223. ද්වාදසායතනානි: චක්ඛායතනං. රූපායතනං, සොතායතනං, සද්දායතනං, ඝානායතනං, ගන්ධායතනං, ජිව්හායතනං, රසායතනං, කායායතනං, ඵොට්ඨබ්බායතනං, මනායතනං, ධම්මායතනං.
224. චක්ඛුං අනිච්චං දුක්ඛං අනත්තා විපරිණාමධම්මං, රූපා අනිච්චා දුක්ඛා අනත්තා විපරිණාමධම්මා, සොතං අනිච්චං දුක්ඛං අනත්තා විපරිණාමධම්මං, සද්දා අනිච්චා දුක්ඛා අනත්තා විපරිණාමධම්මා, ඝානං අනිච්චං දුක්ඛං අනත්තා විපරිණාමධම්මං, ගන්ධා අනිච්චා දුක්ඛා අනත්තා විපරිණාමධම්මා, ජිව්හා අනිච්චා දුක්ඛා අනත්තා විපරිණාමධම්මා, රසා අනිච්චා දුක්ඛා අනත්තා විපරිණාමධම්මා, කායො අනිච්චො දුක්ඛො අනත්තා විපරිණාමධම්මො, ඵොට්ඨබ්බා අනිච්චා දුක්ඛා අනත්තා විපරිණාමධම්මා, මනො අනිච්චො දුක්ඛො අනත්තා විපරිණාමධම්මො, ධම්මා අනිච්චා දුක්ඛා අනත්තා විපරිණාමධම්මා.
සුත්තන්තභාජනියං.
225. ද්වාදසායතනානි: චක්ඛායතනං, සොතායතනං, ඝානායතනං, ජිව්හායතනං, කායායතනං, මනායතනං, රූපායතනං, සද්දායතනං, ගන්ධායතනං, රසායතනං, ඵොට්ඨබ්බායතනං, ධම්මායතනං.
226. තත්ථ කතමං චක්ඛායතනං, යං චක්ඛුං චතුන්නං මහාභූතානං උපාදාය පසාදො අත්තභාවපරියාපන්නො අනිදස්සනො සප්පටිඝො, යෙන චක්ඛුනා අනිදස්සනෙන සප්පටිඝෙන රූපං සනිදස්සනං සප්පටිඝං පස්සී වා පස්සති වා පස්සිස්සති වා පස්සෙ වා, චක්ඛුම්පෙතං චක්ඛායතනම්පෙතං චක්ඛුධාතුපෙසා චක්ඛුන්ද්රියම්පෙතං ලොකොපෙසො ද්වාරාපෙසා සමුද්දොපෙසො පණ්ඩරම්පෙතං ඛෙත්තම්පෙතං වත්ථුම්පෙතං නෙත්තම්පෙතං නයනම්පෙතං ඔරිමං තීරම්පෙතං සුඤ්ඤො ගාමොපෙසො ඉදං වුච්චති චක්ඛායතනං.
227. තත්ථ කතමං සොතායතනං: යං සොතං චතුන්නං මහාභූතානං උපාදාය පසාදො අත්තභාවපරියාපන්නො අනිදස්සනො සප්පටිඝො, යෙන සොතෙන අනිදස්සනෙන සප්පටිඝෙන සද්දං අනිදස්සනං සප්පටිඝං සුණී වා සුණාති වා සුණිස්සති වා සුණෙ වා සොතම්පෙතං සොතායතනම්පෙතං සොතධාතුපෙසා සොතින්ද්රියම්පෙතං ලොකොපෙසො ද්වාරාපෙසා සමුද්දොපෙසො පණ්ඩරම්පෙතං ඛෙත්තම්පෙතං වත්ථුම්පෙතං ඔරිමං තීරම්පෙතං සුඤ්ඤො ගාමොපෙසො ඉදං වුච්චති සොතායතනං.
228. තත්ථ කතමං ඝානායතනං: යං ඝානං චතුන්නං මහාභූතානං උපාදාය පසාදො අත්තභාවපරියාපන්නො අනිදස්සනො සප්පටිඝො, යෙන ඝානෙන අනිදස්සනෙන සප්පටිඝෙන ගන්ධං අනිදස්සනං සප්පටිඝං ඝායී වා ඝායති වා ඝායිස්සති වා ඝායෙ වා ඝානම්පෙතං ඝානායතනම්පෙතං ඝානධාතුපෙසා ඝානින්ද්රියම්පෙතං ලොකොපෙසො ද්වාරාපෙසා සමුද්දොපෙසො පණ්ඩරම්පෙතං ඛෙත්තම්පෙතං වත්ථුම්පෙතං ඔරිමං තීරම්පෙතං සුඤ්ඤො ගාමොපෙසො ඉදං වුච්චති ඝානායතනං.
