Naadhipati
Ācayagāmiṁ dhammaṁ paccayā ācayagāmī dhammo uppajjati naadhipatipaccayā … tīṇi.
Apacayagāmiṁ dhammaṁ paccayā apacayagāmī dhammo uppajjati naadhipatipaccayā— apacayagāmī khandhe paccayā apacayagāmī adhipati.
Nevācayagāmināpacayagāmiṁ dhammaṁ paccayā nevācayagāmināpacayagāmī dhammo uppajjati naadhipatipaccayā …pe… asaññasattānaṁ …pe… cakkhāyatanaṁ paccayā cakkhuviññāṇaṁ …pe… kāyāyatanaṁ paccayā kāyaviññāṇaṁ. Vatthuṁ paccayā nevācayagāmināpacayagāmī khandhā.
Nevācayagāmināpacayagāmiṁ dhammaṁ paccayā ācayagāmī dhammo uppajjati naadhipatipaccayā—vatthuṁ paccayā ācayagāmī khandhā.
Nevācayagāmināpacayagāmiṁ dhammaṁ paccayā apacayagāmī dhammo uppajjati naadhipatipaccayā—vatthuṁ paccayā apacayagāmī adhipati.
Nevācayagāmināpacayagāmiṁ dhammaṁ paccayā ācayagāmī ca nevācayagāmināpacayagāmī ca dhammā uppajjanti naadhipatipaccayā—vatthuṁ paccayā ācayagāmī khandhā, mahābhūte paccayā cittasamuṭṭhānaṁ rūpaṁ.
Ācayagāmiñca nevācayagāmināpacayagāmiñca dhammaṁ paccayā ācayagāmī dhammo uppajjati naadhipatipaccayā—ācayagāmiṁ ekaṁ khandhañca vatthuñca paccayā tayo khandhā …pe… dve khandhe …pe….
Ācayagāmiñca nevācayagāmināpacayagāmiñca dhammaṁ paccayā nevācayagāmināpacayagāmī dhammo uppajjati naadhipatipaccayā—ācayagāmī khandhe ca mahābhūte ca paccayā cittasamuṭṭhānaṁ rūpaṁ.
Ācayagāmiñca nevācayagāmināpacayagāmiñca dhammaṁ paccayā ācayagāmī ca nevācayagāmināpacayagāmī ca dhammā uppajjanti naadhipatipaccayā—ācayagāmiṁ ekaṁ khandhañca vatthuñca paccayā tayo khandhā …pe… dve khandhe …pe… ācayagāmī khandhe ca mahābhūte ca paccayā cittasamuṭṭhānaṁ rūpaṁ.
Apacayagāmiñca nevācayagāmināpacayagāmiñca dhammaṁ paccayā apacayagāmī dhammo uppajjati naadhipatipaccayā—apacayagāmī khandhe ca vatthuñca paccayā apacayagāmī adhipati.
Naanantarādi
Naanantarapaccayā … nasamanantarapaccayā … naaññamaññapaccayā … naupanissayapaccayā … napurejātapaccayā (paṭiccavārasadisā, satta pañhā) … napacchājātapaccayā. (Paripuṇṇaṁ.)
Naāsevana
Ācayagāmiṁ dhammaṁ paccayā ācayagāmī dhammo uppajjati naāsevanapaccayā … tīṇi.
Apacayagāmiṁ dhammaṁ paccayā nevācayagāmināpacayagāmī dhammo uppajjati naāsevanapaccayā—apacayagāmī khandhe paccayā cittasamuṭṭhānaṁ rūpaṁ.
Nevācayagāmināpacayagāmiṁ dhammaṁ paccayā nevācayagāmināpacayagāmī dhammo uppajjati naāsevanapaccayā—asaññasattānaṁ …pe… cakkhāyatanaṁ paccayā cakkhuviññāṇaṁ …pe… kāyāyatanaṁ paccayā kāyaviññāṇaṁ. Vatthuṁ paccayā nevācayagāmināpacayagāmī khandhā.
