රූපක්ඛන්ධො මජ්ඣිමො, චත්තාරො ඛන්ධා, සියා හීනා, සියා මජ්ඣිමා, සියා පණීතා.
රූපක්ඛන්ධො අනියතො, චත්තාරො ඛන්ධා සියා මිච්ඡත්තනියතා, සියා සම්මත්තනියතා, සියා අනියතා.
රූපක්ඛන්ධො අනාරම්මණො, චත්තාරො ඛන්ධා සියා මග්ගාරම්මණා, සියා මග්ගහෙතුකා සියා මග්ගාධිපතිනො, සියා න වත්තබ්බා මග්ගාරම්මණාතිපි මග්ගහෙතුකාතිපි මග්ගාධිපතිනොතිපි.
සියා උප්පන්නා, සියා අනුප්පන්නා, සියා උප්පාදිනො.
සියා අතීතා, සියා අනාගතා, සියා පච්චුප්පන්නා.
රූපක්ඛන්ධො අනාරම්මණො චත්තාරො ඛන්ධා, සියා අතීතාරම්මණා, සියා අනාගතාරම්මණා, සියා පච්චුප්පන්නාරම්මණා, සියා න වත්තබ්බා අතීතාරම්මණාති’පි අනාගතාරම්මණාති’පි පච්චුප්පන්නාරම්මණාති’පි.
සියා අජ්ඣත්තා, සියා බහිද්ධා, සියා අජ්ඣත්තබහිද්ධා.
රූපක්ඛන්ධො අනාරම්මණො. චත්තාරො ඛන්ධා සියා අජ්ඣත්තාරම්මණා, සියා බහිද්ධාරම්මණා, සියා අජ්ඣත්තබහිද්ධාරම්මණා, සියා න වත්තබ්බා අජ්ඣත්තාරම්මණාති’පි බහිද්ධාරම්මණාති’පි අජ්ඣත්තබහිද්ධාරම්මණාති’පි.
චත්තාරො ඛන්ධා අනිදස්සනඅප්පටිඝා. රූපක්ඛන්ධො සියා සනිදස්සනසප්පටිඝො, සියා අනිදස්සනසප්පටිඝො, සියා අනිදස්සනඅප්පටිඝො.
210. චත්තාරො ඛන්ධා න හෙතු. සඞ්ඛාරක්ඛන්ධො සියා හෙතු, සියා න හෙතු.
රූපක්ඛන්ධො අහෙතුකො. චත්තාරො ඛන්ධා සියා සහෙතුකා, සියා අහෙතුකා.
රූපක්ඛන්ධො හෙතුවිප්පයුත්තො. චත්තාරො ඛන්ධා සියා හෙතුසම්පයුත්තා, සියා හෙතුවිප්පයුත්තා.
රූපක්ඛන්ධො න වත්තබ්බො හෙතු චෙ ව සහෙතුකොතිපි සහෙතුකො චෙව න ච හෙතූති’පි. තයො ඛන්ධා න වත්තබ්බා හෙතු චෙව සහෙතුකාතිපි, සියා සහෙතුකා චෙව න චහෙතු, සියා න වත්තබ්බා සහෙතුකා චෙව න ච හෙතූති. සඞ්ඛාරක්ඛන්ධො සියා හෙතු චෙව සහෙතුකො ච සියා සහෙතුකො චෙව න ච හෙතු, සියා න වත්තබ්බො හෙතු චෙව සහෙතුකොතිපි සහෙතුකො චෙව න ච හෙතූතිපි.
රූපක්ඛන්ධො න වත්තබ්බො හෙතු චෙව හෙතුසම්පයුත්තොති’පි, හෙතුසම්පයුත්තො චෙව න ච හෙතූති’පි. තයො ඛන්ධා න වත්තබ්බා හෙතු චෙව හෙතුසම්පයුත්තාති, සියා හෙතුසම්පයුත්තා චෙව න ච හෙතු, සියා න වත්තබ්බා හෙතුසම්පයුත්තා චෙව න ච හෙතූ ති. සඞ්ඛාරක්ඛන්ධො සියා හෙතු චෙව හෙතුසම්පයුත්තො ච, සියා හෙතුසම්පයුත්තො චෙව න ච හෙතු, සියා න වත්තබ්බො හෙතු චෙව හෙතුසම්පයුත්තොති’පි, හෙතුසම්පයුත්තො චෙව න ච හෙතූති’පි.