229. තත්ථ කතමං ජිව්හායතනං: යා ජිව්හා චතුන්නං මහාභූතානං උපාදාය පසාදො අත්තභාවපරියාපන්නො අනිදස්සනො සප්පටිඝො යාය ජිව්හාය අනිදස්සනාය සප්පටිඝාය රසං අනිදස්සනං සප්පටිඝං සායී වා සායති වා සායිස්සති වා සයෙවා ජිව්හාපෙසා ජිව්හායතනම්පෙතං ජිව්හාධාතු’පෙසා ජිව්හින්ද්රියම්පෙතං ලොකො’පෙසො ද්වාරා’පෙසා සමුද්දොපෙසො පණ්ඩරම්පෙතං ඛෙත්තම්පෙතං වත්ථුම්පෙතං ඔරිමං තීරම්පෙතං සුඤ්ඤො ගාමො’පෙසො, ඉදං වුච්චති ජිව්හායතනං.
230. තත්ථ කතමං කායායතනං: යො කායො චතුන්නං මහාභූතානං උපාදාය පසාදො අත්තභාවපරියාපන්නො අනිදස්සනො සප්පටිඝො යෙන කායෙන අනිදස්සනෙන සප්පටිඝෙන ඵොට්ඨබ්බං අනිදස්සනං සප්පටිඝං ඵුසී වා ඵුසති වා ඵුසිස්සති වා ඵුසෙ වා කායොපෙසො කායායතනම්පෙතං කයාධාතුපෙසා කායින්ද්රියම්පෙතං ලොකො’පෙසා ද්වාරා’පෙසා සමුද්දොපෙසො පණ්ඩරම්පෙතං ඛෙත්තම්පෙතං වත්ථුම්පෙතං ඔරිමං තීරම්පෙතං සුඤ්ඤො ගාමො’පෙසො, ඉදං වුච්චති කායායතනං.
231. තත්ථ කතමං මනායතනං: එකවිධෙන මනායතනං: ඵස්සසම්පයුත්තං.
දුවිධෙන මනායතනං: අත්ථි සහෙතුකං, අත්ථි අහෙතුකං.
තිවිධෙන මනායතනං: අත්ථි කුසලං අත්ථි අකුසලං අත්ථි අව්යාකතං.
චතුබ්බිධෙන මනායතනං: අත්ථි කාමාවචරං අත්ථි රූපාවචරං අත්ථි අරූපාවචරං අත්ථි අපරියාපන්නං.
පඤ්චවිධෙන මනායතනං: අත්ථි සුඛින්ද්රියසම්පයුත්තං අත්ථි දුක්ඛින්ද්රියසම්පයුත්තං, අත්ථි සොමනස්සින්ද්රියසම්පයුත්තං, අත්ථි දොමනස්සින්ද්රියසම්පයුත්තං, අත්ථි උපෙක්ඛින්ද්රියසම්පයුත්තං.
ඡබ්බිධෙන මනායතනං: චක්ඛුවිඤ්ඤාණං සොතවිඤ්ඤාණං ඝානවිඤ්ඤාණං ජිව්හාවිඤ්ඤාණං කායවිඤ්ඤාණං මනොවිඤ්ඤාණං, එවං ඡබ්බිධෙන මනායතනං.
සත්තවිධෙන මනායතනං: චක්ඛුවිඤ්ඤාණං සොතවිඤ්ඤාණං ඝානවිඤ්ඤාණං ජිව්හාවිඤ්ඤාණං කායවිඤ්ඤාණං මනොධාතු මනොවිඤ්ඤාණධාතු. එවං සත්තවිධෙන මනායතනං.
අට්ඨවිධෙන මනායතනං: චක්ඛුවිඤ්ඤාණං -පෙ- කායවිඤ්ඤාණං අත්ථි සුඛසහගතං, අත්ථි දුක්ඛසහගතං මනොධාතු මනොවිඤ්ඤාණධාතු. එවං අට්ඨවිධෙන මනායතනං.
නවවිධෙන මනායතනං: චක්ඛුවිඤ්ඤාණං -පෙ- කායවිඤ්ඤාණං, මනොධාතු මනොවිඤ්ඤාණධාතු අත්ථි කුසලං අත්ථි අකුසලං, අත්ථි අව්යාකතං. එවං නවවිධෙන මනායතනං.
දසවිධෙන මනායතනං: චක්ඛුවිඤ්ඤාණං සොතවිඤ්ඤාණං ඝානවිඤ්ඤාණං ජිව්හාවිඤ්ඤාණං කායවිඤ්ඤාණං අත්ථි සුඛසහගතං, අත්ථි දුක්ඛසහගතං, මනොධාතු, මනොවිඤ්ඤාණධාතු අත්ථි කුසලං, අත්ථි අකුසලං, අත්ථි අව්යාකතං. එවං දසවිධෙන මනායතනං.
232. එකවිධෙන මනායතනං: ඵස්සසම්පයුත්තං.
දුවිධෙන මනායතනං: අත්ථි සහෙතුකං අත්ථි අහෙතුකං.
තිවිධෙන මනායතනං: අත්ථි සුඛාය වෙදනාය සම්පයුත්තං, අත්ථි දුක්ඛාය වෙදනාය සම්පයුත්තං. අත්ථි අදුක්ඛමසුඛාය වෙදනාය සම්පයුත්තං -පෙ- එවං බහුවිධෙන මනායතනං. ඉදං වුච්චති මනායතනං.
