Kathāvatthu
Mahāpaṇṇāsaka
Catutthavagga
Upekkhāsamannāgatakathā
Arahā chahi upekkhāhi samannāgatoti?
Āmantā.
Arahā chahi phassehi, chahi vedanāhi, chahi saññāhi …pe… chahi paññāhi samannāgatoti?
Na hevaṁ vattabbe …pe….
Arahā chahi upekkhāhi samannāgatoti?
Āmantā.
Arahā cakkhunā rūpaṁ passanto sotena saddaṁ suṇāti, ghānena gandhaṁ ghāyati, jivhāya rasaṁ sāyati, kāyena phoṭṭhabbaṁ phusati, manasā dhammaṁ vijānāti …pe…
manasā dhammaṁ vijānanto cakkhunā rūpaṁ passati, sotena saddaṁ suṇāti, ghānena gandhaṁ ghāyati, jivhāya rasaṁ sāyati, kāyena phoṭṭhabbaṁ phusatīti?
Na hevaṁ vattabbe …pe….
Arahā chahi upekkhāhi samannāgatoti?
Āmantā.
Satataṁ samitaṁ abbokiṇṇaṁ chahi upekkhāhi samannāgato samohito, cha upekkhāyo paccupaṭṭhitāti?
Na hevaṁ vattabbe …pe….
Na vattabbaṁ—
“arahā chahi upekkhāhi samannāgato”ti?
Āmantā.
Nanu arahā chaḷaṅgupekkhoti?
Āmantā.
Hañci arahā chaḷaṅgupekkho, tena vata re vattabbe—
“arahā chahi upekkhāhi samannāgato”ti …pe….
Upekkhāsamannāgatakathā niṭṭhitā.
Kathāvatthu
Mahāpaṇṇāsaka
Catutthavagga
Bodhiyābuddhotikathā
Bodhiyā buddhoti?
Āmantā.
Bodhiyā niruddhāya vigatāya paṭipassaddhāya abuddho hotīti?
Na hevaṁ vattabbe …pe….
Bodhiyā buddhoti?
Āmantā.
Atītāya bodhiyā buddhoti?
Na hevaṁ vattabbe …pe…
atītāya bodhiyā buddhoti?
Āmantā.
Tāya bodhiyā bodhikaraṇīyaṁ karotīti?
Na hevaṁ vattabbe …pe….
Tāya bodhiyā bodhikaraṇīyaṁ karotīti?
Āmantā.
Tāya bodhiyā dukkhaṁ parijānāti, samudayaṁ pajahati, nirodhaṁ sacchikaroti, maggaṁ bhāvetīti?
Na hevaṁ vattabbe …pe….
Bodhiyā buddhoti?
Āmantā.
Anāgatāya bodhiyā buddhoti?
Na hevaṁ vattabbe …pe….
Anāgatāya bodhiyā buddhoti?
Āmantā.
Tāya bodhiyā bodhikaraṇīyaṁ karotīti?
Na hevaṁ vattabbe …pe….
Tāya bodhiyā bodhikaraṇīyaṁ karotīti?
Āmantā.
Tāya bodhiyā dukkhaṁ parijānāti …pe… maggaṁ bhāvetīti?
Na hevaṁ vattabbe …pe….
Paccuppannāya bodhiyā buddho, tāya bodhiyā bodhikaraṇīyaṁ karotīti?
Āmantā.
Atītāya bodhiyā buddho, tāya bodhiyā bodhikaraṇīyaṁ karotīti?
Na hevaṁ vattabbe …pe….
Paccuppannāya bodhiyā buddho, tāya bodhiyā dukkhaṁ parijānāti, samudayaṁ pajahati, nirodhaṁ sacchikaroti, maggaṁ bhāvetīti?
Āmantā.
Atītāya bodhiyā buddho, tāya bodhiyā dukkhaṁ parijānāti …pe… maggaṁ bhāvetīti?
Na hevaṁ vattabbe …pe….
Paccuppannāya bodhiyā buddho, tāya bodhiyā bodhikaraṇīyaṁ karotīti?
Āmantā.
Anāgatāya bodhiyā buddho, tāya bodhiyā bodhikaraṇīyaṁ karotīti?
Na hevaṁ vattabbe …pe….
Paccuppannāya bodhiyā buddho, tāya bodhiyā dukkhaṁ parijānāti …pe… maggaṁ bhāvetīti?
Āmantā.
Anāgatāya bodhiyā buddho, tāya bodhiyā dukkhaṁ parijānāti …pe… maggaṁ bhāvetīti?
Na hevaṁ vattabbe …pe….
Atītāya bodhiyā buddho, na ca tāya bodhiyā bodhikaraṇīyaṁ karotīti?
Āmantā.
Paccuppannāya bodhiyā buddho, na ca tāya bodhiyā bodhikaraṇīyaṁ karotīti?
Na hevaṁ vattabbe …pe….
Atītāya bodhiyā buddho, na ca tāya bodhiyā dukkhaṁ parijānāti …pe… maggaṁ bhāvetīti?
Āmantā.
Paccuppannāya bodhiyā buddho, na ca tāya bodhiyā dukkhaṁ parijānāti …pe… maggaṁ bhāvetīti?
Na hevaṁ vattabbe …pe….
Anāgatāya bodhiyā buddho, na ca tāya bodhiyā bodhikaraṇīyaṁ karotīti?
Āmantā.
Paccuppannāya bodhiyā buddho, na ca tāya bodhiyā bodhikaraṇīyaṁ karotīti?
Na hevaṁ vattabbe …pe….
Anāgatāya bodhiyā buddho, na ca tāya bodhiyā dukkhaṁ parijānāti …pe… maggaṁ bhāvetīti?
Āmantā.
Paccuppannāya bodhiyā buddho, na ca tāya bodhiyā dukkhaṁ parijānāti …pe… maggaṁ bhāvetīti?
Na hevaṁ vattabbe …pe….
Atītāya bodhiyā buddho, anāgatāya bodhiyā buddho, paccuppannāya bodhiyā buddhoti?
Āmantā.
Tīhi bodhīhi buddhoti?
Na hevaṁ vattabbe …pe….
Tīhi bodhīhi buddhoti?
Āmantā.
Satataṁ samitaṁ abbokiṇṇaṁ tīhi bodhīhi samannāgato samohito, tisso bodhiyo paccupaṭṭhitāti?
Na hevaṁ vattabbe …pe….
Na vattabbaṁ—
“bodhiyā buddho”ti?
Āmantā.