රූපක්ඛන්ධො න හෙතු අහෙතුකො. තයො ඛන්ධා සියා න හෙතුසහෙතුකා, සියා න හෙතු අහෙතුකා. සඞ්ඛාරක්ඛන්ධො සියා න හෙතු සහෙතුකො, සියා න හෙතු අහෙතුකො, සියා න වත්තබ්බො න හෙතු සහෙතුකොති’පි න හෙතු අහෙතුකොති’පි.
211. සප්පච්චයා, සඞ්ඛතා.
චත්තාරො ඛන්ධා අනිදස්සනා. රූපක්ඛන්ධො සියා සනිදස්සනො, සියා අනිදස්සනො.
චත්තාරො ඛන්ධා අප්පටිඝා. රූපක්ඛන්ධො සියා සප්පටිඝො, සියා අප්පටිඝො.
රූපක්ඛන්ධො රූපං. චත්තාරො ඛන්ධා අරූපා.
රූපක්ඛන්ධො ලොකියො. චත්තාරො ඛන්ධා සියා ලොකියා, සියා ලොකුත්තරා.
කෙනචි විඤ්ඤෙය්යා, කෙනචි න විඤ්ඤෙය්යා.
212. චත්තාරො ඛන්ධා නො ආසවා. සඞ්ඛාරක්ඛන්ධො සියා ආසවො, සියා නො ආසවො.
රූපක්ඛන්ධො සාසවො. චත්තාරො ඛන්ධා සියා ආසවා, සියා අනාසවා.
රූපක්ඛන්ධො ආසවවිප්පයුත්තො. චත්තාරො ඛන්ධා සියා ආසවසම්පයුත්තා, සියා ආසවවිප්පයුත්තා.
රූපක්ඛන්ධො න වත්තබ්බො ආසවො චෙව සාසවො චාති,{1} සාසවො චෙව නො ච ආසවො. තයො ඛන්ධා න වත්තබ්බා ආසවා චෙව සාසවා චාති,{2} සියා සාසවා චෙව නො ච ආසවා, සියා න වත්තබ්බා සාසවා චෙව නො ච ආසවාති. සඞ්ඛාරක්ඛන්ධො සියා ආසවො චෙව සාසවො ච, සියා සාසවො චෙව නො ච ආසවො, සියා න වත්තබ්බො ආසවො චෙව සාසවොති’පි සාසවො චෙව නො ච ආසවොතිපි.
රූපක්ඛන්ධො න වත්තබ්බො ආසවො චෙව ආසවසම්පයුත්තොතිපි, ආසවසම්පයුත්තො චෙව නො ච ආසවොති’පි. තයො ඛන්ධා න වත්තබ්බා ආසවා චෙව ආසවසම්පයුත්තාති, සියා ආසවසම්පයුත්තා චෙව නො ච ආසවා, සියා න වත්තබා ආසවසම්පයුත්තා චෙව නො ච ආසවාති. සඞ්ඛාරක්ඛන්ධො සියා ආසවො චෙව ආසවසම්පයුත්තො ච, සියා ආසවසම්පයුත්තො චෙව නො ච ආසවො, සියා න වත්තබ්බො ආසවො චෙව ආසවසම්පයුත්තොතිපි, ආසවසම්පයුත්තො චෙව නො ච ආසවොතිපි.
රූපක්ඛන්ධො ආසවවිප්පයුත්තසාසවො. චත්තාරො ඛන්ධා සියා ආසවවිප්පයුත්තසාසවා, සියා ආසවවිප්පයුත්තඅනාසවා සියා න වත්තබ්බා ආසව විප්පයුත්ත සාසවා තිපි ආසව විප්පයුත්ත අනාසවා තිපි.
