Attheva suttantoti?
Āmantā.
Tena hi na vattabbaṁ—
“yathākammūpagataṁ ñāṇaṁ dibbacakkhun”ti.
Yathākammūpagatañāṇakathā niṭṭhitā.
Kathāvatthu
Mahāpaṇṇāsaka
Tatiyavagga
Saṁvarakathā
Atthi devesu saṁvaroti?
Āmantā.
Atthi devesu asaṁvaroti?
Na hevaṁ vattabbe …pe….
Natthi devesu asaṁvaroti?
Āmantā.
Natthi devesu saṁvaroti?
Na hevaṁ vattabbe …pe….
Nanu asaṁvarā saṁvaro sīlaṁ, atthi devesu saṁvaroti?
Āmantā.
Atthi devesu asaṁvaro, yamhā asaṁvarā saṁvaro sīlanti?
Na hevaṁ vattabbe …pe….
Ājānāhi niggahaṁ.
Hañci asaṁvarā saṁvaro sīlaṁ, atthi devesu saṁvaro, tena vata re vattabbe—
“atthi devesu asaṁvaro, yamhā asaṁvarā saṁvaro sīlan”ti.
Yaṁ tattha vadesi—
“vattabbe kho—
‘asaṁvarā saṁvaro sīlaṁ, atthi devesu saṁvaro’, no ca vattabbe—
‘atthi devesu asaṁvaro, yamhā asaṁvarā saṁvaro sīlan’”ti micchā.
No ce pana vattabbe—
“atthi devesu asaṁvaro, yamhā asaṁvarā saṁvaro sīlan”ti, no ca vata re vattabbe—
“asaṁvarā saṁvaro sīlaṁ, atthi devesu saṁvaro”ti.
Yaṁ tattha vadesi—
“vattabbe kho ‘asaṁvarā saṁvaro sīlaṁ, atthi devesu saṁvaro’, no ca vattabbe—
‘atthi devesu asaṁvaro, yamhā asaṁvarā saṁvaro sīlan’”ti micchā.
Atthi manussesu saṁvaro, atthi tattha asaṁvaroti?
Āmantā.
Atthi devesu saṁvaro, atthi tattha asaṁvaroti?
Na hevaṁ vattabbe …pe….
Atthi devesu saṁvaro, natthi tattha asaṁvaroti?
Āmantā.
Atthi manussesu saṁvaro, natthi tattha asaṁvaroti?
Na hevaṁ vattabbe …pe….
Atthi devesu pāṇātipātā veramaṇīti?
Āmantā.
Atthi devesu pāṇātipātoti?
Na hevaṁ vattabbe …pe….
Atthi devesu surāmerayamajjapamādaṭṭhānā veramaṇīti?
Āmantā.
Atthi devesu surāmerayamajjapamādaṭṭhānanti?
Na hevaṁ vattabbe …pe….
Natthi devesu pāṇātipātoti?
Āmantā.
Natthi devesu pāṇātipātā veramaṇīti?
Na hevaṁ vattabbe …pe….
Natthi devesu surāmerayamajjapamādaṭṭhānanti?
Āmantā.
Natthi devesu surāmerayamajjapamādaṭṭhānā veramaṇīti?
Na hevaṁ vattabbe …pe….
Atthi manussesu pāṇātipātā veramaṇi, atthi tattha pāṇātipātoti?
Āmantā.
Atthi devesu pāṇātipātā veramaṇi, atthi tattha pāṇātipātoti?
Na hevaṁ vattabbe …pe….
Atthi manussesu surāmerayamajjapamādaṭṭhānā veramaṇi, atthi tattha surāmerayamajjapamādaṭṭhānanti?
Āmantā.
Atthi devesu surāmerayamajjapamādaṭṭhānā veramaṇi, atthi tattha surāmerayamajjapamādaṭṭhānanti?
Na hevaṁ vattabbe …pe….
Atthi devesu pāṇātipātā veramaṇi, natthi tattha pāṇātipātoti?
Āmantā.
Atthi manussesu pāṇātipātā veramaṇi, natthi tattha pāṇātipātoti?
Na hevaṁ vattabbe …pe….
Atthi devesu surāmerayamajjapamādaṭṭhānā veramaṇi, natthi tattha surāmerayamajjapamādaṭṭhānanti?
Āmantā.
Atthi manussesu surāmerayamajjapamādaṭṭhānā veramaṇi, natthi tattha surāmerayamajjapamādaṭṭhānanti?
Na hevaṁ vattabbe …pe….
Natthi devesu saṁvaroti?
Āmantā.
Sabbe devā pāṇātipātino adinnādāyino kāmesumicchācārino musāvādino surāmerayamajjapamādaṭṭhāyinoti?
Na hevaṁ vattabbe …pe…
tena hi atthi devesu saṁvaroti.
Saṁvarakathā niṭṭhitā.
Kathāvatthu
Mahāpaṇṇāsaka
Tatiyavagga
Asaññakathā
Asaññasattesu saññā atthīti?
Āmantā.
Saññābhavo saññāgati saññāsattāvāso saññāsaṁsāro saññāyoni saññattabhāvapaṭilābhoti?
Na hevaṁ vattabbe …pe….
Nanu asaññabhavo asaññagati asaññasattāvāso asaññasaṁsāro asaññayoni asaññattabhāvapaṭilābhoti?
Āmantā.
Hañci asaññabhavo asaññagati asaññasattāvāso asaññasaṁsāro asaññayoni asaññattabhāvapaṭilābho, no ca vata re vattabbe—
“asaññasattesu saññā atthī”ti.
Asaññasattesu saññā atthīti?
Āmantā.
Pañcavokārabhavo gati sattāvāso saṁsāro yoni attabhāvapaṭilābhoti?
Na hevaṁ vattabbe …pe…
Nanu ekavokārabhavo gati sattāvāso saṁsāro yoni attabhāvapaṭilābhoti?
Āmantā.
Hañci ekavokārabhavo gati sattāvāso saṁsāro yoni attabhāvapaṭilābho, no ca vata re vattabbe—
“asaññasattesu saññā atthī”ti.