Nevācayagāmināpacayagāmiṁ dhammaṁ paccayā ācayagāmī dhammo uppajjati naāsevanapaccayā—vatthuṁ paccayā ācayagāmī khandhā.
Nevācayagāmināpacayagāmiṁ dhammaṁ paccayā ācayagāmī ca nevācayagāmināpacayagāmī ca dhammā uppajjanti naāsevanapaccayā—vatthuṁ paccayā ācayagāmī khandhā, mahābhūte paccayā cittasamuṭṭhānaṁ rūpaṁ.
Ācayagāmiñca nevācayagāmināpacayagāmiñca dhammaṁ paccayā ācayagāmī dhammo uppajjati naāsevanapaccayā—ācayagāmiṁ ekaṁ khandhañca vatthuñca paccayā tayo khandhā …pe… dve khandhe …pe….
Ācayagāmiñca nevācayagāmināpacayagāmiñca dhammaṁ paccayā nevācayagāmināpacayagāmī dhammo uppajjati naāsevanapaccayā—ācayagāmī khandhe ca mahābhūte ca paccayā cittasamuṭṭhānaṁ rūpaṁ.
Ācayagāmiñca nevācayagāmināpacayagāmiñca dhammaṁ paccayā ācayagāmī ca nevācayagāmināpacayagāmī ca dhammā uppajjanti naāsevanapaccayā—ācayagāmiṁ ekaṁ khandhañca vatthuñca paccayā tayo khandhā …pe… dve khandhe …pe… ācayagāmī khandhe ca mahābhūte ca paccayā cittasamuṭṭhānaṁ rūpaṁ.
Apacayagāmiñca nevācayagāmināpacayagāmiñca dhammaṁ paccayā nevācayagāmināpacayagāmī dhammo uppajjati naāsevanapaccayā—apacayagāmī khandhe ca mahābhūte ca paccayā cittasamuṭṭhānaṁ rūpaṁ.
Nakamma
Ācayagāmiṁ dhammaṁ paccayā ācayagāmī dhammo uppajjati nakammapaccayā— ācayagāmī khandhe paccayā ācayagāmī cetanā.
Apacayagāmiṁ dhammaṁ paccayā apacayagāmī dhammo uppajjati nakammapaccayā— apacayagāmī khandhe paccayā apacayagāmī cetanā.
Nevācayagāmināpacayagāmiṁ dhammaṁ paccayā nevācayagāmināpacayagāmī dhammo uppajjati nakammapaccayā—nevācayagāmināpacayagāmī khandhe paccayā nevācayagāmināpacayagāmī cetanā; bāhiraṁ … āhārasamuṭṭhānaṁ … utusamuṭṭhānaṁ …pe… vatthuṁ paccayā nevācayagāmināpacayagāmī cetanā.
Nevācayagāmināpacayagāmiṁ dhammaṁ paccayā ācayagāmī dhammo uppajjati nakammapaccayā—vatthuṁ paccayā ācayagāmī cetanā.
Nevācayagāmināpacayagāmiṁ dhammaṁ paccayā apacayagāmī dhammo uppajjati nakammapaccayā—vatthuṁ paccayā apacayagāmī cetanā.
Ācayagāmiñca nevācayagāmināpacayagāmiñca dhammaṁ paccayā ācayagāmī dhammo uppajjati nakammapaccayā—ācayagāmī khandhe ca vatthuñca paccayā ācayagāmī cetanā.
Apacayagāmiñca nevācayagāmināpacayagāmiñca dhammaṁ paccayā apacayagāmī dhammo uppajjati nakammapaccayā—apacayagāmī khandhe ca vatthuñca paccayā apacayagāmī cetanā.
Navipākādi
Ācayagāmiṁ dhammaṁ paccayā ācayagāmī dhammo uppajjati navipākapaccayā. (Paripuṇṇaṁ kātabbaṁ, paṭisandhikkhaṇe natthi.)
