Rūpāvacarānaṁ tesaṁ tattha cakkhundriyaṁ uppajjissati, no ca tesaṁ tattha ghānindriyaṁ uppajjissati. Kāmāvacarānaṁ tesaṁ tattha cakkhundriyañca uppajjissati ghānindriyañca uppajjissati.
Yassa vā pana yattha ghānindriyaṁ uppajjissati tassa tattha cakkhundriyaṁ uppajjissatīti? Āmantā.
Yassa yattha cakkhundriyaṁ uppajjissati tassa tattha itthindriyaṁ uppajjissatīti?
Rūpāvacarānaṁ ye ca purisā eteneva bhāvena katici bhave dassetvā parinibbāyissanti tesaṁ tattha cakkhundriyaṁ uppajjissati, no ca tesaṁ tattha itthindriyaṁ uppajjissati. Itaresaṁ kāmāvacarānaṁ tesaṁ tattha cakkhundriyañca uppajjissati itthindriyañca uppajjissati.
Yassa vā pana yattha itthindriyaṁ uppajjissati tassa tattha cakkhundriyaṁ uppajjissatīti? Āmantā.
Yassa yattha cakkhundriyaṁ uppajjissati tassa tattha purisindriyaṁ uppajjissatīti?
Rūpāvacarānaṁ yā ca itthiyo eteneva bhāvena katici bhave dassetvā parinibbāyissanti tesaṁ tattha cakkhundriyaṁ uppajjissati, no ca tesaṁ tattha purisindriyaṁ uppajjissati. Itaresaṁ kāmāvacarānaṁ tesaṁ tattha cakkhundriyañca uppajjissati purisindriyañca uppajjissati.
Yassa vā pana yattha purisindriyaṁ uppajjissati tassa tattha cakkhundriyaṁ uppajjissatīti? Āmantā.
Yassa yattha cakkhundriyaṁ uppajjissati tassa tattha jīvitindriyaṁ uppajjissatīti? Āmantā.
Yassa vā pana yattha jīvitindriyaṁ uppajjissati tassa tattha cakkhundriyaṁ uppajjissatīti?
Asaññasattānaṁ arūpānaṁ tesaṁ tattha jīvitindriyaṁ uppajjissati, no ca tesaṁ tattha cakkhundriyaṁ uppajjissati. Pañcavokārānaṁ tesaṁ tattha jīvitindriyañca uppajjissati cakkhundriyañca uppajjissati.
Yassa yattha cakkhundriyaṁ uppajjissati tassa tattha somanassindriyaṁ uppajjissatīti?
Ye sacakkhukā upekkhāya upapajjitvā parinibbāyissanti tesaṁ tattha cakkhundriyaṁ uppajjissati, no ca tesaṁ tattha somanassindriyaṁ uppajjissati. Itaresaṁ pañcavokārānaṁ tesaṁ tattha cakkhundriyañca uppajjissati somanassindriyañca uppajjissati.
Yassa vā pana yattha somanassindriyaṁ uppajjissati tassa tattha cakkhundriyaṁ uppajjissatīti? Āmantā.
Yassa yattha cakkhundriyaṁ uppajjissati tassa tattha upekkhindriyaṁ uppajjissatīti?
Ye sacakkhukā somanassena upapajjitvā parinibbāyissanti tesaṁ tattha cakkhundriyaṁ uppajjissati, no ca tesaṁ tattha upekkhindriyaṁ uppajjissati. Itaresaṁ pañcavokārānaṁ tesaṁ tattha cakkhundriyañca uppajjissati upekkhindriyañca uppajjissati.
Yassa vā pana yattha upekkhindriyaṁ uppajjissati tassa tattha cakkhundriyaṁ uppajjissatīti?
Arūpānaṁ tesaṁ tattha upekkhindriyaṁ uppajjissati, no ca tesaṁ tattha cakkhundriyaṁ uppajjissati. Pañcavokārānaṁ tesaṁ tattha upekkhindriyañca uppajjissati cakkhundriyañca uppajjissati.
