Sotāpattiphalena samannāgato “sotāpanno”ti vattabboti?
Āmantā.
Sakadāgāmī sotāpattiphalena samannāgatoti?
Āmantā.
Sveva sakadāgāmī, so sotāpannoti?
Na hevaṁ vattabbe …pe….
Arahā sotāpattiphalena samannāgatoti?
Āmantā.
Nanu arahā sotāpattiphalaṁ vītivattoti?
Āmantā.
Hañci arahā sotāpattiphalaṁ vītivatto, no ca vata re vattabbe—
“arahā sotāpattiphalena samannāgato”ti.
Arahā sotāpattiphalaṁ vītivatto tena samannāgatoti?
Āmantā.
Arahā sotāpattimaggaṁ vītivatto, sakkāyadiṭṭhiṁ vicikicchaṁ sīlabbataparāmāsaṁ, apāyagamanīyaṁ rāgaṁ, apāyagamanīyaṁ dosaṁ, apāyagamanīyaṁ mohaṁ vītivatto tena samannāgatoti?
Na hevaṁ vattabbe …pe….
Arahā sakadāgāmiphalena samannāgatoti?
Āmantā.
Nanu arahā sakadāgāmiphalaṁ vītivattoti?
Āmantā.
Hañci arahā sakadāgāmiphalaṁ vītivatto, no ca vata re vattabbe—
“arahā sakadāgāmiphalena samannāgato”ti.
Arahā sakadāgāmiphalaṁ vītivatto tena samannāgatoti?
Āmantā.
Arahā sakadāgāmimaggaṁ vītivatto, oḷārikaṁ kāmarāgaṁ, oḷārikaṁ byāpādaṁ vītivatto tena samannāgatoti?
Na hevaṁ vattabbe …pe….
Arahā anāgāmiphalena samannāgatoti?
Āmantā.
Nanu arahā anāgāmiphalaṁ vītivattoti?
Āmantā.
Hañci arahā anāgāmiphalaṁ vītivatto, no ca vata re vattabbe—
“arahā anāgāmiphalena samannāgato”ti.
Arahā anāgāmiphalaṁ vītivatto tena samannāgatoti?
Āmantā.
Arahā anāgāmimaggaṁ vītivatto, aṇusahagataṁ kāmarāgaṁ, aṇusahagataṁ byāpādaṁ vītivatto tena samannāgatoti?
Na hevaṁ vattabbe …pe….
Anāgāmī sotāpattiphalena samannāgatoti?
Āmantā.
Nanu anāgāmī sotāpattiphalaṁ vītivattoti?
Āmantā.
Hañci anāgāmī sotāpattiphalaṁ vītivatto, no ca vata re vattabbe—
“anāgāmī sotāpattiphalena samannāgato”ti.
Anāgāmī sotāpattiphalaṁ vītivatto tena samannāgatoti?
Āmantā.
Anāgāmī sotāpattimaggaṁ vītivatto, sakkāyadiṭṭhiṁ …pe… apāyagamanīyaṁ mohaṁ vītivatto tena samannāgatoti?
Na hevaṁ vattabbe …pe….
Anāgāmī sakadāgāmiphalena samannāgatoti?
Āmantā.
Nanu anāgāmī sakadāgāmiphalaṁ vītivattoti?
Āmantā.
Hañci anāgāmī sakadāgāmiphalaṁ vītivatto, no ca vata re vattabbe—
“anāgāmī sakadāgāmiphalena samannāgato”ti.
Anāgāmī sakadāgāmiphalaṁ vītivatto tena samannāgatoti?
Āmantā.
Anāgāmī sakadāgāmimaggaṁ vītivatto, oḷārikaṁ kāmarāgaṁ, oḷārikaṁ byāpādaṁ vītivatto tena samannāgatoti?
Na hevaṁ vattabbe …pe….
Sakadāgāmī sotāpattiphalena samannāgatoti?
Āmantā.
Nanu sakadāgāmī sotāpattiphalaṁ vītivattoti?
Āmantā.
Hañci sakadāgāmī sotāpattiphalaṁ vītivatto, no ca vata re vattabbe—
“sakadāgāmī sotāpattiphalena samannāgato”ti.
Sakadāgāmī sotāpattiphalaṁ vītivatto tena samannāgatoti?
Āmantā.
Sakadāgāmī sotāpattimaggaṁ vītivatto, sakkāyadiṭṭhiṁ …pe… apāyagamanīyaṁ mohaṁ vītivatto tena samannāgatoti?
Na hevaṁ vattabbe …pe….
Na vattabbaṁ—
“arahā catūhi phalehi samannāgato”ti?
Āmantā.
Nanu arahatā cattāri phalāni paṭiladdhāni tehi ca aparihīnoti?
Āmantā.
Hañci arahatā cattāri phalāni paṭiladdhāni tehi ca aparihīno, tena vata re vattabbe—
“arahā catūhi phalehi samannāgato”ti.
Na vattabbaṁ—
“anāgāmī tīhi phalehi samannāgato”ti?
Āmantā.
Nanu anāgāminā tīṇi phalāni paṭiladdhāni tehi ca aparihīnoti?
Āmantā.
Hañci anāgāminā tīṇi phalāni paṭiladdhāni tehi ca aparihīno, tena vata re vattabbe—
“anāgāmī tīhi phalehi samannāgato”ti.
Na vattabbaṁ—
“sakadāgāmī dvīhi phalehi samannāgato”ti?
Āmantā.
Nanu sakadāgāminā dve phalāni paṭiladdhāni tehi ca aparihīnoti?
Āmantā.
Hañci sakadāgāminā dve phalāni paṭiladdhāni tehi ca aparihīno, tena vata re vattabbe—
“sakadāgāmī dvīhi phalehi samannāgato”ti.
Arahatā cattāri phalāni paṭiladdhāni tehi ca aparihīnoti, arahā catūhi phalehi samannāgatoti?
Āmantā.
Arahatā cattāro maggā paṭiladdhā tehi ca aparihīnoti, arahā catūhi maggehi samannāgatoti?
Na hevaṁ vattabbe …pe….
Anāgāminā tīṇi phalāni paṭiladdhāni tehi ca aparihīnoti, anāgāmī tīhi phalehi samannāgatoti?
Āmantā.
Anāgāminā tayo maggā paṭiladdhā tehi ca aparihīnoti, anāgāmī tīhi maggehi samannāgatoti?
Na hevaṁ vattabbe …pe….
Sakadāgāminā dve phalāni paṭiladdhāni tehi ca aparihīnoti, sakadāgāmī dvīhi phalehi samannāgatoti?
Āmantā.
Sakadāgāminā dve maggā paṭiladdhā tehi ca aparihīnoti, sakadāgāmī dvīhi maggehi samannāgatoti?
Na hevaṁ vattabbe …pe….
Samannāgatakathā niṭṭhitā.