233. තත්ථ කතමං රූපායතනං: යං රූපං චතුන්නං මහාභූතානං උපාදාය වණ්ණනිභා සනිදස්සනං සප්පටිඝං නීලං පීතකං{1} ලොහිතකං{2} ඔදාතං කාළකං මඤ්ජෙට්ඨකං හරි හරිවණ්ණං{3} අම්බඞ්කුරවණ්ණං දීඝං රස්සං අණුං ථූලං වට්ටං පරිමණ්ඩලං චතුරස්සං ඡළංසං අට්ඨංසං සොළසංසං නින්නං ථලං ඡායා ආතපො ආලොකො අන්ධකාරො අබ්භා මහිකා ධූමො රජො චන්දමණ්ඩලස්ස වණ්ණනිභා සුරියමණ්ඩලස්ස වණ්ණනිභා තාරක රූපානං වණ්ණනිභා ආදාසමණ්ඩලස්ස වණ්ණනිභා මණිසඞ්ඛමුත්තා{4} වෙළුරියස්ස වණ්ණනිභා ජාතරූපරජතස්ස වණ්ණනිභා යං වා පනඤ්ඤම්පි අත්ථි රූපං චතුන්නං මහාභූතානං උපාදාය වණ්ණනිභා සනිදස්සනං සප්පටිඝං යං රූපං සනිදස්සන සප්පටිඝං චක්ඛුනා අනිදස්සනෙන සප්පටිඝෙන පස්සී වා පස්සති වා පස්සිස්සති වා පස්සෙ වා රූපම්පෙතං රූපායතනම්පෙතං රූපධාතුපෙ’සා. ඉදං වුච්චති රූපායතනං.
234. තත්ථ කතමං සද්දායතනං: යො සද්දො චතුන්නං මහාභූතානං උපාදාය අනිදස්සනො සප්පටිඝො, භෙරිසද්දො, මුතිඞ්ගසද්දො, සඞ්ඛසද්දො පණවසද්දො, ගීතසද්දො, වාදිතසද්දො, සම්මසද්දො, පාණිසද්දො, සත්තානං නිග්ඝොසසද්දො, ධාතූනං සන්නිඝාතසද්දො, වාතසද්දො, උදකසද්දො, මනුස්සසද්දො, අමනුස්සසද්දො, යො වා පනඤ්ඤොපි අත්ථි සද්දො චතුන්නං මහාභූතානං උපාදාය අනිදස්සනො සප්පටිඝො, යං සද්දං අනිදස්සනං සප්පටිඝා සොතෙන අනිදස්සනෙන සප්පටිඝෙන සුණී වා සුණාති වා සුණිස්සති වා සුණෙ වා සද්දො’පෙසො සද්දායතනම්පෙතං සද්දධාතුපෙසා. ඉදං වුච්චති සද්දායතනං.
235. තත්ථ කතමං ගන්ධායතනං: යො ගන්ධො චතුන්නං මහාභූතානං උපාදාය අනිදස්සනො සප්පටිඝො, මූලගන්ධො, සාරගන්ධො, තචගන්ධො පත්තගන්ධො, පුප්ඵගන්ධො ඵලගන්ධො ආමගන්ධො විස්සගන්ධො සුගන්ධො දුග්ගන්ධො යො වා පනඤ්ඤොපි අත්ථි ගන්ධො චතුන්නං මහාභූතානං උපාදාය අනිදස්සනො සප්පටිඝො, යං ගන්ධං අනිදස්සනං සප්පටිඝං ඝානෙන අනිදස්සනෙන සප්පටිඝෙන ඝායී වා ඝායති වා ඝායිස්සති වා ඝායෙ වා ගන්ධොපෙසො ගන්ධායතනම්පෙතං ගන්ධධාතුපෙසා, ඉදං වුච්චති ගන්ධායතනං.
236. තත්ථ කතමං රසායතනං: යො රසො චතුන්නං මහාභූතානං උපාදාය අනිදස්සනො සප්පටිඝො මූලරසො ඛන්ධරසො තචරසො පත්තරසො පුප්ඵරසො ඵලරසො අම්බිලං මධුරං තිත්තකං කටුකං ලොණිකං ඛාරිකං ලපිලකං{1} කසාවො සාදු අසාදු, යො වා පනඤ්ඤොපි අත්ථි රසො චතුන්නං මහාභූතානං උපාදාය අනිදස්සනො සප්පටිඝො යං රසං අනිදස්සනං සප්පටිඝං ජිව්හාය අනිදස්සනාය සප්පටිඝාය සායී වා සායති වා සාසිස්සති වා සායෙ වා රසොපෙසො රසායතනම්පෙතං රසධාතුපෙසා, ඉදං වුච්චති රසායතනං.
