1087. චතුත්ථං ඣානං{5} භාවෙත්වා ආරම්මණනානත්තතා මනසිකාර නානත්තතා ඡන්දනානත්තතා පණීධිනානත්තතා අධිමොක්ඛනානත්තතා අභිනීහාරනානත්තතා පඤ්ඤානානත්තතා අප්පෙකච්චෙ අසඤ්ඤසත්තානං දෙවානං සහව්යතං උපපජ්ජන්ති, අප්පෙකච්චෙ වෙහප්ඵලානං දෙවානං සහව්යතං උපපජ්ජන්ති, අප්පෙකච්චෙ අවිහානං දෙවානං සහව්යතං උපපජ්ජන්ති, අප්පෙකච්චෙ අතප්පානං දෙවානං සහව්යතං උපපජ්ජන්ති, අප්පෙකච්චෙ සුදස්සානං දෙවානං සහව්යතං උපපජ්ජන්ති, අප්පෙකච්චෙ සුදස්සීනං දෙවානං සහව්යතං උපපජ්ජන්ති, අප්පෙකච්චෙ අකනිට්ඨානං දෙවානං සහව්යතං උපපජ්ජන්ති. අප්පෙකච්චෙ ආකාසානඤ්චායතනූපගානං දෙවානං සහව්යතං උප්පජ්ජන්ති, අප්පෙකච්චෙ විඤ්ඤාණඤ්චායතනූපගානං දෙවානං සහව්යතං උපපජ්ජන්ති, අප්පෙකච්චෙ ආකිඤ්චඤ්ඤායතනූපගානං දෙවානං සහව්යතං උපපජ්ජන්ති අප්පෙකච්චෙ නෙවසඤ්ඤානාසඤ්ඤායතනූපගානං දෙවානං සහව්යතං උපපජ්ජන්ති.
1088. අසඤ්ඤසත්තානඤ්ච වෙහප්ඵලානඤ්ච දෙවානං කිත්තකං ආයුප්පමාණං: පඤ්ච කප්පසතානි.
අවිහානං දෙවානං කිත්තකං ආයුප්පමාණං: කප්පසහස්සං.
අතප්පානං දෙවානං කිත්තකං ආයුප්පමාණං: ද්වෙ කප්පසහස්සානි.
සුදස්සානං දෙවානං කිත්තකං ආයුප්පමාණං: චත්තාරි කප්පසහස්සානි.
සුදස්සීනං දෙවානං කිත්තකං ආයුප්පමාණං: අට්ඨ කප්පසහස්සානි.
අකනිට්ඨකානං දෙවානං කිත්තකං ආයුප්පමාණං: සොළස කප්පසහස්සානි.
ආකාසානඤ්චායතනූපගානං දෙවානං කිත්තකං ආයුප්පමාණං: වීසති කප්පසහස්සානි.
විඤ්ඤාණඤ්චායතනූපගානං දෙවානං කිත්තකං ආයුප්පමාණං: චත්තාරීස කප්පසහස්සානි.
ආකිඤ්චඤ්ඤායතනූපගානං දෙවානං කිත්තකං ආයුප්පමාණං: සට්ඨි කප්පසහස්සානි.
නෙවසඤ්ඤානාඤ්ඤායතනූපගානං දෙවානං කිත්තකං ආයුප්පමාණං: චතුරාසීති කප්පසහස්සානි.
1089. උක්ඛිත්තා පුඤ්ඤතෙජෙන - කාමරූපගතිඞ්ගතා භවග්ගතම්පි සම්පත්තා - පුනාගච්ඡන්ති දුග්ගතිං.
තාව දීඝායුකා සත්තා - වචන්ති ආයුසඞ්ඛයා, නත්ථි කොචි භවො නිච්චො - ඉති වුත්තං මහෙසිනා.
තස්මා හි ධීරා නිපකා - නිපුණා අත්ථචින්තකා, ජරාමරණමොක්ඛාය - භාවෙන්ති මග්ගමුත්තමං.
භාවයිත්වා සුචිං{1} මග්ගං - නිබ්බාණොගධගාමිනං, සබ්බාසවෙ{2} පරිඤ්ඤාය - පරිනිබ්බන්ති අනාසවා’ති.
7.
