atthi koci pubbe akusalaṁ pacchā kusalaṁ karotīti?
Na hevaṁ vattabbe …pe…
atthi koci pubbe sāsavaṁ …pe… saṅkilesiyaṁ pacchā asaṅkilesiyaṁ karotīti?
Na hevaṁ vattabbe …pe….
Labbhā tathāgatassa sāsanaṁ puna navaṁ kātunti?
Āmantā.
Labbhā satipaṭṭhānā puna navaṁ kātunti?
Na hevaṁ vattabbe …pe…
labbhā sammappadhānā …pe…
iddhipādā …pe…
indriyā …pe…
balā …pe…
bojjhaṅgā puna navaṁ kātunti?
Na hevaṁ vattabbe …pe…
labbhā pubbe akusalaṁ pacchā kusalaṁ kātunti?
Na hevaṁ vattabbe …pe…
labbhā pubbe sāsavaṁ …pe… saṅkilesiyaṁ pacchā asaṅkilesiyaṁ kātunti?
Na hevaṁ vattabbe …pe….
Sāsanakathā niṭṭhitā.
Kathāvatthu
Khuddakaaḍḍhapaṇṇāsaka
Ekavīsatimavagga
Avivittakathā
Puthujjano tedhātukehi dhammehi avivittoti?
Āmantā.
Puthujjano tedhātukehi phassehi …pe…
tedhātukāhi vedanāhi …
saññāhi …
cetanāhi …
cittehi …
saddhāhi …
vīriyehi …
satīhi …
samādhīhi …pe…
tedhātukāhi paññāhi avivittoti?
Na hevaṁ vattabbe …pe….
Puthujjano tedhātukehi kammehi avivittoti?
Āmantā.
Yasmiṁ khaṇe puthujjano cīvaraṁ deti, tasmiṁ khaṇe paṭhamaṁ jhānaṁ upasampajja viharati …pe…
ākāsānañcāyatanaṁ upasampajja viharatīti?
Na hevaṁ vattabbe …pe…
yasmiṁ khaṇe puthujjano piṇḍapātaṁ deti …pe…
senāsanaṁ deti …pe…
gilānapaccayabhesajjaparikkhāraṁ deti, tasmiṁ khaṇe catutthaṁ jhānaṁ upasampajja viharati …
nevasaññānāsaññāyatanaṁ upasampajja viharatīti?
Na hevaṁ vattabbe …pe….
Na vattabbaṁ—
“puthujjano tedhātukehi kammehi avivitto”ti?
Āmantā.
Puthujjanassa rūpadhātuarūpadhātūpagaṁ kammaṁ pariññātanti?
Na hevaṁ vattabbe.
Tena hi puthujjano tedhātukehi kammehi avivittoti …pe….
Avivittakathā niṭṭhitā.
Kathāvatthu
Mahāpaṇṇāsaka
Ekavīsatimavagga
Saṁyojanakathā
Atthi kiñci saṁyojanaṁ appahāya arahattappattīti?
Āmantā.
Atthi kiñci sakkāyadiṭṭhiṁ appahāya …pe…
vicikicchaṁ appahāya …pe…
sīlabbataparāmāsaṁ appahāya …
rāgaṁ appahāya …
dosaṁ appahāya …
mohaṁ appahāya …
anottappaṁ appahāya arahattappattīti?
Na hevaṁ vattabbe …pe….
Atthi kiñci saṁyojanaṁ appahāya arahattappattīti?
Āmantā.
Arahā sarāgo sadoso samoho samāno samakkho sapaḷāso saupāyāso sakilesoti?
Na hevaṁ vattabbe …pe…
nanu arahā nirāgo niddoso nimmoho nimmāno nimmakkho nippaḷāso nirupāyāso nikkilesoti?
Āmantā.
Hañci arahā nirāgo …pe…
nikkileso, no ca vata re vattabbe—
“atthi kiñci saṁyojanaṁ appahāya arahattappattī”ti.
Na vattabbaṁ—
“kiñci saṁyojanaṁ appahāya arahattappattī”ti?
Āmantā.
Arahā sabbaṁ buddhavisayaṁ jānātīti?
Na hevaṁ vattabbe.
Tena hi atthi kiñci saṁyojanaṁ appahāya arahattappattīti.
Saṁyojanakathā niṭṭhitā.
Kathāvatthu
Mahāpaṇṇāsaka
Ekavīsatimavagga
Iddhikathā
Atthi adhippāyaiddhi buddhānaṁ vā sāvakānaṁ vāti?
Āmantā.
“Niccapaṇṇā rukkhā hontū”ti—
atthi adhippāyaiddhi buddhānaṁ vā sāvakānaṁ vāti?
Na hevaṁ vattabbe …pe…
“niccapupphā rukkhā hontu …pe…
niccaphalikā rukkhā hontu …
niccaṁ juṇhaṁ hotu …
niccaṁ khemaṁ hotu …
niccaṁ subhikkhaṁ hotu …
niccaṁ suvatthi hotū”ti—
atthi adhippāyaiddhi buddhānaṁ vā sāvakānaṁ vāti?
Na hevaṁ vattabbe …pe….