Yassa yattha cakkhundriyaṁ uppajjissati tassa tattha saddhindriyaṁ …pe… paññindriyaṁ …pe… manindriyaṁ uppajjissatīti? Āmantā.
Yassa vā pana yattha manindriyaṁ uppajjissati tassa tattha cakkhundriyaṁ uppajjissatīti?
Arūpānaṁ tesaṁ tattha manindriyaṁ uppajjissati, no ca tesaṁ tattha cakkhundriyaṁ uppajjissati. Pañcavokārānaṁ tesaṁ tattha manindriyañca uppajjissati cakkhundriyañca uppajjissati. (Cakkhundriyamūlakaṁ.)
Yassa yattha ghānindriyaṁ uppajjissati tassa tattha itthindriyaṁ uppajjissatīti?
Ye purisā eteneva bhāvena katici bhave dassetvā parinibbāyissanti tesaṁ tattha ghānindriyaṁ uppajjissati, no ca tesaṁ tattha itthindriyaṁ uppajjissati. Itaresaṁ kāmāvacarānaṁ tesaṁ tattha ghānindriyañca uppajjissati itthindriyañca uppajjissati.
Yassa vā pana yattha itthindriyaṁ uppajjissati tassa tattha ghānindriyaṁ uppajjissatīti? Āmantā.
Yassa yattha ghānindriyaṁ uppajjissati tassa tattha purisindriyaṁ uppajjissatīti?
Yā itthiyo eteneva bhāvena katici bhave dassetvā parinibbāyissanti tāsaṁ tattha ghānindriyaṁ uppajjissati, no ca tāsaṁ tattha purisindriyaṁ uppajjissati. Itaresaṁ kāmāvacarānaṁ tesaṁ tattha ghānindriyañca uppajjissati purisindriyañca uppajjissati.
Yassa vā pana yattha purisindriyaṁ uppajjissati tassa tattha ghānindriyaṁ uppajjissatīti? Āmantā.
Yassa yattha ghānindriyaṁ uppajjissati tassa tattha jīvitindriyaṁ uppajjissatīti? Āmantā.
Yassa vā pana yattha jīvitindriyaṁ uppajjissati tassa tattha ghānindriyaṁ uppajjissatīti?
Rūpāvacarānaṁ arūpāvacarānaṁ tesaṁ tattha jīvitindriyaṁ uppajjissati, no ca tesaṁ tattha ghānindriyaṁ uppajjissati. Kāmāvacarānaṁ tesaṁ tattha jīvitindriyañca uppajjissati ghānindriyañca uppajjissati.
Yassa yattha ghānindriyaṁ uppajjissati tassa tattha somanassindriyaṁ uppajjissatīti?
Ye saghānakā upekkhāya upapajjitvā parinibbāyissanti tesaṁ tattha ghānindriyaṁ uppajjissati, no ca tesaṁ tattha somanassindriyaṁ uppajjissati. Itaresaṁ kāmāvacarānaṁ tesaṁ tattha ghānindriyañca uppajjissati somanassindriyañca uppajjissati.
Yassa vā pana yattha somanassindriyaṁ uppajjissati tassa tattha ghānindriyaṁ uppajjissatīti?
Rūpāvacarānaṁ tesaṁ tattha somanassindriyaṁ uppajjissati, no ca tesaṁ tattha ghānindriyaṁ uppajjissati. Kāmāvacarānaṁ tesaṁ tattha somanassindriyañca uppajjissati ghānindriyañca uppajjissati.
Yassa yattha ghānindriyaṁ uppajjissati tassa tattha upekkhindriyaṁ uppajjissatīti?
Ye saghānakā somanassena upapajjitvā parinibbāyissanti tesaṁ tattha ghānindriyaṁ uppajjissati, no ca tesaṁ tattha upekkhindriyaṁ uppajjissati. Itaresaṁ kāmāvacarānaṁ tesaṁ tattha ghānindriyañca uppajjissati upekkhindriyañca uppajjissati.