1090. පඤ්චන්නං ඛන්ධානං කති අභිඤ්ඤෙය්යා, කති පරිඤ්ඤෙය්යා. කති පහාතබ්බා, කති භාවෙතබ්බා, කති සච්ඡිකාතබ්බා, කති න පහාතබ්බා, න භාවෙතබ්බා, න සච්ඡිකාතබ්බා -පෙ- සත්තන්නං චිත්තානං කති අභිඤ්ඤෙය්යා, කති පරිඤ්ඤෙය්යා, කති පහාතබ්බා, කති භාවෙතබ්බා, කති සච්ඡිකාතබ්බා, කති න පහාතබ්බා, න භාවෙතබ්බා, න සච්ඡිකාතබ්බා:
1091. රූපක්ඛන්ධො අභිඤ්ඤෙය්යො පරිඤ්ඤෙය්යො න පහාතබ්බො න භාවෙතබ්බො න සච්ඡිකාතබ්බො. චත්තාරො ඛන්ධා අභිඤ්ඤෙය්යා පරිඤ්ඤෙය්යා, සියා පහාතබ්බා, සියා භාවෙතබ්බා, සියා සච්ඡිකාතබ්බා, සියා න පහාතබ්බා. න භාවෙතබ්බා, න සච්ඡිකාතබ්බා.
1092. දසායතනා අභිඤ්ඤෙය්යා, පරිඤ්ඤෙය්යා, න පහාතබ්බා, න භාවෙතබ්බා, න සච්ඡිකාතබ්බා. ද්වෙ ආයතනා අභිඤ්ඤෙය්යා පරිඤ්ඤෙය්යා, සියා පහාතබ්බා, සියා භාවෙතබ්බා, සියා සච්ඡිකාතබ්බා, සියා න පහාතබ්බා. න භාවෙතබ්බා, න සච්ඡිකාතබ්බා.
1093. සොළසධාතුයො අභිඤ්ඤෙය්යා, පරිඤ්ඤෙය්යා, න පහාතබ්බා. න භාවෙතබ්බා, න සච්ඡිකාතබ්බා. ද්වෙ ධාතුයො අභිඤ්ඤෙය්යා පරිඤ්ඤෙය්යා, සියා පහාතබ්බා, සියා භාවෙතබ්බා, සියා සච්ඡිකාතබ්බා, සියා න පහාතබ්බා, න භාවෙතබ්බා, න සච්ඡිකාතබ්බා.
1094. සමුදයසච්චං අභිඤ්ඤෙය්යං පරිඤ්ඤෙය්යං පහාතබ්බං න භාවෙතබ්බං න සච්ඡිකාතබ්බං. මග්ගසච්චං අභිඤ්ඤෙය්යං පරිඤ්ඤෙය්යං න පහාතබ්බං භාවෙතබ්බං න සච්ඡිකාතබ්බං. නිරොධසච්චං අභිඤ්ඤෙය්යං පරිඤ්ඤෙය්යං න පහාතබ්බං න භාවෙතබ්බං සච්ඡිකාතබ්බං. දුක්ඛසච්චං අභිඤ්ඤෙය්යං පරිඤ්ඤෙය්යං, සියා පහාතබ්බං න භාවෙතබ්බං, න සච්ඡිකාතබ්බං, සියා න පහාතබ්බං.
1095. නවින්ද්රියා අභිඤ්ඤෙය්යා පරිඤ්ඤෙය්යා න පහාතබ්බා න භාවෙතබ්බා න සච්ඡිකාතබ්බා. දොමනස්සින්ද්රියං අභිඤ්ඤෙය්යං පරිඤ්ඤෙය්යං පහාතබ්බං න භාවෙතබ්බං න සච්ඡිකාතබ්බං. අනඤ්ඤාතඤ්ඤස්සාමීතින්ද්රියං අභිඤ්ඤෙය්යං පරිඤ්ඤෙය්යං න පහාතබ්බං. භාවෙතබ්බං න සච්ඡිකාතබ්බං. අඤ්ඤින්ද්රියං අභිඤ්ඤෙය්යං පරිඤ්ඤෙය්යං න පහාතබ්බං. සියා භාවෙතබ්බං, සියා සච්ඡිකාතබ්බං. අඤ්ඤාතාවින්ද්රියං අභිඤ්ඤෙය්යං පරිඤ්ඤෙය්යං න පහාතබ්බං න භාවෙතබ්බං සච්ඡිකාතබ්බං. තීණින්ද්රියා අභිඤ්ඤෙය්යා පරිඤ්ඤෙය්යා න පහාතබ්බා, සියා භාවෙතබ්බා, සියා සච්ඡිකාතබ්බා, සියා න භාවෙතබ්බා න සච්ඡිකාතබ්බා. ඡ ඉන්ද්රියා අභිඤ්ඤෙය්යා පරිඤ්ඤෙය්යා, සියා පහාතබ්බා, සියා භාවෙතබ්බා සියා සච්ඡිකාතබ්බා, සියා න පහාතබ්බා, න භාවෙතබ්බා, න සච්ඡිකාතබ්බා.
