අභිධම්මපිටකෙ
පුග්ගලපඤ්ඤත්තිප්පකරණං
නමො තස්ස භගවතො අරහතො සම්මාසම්බුද්ධස්ස
මාතිකා
1. එකක මාතිකා
ඡ පඤ්ඤත්තියො: ඛන්ධපඤ්ඤත්ති, ආයතනපඤ්ඤත්ති, ධාතුපඤ්ඤත්ති, සච්චපඤ්ඤත්ති, ඉන්ද්රියපඤ්ඤත්ති, පුග්ගලපඤ්ඤත්තී ති.
කිත්තාවතා ඛන්ධානං ඛන්ධපඤ්ඤත්ති: යාවතා පඤ්චක්ඛන්ධො, රූපක්ඛන්ධො වෙදනාක්ඛන්ධො සඤ්ඤාක්ඛන්ධො සඞ්ඛාරක්ඛන්ධො විඤ්ඤාණක්ඛන්ධො. එත්තාවතා ඛන්ධානං ඛන්ධපඤ්ඤත්ති.
කිත්තාවතා ආයතනානං ආයතනපඤ්ඤත්ති: යාවතා ද්වාදසායතනානි චක්ඛායතනං රූපායතනං සොතායතනං සද්දායතනං ඝානායතනං ගන්ධායතනං ජිව්හායතනං රසායතනං කායායතනං ඵොට්ඨබ්බායතනං මනායතනං ධම්මායතනං. එත්තාවතා ආයතනානං ආයතනපඤ්ඤත්ති.
කිත්තාවතා ධාතූනං ධාතුපඤ්ඤත්ති: යාවතා අට්ඨාරසධාතුයො, චක්ඛුධාතු රූපධාතු චක්ඛුවිඤ්ඤාණධාතු, සොතධාතු සද්දධාතු සොතවිඤ්ඤාණධාතු, ඝානධාතු ගන්ධධාතු ඝානවිඤ්ඤාණධාතු, ජිව්හාධාතු රසධාතු ජිව්හාවිඤ්ඤාණධාතු, කායධාතු ඵොට්ඨබ්බධාතු කායවිඤ්ඤාණධාතු, මනොධාතු ධම්මධාතු මනොවිඤ්ඤාණධාතු. එත්තාවතා ධාතූනං ධාතුපඤ්ඤත්ති.
කිත්තාවතා සච්චානං සච්චපඤ්ඤත්ති: යාවතා චත්තාරි සච්චානි, දුක්ඛසච්චං සමුදයසච්චං නිරොධසච්චං මග්ගසච්චං. එත්තාවතා සච්චානං සච්චපඤ්ඤත්ති.
කිත්තාවතා ඉන්ද්රියානං ඉන්ද්රියපඤ්ඤත්ති: යාවතා බාවීසතින්ද්රියානි: චක්ඛුන්ද්රියං සොතින්ද්රියං ඝානින්ද්රියං ජිව්හින්ද්රියං කායින්ද්රියං මනින්ද්රියං ඉත්ථින්ද්රියං පුරිසින්ද්රියං ජීවිතින්ද්රියං සුඛින්ද්රියං දුක්ඛින්ද්රියං සොමනස්සින්ද්රියං දොමනස්සින්ද්රියං උපෙක්ඛින්ද්රියං සද්ධින්ද්රියං විරියින්ද්රියං සතින්ද්රියං සමාධින්ද්රියං පඤ්ඤින්ද්රියං අනඤ්ඤාතඤ්ඤාස්සාමීතින්ද්රියං අඤ්ඤින්ද්රියං අඤ්ඤාතාවින්ද්රියං. එත්තාවතා ඉන්ද්රියානං ඉන්ද්රියපඤ්ඤත්ති.