Nevācayagāmināpacayagāmiṁ dhammaṁ paccayā nevācayagāmināpacayagāmī dhammo uppajjati naāhārapaccayā—bāhiraṁ … utusamuṭṭhānaṁ … asaññasattānaṁ …pe… naindriyapaccayā—bāhiraṁ … āhārasamuṭṭhānaṁ … utusamuṭṭhānaṁ … asaññasattānaṁ …pe… mahābhūte paccayā rūpajīvitindriyaṁ … najhānapaccayā— pañcaviññāṇaṁ …pe… bāhiraṁ … āhārasamuṭṭhānaṁ … utusamuṭṭhānaṁ … asaññasattānaṁ …pe… cakkhāyatanaṁ paccayā cakkhuviññāṇaṁ …pe… kāyāyatanaṁ paccayā kāyaviññāṇaṁ …pe… namaggapaccayā—ahetukā nevācayagāmināpacayagāmī …pe… asaññasattānaṁ ekaṁ mahābhūtaṁ …pe… cakkhāyatanaṁ paccayā cakkhuviññāṇaṁ …pe… kāyāyatanaṁ paccayā kāyaviññāṇaṁ, vatthuṁ paccayā ahetukā nevācayagāmināpacayagāmī …pe… nasampayuttapaccayā … navippayuttapaccayā (paṭiccavārasadisaṁ, tīṇi) … nonatthipaccayā … novigatapaccayā.
Saṅkhyāvāra
Suddha
Nahetuyā cattāri, naārammaṇe pañca, naadhipatiyā dvādasa, naanantare pañca, nasamanantare naaññamaññe naupanissaye pañca, napurejāte satta, napacchājāte sattarasa, naāsevane ekādasa, nakamme satta, navipāke sattarasa, naāhāre naindriye najhāne namagge ekaṁ, nasampayutte pañca, navippayutte tīṇi, nonatthiyā novigate pañca. (Evaṁ gaṇetabbaṁ.)
Paccanīyaṁ.
1.11.3.3. Paccayānulomapaccanīya
Hetuduka
Hetupaccayā naārammaṇe pañca, naadhipatiyā dvādasa, naanantare nasamanantare naaññamaññe naupanissaye pañca, napurejāte satta, napacchājāte sattarasa, naāsevane ekādasa, nakamme satta, navipāke sattarasa, nasampayutte pañca, navippayutte tīṇi, nonatthiyā novigate pañca. (Evaṁ gaṇetabbaṁ.)
Anulomapaccanīyaṁ.
1.11.3.4. Paccayapaccanīyānuloma
Nahetuduka
Nahetupaccayā ārammaṇe cattāri, anantare samanantare sahajāte aññamaññe nissaye upanissaye purejāte āsevane kamme cattāri, vipāke ekaṁ, āhāre cattāri, indriye jhāne cattāri, magge tīṇi, sampayutte vippayutte atthiyā natthiyā vigate cattāri, avigate cattāri. (Evaṁ gaṇetabbaṁ.)
Paccanīyānulomaṁ.
Paccayavāro.
1.11.4. Nissayavāra
Nissayavāro paccayavārasadiso.
1.11.5. Saṁsaṭṭhavāra
1.11.5.1. Paccayānuloma
Vibhaṅgavāra
Hetu
Ācayagāmiṁ dhammaṁ saṁsaṭṭho ācayagāmī dhammo uppajjati hetupaccayā— ācayagāmiṁ ekaṁ khandhaṁ saṁsaṭṭhā tayo khandhā …pe… dve khandhe saṁsaṭṭhā dve khandhā.
Apacayagāmiṁ dhammaṁ saṁsaṭṭho apacayagāmī dhammo uppajjati hetupaccayā— apacayagāmiṁ ekaṁ khandhaṁ saṁsaṭṭhā tayo khandhā …pe… dve khandhe …pe….
Nevācayagāmināpacayagāmiṁ dhammaṁ saṁsaṭṭho nevācayagāmināpacayagāmī dhammo uppajjati hetupaccayā—nevācayagāmināpacayagāmiṁ ekaṁ khandhaṁ saṁsaṭṭhā tayo khandhā …pe… dve khandhe …pe… paṭisandhikkhaṇe …pe….