1096 තයො අකුසලහෙතු අභිඤ්ඤෙය්යා පරිඤ්ඤෙය්යා පහාතබ්බා, න භාවෙතබ්බා, න සච්ඡිකාතබ්බා. තයො කුසලහෙතු අභිඤ්ඤෙය්යා පරිඤ්ඤෙය්යා, න පහාතබ්බා, සියා භාවෙතබ්බා න සච්ඡිකාතබ්බා, සියා න භාවෙතබ්බා. තයො අව්යාකතහෙතු අභිඤ්ඤෙය්යා පරිඤ්ඤෙය්යා, න පහාතබ්බා න භාවෙතබ්බා, සියා සච්ඡිකාතබ්බා, සියා න සච්ඡිකාතබ්බා.
1097. කබළිඞ්කාරො ආහාරො අභිඤ්ඤෙය්යො, පරිඤ්ඤෙය්යො, න පහාතබ්බො, න භාවෙතබ්බො, න සච්ඡිකාතබ්බො. තයො ආහාරා අභිඤ්ඤෙය්යා, පරිඤ්ඤෙය්යා, සියා පහාතබ්බා, සියා භාවෙතබ්බා. සියා සච්ඡිකාතබ්බා, සියා න පහාතබ්බා, න භාවෙතබ්බා. න සච්ඡිකාතබ්බා.
1098. ඡ ඵස්සා අභිඤ්ඤෙය්යා, පරිඤ්ඤෙය්යා, න පහාතබ්බා, න භාවෙතබ්බා, න සච්ඡිකාතබ්බා. මනොවිඤ්ඤාණධාතුසම්ඵස්සො අභිඤ්ඤෙය්යො, පරිඤ්ඤෙය්යො, සියා පහාතබ්බො, සියා භාවෙතබ්බො, සියා සච්ඡිකාතබ්බො, සියා න පහාතබ්බො, න භාවෙතබ්බො, න සච්ඡිකාතබ්බො.
1099. ඡ වෙදනා, ඡ සඤ්ඤා, ඡ චෙතනා, ඡ චිත්තා අභිඤ්ඤෙය්යා පරිඤ්ඤෙය්යා න පහාතබ්බා න භාවෙතබ්බා න සච්ඡිකාතබ්බා.
1100. මනොවිඤ්ඤාණධාතු අභිඤ්ඤෙය්යා පරිඤ්ඤෙය්යා සියා පහාතබ්බා, සියා භාවෙතබ්බා, සියා සච්ඡිකාතබ්බා, සියා න පහාතබ්බා, න භාවෙතබ්බා න සච්ඡිකාතබ්බා.
8.
1101. පඤ්චන්නං ඛන්ධානං කති සාරම්මණා, කති අනාරම්මණා -පෙ- සත්තන්නං චිත්තානං කති සාරම්මණා, කති අනාරම්මණා:
1102. රූපක්ඛන්ධො අනාරම්මණො. චත්තාරො ඛන්ධා සාරම්මණා.
දසායතනා අනාරම්මණා, මනායතනං සාරම්මණං. ධම්මායතනං සියා සාරම්මණං, සියා අනාරම්මණං.
දසධාතුයො අනාරම්මණා. සත්තධාතුයො සාරම්මණා, ධම්මධාතු සියා සාරම්මණා, සියා අනාරම්මණා.
ද්වෙ සච්චා සාරම්මණා. නිරොධසච්චං අනාරම්මණං. දුක්ඛසච්චං සියා සාරම්මණං, සියා අනාරම්මණං.
සත්තින්ද්රියා අනාරම්මණා, චුද්දසින්ද්රියා සාරම්මණා. ජීවිතින්ද්රියං සියා සාරම්මණං, සියා අනාරම්මණං.
නව හෙතූ සාරම්මණා, කබළිඞ්කාරො ආහාරො අනාරම්මණො, තයො ආහාරා සාරම්මණා.
සත්තඵස්සා, සත්ත වෙදනා, සත්ත සඤ්ඤා, සත්ත චෙතනා, සත්ත චිත්තා සාරම්මණා.
1103. පඤ්චන්නං ඛන්ධානං කති සාරම්මණාරම්මණා, කති අනාරම්මණාරම්මණා -පෙ- සත්තන්නං චිත්තානං කති සාරම්මණාරම්මණා, කති අනාරම්මණාරම්මණා:
1104. රූපක්ඛන්ධො අනාරම්මණො. චත්තාරො ඛන්ධා සියා සාරම්මණා රම්මණා, සියා අනාරම්මණාරම්මණා.
දසායතනා අනාරම්මණා. මනායතනං සියා සාරම්මණාරම්මණං, සියා අනාරම්මණාරම්මණං. ධම්මායතනං සියා සාරම්මණාරම්මණං, සියා අනාරම්මණාරම්මණං, සියා අනාරම්මණං.
