බො. යාචිත්වා ව්යත්තෙන භික්ඛුනා පටිබලෙන සඞ්ඝො ඤාපෙතබ්බො:
සුණාතු මෙ භන්තෙ සඞ්ඝො. යදි සඞ්ඝස්ස පත්තකල්ලං සඞ්ඝො ඉත්ථන්නාමං භික්ඛුං සාටියගාහාපකං සම්මන්නෙය්ය. එසා ඤත්ති.
සුණාතු මෙ භන්තෙ සඞ්ඝො. සඞ්ඝො ඉත්ථන්නාමං භික්ඛුං සාටියගාහාපකං සම්මන්නති. යස්සායස්මතො ඛමති ඉත්ථන්නාමස්ස භික්ඛුනො සාටියගාහාපකස්ස සම්මති සො තුණ්හස්ස. යස්ස නක්ඛමති සො භාසෙය්ය. සම්මතො සඞ්ඝෙන ඉත්ථන්නාමො භික්ඛු සාටියගාහාපකො ඛමති සඞ්ඝස්ස. තස්මා තුණ්හී. එවමෙතං ධාරයාමී”ති.
තෙන ඛො පන සමයෙන සඞ්ඝස්ස පත්තගාහාපකො න හොති. භගවතො එතමත්ථං ආරොචෙසුං.
“අනුජානාමි භික්ඛවෙ පඤ්චහඞ්ගෙහි සමන්නාගතං භික්ඛුං පත්තගාහාපකං සම්මන්නිතුං: යො න ඡන්දාගතිං ගච්ඡෙය්ය -පෙ- ගහිතාගහිතඤ්ච ජානෙය්ය.
එවඤ්ච පන භික්ඛවෙ සම්මන්නිතබ්බො:
පඨමං භික්ඛු යාචිතබ්බො. යාචිත්වා -පෙ- ඛමති සඞ්ඝස්ස තස්මා තුණ්හී. එවමෙතං ධාරයාමී”ති.
72. තෙන ඛො පන සමයෙන සඞ්ඝස්ස ආරාමිකපෙසකො න හොති. ආරාමිකා අපෙසියමානා කම්මං න කරොන්ති. භගවතො එතමත්ථං ආරොචෙසුං.
“අනුජානාමි භික්ඛවෙ පඤ්චහඞ්ගෙහි සමන්නාගතං භික්ඛුං ආරාමිකපෙසකං සම්මන්නිතුං. යො න ඡන්දාගතිං ගච්ඡෙය්ය -පෙ- පෙසිතාපෙසිතඤ්ච ජානෙය්ය. එවඤ්ච පන භික්ඛවෙ සම්මන්නිතබ්බො. -පෙ- තස්මා තුණ්හී. එවමෙතං ධාරයාමී”ති.
තෙන ඛො පන සමයෙන සඞ්ඝස්ස සාමණෙරපෙසකො න හොති. සාමණෙරා අපෙසියමානා කම්මං න කරොන්ති. භගවතො එතමත්ථං ආරොචෙසුං.
“අනුජානාමි භික්ඛවෙ පඤ්චහඞ්ගෙහි සමන්නාගතං භික්ඛුං සාමණෙරපෙසකං සම්මන්නිතුං: යො න ඡන්දාගතිං ගච්ඡෙය්ය න දොසාගතිං ගච්ඡෙය්ය න මොහාගතිං ගච්ඡෙය්ය න භයාගතිං ගච්ඡෙය්ය පෙසිතාපෙසිතඤ්ච ජානෙය්ය. එවඤ්ච පන භික්ඛවෙ සම්මන්නිතබ්බො: පඨමං භික්ඛු යාචිතබ්බො යාචිත්වා ව්යත්තෙන භික්ඛුනා පටිබලෙන සඞ්ඝො ඤාපෙතබ්බො:
සුණාතු මෙ භන්තෙ සඞ්ඝො. යදි සඞ්ඝස්ස පත්තකල්ලං සඞ්ඝො ඉත්ථන්නාමං භික්ඛුං සාමණෙරපෙසකං සම්මන්නෙය්ය. එසා ඤත්ති.
සුණාතු මෙ භන්තෙ සඞ්ඝො. සඞ්ඝො ඉත්ථන්නාමං භික්ඛුං සාමණෙරපෙසකං සම්මන්නති. යස්සායස්මතො ඛමති ඉත්ථන්නාමස්ස භික්ඛුනො සාමණෙරපෙසකස්ස සම්මති. සො තුණ්හස්ස. යස්ස නක්ඛමති සො භාසෙය්ය.