237. තත්ථ කතමං ඵොට්ඨබ්බාතනං: පඨවීධාතු තෙජොධාතු වායොධාතු කක්ඛලං මුදුකං සණ්හං ඵරුසං සුඛසම්ඵස්සං දුක්ඛසම්ඵස්සං ගරුකං ලහුකං යං ඵොට්ඨබ්බං අනිදස්සනං සප්පටිඝං කායෙන අනිදස්සනෙන සප්පටිඝෙන ඵුසී වා ඵුසති වා ඵුසිස්සති වා ඵුසෙ වා ඵොට්ඨබ්බො’පෙසො ඵොට්ඨබ්බායතනම්පෙතං ඵොට්ඨබ්බධාතුපෙසා, ඉදං වුච්චති ඵොට්ඨබ්බායතනං.
238. තත්ථ කතමං ධම්මායතනං: වෙදනාක්ඛන්ධො සඤ්ඤාක්ඛන්ධො සඞ්ඛාරක්ඛන්ධො, යං ච රූපං අනිදස්සනං අප්පටිඝං ධම්මායතනපරියාපන්නං අසඞ්ඛතා ච ධාතු.
තත්ථ කතමො වෙදනාක්ඛන්ධො: එකවිධෙන වෙදනාක්ඛන්ධො: ඵස්සසම්පයුත්තො.
දුවිධෙන වෙදනාක්ඛන්ධො: අත්ථි සහෙතුකො අත්ථි අහෙතුකො.
තිවිධෙන වෙදනාක්ඛන්ධො: අත්ථි කුසලො අත්ථි අකුසලො අත්ථි අව්යාකතො -පෙ- එවං දසවිධෙන වෙදනාක්ඛන්ධො -පෙ- එවං බහුවිධෙන වෙදනාක්ඛන්ධො. අයං වුච්චති වෙදනාක්ඛන්ධො.
තත්ථ කතමො සඤ්ඤාක්ඛන්ධො: එකවිධෙන සඤ්ඤාක්ඛන්ධො: ඵස්සසම්පයුත්තො.
දුවිධෙන සඤ්ඤාක්ඛන්ධො: අත්ථි සහෙතුකො අත්ථි අහෙතුකො.
තිවිධෙන සඤ්ඤාක්ඛන්ධො: අත්ථි කුසලො අත්ථි අකුසලො අත්ථි අව්යාකතො -පෙ- එවං දසවිධෙන සඤ්ඤාක්ඛන්ධො -පෙ- එවං බහුවිධෙන සඤ්ඤාක්ඛන්ධො. අයං වුච්චති සඤ්ඤාක්ඛන්ධො.
තත්ථ කතමො සඞ්ඛාරක්ඛන්ධො: එකවිධෙන සඞ්ඛාරක්ඛන්ධො: චිත්තසම්පයුත්තො.
දුවිධෙන සඞ්ඛාරක්ඛන්ධො: අත්ථි හෙතු අත්ථි න හෙතු.
තිවිධෙන සඞ්ඛාරක්ඛන්ධො: අත්ථි කුසලො අත්ථි අකුසලො අත්ථි අව්යාකතො -පෙ- එවං දසවිධෙන සඞ්ඛාරක්ඛන්ධො -පෙ- එවං බහුවිධෙන සඞ්ඛාරක්ඛන්ධො. අයං වුච්චති සඞ්ඛාරක්ඛන්ධො.
තත්ථ කතමං රූපං අනිදස්සන අප්පටිඝං ධම්මායතන පරියාපන්නං: ඉත්ථින්ද්රියං පුරිසින්ද්රියං -පෙ- කබළිංකාරො ආහාරො. ඉදං වුච්චති රූපං අනිදස්සනං අප්පටිඝං ධම්මායතනපරියාපන්නං.
තත්ථ කතමා අසඞ්ඛතා ධාතු: රාගක්ඛයො දොසක්ඛයො මොහක්ඛයො අයං වුච්චති අසඞ්ඛතා ධාතු, ඉදං වුච්චති ධම්මායතනං.
අභිධම්මභාජනියං.
239 ද්වාදසායතනානි: චක්ඛායතනං, රූපායතනං, සොතායතනං, සද්දායතනං, ඝානායතනං. ගන්ධායතනං, ජිව්හායතනං, රසායතනං, කායායතනං, ඵොට්ඨබ්බායතනං, මනායතනං, ධම්මායතනං.
240. ද්වාදසන්නං ආයතනානං කති කුසලා, කති අකුසලා, කති අව්යාකතා -පෙ- කති සරණා, කති අරණා.
241. දසායතනා අව්යාකතා, ද්වායතනා සියා කුසලා, සියා අකුසලා, සියා අව්යාකතා.