213. චත්තාරො ඛන්ධා නො සඤ්ඤොජනා. සඞ්ඛාරක්ඛන්ධො සියා සඤ්ඤොජනං, සියා නො සඤ්ඤොජනං.
රූපක්ඛන්ධො සඤ්ඤොජනියො. චත්තාරො ඛන්ධා සියා සඤ්ඤොජනියා සියා අසඤ්ඤොජනියා.
රූපක්ඛන්ධො සඤ්ඤොජනවිප්පයුත්තො. චත්තාරො ඛන්ධා සියා සඤ්ඤොජනසම්පයුත්තා, සියා සඤ්ඤොජනවිප්පයුත්තා.
රූපක්ඛන්ධො න වත්තබ්බො සඤ්ඤොජනං චෙව සඤ්ඤොජනියොති සඤ්ඤොජනියො චෙව නො ච සඤ්ඤොජනං. තයො ඛන්ධා න වත්තබ්බා සඤ්ඤොජනා චෙව සඤ්ඤොජනියාති; සියා සඤ්ඤොජනියා චෙව නො ච සඤ්ඤොජනා, සියා න වත්තබ්බා සඤ්ඤොජනියා චෙව නො ච සඤ්ඤොජනා ති. සඞ්ඛාරක්ඛන්ධො සියා සඤ්ඤොජනඤ්චෙව සඤ්ඤොජනියො ච, සියා සඤ්ඤොජනියො චෙව නො ච සඤ්ඤොජනං, සියා න වත්තබ්බො සඤ්ඤොජනඤ්චෙව සඤ්ඤොජනියොතිපි, සඤ්ඤෙජනියො චෙව නො ච සඤ්ඤොජනන්ති’පි.
රූපක්ඛන්ධො න වත්තබ්බො සඤ්ඤොජනඤ්චෙව සඤ්ඤොජනසම්පයුත්තො චා’තිපි, සඤ්ඤොජනසම්පයුත්තො චෙව නො ච සඤ්ඤොජන්නති’පි. තයො ඛන්ධා න වත්තබ්බා සඤ්ඤොජනා චෙව සඤ්ඤොජනසම්පයුත්තා චාති, සියා සඤ්ඤොජනසම්පයුත්තා චෙව නො ච සඤ්ඤොජනා, සියා න වත්තබ්බා සඤ්ඤොජනසම්පයුත්තා චෙව නො ච සඤ්ඤොජනාති, සඞ්ඛාරක්ඛන්ධො සියා සඤ්ඤොජනඤ්චෙව සඤ්ඤොජන සම්පයුත්තො ච, සියා සඤ්ඤොජනසම්පයුත්තො චෙව නො ච සංයොජනං; සියා න වත්තබ්බො සඤ්ඤොජනං චෙව සඤ්ඤොජනසම්පයුත්තොතිපි, සඤ්ඤොජනසම්පයුත්තො චෙව නො ච සඤ්ඤොජනන්තිපි.
රූපක්ඛන්ධො සඤ්ඤොජනවිප්පයුත්තසඤ්ඤොජනියා. චත්තාරො ඛන්ධා සියා සඤ්ඤොජනවිප්පයුත්තසඤ්ඤොජනියා, සියා සඤ්ඤොජනවිප්පයුත්තඅසඤ්ඤොජනියා, සියා න වත්තබ්බා සඤ්ඤොජනවිප්පයුත්තසංයොජනියා තිපි, සඤ්ඤොජනවිප්පයුත්තඅසංයොජනියා තිපි.
214. චත්තාරො ඛන්ධා නො ගන්ථා. සඞ්ඛාරක්ඛන්ධො සියා ගන්ථො, සියා නො ගන්ථො.
රූපක්ඛන්ධො ගන්ථනියො. චත්තාරො ඛන්ධා සියා ගන්ථනියා, සියා අගන්ථනියා.
රූපක්ඛන්ධො ගන්ථවිප්පයුත්තො. චත්තාරො ඛන්ධා සියා ගන්ථසම්පයුත්තා, සියා ගන්ථවිප්පයුත්තා.