දස ධාතුයො අනාරම්මණා. ඡ ධාතුයො අනාරම්මණාරම්මණා. මනොවිඤ්ඤාණධාතු සියා සාරම්මණාරම්මණා, සියා අනාරම්මණාරම්මණා, ධම්මධාතු සියා සාරම්මණාරම්මණා, සියා අනාරම්මණාරම්මණා, සියා අනාරම්මණා
නිරොධසච්චං අනාරම්මණං. මග්ගසච්චං අනාරම්මණාරම්මණං. සමුදයසච්චං සියා සාරම්මණාරම්මණං, සියා අනාරම්මණාරම්මණං, දුක්ඛසච්චං සියා සාරම්මණාරම්මණං, සියා අනාරම්මණාරම්මණං, සියා අනාරම්මණං.
සත්තින්ද්රියා අනාරම්මණා. පඤ්චින්ද්රියා අනාරම්මණාරම්මණා. නවින්ද්රියා සියා සාරම්මණාරම්මණා, සියා අනාරම්මණාරම්මණා. ජීවිතින්ද්රියං සියා සාරම්මණාරම්මණං, සියා අනාරම්මණාරම්මණං, සියා අනාරම්මණං.
නව හෙතූ සියා සාරම්මණාරම්මණා, සියා අනාරම්මණාරම්මණා.
කබළිඞ්කාරො ආහාරො අනාරම්මණො. තයො ආහාරා සියා සාරම්මණාරම්මණා, සියා අනාරම්මණාරම්මණා.
ඡ ඵස්සා අනාරම්මණාරම්මණා. මනොවිඤ්ඤාණධාතුසම්ඵස්සො සියා සාරම්මණාරම්මණො, සියා අනාරම්මණාරම්මණො.
ඡ වෙදනා, ඡ සඤ්ඤා, ඡ චෙතනා, ඡ චිත්තා අනාරම්මණාරම්මණා. මනොවිඤ්ඤාණධාතු සියා සාරම්මණාරම්මණා, සියා අනාරම්මණාරම්මණා.
9.
1105. පඤ්චන්නං ඛන්ධානං කති දිට්ඨා, කති සුතා, කති මුතා, කති විඤ්ඤාතා, කති න දිට්ඨා, න සුතා, න මුතා, න විඤ්ඤාතා, -පෙ- සත්තන්නං චිත්තානං කති දිට්ඨා, කති සුතා, කති මුතා, කති විඤ්ඤාතා, කති න දිට්ඨා, න සුතා, න මුතා, න විඤ්ඤාතා:
1106. රූපක්ඛන්ධො සියා දිට්ඨො, සියා සුතො, සියා මුතො, සියා විඤ්ඤාතො, සියා න දිට්ඨො, න සුතො, න මුතො, න විඤ්ඤාතො. චත්තාරො ඛන්ධා න දිට්ඨා, න සුතා, න මුතා, විඤ්ඤාතා.
රූපායතනං දිට්ඨං, න සුතං, න මුතං, විඤ්ඤාතං. සද්දායතනං න දිට්ඨං, සුතං, න මුතං, විඤ්ඤාතං. ගන්ධායතනං රසායතනං ඵොට්ඨබ්බායතනං න දිට්ඨං, න සුතං, මුතං, විඤ්ඤාතං. සත්තායතනා න දිට්ඨා, න සුතා, න මුතා, විඤ්ඤාතා.
රූපධාතු දිට්ඨා, න සුතා, න මුතා, විඤ්ඤාතා. සද්දධාතු න දිට්ඨා, සුතා, න මුතා, විඤ්ඤාතා. ගන්ධධාතු රසධාතු ඵොට්ඨබ්බධාතු න දිට්ඨා, න සුතා, මුතා, විඤ්ඤාතා. තෙරස ධාතුයො න දිට්ඨා, න සුතා, න මුතා, විඤ්ඤාතා.
තීණි සච්චානි න දිට්ඨා, න සුතා, න මුතා, විඤ්ඤාතා. දුක්ඛසච්චං සියා දිට්ඨං, සියා සුතං, සියා මුතං, සියා විඤ්ඤාතං, සියා න දිට්ඨං, න සුතං, න මුතං, විඤ්ඤාතං.
බාවීසතින්ද්රියා න දිට්ඨා, න සුතා, න මුතා, විඤ්ඤාතා.
නව හෙතූ න දිට්ඨා, න සුතා, න මුතා, විඤ්ඤාතා.
චත්තාරො ආහාරා න දිට්ඨා, න සුතා, න මුතා, විඤ්ඤාතා.
සත්ත ඵස්සා න දිට්ඨා, න සුතා, න මුතා, විඤ්ඤාතා.