සම්මතො සඞ්ඝෙන ඉත්ථන්නාමො භික්ඛු සාමණෙරපෙසකො. ඛමති සඞ්ඝස්ස. තස්මා තුණ්හී. එවමෙතං ධාරයාමී”ති.
තතියක-භාණවාරං.
සෙනාසනක්ඛන්ධකො නිට්ඨිතො ඡට්ඨො{1}.
තස්සුද්දානං:
1. විහාරො{2} බුද්ධසෙට්ඨෙන අපඤ්ඤත්තො තදා අහු තහං තහං නික්ඛමන්ති වාසා තෙ ජිනසාවකා.
2. තෙ සෙට්ඨී ගහපති දිස්වා භික්ඛූනං එතදබ්රවි කාරාපෙය්යං වසෙය්යාථ පටිපුච්ඡිංසු නායකං
3. විහාරං අඩ්ඪයොගඤ්ච පාසාදං හම්මියං ගුහං පඤ්චලෙණං අනුඤ්ඤාසි විහාරෙ සෙට්ඨි කාරයි.
4. ජනො විහාරං කාරෙති අකවාටං අසංවුතං කවාටං පිට්ඨසඞ්ඝාටං උදුක්ඛලඤ්ච උත්තරි.
5. ආවිඤ්ඡනච්ඡිද්දරජ්ජුං වට්ටිඤ්ච කපිසීසකං සූචී ඝටී තාලච්ඡිද්දං ලොහකට්ඨවිසාණකං.
6. යන්තකං සූචිකඤ්චෙව ඡදනං උල්ලිත්තාවලිත්තං වෙදිජාලසලාකඤ්ච චක්කලී සන්ථරෙන ච.
7. මීඪිං බිදලමඤ්චඤ්ච සොසානිකමසාරකො බුන්දි කුළීරපාදඤ්ච ආහච්චාසන්දි උච්චකෙ.
8. සත්තඞ්ගො ච භද්දපීඨං පීඨකාඵලකපාදකං ආමලාඵලකා{1} කොච්ඡා පලාලපීඨමෙව ච.
9. උච්චෙ ච අභිපාදානි අට්ඨඞ්ගුලකපාදකං සුත්තං අට්ඨපදං චොළං තූලිකං අඩ්ඪකායිකං
10. ගිරග්ගො භිසියො චාපි දුස්සං සෙනාසනම්පි ච ඔනද්ධං හෙට්ඨා පතති උප්පාටෙත්වා හරන්ති ච.
11. භත්තිඤ්ච{2} හත්ථභත්තිඤ්ච අනුඤ්ඤාසි තථාගතො සෙතකාළවිහාරෙපි ථුසං සණ්හඤ්ච මත්තිකං
12. ඉක්කාසං පාණිකං කුණ්ඩං සාසපං සිත්ථතෙලකං උස්සන්නෙ පච්චුද්ධරිතුං ඵරුසං ගණ්ඩමත්තිකං.
13. ඉක්කාසං පටිභානඤ්ච නීචා චයො ච ආරුහං පරිපතන්ති ආළකං අඩ්ඪකුඩ්ඩං තයො පුන.
14. ඛුද්දකෙ කුඩ්ඩපාදො ච ඔවස්සති සරං ඛිලං චීවරවංසං රජ්ජුඤ්ච ආළින්දං කිටීකෙන ච.
15. ආලම්බනං තිණචුණ්ණං හෙට්ඨාමග්ගෙ නයං කරෙ අජ්ඣොකාසෙ ඔතප්පති සාලං හෙට්ඨා ච භාජනං
16. විහාරො කොට්ඨකො චෙව පරිවෙණග්ගිසාලකං ආරාමෙ ච පුන කොට්ඨෙ හෙට්ඨඤ්ඤෙව නයං කරෙ.
17. සුදං අනාථපිණ්ඩී ච සද්ධො සීතවනං අගා දිට්ඨධම්මො නිමන්තෙසි සහ සඞ්ඝෙන නායකං.
18. ආණාපෙසන්තරාමග්ගෙ ආරාමං කාරයි ගණො වෙසාලියං නවකම්මං පුරතො ච පරිග්ගහං.
19. කො අරහති භත්තග්ගෙ තිත්තිරඤ්ච අවන්දියා පරිග්ගහිතන්තරඝරා තූලො සාවත්ථි ඔසරි.
20. පතිට්ඨාපෙසි ආරාමං භත්තග්ගෙ ච කොලාහලං, ගිලානා වරසෙය්යා ච ලෙසා සත්තරසා තහිං.