රූපක්ඛන්ධො න වත්තබ්බො ගන්ථො චෙව ගන්ථනියො චාති;{1} ගන්ථනියො චෙව නො ච ගන්ථො. තයො ඛන්ධා න වත්තබ්බා ගන්ථා චෙව ගන්ථනියා චාති ;{2} සියා ගන්ථනියා චෙව නො ච ගන්ථා, සියා න වත්තබ්බා ගන්ථනියා චෙව නො ච ගන්ථාති. සඞ්ඛාරක්ඛන්ධො සියා ගන්ථො චෙව ගන්ථනියො ච, සියා ගන්ථනියො චෙව නො ච ගන්ථො; සියා න වත්තබ්බො ගන්ථො චෙව ගන්ථනියො චාතිපි.{1} ගන්ථනියො චෙව නො ච ගන්ථොතිපි.
රූපක්ඛන්ධො න වත්තබ්බො ගන්ථා චෙව ගන්ථ සම්පයුත්තො චාතිපි, ගන්ථසම්පයුත්තො චෙව නො ච ගන්ථොතිපි. තයො ඛන්ධා න වත්තබ්බා ගන්ථා චෙව ගන්ථසම්පයුත්තා චාති,{3} සියා ගන්ථසම්පයුත්තා චෙව නො ච ගන්ථා; සියා න වත්තබ්බා ගන්ථසම්පයුත්තා චෙව නො ච ගන්ථාති. සඞ්ඛාරක්ඛන්ධො සියා ගන්ථො චෙව ගන්ථසම්පයුත්තො ච, සියා ගන්ථසම්පයුත්තො චෙව නො ච ගන්ථො; සියා න වත්තබ්බො ගන්ථො චෙව ගන්ථසම්පයුත්තො චාති, ගන්ථසම්පයුත්තො චෙව නො ච ගන්ථොතිපි.
රූපක්ඛන්ධො ගන්ථවිප්පයුත්තගන්ථනීයො. චත්තාරො ඛන්ධා සියා ගන්ථවිප්පයුත්තගන්ථනීයා; සියා ගන්ථවිප්පයුත්තඅගන්ථනීයා; සියා න වත්තබ්බා ගන්ථවිප්පයුත්තගන්ථනීයාතිපි, ගන්ථවිප්පයුත්ත අගන්ථනීයාතිපි;
215-216. චත්තාරො ඛන්ධා නො ඔඝා -පෙ- නො යොගා -පෙ-
217. චත්තාරො ඛන්ධා නො නීවරණා. සඞ්ඛාරක්ඛන්ධො සියා නීවරණං, සියා නො නීවරණං.
රූපක්ඛන්ධො නීවරණියො. චත්තාරො ඛන්ධා සියා නීවරණියා, සියා අනීවරණියා.
රූපක්ඛන්ධො නීවරණවිප්පයුත්තො. චත්තාරො ඛන්ධා සියා නීවරණසම්පයුත්තා, සියා නීවරණවිප්පයුත්තා.
රූපක්ඛන්ධො න වත්තබ්බො නීවරණං චෙව නීවරණියො චාති{1}. නීවරණියො චෙව නො ච නීවරණං. තයො ඛන්ධා න වත්තබ්බා නීවරණා චෙව නීවරණියා චාති, සියා නීවරණියා චෙව නො ච නීවරණා, සියා න වත්තබ්බා නීවරණියා චෙව නො ච නීවරණා{1}ති. සඞ්ඛාරක්ඛන්ධො සියා නීවරණං චෙව නීවරණියො ච, සියා නීවරණියො චෙව නො ච නීවරණං, සියා න වත්තබ්බො නීවරණං චෙව නීවරණියොති’පි, නීවරණියො චෙව නො ච නීවරණන්තිපි.
