Dvādasindriyā siyā savitakkā, siyā avitakkā.
Navindriyā avicārā.
Domanassindriyaṁ savicāraṁ.
Dvādasindriyā siyā savicārā, siyā avicārā.
Ekādasindriyā appītikā.
Ekādasindriyā siyā sappītikā, siyā appītikā.
Ekādasindriyā na pītisahagatā.
Ekādasindriyā siyā pītisahagatā, siyā na pītisahagatā.
Dvādasindriyā na sukhasahagatā.
Dasindriyā siyā sukhasahagatā, siyā na sukhasahagatā.
Dvādasindriyā na upekkhāsahagatā.
Dasindriyā siyā upekkhāsahagatā, siyā na upekkhāsahagatā.
Dasindriyā kāmāvacarā.
Tīṇindriyā na kāmāvacarā.
Navindriyā siyā kāmāvacarā, siyā na kāmāvacarā.
Terasindriyā na rūpāvacarā.
Navindriyā siyā rūpāvacarā, siyā na rūpāvacarā.
Cuddasindriyā na arūpāvacarā.
Aṭṭhindriyā siyā arūpāvacarā, siyā na arūpāvacarā.
Dasindriyā pariyāpannā.
Tīṇindriyā apariyāpannā.
Navindriyā siyā pariyāpannā, siyā apariyāpannā.
Ekādasindriyā aniyyānikā.
Anaññātaññassāmītindriyaṁ niyyānikaṁ.
Dasindriyā siyā niyyānikā, siyā aniyyānikā.
Dasindriyā aniyatā.
Anaññātaññassāmītindriyaṁ niyataṁ.
Ekādasindriyā siyā niyatā, siyā aniyatā.
Dasindriyā sauttarā.
Tīṇindriyā anuttarā.
Navindriyā siyā sauttarā, siyā anuttarā.
Pannarasindriyā araṇā.
Domanassindriyaṁ saraṇaṁ.
Cha indriyā siyā saraṇā, siyā araṇāti.
Pañhāpucchakaṁ.
Indriyavibhaṅgo niṭṭhito.
Vibhaṅga
Paṭiccasamuppādavibhaṅga
1. Suttantabhājanīya
Avijjāpaccayā saṅkhārā, saṅkhārapaccayā viññāṇaṁ, viññāṇapaccayā nāmarūpaṁ, nāmarūpapaccayā saḷāyatanaṁ, saḷāyatanapaccayā phasso, phassapaccayā vedanā, vedanāpaccayā taṇhā, taṇhāpaccayā upādānaṁ, upādānapaccayā bhavo, bhavapaccayā jāti, jātipaccayā jarāmaraṇaṁ sokaparidevadukkhadomanassupāyāsā sambhavanti.
Evametassa kevalassa dukkhakkhandhassa samudayo hoti.
Tattha katamā avijjā?
Dukkhe aññāṇaṁ, dukkhasamudaye aññāṇaṁ, dukkhanirodhe aññāṇaṁ, dukkhanirodhagāminiyā paṭipadāya aññāṇaṁ—
ayaṁ vuccati “avijjā”.
Tattha katame avijjāpaccayā saṅkhārā?
Puññābhisaṅkhāro, apuññābhisaṅkhāro, āneñjābhisaṅkhāro, kāyasaṅkhāro, vacīsaṅkhāro, cittasaṅkhāro.
Tattha katamo puññābhisaṅkhāro?
Kusalā cetanā kāmāvacarā rūpāvacarā dānamayā sīlamayā bhāvanāmayā—
ayaṁ vuccati “puññābhisaṅkhāro”.
Tattha katamo apuññābhisaṅkhāro?
Akusalā cetanā kāmāvacarā—
ayaṁ vuccati “apuññābhisaṅkhāro”.
Tattha katamo āneñjābhisaṅkhāro?
Kusalā cetanā arūpāvacarā—
ayaṁ vuccati “āneñjābhisaṅkhāro”.