Yassa vā pana yattha upekkhindriyaṁ uppajjissati tassa tattha ghānindriyaṁ uppajjissatīti?
Rūpāvacarānaṁ arūpāvacarānaṁ tesaṁ tattha upekkhindriyaṁ uppajjissati, no ca tesaṁ tattha ghānindriyaṁ uppajjissati. Kāmāvacarānaṁ tesaṁ tattha upekkhindriyañca uppajjissati ghānindriyañca uppajjissati.
Yassa yattha ghānindriyaṁ uppajjissati tassa tattha saddhindriyaṁ …pe… paññindriyaṁ …pe… manindriyaṁ uppajjissatīti? Āmantā.
Yassa vā pana yattha manindriyaṁ uppajjissati tassa tattha ghānindriyaṁ uppajjissatīti?
Rūpāvacarānaṁ arūpāvacarānaṁ tesaṁ tattha manindriyaṁ uppajjissati, no ca tesaṁ tattha ghānindriyaṁ uppajjissati. Kāmāvacarānaṁ tesaṁ tattha manindriyañca uppajjissati ghānindriyañca uppajjissati. (Ghānindriyamūlakaṁ.)
Yassa yattha itthindriyaṁ uppajjissati tassa tattha purisindriyaṁ uppajjissatīti?
Yā itthiyo eteneva bhāvena katici bhave dassetvā parinibbāyissanti tāsaṁ tattha itthindriyaṁ uppajjissati, no ca tāsaṁ tattha purisindriyaṁ uppajjissati. Itaresaṁ kāmāvacarānaṁ tesaṁ tattha itthindriyañca uppajjissati purisindriyañca uppajjissati.
Yassa vā pana yattha purisindriyaṁ uppajjissati tassa tattha itthindriyaṁ uppajjissatīti?
Ye purisā eteneva bhāvena katici bhave dassetvā parinibbāyissanti tesaṁ tattha purisindriyaṁ uppajjissati, no ca tesaṁ tattha itthindriyaṁ uppajjissati. Itaresaṁ kāmāvacarānaṁ tesaṁ tattha purisindriyañca uppajjissati itthindriyañca uppajjissati.
Yassa yattha itthindriyaṁ uppajjissati tassa tattha jīvitindriyaṁ uppajjissatīti? Āmantā.
Yassa vā pana yattha jīvitindriyaṁ uppajjissati tassa tattha itthindriyaṁ uppajjissatīti?
Rūpāvacarānaṁ arūpāvacarānaṁ ye ca purisā eteneva bhāvena katici bhave dassetvā parinibbāyissanti tesaṁ tattha jīvitindriyaṁ uppajjissati, no ca tesaṁ tattha itthindriyaṁ uppajjissati. Itaresaṁ kāmāvacarānaṁ tesaṁ tattha jīvitindriyañca uppajjissati itthindriyañca uppajjissati.
Yassa yattha itthindriyaṁ uppajjissati tassa tattha somanassindriyaṁ uppajjissatīti?
Yā itthiyo eteneva bhāvena katici bhave dassetvā upekkhāya upapajjitvā parinibbāyissanti tāsaṁ tattha itthindriyaṁ uppajjissati, no ca tāsaṁ tattha somanassindriyaṁ uppajjissati. Itaresaṁ kāmāvacarānaṁ tesaṁ tattha itthindriyañca uppajjissati. Somanassindriyañca uppajjissati.
Yassa vā pana yattha somanassindriyaṁ uppajjissati tassa tattha itthindriyaṁ uppajjissatīti?
Rūpāvacarānaṁ ye ca purisā eteneva bhāvena katici bhave dassetvā somanassena upapajjitvā parinibbāyissanti tesaṁ tattha somanassindriyaṁ uppajjissati, no ca tesaṁ tattha itthindriyaṁ uppajjissati. Itaresaṁ kāmāvacarānaṁ tesaṁ tattha somanassindriyañca uppajjissati itthindriyañca uppajjissati.