රූපක්ඛන්ධො න වත්තබ්බො නීවරණං චෙව නීවරණසම්පයුත්තොචාති’පි, නීවරණසම්පයුත්තො චෙව නො ච නීවරණන්ති’පි. තයො ඛන්ධා න වත්තබ්බා නීවරණා චෙව නීවරණසම්පයුත්තා චාති, සියා නීවරණසම්පයුත්තා චෙව නො ච නීවරණා, සියා න වත්තබ්බා නීවරණසම්පයුත්තා චෙව නො ච නීවරණාති. සඞ්ඛාරක්ඛන්ධො සියා නීවරණං චෙව නීවරණසම්පයුත්තො ච, සියා නීවරණසම්පයුත්තො චෙව නො ච නීවරණං, සියා න වත්තබ්බො නීවරණං චෙව නීවරණසම්පයුත්තොචාති’පි, නීවරණසම්පයුත්තො චෙව නො ච නීවරණන්ති’පි
රූපක්ඛන්ධො නීවරණවිප්පයුත්තනීවරණියො. චත්තාරො ඛන්ධා සියා නීවරණවිප්පයුත්තනීවරණියා, සියා නීවරණවිප්පයුත්තඅනීවරණියා, සියා න වත්තබ්බා නීවරණවිප්පයුත්තනීවරණියාති’පි නීවරණවිප්පයුත්තඅනීවරණියාති’පි.
218. චත්තාරො ඛන්ධා නො පරාමාසා. සඞ්ඛාරක්ඛන්ධො සියා පරාමාසො, සියා නො පරාමාසො.
රූපක්ඛන්ධො පරාමට්ඨො. චත්තාරො ඛන්ධා සියා පරාමට්ඨා, සියා අපරාමට්ඨා.
රූපක්ඛන්ධො පරාමාසවිප්පයුත්තො. තයො ඛන්ධා සියා පරාමාසසම්පයුත්තා, සියා පරාමාසවිප්පයුත්තා. සඞ්ඛාරක්ඛන්ධො සියා පරාමාසසම්පයුත්තො, සියා පරාමාසවිප්පයුත්තො, සියා න වත්තබ්බො පරාමාසසම්පයුත්තොතිපි පරාමාසවිප්පයුත්තොති’පි.
රූපක්ඛන්ධො න වත්තබ්බො පරාමාසො චෙව පරාමට්ඨොති, පරාමට්ඨො චෙව නො ච පරාමාසො. තයො ඛන්ධා න වත්තබ්බා පරාමාසා චෙව පරාමට්ඨොති, සියා පරාමට්ඨා චෙව නො ච පරාමාසා, සියා න වත්තබ්බා පරාමට්ඨා චෙව නො ච පරාමාසාති. සඞ්ඛාරක්ඛන්ධො සියා පරාමාසො චෙව පරාමට්ඨො ච, සියා පරාමට්ඨො චෙව නො ච පරාමාසො, සියා න වත්තබ්බො පරාමාසො චෙව පරාමට්ඨොතිපි, පරාමට්ඨො චෙව නො ච පරාමාසොති’පි.
රූපක්ඛන්ධො පරාමාසවිප්පයුත්තපරාමට්ඨො. චත්තාරො ඛන්ධා සියා පරාමාසවිප්පයුත්තපරාමට්ඨා, සියා පරාමාසවිප්පයුත්තඅපරාමට්ඨා, සියා න වත්තබ්බා පරාමාසවිප්පයුත්තපරාමට්ඨාති’පි, පරාමාසවිප්පයුත්තඅපරාමට්ඨාති’පි.
219. රූපක්ඛන්ධො අනාරම්මණො. චත්තාරො ඛන්ධා සාරම්මණා.
විඤ්ඤාණක්ඛන්ධො චිත්තං. චත්තාරො ඛන්ධා නො චිත්තා.
තයො ඛන්ධා චෙතසිකා. ද්වෙ ඛන්ධා අචෙතසිකා.
තයො ඛන්ධා චිත්තසම්පයුත්තා. රූපක්ඛන්ධො චිත්තවිප්පයුත්තො. විඤ්ඤාණක්ඛන්ධො න වත්තබ්බො චිත්තෙන සම්පයුත්තොති’පි චිත්තෙන විප්පයුත්තොති’පි.