දසායතනා න වත්තබ්බා සුඛාය වෙදනාය සම්පයුත්තාති’පි, දුක්ඛාය වෙදනාය සම්පයුත්තා’පි අදුක්ඛමසුඛාය වෙදනාය සම්පයුත්තාති’පි. මනායතනං සියා සුඛාය වෙදනාය සම්පයුත්තං, සියා දුක්ඛාය වෙදනාය සම්පයුත්තං, සියා අදුක්ඛමසුඛාය වෙදනාය සම්පයුත්තං, ධම්මායතනං සියා සුඛාය වෙදනාය සම්පයුත්තං, සියා දුක්ඛාය වෙදනාය සම්පයුත්තං, සියා අදුක්ඛමසුඛාය වෙදනාය සම්පයුත්තං, සියා න වත්තබ්බං සුඛාය වෙදනාය සම්පයුත්තන්ති’පි දුක්ඛාය වෙදනාය සම්පයුත්තන්ති’පි අදුක්ඛමසුඛාය වෙදනාය සම්පයුත්තන්ති’පි.
දසායතනා නෙවවිපාකනවිපාකධම්මධම්මා, ද්වායතනා සියා විපාකා, සියා විපාකධම්මධම්මා. සියා නෙවවිපාකනවිපාකධම්මධම්මා.
පඤ්චායතනා උපාදින්නුපාදානියා, සද්දායතනං අනුපාදින්නුපාදානියං චත්තාරො ආයතනා සියා අනුපාදින්නුපාදානියා, ද්වායතනා සියා උපාදින්නුපාදානියා, සියා අනුපාදින්නුපාදානියා, සියා අනුපාදින්නඅනුපාදානියා.
දසායතනා අසංකිලිට්ඨසංකිලෙසිකා, ද්වායතනා සියා සංකිලිට්ඨසංකිලෙසිකා, සියා අසංකිලිට්ඨසංකිලෙසිකා, සියා අසංකිලිට්ඨඅසංකිලෙසිකා.
දසායතනා අවිතක්කඅවිචාරා, මනායතනං සියා සවිතක්කසවිචාරං සියා අවිතක්කවිචාරමත්තං, සියා අවිතක්කඅවිචාරං. ධම්මායතනං සියා සවිතක්කසවිචාරං, සියා අවිතක්කවිචාරමත්තං, සියා අවිතක්කඅවිචාරං සියා න වත්තබ්බං සවිතක්කසවිචාරන්ති’පි අවිතක්කවිචාරමත්තන්ති’පි. අවිතක්කඅවිචාරන්ති’පි.
දසායතනා න වත්තබ්බා පීතිසහගතාති’පි සුඛසහගතාති’පි උපෙක්ඛාසහගතාති’පි, ද්වායතනා සියා පීතිසහගතා, සියා සුඛසහගතා, සියා උපෙක්ඛාසහගතා, සියා න වත්තබ්බා පීතිසහගතාති’පි සුඛසහගතාති’පි උපෙක්ඛාසහගතාති’පි.
දසායතනා නෙවදස්සනෙන න භාවනාය පහාතබ්බා, ද්වායතනා සියා දස්සනෙන පහාතබ්බා, සියා භාවනාය පහාතබ්බා, සියා නෙවදස්සනෙන න භාවනාය පහාතබ්බා.
දසායතනා නෙවදස්සනෙන න භාවනාය පහාතබ්බහෙතුකා, ද්වායතනා සියා දස්සනෙන පහාතබ්බහෙතුකා, සියා භාවනාය පහාතබ්බහෙතුකා, සියා නෙවදස්සනෙන න භාවනාය පහාතබ්බහෙතුකා.
දසායතනා නෙවාචයගාමිනාපචයගාමිනො, ද්වායතනා සියා ආචයගාමිනො, සියා අපචයගාමිනො, සියා නෙවආචයගාමිනාපචයගාමිනො.
දසායතනා නෙව සෙක්ඛා නාසෙක්ඛා, ද්වායතනා සියා සෙක්ඛා, සියා අසෙක්ඛා, සියා නෙව සෙක්ඛා නාසෙක්ඛා.
දසායතනා පරිත්තා, ද්වායතනා සියා පරිත්තා, සියා මහග්ගතා, සියා අප්පමාණා.
දසායතනා අනාරම්මණා, ද්වායතනා සියා පරිත්තාරම්මණා, සියා මහග්ගතාරම්මණා, සියා අප්පමාණාරම්මණා, සියා න වත්තබ්බා පරිත්තාරම්මණාතිපි මහග්ගතාරම්මණාතිපි අප්පමාණාරම්මණාතිපි.
දසායතනා මජ්ඣිමා, ද්වායතනා සියා හීනා, සියා මජ්ඣිමා, සියා පණීතා.
දසායතනා අනියතා, ද්වායතනා සියා මිච්ඡත්තනියතා, සියා සම්මත්තනියතා, සියා අනියතා.
දසායතනා අනාරම්මණා, ද්වායතනා සියා මග්ගාරම්මණා, සියා මග්ගහෙතුකා, සියා මග්ගාධිපතිනො, සියා න වත්තබ්බා මග්ගාරම්මණාති’පි මග්ගහෙතුකාති’පි මග්ගාධිපතිනොති’පි.