Yassa yattha itthindriyaṁ uppajjissati tassa tattha upekkhindriyaṁ uppajjissatīti?
Yā itthiyo eteneva bhāvena katici bhave dassetvā somanassena upapajjitvā parinibbāyissanti tāsaṁ tattha itthindriyaṁ uppajjissati, no ca tāsaṁ tattha upekkhindriyaṁ uppajjissati. Itaresaṁ kāmāvacarānaṁ tesaṁ tattha itthindriyañca uppajjissati upekkhindriyañca uppajjissati.
Yassa vā pana yattha upekkhindriyaṁ uppajjissati tassa tattha itthindriyaṁ uppajjissatīti?
Rūpāvacarānaṁ arūpāvacarānaṁ ye ca purisā eteneva bhāvena katici bhave dassetvā upekkhāya upapajjitvā parinibbāyissanti tesaṁ tattha upekkhindriyaṁ uppajjissati, no ca tesaṁ tattha itthindriyaṁ uppajjissati. Itaresaṁ kāmāvacarānaṁ tesaṁ tattha upekkhindriyañca uppajjissati itthindriyañca uppajjissati.
Yassa yattha itthindriyaṁ uppajjissati tassa tattha saddhindriyaṁ …pe… paññindriyaṁ …pe… manindriyaṁ uppajjissatīti? Āmantā.
Yassa vā pana yattha manindriyaṁ uppajjissati tassa tattha itthindriyaṁ uppajjissatīti?
Rūpāvacarānaṁ arūpāvacarānaṁ ye ca purisā eteneva bhāvena katici bhave dassetvā parinibbāyissanti tesaṁ tattha manindriyaṁ uppajjissati, no ca tesaṁ tattha itthindriyaṁ uppajjissati. Itaresaṁ kāmāvacarānaṁ tesaṁ tattha manindriyañca uppajjissati itthindriyañca uppajjissati. (Itthindriyamūlakaṁ.)
Yassa yattha purisindriyaṁ uppajjissati tassa tattha jīvitindriyaṁ uppajjissatīti? Āmantā.
Yassa vā pana yattha jīvitindriyaṁ uppajjissati tassa tattha purisindriyaṁ uppajjissatīti?
Rūpāvacarānaṁ arūpāvacarānaṁ yā ca itthiyo eteneva bhāvena katici bhave dassetvā parinibbāyissanti tesaṁ tattha jīvitindriyaṁ uppajjissati, no ca tesaṁ tattha purisindriyaṁ uppajjissati. Itaresaṁ kāmāvacarānaṁ tesaṁ tattha jīvitindriyañca uppajjissati purisindriyañca uppajjissati.
Yassa yattha purisindriyaṁ uppajjissati tassa tattha somanassindriyaṁ uppajjissatīti?
Ye purisā eteneva bhāvena katici bhave dassetvā upekkhāya upapajjitvā parinibbāyissanti tesaṁ tattha purisindriyaṁ uppajjissati, no ca tesaṁ tattha somanassindriyaṁ uppajjissati. Itaresaṁ kāmāvacarānaṁ tesaṁ tattha purisindriyañca uppajjissati somanassindriyañca uppajjissati.
Yassa vā pana yattha somanassindriyaṁ uppajjissati tassa tattha purisindriyaṁ uppajjissatīti?
Rūpāvacarānaṁ yā ca itthiyo eteneva bhāvena katici bhave dassetvā somanassena upapajjitvā parinibbāyissanti tesaṁ tattha somanassindriyaṁ uppajjissati, no ca tesaṁ tattha purisindriyaṁ uppajjissati. Itaresaṁ kāmāvacarānaṁ tesaṁ tattha somanassindriyañca uppajjissati purisindriyañca uppajjissati.