සත්ත වෙදනා, සත්ත සඤ්ඤා, සත්ත චෙතනා, සත්ත චිත්තා, න දිට්ඨා, න සුතා, න මුතා, විඤ්ඤාතා.
10.
1107. පඤ්චන්නං ඛන්ධානං කති කුසලා, කති අකුසලා, කති අව්යාකතා, -පෙ- සත්තන්නං චිත්තානං කති කුසලා, කති අකුසලා, කති අව්යාකතා:
1108. රූපක්ඛන්ධො අව්යාකතො. චත්තාරො ඛන්ධා සියා කුසලා, සියා අකුසලා, සියා අව්යාකතා.
දසායතනා අව්යාකතා. ද්වායතනා සියා කුසලා, සියා අකුසලා, සියා අව්යාකතා.
සොළස ධාතුයො අව්යාකතා. ද්වෙ ධාතුයො. සියා කුසලා, සියා අකුසලා, සියා අව්යාකතා.
සමුදයසච්චං අකුසලං. මග්ගසච්චං කුසලං. නිරොධසච්චං අව්යාකතං. දුක්ඛ සච්චං සියා කුසලං. සියා අකුසලං, සියා අව්යාකතං.
දසින්ද්රියා අව්යාකතා. දොමනස්සින්ද්රියං අකුසලං අනඤ්ඤාතඤ්ඤස්සාමීතින්ද්රියං කුසලං. චත්තාරින්ද්රියා සියා කුසලා, සියා අව්යාකතා. ඡ ඉන්ද්රියා සියා කුසලා, සියා අකුසලා, සියා අව්යාකතා.
තයො කුසලහෙතූ කුසලා. තයො අකුසලහෙතූ අකුසලා. තයො අව්යාකතහෙතූ අව්යාකතා.
කබළිඞ්කාරො ආහාරො අව්යාකතො. තයො ආහාරා සියා කුසලා, සියා අකුසලා, සියා අව්යාකතා.
ඡ ඵස්සා අව්යාකතා. මනොවිඤ්ඤාණධාතුසම්ඵස්සො සියා කුසලො, සියා අකුසලො, සියා අව්යාකතො.
ඡ වෙදනා, ඡ සඤ්ඤා, ඡ චෙතනා, ඡ චිත්තා අව්යාකතා. මනො විඤ්ඤාණධාතු සියා කුසලා, සියා අකුසලා, සියා අව්යාකතා.
1109. පඤ්චන්නං ඛන්ධානං කති සුඛාය වෙදනාය සම්පයුත්තා: කති දුක්ඛාය වෙදනාය සම්පයුත්තා: කති අදුක්ඛමසුඛාය වෙදනාය සම්පයුත්තා: -පෙ- සත්තන්නං චිත්තානං කති සුඛාය වෙදනාය සම්පයුත්තා: කති දුක්ඛාය වෙදනාය සම්පයුත්තා: කති අදුක්ඛමසුඛාය වෙදනාය සම්පයුත්තා:
1110. ද්වෙ ඛන්ධා න වත්තබ්බා සුඛාය වෙදනාය සම්පයුත්තාතිපි දුක්ඛාය වෙදනාය සම්පයුත්තාතිපි අදුක්ඛමසුඛාය වෙදනාය සම්පයුත්තාතිපි. තයො ඛන්ධා සියා සුඛාය වෙදනාය සම්පයුත්තා, සියා දුක්ඛාය වෙදනාය සම්පයුත්තා, සියා අදුක්ඛමසුඛාය වෙදනාය සම්පයුත්තා.
දසායතනා න වත්තබ්බා සුඛාය වෙදනාය සම්පයුත්තාතිපි දුක්ඛාය වෙදනාය සම්පයුත්තාතිපි අදුක්ඛමසුඛාය වෙදනාය සම්පයුත්තාතිපි. මනායතනං සියා සුඛාය වෙදනාය සම්පයුත්තං, සියා දුක්ඛාය වෙදනාය සම්පයුත්තං, සියා අදුක්ඛමසුඛාය වෙදනාය සම්පයුත්තං. ධම්මායතනං සියා සුඛාය වෙදනාය සම්පයුත්තං, සියා දුක්ඛාය වෙදනාය සම්පයුත්තං, සියා අදුක්ඛමසුඛාය වෙදනාය සම්පයුත්තං, සියා න වත්තබ්බං සුඛාය වෙදනාය සම්පයුත්තන්තිපි දුක්ඛාය වෙදනාය සම්පයුත්තන්තිපි අදුක්ඛමසුඛාය වෙදනාය සම්පයුත්තන්තිපි.