Tattha katamo kāyasaṅkhāro?
Kāyasañcetanā kāyasaṅkhāro, vacīsañcetanā vacīsaṅkhāro, manosañcetanā cittasaṅkhāro.
Ime vuccanti “avijjāpaccayā saṅkhārā”.
Tattha katamaṁ saṅkhārapaccayā viññāṇaṁ?
Cakkhuviññāṇaṁ, sotaviññāṇaṁ, ghānaviññāṇaṁ, jivhāviññāṇaṁ, kāyaviññāṇaṁ, manoviññāṇaṁ—
idaṁ vuccati “saṅkhārapaccayā viññāṇaṁ”.
Tattha katamaṁ viññāṇapaccayā nāmarūpaṁ?
Atthi nāmaṁ, atthi rūpaṁ.
Tattha katamaṁ nāmaṁ?
Vedanākkhandho, saññākkhandho, saṅkhārakkhandho—
idaṁ vuccati “nāmaṁ”.
Tattha katamaṁ rūpaṁ?
Cattāro mahābhūtā, catunnañca mahābhūtānaṁ upādāyarūpaṁ—
idaṁ vuccati “rūpaṁ”.
Iti idañca nāmaṁ, idañca rūpaṁ.
Idaṁ vuccati “viññāṇapaccayā nāmarūpaṁ”.
Tattha katamaṁ nāmarūpapaccayā saḷāyatanaṁ?
Cakkhāyatanaṁ, sotāyatanaṁ, ghānāyatanaṁ, jivhāyatanaṁ, kāyāyatanaṁ, manāyatanaṁ—
idaṁ vuccati “nāmarūpapaccayā saḷāyatanaṁ”.
Tattha katamo saḷāyatanapaccayā phasso?
Cakkhusamphasso sotasamphasso ghānasamphasso jivhāsamphasso kāyasamphasso manosamphasso—
ayaṁ vuccati “saḷāyatanapaccayā phasso”.
Tattha katamā phassapaccayā vedanā?
Cakkhusamphassajā vedanā, sotasamphassajā vedanā, ghānasamphassajā vedanā, jivhāsamphassajā vedanā, kāyasamphassajā vedanā, manosamphassajā vedanā—
ayaṁ vuccati “phassapaccayā vedanā”.
Tattha katamā vedanāpaccayā taṇhā?
Rūpataṇhā, saddataṇhā, gandhataṇhā, rasataṇhā, phoṭṭhabbataṇhā, dhammataṇhā—
ayaṁ vuccati “vedanāpaccayā taṇhā”.
Tattha katamaṁ taṇhāpaccayā upādānaṁ?
Kāmupādānaṁ, diṭṭhupādānaṁ, sīlabbatupādānaṁ, attavādupādānaṁ—
idaṁ vuccati “taṇhāpaccayā upādānaṁ”.
Tattha katamo upādānapaccayā bhavo?
Bhavo duvidhena—
atthi kammabhavo, atthi upapattibhavo.
Tattha katamo kammabhavo?
Puññābhisaṅkhāro, apuññābhisaṅkhāro, āneñjābhisaṅkhāro—
ayaṁ vuccati “kammabhavo”.
Sabbampi bhavagāmikammaṁ kammabhavo.
Tattha katamo upapattibhavo?
Kāmabhavo, rūpabhavo, arūpabhavo, saññābhavo, asaññābhavo, nevasaññānāsaññābhavo, ekavokārabhavo, catuvokārabhavo, pañcavokārabhavo—
ayaṁ vuccati “upapattibhavo”.
Ayaṁ vuccati “upādānapaccayā bhavo”.
Tattha katamā bhavapaccayā jāti?
Yā tesaṁ tesaṁ sattānaṁ tamhi tamhi sattanikāye jāti sañjāti okkanti abhinibbatti, khandhānaṁ pātubhāvo, āyatanānaṁ paṭilābho—
ayaṁ vuccati “bhavapaccayā jāti”.