Yassa yattha purisindriyaṁ uppajjissati tassa tattha upekkhindriyaṁ uppajjissatīti?
Ye purisā eteneva bhāvena katici bhave dassetvā somanassena upapajjitvā parinibbāyissanti tesaṁ tattha purisindriyaṁ uppajjissati, no ca tesaṁ tattha upekkhindriyaṁ uppajjissati. Itaresaṁ kāmāvacarānaṁ tesaṁ tattha purisindriyañca uppajjissati upekkhindriyañca uppajjissati.
Yassa vā pana yattha upekkhindriyaṁ uppajjissati tassa tattha purisindriyaṁ uppajjissatīti?
Rūpāvacarānaṁ arūpāvacarānaṁ yā ca itthiyo eteneva bhāvena katici bhave dassetvā upekkhāya upapajjitvā parinibbāyissanti tesaṁ tattha upekkhindriyaṁ uppajjissati, no ca tesaṁ tattha purisindriyaṁ uppajjissati. Itaresaṁ kāmāvacarānaṁ tesaṁ tattha upekkhindriyañca uppajjissati purisindriyañca uppajjissati.
Yassa yattha purisindriyaṁ uppajjissati tassa tattha saddhindriyaṁ …pe… paññindriyaṁ …pe… manindriyaṁ uppajjissatīti? Āmantā.
Yassa vā pana yattha manindriyaṁ uppajjissati tassa tattha purisindriyaṁ uppajjissatīti?
Rūpāvacarānaṁ arūpāvacarānaṁ yā ca itthiyo eteneva bhāvena katici bhave dassetvā parinibbāyissanti tesaṁ tattha manindriyaṁ uppajjissati, no ca tesaṁ tattha purisindriyaṁ uppajjissati. Itaresaṁ kāmāvacarānaṁ tesaṁ tattha manindriyañca uppajjissati purisindriyañca uppajjissati. (Purisindriyamūlakaṁ.)
Yassa yattha jīvitindriyaṁ uppajjissati tassa tattha somanassindriyaṁ uppajjissatīti?
Yassa cittassa anantarā upekkhāsampayuttapacchimacittaṁ uppajjissati asaññasattānaṁ tesaṁ tattha jīvitindriyaṁ uppajjissati, no ca tesaṁ tattha somanassindriyaṁ uppajjissati. Itaresaṁ catuvokārānaṁ pañcavokārānaṁ tesaṁ tattha jīvitindriyañca uppajjissati somanassindriyañca uppajjissati.
Yassa vā pana yattha somanassindriyaṁ uppajjissati tassa tattha jīvitindriyaṁ uppajjissatīti? Āmantā.
Yassa yattha jīvitindriyaṁ uppajjissati tassa tattha upekkhindriyaṁ uppajjissatīti?
Yassa cittassa anantarā somanassasampayuttapacchimacittaṁ uppajjissati asaññasattānaṁ tesaṁ tattha jīvitindriyaṁ uppajjissati, no ca tesaṁ tattha upekkhindriyaṁ uppajjissati. Itaresaṁ catuvokārānaṁ pañcavokārānaṁ tesaṁ tattha jīvitindriyañca uppajjissati upekkhindriyañca uppajjissati.
Yassa vā pana yattha upekkhindriyaṁ uppajjissati tassa tattha jīvitindriyaṁ uppajjissatīti? Āmantā.
Yassa yattha jīvitindriyaṁ uppajjissati tassa tattha saddhindriyaṁ …pe… paññindriyaṁ …pe… manindriyaṁ uppajjissatīti?
Asaññasattānaṁ tesaṁ tattha jīvitindriyaṁ uppajjissati, no ca tesaṁ tattha manindriyaṁ uppajjissati. Catuvokārānaṁ pañcavokārānaṁ tesaṁ tattha jīvitindriyañca uppajjissati manindriyañca uppajjissati.