පඤ්චායතනා සියා උප්පන්නා, සියා උප්පාදිනො, න වත්තබ්බා අනුප්පන්නාති, සද්දායතනං සියා උප්පන්නං, සියා අනුප්පන්නං, න වත්තබ්බං උප්පාදීති, පඤ්චායතනා සියා උප්පන්නා, සියා අනුප්පන්නා සියා උප්පාදිනො, ධම්මායතනං සියා උප්පන්නං, සියා අනුප්පන්නං, සියා උප්පාදි, සියා න වත්තබ්බං උප්පන්නන්ති’පි අනුප්පන්නන්ති’පි උප්පාදීති’පි.
එකාදසායතනා සියා අතීතා, සියා අනාගතා, සියා පච්චුප්පන්නා, සියා න වත්තබ්බං අතීතන්ති’පි අනාගතන්ති’පි පච්චුප්පන්නන්ති’පි.
දසායතනා අනාරම්මණා, ද්වායතනා සියා අතීතාරම්මණා සියා අනාගතාරම්මණා, සියා පච්චුප්පන්නාරම්මණා, සියා න වත්තබ්බා අතීතාරම්මණාති’පි අනාගතාරම්මණාති’පි පච්චුප්පන්නාරම්මණාති’පි.
සියා අජ්ඣත්තා, සියා බහිද්ධා, සියා අජ්ඣත්තබහිද්ධා.
දසායතනා අනාරම්මණා, ද්වායතනා සියා අජ්ඣත්තාරම්මණා, සියා බහිද්ධාරම්මණා, සියා අජ්ඣත්තබහිද්ධාරම්මණා, සියා න වත්තබ්බා අජ්ඣත්තාරම්මණාතිපි බහිද්ධාරම්මණාතිපි අජ්ඣත්තබහිද්ධාරම්මණාතිපි.
රූපායතනං සනිදස්සනසප්පටිඝං, නවායතනා අනිදස්සනසප්පටිඝා, ද්වායතනා අනිදස්සනඅප්පටිඝා.
242. එකාදසායතනා න හෙතු. ධම්මායතනං සියා හෙතු, සියා න හෙතු.
දසායතනා අහෙතුකා. ද්වායතනා සියා සහෙතුකා, සියා අහෙතුකා.
දසායතනා හෙතුවිප්පයුත්තා. ද්වායතනා සියා හෙතුසම්පයුත්තා, සියා හෙතුවිප්පයුත්තා.
දසායතනා න වත්තබ්බා හෙතු චෙව සහෙතුකාති’පි, සහෙතුකා චෙව න ච හෙතූතිපි. මනායතනං න වත්තබ්බං හෙතු චෙව සහෙතුකන්ති, සියා සහෙතුකං චෙව න ච හෙතු, සියා න වත්තබ්බං සහෙතුකඤ්චෙව න ච හෙතූති. ධම්මායතනං සියා හෙතූ චෙව සහෙතුකඤ්ච, සියා සහෙතුකං චෙව න ච හෙතු, සියා න වත්තබ්බං හෙතූ චෙව සහෙතුකන්ති’පි සහෙතුකඤ්චෙව න ච හෙතූති’පි.
දසායතනා න වත්තබ්බා හෙතු චෙව හෙතුසම්පයුත්තාති’පි හෙතුසම්පයුත්තා චෙව න ච හෙතූති’පි. මනායතනං න වත්තබ්බං හෙතූ චෙව හෙතුසම්පයුත්තන්ති, සියා හෙතුසම්පයුත්තං චෙව න ච හෙතූ, සියා න වත්තබ්බං හෙතුසම්පයුත්තං චෙව න ච හෙතූති, ධම්මායතනං සියා හෙතූ චෙව හෙතුසම්පයුත්තං ච, සියා හෙතුසම්පයුත්තං චෙව න ච හෙතූ, සියා න වත්තබ්බං හෙතු චෙව හෙතුසම්පයුත්තන්ති’පි හෙතුසම්පයුත්තං චෙව න ච හෙතූති’පි.
දසායතනා න හෙතු අහෙතුකං. මනායතනං සියා න හෙතු සහෙතුකං, සියා න හෙතු අහෙතුකං. ධම්මායතනං සියා න හෙතු සහෙතුකං, සියා න හෙතු අහෙතුකං, සියා න වත්තබ්බං න හෙතු සහෙතුකන්ති’පි න හෙතු අහෙතුකන්ති’පි.
243. එකාදසායතනා සප්පච්චයා. ධම්මායතනං සියා සප්පච්චයං සියා අප්පච්චයං.
එකාදසායතනා සඞ්ඛතා. ධම්මායතනං සියා සඞ්ඛතං සියා අසඞ්ඛතං.
රූපායතනං සනිදස්සනං. එකාදසායතනා අනිදස්සනා.
දසායතනා සප්පටිඝා. ද්වායතනා අප්පටිඝා.
දසායතනා රූපා. මනායතනං අරූපං, ධම්මායතනං සියා රූපං, සියා අරූපං.
දසායතනා ලොකියා. ද්වායතනා සියා ලොකියා, සියා ලොකුත්තරා
කෙනචි විඤ්ඤෙය්යා, කෙනචි න විඤ්ඤෙය්යා.
244. එකාදසායතනා නො ආසවා, ධම්මායතනං සියා ආසවො සියා නො ආසවො.