තයො ඛන්ධා චිත්තසංසට්ඨා. රූපක්ඛන්ධො චිත්තවිසංසට්ඨො. විඤ්ඤාණක්ඛන්ධො න වත්තබ්බො චිත්තෙන සංසට්ඨොති’පි චිත්තෙන විසංසට්ඨොති’පි.
තයො ඛන්ධා චිත්තසමුට්ඨානා. විඤ්ඤාණක්ඛන්ධො නො චිත්තසමුට්ඨානො. රූපක්ඛන්ධො සියා චිත්තසමුට්ඨානො, සියා නො චිත්තසමුට්ඨානො.
තයො ඛන්ධා චිත්තසහභුනො. විඤ්ඤාණක්ඛන්ධො නො චිත්තසහභු. රූපක්ඛන්ධො සියා චිත්තසහභු සියා නො චිත්තසහභු.
තයො ඛන්ධා චිත්තානුපරිවත්තිනො. විඤ්ඤාණක්ඛන්ධො නො චිත්තානුපරිවත්ති, රූපක්ඛන්ධො සියා චිත්තානුපරිවත්ති, සියා නො චිත්තානුපරිවත්තී.
තයො ඛන්ධා චිත්තසංසට්ඨසමුට්ඨානා. ද්වෙ ඛන්ධා නො චිත්තසංසට්ඨසමුට්ඨානා.
තයො ඛන්ධා චිත්තසංසට්ඨසමුට්ඨානසහභුනො. ද්වෙ ඛන්ධා නො චිත්තසංසට්ඨසමුට්ඨානසහභුනො.
තයො ඛන්ධා චිත්තසංසට්ඨසමුට්ඨානානුපරිවත්තිනො. ද්වෙ ඛන්ධා නො චිත්තසංසට්ඨසමුට්ඨානානුපරිවත්තිනො.
විඤ්ඤාණක්ඛන්ධො අජ්ඣත්තිකො. තයො ඛන්ධා බාහිරා, රූපක්ඛන්ධො සියා අජ්ඣත්තිකො, සියා බාහිරො.
චත්තාරො ඛන්ධා නො උපාදා. රූපක්ඛන්ධො සියා උපාදා, සියා නො උපාදා.
සියා උපාදින්නා, සියා අනුපාදින්නා.
220. චත්තාරො ඛන්ධා නො උපාදානා. සඞ්ඛාරක්ඛන්ධො සියා උපාදානං, සියා නො උපාදානං.
රූපක්ඛන්ධො උපාදානියො. චත්තාරො ඛන්ධා සියා උපාදානියා, සියා අනුපාදානියා.
රූපක්ඛන්ධො උපාදානවිප්පයුත්තො. චත්තාරො ඛන්ධා සියා උපාදානසම්පයුත්තා, සියා උපාදානවිප්පයුත්තා.
රූපක්ඛන්ධො න වත්තබ්බො උපාදානං චෙව උපාදානියො’ති, උපාදානියො චෙව නො ච උපාදානං. තයො ඛන්ධා න වත්තබ්බා උපාදානා චෙව උපාදානියා’ති, සියා උපාදානියා චෙව නො ච උපාදානා, සියා න වත්තබ්බා උපාදානියා චෙව නො ච උපාදානාති. සඞ්ඛාරක්ඛන්ධො සියා උපාදානඤ්චෙව උපාදානියො ච, සියා උපාදානියො චෙව නො ච උපාදානං, සියා න වත්තබ්බො උපාදානං චෙව උපාදානියොති’පි, උපාදානියො චෙව නො ච උපාදානන්ති’පි.
රූපක්ඛන්ධො න වත්තබ්බො උපාදානං චෙව උපාදානසම්පයුත්තොති’පි, උපාදානසම්පයුත්තො චෙව නො ච උපාදානන්ති’පි. තයො ඛන්ධා න වත්තබ්බා උපාදානා චෙව උපාදානසම්පයුත්තා’ති, සියා උපාදානසම්පයුත්තා චෙව නො ච උපාදානා, සියා න වත්තබ්බා උපාදානසම්පයුත්තා චෙව නො ච උපාදානාති. සඞ්ඛාරක්ඛන්ධො සියා උපාදානං චෙව උපාදානසම්පයුත්තො ච, සියා උපාදානසම්පයුත්තො චෙව නො ච උපාදානං, සියා න වත්තබ්බො උපාදානං චෙව උපාදානසම්පයුත්තොති’පි, උපාදානසම්පයුත්තො චෙව නො ච උපාදානන්ති’පි.