Yassa vā pana yattha manindriyaṁ uppajjissati tassa tattha jīvitindriyaṁ uppajjissatīti? Āmantā. (Jīvitindriyamūlakaṁ.)
Yassa yattha somanassindriyaṁ uppajjissati tassa tattha upekkhindriyaṁ uppajjissatīti?
Yassa cittassa anantarā somanassasampayuttapacchimacittaṁ uppajjissati tesaṁ tattha somanassindriyaṁ uppajjissati, no ca tesaṁ tattha upekkhindriyaṁ uppajjissati. Itaresaṁ catuvokārānaṁ pañcavokārānaṁ tesaṁ tattha somanassindriyañca uppajjissati upekkhindriyañca uppajjissati.
Yassa vā pana yattha upekkhindriyaṁ uppajjissati tassa tattha somanassindriyaṁ uppajjissatīti?
Yassa cittassa anantarā upekkhāsampayuttapacchimacittaṁ uppajjissati tesaṁ tattha upekkhindriyaṁ uppajjissati, no ca tesaṁ tattha somanassindriyaṁ uppajjissati. Itaresaṁ catuvokārānaṁ pañcavokārānaṁ tesaṁ tattha upekkhindriyañca uppajjissati somanassindriyañca uppajjissati.
Yassa yattha somanassindriyaṁ uppajjissati tassa tattha saddhindriyaṁ …pe… paññindriyaṁ …pe… manindriyaṁ uppajjissatīti? Āmantā.
Yassa vā pana yattha manindriyaṁ uppajjissati tassa tattha somanassindriyaṁ uppajjissatīti?
Yassa cittassa anantarā upekkhāsampayuttapacchimacittaṁ uppajjissati tesaṁ tattha manindriyaṁ uppajjissati, no ca tesaṁ tattha somanassindriyaṁ uppajjissati. Itaresaṁ catuvokārānaṁ pañcavokārānaṁ tesaṁ tattha manindriyañca uppajjissati somanassindriyañca uppajjissati. (Somanassindriyamūlakaṁ.)
Yassa yattha upekkhindriyaṁ uppajjissati tassa tattha saddhindriyaṁ …pe… paññindriyaṁ …pe… manindriyaṁ uppajjissatīti? Āmantā.
Yassa vā pana yattha manindriyaṁ uppajjissati tassa tattha upekkhindriyaṁ uppajjissatīti?
Yassa cittassa anantarā somanassasampayuttapacchimacittaṁ uppajjissati tesaṁ tattha manindriyaṁ uppajjissati, no ca tesaṁ tattha upekkhindriyaṁ uppajjissati. Itaresaṁ catuvokārānaṁ pañcavokārānaṁ tesaṁ tattha manindriyañca uppajjissati upekkhindriyañca uppajjissati. (Upekkhindriyamūlakaṁ.)
Yassa yattha saddhindriyaṁ uppajjissati tassa tattha paññindriyaṁ …pe… manindriyaṁ uppajjissatīti? Āmantā.
Yassa vā pana yattha manindriyaṁ uppajjissati tassa tattha saddhindriyaṁ uppajjissatīti? Āmantā. (Saddhindriyamūlakaṁ.)
Yassa yattha paññindriyaṁ uppajjissati tassa tattha manindriyaṁ uppajjissatīti? Āmantā.
Yassa vā pana yattha manindriyaṁ uppajjissati tassa tattha paññindriyaṁ uppajjissatīti? Āmantā. (Paññindriyamūlakaṁ.)
10.2.1.3.4. Paccanīkapuggala
Yassa cakkhundriyaṁ na uppajjissati tassa sotindriyaṁ na uppajjissatīti? Āmantā.
Yassa vā pana sotindriyaṁ na uppajjissati tassa cakkhundriyaṁ na uppajjissatīti? Āmantā.
Yassa cakkhundriyaṁ na uppajjissati tassa ghānindriyaṁ na uppajjissatīti? Āmantā.