දසායතනා සාසවා, ද්වායතනා සියා සාසවා සියා අනාසවා.
දසායතනා ආසවවිප්පයුත්තා, ද්වායතනා සියා ආසවසම්පයුත්තා, සියා ආසවවිප්පයුත්තා.
දසායතනා න වත්තබ්බා ආසවා චෙව සාසවාති, සාසවා චෙව නො ච ආසවා; මනායතනං න වත්තබ්බං ආසවො චෙව සාසවන්ති, සියා සාසවං චෙව නො ච ආසවො, සියා න වත්තබ්බං සාසවං චෙව නො ච ආසවොති; ධම්මායතනං සියා ආසවො චෙව සාසවං ච, සියා සාසවං චෙව නො ච ආසවො, සියා න වත්තබ්බං ආසවො චෙව සාසවන්තිපි, සාසවං චෙව නො ච ආසවොති’පි.
දසායතනා න වත්තබ්බා ආසවා චෙව ආසවසම්පයුත්තාතිපි, ආසවසම්පයුත්තා චෙව නො ච ආසවාතිපි; මනායතනං න වත්තබ්බං ආසවො චෙව ආසවසම්පයුත්තන්ති. සියා ආසවසම්පයුත්තං චෙව නො ච ආසවො, සියා න වත්තබ්බං ආසවසම්පයුත්තං චෙව නො ච ආසවොති; ධම්මායතනං සියා ආසවො චෙව ආසවසම්පයුත්තං ච, සියා ආසවසම්පයුත්තං චෙව නො ච ආසවො, සියා න වත්තබ්බං ආසවො චෙව ආසවසම්පයුත්තන්තිපි, ආසවසම්පයුත්තං චෙව නො ච ආසවොතිපි.
දසායතනා ආසවවිප්පයුත්තසාසවා, ද්වායතනා සියා ආසවවිප්පයුත්තසාසවා, සියා ආසවවිප්පයුත්තඅනාසවා, සියා න වත්තබ්බා ආසවවිප්පයුත්තසාසවාතිපි ආසවවිප්පයුත්තඅනාසවාතිපි.
245. එකාදසායතනා නො සඤ්ඤොජනා, ධම්මායතනං සියා සඤ්ඤොජනං, සියා නො සඤ්ඤොජනං.
දසායතනා සඤ්ඤොජනියා, ද්වායතනා සියා සංයොජනියා සියා අසංයොජනියං.
දසායතනා සඤ්ඤොජනවිප්පයුත්තා, ද්වායතනා සියා සඤ්ඤොජනසම්පයුත්තා, සියා සඤ්ඤොජනවිප්පයුත්තා.
දසායතනා න වත්තබ්බා සඤ්ඤෙජනා චෙව සඤ්ඤොජනියාති, සඤ්ඤෙජනියා චෙව නො ච සඤ්ඤොජනා; මනායතනං න වත්තබ්බං සඤ්ඤොජනං චෙව සඤ්ඤොජනියන්ති, සියා සඤ්ඤොජනියං චෙව නො ච සඤ්ඤොජනං, සියා න වත්තබ්බං සඤ්ඤොජනියං චෙව නො ච සඤ්ඤොජනන්ති. ධම්මායතනං සියා සඤ්ඤොජනං චෙව සඤ්ඤොජනියංච. සියා සඤ්ඤොජනියං චෙව නො ච සඤ්ඤොජනං. සියා න වත්තබ්බං සඤ්ඤොජනං චෙව සඤ්ඤොජනියන්තිපි, සඤ්ඤොජනියං චෙව නො ච සඤ්ඤොජනන්තිපි.
දසායතනා න වත්තබ්බා සඤ්ඤොජනා චෙව සඤ්ඤොජනසම්පයුත්තාතිපි, සඤ්ඤොජනසම්පයුත්තා චෙව නො ච සඤ්ඤොජනාතිපි. මනායතනං න වත්තබ්බං සඤ්ඤොජනං චෙව සඤ්ඤොජනසම්පයුත්තන්ති, සියා සඤ්ඤොජනසම්පයුත්තං චෙව නො ච සඤ්ඤොජනං, සියා න වත්තබ්බං සඤ්ඤොජනසම්පයුත්තං චෙව නො ච සඤ්ඤොජනන්ති. ධම්මායතනං සියා සඤ්ඤොජනඤ්චෙව සඤ්ඤොජනසම්පයුත්තං ච, සියා සඤ්ඤොජන සම්පයුත්තං චෙව නො ච සඤ්ඤොජනං, සියා න වත්තබ්බං සඤ්ඤොජනං චෙව සඤ්ඤොජනසම්පයුත්තන්තිපි, සඤ්ඤොජනසම්පයුත්තං චෙව නො ච සඤ්ඤොජනන්තිපි.
දසායතනා සඤ්ඤොජනවිප්පයුත්තසඤ්ඤොජනියා, ද්වායතනා සියා සඤ්ඤොජනවිප්පයුත්තසඤ්ඤොජනියා. සියා සඤ්ඤොජනවිප්පත්තඅසඤ්ඤොජනියා, සියා න වත්තබ්බා සඤ්ඤොජනවිප්පයුත්තසඤ්ඤොජනියාතිපි, සඤ්ඤොජනවිප්පයුත්තඅසඤ්ඤොජනියාතිපි.
