Na hevaṁ vattabbe …pe…
natthi arahato gihisaṁyojananti?
Āmantā.
Hañci natthi arahato gihisaṁyojanaṁ, no ca vata re vattabbe—
“gihi’ssa arahā”ti.
Gihi’ssa arahāti?
Āmantā.
Nanu arahato gihisaṁyojanaṁ pahīnaṁ ucchinnamūlaṁ tālāvatthukataṁ anabhāvaṅkataṁ āyatiṁ anuppādadhammanti?
Āmantā.
Hañci arahato gihisaṁyojanaṁ pahīnaṁ ucchinnamūlaṁ tālāvatthukataṁ anabhāvaṅkataṁ āyatiṁ anuppādadhammaṁ, no ca vata re vattabbe—
“gihi’ssa arahā”ti.
Gihi’ssa arahāti?
Āmantā.
Atthi koci gihī gihisaṁyojanaṁ appahāya diṭṭheva dhamme dukkhassantakaroti?
Natthi.
Hañci natthi koci gihī gihisaṁyojanaṁ appahāya diṭṭheva dhamme dukkhassantakaro, no ca vata re vattabbe—
“gihi’ssa arahā”ti.
Gihi’ssa arahāti?
Āmantā.
Nanu vacchagotto paribbājako bhagavantaṁ etadavoca—
“atthi nu kho, bho gotama, koci gihī gihisaṁyojanaṁ appahāya kāyassa bhedā dukkhassantakaro”ti?
“Natthi kho, vaccha, koci gihī gihisaṁyojanaṁ appahāya kāyassa bhedā dukkhassantakaro”ti.
Attheva suttantoti?
Āmantā.
Tena hi na vattabbaṁ—
“gihi’ssa arahā”ti.
Gihi’ssa arahāti?
Āmantā.
Arahā methunaṁ dhammaṁ paṭiseveyya, methunaṁ uppādeyya, puttasambādhasayanaṁ ajjhāvaseyya, kāsikacandanaṁ paccanubhaveyya, mālāgandhavilepanaṁ dhāreyya, jātarūparajataṁ sādiyeyya, ajeḷakaṁ paṭiggaṇheyya, kukkuṭasūkaraṁ paṭiggaṇheyya, hatthigavassavaḷavaṁ paṭiggaṇheyya, tittiravaṭṭakamorakapiñjaraṁ paṭiggaṇheyya, cittavaṇḍavālamoḷiṁ dhāreyya, odātāni vatthāni dīghadasāni dhāreyya, yāvajīvaṁ agāriyabhūto assāti?
Na hevaṁ vattabbe …pe….
Na vattabbaṁ—
“gihi’ssa arahā”ti?
Āmantā.
Nanu yaso kulaputto, uttiyo gahapati, setu māṇavo, gihibyañjanena arahattaṁ pattoti?
Āmantā.
Hañci yaso kulaputto, uttiyo gahapati, setu māṇavo, gihibyañjanena arahattaṁ patto, tena vata re vattabbe—
“gihi’ssa arahā”ti.
Gihi’ssa arahātikathā niṭṭhitā.
Kathāvatthu
Mahāpaṇṇāsaka
Catutthavagga
Upapattikathā
Saha upapattiyā arahāti?
Āmantā.
Saha upapattiyā sotāpanno hotīti?
Na hevaṁ vattabbe …pe….
Saha upapattiyā arahāti?
Āmantā.
Saha upapattiyā sakadāgāmī hotīti?
Na hevaṁ vattabbe …pe….
Saha upapattiyā arahāti?
Āmantā.
Saha upapattiyā anāgāmī hotīti?
Na hevaṁ vattabbe …pe….
Saha upapattiyā sotāpanno na hotīti?
Āmantā.
Hañci saha upapattiyā sotāpanno na hoti, no ca vata re vattabbe—
“saha upapattiyā arahā”ti.
Saha upapattiyā sakadāgāmī na hotīti?
Āmantā.
Hañci saha upapattiyā sakadāgāmī na hoti, no ca vata re vattabbe—
“saha upapattiyā arahā”ti.
Saha upapattiyā anāgāmī na hotīti?
Āmantā.
Hañci saha upapattiyā anāgāmī na hoti, no ca vata re vattabbe—
“saha upapattiyā arahā”ti.
Saha upapattiyā arahāti?
Āmantā.
Sāriputto thero saha upapattiyā arahāti?
Na hevaṁ vattabbe.
Mahāmoggallāno thero …pe…
mahākassapo thero …pe…
mahākaccāno thero …pe…
mahākoṭṭhiko thero …pe…
mahāpanthako thero saha upapattiyā arahāti?
Na hevaṁ vattabbe …pe….
Sāriputto thero na saha upapattiyā arahāti?
Āmantā.
Hañci sāriputto thero na saha upapattiyā arahā, no ca vata re vattabbe—
“saha upapattiyā arahā”ti.
Mahāmoggallāno thero …pe…
mahākassapo thero …pe…
mahākaccāno thero …pe…
mahākoṭṭhiko thero …pe…
mahāpanthako thero na saha upapattiyā arahāti?
Āmantā.
Hañci mahāpanthako thero na saha upapattiyā arahā, no ca vata re vattabbe—
“saha upapattiyā arahā”ti.
Saha upapattiyā arahāti?
Āmantā.
Upapattesiyena cittena arahattaṁ sacchikaroti lokiyena sāsavena …pe… saṅkilesiyenāti?
Na hevaṁ vattabbe …pe….
Saha upapattiyā arahāti?
Āmantā.
Upapattesiyaṁ cittaṁ niyyānikaṁ khayagāmī bodhagāmī apacayagāmī anāsavaṁ …pe…
asaṅkilesiyanti?
Na hevaṁ vattabbe …pe….
Nanu upapattesiyaṁ cittaṁ aniyyānikaṁ na khayagāmi na bodhagāmi na apacayagāmi sāsavaṁ …pe…
saṅkilesiyanti?
Āmantā.