කිත්තාවතා පුග්ගලානං පුග්ගලපඤ්ඤත්ති:
1. සමයවිමුත්තො
2. අසමයවිමුත්තො
3. කුප්පධම්මො
4. අකුප්පධම්මො
5. පරිහානධම්මො
6. අපරිහානධම්මො
7. චෙතනාභබ්බො
8. අනුරක්ඛනාභබ්බො
9. පුථුජ්ජනො
10. ගොත්රභූ
11. භයූපරතො
12. අභයූපරතො
13. භබ්බාගමනො
14. අභබ්බාගමනො
15. නියතො
16. අනියතො
17. පටිපන්නකො
18. ඵලෙඨීතො
19. සමසීසී
20. ඨීතකප්පී
21. අරියො
22. අනරියො
23. සෙඛො{1}
24. අසෙඛො{2}
25. නෙවසෙඛො නාසෙඛො{3}
26. තෙවිජ්ජො
27. ඡළභිඤ්ඤො
28. සම්මාසම්බුද්ධො
29. පච්චෙකබුද්ධො{4}
30. උභතොභාගවිමුත්තො
31. පඤ්ඤාවිමුත්තො
32. කායසක්ඛී
33. දිට්ඨප්පත්තො
34. සද්ධාවිමුත්තො
35. ධම්මානුසාරී
36. සද්ධානුසාරී
37. සත්තක්ඛත්තුපරමො
38. කොලංකොලො
39. එකබීජී
40. සකදාගාමී
41. අනාගාමී
42. අන්තරාපරිනිබ්බායී
43. උපහච්චපරිනිබ්බායී
44. අසඞ්ඛාරපරිනිබ්බායී
45. සසඞ්ඛාරපරිනිබ්බායී
46. උද්ධංසොතො අකනිට්ඨගාමී
47. සොතාපන්නො, සොතාපත්තිඵල සච්ඡිකිරියාය පටිපන්නො
48. සකදාගාමී, සකදාගාමීඵල සච්ඡිකිරියාය පටිපන්නො
49. අනාගාමී, අනාගාමිඵල සච්ඡිකිරියාය පටිපන්නො
50. අරහා, අරහත්තඵල සච්ඡිකිරියාය{1} පටිපන්නො
එකක මාතිකා නිට්ඨිතා
2. දුක මාතිකා
1. කොධනො ච උපනාහී ච
2. මක්ඛී ච පළාසී ච
3. ඉස්සුකී ච මච්ඡරී ච
4. සඨො ච මායාවී ච
5. අහිරිකො ච අනොත්තප්පී ච
6. දුබ්බචො ච පාපමිත්තො ච
7. ඉන්ද්රියෙසු අගුත්තද්වාරො ච භොජනෙ අමත්තඤ්ඤූ ච
8. මුට්ඨස්සති ච අසම්පජානො ච
9. සීලවිපන්නො ච දිට්ඨිවිපන්නො ච
10. අජ්ඣත්තසඤ්ඤොජනො ච බහිද්ධාසඤ්ඤොජනො ච
11. අක්කොධනො ච අනුපනාහී ච
12. අමක්ඛී ච අපලාසී ච
13. අනිස්සුකී ච අමච්ඡරී ච
14. අසඨො ච අමායාවී ච
15. හිරිමා ච ඔත්තප්පී ච
16. සුවචො ච කල්යාණමිත්තො ච
17. ඉන්ද්රියෙසු ගුත්තද්වාරො ච භොජනෙ මත්තඤ්ඤූ ච
18. උපට්ඨිතසති ච සම්පජානො ච
19. සීලසම්පන්නො ච දිට්ඨිසම්පන්නො ච
20. ද්වෙපුග්ගලා දුල්ලභා ලොකස්මිං
21. ද්වෙ පුග්ගලා දුතප්පයා
22. ද්වෙ පුග්ගලා සුතප්පයා
23. ද්වින්නං පුග්ගලානං ආසවා වඩ්ඪන්ති
24. ද්වින්නං පුග්ගලානං ආසවා න වඩ්ඪන්ති
25. හීනාධිමුත්තො ච පණීතාධිමුත්තො ච
26. තිත්තො ච තප්පෙතා ච
දුක මාතිකා නිට්ඨිතා
3. තික මාතිකා
1. නිරායො ආසංසො විගතාසො.
2. තයො ගිලානූපමා පුග්ගලා.
3. කායසක්ඛී දිට්ඨිප්පත්තො සද්ධාවිමුත්තො.
4. ගූථභාණී පුප්ඵභාණී මධුභාණී.
5. අරුකූපම{1} චිත්තො පුග්ගලො විජ්ජූපමචිත්තො පුග්ගලො වජිරූපමචිත්තො පුග්ගලො.
6. අන්ධො එකචක්ඛු ද්විචක්ඛු.
7. අවකුජ්ජපඤ්ඤො පුග්ගලො උච්ඡඞ්ගපඤ්ඤො පුග්ගලො පුථුපඤ්ඤො පුග්ගලො.
8. අත්ථෙකච්චො පුග්ගලො කාමෙසු ච භවෙසු ච අවීතරාගො, අත්ථෙකච්චො පුග්ගලො කාමෙසු වීතරාගො භවෙසු අවීතරාගො, අත්ථෙකච්චො පුග්ගලො කාමෙසු ච භවෙසු ච වීතරාගො.