246. එකාදසායතනා නො ගන්ථා, ධම්මායතනං සියා ගන්ථො, සියා නොගන්ථො.
දසායතනා ගන්ථනියා, ද්වායතනා සියා ගන්ථනියා, සියා අගන්ථනියා.
දසායතනා ගන්ථවිප්පයුත්තා, ද්වායතනා සියා ගන්ථසම්පයුත්තා සියා ගන්ථවිප්පයුත්තා.
දසායතනා න වත්තබ්බා ගන්ථා චෙව ගන්ථනියාති. ගන්ථනියා චෙව නො ච ගන්ථා, මනායතනං න වත්තබ්බං ගන්ථො චෙව ගන්ථනියන්ති. සියා ගන්ථනියං චෙව නො ච ගන්ථො, සියා න වත්තබ්බං ගන්ථනියං චෙව නො ච ගන්ථොති; ධම්මායතනං සියා ගන්ථො චෙව ගන්ථනියඤ්ච, සියා ගන්ථනියං චෙව නො ච ගන්ථො, සියා න වත්තබ්බං ගන්ථො චෙව ගන්ථනියන්තිපි ගන්ථනියං චෙව නො ච ගන්ථොතිපි.
දසායතනා න වත්තබ්බා ගන්ථා චෙව ගන්ථසම්පයුත්තාතිපි. ගන්ථසම්පයුත්තා චෙව නො ච ගන්ථාතිපි. මනායතනං න වත්තබ්බං ගන්ථො චෙව ගන්ථසම්පයුත්තන්ති, සියා ගන්ථසම්පයුත්තං චෙව නො ච ගන්ථො. සියා න වත්තබ්බං ගන්ථසම්පයුත්තං චෙව නො ච ගන්ථොති. ධම්මායතනං සියා ගන්ථො චෙව ගන්ථසම්පයුත්තං ච, සියා ගන්ථසම්පයුත්තං චෙව නො ච ගන්ථො, සියා න වත්තබ්බං ගන්ථො චෙව ගන්ථසම්පයුත්තන්තිපි. ගන්ථසම්පයුත්තං චෙව නො ච ගන්ථොතිපි, දසායතනා ගන්ථවිප්පයුත්තගන්ථනියා, ද්වායතනා සියා ගන්ථවිප්පයුත්තගන්ථනියා. සියා ගන්ථවිප්පයුත්තඅගන්ථනියා, සියා න වත්තබ්බා ගන්ථවිප්පයුත්තගන්ථනියාතිපි ගන්ථවිප්පයුත්තඅගන්ථනියාතිපි.
247. එකාදසායතනා නො ඔඝා -පෙ- නො යොගා -පෙ-
249. නො නීවරණා, ධම්මායතනං සියා නීවරණං, සියා නො නීවරණං.
දසායතනා නීවරණියා, ද්වායතනා සියා නීවරණියා, සියා අනීවරණියා.
දසායතනා නීවරණවිප්පයුත්තා; ද්වායතනා සියා නීවරණසම්පයුත්තා, සියා නීවරණවිප්පයුත්තා.
දසායතනා න වත්තබ්බා නීවරණා චෙව නීවරණියාති, නීවරණියා චෙව නො ච නීවරණා, මනායතනං න වත්තබ්බං නීවරණං චෙ’ව නීවරණියන්ති; සියා නීවරණියඤ්චෙව නො ච නීවරණං; සියා න වත්තබ්බං නීවරණියඤ්චෙව නො ච නීවරණන්ති ධම්මායතනං සියා නීවරණඤ්චෙව නීවරණියඤ්ච, සියා නීවරණියඤ්චෙව නො ච නීවරණං; සියා න වත්තබ්බං නීවරණඤ්චෙව නීවරණියන්තිපි, නීවරණියඤ්චෙව නො ච නීවරණන්ති’පි.
දසායතනා න වත්තබ්බා නීවරණා චෙව නීවරණසම්පයුත්තාති’පි, නීවරණසම්පයුත්තා චෙව නො ච නීවරණාති’පි; මනායතනං න වත්තබ්බං නීවරණඤ්චෙව නීවරණසම්පයුත්තන්ති; සියා නීවරණසම්පයුත්තඤ්චෙව නො ච නීවරණං, සියා න වත්තබ්බං නීවරණසම්පයුත්තඤ්චෙව නො ච නීවරණන්ති, ධම්මායතනං සියා නීවරණඤ්චෙව නීවරණසම්පයුත්තඤ්ච, සියා නීවරණසම්පයුත්තඤ්චෙව නො ච නීවරණං, සියා න වත්තබ්බං නීවරණඤ්චෙව නීවරණසම්පයුත්තන්තිපි, නීවරණසම්පයුත්තඤ්චෙව නො ච නීවරණන්ති’පි.