21. කෙන නු ඛො කථන්නු ඛො විහාරග්ගෙන භාජසී පරිවෙණානුභාගඤ්ච අකාමා භාගං නො දදෙ.
22. නිස්සීමං සබ්බකාලං ච ගාහා සෙනාසනෙ තයො උපනන්දො ච වණ්ණෙසි ඨිතකා සමකාසනා.
23. සමානාසනිකා භින්දිංසු තිවග්ගා ච දුවග්ගිකං අසමානාසනිකෙහි දීඝං සාළින්දං{1} පරිභුඤ්ජිතුං.
24. අය්යකා ච අවිදූරෙ භාජිතඤ්ච කීටාගිරෙ ආළවී පිණ්ඩකකුඩ්ඩෙහි ද්වාරඅග්ගළවට්ටිකා.
25. ආලොක සෙත-කාළඤ්ච ගෙරු-ඡාදන බන්ධනා භණ්ඩි-ඛණ්ඩ-පරිභණ්ඩං වීස-තිංසා යාවජීවිකං.
26. ඔසිතෙ අකතං{1} ඛුද්දෙ ඡ-පඤ්චවස්සිකංදදෙ අඩ්ඪයොගෙ ච සත්තට්ඨ මහල්ලෙ දස-ද්වාදස.
27. සබ්බං විහාරං එකස්ස අඤ්ඤං වාසෙන්ති සඞ්ඝිකං නිස්සීමං සබ්බකාලඤ්ච පක්කමන්ති විබ්භමන්ති ච.
28. කාලඤ්ච සාමණෙරඤ්ච සික්ඛාපච්චක්ඛාන්තිමං උම්මත්ත ඛිත්තචිත්තා ච වෙදනාපතත්යදස්සනා.
29. අප්පටිකම්මා දිට්ඨියා පණ්ඩකා ථෙය්යතිත්ථියා තිරච්ඡාන මාතු පිතු අරහන්තා ඝාතක දූසකා.
30. භෙදකා ලොහිතුප්පාදා උභතො චාපි ව්යඤ්ජනා මා සඞ්ඝස්ස පරිහායි කම්මං අඤ්ඤස්ස දාතවෙ.
31. විප්පකතෙ ච අඤ්ඤස්ස කතෙ තස්සෙව පක්කමෙ විබ්භමති කාලකතො සාමණෙරො ච ජායති.
32. පච්චක්ඛාතො ච සික්ඛාය අන්තිමා පණ්ඩකො යදි සඞ්ඝො ව සාමිකො හොති උම්මත්ත ඛිත්තවෙදනා.
33. අදස්සනාප්පටිකම්මෙ දිට්ඨි තස්සෙව හොති වා පණ්ඩකො ථෙය්ය තිත්ථී ච තිරච්ඡාන මාතුපෙත්තිකං
34. ඝාතකො දූසකො චාපි භෙද ලොහිත ව්යඤ්ජනා පටිජානාති යදි සො සඞ්ඝොව හොති සාමිකො.
35. හරන්තඤ්ඤත්ර කුක්කුච්චං උද්රියති ච කම්බලං දුස්සං ච චම්ම චක්කලී චොළකං අක්කමන්ති ච.
36. අල්ලා උපාහනා නිට්ඨු ලිඛන්ති අපස්සෙන්ති ච. අපස්සෙනං ලිඛතෙ වා ධොතපච්චත්ථරෙන ච.
37. රාජගහෙ න සක්කොන්ති ලාමකං භත්තුද්දෙසකං කථං නු ඛො පඤ්ඤාපකං භණ්ඩාගාරිකසම්මුතිං.
38. පටිග්ගාහභාජකො චාපි යාගු ච ඵලභාජකො ඛජ්ජකභාජකො චෙව අප්පමත්තකවිස්සජො.
39. සාටියගාහාපකො චෙව තථෙව පත්තගාහකො ආරාමික සාමණෙර පෙසකස්ස ච සම්මුති.
40. සබ්බාභිභූ ලොකවිදූ හිතචිත්තො විනායකො ලෙණත්ථං ච සුඛත්ථං ච, ඣායිතුං ච විපස්සිතුන්ති.
7.