Ārammaṇādi
Ācayagāmiṁ dhammaṁ saṁsaṭṭho ācayagāmī dhammo uppajjati ārammaṇapaccayā … adhipatipaccayā … anantarapaccayā … samanantarapaccayā … sahajātapaccayā … aññamaññapaccayā … nissayapaccayā … upanissayapaccayā … purejātapaccayā … āsevanapaccayā … kammapaccayā … vipākapaccayā … āhārapaccayā … indriyapaccayā … jhānapaccayā … maggapaccayā … sampayuttapaccayā … vippayuttapaccayā … atthipaccayā … natthipaccayā … vigatapaccayā … avigatapaccayā.
Saṅkhyāvāra
Suddha
Hetuyā tīṇi, ārammaṇe adhipatiyā anantare samanantare sahajāte aññamaññe nissaye upanissaye purejāte āsevane kamme sabbattha tīṇi, vipāke ekaṁ, āhāre tīṇi, indriye jhāne magge sampayutte vippayutte atthiyā natthiyā vigate avigate tīṇi. (Evaṁ gaṇetabbaṁ.)
Anulomaṁ.
1.11.5.2. Paccayapaccanīya
Vibhaṅgavāra
Nahetu
Ācayagāmiṁ dhammaṁ saṁsaṭṭho ācayagāmī dhammo uppajjati nahetupaccayā— vicikicchāsahagate uddhaccasahagate khandhe saṁsaṭṭho vicikicchāsahagato uddhaccasahagato moho.
Nevācayagāmināpacayagāmiṁ dhammaṁ saṁsaṭṭho nevācayagāmināpacayagāmī dhammo uppajjati nahetupaccayā—ahetukaṁ nevācayagāmināpacayagāmiṁ ekaṁ khandhaṁ saṁsaṭṭhā tayo khandhā …pe… dve khandhe …pe… ahetukapaṭisandhikkhaṇe …pe….
Naadhipatyādi
Ācayagāmiṁ dhammaṁ saṁsaṭṭho ācayagāmī dhammo uppajjati naadhipatipaccayā … napurejātapaccayā … napacchājātapaccayā … naāsevanapaccayā … ācayagāmiṁ ekaṁ khandhaṁ saṁsaṭṭhā tayo khandhā …pe… dve khandhe …pe….
Nevācayagāmināpacayagāmiṁ dhammaṁ saṁsaṭṭho nevācayagāmināpacayagāmī dhammo uppajjati naāsevanapaccayā—nevācayagāmināpacayagāmiṁ ekaṁ khandhaṁ saṁsaṭṭhā …pe… paṭisandhikkhaṇe …pe… nakammapaccayā … navipākapaccayā … najhānapaccayā … namaggapaccayā … navippayuttapaccayā.
Saṅkhyāvāra
Suddha
Nahetuyā dve, naadhipatiyā tīṇi, napurejāte tīṇi, napacchājāte tīṇi, naāsevane dve, nakamme tīṇi, navipāke tīṇi, najhāne ekaṁ, namagge ekaṁ, navippayutte tīṇi. (Evaṁ gaṇetabbaṁ.)
Paccanīyaṁ.
1.11.5.3. Paccayānulomapaccanīya
Hetupaccayā naadhipatiyā tīṇi, napurejāte tīṇi, napacchājāte tīṇi, naāsevane dve, nakamme tīṇi, navipāke tīṇi, navippayutte tīṇi. (Evaṁ gaṇetabbaṁ.)
Anulomapaccanīyaṁ.
1.11.5.4. Paccayapaccanīyānuloma
Nahetupaccayā ārammaṇe dve, anantare samanantare sahajāte aññamaññe nissaye upanissaye purejāte āsevane kamme sabbattha dve, vipāke ekaṁ, āhāre dve, indriye dve, jhāne dve, magge ekaṁ, sampayutte dve, vippayutte atthiyā natthiyā vigate avigate dve (evaṁ gaṇetabbaṁ.)
Paccanīyānulomaṁ.
Saṁsaṭṭhavāro.
1.11.6. Sampayuttavāra
Sampayuttavāro saṁsaṭṭhavārasadiso.
