Nanu cattāro purisayugā aṭṭha purisapuggalā dakkhiṇeyyā vuttā bhagavatāti?
Āmantā.
Hañci cattāro purisayugā aṭṭha purisapuggalā dakkhiṇeyyā vuttā bhagavatā, tena vata re vattabbe—
“saṅgho dakkhiṇaṁ visodhetī”ti.
Na vattabbaṁ—
“saṅgho dakkhiṇaṁ visodhetī”ti?
Āmantā.
Nanu atthi keci saṅghassa dānaṁ datvā dakkhiṇaṁ ārādhentīti?
Āmantā.
Hañci atthi keci saṅghassa dānaṁ datvā dakkhiṇaṁ ārādhenti, tena vata re vattabbe—
“saṅgho dakkhiṇaṁ visodhetī”ti.
Nanu atthi keci saṅghassa cīvaraṁ datvā …pe…
piṇḍapātaṁ datvā …pe…
senāsanaṁ datvā …
gilānapaccayabhesajjaparikkhāraṁ datvā …
khādanīyaṁ datvā …
bhojanīyaṁ datvā …pe…
pānīyaṁ datvā dakkhiṇaṁ ārādhentīti?
Āmantā.
Hañci atthi keci saṅghassa pānīyaṁ datvā dakkhiṇaṁ ārādhenti, tena vata re vattabbe—
“saṅgho dakkhiṇaṁ visodhetī”ti.
Saṅgho dakkhiṇaṁ visodhetīti?
Āmantā.
Maggo visodheti, phalaṁ visodhetīti?
Na hevaṁ vattabbe …pe….
Na vattabbaṁ saṅgho dakkhiṇaṁ visodhetītikathā niṭṭhitā.
Kathāvatthu
Mahāpaṇṇāsaka
Sattarasamavagga
Navattabbaṁsaṅghobhuñjatītikathā
Na vattabbaṁ—
“saṅgho bhuñjati pivati khādati sāyatī”ti?
Āmantā.
Nanu atthi keci saṅghabhattāni karonti, uddesabhattāni karonti, yāgupānāni karontīti?
Āmantā.
Hañci atthi keci saṅghabhattāni karonti, uddesabhattāni karonti, yāgupānāni karonti, tena vata re vattabbe—
“saṅgho bhuñjati pivati khādati sāyatī”ti.
Na vattabbaṁ—
“saṅgho bhuñjati pivati khādati sāyatī”ti?
Āmantā.
Nanu vuttaṁ bhagavatā—
“gaṇabhojanaṁ paramparabhojanaṁ atirittabhojanaṁ anatirittabhojanan”ti?
Āmantā.
Hañci vuttaṁ bhagavatā—
“gaṇabhojanaṁ paramparabhojanaṁ atirittabhojanaṁ anatirittabhojanaṁ”, tena vata re vattabbe—
“saṅgho bhuñjati pivati khādati sāyatī”ti.
Na vattabbaṁ—
“saṅgho bhuñjati pivati khādati sāyatī”ti?
Āmantā.
Nanu aṭṭha pānāni vuttāni bhagavatā—
ambapānaṁ, jambupānaṁ, cocapānaṁ, mocapānaṁ, madhukapānaṁ, muddikapānaṁ, sālukapānaṁ, phārusakapānanti?
Āmantā.
Hañci aṭṭha pānāni vuttāni bhagavatā—
ambapānaṁ, jambupānaṁ, cocapānaṁ, mocapānaṁ, madhukapānaṁ, muddikapānaṁ, sālukapānaṁ, phārusakapānaṁ, tena vata re vattabbe—
“saṅgho bhuñjati pivati khādati sāyatī”ti.
Saṅgho bhuñjati pivati khādati sāyatīti?
Āmantā.
Maggo bhuñjati pivati khādati sāyati, phalaṁ bhuñjati pivati khādati sāyatīti?
Na hevaṁ vattabbe …pe….
Na vattabbaṁ saṅgho bhuñjatītikathā niṭṭhitā.
Kathāvatthu
Mahāpaṇṇāsaka
Sattarasamavagga
Navattabbaṁsaṅghassadinnaṁmahapphalantikathā
Na vattabbaṁ—
“saṅghassa dinnaṁ mahapphalan”ti?
Āmantā.
Nanu saṅgho āhuneyyo pāhuneyyo dakkhiṇeyyo añjalikaraṇīyo anuttaraṁ puññakkhettaṁ lokassāti?
Āmantā.
Hañci saṅgho āhuneyyo …pe… anuttaraṁ puññakkhettaṁ lokassa, tena vata re vattabbe—
“saṅghassa dinnaṁ mahapphalan”ti.
Na vattabbaṁ—
“saṅghassa dinnaṁ mahapphalan”ti?
Āmantā.
Nanu cattāro purisayugā aṭṭha purisapuggalā dakkhiṇeyyā vuttā bhagavatāti?
Āmantā.
Hañci cattāro purisayugā aṭṭha purisapuggalā dakkhiṇeyyā vuttā bhagavatā, tena vata re vattabbe—
“saṅghassa dinnaṁ mahapphalan”ti.
Na vattabbaṁ—
“saṅghassa dinnaṁ mahapphalan”ti?
Āmantā.
Nanu vuttaṁ bhagavatā—
“saṅghe, gotami, dehi, saṅghe te dinne ahañceva pūjito bhavissāmi saṅgho cā”ti.
Attheva suttantoti?
Āmantā.
Tena hi saṅghassa dinnaṁ mahapphalanti.
Na vattabbaṁ—
“saṅghassa dinnaṁ mahapphalan”ti?
Āmantā.
Nanu sakko devānamindo bhagavantaṁ etadavoca—
“Yajamānānaṁ manussānaṁ,
puññapekkhāna pāṇinaṁ;
Karotaṁ opadhikaṁ puññaṁ,
kattha dinnaṁ mahapphalan”ti.
“Cattāro ca paṭipannā,
cattāro ca phale ṭhitā;
Esa saṅgho ujubhūto,
paññāsīlasamāhito.
Yajamānānaṁ manussānaṁ,
puññapekkhāna pāṇinaṁ;