සඞ්ඝභෙදකක්ඛන්ධකං
පඨමභාණවාරං
ඡසක්යපබ්බජ්ජා
1. තෙන සමයෙන බුද්ධො භගවා අනුපියායං විහරති අනුපියං නාම මල්ලානං නිගමො. තෙන ඛො පන සමයෙන අභිඤ්ඤාතා අභිඤ්ඤාතා සක්යකුමාරා භගවන්තං පබ්බජිතං අනුපබ්බජන්ති. තෙන ඛො පන සමයෙන මහානාමො ච සක්කො අනුරුද්ධො ච සක්කො ද්වෙ භාතිකා හොන්ති. අනුරුද්ධො සක්කො සුඛුමාලො හොති. තස්ස තයො පාසාදා හොන්ති එකො හෙමන්තිකො එකො ගිම්හිකො, එකො වස්සිකො. සො වස්සිකෙ පාසාදෙ වස්සිකෙ චත්තාරො මාසෙ නිප්පුරිසෙහි තුරියෙහි පරිචාරයමානො න හෙට්ඨාපාසාදං ඔරොහති.
අථ ඛො මහානාමස්ස සක්කස්ස එතදහොසි: “එතරහි ඛො අභිඤ්ඤාතා අභිඤ්ඤාතා සක්යකුමාරා භගවන්තං පබ්බජිතං අනුපබ්බජන්ති. අම්හාකඤ්ච කුලා නත්ථි කොචි අගාරස්මා අනගාරියං පබ්බජිතො. යන්නූනාහං වා පබ්බජෙය්යං අනුරුද්ධො වා”ති. ”අථ ඛො මහානාමො සක්කො යෙන අනුරුද්ධො සක්කො තෙනුපසඞ්කමි. උපසඞ්කමිත්වා අනුරුද්ධං සක්කං එතදවොච: “එතරහි තාත අනුරුද්ධ, අභිඤ්ඤාතා අභිඤ්ඤාතා සක්යකුමාරා භගවන්තං පබ්බජිතං අනුපබ්බජන්ති. අම්හාකඤ්ච කුලා නත්ථි කොචි අගාරස්මා අනගාරියං පබ්බජිතො. තෙන හි ත්වං වා පබ්බජ අහං වා පබ්බජිස්සාමී”ති.
“අහං ඛො සුඛුමාලො. නාහං සක්කොමි අගාරස්මා අනගාරියං පබ්බජිතුං. ත්වං පබ්බජ්ජාහී”ති.
“එහි ඛො තෙ තාත අනුරුද්ධ ඝරාවාසත්ථං අනුසාසිස්සාමි: පඨමං ඛෙත්තං කසාපෙතබ්බං, කසාපෙත්වා වපාපෙතබ්බං, වපාපෙත්වා උදකං අතිනෙතබ්බං, උදකං අතිනෙත්වා උදකං නින්නෙතබ්බං. උදකං නින්නෙත්වා නිඩ්ඩහෙතබ්බං.{1} නිඩ්ඩහෙත්වා{2} ලවාපෙතබ්බං, ලවාපෙත්වා උබ්බාහාපෙතබ්බං. උබ්බාහාපෙත්වා පුඤ්ජං කාරාපෙතබ්බං. පුඤ්ජං කාරාපෙත්වා මද්දාපෙතබ්බං. මද්දාපෙත්වා පලාලානි උද්ධරාපෙතබ්බානි, පලාලානි උද්ධරාපෙත්වා භූසිකා උද්ධරාපෙතබ්බා. භුසිකං උද්ධරාපෙත්වා ඔපුනාපෙතබ්බං ඔපුනාපෙත්වා අතිහරාපෙතබ්බං. අතිහරාපෙත්වා ආයතිම්පි වස්සං එවමෙව කාතබ්බන්ති.”
“න කම්මා ඛීයන්ති, න කම්මානං අන්තො පඤ්ඤායති. කදා කම්මා ඛීයිස්සන්ති? කදා කම්මානං අන්තො පඤ්ඤායිස්සති? කදා මයං අප්පොස්සුක්කා පඤ්චහි කාමගුණෙහි සමප්පිතා සමඞ්ගීභූතා පරිචාරිස්සාමා”ති.
“න හි තාත අනුරුද්ධ කම්මා ඛීයන්ති, න කම්මානං අන්තො පඤ්ඤායති. අඛීණෙයෙව කම්මෙ පිතරො ච පිතාමහා ච කාලකතා”ති.
“තෙන හි ත්වඤ්ඤෙව ඝරාවාසත්ථෙන උපජානාහි{1}. අහං අගාරස්මා අනගාරියං පබ්බජිස්සාමී”ති.
