patti asaṅkhatāti?
Āmantā.
Patti rūpaṁ …
vedanā …
saññā …
saṅkhārā …
viññāṇanti?
Na hevaṁ vattabbe.
Tena hi patti asaṅkhatāti.
Pattikathā niṭṭhitā.
Kathāvatthu
Mahāpaṇṇāsaka
Ekūnavīsatimavagga
Tathatākathā
Sabbadhammānaṁ tathatā asaṅkhatāti?
Āmantā.
Nibbānaṁ …pe…
amatanti?
Na hevaṁ vattabbe …pe…
sabbadhammānaṁ tathatā asaṅkhatā, nibbānaṁ asaṅkhatanti?
Āmantā.
Dve asaṅkhatānīti?
Na hevaṁ vattabbe …pe…
dve asaṅkhatānīti?
Āmantā.
Dve tāṇāni …pe…
antarikā vāti?
Na hevaṁ vattabbe …pe….
Rūpassa rūpatā, nanu rūpatā asaṅkhatāti?
Āmantā.
Nibbānaṁ …pe…
amatanti?
Na hevaṁ vattabbe …pe…
rūpassa rūpatā, nanu rūpatā asaṅkhatā, nibbānaṁ asaṅkhatanti?
Āmantā.
Dve asaṅkhatānīti?
Na hevaṁ vattabbe …pe…
dve asaṅkhatānīti?
Āmantā.
Dve tāṇāni …pe…
antarikā vāti?
Na hevaṁ vattabbe …pe….
Vedanāya vedanatā, nanu vedanatā …pe…
saññāya saññatā, nanu saññatā …pe…
saṅkhārānaṁ saṅkhāratā, nanu saṅkhāratā …pe…
viññāṇassa viññāṇatā, nanu viññāṇatā asaṅkhatāti?
Āmantā.
Nibbānaṁ …pe…
amatanti?
Na hevaṁ vattabbe …pe….
Rūpassa rūpatā, nanu rūpatā …pe…
viññāṇassa viññāṇatā, nanu viññāṇatā asaṅkhatā, nibbānaṁ asaṅkhatanti?
Āmantā.
Cha asaṅkhatānīti?
Na hevaṁ vattabbe …pe…
cha asaṅkhatānīti?
Āmantā.
Cha tāṇāni …pe…
antarikā vāti?
Na hevaṁ vattabbe …pe….
Na vattabbaṁ—
“sabbadhammānaṁ tathatā asaṅkhatā”ti?
Āmantā.
Sabbadhammānaṁ tathatā rūpaṁ …
vedanā …
saññā …
saṅkhārā …
viññāṇanti?
Na hevaṁ vattabbe.
Tena hi sabbadhammānaṁ tathatā asaṅkhatāti.
Tathatākathā niṭṭhitā.
Kathāvatthu
Mahāpaṇṇāsaka
Ekūnavīsatimavagga
Kusalakathā
Nibbānadhātu kusalāti?
Āmantā.
Sārammaṇā, atthi tāya āvaṭṭanā …pe… paṇidhīti?
Na hevaṁ vattabbe …pe…
nanu anārammaṇā, natthi tāya āvaṭṭanā …pe… paṇidhīti?
Āmantā.
Hañci anārammaṇā, natthi tāya āvaṭṭanā …pe… paṇidhi, no ca vata re vattabbe—
“nibbānadhātu kusalā”ti.
Alobho kusalo sārammaṇo, atthi tassa āvaṭṭanā …pe… paṇidhīti?
Āmantā.
Nibbānadhātu kusalā sārammaṇā, atthi tāya āvaṭṭanā …pe… paṇidhīti?
Na hevaṁ vattabbe …pe…
adoso kusalo …pe…
amoho kusalo …pe…
saddhā …
vīriyaṁ …
sati …
samādhi …pe…
paññā kusalā sārammaṇā, atthi tāya āvaṭṭanā …pe… paṇidhīti?
Āmantā.
Nibbānadhātu kusalā sārammaṇā, atthi tāya āvaṭṭanā …pe… paṇidhīti?
Na hevaṁ vattabbe …pe….
Nibbānadhātu kusalā anārammaṇā, natthi tāya āvaṭṭanā …pe… paṇidhīti?
Āmantā.
Alobho kusalo anārammaṇo, natthi tassa āvaṭṭanā …pe… paṇidhīti?