1.11.7. Pañhāvāra
1.11.7.1. Paccayānuloma
Vibhaṅgavāra
Hetu
Ācayagāmī dhammo ācayagāmissa dhammassa hetupaccayena paccayo—ācayagāmī hetū sampayuttakānaṁ khandhānaṁ hetupaccayena paccayo.
Ācayagāmī dhammo nevācayagāmināpacayagāmissa dhammassa hetupaccayena paccayo— ācayagāmī hetū cittasamuṭṭhānānaṁ rūpānaṁ hetupaccayena paccayo.
Ācayagāmī dhammo ācayagāmissa ca nevācayagāmināpacayagāmissa ca dhammassa hetupaccayena paccayo—ācayagāmī hetū sampayuttakānaṁ khandhānaṁ cittasamuṭṭhānānañca rūpānaṁ hetupaccayena paccayo.
Apacayagāmī dhammo apacayagāmissa dhammassa hetupaccayena paccayo … tīṇi.
Nevācayagāmināpacayagāmī dhammo nevācayagāmināpacayagāmissa dhammassa hetupaccayena paccayo—nevācayagāmināpacayagāmī hetū sampayuttakānaṁ khandhānaṁ cittasamuṭṭhānānañca rūpānaṁ hetupaccayena paccayo. Paṭisandhikkhaṇe nevācayagāmināpacayagāmī hetū sampayuttakānaṁ khandhānaṁ kaṭattā ca rūpānaṁ hetupaccayena paccayo.
Ārammaṇa
Ācayagāmī dhammo ācayagāmissa dhammassa ārammaṇapaccayena paccayo—dānaṁ datvā sīlaṁ samādiyitvā uposathakammaṁ katvā taṁ paccavekkhati, pubbe suciṇṇāni paccavekkhati, jhānā vuṭṭhahitvā jhānaṁ paccavekkhati. Sekkhā pahīne kilese paccavekkhanti, vikkhambhite kilese paccavekkhanti, pubbe samudāciṇṇe kilese jānanti. Sekkhā vā puthujjanā vā ācayagāmī khandhe aniccato dukkhato anattato vipassanti, assādenti abhinandanti, taṁ ārabbha rāgo uppajjati, diṭṭhi …pe… vicikicchā …pe… uddhaccaṁ …pe… domanassaṁ uppajjati, cetopariyañāṇena ācayagāmicittasamaṅgissa cittaṁ jānanti, ākāsānañcāyatanakusalaṁ viññāṇañcāyatanakusalassa ārammaṇapaccayena paccayo. Ākiñcaññāyatanakusalaṁ nevasaññānāsaññāyatanakusalassa …pe… ācayagāmī khandhā iddhividhañāṇassa, cetopariyañāṇassa, pubbenivāsānussatiñāṇassa, yathākammūpagañāṇassa, anāgataṁsañāṇassa ārammaṇapaccayena paccayo.
Ācayagāmī dhammo nevācayagāmināpacayagāmissa dhammassa ārammaṇapaccayena paccayo—arahā pahīne kilese paccavekkhati, pubbe samudāciṇṇe kilese jānāti, ācayagāmī khandhe aniccato dukkhato anattato vipassati; cetopariyañāṇena ācayagāmicittasamaṅgissa cittaṁ jānāti. Sekkhā vā puthujjanā vā ācayagāmī khandhe aniccato dukkhato anattato vipassanti, kusale niruddhe vipāko tadārammaṇatā uppajjati, ācayagāmī khandhe assādeti abhinandati, taṁ ārabbha rāgo uppajjati …pe… domanassaṁ uppajjati, akusale niruddhe vipāko tadārammaṇatā uppajjati, ākāsānañcāyatanakusalaṁ viññāṇañcāyatanavipākassa ca kiriyassa ca ārammaṇapaccayena paccayo. Ākiñcaññāyatanakusalaṁ nevasaññānāsaññāyatanavipākassa ca kiriyassa ca ārammaṇapaccayena paccayo. Ācayagāmī khandhā cetopariyañāṇassa, pubbenivāsānussatiñāṇassa, yathākammūpagañāṇassa, anāgataṁsañāṇassa, āvajjanāya ārammaṇapaccayena paccayo.
