Āmantā.
Nanu vuttaṁ bhagavatā—
“idha, bhikkhave, ekacco puggalo samannāgato hoti ekantakāḷakehi akusalehi dhammehi, so sakiṁ nimuggo nimuggova hotī”ti.
Attheva suttantoti?
Āmantā.
Tena hi atthi puthujjanassa accantaniyāmatāti.
Vuttaṁ bhagavatā—
“idha, bhikkhave, ekacco puggalo samannāgato hoti ekantakāḷakehi akusalehi dhammehi, so sakiṁ nimuggo nimuggova hotī”ti katvā tena ca kāraṇena atthi puthujjanassa accantaniyāmatāti?
Āmantā.
Vuttaṁ bhagavatā—
“idha, bhikkhave, ekacco puggalo ummujjitvā nimujjatī”ti.
Attheva suttantoti?
Āmantā.
Sabbakālaṁ ummujjitvā nimujjatīti?
Na hevaṁ vattabbe …pe….
Vuttaṁ bhagavatā—
“idha, bhikkhave, ekacco puggalo samannāgato hoti ekantakāḷakehi akusalehi dhammehi, so sakiṁ nimuggo nimuggova hotī”ti—
katvā tena ca kāraṇena atthi puthujjanassa accantaniyāmatāti?
Āmantā.
Vuttaṁ bhagavatā—
“idha, bhikkhave, ekacco puggalo ummujjitvā ṭhito hoti, ummujjitvā vipassati viloketi, ummujjitvā patarati, ummujjitvā patigādhappatto hotī”ti.
Attheva suttantoti?
Āmantā.
Sabbakālaṁ ummujjitvā patigādhappatto hotīti?
Na hevaṁ vattabbe …pe….
Accantaniyāmakathā niṭṭhitā.
Kathāvatthu
Mahāpaṇṇāsaka
Ekūnavīsatimavagga
Indriyakathā
Natthi lokiyaṁ saddhindriyanti?
Āmantā.
Natthi lokiyā saddhāti?
Na hevaṁ vattabbe …pe…
natthi lokiyaṁ vīriyindriyaṁ …pe…
satindriyaṁ …pe…
samādhindriyaṁ …pe…
paññindriyanti?
Āmantā.
Natthi lokiyā paññāti?
Na hevaṁ vattabbe …pe….
Atthi lokiyā saddhāti?
Āmantā.
Atthi lokiyaṁ saddhindriyanti?
Na hevaṁ vattabbe …pe…
atthi lokiyaṁ vīriyaṁ …pe…
sati …pe…
samādhi …pe…
paññāti?
Āmantā.
Atthi lokiyaṁ paññindriyanti?
Na hevaṁ vattabbe …pe….
Atthi lokiyo mano, atthi lokiyaṁ manindriyanti?
Āmantā.
Atthi lokiyā saddhā, atthi lokiyaṁ saddhindriyanti?
Na hevaṁ vattabbe …pe…
atthi lokiyo mano, atthi lokiyaṁ manindriyanti?
Āmantā.
Atthi lokiyā paññā, atthi lokiyaṁ paññindriyanti?
Na hevaṁ vattabbe …pe….
Atthi lokiyaṁ somanassaṁ, atthi lokiyaṁ somanassindriyaṁ …pe…
atthi lokiyaṁ jīvitaṁ, atthi lokiyaṁ jīvitindriyanti?
Āmantā.
Atthi lokiyā saddhā, atthi lokiyaṁ saddhindriyanti?
Na hevaṁ vattabbe …pe…
atthi lokiyaṁ jīvitaṁ, atthi lokiyaṁ jīvitindriyanti?
Āmantā.
Atthi lokiyā paññā, atthi lokiyaṁ paññindriyanti?
Na hevaṁ vattabbe …pe….
Atthi lokiyā saddhā, natthi lokiyaṁ saddhindriyanti?
Āmantā.
Atthi lokiyo mano, natthi lokiyaṁ manindriyanti?
Na hevaṁ vattabbe …pe…
atthi lokiyā paññā, natthi lokiyaṁ paññindriyanti?
Āmantā.
Atthi lokiyo mano, natthi lokiyaṁ manindriyanti?
Na hevaṁ vattabbe …pe….
Atthi lokiyā saddhā, natthi lokiyaṁ saddhindriyanti?
Āmantā.
Atthi lokiyaṁ somanassaṁ, natthi lokiyaṁ somanassindriyanti …
atthi lokiyaṁ jīvitaṁ, natthi lokiyaṁ jīvitindriyanti?
Na hevaṁ vattabbe …pe…
atthi lokiyā paññā, natthi lokiyaṁ paññindriyanti?
Āmantā.
Atthi lokiyo mano, natthi lokiyaṁ manindriyanti …pe…
atthi lokiyaṁ jīvitaṁ, natthi lokiyaṁ jīvitindriyanti?
Na hevaṁ vattabbe …pe….
Atthi lokuttarā saddhā, atthi lokuttaraṁ saddhindriyanti?
Āmantā.
Atthi lokiyā saddhā, atthi lokiyaṁ saddhindriyanti?
Na hevaṁ vattabbe …pe…
atthi lokuttaraṁ vīriyaṁ …pe…
atthi lokuttarā paññā, atthi lokuttaraṁ paññindriyanti?
Āmantā.
Atthi lokiyā paññā, atthi lokiyaṁ paññindriyanti?
Na hevaṁ vattabbe …pe….
Atthi lokiyā saddhā, natthi lokiyaṁ saddhindriyanti?
Āmantā.
Atthi lokuttarā saddhā, natthi lokuttaraṁ saddhindriyanti?
Na hevaṁ vattabbe …pe…