2. අථ ඛො අනුරුද්ධො සක්කො යෙන මාතා තෙනුපසඞ්කමි. උපසඞ්කමිත්වා මාතරං එතදවොච: “ඉච්ඡාමහං අම්ම අගාරස්මා අනගාරියං පබ්බජිතුං. අනුජානාහි මං අගාරස්මා අනගාරියං පබ්බජ්ජායා”ති. එවං වුත්තෙ අනුරුද්ධස්ස සක්කස්ස මාතා අනුරුද්ධං සක්කං එතදවොච: “තුම්හෙ ඛො මෙ තාත අනුරුද්ධ ද්වෙ පුත්තා පියා මනාපා අප්පටිකූලා මරණෙනපි වො අකාමකා විනා භවිස්සාමි. කිම්පනාහං තුම්හෙ ජීවන්තෙ අනුජානිස්සාමි අගාරස්මා අනගාරියං පබ්බජ්ජායා”ති.
දුතියම්පි ඛො අනුරුද්ධො සක්කො මාතරං එතදවොච: “ඉච්ඡාමහං අම්ම අගාරස්මා අනගාරියං පබ්බජිතුං. අනුජානාහි මං අගාරස්මා අනගාරියං පබ්බජ්ජායා”ති.
“තුම්හෙ ඛො මෙ තාත අනුරුද්ධ ද්වෙ පුත්තා පියා මනාපා අප්පටිකූලා මරණෙනපි වො අකාමකා විනා භවිස්සාමි. කිං පනාහං තුම්හෙ ජීවන්තෙ අනුජානිස්සාමි අගාරස්මා අනගාරියං පබ්බජ්ජායා”ති.
තතියම්පි ඛො අනුරුද්ධො සක්කො මාතරං එතදවොච: “ඉච්ඡාමහං අම්ම අගාරස්මා අනගාරියං පබ්බජිතුං. අනුජානාමි මං අගාරස්මා අනගාරියං පබ්බජ්ජායා”ති.
තෙන ඛො පන සමයෙන භද්දියො සක්යරාජා සක්යානං රජ්ජං කාරෙති. සො ච අනුරුද්ධස්ස සක්කස්ස සහායො හොති. අථ ඛො අනුරුද්ධස්ස සක්කස්ස මාතා “අයං ඛො භද්දියො සක්යරාජා සක්යානං රජ්ජං කාරෙති අනුරුද්ධස්ස සක්කස්ස සහායො. සො න උස්සහති අගාරස්මා අනගාරියං පබ්බජිතුන්ති” අනුරුද්ධං සක්කං එතදවොච: “සචෙ තාත අනුරුද්ධ භද්දියො සක්යරාජා අගාරස්මා අනගාරියං පබ්බජති එවං ත්වම්පි පබ්බජාහී”ති.
3. අථ ඛො අනුරුද්ධො සක්කො යෙන භද්දියො සක්යරාජා තෙනුපසඞ්කමි, උපසඞ්කමිත්වා භද්දියං සක්යරාජානං එතදවොච: “මම ඛො සම්ම, පබ්බජ්ජා තව පටිබද්ධා”ති.
“සචෙ තෙ සම්ම පබ්බජ්ජා මම පටිබද්ධා වා අප්පටිබද්ධා වා{1} හොතු. අහං තයා..... යථාසුඛං පබ්බජාහී”ති.
“එහි සම්ම උභො අගාරස්මා අනගාරියං පබ්බජිස්සාමා”ති.
“නාහං සම්ම සක්කොමි අගාරස්මා අනගාරියං පබ්බජිතුං. යං තෙ සක්කා අඤ්ඤං මයා කාතුං ත්යාහං කරිස්සාමි. ත්වං පබ්බජාහී”ති.
“මාතා ඛො මං සම්ම, එවමාහ: ‘සචෙ තාත අනුරුද්ධ භද්දියො සක්යරාජා අගාරස්මා අනගාරියං පබ්බජති එවං ත්වම්පි පබ්බජාහී’ති. භාසිතා ඛො පන තෙ සම්ම එසා වාචා: සචෙ තෙ සම්ම පබ්බජ්ජා මම පටිබද්ධා වා අප්පටිබද්ධා වා සා හොතු. අහං තයා ... යථා සුඛං පබ්බජ්ජාහී’ති. එහි සම්ම උභො අගාරස්මා අනගාරියං පබ්බජිස්සාමා”ති.
තෙන ඛො පන සමයෙන මනුස්සා සච්චවාදිනො හොන්ති සච්චපටිඤ්ඤා. අථ ඛො භද්දියො සක්යරාජා අනුරුද්ධං සක්කං එතදවොච: “ආගමෙහි සම්ම සත්ත වස්සානි සත්තන්නං වස්සානං අච්චයෙන උභො අගාරස්මා අනගාරියං පබ්බජිස්සාමා”ති.