දසධාතුයො න වත්තබ්බා සුඛාය වෙදනාය සම්පයුත්තාතිපි. දුක්ඛාය වෙදනාය සම්පයුත්තාතිපි අදුක්ඛමසුඛාය වෙදනාය සම්පයුත්තාතිපි. පඤ්ච ධාතුයො අදුක්ඛමසුඛාය වෙදනාය සම්පයුත්තා. කායවිඤ්ඤාණධාතු සියා සුඛාය වෙදනාය සම්පයුත්තා, සියා දුක්ඛාය වෙදනාය සම්පයුත්තා. මනොවිඤ්ඤාණධාතු සියා සුඛාය වෙදනාය සම්පයුත්තා, සියා දුක්ඛාය වෙදනාය සම්පයුත්තා, සියා අදුක්ඛමසුඛාය වෙදනාය සම්පයුත්තා. ධම්මධාතු සියා සුඛාය වෙදනාය සම්පයුත්තා, සියා දුක්ඛාය වෙදනාය සම්පයුත්තා, සියා අදුක්ඛමසුඛාය වෙදනාය සම්පයුත්තා, සියා න වත්තබ්බා සුඛාය වෙදනාය සම්පයුත්තාතිපි දුක්ඛාය වෙදනාය සම්පයුත්තාතිපි අදුක්ඛමසුඛාය වෙදනාය සම්පයුත්තාතිපි.
ද්වෙ සච්චා සියා සුඛාය වෙදනාය සම්පයුත්තා, සියා අදුක්ඛමසුඛාය වෙදනාය සම්පයුත්තා. නිරොධසච්චං. න වත්තබ්බං සුඛාය වෙදනාය සම්පයුත්තන්තිපි දුක්ඛාය වෙදනාය සම්පයුත්තන්තිපි අදුක්ඛමසුඛාය වෙදනාය සම්පයුත්තන්තිපි. දුක්ඛසච්චං සියා සුඛාය වෙදනාය සම්පයුත්තං. සියා දුක්ඛාය වෙදනාය සම්පයුත්තං, සියා අදුක්ඛමසුඛාය වෙදනාය සම්පයුත්තං. සියා න වත්තබ්බං සුඛාය වෙදනාය සම්පයුත්තන්තිපි දුක්ඛාය වෙදනාය සම්පයුත්තන්තිපි අදුක්ඛමසුඛාය වෙදනාය සම්පයුත්තන්තිපි.
ද්වාදසින්ද්රියා න වත්තබ්බා සුඛාය වෙදනාය සම්පයුත්තාතිපි දුක්ඛාය වෙදනාය සම්පයුත්තාතිපි අදුක්ඛමසුඛාය වෙදනාය සම්පයුත්තාතිපි. ඡ ඉන්ද්රියා සියා සුඛාය වෙදනාය සම්පයුත්තා, සියා අදුක්ඛමසුඛාය වෙදනාය සම්පයුත්තා. තීණින්ද්රියා සියා සුඛාය වෙදනාය සම්පයුත්තා, සියා දුක්ඛාය වෙදනාය සම්පයුත්තා, සියා අදුක්ඛමසුඛාය වෙදනාය සම්පයුත්තා. ජීවිතින්ද්රියං සියා සුඛාය වෙදනාය සම්පයුත්තං, සියා දුක්ඛාය වෙදනාය සම්පයුත්තං, සියා අදුක්ඛමසුඛාය වෙදනාය සම්පයුත්තං සියා න වත්තබ්බං සුඛාය වෙදනාය සම්පයුත්තන්තිපි දුක්ඛාය වෙදනාය සම්පයුත්තන්තිපි අදුක්ඛමසුඛාය වෙදනාය සම්පයුත්තන්තිපි.
දොසො අකුසලහෙතු දුක්ඛාය වෙදනාය සම්පයුත්තො. සත්තහෙතූ සියා සුඛාය වෙදනාය සම්පයුත්තා, සියා අදුක්ඛමසුඛාය වෙදනාය සම්පයුත්තා. මොහො අකුසලහෙතු සියා සුඛාය වෙදනාය සම්පයුත්තො, සියා දුක්ඛාය වෙදනාය සම්පයුත්තො, සියා අදුක්ඛමසුඛාය වෙදනාය සම්පයුත්තො.
කබළිඞ්කාරො ආහාරො න වත්තබ්බො සුඛාය වෙදනාය සම්පයුත්තොතිපි දුක්ඛාය වෙදනාය සම්පයුත්තොතිපි අදුක්ඛමසුඛාය වෙදනාය සම්පයුත්තොතිපි. තයො ආහාරා සියා සුඛාය වෙදනාය සම්පයුත්තා. සියා දුක්ඛාය වෙදනාය සම්පයුත්තා, සියා අදුක්ඛමසුඛාය වෙදනාය සම්පයුත්තා.
