9. පාසාණලෙඛූපමො පුග්ගලො පඨවිලෙඛූපමො පුග්ගලො උදකලෙඛූපමො පුග්ගලො.
10. තයො පොත්ථකූපමා පුග්ගලා.
11. තයො කාසිකවත්ථූපමා පුග්ගලා.
12. සුප්පමෙය්යො, දුප්පමෙය්යො, අප්පමෙය්යො.
13. අත්ථෙකච්චො පුග්ගලො න සෙවිතබ්බො න භජිතබ්බො න පයිරුපාසිතබ්බො.
අත්ථෙකච්චො පුග්ගලො සෙවිතබ්බො භජිතබ්බො පයිරුපාසිතබ්බො, අත්ථෙකච්චො පුග්ගලො සක්කත්වා ගරුකත්වා සෙවිතබ්බො භජිතබ්බො පයිරුපාසිතබ්බො.
14. අත්ථෙකච්චො පුග්ගලො ජිගුච්ඡිතබ්බො න සෙවිතබ්බො න භජිතබ්බො න පයිරුපාසිතබ්බො,
අත්ථෙකච්චො පුග්ගලො අජ්ඣුපෙක්ඛිතබ්බො න සෙවිතබ්බො න භජිතබ්බො න පයිරුපාසිතබ්බො,
අත්ථෙකච්චො පුග්ගලො සෙවිතබ්බො භජිතබ්බො පයිරුපාසිතබ්බො.
15. අත්ථෙකච්චො පුග්ගලො සීලෙසු පරිපූරකාරී සමාධිස්මිං මත්තසොකාරී පඤ්ඤාය මත්තසොකාරී.
අත්ථෙකච්චො පුග්ගලො සීලෙසු ච පරිපූරකාරී සමාධිස්මිං ච පරිපූරකාරී පඤ්ඤාය මත්තසොකාරී.
අත්ථෙකච්චො පුග්ගලො සීලෙසු ච පරිපූරකාරී සමාධිස්මිං ච පරිපූරකාරී පඤ්ඤාය ච පරිපූරකාරී.
16. තයො සත්ථාරො, අපරෙපි තයො සත්ථාරො.
තිකි මාතිකා නිට්ඨිතා.
4. චතුක්ක මාතිකා
1. අසප්පුරිසො, අසප්පුරිසෙන අසප්පුරිසතරො, සප්පුරිසො. සප්පුරිසෙන සප්පුරිසතරො.
2. පාපො, පාපෙන පාපතරො, කල්යාණො, කල්යාණෙන කල්යාණතරො.
3. පාපධම්මො, පාපධම්මෙන පාපධම්මතරො, කල්යාණධම්මො, කල්යාණධම්මෙන කල්යාණධම්මතරො.
4. සාවජ්ජො, වජ්ජබහුලො, අප්පවජ්ජො, අනවජ්ජො.
5. උග්ඝටිතඤ්ඤූ, විපඤ්චිතඤ්ඤූ{1}, නෙය්යො, පදපරමො.
6. යුත්තපටිභානො නො මුත්තපටිභානො, මුත්තපටිභානො නො යුත්තපටිභානො, යුත්තපටිභානො ච මුත්තපටිභානො ච, නෙව යුත්තපටිභානො නො මුත්තපටිභානො.
7. චත්තාරො ධම්මකථිකා පුග්ගලා.
8. චත්තාරො වලාහකූපමා පුග්ගලා.
9. චත්තාරො මූසිකූපමා පුග්ගලා.
10. චත්තාරො අම්බූපමා පුග්ගලා.
11. චත්තාරො කුම්භූපමා පුග්ගලා.
12. චත්තාරො උදකරහදූපමා පුග්ගලා.
13. චත්තාරො බලිවද්දූපමා{2} පුග්ගලා.
14. චත්තාරො ආසිවිසූපමා පුග්ගලා.
15. අත්ථෙකච්චො පුග්ගලො, අනනුවිච්ච අපරියොගාහෙත්වා අවණ්ණාරහස්සා වණ්ණං භාසිතා හොති,
අත්ථෙකච්චො පුග්ගලො අනනුවිච්ච අපරියොගාහෙත්වා වණ්ණාරහස්ස අවණ්ණං භාසිතා හොති,
අත්ථෙකච්චො පුග්ගලො අනනුවිච්ච අපරියොගාහෙත්වා අප්පසාදනීයෙ ඨානෙ පසාදං උපදංසිතා හොති,
අත්ථෙකච්චො පුග්ගලො අනනුවිච්ච අපරියොගාහෙත්වා පසාදනීයෙ ඨානෙ අප්පසාදං උපදංසිතා හොති.