රූපක්ඛන්ධො උපාදානවිප්පයුත්තඋපාදානියො. චත්තාරො ඛන්ධා සියා උපාදානවිප්පයුත්තඋපාදානියා, සියා උපාදානවිප්පයුත්තඅනුපාදානියා, සියා න වත්තබ්බා උපාදානවිප්පයුත්තඋපාදානියාතිපි උපාදානවිප්පයුත්තඅනුපාදානියාතිපි.
221. චත්තාරො ඛන්ධා නො කිලෙසා. සඞ්ඛාරක්ඛන්ධො සියා කිලෙසො, සියා නො කිලෙසො.
රූපක්ඛන්ධො සංකිලෙසිකො. චත්තාරො ඛන්ධා සියා සංකිලෙසිකා, සියා අසංකිලෙසිකා.
රූපක්ඛන්ධො අසංකිලිට්ඨො. චත්තාරො ඛන්ධා සියා සංකිලිට්ඨා, සියා අසංකිලිට්ඨා.
රූපක්ඛන්ධො කිලෙසවිප්පයුත්තො. චත්තාරො ඛන්ධා සියා කිලෙසසම්පයුත්තා, සියා කිලෙසවිප්පයුත්තා.
රූපක්ඛන්ධො න වත්තබ්බො කිලෙසො චෙව සංකිලෙසිකොති, සංකිලෙසිකො චෙව නො ච කිලෙසො. තයො ඛන්ධා න වත්තබ්බා කිලෙසා චෙව සංකිලෙසිකාති, සියා සංකිලෙසිකා චෙව නො ච කිලෙසා සියා න වත්තබ්බා සංකිලෙසිකා චෙව නො ච කිලෙසාති. සඞ්ඛාරක්ඛන්ධො සියා කිලෙසො චෙව සංකිලෙසිකො ච, සියා සංකිලෙසිකො චෙව නො ච කිලෙසො, සියා න වත්තබ්බො කිලෙසො චෙව, සංකිලෙසිකොතිපි සංකිලෙසිකො චෙව නො ච කිලෙසොතිපි.
රූපක්ඛන්ධො න වත්තබ්බො කිලෙසො චෙව සංකිලිට්ඨොතිපි, සංකිලිට්ඨො චෙව නො ච කිලෙසොතිපි. තයො ඛන්ධා න වත්තබ්බා කිලෙසා චෙව සංකිලිට්ඨාති, සියා සංකිලිට්ඨා චෙව නො ච කිලෙසා, සියා න වත්තබ්බා සංකිලිට්ඨා චෙව නො ච කිලෙසාති. සඞ්ඛාරක්ඛන්ධො සියා කිලෙසො චෙව සංකිලිට්ඨො ච, සියා සංකිලිට්ඨො චෙව නො ච කිලෙසො. සියා න වත්තබ්බො කිලෙසො චෙව සංකිලිට්ඨොතිපි, සංකිලිට්ඨො චෙව නො ච කිලෙසොතිපි.
රූපක්ඛන්ධො න වත්තබ්බො කිලෙසො චෙව කිලෙස සම්පයුත්තොතිපි, කිලෙසසම්පයුත්තො චෙව නො ච කිලෙසොතිපි. තයො ඛන්ධා න වත්තබ්බා කිලෙසා චෙව කිලෙසසම්පයුත්තාති, සියා කිලෙසසම්පයුත්තා චෙව නො ච කිලෙසා, සියා න වත්තබ්බා කිලෙසසම්පයුත්තා චෙව නො ච කිලෙසාති. සඞ්ඛාරක්ඛන්ධො සියා කිලෙසො චෙව කිලෙසසම්පයුත්තො ච, සියා කිලෙසසම්පයුත්තො චෙව නො ච කිලෙසො, සියා න වත්තබ්බො කිලෙසො චෙව කිලෙසසම්පයුත්තොතිපි, කිලෙසසම්පයුත්තො චෙව නො ච කිලෙසොතිපි.