පඤ්ච ඵස්සා අදුක්ඛමසුඛාය වෙදනාය සම්පයුත්තා. කායවිඤ්ඤාණධාතුසම්ඵස්සො සියා සුඛාය වෙදනාය සම්පයුත්තො, සියා දුක්ඛාය වෙදනාය සම්පයුත්තො. මනොවිඤ්ඤාණධාතුසම්ඵස්සො සියා සුඛාය වෙදනාය සම්පයුත්තො, සියා දුක්ඛාය වෙදනාය සම්පයුත්තො, සියා අදුක්ඛමසුඛාය වෙදනාය සම්පයුත්තො.
සත්ත වෙදනා න වත්තබ්බා සුඛාය වෙදනාය සම්පයුත්තාතිපි දුක්ඛාය වෙදනාය සම්පයුත්තාතිපි අදුක්ඛමසුඛාය වෙදනාය සම්පයුත්තාතිපි.
පඤ්ච සඤ්ඤා -පෙ- පඤ්ච චෙතනා පඤ්ච චිත්තා අදුක්ඛමසුඛාය වෙදනාය සම්පයුත්තා. කායවිඤ්ඤාණධාතු සියා සුඛාය වෙදනාය සම්පයුත්තා, සියා දුක්ඛාය වෙදනාය සම්පයුත්තා. මනොවිඤ්ඤාණධාතු සියා සුඛාය වෙදනාය සම්පයුත්තා, සියා දුක්ඛාය වෙදනාය සම්පයුත්තා. සියා අදුක්ඛමසුඛාය වෙදනාය සම්පයුත්තා.
1111. පඤ්චන්නං ඛන්ධානං කතී විපාකා: කති විපාකධම්මධම්මා: කති නෙවවිපාකනවිපාකධම්මධම්මා: -පෙ- සත්තන්නං චිත්තානං කති විපාකා: කතී විපාකධම්මධම්මා: කතී නෙවවිපාකනවිපාකධම්මධම්මා:
1112. රූපක්ඛන්ධො නෙවවිපාකනවිපාකධම්මධම්මො. චත්තාරො ඛන්ධා සියා විපාකා, සියා විපාකධම්මා, සියා නෙවවිපාකනවිපාක ධම්මධම්මා.
දසායතනා නෙවවිපාකනවිපාකධම්මධම්මා. ද්වායතනා සියා විපාකා, සියා විපාකධම්මධම්මා, සියා නෙවවිපාකනවිපාකධම්මධම්මා.
දසධාතුයො නෙවවිපාකනවිපාකධම්මධම්මා. පඤ්චධාතුයො විපාකා. මනොධාතු සියා විපාකා, සියා නෙවවිපාකනවිපාකධම්මධම්මා. ද්වෙ ධාතුයො සියා විපාකා, සියා විපාකධම්මධම්මා, සියා නෙවවිපාක න විපාකධම්මධම්මා.
ද්වෙ සච්චා විපාකධම්මධම්මා. නිරොධසච්චං නෙවවිපාකනවිපාකධම්මධම්මං. දුක්ඛසච්චං සියා විපාකං, සියා විපාකධම්මධම්මං, සියා නෙවවිපාකනවිපාකධම්මධම්මං.
සත්තින්ද්රියා නෙවවිපාකනවිපාකධම්මධම්මා. තීණින්ද්රියා විපාකා. දුවින්ද්රියා විපාකධම්මධම්මා. අඤ්ඤින්ද්රියං සියා විපාකං, සියා විපාක ධම්මධම්මං. නවින්ද්රියා සියා විපාකා, සියා විපාකධම්මධම්මා, සියා නෙව විපාකනවිපාකධම්මධම්මා.
ඡ හෙතූ විපාකධම්මධම්මා. තයො අව්යාකතහෙතූ සියා විපාකා, සියා නෙවවිපාකනවිපාකධම්මධම්මා.
කබළිඞ්කාරො ආහාරො නෙවවිපාකනවිපාකධම්මධම්මො. තයො ආහාරා සියා විපාකා, සියා විපාකධම්මධම්මා, සියා නෙවවිපාකනවිපාකධම්මධම්මා.
පඤ්ච ඵස්සා විපාකා. මනොධාතුසම්ඵස්සො සියා විපාකො, සියා නෙවවිපාකනවිපාකධම්මධම්මො. මනොවිඤ්ඤාණධාතුසම්ඵස්සො සියා විපාකො, සියා විපාකධම්මධම්මො, සියා නෙවවිපාකනවිපාකධම්මධම්මො.