16. අත්ථෙකච්චො පුග්ගලො අනුවිච්ච පරියොගාහෙත්වා අවණ්ණාරහස්ස අවණ්ණං භාසිතා හොති,
අත්ථෙකච්චො පුග්ගලො අනුවිච්ච පරියොගාහෙත්වා වණ්ණාරහස්ස වණ්ණං භාසිතා හොති,
අත්ථෙකච්චො පුග්ගලො අනුවිච්ච පරියොගාහෙත්වා අප්පසාදනීයෙ ඨානෙ අප්පසාදං උපදංසිතා හොති,
අත්ථෙකච්චො පුග්ගලො අනුවිච්ච පරියොගාහෙත්වා පසාදනීයෙ ඨානෙ පසාදං උපදංසිතා හොති.
17. අත්ථෙකච්චො පුග්ගලො අවණ්ණාරහස්ස අවණ්ණං භාසිතා හොති භූතං තච්ඡං කාලෙන, නො ච ඛො වණ්ණාරහස්ස වණ්ණං භාසිතා හොති භූතං තච්ඡං කාලෙන,
අත්ථෙකච්චො පුග්ගලො වණ්ණාරහස්ස වණ්ණං භාසිතා හොති භූතං තච්ඡං කාලෙන, නො ච ඛො අවණ්ණාරහස්ස අවණ්ණං. භාසිතා හොති භූතං තච්ඡං කාලෙන,
අත්ථෙකච්චො පුග්ගලො අවණ්ණාරහස්ස අවණ්ණං භාසිතා හොති භූතං තච්ඡං කාලෙන, වණ්ණාරහස්ස වණ්ණං භාසිතා හොති භූතං තච්ඡං කාලෙන.
අත්ථෙකච්චො පුග්ගලො නෙව අවණ්ණාරහස්ස අවණ්ණං භාසිතා හොති භූතං තච්ඡං කාලෙන, නො ච වණ්ණාරහස්ස වණ්ණං භාසිතා හොති භූතං තච්ඡං කාලෙන.
18. උට්ඨානඵලූපජීවී නො පුඤ්ඤඵලූපජීවී, පුඤ්ඤඵලූපජීවී නො උට්ඨානඵලූපජීවී, උට්ඨානඵලූපජීවී ච පුඤ්ඤඵලූපජීවී ච. නෙව උට්ඨානඵලූපජීවී නො පුඤ්ඤඵලූපජීවී.
19. තමොතම පරායනො, තමො ජොතිපරායනො, ජොතිතමපරායනො, ජොති ජොති පරායනො.
20. ඔනතොනතො, ඔනතුන්නතො, උන්නතොනතො, උන්නතුන්නතො.
21. චත්තාරො රුක්ඛූපමා පුග්ගලා.
22. රූපප්පමාණො රූපප්පසන්නො, ඝොසප්පමාණො ඝොසප්පසන්නො, ලූඛප්පමාණො ලූඛප්පසන්නො, ධම්මප්පමාණො ධම්මප්පසන්නො.
23. අත්ථෙකච්චො පුග්ගලො අත්තහිතාය පටිපන්නො හොති නො පරහිතාය,
අත්ථෙකච්චො පුග්ගලො පරහිතාය පටිපන්නො හොති නො අත්තහිතාය,
අත්ථෙකච්චො පුග්ගලො අත්තහිතාය චෙව පටිපන්නො හොති පරහිතාය ච,
අත්ථෙකච්චො පුග්ගලො නෙවත්තහිතාය පටිපන්නො හොති නො පරහිතාය.
24. අත්ථෙකච්චො පුග්ගලො අත්තන්තපො හොති අත්තපරිතාපනානුයොගමනුයුත්තො,
අත්ථෙකච්චො පුග්ගලො පරන්තපො හොති පරපරිතාපනානුයොගමනුයුත්තො,
අත්ථෙකච්චො පුග්ගලො අත්තන්තපො ච හොති අත්තපරිතාපනානුයොගමනුයුත්තො පරන්තපො ච පරපරිතාපනානුයොගමනුයුත්තො,
අත්ථෙකච්චො පුග්ගලො නෙව අත්තන්තපො හොති න අත්තපරිතාපනානුයොගමනුයුත්තො, න පරන්තපො න පරපරිතාපනානුයොගමනුයුත්තො, සො අනත්තන්තපො අපරන්තපො දිට්ඨෙවධම්මෙ නිච්ඡාතො නිබ්බුතො සීතිභූතො සුඛපටිසංවෙදී බ්රහ්මභූතෙන අත්තනා විහරති.
25. සරාගො, සදොසො, සමොහො, සමානො.
26. අත්ථෙකච්චො පුග්ගලො ලාභී හොති අජ්ඣත්තං චෙතො සමථස්ස, න ලාභී අධිපඤ්ඤාධම්මවිපස්සනාය.
අත්ථෙකච්චො පුග්ගලො ලාභී හොති අධිපඤ්ඤාධම්මවිපස්සනාය, න ලාභී අජ්ඣත්තං චෙතොසමථස්ස.
අත්ථෙකච්චො පුග්ගලො ලාභී චෙව හොති අජ්ඣත්තං චෙතොසමථස්ස, ලාභී අධිපඤ්ඤාධම්මවිපස්සනාය.
අත්ථෙකච්චො පුග්ගලො නෙව ලාභී හොති අජ්ඣත්තං චෙතොසමථස්ස න ලාභී අධිපඤ්ඤාධම්මවිපස්සනාය.
27. අනුසොතගාමී පුග්ගලො, පටිසොතගාමී පුග්ගලො, ඨිතත්තො පුග්ගලො, තිණ්ණො පාරගතො{1}. ථලෙ තිට්ඨති බ්රාහ්මණො.
28. අප්පස්සුතො සුතෙන අනුප්පන්නො, අප්පස්සුතො සුතෙන උප්පන්නො, බහුස්සුතො සුතෙන අනුප්පන්නො, බහුස්සුතො සුතෙන උප්පන්නො.
29. සමණමචලො, සමණපදුමො, සමණපුණ්ඩරීකො, සමණෙසු සමණසුඛුමාලො.
චතුක්ක මාතිකා නිට්ඨිතා.
5. පඤ්චක මාතිකා
1. අත්ථෙකච්චො පුග්ගලො ආරභති{1} ච විප්පටිසාරී ච හොති තඤ්ච චෙතොවිමුත්තිං පඤ්ඤාවිමුත්තිං යථාභූතං නප්පජානාති, යත්ථස්ස තෙ උප්පන්නා පාපකා අකුසලා ධම්මා අපරිසෙසා නිරුජ්ඣන්ති.
අත්ථෙකච්චො පුග්ගලො ආරභති න විප්පටිසාරී ච හොති තඤ්ච චෙතොවිමුත්තිං පඤ්ඤාවිමුත්තිං යථාභූතං නප්පජානාති, යත්ථස්ස තෙ උප්පන්නා පාපකා අකුසලා ධම්මා අපරිසෙසා නිරුජ්ඣන්ති.
අත්ථෙකච්චො පුග්ගලො නාරභති විප්පටිසාරී හොති තඤ්ච චෙතොවිමුත්තිං පඤ්ඤාවිමුත්තිං යථාභූතං නප්පජානාති යත්ථස්ස තෙ උප්පන්නා පාපකා අකුසලා ධම්මා අපරිසෙසා නිරුජ්ඣන්ති.
අත්ථෙකච්චො පුග්ගලො නාරභති න විප්පටිසාරී හොති තඤ්ච චෙතොවිමුත්තිං පඤ්ඤාවිමුත්තිං යථාභූතං නප්පජානාති යත්ථස්ස තෙ උප්පන්නා පාපකා අකුසලා ධම්මා අපරිසෙසා නිරුජ්ඣන්ති.
අත්ථෙකච්චො පුග්ගලො නාරභති න විප්පටිසාරී හොති තඤ්ච චෙතො විමුත්තිං පඤ්ඤාවිමුත්තිං යථාභූතං පජානාති යත්ථස්ස තෙ උප්පන්නා පාපකා අකුසලා ධම්මා අපරිසෙසා නිරුජ්ඣන්ති.
2. දත්වා අවජානාති, සංවාසෙන අවජානාති, ආධෙය්යමුඛො හොති, ලොලො හොති මන්දො මොමූහො හොති.
3. පඤ්ච යොධාජීවූපමා පුග්ගලා.
