Natthi buddhassa bhagavato muditā …pe…
upekkhāti?
Na hevaṁ vattabbe …pe….
Atthi buddhassa bhagavato mettāti?
Āmantā.
Atthi buddhassa bhagavato karuṇāti?
Na hevaṁ vattabbe …pe…
atthi buddhassa bhagavato muditā …pe…
upekkhāti?
Āmantā.
Atthi buddhassa bhagavato karuṇāti?
Na hevaṁ vattabbe …pe….
Natthi buddhassa bhagavato karuṇāti?
Āmantā.
Bhagavā akāruṇikoti?
Na hevaṁ vattabbe …pe…
nanu bhagavā kāruṇiko lokahito lokānukampako lokatthacaroti?
Āmantā.
Hañci bhagavā kāruṇiko lokahito lokānukampako lokatthacaro, no ca vata re vattabbe—
“natthi buddhassa bhagavato karuṇā”ti …pe….
Natthi buddhassa bhagavato karuṇāti?
Āmantā.
Nanu bhagavā mahākaruṇāsamāpattiṁ samāpajjīti?
Āmantā.
Hañci bhagavā mahākaruṇāsamāpattiṁ samāpajji, no ca vata re vattabbe—
“natthi buddhassa bhagavato karuṇā”ti.
Atthi buddhassa bhagavato karuṇāti?
Āmantā.
Bhagavā sarāgoti?
Na hevaṁ vattabbe.
Tena hi natthi buddhassa bhagavato karuṇāti.
Karuṇākathā niṭṭhitā.
Kathāvatthu
Mahāpaṇṇāsaka
Aṭṭhārasamavagga
Gandhajātikathā
Buddhassa bhagavato uccārapassāvo ativiya aññe gandhajāte adhiggaṇhātīti?
Āmantā.
Bhagavā gandhabhojīti?
Na hevaṁ vattabbe …pe…
nanu bhagavā odanakummāsaṁ bhuñjatīti?
Āmantā.
Hañci bhagavā odanakummāsaṁ bhuñjati, no ca vata re vattabbe—
“buddhassa bhagavato uccārapassāvo ativiya aññe gandhajāte adhiggaṇhātī”ti.
Buddhassa bhagavato uccārapassāvo ativiya aññe gandhajāte adhiggaṇhātīti?
Āmantā.
Atthi keci buddhassa bhagavato uccārapassāvaṁ nhāyanti vilimpanti ucchādenti peḷāya paṭisāmenti karaṇḍāya nikkhipanti āpaṇe pasārenti, tena ca gandhena gandhakaraṇīyaṁ karontīti?
Na hevaṁ vattabbe …pe….
Gandhajātikathā niṭṭhitā.
Kathāvatthu
Mahāpaṇṇāsaka
Aṭṭhārasamavagga
Ekamaggakathā
Ekena ariyamaggena cattāri sāmaññaphalāni sacchikarotīti?
Āmantā.
Catunnaṁ phassānaṁ …pe…
catunnaṁ saññānaṁ samodhānaṁ hotīti?
Na hevaṁ vattabbe …pe…
ekena ariyamaggena cattāri sāmaññaphalāni sacchikarotīti?
Āmantā.
Sotāpattimaggenāti?
Na hevaṁ vattabbe …pe…
sakadāgāmi …pe…
anāgāmimaggenāti?
Na hevaṁ vattabbe …pe….
Katamena maggenāti?
Arahattamaggenāti.
Arahattamaggena sakkāyadiṭṭhiṁ vicikicchaṁ sīlabbataparāmāsaṁ jahatīti?
Na hevaṁ vattabbe …pe…
arahattamaggena sakkāyadiṭṭhiṁ vicikicchaṁ sīlabbataparāmāsaṁ jahatīti?
Āmantā.
Nanu tiṇṇaṁ saṁyojanānaṁ pahānaṁ sotāpattiphalaṁ vuttaṁ bhagavatāti?
Āmantā.
Hañci tiṇṇaṁ saṁyojanānaṁ pahānaṁ sotāpattiphalaṁ vuttaṁ bhagavatā, no ca vata re vattabbe—
“arahattamaggena sakkāyadiṭṭhiṁ vicikicchaṁ sīlabbataparāmāsaṁ jahatī”ti.
Arahattamaggena oḷārikaṁ kāmarāgaṁ oḷārikaṁ byāpādaṁ jahatīti?
Na hevaṁ vattabbe …pe…
arahattamaggena oḷārikaṁ kāmarāgaṁ oḷārikaṁ byāpādaṁ jahatīti?
Āmantā.
Nanu kāmarāgabyāpādānaṁ tanubhāvaṁ sakadāgāmiphalaṁ vuttaṁ bhagavatāti?
Āmantā.
Hañci kāmarāgabyāpādānaṁ tanubhāvaṁ sakadāgāmiphalaṁ vuttaṁ bhagavatā, no ca vata re vattabbe—
“arahattamaggena oḷārikaṁ kāmarāgaṁ oḷārikaṁ byāpādaṁ jahatī”ti.
Arahattamaggena aṇusahagataṁ kāmarāgaṁ aṇusahagataṁ byāpādaṁ jahatīti?
Na hevaṁ vattabbe …pe…
arahattamaggena aṇusahagataṁ kāmarāgaṁ aṇusahagataṁ byāpādaṁ jahatīti?
Āmantā.
Nanu kāmarāgabyāpādānaṁ anavasesappahānaṁ anāgāmiphalaṁ vuttaṁ bhagavatāti?
Āmantā.
Hañci kāmarāgabyāpādānaṁ anavasesappahānaṁ anāgāmiphalaṁ vuttaṁ bhagavatā, no ca vata re vattabbe—
“arahattamaggena aṇusahagataṁ kāmarāgaṁ aṇusahagataṁ byāpādaṁ jahatī”ti.
Na vattabbaṁ—
“ekena ariyamaggena cattāri sāmaññaphalāni sacchikarotī”ti?
Āmantā.
Bhagavatā sotāpattimaggo bhāvitoti?
Āmantā.
Bhagavā sotāpannoti?
Na hevaṁ vattabbe …pe…
bhagavatā sakadāgāmi …pe…
anāgāmimaggo bhāvitoti?