රූපක්ඛන්ධො කිලෙසවිප්පයුත්තසංකිලෙසිකො. චත්තාරො ඛන්ධා සියා කිලෙසවිප්පයුත්තසංකිලෙසිකා, සියා කිලෙසවිප්පයුත්තඅසංකිලෙසිකා, සියා න වත්තබ්බා කිලෙසවිප්පයුත්තසංකිලෙසිකාතිපි, කිලෙසවිප්පයුත්තඅසංකිලෙසිකාතිපි.
222. රූපක්ඛන්ධො න දස්සනෙන පහාතබ්බො. චත්තාරො ඛන්ධා සියා දස්සනෙන පහාතබ්බා, සියා න දස්සනෙන පහාතබ්බා.
රූපක්ඛන්ධො න භාවනාය පහාතබ්බො. චත්තාරො ඛන්ධා සියා භාවනාය පහාතබ්බා, සියා න භාවනාය පහාතබ්බා.
රූපක්ඛන්ධො න දස්සනෙන පහාතබ්බහෙතුකො. චත්තාරො ඛන්ධා සියා දස්සනෙන පහාතබ්බහෙතුකා, සියා න දස්සනෙන පහාතබ්බහෙතුකා.
රූපක්ඛන්ධො න භාවනාය පහාතබ්බහෙතුකො. චත්තාරො ඛන්ධා සියා භාවනාය පහාතබ්බහෙතුකා, සියා න භාවනාය පහාතබ්බහෙතුකා.
රූපක්ඛන්ධො අවිතක්කො. චත්තාරො ඛන්ධා සියා සවිතක්කා සියා අවිතක්කා.
රූපක්ඛන්ධො අවිචාරො. චත්තාරො ඛන්ධා සියා සවිචාරා. සියා අවිචාරා.
රූපක්ඛන්ධො අප්පීතිකො. චත්තාරො ඛන්ධා සියා සප්පීතිකා, සියා අප්පීතිකා.
රූපක්ඛන්ධො න පීතිසහගතො. චත්තාරො ඛන්ධා සියා පීතිසහගතා, සියා න පීතිසහගතා.
ද්වෙ ඛන්ධා න සුඛසහගතා. තයො ඛන්ධා සියා සුඛසහගතා, සියා න සුඛසහගතා.
ද්වෙ ඛන්ධා න උපෙක්ඛාසහගතා. තයො ඛන්ධා සියා උපෙක්ඛාසහගතා, සියා න උපෙක්ඛාසහගතා.
රූපක්ඛන්ධො කාමාවචරො. චත්තාරො ඛන්ධා සියා කාමාවචරා, සියා න කාමාවචරා.
රූපාක්ඛන්ධො න රූපාවචරො. චත්තාරො ඛන්ධා සියා රූපාවචරා සියා න රූපාවචරා.
රූපක්ඛන්ධො න අරූපාවචරො. චත්තාරො ඛන්ධා සියා අරූපාවචරා සියා න අරූපාවචරා.
රූපක්ඛන්ධො පරියාපන්නො. චත්තාරො ඛන්ධා සියා පරියාපන්නා සියා අපරියාපන්නා.
රූපක්ඛන්ධො අනිය්යානිකො. චත්තාරො ඛන්ධා සියා නිය්යානිකා, සියා අනිය්යානිකා.
රූපක්ඛන්ධො අනියතො. චත්තාරො ඛන්ධා සියා නියතා සියා අනියතා.
රූපක්ඛන්ධො සඋත්තරො. චත්තාරො ඛන්ධා සියා සඋත්තරා, සියා අනුත්තරා.
රූපක්ඛන්ධො අරණො. චත්තාරො ඛන්ධා සියා සරණා සියා අරණාති.
පඤ්හපුච්ඡකං.
ඛන්ධවිභඞ්ගො නිට්ඨිතො.
2. ආයතන විභඞ්ගො