4. පඤ්ච පිණ්ඩපාතිකා.
5. පඤ්ච ඛලුපච්ඡාභත්තිකා.
6. පඤ්ච එකාසනිකා.
7. පඤ්ච පංසුකූලිකා.
8. පඤ්ච තෙචීවරිකා.
9. පඤ්ච ආරඤ්ඤිකා.
10. පඤ්ච රුක්ඛමූලිකා.
11. පඤ්ච අබ්භොකාසිකා.
12. පඤ්ච නෙසජ්ජිකා.
13. පඤ්ච යථාසන්ථතිකා.
14. පඤ්ච සොසානිකා.
පඤ්චක මාතිකා නිට්ඨිතා.
6. ඡක්ක මාතිකා
1. අත්ථෙකච්චො පුග්ගලො පුබ්බෙ අනනුස්සුතෙසු ධම්මෙසු සාමං සච්චානි අභිසම්බුජ්ඣති, තත්ථ ච සබ්බඤ්ඤුතං පාපුණාති බලෙසුව වසීභාවං.
අත්ථෙකච්චො පුග්ගලො පුබ්බෙ අනනුස්සුතෙසු ධම්මෙසු සාමං සච්චානි අභිසම්බුජ්ඣති, න ච තත්ථ සබ්බඤ්ඤුතං පාපුණාති න ච බලෙසු{1} වසීභාවං.
අත්ථෙකච්චො පුග්ගලො පුබ්බෙ අනනුස්සුතෙසු ධම්මෙසු සාමං සච්චානි අනභිසම්බුජ්ඣති දිට්ඨෙව ධම්මෙ දුක්ඛස්සන්තකරො හොති, සාවකපාරමිං ච පාපුණාති.
අත්ථෙකච්චො පුග්ගලො පුබ්බෙ අනනුස්සුතෙසු ධම්මෙසු සාමං සච්චානි අනභිසම්බුජ්ඣති දිට්ඨෙව ධම්මෙ දුක්ඛස්සන්තකරො හොති, න ච සාවකපාරමිං පාපුණාති.
අත්ථෙකච්චො පුග්ගලො පුබ්බෙ අනනුස්සුතෙසු ධම්මෙසු සාමං සච්චානි අනභිසම්බුජ්ඣති න ච දිට්ඨෙව ධම්මෙ දුක්ඛස්සන්තකරො හොති, අනාගාමී හොති අනාගන්තා ඉත්ථත්තං.
අත්ථෙකච්චො පුග්ගලො පුබ්බෙ අනනුස්සුතෙසු ධම්මෙසු සාමං සච්චානි අනභිසම්බුජ්ඣති න ච දිට්ඨෙව ධම්මෙ දුක්ඛස්සන්තකරො හොති, ආගාමී හොති ආගන්තා ඉත්ථත්තං.
ඡක්ක මාතිකා නිට්ඨිතා.
7. සත්තක මාතිකා
1. සත්ත උදකූපමා පුග්ගලා: සකිං නිමුග්ගො නිමුග්ගොව හොති, උම්මුජ්ජිත්වා නිමුජ්ජති, උම්මුජ්ජිත්වා ඨිතො හොති, උම්මුජ්ජිත්වා විපස්සති විලොකෙති, උම්මුජ්ජිත්වා පතරති, උම්මුජ්ජිත්වා පටිගාධප්පත්තො හොති, උම්මුජ්ජිත්වා තිණ්ණො හොති පාරගතො ථලෙ තිට්ඨති බ්රාහ්මණො.
2. උභතොභාගවිමුත්තො, පඤ්ඤාවිමුත්තො, කායසක්ඛී, දිට්ඨප්පත්තො, සද්ධාවිමුත්තො, ධම්මානුසාරී, සද්ධානුසාරී.
සත්තක මාතිකා නිට්ඨිතා.
8. අට්ඨක මාතිකා
1. චත්තාරො මග්ගසමඞ්ගිනො, චත්තාරො ඵලසමඞ්ගිනො-පුග්ගලා.
අට්ඨක මාතිකා නිට්ඨිතා
9. නවක මාතිකා
1. සම්මා සම්බුද්ධො, පච්චෙක බුද්ධො, උභතොභාගවිමුත්තො, පඤ්ඤාවිමුත්තො, කායසක්ඛී, දිට්ඨප්පත්තො, සද්ධාවිමුත්තො, ධම්මානුසාරී, සද්ධානුසාරී.