natthi arahato akālamaccu,
sabbamidaṁ kammato,
indriyabaddhaññeva dukkhaṁ,
ṭhapetvā ariyamaggaṁ avasesā saṅkhārā dukkhā,
saṅgho dakkhiṇaṁ paṭiggaṇhāti,
saṅgho dakkhiṇaṁ visodheti,
saṅgho bhuñjati pivati khādati sāyati,
saṅghassa dinnaṁ mahapphalaṁ,
atthi dānaṁ visuddhiyāti.
Kathāvatthu
Niggahapaṇṇāsaka
Aṭṭhārasamavagga
Manussalokakathā
Na vattabbaṁ—
“buddho bhagavā manussaloke aṭṭhāsī”ti?
Āmantā.
Nanu atthi buddhavutthāni cetiyāni ārāmavihāragāmanigamanagarāni raṭṭhāni janapadānīti?
Āmantā.
Hañci atthi buddhavutthāni cetiyāni ārāmavihāragāmanigamanagarāni raṭṭhāni janapadāni, tena vata re vattabbe—
“buddho bhagavā manussaloke aṭṭhāsī”ti.
Na vattabbaṁ—
“buddho bhagavā manussaloke aṭṭhāsī”ti?
Āmantā.
Nanu bhagavā lumbiniyā jāto, bodhiyā mūle abhisambuddho, bārāṇasiyaṁ bhagavatā dhammacakkaṁ pavattitaṁ, cāpāle cetiye āyusaṅkhāro ossaṭṭho, kusinārāyaṁ bhagavā parinibbutoti?
Āmantā.
Hañci bhagavā lumbiniyā jāto …pe… kusinārāyaṁ bhagavā parinibbuto, tena vata re vattabbe—
“buddho bhagavā manussaloke aṭṭhāsī”ti.
Na vattabbaṁ—
“buddho bhagavā manussaloke aṭṭhāsī”ti?
Āmantā.
Nanu vuttaṁ bhagavatā—
“ekamidāhaṁ, bhikkhave, samayaṁ ukkaṭṭhāyaṁ viharāmi subhagavane sālarājamūle”ti;
“ekamidāhaṁ, bhikkhave, samayaṁ uruvelāyaṁ viharāmi ajapālanigrodhe paṭhamābhisambuddho”ti;
“ekamidāhaṁ, bhikkhave, samayaṁ rājagahe viharāmi veḷuvane kalandakanivāpe”ti;
“ekamidāhaṁ, bhikkhave, samayaṁ sāvatthiyaṁ viharāmi jetavane anāthapiṇḍikassa ārāme”ti;
“ekamidāhaṁ, bhikkhave, samayaṁ vesāliyaṁ viharāmi mahāvane kūṭāgārasālāyan”ti.
Attheva suttantoti?
Āmantā.
Tena hi buddho bhagavā manussaloke aṭṭhāsīti.
Buddho bhagavā manussaloke aṭṭhāsīti?
Āmantā.
Nanu bhagavā loke jāto, loke saṁvaḍḍho, lokaṁ abhibhuyya viharati anupalitto lokenāti?
Āmantā.
Hañci bhagavā loke jāto, loke saṁvaḍḍho, lokaṁ abhibhuyya viharati anupalitto lokena, no ca vata re vattabbe—
“buddho bhagavā manussaloke aṭṭhāsī”ti.
Manussalokakathā niṭṭhitā.
Kathāvatthu
Mahāpaṇṇāsaka
Aṭṭhārasamavagga
Dhammadesanākathā
Na vattabbaṁ—
“buddhena bhagavatā dhammo desito”ti?
Āmantā.
Kena desitoti?
Abhinimmitena desitoti.
Abhinimmito jino satthā sammāsambuddho sabbaññū sabbadassāvī dhammassāmī dhammappaṭisaraṇoti?
Na hevaṁ vattabbe …pe….
Na vattabbaṁ—
“buddhena bhagavatā dhammo desito”ti?
Āmantā.
Kena desitoti?
Āyasmatā ānandena desitoti.
Āyasmā ānando jino satthā sammāsambuddho sabbaññū sabbadassāvī dhammassāmī dhammappaṭisaraṇoti?
Na hevaṁ vattabbe …pe….
Na vattabbaṁ—
“buddhena bhagavatā dhammo desito”ti?
Āmantā.
Nanu vuttaṁ bhagavatā—
“saṅkhittenapi kho ahaṁ, sāriputta, dhammaṁ deseyyaṁ;
vitthārenapi kho ahaṁ, sāriputta, dhammaṁ deseyyaṁ;
saṅkhittavitthārenapi kho ahaṁ, sāriputta, dhammaṁ deseyyaṁ;
aññātāro ca dullabhā”ti.
Attheva suttantoti?
Āmantā.
Tena hi buddhena bhagavatā dhammo desitoti.
Na vattabbaṁ—
“buddhena bhagavatā dhammo desito”ti?
Āmantā.
Nanu vuttaṁ bhagavatā—
“‘abhiññāyāhaṁ, bhikkhave, dhammaṁ desemi, no anabhiññāya;
sanidānāhaṁ, bhikkhave, dhammaṁ desemi, no anidānaṁ;
sappāṭihāriyāhaṁ, bhikkhave, dhammaṁ desemi, no appāṭihāriyaṁ;
tassa mayhaṁ, bhikkhave, abhiññāya dhammaṁ desayato no anabhiññāya, sanidānaṁ dhammaṁ desayato no anidānaṁ, sappāṭihāriyaṁ dhammaṁ desayato no appāṭihāriyaṁ karaṇīyo ovādo karaṇīyā anusāsanī;
alañca pana vo, bhikkhave, tuṭṭhiyā alaṁ attamanatāya alaṁ somanassāya—
sammāsambuddho bhagavā, svākkhāto dhammo, suppaṭipanno saṅgho’ti.
Imasmiñca pana veyyākaraṇasmiṁ bhaññamāne dasasahassilokadhātu akampitthā”ti.
Attheva suttantoti?
Āmantā.
Tena hi buddhena bhagavatā dhammo desitoti.
Dhammadesanākathā niṭṭhitā.
Kathāvatthu
Mahāpaṇṇāsaka
Aṭṭhārasamavagga
Karuṇākathā
Natthi buddhassa bhagavato karuṇāti?
Āmantā.
Natthi buddhassa bhagavato mettāti?
Na hevaṁ vattabbe …pe…
natthi buddhassa bhagavato karuṇāti?
Āmantā.