Apacayagāmī dhammo ācayagāmissa dhammassa ārammaṇapaccayena paccayo—sekkhā maggā vuṭṭhahitvā maggaṁ paccavekkhanti, cetopariyañāṇena apacayagāmicittasamaṅgissa cittaṁ jānanti, apacayagāmī khandhā cetopariyañāṇassa, pubbenivāsānussatiñāṇassa, anāgataṁsañāṇassa, ārammaṇapaccayena paccayo.
Apacayagāmī dhammo nevācayagāmināpacayagāmissa dhammassa ārammaṇapaccayena paccayo—arahā maggā vuṭṭhahitvā maggaṁ paccavekkhati, cetopariyañāṇena apacayagāmicittasamaṅgissa cittaṁ jānāti, apacayagāmī khandhā cetopariyañāṇassa, pubbenivāsānussatiñāṇassa, anāgataṁsañāṇassa, āvajjanāya ārammaṇapaccayena paccayo.
Nevācayagāmināpacayagāmī dhammo nevācayagāmināpacayagāmissa dhammassa ārammaṇapaccayena paccayo—arahā phalaṁ paccavekkhati, nibbānaṁ paccavekkhati, nibbānaṁ phalassa āvajjanāya ārammaṇapaccayena paccayo. Arahā cakkhuṁ aniccato dukkhato anattato vipassati, sotaṁ …pe… vatthuṁ … nevācayagāmināpacayagāmī khandhe aniccato dukkhato anattato vipassati, dibbena cakkhunā rūpaṁ passati, dibbāya sotadhātuyā saddaṁ suṇāti, cetopariyañāṇena nevācayagāmināpacayagāmicittasamaṅgissa cittaṁ jānāti, ākāsānañcāyatanakiriyaṁ viññāṇañcāyatanakiriyassa ārammaṇapaccayena paccayo. Ākiñcaññāyatanakiriyaṁ nevasaññānāsaññāyatanakiriyassa …pe… rūpāyatanaṁ cakkhuviññāṇassa …pe… phoṭṭhabbāyatanaṁ kāyaviññāṇassa …pe… nevācayagāmināpacayagāmī khandhā iddhividhañāṇassa, cetopariyañāṇassa, pubbenivāsānussatiñāṇassa, anāgataṁsañāṇassa āvajjanāya ārammaṇapaccayena paccayo.
Nevācayagāmināpacayagāmī dhammo ācayagāmissa dhammassa ārammaṇapaccayena paccayo—sekkhā phalaṁ paccavekkhanti, nibbānaṁ paccavekkhanti, nibbānaṁ gotrabhussa, vodānassa ārammaṇapaccayena paccayo. Sekkhā vā puthujjanā vā cakkhuṁ aniccato dukkhato anattato vipassanti, assādenti abhinandanti; taṁ ārabbha rāgo uppajjati …pe… domanassaṁ uppajjati. Sotaṁ …pe… vatthuṁ … nevācayagāmināpacayagāmī khandhe aniccato dukkhato anattato vipassanti, assādenti abhinandanti; taṁ ārabbha rāgo uppajjati, diṭṭhi uppajjati, vicikicchā …pe… uddhaccaṁ …pe… domanassaṁ …pe… dibbena cakkhunā rūpaṁ passanti, dibbāya sotadhātuyā saddaṁ suṇanti, cetopariyañāṇena nevācayagāmināpacayagāmicittasamaṅgissa cittaṁ jānanti, nevācayagāmināpacayagāmī khandhā iddhividhañāṇassa, cetopariyañāṇassa, pubbenivāsānussatiñāṇassa, anāgataṁsañāṇassa ārammaṇapaccayena paccayo.
Nevācayagāmināpacayagāmī dhammo apacayagāmissa dhammassa ārammaṇapaccayena paccayo—nibbānaṁ maggassa ārammaṇapaccayena paccayo.