පඤ්ච වෙදනා, පඤ්ච සඤ්ඤා, පඤ්ච චෙතනා, පඤ්ච චිත්තා විපාකා. මනොධාතු සායි විපාකා, සියා නෙවවිපාකනවිපාකධම්මධම්මා. මනොවිඤ්ඤාණධාතු සියා විපාකා, සියා විපාකධම්මධම්මා, සියා නෙව විපාකනවිපාකධම්මධම්මා.
1113. පඤ්චන්නං ඛන්ධානං කති උපාදින්නුපාදානියා: කති අනුපාදින්නුපාදානියා: කති අනුපාදින්නඅනුපාදානියා -පෙ- සත්තන්නං චිත්තානං කති උපාදින්නුපාදානියා: කති අනුපාදින්නුපාදානියා: කති අනුපාදින්නඅනුපාදානියා:
1114. රූපක්ඛන්ධො සියා උපාදින්නුපාදානියො, සියා අනුපාදින්නුපාදානියො. චත්තාරො ඛන්ධා සියා උපාදින්නුපාදානියා, සියා අනුපාදින්නුපාදානියා, සියා අනුපාදින්නඅනුපාදානියා.
පඤ්චායතනා උපාදින්නුපාදානියා, සද්දායතනං අනුපාදින්නුපාදානියං. චත්තාරො ආයතනා සියා උපාදින්නුපාදානියා, සියා අනුපාදින්නුපාදානියා. ද්වායතනා සියා උපාදින්නුපාදානියා, සියා අනුපාදින්නුපාදානියා, සියා අනුපාදින්නඅනුපාදානියා.
දසධාතුයො උපාදින්නුපාදානියා, සද්දධාතු අනුපාදින්නුපාදානියා පඤ්ච ධාතුයො සියා උපාදින්නුපාදානියා, සියා අනුපාදින්නුපාදානියා. ද්වෙ ධාතුයො සියා උපාදින්නුපාදානියා, සියා අනුපාදින්නුපාදානියා සියා අනුපාදින්නඅනුපාදානියා.
සමුදයසච්චං අනුපාදින්නුපාදානියං. ද්වෙ සච්චා අනුපාදින්නඅනුපාදානියා. දුක්ඛසච්චං සියා උපාදින්නුපාදානියං, සියා අනුපාදින්නුපාදානියං.
නවින්ද්රියා උපාදින්නුපාදානියා. දොමනස්සින්ද්රියං අනුපාදින්නුපාදානියං. තීණින්ද්රියා අනුපාදින්නඅනුපාදානියා. නවින්ද්රියා සියා උපාදින්නුපාදානියා, සියා අනුපාදින්නුපාදානියා, සියා අනුපාදින්නඅනුපාදානියා.
තයො අකුසලහෙතූ අනුපාදින්නුපාදානියා. තයො කුසලහෙතූ සියා අනුපාදින්නුපාදානියා, සියා අනුපාදින්නඅනුපාදානියා. තයො අව්යාකතහෙතූ සියා උපාදින්නුපාදානියා, සියා අනුපාදින්නුපාදානියා, සියා අනුපාදින්නඅනුපාදානියා.
කබළිඞ්කාරො ආහාරො සියා උපාදින්නුපාදානියො, සියා අනුපාදින්නුපාදානියො. තයො ආහාරා සියා උපාදින්නුපාදානියා, සියා අනුපාදින්නුපාදානියා, සියා අනුපාදින්නඅනුපාදානියා.
පඤ්ච ඵස්සා උපාදින්නුපාදානියා. මනොධාතුසම්ඵස්සො සියා උපාදින්නුපාදානියො, සියා අනුපාදින්නුපාදානියො. මනොවිඤ්ඤාණධාතු සම්ඵස්සො සියා උපාදින්නුපාදානියො, සියා අනුපාදින්නුපාදානියො, සියා අනුපාදින්නඅනුපාදානියො.
පඤ්ච වෙදනා, පඤ්ච සඤ්ඤා, පඤ්ච චෙතනා, පඤ්ච චිත්තා උපාදින්නුපාදානියා. මනොධාතු සියා උපාදින්නුපාදානියා, සියා අනුපාදින්නුපාදානියා. මනොවිඤ්ඤාණධාතු සියා උපාදින්නුපාදානියා, සියා අනුපාදින්නුපාදානියා, සියා අනුපාදින්නඅනුපාදානියා.
1115. පඤ්චන්නං ඛන්ධානං කති සවිතක්කසවිචාරා: කති අවිතක්කවිචාරමත්තා: කති අවිතක්කඅවිචාරා: -පෙ- සත්තන්නං චිත්තානං කති සවිතක්කසවිචාරා: කති අවිතක්කවිචාරමත්තා: කති අවිතක්කඅවිචාරා: