Sanidassanadukaṁ niṭṭhitaṁ.
2.2.4. Sappaṭighaduka
2.2.4.1. Paṭiccavāra
2.2.4.1.1. Paccayānuloma
Vibhaṅgavāra
Hetu
Sappaṭighaṁ dhammaṁ paṭicca sappaṭigho dhammo uppajjati hetupaccayā— sappaṭighaṁ ekaṁ mahābhūtaṁ paṭicca dve mahābhūtā, dve mahābhūte paṭicca ekaṁ mahābhūtaṁ, sappaṭighe mahābhūte paṭicca sappaṭighaṁ cittasamuṭṭhānaṁ rūpaṁ, kaṭattārūpaṁ, upādārūpaṁ, phoṭṭhabbāyatanaṁ paṭicca cakkhāyatanaṁ …pe… rasāyatanaṁ.
Sappaṭighaṁ dhammaṁ paṭicca appaṭigho dhammo uppajjati hetupaccayā—sappaṭighe mahābhūte paṭicca āpodhātu, sappaṭighe mahābhūte paṭicca appaṭighaṁ cittasamuṭṭhānaṁ rūpaṁ, kaṭattārūpaṁ, upādārūpaṁ, phoṭṭhabbāyatanaṁ paṭicca āpodhātu itthindriyaṁ …pe… kabaḷīkāro āhāro.
Sappaṭighaṁ dhammaṁ paṭicca sappaṭigho ca appaṭigho ca dhammā uppajjanti hetupaccayā—sappaṭighaṁ ekaṁ mahābhūtaṁ paṭicca dve mahābhūtā āpodhātu ca, dve mahābhūte …pe… sappaṭighe mahābhūte paṭicca sappaṭighañca appaṭighañca cittasamuṭṭhānaṁ rūpaṁ, kaṭattārūpaṁ, upādārūpaṁ, phoṭṭhabbāyatanaṁ paṭicca cakkhāyatanaṁ …pe… rasāyatanaṁ āpodhātu itthindriyaṁ …pe… kabaḷīkāro āhāro.
Appaṭighaṁ dhammaṁ paṭicca appaṭigho dhammo uppajjati hetupaccayā—appaṭighaṁ ekaṁ khandhaṁ paṭicca tayo khandhā appaṭighaṁ cittasamuṭṭhānañca rūpaṁ …pe… dve khandhe …pe… paṭisandhikkhaṇe …pe… khandhe paṭicca vatthu, vatthuṁ paṭicca khandhā, āpodhātuṁ paṭicca appaṭighaṁ cittasamuṭṭhānaṁ rūpaṁ, kaṭattārūpaṁ, upādārūpaṁ, āpodhātuṁ paṭicca itthindriyaṁ …pe… kabaḷīkāro āhāro.
Appaṭighaṁ dhammaṁ paṭicca sappaṭigho dhammo uppajjati hetupaccayā—appaṭighe khandhe paṭicca sappaṭighaṁ cittasamuṭṭhānaṁ rūpaṁ; paṭisandhikkhaṇe …pe… āpodhātuṁ paṭicca sappaṭighā mahābhūtā, āpodhātuṁ paṭicca sappaṭighaṁ cittasamuṭṭhānaṁ rūpaṁ, kaṭattārūpaṁ, upādārūpaṁ, āpodhātuṁ paṭicca cakkhāyatanaṁ …pe… phoṭṭhabbāyatanaṁ.
Appaṭighaṁ dhammaṁ paṭicca sappaṭigho ca appaṭigho ca dhammā uppajjanti hetupaccayā—appaṭighaṁ ekaṁ khandhaṁ paṭicca tayo khandhā sappaṭighañca appaṭighañca cittasamuṭṭhānaṁ rūpaṁ …pe… dve khandhe …pe… paṭisandhikkhaṇe …pe… āpodhātuṁ paṭicca sappaṭighañca appaṭighañca cittasamuṭṭhānaṁ rūpaṁ, kaṭattārūpaṁ, upādārūpaṁ, āpodhātuṁ paṭicca cakkhāyatanaṁ …pe… phoṭṭhabbāyatanaṁ, itthindriyaṁ …pe… kabaḷīkāro āhāro.
Sappaṭighañca appaṭighañca dhammaṁ paṭicca sappaṭigho dhammo uppajjati hetupaccayā—appaṭighe khandhe ca mahābhūte ca paṭicca sappaṭighaṁ cittasamuṭṭhānaṁ rūpaṁ; paṭisandhikkhaṇe …pe… sappaṭighaṁ ekaṁ mahābhūtañca āpodhātuñca paṭicca dve mahābhūtā …pe… sappaṭighe mahābhūte ca āpodhātuñca paṭicca sappaṭighaṁ cittasamuṭṭhānaṁ rūpaṁ, kaṭattārūpaṁ, upādārūpaṁ, phoṭṭhabbāyatanañca āpodhātuñca paṭicca cakkhāyatanaṁ …pe… rasāyatanaṁ.
Sappaṭighañca appaṭighañca dhammaṁ paṭicca appaṭigho dhammo uppajjati hetupaccayā—appaṭighe khandhe ca mahābhūte ca paṭicca appaṭighaṁ cittasamuṭṭhānaṁ rūpaṁ; paṭisandhikkhaṇe appaṭighe khandhe ca mahābhūte ca paṭicca appaṭighaṁ kaṭattārūpaṁ, phoṭṭhabbāyatanañca āpodhātuñca paṭicca appaṭighaṁ cittasamuṭṭhānaṁ rūpaṁ, kaṭattārūpaṁ, upādārūpaṁ, phoṭṭhabbāyatanañca āpodhātuñca paṭicca itthindriyaṁ …pe… kabaḷīkāro āhāro.
Sappaṭighañca appaṭighañca dhammaṁ paṭicca sappaṭigho ca appaṭigho ca dhammā uppajjanti hetupaccayā—appaṭighe khandhe ca mahābhūte ca paṭicca sappaṭighañca appaṭighañca cittasamuṭṭhānaṁ rūpaṁ; paṭisandhikkhaṇe …pe… appaṭighe khandhe ca mahābhūte ca paṭicca sappaṭighañca appaṭighañca kaṭattārūpaṁ, phoṭṭhabbāyatanañca āpodhātuñca paṭicca sappaṭighañca appaṭighañca cittasamuṭṭhānaṁ rūpaṁ, kaṭattārūpaṁ, upādārūpaṁ, phoṭṭhabbāyatanañca āpodhātuñca paṭicca cakkhāyatanaṁ …pe… rasāyatanaṁ, itthindriyaṁ …pe… kabaḷīkāro āhāro.
Ārammaṇa
Appaṭighaṁ dhammaṁ paṭicca appaṭigho dhammo uppajjati ārammaṇapaccayā— appaṭighaṁ ekaṁ khandhaṁ paṭicca tayo khandhā …pe… dve khandhe …pe… paṭisandhikkhaṇe …pe… vatthuṁ paṭicca khandhā.
Adhipatyādi
Sappaṭighaṁ dhammaṁ paṭicca appaṭigho dhammo uppajjati adhipatipaccayā (paṭisandhi vajjetabbā, kaṭattārūpā ca) … anantarapaccayā … samanantarapaccayā … sahajātapaccayā (sabbe mahābhūtā kātabbā) … aññamaññapaccayā—sappaṭighaṁ ekaṁ mahābhūtaṁ paṭicca dve mahābhūtā, dve mahābhūte …pe….
Sappaṭighaṁ dhammaṁ paṭicca appaṭigho dhammo uppajjati aññamaññapaccayā— sappaṭighe mahābhūte paṭicca āpodhātu …pe….
Sappaṭighaṁ dhammaṁ paṭicca sappaṭigho ca appaṭigho ca dhammā uppajjanti aññamaññapaccayā—sappaṭighaṁ ekaṁ mahābhūtaṁ paṭicca dve mahābhūtā āpodhātu ca, dve mahābhūte …pe….
Appaṭighaṁ dhammaṁ paṭicca appaṭigho dhammo uppajjati aññamaññapaccayā— appaṭighaṁ ekaṁ khandhaṁ paṭicca tayo khandhā …pe… dve khandhe …pe… paṭisandhikkhaṇe …pe… khandhe paṭicca vatthu, vatthuṁ paṭicca khandhā.
Appaṭighaṁ dhammaṁ paṭicca sappaṭigho dhammo uppajjati aññamaññapaccayā— āpodhātuṁ paṭicca sappaṭighā mahābhūtā. (Ime ajjhattikabāhirā mahābhūtā kātabbā.)
Sappaṭighañca appaṭighañca dhammaṁ paṭicca sappaṭigho dhammo uppajjati aññamaññapaccayā—sappaṭighaṁ ekaṁ mahābhūtañca āpodhātuñca paṭicca dve mahābhūtā …pe… nissayapaccayā …pe… avigatapaccayā.
Saṅkhyāvāra
Suddha
Hetuyā nava, ārammaṇe ekaṁ, adhipatiyā nava, anantare ekaṁ, samanantare ekaṁ, sahajāte nava, aññamaññe cha, nissaye nava, upanissaye ekaṁ, purejāte ekaṁ, āsevane ekaṁ, kamme nava, vipāke nava, āhāre nava, indriye nava, jhāne nava, magge nava, sampayutte ekaṁ, vippayutte nava, atthiyā nava, natthiyā ekaṁ, vigate ekaṁ, avigate nava.
Anulomaṁ.
2.2.4.1.2. Paccayapaccanīya
Vibhaṅgavāra
Sappaṭighaṁ dhammaṁ paṭicca sappaṭigho dhammo uppajjati nahetupaccayā … tīṇi.
Appaṭighaṁ dhammaṁ paṭicca appaṭigho dhammo uppajjati nahetupaccayā—ahetukaṁ appaṭighaṁ ekaṁ khandhaṁ paṭicca tayo khandhā appaṭighaṁ cittasamuṭṭhānañca rūpaṁ …pe… dve khandhe …pe… ahetukapaṭisandhikkhaṇe …pe… khandhe paṭicca vatthu, vatthuṁ paṭicca khandhā, āpodhātuṁ paṭicca appaṭighaṁ cittasamuṭṭhānaṁ rūpaṁ, kaṭattārūpaṁ, upādārūpaṁ, āpodhātuṁ paṭicca itthindriyaṁ …pe…. <b>Kabaḷīkāro āhāro</b>— … bāhiraṁ … āhārasamuṭṭhānaṁ … utusamuṭṭhānaṁ … asaññasattānaṁ … āpodhātuṁ paṭicca appaṭighaṁ kaṭattārūpaṁ upādārūpaṁ; vicikicchāsahagate uddhaccasahagate khandhe paṭicca vicikicchāsahagato uddhaccasahagato moho.
(Appaṭighamūlakaṁ itarepi dve pañhā kātabbā. Ghaṭanepi tīṇi pañhā kātabbā. Ajjhattikā bāhirā mahābhūtā sabbe jānitvā kātabbā.)
Naārammaṇādi
Sappaṭighaṁ dhammaṁ paṭicca sappaṭigho dhammo uppajjati naārammaṇapaccayā (sabbaṁ saṅkhittaṁ) … novigatapaccayā.
Saṅkhyāvāra
Suddha
Nahetuyā nava, naārammaṇe nava, naadhipatiyā nava, naanantare nava, nasamanantare nava, naaññamaññe nava, naupanissaye nava, napurejāte nava, napacchājāte nava, naāsevane nava, nakamme nava, navipāke nava, naāhāre nava, naindriye nava, najhāne nava, namagge nava, nasampayutte nava, navippayutte nava, nonatthiyā nava, novigate nava.
Paccanīyaṁ.
2.2.4.1.3. Paccayānulomapaccanīya
Hetuduka
Hetupaccayā naārammaṇe nava, naadhipatiyā nava, naanantare nava, nasamanantare nava, naaññamaññe nava, naupanissaye nava, napurejāte nava, napacchājāte nava, naāsevane nava, nakamme ekaṁ, navipāke nava, nasampayutte nava, navippayutte ekaṁ, nonatthiyā nava, novigate nava.
Anulomapaccanīyaṁ.
2.2.4.1.4. Paccayapaccanīyānuloma
Nahetuduka
Nahetupaccayā ārammaṇe ekaṁ, anantare ekaṁ, samanantare ekaṁ, sahajāte nava, aññamaññe cha, nissaye nava, upanissaye ekaṁ, purejāte ekaṁ, āsevane ekaṁ, kamme nava …pe… magge ekaṁ, sampayutte ekaṁ, vippayutte nava, atthiyā nava, natthiyā ekaṁ, vigate ekaṁ, avigate nava.
Paccanīyānulomaṁ.
2.2.4.2. Sahajātavāra
Sahajātavāropi paṭiccavārasadiso.
2.2.4.3. Paccayavāra
2.2.4.3.1–4. Paccayānulomādi
Vibhaṅgavāra
Hetu
Sappaṭighaṁ dhammaṁ paccayā sappaṭigho dhammo uppajjati hetupaccayā … tīṇi.
Appaṭighaṁ dhammaṁ paccayā appaṭigho dhammo uppajjati hetupaccayā—appaṭighaṁ ekaṁ khandhaṁ paccayā tayo khandhā appaṭighaṁ cittasamuṭṭhānañca rūpaṁ …pe… dve khandhe …pe… paṭisandhikkhaṇe …pe… āpodhātuṁ paccayā appaṭighaṁ cittasamuṭṭhānaṁ rūpaṁ, kaṭattārūpaṁ, upādārūpaṁ, āpodhātuṁ paccayā itthindriyaṁ …pe… kabaḷīkāro āhāro, vatthuṁ paccayā appaṭighā khandhā.
Avasesā pañca pañhā paṭiccavārasadisā.
Ārammaṇādi
Sappaṭighaṁ dhammaṁ paccayā appaṭigho dhammo uppajjati ārammaṇapaccayā— cakkhāyatanaṁ paccayā cakkhuviññāṇaṁ …pe… kāyāyatanaṁ paccayā kāyaviññāṇaṁ.
Appaṭighaṁ dhammaṁ paccayā appaṭigho dhammo uppajjati ārammaṇapaccayā— appaṭighaṁ ekaṁ khandhaṁ paccayā tayo khandhā …pe… dve khandhe …pe… paṭisandhikkhaṇe …pe… vatthuṁ paccayā appaṭighā khandhā.
Sappaṭighañca appaṭighañca dhammaṁ paccayā appaṭigho dhammo uppajjati ārammaṇapaccayā—cakkhuviññāṇasahagataṁ ekaṁ khandhañca cakkhāyatanañca paccayā tayo khandhā …pe… kāyaviññāṇasahagataṁ ekaṁ khandhañca kāyāyatanañca paccayā tayo khandhā …pe… adhipatipaccayā … (saṅkhittaṁ) avigatapaccayā.
Saṅkhyāvāra
Suddha
Hetuyā nava, ārammaṇe tīṇi, adhipatiyā nava, anantare tīṇi, samanantare tīṇi, sahajāte nava, aññamaññe cha, nissaye nava, upanissaye tīṇi, purejāte tīṇi, āsevane ekaṁ, kamme nava …pe… avigate nava. (Evaṁ paccanīyagaṇanāpi kātabbā.)
2.2.4.4. Nissayavāra
Nissayavāropi paccayavārasadiso.
2.2.4.5. Saṁsaṭṭhavāra
(Saṁsaṭṭhavārepi sabbattha ekaṁ, saṅkhittaṁ. Avigatapaccayā, ekāyeva pañhā. Dvepi vārā kātabbā.)
2.2.4.7. Pañhāvāra
2.2.4.7.1. Paccayānuloma
Vibhaṅgavāra
Hetu
Appaṭigho dhammo appaṭighassa dhammassa hetupaccayena paccayo—appaṭighā hetū sampayuttakānaṁ khandhānaṁ appaṭighānañca cittasamuṭṭhānānaṁ rūpānaṁ hetupaccayena paccayo; paṭisandhikkhaṇe …pe….
Appaṭigho dhammo sappaṭighassa dhammassa hetupaccayena paccayo—appaṭighā hetū sappaṭighānaṁ cittasamuṭṭhānānaṁ rūpānaṁ hetupaccayena paccayo; paṭisandhikkhaṇe …pe….
Appaṭigho dhammo sappaṭighassa ca appaṭighassa ca dhammassa hetupaccayena paccayo—appaṭighā hetū sampayuttakānaṁ khandhānaṁ sappaṭighānañca appaṭighānañca cittasamuṭṭhānānaṁ rūpānaṁ hetupaccayena paccayo; paṭisandhikkhaṇe …pe….
Ārammaṇa
Sappaṭigho dhammo appaṭighassa dhammassa ārammaṇapaccayena paccayo— cakkhuṁ …pe… phoṭṭhabbe aniccato …pe… domanassaṁ uppajjati; dibbena cakkhunā rūpaṁ passati, dibbāya sotadhātuyā saddaṁ suṇāti. Rūpāyatanaṁ cakkhuviññāṇassa …pe… phoṭṭhabbāyatanaṁ kāyaviññāṇassa …pe… sappaṭighā khandhā iddhividhañāṇassa, pubbenivāsānussatiñāṇassa, anāgataṁsañāṇassa, āvajjanāya ārammaṇapaccayena paccayo.
Appaṭigho dhammo appaṭighassa dhammassa ārammaṇapaccayena paccayo—dānaṁ …pe… sīlaṁ …pe… uposathakammaṁ katvā taṁ paccavekkhati, pubbe suciṇṇāni paccavekkhati, jhānā vuṭṭhahitvā jhānaṁ paccavekkhati, ariyā maggā vuṭṭhahitvā maggaṁ paccavekkhanti, phalaṁ paccavekkhanti, nibbānaṁ paccavekkhanti; nibbānaṁ gotrabhussa, vodānassa, maggassa, phalassa, āvajjanāya ārammaṇapaccayena paccayo; ariyā pahīne kilese paccavekkhanti, vikkhambhite kilese paccavekkhanti, pubbe samudāciṇṇe kilese jānanti; vatthuṁ …pe… itthindriyaṁ … purisindriyaṁ … jīvitindriyaṁ … āpodhātuṁ, kabaḷīkāraṁ āhāraṁ aniccato …pe… domanassaṁ uppajjati; cetopariyañāṇena appaṭighacittasamaṅgissa cittaṁ jānāti, ākāsānañcāyatanaṁ viññāṇañcāyatanassa …pe… ākiñcaññāyatanaṁ nevasaññānāsaññāyatanassa …pe… appaṭighā khandhā iddhividhañāṇassa, cetopariyañāṇassa, pubbenivāsānussatiñāṇassa yathākammūpagañāṇassa, anāgataṁsañāṇassa, āvajjanāya ārammaṇapaccayena paccayo.
Adhipati
Sappaṭigho dhammo appaṭighassa dhammassa adhipatipaccayena paccayo. <b>Ārammaṇādhipati</b>—cakkhuṁ …pe… phoṭṭhabbe garuṁ katvā assādeti abhinandati, taṁ garuṁ katvā rāgo uppajjati, diṭṭhi uppajjati.
Appaṭigho dhammo appaṭighassa dhammassa adhipatipaccayena paccayo— ārammaṇādhipati, sahajātādhipati. <b>Ārammaṇādhipati</b>—dānaṁ …pe… sīlaṁ …pe… uposathakammaṁ katvā taṁ garuṁ katvā paccavekkhati, pubbe suciṇṇāni garuṁ katvā paccavekkhati, jhānā vuṭṭhahitvā jhānaṁ garuṁ katvā paccavekkhati, ariyā maggā vuṭṭhahitvā maggaṁ garuṁ katvā paccavekkhanti, phalaṁ garuṁ katvā paccavekkhanti, nibbānaṁ garuṁ katvā paccavekkhanti; nibbānaṁ gotrabhussa, vodānassa, maggassa, phalassa adhipatipaccayena paccayo; vatthuṁ …pe… itthindriyaṁ … purisindriyaṁ … jīvitindriyaṁ … āpodhātuṁ, kabaḷīkāraṁ āhāraṁ garuṁ katvā assādeti abhinandati, taṁ garuṁ katvā rāgo uppajjati, diṭṭhi uppajjati. <b>Sahajātādhipati</b>—appaṭighādhipati sampayuttakānaṁ khandhānaṁ appaṭighānañca cittasamuṭṭhānānaṁ rūpānaṁ adhipatipaccayena paccayo.
Appaṭigho dhammo sappaṭighassa dhammassa adhipatipaccayena paccayo. <b>Sahajātādhipati</b>—appaṭighādhipati sappaṭighānaṁ cittasamuṭṭhānānaṁ rūpānaṁ adhipatipaccayena paccayo.
Appaṭigho dhammo sappaṭighassa ca appaṭighassa ca dhammassa adhipatipaccayena paccayo. <b>Sahajātādhipati</b>—appaṭighādhipati sampayuttakānaṁ khandhānaṁ sappaṭighānañca appaṭighānañca cittasamuṭṭhānānaṁ rūpānaṁ adhipatipaccayena paccayo.
Anantara
Appaṭigho dhammo appaṭighassa dhammassa anantarapaccayena paccayo—purimā purimā appaṭighā khandhā …pe… phalasamāpattiyā anantarapaccayena paccayo.
Samanantara
Appaṭigho dhammo appaṭighassa dhammassa samanantarapaccayena paccayo …pe….
Sahajātādi
Sappaṭigho dhammo sappaṭighassa dhammassa sahajātapaccayena paccayo … nava … aññamaññapaccayena paccayo … cha … nissayapaccayena paccayo … nava.
Upanissaya
Sappaṭigho dhammo appaṭighassa dhammassa upanissayapaccayena paccayo— ārammaṇūpanissayo, pakatūpanissayo …pe…. <b>Pakatūpanissayo</b>—utuṁ, senāsanaṁ upanissāya dānaṁ deti …pe… saṅghaṁ bhindati; utu, senāsanaṁ saddhāya …pe… phalasamāpattiyā upanissayapaccayena paccayo.
Appaṭigho dhammo appaṭighassa dhammassa upanissayapaccayena paccayo— ārammaṇūpanissayo, anantarūpanissayo, pakatūpanissayo …pe…. <b>Pakatūpanissayo</b>—saddhaṁ upanissāya dānaṁ deti …pe… diṭṭhiṁ gaṇhāti; sīlaṁ …pe… kāyikaṁ sukhaṁ, kāyikaṁ dukkhaṁ, bhojanaṁ upanissāya dānaṁ deti …pe… saṅghaṁ bhindati; saddhā …pe… bhojanaṁ saddhāya …pe… phalasamāpattiyā upanissayapaccayena paccayo.
Purejāta
Sappaṭigho dhammo appaṭighassa dhammassa purejātapaccayena paccayo— ārammaṇapurejātaṁ, vatthupurejātaṁ. <b>Ārammaṇapurejātaṁ</b>—cakkhuṁ …pe… phoṭṭhabbe aniccato …pe… domanassaṁ uppajjati; dibbena cakkhunā rūpaṁ passati, dibbāya sotadhātuyā saddaṁ suṇāti, rūpāyatanaṁ cakkhuviññāṇassa …pe… phoṭṭhabbāyatanaṁ kāyaviññāṇassa purejātapaccayena paccayo. <b>Vatthupurejātaṁ</b>—cakkhāyatanaṁ cakkhuviññāṇassa …pe… kāyāyatanaṁ kāyaviññāṇassa purejātapaccayena paccayo.
Appaṭigho dhammo appaṭighassa dhammassa purejātapaccayena paccayo— ārammaṇapurejātaṁ, vatthupurejātaṁ. <b>Ārammaṇapurejātaṁ</b>—vatthuṁ …pe… itthindriyaṁ, purisindriyaṁ, jīvitindriyaṁ, āpodhātuṁ, kabaḷīkāraṁ āhāraṁ aniccato …pe… domanassaṁ uppajjati. <b>Vatthupurejātaṁ</b>—vatthu appaṭighānaṁ khandhānaṁ purejātapaccayena paccayo.
Sappaṭigho ca appaṭigho ca dhammā appaṭighassa dhammassa purejātapaccayena paccayo— <b>ārammaṇapurejātaṁ, vatthupurejātaṁ</b>. Cakkhāyatanañca vatthu ca …pe… phoṭṭhabbāyatanañca vatthu ca appaṭighānaṁ khandhānaṁ purejātapaccayena paccayo.
Pacchājāta
Appaṭigho dhammo appaṭighassa dhammassa pacchājātapaccayena paccayo— pacchājātā appaṭighā khandhā purejātassa imassa appaṭighassa kāyassa pacchājātapaccayena paccayo. (Mūlaṁ kātabbaṁ.) Pacchājātā appaṭighā khandhā purejātassa imassa sappaṭighassa kāyassa pacchājātapaccayena paccayo. (Mūlaṁ kātabbaṁ.) Pacchājātā appaṭighā khandhā purejātassa imassa sappaṭighassa ca appaṭighassa ca kāyassa pacchājātapaccayena paccayo. (Dvinnampi mūlā kātabbā.)
Āsevana
Appaṭigho dhammo appaṭighassa dhammassa āsevanapaccayena paccayo—purimā purimā appaṭighā khandhā …pe… vodānaṁ maggassa āsevanapaccayena paccayo.
Kamma